 |
رواية بيت الخبازه الجزء الثاني الفصل السابع والعشرون بقلم زهرة الرمان
استبرق
شنو إني
عقيل
أمي الله يرحمها ببداية زواج خالي موفق من والدتج
تحمد بيج
ورشحتج لياسر اصغر الإخوان
بيها رفضتوا انتم
إني جنت أكول اكره مره تتزوج رجال متزوج احسها تستغله
وعذراً ضروف امج شلون قبلت أن تاخذها خاله انعام لزوجها علمود الاطفال كلت يعني شنو الضرف إلي يخلي إنسان يبيع نفسه وهذا الكلام إني جنت خاطب كوثر
أبدا مافكرت اجي يعد زواج خالو موفق
بس
من أمي سولفت ماتت والدتج وشون أنتي داريتي خاله انعام
تصوري هم كلت طمعانه بفلوسهم وتموت خاله انعام وكلمن يشوف طريقه
رب العالمين راد يوضح حقيقة البشر
مرض خالي موفق وإني اكول هاي تتصرف برياء
بنفس الوقت اراقبج بدون نوايا سيئه اراقبج لأن بكل مره اسأل معقول الفلوس تجبرها تبقى هيج
إلى أن قررنه نبقى كل واحد منه ساعتين يم خالي موفق
سمعت شون بگلبج حب لخالي موفق
شلون تخافين عليه
شكلج بعيد تماماً عن احساسج وگلبج
سمعت بدون قصد تسولفين ل بنت عمج
شفت لأ طماعه بينما عشتي حسب تعبيرج ايام سوده فقد وتعب وتشتغلين تساعدين امج وعمامج كلشي سمعت بنفس الوقت أنتي سمعتي عن حياتنا هذا التلفوات خطره تخلي ماكو أسرار بالبيوت
مع الأسف إني ما شفت زوجه توكف لجانبي وتساعدني وتساندني جانت دوم باستهزاء وتضحك إذا اكول عندي كذا مشروع او عمل تستصغرني
وأكثر وأكثر مما تتصورين مع ذلك جنت اكول المراه تنكسر بالطلاك وخطيه
بس كلما اجي هنا أحس بأمان بكلامج اكو مغناطيس يرجعني هنا
جنت اغشم نفسي بالبداية واكول وهم واضغط على نفسي وما اجي
مجنت أعرف بعض البعد يزيد الاشتياق
إني احجي هواية بس كلام عاطفي ماعرفله لهذا اكلج أنتي سبب اختفائي لأن زواجي مو أول مرة وأعرف مراح نستمر
بس اختفي منج وارجع لهنا من اوصل للباب يلا انتبه إني شجاي اسوي اقطع عهد ما اجي هنا واشوف كل الشوارع تأخذني لشارع بيتكم
ف يااا استبرق إني حجيت لبگلبي اتجاهج جان اعجاب واطور واطور بس بسرعه أكثر مما اتصور وهذا إني كدامج اكلج حبيتج
استبرق
هو مسترسل يحجي وإني ساكته تماما بدون ما اقاطعه
عقيل
هاا استبرق شو ساكته
استبرق
ما الومك إذا بالبداية صار عندك شك او ريبه منه
وما امنع مشاعرك
بس حبك اليه شي بعيد عني بصراحه
عقيل
ليش
استبرق
مخليه ابهام يفر بابهام ومتوتره
لأن إني عندي إخواني وعمو موفق مسؤوليتهم ما تخليلي وقت للزواج
من جهه والجهه الثانية أنت طلكت كوثر بت ام ياس
وام ياس بدون كلشي من يوم الدخلنه لهذا البيت ما اطيقني أنوب اتزوج زوج بتها
فك مني عقيل
عقيل
شنو زوج بتها طلكتها وكلمن راح لحاله
استبرق
هاي بنضرك بس إني عاشرت ام ياس وأعرف شلون تفكر ما عايزه مشاكل إني
بعده يريد يسولف ويجاوب وكعد عمو موفق
وانشغلت بيه
عقيل راح اروح فكري وارجع اسمع الرد
استبرق
بقيت يومين الموضوع براسي
خايرت فطومه
فطومه
بس شكو بيها يعني هو حبج وهم ابن اخت سيد موفق إني أكول فرصة
استبرق
ليش فرصة
جاي تفهمين ام زوجته مره تحب للمشاكل أصلا هي خربت بيت بتهه وجانت اسمعها قبل شلون تنخر رأس خاله انعام ماتحب أمي ولا تحبني هاي كل السنين وهي تحقد عليه وما انسالها من هددت أمي
والله لو عمو موفق بذاك حيله ميقبل
