رواية اغتصاب شرعى الجزء الثاني الفصل الرابع عشر
ممتاز .. تمام .. بس بردوا انتي مين ؟!
ساندي .. ما انا قلتلك اسمي ساندي
ممتاز .. انتي ازاي عرفتي اني انضربت بالنار ؟! وازاي نقلتيني هنا ؟!
ساندى .. ما انا كنت معدية بالصدفة في المكان اللي كنت فيه ف لقيتك واقع في الارض ومغمي عليك !! فنزلت ابص عليك لقيتك مضروب برصاصة في رجليك فأخدتك معايا في العربية وجيبتك علي هنا وعملت اللازم !! حاجة بسيطة .. هههههه .. كل بقي وبلاش تتكلم كتير !
ممتاز .. طب وانتي ليه عملتي كده ؟!
ساندي .. دافع انساني اكيد !!
ممتاز .. انتي بلغتي البوليس ؟!
ساندي .. لا طبعا .. الا كنت وديتك مستشفي من الاول !! ع الاقل افضل بكتير من اني اخرج الرصاصة بنفسي !! .. انا عارفة انك في مشاكل مع البوليس ..
ممتاز .. وانتي عرفتي منين حاجة زي دي ؟! انتي تعرفيني قبل كدا ؟!
ساندي .. لا معرفكش طبعا .. بس سمعت عنك كتير ..
ممتاز .. سمعتي عني ؟! سمعتي عني من مين ؟!
ساندي .. حضرة الظابط .. من فضلك بلاش تسألني اسئلة انا مش هقدر اجاوب عليها
ممتاز .. انتي عارفة كمان اني ظابط ؟!
ساندي .. اكيد عارفة انك ظابط .. وبعدين دي معلومة اي حد ممكن يعرفها بمجرد ما هايشوف الكارنية اللي في المحفظة بتاعتك .. ممكن نبطل كلام وناكل احسن !! يلا انا هاوصل مشوار بسيط وراجعالك بسرعة تكون خلصت الاكل دا كله
ممتاز .. انتي رايحة فين ؟!
ساندي .. قلتلك مشوار بسيط يا باشا وحالا ارجع وبطل اسئلة احنا مش في قسم هنا يا حضرة الظابط !! .. هههههه .. متخافش انت هنا في امان .. يلا باي
رد فعل علي وجه ممتاز
ونذهب الي شهاب الذي يجلس في غرفته ثم تأتيه سها اخته وتطرق الباب
شهاب .. ادخل
سها .. شهاب .. فيه واحد تحت عاوز يقابلك ؟!
شهاب .. مين ده ؟!
سها .. معرفش .. واحد شكلة جربان!! ..انا اول مره اشوفه ؟!
شهاب .. جربان ؟!
سها .. ايوه .. دقنه طويلة وهدومة مبهدله !! بصراحة انا خفت من منظره ده !!
شهاب .. مين ده ؟! انا نازل اشوف
وينزل شهاب الي الاسفل ليفاجأ بأنه عوض الذي كان يعمل مع سيد وغدر به وقتله اقتداء لأمر شهاب
شهاب .. هو انت ؟! انت ايه اللي جابك هنا يا بني آدم انت ؟!
عوض .. ما انا برن ع التليفون ياباشا وحضرتك منفضلي ومش بترد خالص !!
شهاب .. تقوم تيجي هنا يا حيوان انت ؟!.
عوض .. طب انا اعمل ايه يا باشا .. ما انا عاوزك ضروري ومش لاقي طريقة اوصل بيها لسيادتك !!
سها تقف ع السلم تراقب الموقف وشهاب يلاحظ ذلك ..
شهاب .. طب تعالي ع المكتب
عوض .. ماشي يا باشا
شهاب يدخل حجرة المكتب وخلفة عوض ويغلق الباب من الداخل حتي لا يسمعه احد
شهاب .. حسك عينك تيجي هنا تاني .. انت فاهم ؟!
عوض .. حاضر سعتك
شهاب .. انطق عايز ايه ؟!
عوض .. عايز اللي وعدتني بيه يا باشا !!
شهاب .. وانا وعدتك بأيه يا روح امك ؟!
عوض .. حضرتك وعدتني اني هاكون واحد من رجالتك واني اي حاجة اعوزها اطلبها من سيادتك !!
شهاب .. ما انت فعلا بقيت واحد من رجالتي يا عوض .. ولما اعوزك هاتصل بيك اكيد !!
عوض .. وانا خدامك يا باشا في اي وقت والله
شهاب .. عارفك جدع يا عوض
عوض .. دا من اصلك يا باشا .. طب حضرتك وعدتني بحاجة تاني
شهاب يبدوا انه بدأ يغضب
شهاب .. ايه هي ؟!
