 |
رواية اغتصاب شرعى الجزء الثاني الفصل الخامس عشر
شهاب .. طب ادخل برجلك اليمين عشان ربك يسهلها كده وتبقي اشطة يا عم يس ..
يس ينظر اليه في دهشة مستنكرا كل هذا الجبروت والتعجرف الذي عليه شهاب ويدخل يس الي شقة شهاب فيجد المأذون ومعه اثنان من الشهود ..
ونذهب الي النقيب سالم الذي حضر مع قوة من البوليس لمعاينة جثة مدفونة داخل قطعة ارض تخص الحج سعيد والذي اشتراها من السيدة فتحية ام حسن طليقة سيد
سالم .. جثة فعلا !! وباين عليها كمان جثة واحدة ست ؟! الارض دي بتاعتك يا حج سعيد ؟!
سعيد .. ايوه ملكي يا حضرة الظابط بس انا لسة شاريها مكملتش اسبوع من واحدة اسمها فتحية هاشم
سالم .. فتحية هاشم مين ؟!
سعيد .. فتحية هاشم مرات الحاج سيد النص الله يرحمه تاجر الادوات الصحية المعروف
سالم .. تقصد الحج سيد النص اللي لقيوه مقتول علي طريق مصر اسكندرية الصحراوي ؟!
سعيد .. ايوه هو يا باشا .. وابنه حسن كمان مات هو الاخر مقتول بعيد عنك !!
سالم مندهشا .. الله .. دي الحكاية احلوت اوي ؟!
سالم .. وانت بقي بتعمل ايه في الارض هنا يا عم الحج ؟!
سعيد .. انا بجهز الارض عشان هابني برج عقبال عندك يا باشا
سالم .. اها .. عشان كده لما جيت تحفر للأساسات لقيت الجثة دي ؟!
سعيد .. ايو يا باشا مظبوط واول ما لقيت المصيبة دي اتصلت بيكم علطول ..
سالم .. طيب هاتوه ..
سعيد .. هاتخدوني ليه يا باشا ؟! انا قلت لسيادتك اني لسة شاري الارض دي من اللي اسمها فتحية الله يخرب بيتها وديتني في داهيه !!
سالم .. متخافش يا حج هنكمل المحضر وهنخليك تروح علطول .. وانت يابني مشي العمال دي من هنا واعملي كاردون حوالين الارض دي .. ومش عاوز مخلوق يحط رجله هنا .. فاهم ؟
الامين .. تمام يا باشا
ويتم اصطحاب سعيد الي مديرية الامن ..
ونذهب الي تامر المصري الذي اعترف ل مازن وكيل النيابة بأمر خطير
مازن .. انت متأكد من كلامك ده يا تامر ؟!
تامر .. ايوا يا فندم .. متأكد طبعا وكل كلمة قلتها لسيادتك صح مليون المية والدليل مع حضرتك اهوه ..
مازن .. تمام .. طب روح انت دلوقتي وانتظر مني تليفون عشان هاستدعيك تاني
تامر .. وانا تحت امر سيادتك في اي وقت يا باشا .. بس عدم لا مؤاخذة انا كده فيه ضرر عليا ولا حاجة ؟!
مازن .. لا متخافش يا تامر
تامر .. طمنتي يا باشا الله يطمن قلبك .. طب بالاذن انا سعتك وخدامك في اي وقت ..
مازن .. مع السلامة
وينصرف تامر من عند مازن .. بعدها مازن يُجري اتصالا هاتفيا ب التقيب سالم
مازن .. ايوا يا سالم .. عندي معلومات خطيرة ولسة طازة .. اظاهر خلاص قربنا نلم كل خيوط القضية بتاعة سارة يس ونوصل للحقيقة .. وانت كمان عندك مفاجأة ؟! .. ايه هي قول .. ايه ؟!!
رد فعل علي وجه مازن
ونذهب الي شهاب ويس والد سارة ..ويبدوا انه تم عقد قران شهاب علي سارة والاب يبدوا حزينا جدا
شهاب .. مبروك يا عم الحج يس
يس .. الله يبارك فيك
شهاب .. مالك بتقولها كده ليه من غير نفس ؟! هو انت مش راضي عن الجوازة دي ولا ايه يا عم الحج ؟!
يس .. لا يابني راضي طبعا
شهاب .. طب اضحك بقي وبلاش التكشيرة اللي بتعصبني دي !! ولا اقلك تعرف تزغرد ؟!.
يس يتعجب من تلك الكلمة
يس .. ازغرد ازاي بس يابني ؟!
شهاب .. ايه يا عم يس بهزر معاك .. خد اشرب الشربات .. وانت يا عم المأذون مش كتبت الكتاب وشربت الشربات كمان .. هوينا بقي
المأذون يبدوا قلقا .. طب مش كنا ناخد رأي العروسة افضل ؟!
شهاب .. تاني ؟! وبعد ما كتبنا الكتاب خلاص !! يفيد بأية رأي العروسة دلوقتي ؟! وبعدين ما قلتلك انها موافقة بدليل انها وكلت ابوها عشان يكتب الكتاب .. صح يا عم يس ؟
يس .. اه ؟!
شهاب .. ايه هو اللي اه ؟! بقلك انت مش بنتك وكلتك عشان تكتب الكتاب .. صح ولا لا ؟
يس .. صح .. صح
شهاب .. شفت بقي !! بطل رط يا عم الشيخ وروح اتوكل علي الله عشان متعصبنيش انت كمان
المأذون .. طيب الامر لله .. سلاموا عليكم
شهاب .. وعليكم السلام يا سيدي .. قلي يا عم يس هاتجيب العروسة امتي هنا ؟!