متعرفين شكد احنه غاليين عد عمو موفق
راحت فطومه وإني زاد التفكير ما قل
شيرين
اليوم مامركزه كلش
استبرق
هاا ليش
شيرين
جاي اكلج صفا صفا اليوم الحنه مال حماتها تروحين
استبرق
هااا لا بعدين اروح وادز هديه ماكدر اعيف البيت
شيرين
شنو المخليج هيج صفنه تاخذج وصفنه تجيبج ؟
استبرق
سولفت الها عن عقيل
شيرين
لا تخلين عمرج يروح وأنتي تباوعين صحيح لازم تراعين السيد واخوانج
بس لازم تأسسين عائله واطفال عاجبج حالي
مهما ضحيتي بالآخر هبه تتزوج وعلي يتزوج وطول العمر للسيد بس تبقين مثلي وحيده
استبرق
رأي صفا نفس كلام شيرين وفطومه
بيني وبين نفسي اكول ليش لا
كعدت اسولف وي عمو موفق
أكثر جوابه هاا بيومها جان ممركز نهائي
عشر ايام واجه عقيل
حلق لعمو وسبحه وبدل ملابسه
اجه للمطبخ
عقيل
ها استبرق فكرتي
استبرق
ماعرف عقيل متردده
عقيل
اتركي كلشي وإني اتصرف مجرد بس كولي انطيك فرصة كدامنه خطوبه وبعدين تحكمين
ورا كم يوم اتصلت ام يزن
ام يزن
والله گلبي جان حاس عقيل عيونه منج بس ما جنت اعرف هيج يستعجل بكل الأحوال ثنينكم تستاهلون كل الخير
البارحه عقيل حجه وي رضا وياسين وقريباً نجي
بضحكه
استبرق
بقينه نسولف إني وام يزن
وصفا عرفت وفرحت
حددو وقت يجون لعمو موفق وبعدين يرحون لعمامي
جاي نحضر للمدرسه اشتريت ملابس لهبه وعلي وجنط وفارشين المشترينه بالكاع
عمو موفق يمنه بس يباوع
وشيرين يمي
واندك الباب
هبه فتحت الباب
وإني كاعده انسحل شعري من ورا ضرب متواصل على رأسي
اريد اشوف منو
بس صريخ كوثر
بواكه الزلم
كوثر وياها وحده من اخواتها گطعت شعري وتعوص خربتي بيتي تردين تاخذين عقيل
كمشتها شيرين وعمو بقى يحجي والاحرف تگطع
وبقن يغلطن
عدلت ربطتي ووكفت
لج يا ما تستحين
جايه عليه روحي لامج وراجعي نفسج إنتي خربتي بيتج بيدج مو جايه عليه
بيج خير جان حفظتي بيتج يلا ولي برا طابحه الحظ اسويج وصله مسح بس بختج بعمو موفق إلي اخذته للغرفه وخليت هبه وعلي يسولفون وياه شيرين ما قبلت تسكت
وياي
كوثر
امج اخذت بيت خالتي ومكانها وانتي
اخذتي بيت خالتي وحلالها وهسه لاحكتني على زوجي تموتن على فضايل الناس جربه فگر هسه بجال بيت خالتي نضفتي جنتي جربه مسلوعه
وجايه تاخذين زوجي إني لحمي مرر
استبرق
اصحي يازوج وج طلگج ثلاث مرات مل منج ومن امج خل امج تفيدج
وديري بالج تجيبين سيره أمي على لسانج اطهر وأنقى انسانه روحي راجعي نفسج
اختها نفس اللسان انواع الاتهامات حجت. كلام ماينلبس عليه ثوب
دفعتهن شيرين وطردتهن
صرت ارجف
الوو
عقيل
أهلا استبرق
استبرق
هسه اريد تجي إذا ممكن
شيرين
عزا العزاها شكد من وصفتي تصرفها بالمطعم مجنت اتخيل هيج رعنه
استبرق
لاتعيفي عمو شيرين اريد احجي وي عقيل عيوني أنتي
شفته اجه مد ايده فتح قفل الباب الخارجي
دخل ووجه مرتاح ومبتسم
عقيل
كون يطور العلم ويخترعون طياره وي كلمه تعال تلاكيني يمج
استبرق
لأ والله إني ادعي اكو اختراع ينظف العقول المتحجره إلي مثل عقل كوثر
عقيل
خيررر استبرق
استبرق
ماكدر احجي هواية عقيل إني مااا أصلح زوجه الك
عقيل
شنو نلعب شلموضوع ام ياس اجت
استبرق
معناها تعرف نمونه ام طليقتك شنو بس بتها تفوقت على امها
شوف يبن الناس تلغي روحتك لبيت عمامي لولايتنه
عقيل.