عوض .. انك سيادتك هاتديني فلوس كتير اوي !!
شهاب .. طب مش لما يكون فيه شغل بينا ابقي اديلك فلوس !! ولا هديلك فلوس كدا وخلاص بدون مقابل ؟!
عوض .. بس انا فهمت حاجة تاني غير كده سيادتك ؟!
شهاب .. فهمت ايه يا حبيبي ؟! اياك تكون فاكر اني عندي فلوس كتير ومش عارف اوديها فين ف هافرقها ع البلطجية والصيع اللي زيك ؟!
عوض .. بلطجية وصيع !! انا مش بلطجي ولا صايع يا باشا .. انا كنت الدراع اليمين لأكبر تاجر ادوات صحية فيكي يا بلد !! وكنت عايش احسنها عيشة والفلوس كانت معايا زي الرز ومش عارف اوديها فين !!.. لولا سيادتك ظهرتلي وفجأة وارغمتني اني اقتل ولي نعمتي ؟!
شهاب .. وطي صوتك يالا .. لخص عايز ايه ؟!
عوض .. عايز فلوس يا باشا .. انا مش لاقي اكل لا انا ولا عيالي !!
شهاب .. عايز فلوس ؟! حاضر يا عوض .. امسك
عوض .. كام دول يا باشا ؟!
شهاب .. دول ٥٠٠ جنية
عوض .. وعدم لا مؤاخذة دول يعملوا ايه ؟! ياباشا بقول لسيادتك انا الفلوس كانت في ايدي زي الرز ومش عارف اوديها فين ؟! تقوم في الاخر تطلع من جيبك ٥٠٠ جنية ؟!
شهاب .. اومال عايز كام يا روح امك ؟!
عوض .. عايز ٥ باكو .. وياريت حضرتك تثبتلي ادهم شهرية كل شهر
شهاب .. اكونش خلفتك ونسيتك يالا ؟! انا هاصرف عليك انت وعيالك ولا ايه يا روح امك ؟! روح شفلك شغلانه يالا ..
عوض .. محدش راضي يشغلني والبيبان كلها مقفولة في وشي .. زي ما يكون ربنا بيعاقبني ع اللي انا عملته في ولي نعمتي !!
شهاب .. تتحرق انت وولي نعمتك .. امشي ياض من هنا ومش عايز اشوف هنا تاني وانا لما اعوزك هاعرف اجيبك
عوض .. بقي كده يا باشا ؟!.. الحق عليا اني طاوعتك وقتلت الراجل اللي لحم كتافي من خيره عشان خاطرك .. بس يكون في علمك انا لو فضلت كده مقفلة في وشي انا معرفش ساعتها ممكن اعمل ايه ؟!
شهاب يصفعة علي وجهه
شهاب .. انت بتهددني ياابن الكلب ؟!
عوض .. العفو يا باشا .. ما عاش اللي يهددك .. انا بتكلم عن نفسي سيادتك يعني ممكن انتحر او اقتل العيال وامهم !!
شهاب .. اه .. اذا كان كده معلش
عوض .. طب بالاذن انا سعتك
شهاب .. امسك الفلوس يا عوض
عوض .. لا ياباشا .. خليهم مع سعتك يمكن تعزهم ولا حاجة !! سلاموا عليكم
رد فعل علي وجه شهاب .. ثم يتصل بالمحمول علي شخص مجهول
شهاب .. الو .. فينك يا نماش ؟! طب اسمع .. الواد اللي اسمه عوض .. تعبان اوي وعايزك تريحه .. تمام .. وابقي اديني رنه لما تخلص .. سلام ..
شهاب يُغلق الخط ويبتسم ابتسامته الخبيثة التي تحمل كل معاني الشر ..
ونذهب الي سارة حيث تجلس في الشقة مع ابيها يس ويبدوا انهم في حالة من الحزن الشديد.. يس قد فرغ من صلاة الظهر .
سارة .. حرما يا بابا
يس .. جمعا ان شاء الله يا بنتي .. بابا .. انا قلقانه اوي علي ماما !!
يس .. وانا كمان قلقان يا بنتي .. لكن ما باليد حيلة .. احنا قومنا محامي كبير وعشمنا في الله كبير بردوا !! ربنا يفك ضيقتها
سارة .. انا نفسي افهم اللي بيحصلنا ده ليه وازاي ؟!
يس .. والله يا بنتي انا فكرت كتير في الموضوع ده لحد ما عقلي هيجن ومش لاقي اي تفسير !!
