رواية اغتصاب شرعى الجزء الثاني الفصل الثامن عشر
شهاب يذهب الي رضا زوجة عوض ويطرق باب الشقة وتفتح رضا الباب وتندهش عند رؤيته
رضا .. شهاب باشا ؟!
شهاب يحمل في يده كيس بداخلة كباب وكفته وكيس اخر بداخلة تفاح احمر وعنب ثم يتقدم الي الداخل فيجد اولادها يجلسون علي الطبلية يأكلون جبن قريش فقط
شهاب .. ازيك يا رضا عاملة ايه ؟
رضا .. بخير يا باشا .. نحمده علي كل حال
شهاب .. ايه ده !! انتي بتعشي عيالك جبنة قريش ؟!
رضا .. فضل ونعمة ياباشا .. بس تدوم !!
شهاب .. طب خدي اكليهم كباب وكفته .. وخليهم بعد يحلوا ب عنب وتفاح امريكاني .. امسكي يا رضا
رضا مترددة ولكنها تأخذهم في النهاية .. من يد ما نعدمها يا باشا .. خدوا يا ولاد اتعشوا كباب وكفته .. الباشا جايبهم عشانكم
الاولاد يخطفون الاكياس من يد امهم ثم يأكلون ما بداخلهم من طعام بكل شراهه
شهاب .. قليلي .. ناقصك حاجة اجيبهالك ؟! اصل انا وعدت جوزك ان اي حاجة تعوزيها انفذهالك علطول
رضا .. انا عايزة جوزي ياباشا يرجع يبات وسطنا تاني
شهاب .. اه .. ان شاء الله هيرجع يبات وسطكم تاني .. متقلقيش يا رضا اعتبرية سافر كام سنة كدا الكويت يكون نفسه وراجع تاني .. امسكي يا رضا
رضا .. ايه دول يا باشا ؟!
شهاب .. فلوس يا رضا .. هيكون ايه يعني ؟! امسكي دول عشر تلاف جنية .. شوفي لو ناقصك حاجة ولا الولاد ناقصهم حاجة هاتيها .. وان شاء الله هيوصلك زيهم كل شهر .. امسكي يا رضا
رضا تأخذ المال .. تشكر يا باشا
شهاب .. لا يا رضا متشكرنيش.. ده حق عوض وعشان كمان تعرفي ان شهاب مبينساش رجالته وانه لما بيوعد بيوفي
رضا .. انا اهم وعد عندي دلوقتي يا باشا ان جوزي يرجع البيت تاني مش ابص الاقيه في الاخر اخد اعدام ولا مؤبد !!
شهاب .. لا متخافيش يا رضا .. انا وعدتكم ان اقصاها ٥ سنين كأنه بالظبط اعارة في الخليج .. وهيرجع بيته معزز مكرم ومعاه مبلغ حلو كمان
رضا .. وعد ياباشا ؟!
شهاب .. جري ايه يا رضا انا مش بحب اعيد الكلام اللي بقوله كتير ؟! وعشان خاطرك هاقول تاني .. وعد يا رضا .. مبسوطة ؟!
رضا .. تمام يا باشا
شهاب .. طيب بالاذن انا بقي ولو عزتي حاجة نمرة تليفوني معاكي .. كلميني في اي وقت متتكسفيش
رضا .. تسلم يا باشا
شهاب يربط علي كتفها بطريقة تستفز رضا ويقول .. لا دانتي تؤمريني يا رضا .. انتي متعرفيش غلاوتك عندي اد ايه
رضا ترفع يده عن كتفها وتقول .. الله يعزك يا باشا
شهاب يدرك انها فهمت مقصده فيحاول تدارك الامر قائلا .. طيب سلام يا رضا .. سلام يا ولاد
ثم ينصرف
رضا .. مع السلامة يا باشا .. اتفووه
ثم تغلق باب الشقة
*المشهد الثاني*
عوض ما زال جالسا امام وكيل النيابة ايمن خطاب لأستكمال التحقيق معه
الوكيل .. طب يا عوض انت بتقول انك قتلت سيد بالمسدس ودا واضح طبعا في تقرير الطب الشرعي .. فين بقي المسدس ده اللي انت استخدمته في الجريمة ؟!
عوض .. مخبيه في البيت عندي يا باشا
الوكيل .. مفيش مشكلة نروح نجيبه سوا .. طب والسكين اللي انت قتلت بيها حسن ابن سيد حطيت عليها بصمات زينب مرات يس ازاي ؟!
عوض .. هاقول لسعتك يا باشا .. انا قبل الحادثة بيومين بعت ابني الكبير عادل لحد بيت يس علي اساس انه بياع ادوات منزلية متجول .. حلل بقي وصواني وسكاكين مطبخ وكده .. في الوقت ده كنت عارف ان زينب لوحدها في البيت فقام مخبط عليها باب البيت فقامت فاتحة الباب فراح موريها البضاعة اللي معاه ومنها طبعا مجموعة سكاكين مطبخ .. وطبعا زي اي زبون بيتفرج علي بضاعة لازم يمسكها بإيده ويقلب فيها وده اللي حصل بالظبط مسكت كذا سكينة لحد ما عاجبتها واحدة واشتريتها واشترت كمان معاهم شوية طباق ومعالق .. بس الواد باعلها الحاجة ورجع بالسكاكين اللي مسكتها بإيديها وبقي عليها بصماتها .. فأنا اخدت واحدة منهم وقتلت بيها حسن
الوكيل مندهشا من كلام عوض .. طيب يا عوض انت كده عرفتني ازاي قتلته وازاي قدرت تخلي بصمات زينب هي اللي ع السكين .. فاضل بقي تقلي جثة حسن نزلت ازاي في البدروم بتاع بيت يس ؟!!