هاااي مو طريقه كلام فهميني اترجاج تنهين كلشي بدون ما اعرف
استبرق
شكلك مثلا اجت كوثر واختها وملختني وضربتني وسمعتني كلام مثل السم
التشوفها كدامك تره ميته من تعب وضيم مو مرتاحه وحبني واحبك ذني مو بحساباتي إني عليه بواقع حياتك واشكالاتها ما اكدر اواجهن عندي اليكفيني من الهموم عندي هم ماينلم اخوان اريد اوصلهم للدنيا وهذا خالك شكد انتم تحبونه وهو صاحب فضل ع الناس بس بامانتي
من توصي العلويه وتكلي ديري بالج على السيد معناها رساله من رب العالمين
مااا أكدر اجازف بزواج وراه ألف مصيبه ومشكله
عقيل
إلا..
استبرق
قاطعته
لأ اله ولا عله اترجاك خلي مشاكلك بعيده عني ماااتزوجك لو أنت تصير بعد يكولون تنجبين منه نبي اترجاك خلينه نحافظ على صله القرابه إلي تربطنه
إلي هي خالك
وأنت شون تريد عيش بس بعيد عني
طلع وركع الباب خانتني الدموع بچيت لما مليت هذا حضي
لو سيف إلي انطيت فرصة لگلبي
اله وراه جانت ايمان وحامد وانوب هج وضرفي خلاه يبتعد
وهسه هذا من استلطفت وجوده بحياتي هذا الحصلته منه
يمه إني تأكدت التشوهات الصارت بجسمي اهون بهواي من تشوهات حياتي
خابرت ام يزن
تسولف عن عقيل وشلون متعارك وياهم سكتتها
اترجاج انسد الموضوع ماريده بعد ينفتح
ماريد ينذكر
بديت اركز على إخواني سديت يابي حت من يجيون صار من كرايب عمو أخلي شيرين يم عمو موفق ومن وحده إني اتواجد يمه كرهت احتكاكي بيهم
ما اشوف احد بده الدوام وشهرين الأولى وهبه متفوقه انطوها شريط فارسه الصف وإني افرح بكل خطوه اتقدم وياهم
عمو النسيان قل عنده فقط مشاكل النطق تعرقله
بس ينسى من يتعب او يتذكر اشياء تضوجه مثل موت أمي او موت خاله انعام او اخته
صار يلح على رامي لأن رامي بده يتواصل وياه يريده يرجع
وصار يوم 1/1/2018
وجان متذكره كلش وفرش ربطتها وعدها اشياء
صار يقرأ شعر
انا بخير رضوض في المشاعر ..وكسرآ في الخاطر ..وبعض خدوشآ علي الذاكره ... يقول الطبيب.. لا شي مميت خلع في الروح فقط.