سارة .. تعرف اني انا شاكة في الظابط شهاب وعندي احساس كبير اوي انه وري كل اللي بيحصلنا ده ؟!
يس .. طب وايه مصلحته يا بنتي ؟! ده انا حتي مفيش بينا وبينه اي علاقة او سابق معرفة حتي ؟!
سارة .. لا .. هو انت متعرفش انه جه هنا وحضرتك مقبوض عليك وطلب ايدي من ماما ؟!
يس .. ايه معقول ؟!
سارة .. ايوة .. وانا رفضته في وقتها بس هو هددني وقالي بكل بجاحة اني لو موافقتش علي جوازي منه هانضر كلنا !!
يس .. بس ازاي واحد باشا زي ده يطلب بنت زيك انتي للجواز .. اولا فرق كبير بينا وبينه . ثانيا انتي ارملة مش بنت بنوت ؟!
سارة .. ما هو مش عايز يتجوزني عشان بيحبني ؟! ده عايز يتحوزني عشان يطولني مش اكتر .. بعد ما عرف اني ماليش في السكة الشمال ..
يس .. يا ساتر يارب .. شمال ايه يا بنتي .. ده احنا ناس محترمين ونعرف ربنا .. هو ازاي يفكر بالطريقة دي ؟!
سارة .. عشان وسخ طبعا !!
يس .. بس انا ما اعتقدش ان شهاب يعمل ده كله لمجرد انه عايز يجبرك عشان توافقي ع الجواز ؟! ده بالطريقة دي ورطنا في جريمة قتل وعقوبتها بتوصل للأعدام !!
سارة .. لا فيه حاجة تانية كمان !!
يس .. ايه هي يا سارة يا بنتي ؟!
ممتاز .. عايز يكسر ممتاز ويذلة
يس .. قصدك الرائد ممتاز ؟! طب ليه ؟! واحنا ايه علاقتنا ب ممتاز !!
سارة .. ممتاز بيحبني يا بابا وطلب مني الجواز !!
يس .. ايه ؟!
ونذهب الي سها وشهاب والتي حدثت بينهم مشادة كلامية ..
سها .. انت اتجننت يابني انت ؟! عايز تتجوز البنت اللي اسمها سارة دي ؟! البنت دي متهمه في قضية قتل ؟!
شهاب .. ايوه وان شاء الله هتاخد برآة .. عشان هي مقتلش .. انا متأكد
سها .. ولو .. اسمها اتحط في قضية بردوا وبعدين دي مين وبنت مين ؟! بقي تسيب بنت مساعد مدير الامن وعايز تتجوز بنت رد سجون ؟!
شهاب .. بحبها يا سها بحبها
سها .. يا اخي حبك برص !! انت عارف لو بابا عرف ممكن يعمل معاك ايه ؟! انسي الموضوع ده خالص يا شهاب احسنلك !!
شهاب .. لا مش هنساه يا سها وهانفذ اللي في دماغي وعلي فكرة .. طظ فيكي وفي ابوكي .. وانا غلطان اني اتكلمت معاكي وباخد رأيك
ثم يتركها وينصرف ورد فعل علي وجه سها
سها .. اتجنن ده ولا ايه ؟!
ونذهب الي مازن وكيل النيابة حيث يجلس في مكتبه وفجأة يدخل العسكري ليخبره بأن هناك شخص في الخارج يريد مقابلته علي وجه السرعة
العسكري يدخل ويضع بطاقة هذا الشخص علي مكتب مازن
العسكري .. الشخص ده بره وعايز يقابل سيادتك ضروري يا باشا
مازن ينظر الي البطاقة ويقول
مازن .. تامر المصري ؟! خليه يدخل .. ويدخل تامر شاب عشريني متوسط الحال
تامر .. سلاموا عليكم يا باشا
مازن .. وعليكم السلام .. خير يا تامر .. العسكري بيقول انك عايز تقابلني ضروري ؟!
تامر .. ايوا يا باشا .. انا جاي لسيادتك بخصوص سارة يس المتهمه بقتل قاسم
مازن .. مالها سارة يس ؟!
تامر .. سارة يس ماقتلتش قاسم يا باشا .. انا معايا دليل برآتها ؟؟!!
ونذهب الي يس الذي ذهب في المساء الي شقة في عمارة بالزمالك ويرن جرس الباب ويفتح شهاب قائلا
شهاب .. اتأخرت ليه يا عم يس ؟! المأذون قاعد مستني من بدري ؟! ادخل يا عم الحج
يس يتألم من الداخل وعيناه يملأها الدمع ويقول
يس .. حاضر يابني .. اديني داخل اهوه ..