يس .. اديني فرصة يابني افاتحها في الموضوع وهاجبهالك لحد عندك حاضر
شهاب .. تمام .. بس متطولش وحيات ابوك حكم انا مشتاقلها اوي وبحلم بيها ليل ونهار .. يلا بالسلامة انت كمان
يس .. طب وزينب ؟!
شهاب .. مالها زينب ؟!
يس .. انت وعدتني انه بعد كتب الكتاب هاتخرجها من القضية اللي هي لابساها ؟!
شهاب .. وانا عند وعدي .. اعتبرها في البيت خلاص.. يلا بقي مع السلامة عشان مستني ضيوف جايللي ..
واثناء خروجه من الشقة يري فتاه عشرينية جميلة ترتدي ملابس فاضحة تدخل الي الشقة فتصطدم به
الفتاه .. ايه يا عم الحج مش تفتح ؟!
يس .. اسف يا بنتي اصلي تعبان شوية
الفتاه .. لا سلامتك يابا .. مين ده يا شهاب ؟!
شهاب بسخرية . ده حمايا العزيز!!
الفتاه مندهشة .. يااااه .. هو ده حماك ؟! هههههه .. ماله مبهدل في نفسه ليه كده ؟! شبه عبد المنعم مدبولي في ابنائي الاعزاء شكرا !!
شهاب .. علي اد حاله بقي !!
الفتاه .. يلا مش بطال .. مبروك يا عمو وبالرفاء والبنين .. هههههه
يس متأثرا .. الله يبارك فيكي يابنتي ..
شهاب .. اوعي مخك يروح بعيد يا عم الحج .. فاتن دي تصبيرة كدا لحد ما تجيبلي العروسة .. كأنك ماشفتش حاجة .. تمام ؟ .. يلا بالسلامة انت يا عم يس وخد الباب في ايدك ..
يخرج يس ويغلق باب الشقة خلفة ثم يسمع الفتاه تضحك بصوت عالي وتقول
الفتاه .. اي .. عيب كده يا شهاب !! طب استني اغير هدومي !! هو انت علطول مستعجل كده ؟!
يس تدمع عينيه بعد سماع تلك الكلمات ثم ينصرف ..
ونذهب الي مازن حيث قامت ساندي بالتغيير علي الجرح ..
ساندي .. لا بقينا تمام اوي اهوه والجرح بدأ يلم كمان
ممتاز .. الفضل يرجع ليكي
ساندي .. الفضل في الاول وف الاخر ل ربنا .. قول الحمد لله
ممتاز .. الحمد لله .. بس انا بردوا عايز اعرف انتي مين وليه ساعدتيني بالشكل ده ؟!
ساندي .. ما قلتلك بلاش اسئلة كتير يا حضرة الظابط ؟! لأني مش هجاوب عليها
ممتاز .. مش هتجاوبي ليه ؟! عايز افهم ؟! هو انتي بتشتغلي مع ناس انا اعرفهم عشان كده مش عايزة تقولي ؟!!
ساندي .. مش هتجاوب بردوا !!
ممتاز .. طب انتي بتشتغلي ايه ؟!
ساندي .. رقاصة
ممتاز .. رقاصة ؟!
ساندي .. ايوا رقاصة !! مالك استغربت ليه كدا ؟!
ممتاز .. لا ما استغربتش ولا حاجة .. انا توقعت كده بردوا من الصور اللي هنا .. طب مين دي اللي في الصورة ؟! ( يقصد الطفلة التي عمرها ٥ سنين )
ساندي .. دي ندي بنتي
ممتاز .. طب هي فين ؟! انا ماشوفتهاش لدلوقتي ؟!
ساندي .. ولا هتشوفها !! هههه .. لأنها ماتت من سنة تقريبا
ممتاز متأثرا .. الله يرحمها .. بس امورة اوي
ساندي .. كانت كل حاجة في حياتي مش مجرد بنتي وبس .. كانت بنتي وامي واختي وصحبتي وكل حاجة
ممتاز .. ممكن اعرف ماتت ازاي ؟!
ساندي .. اتقتلت !!
ممتاز مصدوم .. اتقتلت ازاي ؟!
ساندي .. دي حكاية طويلة بقي .. ومش وقتها خالص !! اقوم احضرلك الغدا
ممتاز .. مش هتقولي بردوا انتي مين وايه حكايتك ؟!
ساندي ..تؤتؤ .. علي فكرة في حاجات كتير حصلت اليومين دول لازم تعرفها عشان تشوف هتتصرف ازاي .. نتغدي الاول وبعد كده احكيلك كل حاجة .. بعد ازنك
وتنصرف ساندي وتترك ممتاز وحدة في الغرفة .. بعدها ممتاز يبحث عن علبة السجائر فلا يجدها بجواره ولكن يلمحها علي المنضدة بعيدا عنه ينادي علي ساندي كي تحضرها له
ممتاز .. ساندي .. ساندي
ساندي لا تسمعه لأنها بالمطبخ فيقرر ان يقوم هو ويحضر علبة السجائر بنفسة واثناء قيامه يده تصطدم بالبرواز الموجود علي الكوميدينو والذي بداخلة صورة ساندي وابنتها ندي فيسقط علي الارض ويتحطم
ممتاز .. اوووه .. ليه بس كدا ؟!
ثم ينزل الي الارض ليجمع اجزاء البرواز المحطم فيجد صورة اخري علي الارض مقلوبة ويبدوا انها كانت موجودة في نفس البرواز ولكن كانت غير ظاهره .. يعدل الصورة ليفاجأ بأنها صورة ل ساندي وابنتها ندي والنقيب شهاب ؟؟؟!!
رد فعل علي وجه ممتاز ..
