رواية غباء الامومة المستحدث ( جاموسة تايهة في بحر الامومة ) الحكاية الثانية ( انتي مبتناميش ليه ؟؟ )
صباح الخير .....
النهاردة
الذكرى الأولى لولادة أخر العنقود " مروانة كروانة "
وكروانة هنا مش المؤنث من " طائر الكروان " من باب الدلع و التدليل و كدة ... تؤ تؤ نهائى ،
كروانة هنا ترمز ل " كروانة المية " الشهيرة ب (الطشت)
معلش أنا بحب أدلع عيالى بطريقة متخلفة شوية 😂
أنا فاكرة يوم الولادة كأنه من ساعات مش من سنة فاتت
يومها الصبح كان عمر " ابو سنة ونص " كأنه كان حاسس ان هيحصل حاجه مريبة النهاردة أو ماما مبقتش ماما لوحدى
بدايةً كان فرك وصريخ وزن
= صباح الخير يا مورى و اجى ابوسه ألاقى كف خماسى غير ديكور وشى
طيب تعالى ناخد شاور و نغير يطلع يجرى م الحمام سلبوتة بعد ما يعملها ف وشى 🥹
الدكتور اتصل وقالنا اتأخرتو ع العملية والاستاف موجودين تعالو دلواقتى
عم الهرج والمرج فى أنحاء البيت وبعدين لحظة واحدة !
يا دكتور انا معادى بالليل اصلا 🙁 حد يخض حد كدة 🐸
و كأى إمرأة حامل ف طبيعي ده مجهود اوفر ف يلا ننام شوية أغمض عيني
ألاقى هجوم الأندر تيكر وموسيقى الدبليو دبليو إى إشتغلت ف الخلفية وتقريباً فاكر إن الكالو اللى ف بطنى ده ترامبولين " نطاطة " لان النط اللى كان على بطنى كان اوفر والله انا كان نفسى اناملى ساعتين قبل المدعكة 😭
بالليل بقا ف الطريق الاقى مكالمة من العزيزة عفاف وبتعيط ومتوترة وشحتفة وحاجات مّريبة
مالك يا عفاف بتعيطي ليه يا حبيبتى حصلك حاجة ؟
=عااااااا انتى هتولدى
يا عفاف انا اللى هولد مش انتى
=عاااااااا م انتى هيشقوكى زى البطيخه اربع تربع
يا ست بقا حرام عليكي انا رايحة اولد مش احارب و بعدين ايه هيشقونى اربع تربع دى كمان ؟ 😐
هخلص وابعتلك كلمنى شكراً تطمنى 😂😂
ف المستشفى بعد م جهزت ولبست لبس العمليات
والممرضات بيركبولى الكانويلا والفحوصات قبل م ادخل
عمورى حبيبي كان عايش اسعد لحظاته مع البنوتة القمر اللى كانت بتجرى وراه عشان تبوسه وباباها كان مسحول هل يا ترى يلحق بنته اللى جيباله العار وهى عندها سنة ؟ ولا يلحق مراته الغلبانة اللى بتولد ويدعيلها تقوم بالسلامة ؟
بعلى العزيز لحق ابنه قبل التار والعار وجابه الأوضة
وطبعا أنا مؤمنة بان الشاشات قبل السنتبن بتعمل عته للاطفال ف الطاقة بتطلع على هيئة شقاوة بريئة زى شد الكانويلا ، ضرب الأجهزة ، الجرى فى انحاء المستشفى والصويت والرقع بالصوت
ورغم الكسفة إلا ان عزائى الوحيد انى مش انا اللى هجرى وراه والحقه ،
خليهم يدوقو من اللى انا فيه ويحسو بمعاناتى 😌
" اقصد جوزى واهلى طبعا "
لما قعدت ع الترولى عشان ياخدونى ع العمليات لاحظت ان كل اللى رايحين زيي يولدو كلهم بيعيطو ومنهارين واللى بتترعش واللى مش قادرة تقف
-خير يا شباب هو انتو اللى اوفر ولا انا اللى معنديش دم؟ انا معنديش مشكله ادخل الاوضه مشى مش منقولة على ترولى 🤷🏻♀️ ،
ده حتى خير اللهم اجعله خير داخلين على ساعة استجابة يلا كل واحدة تدعى ع الاعداء وخلينا نرتاح منهم 😂
- ناوية تسمى ايه يا حبيبتى ؟
ده سؤال طلع من ممرضة كبيرة ف السن بتفكرنى بامى وامك وام لا اله الا الله
= " والله لسة مش عارفة يا طنط محتارة ، لما اطلع بقا هبقى افكر "
اتاريها مش بترغى عشان فضولها وكدة لاء اتاريها بتشغلنى عشان محسش بحنقة الضهر اللى انا اصلا مبحسش بيها
اتفجئ بممرضة تانيه بتحطلى حقنة ف الكانيولا وبتقولى لما تدوخى قوليلي
