رواية اغتصاب شرعى الجزء الثاني الفصل العاشر
ويصعد الثلاث مجرمون الملثمون الي فيلا شهاب ويفتحون الباب بالمفتاح ويدخلون وهم يتسحبون الي داخل الفيلا ويضيئون الطريق بكشاف بطارية .. يسرعون نحو سلم الطابق الاعلي ثم يتوجهون نحو غرفة سها اخت شهاب ..
احد المجرمين وهو القائد .. جاهزين يا رجالة ؟
الاثنان الاخران .. ايوا جاهزين
ثم يفتح الباب بسرعة ويُشهر مسدسه امامه .. الغرفة مظلمة بعد ان كانت مضاءه منذ قليل !! ..المجرم القائد يضئ المكان بالكشاف الذي يحمله في يده .. فيجد سها نائمه علي السرير وامامها مجلة يبدوا انها كانت تتصفحها فغلبها النوم فيتعجب قائلا
المجرم القائد .. لحقت تنام بالسرعة دي ؟! دا نور الاوضة كان والع من دقيقتين بس؟!
المجرم الاخر .. جايز غلبها النوم وهي بتقري في المجلة اللي قدامها دي !!
المجرم القائد .. ما علينا .. كويس انها نامت .. اهي مصلحة بردوا عشان لو كانت صاحية كانت اكيد هتصرخ لما تشوفنا .. يلا هات المنديل وازازة المخدر بسرعة
احد المجرمين .. عيني يا كبير .. اتفضل ..
المجرم القائد .. وانت طلع الكاميرا من الشنطة عشان هنبدأ تصوير حالا ..
المجرم الثاني .. جاهز يا عمنا ..
المجرم القائد .. ما دام جاهزين يبقي اكشن يا رجالة ..
ثم يخلع ملابسة ويقترب من سها ..
ونذهب الي المستشفي التي يرقد بها المأمور والعسكري فارس بعد الحادث الاليم الذي تعرضوا له ..
المكان مزدحم بالضباط من جميع الرتب جاءوا الي المستشفي بعد ان علموا بالحادث الاليم الذي تعرضت له سيارة المأمور واللواء يسأل الطبيب بعد خروجة من غرفة العمليات ..
اللواء .. خير يا دكتور .. سيادة المأمور اخباره ايه ؟
الطبيب بحزن شديد .. للأسف مقدرناش نعمل حاجة !! البقاء لله ..
لواء اخر .. انا لله وانا اليه راجعون .. طب والناس اللي كانت معاه ؟
الطبيب .. السواق للأسف كان مات بالفعل بمجرد وصوله للمستشفي .. اما العسكري التاني دا مات بعد ما وصل هنا بدقايق بسيطة .. ربنا يرحمهم نحتسبهم شهداء عند الله
ثم يأتي احد الممرضين مسرعا ثم يقول للطبيب وهو في صدمة شديدة
الممرض .. الحق يا دكتور العسكري اللي قلبه وقف وقلنا عليه مات !! رجع يتنفس من تاني ؟!
الطبيب .. معقول ؟! سبحان الله .. بعد اذنكم ..
ثم يذهب هو والممرض مسرعين نحو الغرفة التي بها العسكري فارس الذي عاد الي الحياه من جديد ..
ونذهب الي ممتاز الذي ينتظر في سيارته وينظر في ساعته ويبدوا عليه القلق .. يحادث نفسه قائلا
ممتاز .. اتأخروا ليه البهايم دول ؟!
وبمجرد ان ينتهي من جملته يري الثلاث مجرمين يخرجون من الفيلا مسرعين نحو السيارة ويجلس القائد بجواى ممتاز والاثنان الاخران بالمقعد الخلفي للسيارة
ممتاز .. عملتوا ايه ؟!
القائد .. عملنا اللي أمرت بيه سيادتك .. قلعناها هدومها واخدنا كام صورة كدا حلوين
ممتاز .. اوعي حد فيكم يكون لمسها ؟!