وقمة البؤس ان تبكيك ذاكرة
بمنزل كنت دوما فيه تبتسم
اعلل النفس عل العين تلمحهم
والنفس تدري يقينا انهم رحلوا
مازال عهدي وثيقة في محبتهم
ولن يواريه في داخلي بدل
لا تعذلوا العين ان فاضت مدامعها
ان الفراق على من ذاقه جلل
يفتر بالبيت ويرثي خاله انعام
بس ماكدرنه نروح للمقبره بارده جانت وأخاف عليه وتحججت إني مريضه وهبه وعلي عدهم امتحانات
اجت صفا وقشعم حسيت جيتهم بالوقت المناسب
كاعد بيده كتاب عمو موفق منتظر شيرين تقراله
دخلت صفا
وتميم حيل يحب عمو موفق متعلق بيه
خلاه بحضنه ويسواي بوجهه حركات لتميم وتميم يضحك حيل اويهزه برجله
ومن تقرا شيرين عمو يعيط جررر يجرج ويجر الدنيا حرف الجرا بااكسره مو ضم
صفا
عموو استبرق
عندي خبر
استبرق
خير
صفا
إني حامل
استبرق
مبروك
موفق
ألف مبروك بس مو كلنه نكمل كليتنا
استبرق
حسيت ناسي
تلافيت الأمر
وحجت شيرين
شيرين
كملت السنه هيج وهيج وتخرجت ورادت تفاجئنه بحملها وتخرجت وما ندري
موفق
يعني كملتي بنياتي
صفا
أي عمو الحمد لله
وقشعم ميقبل اتعين
موفق
تعالي تعالي ابوس هاي البطله من خدودها الرمان
استبرق
من يصير طبيعي عمو أحس بقوه وأمان بوجوده أتمنى ما يتخربط لأن إني اتعب واتكأب
ورا كم يوم خابرتني فطومه عمو حامد متخربط وحالته موزينه
من تجي سيره عمو حامد ترجع كل الذكريات وياه
شيرين تلعب شطرنج وي عمو واني كاعده يمهم وكلساع وصاح عمو شيرين تزغلط
دك تلفوني
فطومه
استبرق عمي حامد توفئ إني طالعه من الدوام رايحه لبيت عمي حامد
هسه بلغوني
استبرق
اجذب اذا اكول ما انقهرت
هيج الدنيا إلي ياما صارن معارك بيها تالي كم سنه وهو كوه يحجي وما يتحرك ومات اعتقد من القهر
أمي ماتت من قهر وعمو حامد عزت عليه نفسه احد يشيله ويغسله وهو جان عنده هم كبرياء وهيج صار بيه
كل قوي للزمان يلين
عندما يدخل المرض لجسد
وان كان فيه من المعافاه في الروح تعيا مع الجسد فيبان الضعف في الملامح وان لم يكن الوهن بالعظم وارجاء الجسد
بجيت وبلغت عمو موفق
بس عمو من يتأثر تبقى الاحرف كوه تتجمع عنده وصاير عاطفي جدآ بسرعة يتأثر ويثور
خابرت صفا وقشعم كلتلهم وقشعم كال تريدين إني اروح وياج
رفضت اريدك قشعم تبقى يم صفا راح تدخل بشهرها
وتبقون بيتنا القديم انت وصفا حتى يبقون هبه وعلي يمكم وعيونكم على عمو موفق
صفا
شعجب تروحين لمنو لايمان لو لنورس
استبرق
احتراما لعمو عمار وعمي رشيد وعمي واثق وعمتي عزيزه علمودنه ياما تحملو
والتعزيه الهم همه
من ماتت خالتي اجو ومن تمرض عمو اجو وهذا واجبنا
صارت واجبات عمو موفق واجبي وعمامي رد فضل اروح هاي الاصول صفا خيه
لوما حامل جان اخذتج
طلعت بسيارتي وحدي خابرت على عمو عمار
راجع من الدفن ما كتله جايه
من وصلت كلش للبيت خابرته
عمو إني فريب الجادر تعالي
شويه وطلع عمو منگب
حضنته وبقيت ابجي وهو مشاني وصلني للبيت دخلني وصاح اجت بت حاجم تعازيجن
صحت
عمامي وجرح البگلبي يلچمونه
ولطمت لطمه أمي بالعزيات مال ولايتنه بلبس يشبه لبس أمي
كامن اليه النسوان حتى إيمان وبنات عمي حامد الكبار وسرى وزوجه عمو رشيد وفطومه
لطمه وحده وأعرف عيون بنات عمي حامد شكد متاثرات على ابوهم رغم عاداني واذاني بس جان مدلل بناته وصلهن كلهن بالدراسه وجان يشرط على اليخطبهن إلا يتوضفن
صحتلهن دكن يلبيض راس زماطجن مات