وفضلنا ٥ دقايق انا وهى بنبص لبعض كدة

= انتى لسه مدوختيش ؟
- وحياتك ولا عاوزة اتاوب حتى
حطيتلى حقنة تانية والحمدلله غبت عن الوعى ٣ دقايق بحالهم سمحولهم يحطو ملاية تفصل الرؤية و يكتفولى إيدى الاتنين
" قصة التكتيفة دى هخليها ف مرة تانية لان ليها سبب 😉 "
- يا دكتور فك ايدي الله يسترك
= انتى صاحيه ليه ؟
- أمر الله هقول لامر الله لاء ؟ ، المهم فكلى ايدى
= لاء 😒
من العبثيات ف الموضوع هو ان جدار الاوضه كان سيراميك والنور كان شديد اوى وضارب ف السيراميك ف خلاه زى مراية ضخمة مخليانى اشوف كل حركة بتتعمل بمنتهى البرود 🤷🏻♀️🤷🏻♀️
وكل ٥ دقايق الاقى الدكتور بيبص عليا نمت ولا لاء وطبعا انا صاحيه معرفش فين المشكله
شوية ولقيت الممرضة جيبالى البيبي اول ما طلع افتكرت احساس جميل بالنعومة والدفا اللى بيمس القلوب من روح جديدة بتخرج للنور والروح دى كانت جوايا انا ! حسيت بشريط حياة الحمل الكام شهر اللى فاتو وانى مكنتش راضية ابدا عنه ،
لمساته الرقيقه على وشى كانت بتدغدغ قلبى معاها ،
كل. الاحاسيس السلبية راحت وجه مكانها حاجة مختلفة جدا وعلى النقيض تماماً وهى " الحب "
ولقيت ممرضه بتحقنى بحقنة تالته ف الكانيولا
ولسه صاحية
٣ حقن مخدر خلونى انام ميزيدش على ٥ دقايق وكان لازم انام عشان اغلب الامهات بيجيلهم بانيك اتاك لما الدكاترة يبدأو يخيطو وكدة ميعرفوش اللى فيها وانى اصلا بتفرج عليهم كانهم مسلسل ولا فيلم 😂😂😂
وسامعه الدكاترة والممرضات بيتكلمو عن الشاى ومين راح يعمله ومين طالب قهوة وعاوز يستعجله
طيب وقرمط المتفرمط ملهوش كوباية قهوة تنسيه أحزانه ؟
بعلى العزيز كان مستنيني برة اوضة العمليات وقالى بكل حب
" هتسميه ايه ؟ مروان ولا تميم ولا ايه ؟"
" مروان ، حسيته مروان "
لما وصلت الاوضه كان عمورى فلذة كبدى مستنينى بكل حب وطلع فوق السرير ونط على بطنى " اللى لسه متخيطة اه "
طبعا انا واخدة بنج اه بس احساس الامومة عندى خلانى اتمنى من جوايا اكسعه قلم ظباطى حنين على قده لعله سكت ويتربى
وده طبعا ضرب من الخيال لان التربية الايجابية منعانى
تقلصات الرحم بعد الولاده بشعة جدا وللى ميعرفش ف عشان الرحم يرجع مكانه لازم يضغطو جامد على البطن او يدوكى محلول يقوم بالعمل ده
وعشان حظى حلو المرادى ادونى المحلول هو اه مؤلم بس مفيش مقارنة
حاولت ارتاح شوية قبل البيبي ما يجي م الحضانة
لقيت عمر بيبصلى بكل حب وبيحضن ايدي
" ياه بقا ده الطفل اللى كنت عاوزه اضربه ؟ قد ايه انا أم جاح.... "
طبعا مكملتش الجملة عشان عمر شد الكانيولا من ايدي شالها خالص بقوة لدرجة انى خدت شاور دم ورمى المحلول ف الارض ونط على بطنى للمرة التانى ورمى نفسه عليا
انتا فاكر نفسك ترابل اتش يابن كوم شكاير الجزم ؟
الكام ساعة اللى بعدها هناك كانو لطاف خالص
رايحة جاية ع الحمام ، رايحة جاية ارضع اللى تعبان وعاوز يرضع ، بنيم الطفل الحلوف اللى لازقلى زى القراد ، ارقع بالصوت ، كدة يعنى 🤡
ليه مطلبتش مساعدة ؟ الحقيقة معرفش السبب بس متعودتش اطلب من حد مساعدة او استنى من حد مساعدة مهما كان الحد ده مين ، ولو حد عرض عليا مساعدة ؟ تلقائى بتترفض
معرفش بقا ده غباء منى ولا م الاخرين 🤷🏻♀️
يومها بت ليلتى واخده مروان على يميني وعمر على شمالى عشان مكنتش قادره اقوم اكتر من كداا بصراحة
ويجي حد يقولى " إنتى مبتناميش ليييييه ؟ "
انتو رأيكو ايه ؟ انا مبنامش ليه يا ترى ؟ 😏😒
.......................
الحكاية الثالثة من هنا