القائد يرتبك ويتلعثم في الكلام .. ايه ؟! .. لا لا لا .. اطمن سيادتك محدش لمسها خالص
ممتاز يبدوا انه لا يصدقة .. طب هات الصور
القائد .. اهه الصور يا باشا ..
ممتاز يقلب في الصور وفجأة يتغير لون وجهه ويبدوا عليه الانزعاج الشديد
ممتاز .. ايه دا ؟!
القائد .. الصور مش عاجباك ولا ايه يا باشا ؟!
ممتاز .. يا ابن الكلب !!
القائد .. في ايه يا باشا ؟! مين دا اللي ابن كلب عدم لا مؤاخذة ؟!
ممتاز .. عليا النعمه لأقتلك يا شهاب الكلب !!
القائد .. ايه الحكاية يا باشا ؟! مين شهاب دا ؟!
ممتاز .. وانت كمان حمار
ثم يصفعه بالقلم بكل قوة
القائد .. انت بتضربني ليه يا باشا ؟! انا نفذت اللي طلبته مني بالحرف بالواحد!! يبقي دي جزاتي ؟!
ممتاز .. لأنك غبي انت والبهايم اللي معاك
القائد .. غبي ليه بس يا باشا ؟!
ممتاز .. لأن دي مش سها طليقتي .. دي اختي يا بهايم؟!
القائد .. اختك ؟!
ثم يترجل ممتاز عن السيارة بعد ان يُشهر مسدسة ويتوجه مسرعا نحو الفيلا ..
ونذهب الي زينب وابنتها سارة في شقتهم
الام عاتبة .. ايه يابنتي اللي عملتيه ده ؟!
سارة .. عملت ايه يا ماما ؟!
الام .. الطريقة اللي اتعاملتي بيها مع الظابط ؟!
سارة .. مالها الطريقة اللي اتعاملت بيها مع الظابط ؟! دي انسب طريقة تتعاملي بيها مع بنى آدم زي دا !!
الام .. بس انتي كنتي ناشفة معاه اوي يا سارة ؟!
سارة .. اومال كنتي عايزاني اتعامل معاه ازاي يا ماما ؟! دا انسان بارد ومعندوش دم !! فيه واحد يجي يطلب ايد واحدة في ظروف زي دي ؟! وبعدين دا مكنش جاي يطلب ايدي ؟! دا كان جاي يديني امر ومستني اني انفذه !! انتي ماشوفتيش الطريقة اللي كان بيتكلم بيها
الام .. بس انتي يا بنتي رفضتيه وش كدا من غير حتي ما تقوليلة سيبني افكر وارد عليك ؟!
سارة .. لأن مش محتاجة افكر خالص .. ارتباطي ببني آدم بالنوعية دي مرفوض تماما .. وبعدين مسألتيش نفسك واحد زي دا .. ظابط ومن عيلة كبيرة جاي يرتبط بواحدة زيي انا ليه ؟!
الام .. بيقول انه بيحبك يا بنتي ؟!
سارة بسخرية .. ههه .. للأسف اللي زي دا ميعرفش يعني ايه حب !! دا لو كان عنده قلب من اساسه !! .. دا مش جاي يطلبني عشان بيحبني .. دا عايز جسمي وبس ولما معرفش يوصلي بعد التلميح المستفذ ليا وانا في السجن .. قال خلاص اطولها بس في الحلال .. فهمتي يا ست الكل ؟! هي دي كل الحكاية .. بالظبط زي المرحوم سيد جوزي .. كان كل اللي هامه جسمي وبس!! .. ولما عرف انه مش هيقدر يقربلي بعد اللي عمله فيا .. اتنرفز واتعصب وسابني ومشي .. تقدري تسميه اغتصاب شرعي .. هتك عرض بس في صورة جواز علي سنة الله ورسوله !! بس انا اللي محيرني دلوقتي الكلام اللي هو قاله ؟!
الام .. كلام ايه يا سارة ؟!