وهنه بقن يصيحن أي والله أي والله استبرق أي عمتي عزيزه ماكدرت تكوم بس فتحت أديها اليه حضنتها وبقيت ابجي وياها
شريط تصرقات عمو حامد بهذا البيت وهنا وهنا كل الذكريات ترجع بس أصحابها بخيرهم وشرهم يرحلون
جان عمو موفق يسولفلي عنها بعد ما ماتت أمي والعلوية
أن حامد بقراره نفسه ايحبجن ويريدلجن الزينه بس جرفه حبه لامجن انجرف بغيره والتخلف عامل رئيسي خرب كل تصرفاته
لآخر ايامه وعلى عربانه يكولون ويروح المكبره لأمي
وهسه عمو أمي راحت وانت رحت
بقيت يمهم بليلتها الكل سلمت عليهم وما احد سمعني كلمه حتى نورس احسه متغيره وصايره تفتهم
اجت وسلمت هي عليه ما لطمت ويانه عرفت حامل ومسويه ربط طريقه كلامها انضج ومحترمه أكثر
بليل سرى كالت روحن أنتي وفطومه لبيتنه تعبانه أنتي من الدرب اسبحي ونامي وتعالن باجر على وكت
طلعت الجادر مليان ناس
اجاني بشار
بشار
شكد دزيتلج مسجات ليش ما تردين
استبرق
ما سمعت التلفون بالجنطه شكو
بشار كلت اصف السياره عدل
استبرق
يلا إني اجيت هاك سوق أنت ودينه لبيتكم
فطومه
أنتي تحجين صدك تردين يدعمنه
استبرق
صددك مايعرف يسوق
فطومه
يعرف يضربها بتيل كهرباء يعرف يضرب سيارات
بشار
جذابه أعرف
استبرق
بعدنه نسولف
واجه عمو عمار
عمار
استبرق اخذي باباتي سيارتج روحي لبيتنه أنتي واختج وأنت جلب البحر
مو فاتحه عمك وين تريد تولي يلا وي الشباب امشي
استبرق
رحنه لبيت عمو عمار
بدلنه وغسلنه واتصلت على شيرين وعلى صفا اطمأن على عمو موفق والجهال
اندك الباب فتحته فطومه فضل اجه
صاير ضخم كلش وعبالك اكبر مني شوارب ولحيه وحتى شكله متغير أحلى من أبوي صاير
فات سلم علينه وصعد
اكلج مو كأن فضل صاير ادمي
فطومه
كلش مو شلون ما چان يعني تحول جذري كون الله يهديه ويمتحن خارجي دوم نضرب بيج المثل
امتحنتي وكملتي
بس أبوي يكول افضل من المهندسين شغله
حالياً صار يطلع وي أبو تبريد يشتغل يشدون مكيفات والحجي بينه يجمع فلوسه يمي
وإني اسويله بيهن سلف
ما يبقى بالبيت ابد يشتغل
استبرق
الحمدلله تغير
فطومه
أبوي وياه وياه تشجيع ومتابعه
استبرق
ثاني يوم طلعنه إني وفطومه وفضل من وكت للفاتحه العزا بولايتنه من أول الصبح يبدي
وصلنه يم الجادر شباب مسوين مكان للجاي والكهوه يسوون جاي لكيناهم
فضل تعرف تسوق لو مثل الدب بشار
فضل
اسألي المرشد السياحي مالتج هي تكلج
استبرق
هاا فطوم شتكولين
فطومه
والله تعلموا و الدب
بسياره أبوي بس فضل تعلم بسرعه وأكثر لأن هم بسياره أبو الشغل يطلع
استبرق
انطيت السويج لفضل ونزلنه نريد ندخل وتلاكه بالكراج ويانه وأحد لابس دشداشة
بس لأن هم صلوات شبابنه هواية
شفته يركز بوجهي من بدايه الكراج إني أمشي وهو من نهايته ست أمتار بينه بس عيونه مركزه بوجهي
أول مرة ماركزت بعيدن هنه ذني عيونه عنده شامه بفص الابيض بعينه وكفت رجليه من تقرب وكأن انطاني اشاره توقف إني هم وگفت
مرات الجسد يحركه شعور العقل يرفضه بس الايعاز يجيه من القلب والعاطفه
سيف
شلونج بت عمي
استبرق
البقيه بحياتك وشال النگاب من وجهه حييل شكد متغير كأن السنين اخذت سيف وبدلته يباوعلي ويريد يحجي بس ما حجه كلشي يباوع بوجهي وبس
فطومه كسرت الصمت گالتله
البقيه بحياتك شوكت وصلت
مثل الكعد
سيف
قبل ساعه وصلنه
استبرق
كال وصلنه مرخصتكم وراح يعني جايبن عأئلته
فطومه عصرت ايدي ودخلنه للفاتحه
