رواية وعد القسوة الفصل الواحد العشرون بقلم رنا
سامح: الحياة مش بسيطه لدرجه اني اكون بأذي انسانه زي ريم واجي فجاه اقولها اعذروني انا بحبك...مكنتش عارف انا مالي بس كنت حاسس بعاطفه قويه جدا من ناحيتها كنت حاسس كأن في حد شرير بيأذيها بس برجع افتكر انه انا....معرفش الحب ده حصل ازاي في خلال شهرين...من اول مرة خبطت فيا وهي بتجري من رشا...
كنت رايح بيت رشا بجر رجلي زي الطالب الفاشل...قلبي بيصرخ فيا اني ارجع ل ريم اقعد معاها...واخدها في حضني واسمعها...لكن عقلي كان رافض وكان بيقولي ان عمرها ماممكن تسامح....
وصلت بيت رشا...رنيت الجرس لقيتها هي بتفتح اول ماشافتني صرخت....موحة حبيبي...ونطت بين زراعي وقالت...وحشتني ياغدار شكل العروسة اخدت مني...
قلت بملل وانا ببعدها عني...ارجوكي يارشا مش وقته
ردت عليا بسرعه...ياموحة انا بهرج هي ريم دي اصلا تتحسب انثى...وضحكت...
بصتلها بتحذير وهي فهمت النظرة ومعلقتش...دخلت لقيت الشلة كلها متجمعه ....كانو بيضحكو ومتفائلين جدا للحياه بس انا جوايا كنت حاسس بكسرة نفس...كنت مخنوق اني سمحت لنفسي احب واتعلق ب ريم...مكنش لازم يحصل كده.....
لقيت رشا جايه تقعد جنبي وبتتنهد وتقول...مالك ياموحة مقموص ليه....
بعدتها عني وقلت ...ولا مضايق ولا مقموص بس بالي مشغول شويه...
بصتلي شويه وقالت...انا مش عارفه في ايه لكن اتمنى لو الموضوع مالوش علاقه ب ريم....وبصتلي تاني وقالت...عروستك الجديدة متنساش انها مجرد لعبة....
كنت مخنوق قوي وجت رشا كملتها....
فضلت قاعد مش مندمج معاهم لحد ماجالي مروان وخدني بره....وسألني عن اللي شاغل بالي...كنت محتاج افضفض...وحكتله كل حاجه....
كان رد فعل مروان عكس ماتوقعت...قالي...انا بصراحه توقعت حاجه زي كده...رديت...معقووول...قالي....طبعا انا اتكلمت مع ريم يوم الحفلة بجد هي بنوته تحفه ودماغها كبيرة وعاقله...قاطعته...حيلك حيلك ولما انت شفت كده ممنعتنيش ليه من المصيبه ألي عملتها...
رد مروان...لأنك مشفتش نفسك يومها كنت عامل ازاي...كنت مسروع على الفلوس...وانت عارف كويس انك وقت العصبيه محدش بيعرف يقف قدامك...حتى لما صارحت هشام بوجهة نظري قالي ملناش دعوة هو كده كده هيتجوزها مفيش خساير...
ضحكت بمرارة وقعدت على كرسي في المدخل وقلت...وتفتكر في حل...في أمل....
رد مروان...هو لو على الحلول فهيا كتير لكن أمل مفتكرش...بس دي حاجه عند ربنا وحده هو اللي يدرى بيها....
رديت ...طب ساعدني انا مش عارف افكر...سكت شويه وقال...هي خطوة صعبه بس لازم منها...سألته ايه هي...رد....لازك تقابل باسم اخوها...اعتذر عرفو انك بتحبها لازم تصلح علاقتهم ببعض...اتعامل معاها زي مابتتعامل مع اي بنت حبتها قبل كده واكتر...دي مراتك متتكسفش من انك تخرج بيها وتعوضها عن اي جرح قديم ولو احتاجتك طبطب عليها وعرفها انك هتفضل جنبها...خليها تحبك...وانت لازم تقفل حياتك القديمإ وتفتح صفحة جديدة...سيب حياة الشرب والستات وكون انسان جديد حب الدنيا وحبب ريم فيها....
حسيت بالأمل مع كلمة مروان بيقلها ضحكت وقلت له...مكنتش اعرف انك عاقل كده...
رد وهو بيضحك...الدنيا حلوه بس احنا اللي بنعقدها...وسكت وقال...يلا مستني ايييه بسرعه روحلها....
قمت من مكاني بسرعه وانا حاسس اني طاير...كان لازم اقابل باسم فعلا...
لكن وانا ماشي مكنتش عارف ان رشا واقفه وسامعه كل كلمة.....