سارة .. انتي ما اخدتيش بالك وهو بيقول انا متأكد انك بريئة ووعد ان بابا هيرجع معزز مكرم بس بعد ما يسمع موافقتي ؟!.
الام .. ودا معناه ايه ؟!
سارة .. لا طبعا .. دا معناه كبير اوي !! وبصراحة انا بدأت اشك في شهاب ده !!
ونذهب الي عوض احد رجال سيد وذراعة الايمن والذي غدر به في النهاية وقتله بدم بارد بعد ان ارغمه شهاب علي العمل معه ووعده بأنه سوف يصبح احد رجاله المقربين وسوف يغمره بالمال الكثير .. عوض يجلس في منزلة واطفالة الخمسة يجلسون حول طابلية عليها طعام مكون من فول وطعمية .. وتجلس زوجته رضا امامه .. عوض يدخن سيجارة شارد الذهن ويبدوا انه يفكر في شئ ما
رضا .. وبعدين يا عوض.. مش ناوي تشوف حل؟!
عوض .. اشوف حل في ايه يا ولية انتي ؟!
رضا .. تشوف حل في العيشة اللي احنا عايشينها دي !! دا احنا مبقيناش لاقيين اللقمه ناكلها !!
عوض .. اومال ايه اللي بيطفحوه عيالك ده ؟!
رضا .. وانت بتسمي اللي بياكلوه دا اكل ؟!
عوض .. احمدي ربك .. غيرك مش لاقيها .. واتمسي في ليلتك السودا دي يا رضا !!
رضا .. بقي يا اخواتي بعد ما كنا بنتعشي كباب وكفته ونفطر لانشون وجبنة شيدر وعيش توست .. بقينا بناكل فول وطعمية ليل ونهار لحد ما قلبنا اتحرق منهم
عوض .. كام يوم تاني مش هتلاقي الفول والطعمية دول !! اهمدي بقي
رضا .. عارف .. احنا نستاهل العيشة اللي احنا فيها دي .. اه نستاهل والله .. عشان تاني مره متبقاش ندل وتعض الايد اللي اتمدتلك بالخير .. بقي يا راجل يا واطي تقتل ولي نعمتك ؟!
عوض .. بقلك ايه هو احنا هنعيد السيرة دي كل شوية ولا ايه ؟! الكلام يتنطور وتوديني في داهية الله يخرب بيتك !! وبعدين ما انا قلتلك ان دي تعليمات من باشا كبير اوي في الداخلية
رضا .. وفين الباشا دلوقتي ؟! مش دا اللي قالك انك بقيت واحد من رجالته واي حاجة تعوزها اطلبها منه علطول !! وقالك كمان انه هيديلك فلوس كتير اوي .. اهو مر يا خويا اكتر من اسبوعين ولا نفذ وعد ولا حتي عبرك ؟!
عوض .. مشاغلة كتير .. الله يكون في عونه
رضا .. الله يكون في عونا احنا ياخويا .. هشق هدومي منك وهتموتني طاقة يا عوض يا ابن بهانه !!
عوض .. خلاص اتهدي بقي .. هاكلمه في التليفون
رضا .. ايوا كلمه وقوله فين اللي وعدتني بيه يا باشا ؟! انا وعيالي خلاص مش لاقيين اللقمة الحاف !!
ونذهب الي ممتاز الذي يقتحم فيلا شهاب ويعتلي سلالم الطابق العلوي مسرعا متوجها نحو غرفة سها طليقته ثم يفتح الباب .. فيجد سها تجلس امام المرآة تمشط شعرها وعندما تراه تتعجب ثم تبتسم فرحا تعتقد انه قد اتي اليها يطلب منها السماح
سها .. ممتاز ؟! كنت متأكدة انك جاي !! وحشتني اوي اوي
ثم تتوجه نحوه تريد ان يضمها الي حضنه فينهرها ممتاز ويمنعها من ان تقترب نحوه فتندهش سها ثم تنظر اليه في استنكار شديد وتقول
سها .. ايه دا ؟!
ممتاز بغضب شديد .. نور اختي فين ؟!
سها .. هو انت مش جاي عشان ندمان ع اللي عملته معايا وعايزنا نرجع لبعض تاني ؟!
ممتاز ساخرا ومستنكرا بشدة .. نرجع لبعض تاني ؟! دا انا ما صدقت ما خلصت منك !! .. مش باقي غير بركان الشر اخوكي !!
سها .. اومال انت جاي ليه ؟!
ممتاز .. فين نور اختي ؟!
سها .. نور اختك !! وايه اللي هايجيب نور اختك هنا ؟!
سها .. انتي هاتستعبطي ؟! بقلك نور اختي فين يا سها ؟!
سها .. وانا ايشعرفني ؟! اختك مش هنا .. اتصل بيها وشفها فين ؟!
ممتاز .. اخوكي بيلعب معايا لعبه حقيرة اوي !! وانا خلاص جبت اخري معاه !! وكله الا اختي .. فاهمين؟! .. الا اختي يا ولاد الكلب ؟!
ثم يدفعها بقوة فتسقط ع الارض
سها مستنكرة ومندهشة .. انت بتزقني يا ممتاز ؟!
ممتاز .. وهاقتلك كمان لو مقلتيش نور فين ؟!
سها .. قلتلك معرفش .. ما تتصل بيها يا اخي شفها في انهي داهيه ؟!
ممتاز .. تليفونها مقفول ؟! عملتوا في اختي ايه يا مجرمين يا سفلة ؟!
سها .. وانا اللي كنت فاكرة انك جاي عشاني ؟! اتاريك جاي تدور علي اختك ؟!
ممتاز .. بقلك ايه معنديش وقت اضيعه معاكي !! انطقي اختي فين يا اما هاقتلك دلوقتي حالا !!
سها بعصبية شديدة .. بقلك مش هنا .. مش هنا .. مش هنا يا اخي !! انت مبتفهمش ؟!
ممتاز .. يعني ايه ؟!
ممتاز يفكر قليلا ثم يقول
ممتاز .. عارفة لو طلعتي كدابة انا هارجع واقتلك انتي والكلب اخوكي !!
ثم ينصرف مسرعا وسها تنادي عليه ..
سها .. ممتاز !! .. استني يا ممتاز .. ممتاز !!
ثم تبكي بشدة .. وممتاز يتوجه نحو السيارة فلا يجد الثلاث مجرمين يبدوا انهم قد فروا .. ممتاز يحاول الاتصال علي قائدهم ولكن يجد تليفونه مغلق فيغضب قائلا
ممتاز .. يا اولاد الكلب !!
ممتاز يركب سيارته وينطلق مسرعا متوجها الي منزل والده ..
ونذهب الي يس حيث استدعاه وكيل النيابة لأستكمال التحقيق ..
الوكيل .. تعالي يا حج يس اقعد
يس يبدوا عليه التعب والحزن الشديد وبعد ان يجلس يس يخبره وكيل النيابة قائلا
الوكيل ..تقرير الطب الشرعي ان المجني عليه حسن سيد مات بطعنه نافذة في القلب بأستخدام اله حاده .. اللي هي السكين طبعا اللي لقيناها في الكرتونه عندك !! لكن تقرير المعمل الجنائي بيقول ان البصمات اللي ع السكين المستخدمه في قتل المجني عليه .. مش بصماتك فعلا ؟!
يس فرحا .. الحمد لله .. عشان تصدقني سعتك اني اول مره اشوف السكينة دي !! صدقني يا باشا .. والله العظيم ما قتلت حسن ابن سيد ولا اعرف مين اللي قتله ولا جثته دخلت بيتي ازاي؟! ولا السكينة دي كمان جت ازاي ؟!
الوكيل .. انا دلوقتي بس اقدر اقول ان كل كلامك اللي انت قلته قبل كدا صحيح مليون الميه .. انت فعلا مش الشخص اللي قتل حسن .. لأن البصمات اللي لقيوها ع السكين المستخدم في الجريمة بصمات زينب مراتك؟!!!