*المشهد الثالث*
ممتاز في قمة الدهشة لا يصدق ما اخبرته به ساندي
ممتاز .. بقي اختي انا شغالة مع شهاب ؟!
ساندي .. للأسف هي دي الحقيقة !!
ممتاز .. طب ليه ؟! ايه اللي يخليها تعمل حاجة زي دي ؟! ازاي اهون عليها بالسهوله دي ؟! ده انا طول عمري بخاف عليها من الهوا الطاير !! دي لما اتصلت بيا وقالتلي انها مخطوفة انا جريت عليها زي المجنون !!
ساندي .. كانت تمثيلية علي فكرة !!
ممتاز .. تمثيلية ؟!
ساندي .. ايوه .. كل اللي حصل وقتها ده كان مجرد تمثيلية عليك باتفاق مع شهاب طبعا عشان تستدرجك للعنوان اللي قالتلك عليه وهناك يضربوك ويخدروك ويعملوا شوية حاجات كده عشان تبان فعلا ان خطفت بثينه واغتصبتها ف لما تعمل بلاغ ضدك .. كلامها يطلع مظبوط
ممتاز .. اختي انا تعمل فيا كده ؟! ليه بس يا نور ؟!
ساندي .. متستغربش اي حاجة تحصل في الزمن ده .. اللي خلي اب هان عليه بنته وقتلها لمجرد انه مش عاوزها تتكتب بأسمه والناس تعرف ان ليه بنت !! وعلي فكرة اختك عملت ده كله لأنها بتحب شهاب
ممتاز .. بتحبه ؟!
ساندي .. ايوه ضحك عليها ووهمها انه بيحبها وخلاها تتعلق بيه عشان في الاخر تبقي خاتم في صباعه ويقدر يتحكم فيها زي ما هو عايز .. يعني لو قالها ارمي نفسك في النيل .. مش هتتردد ثانيه
ممتاز .. الشيطان الملعون !! هو عايز مني ايه بالظبط ؟! ليه جواه الغل والكره ده كله من ناحيتي ؟! كل ده عشان طلقت اخته بعد ما الحياه بقت مستحيلة بينا ؟!
ساندي .. علي فكرة هو فيه سبب تاني ويمكن يكون هو الاهم
ممتاز .. ايه هو ؟!
ساندي .. مقدرش اقول للأسف
ممتاز .. ليه متقدريش تقولي ؟! انتي قلتيلي كل حاجة اشمعني ده هاتخبيه عليا ؟!
ساندي .. بص هو انت اكيد هاتعرف في يوم من الايام .. انا متأكدة من ده كويس ..
ممتاز .. هاعرف ايه بالظبط ؟! اتكلمي
ساندي .. ارجوك بلاش انا اللي اقلك وبعدين الافضل تركز في اللي انت فيه دلوقتي عشان تعرف تتصرف بلاش تشتت بالك بأكتر من حاجة .. دي نصيحتي ليك
ممتاز .. انا عايز اعرف دلوقتي حالا .. ايه اللي انتي مخبياه عليا يا ساندي .. وليه الحاجة دي بالذات مش عايزة تقوليهالي ؟!
ساندي .. لأنه موضوع حساس جدا وبعدين مش متأكدة اذا كان صح ولا غلط
ممتاز .. يعني ايه حساس جدا ؟! اتكلمي يا ساندي انا اعصابي مش ناقصة ارجوكي
ساندي .. هاقولك وامري لله
*المشهد الرابع*
عوض ما زال جالسا امام وكيل النيابة ايمن خطاب يستكمل مسرحيته الهزلية واعترافاته الكاذبة
الوكيل مندهشا .. يااااه .. دا انت طلعت داهية اوي يا عوض ؟! مع انه مش باين عليك خالص !! ايه التفكير الجهنمي ده ؟! لا يمكن يكون ده تفكيرك ابدا ؟! هو انت فيه حد بيخططلك يا عوض ؟!
عوض يرتبك .. ايه ؟! اه .. لا .. لا لا سعتك انا اللي خططت وانا اللي نفذت كل حاجة ..
الوكيل .. شئ غريب فعلا .. يبقي عشان توصل لمفاتيح البيت انتظرت لما واحد من صبيان يس اللي شغالين في المخبز راح عنده الصبح عشان ياخد مفاتيح المخبز قام طلعوا عليه اتنين جروا شكله ؟!
عوض .. ايوا سعتك بالظبط كده .. الاتنين دول كانوا مستنينوا تحت البيت بتاع يس واول ما نزل من فوق جروا شكله علطول وقامت خناقة بينهم في الوقت ده بقي كانت المفاتيح اتاخدت واتعمل عليها نسخة ورجعت مكانها في جيبة .. بعد كده بقي انا انتظرت لما البيت بقي هس ومفيهوش حد رحت هناك ومعايا جثة حسن ونزلتها البدروم ومشيت علطول
الوكيل .. اها .. والكلام ده حصل امتي بالظبط ؟!
عوض .. قبل ما يأجر البدروم بيوم واحد ويكتشف ان فيه جثة !!
الوكيل .. يعني انت كنت عارف انه هيأجر البدروم وانهم هينزلوا يوضبوه ويكتشوفوا حكاية الجثة دي ؟!
عوض .. لا سعتك .. وانا هاعرف منين ؟! الموضوع ده جه بالصدفة .. بصراحة انا كنت ناوي ابلغ ان الجثة في بيت يس
الوكيل ..اها .. قلي كده بقي .. بس انا فيه حاجة محيراني يا عوض ؟!
عوض .. ايه هي يا باشا ؟
الوكيل .. بعد ما جثة حسن اتعرضت ع الطب الشرعي قالوا ان الجثة بدأت تتحلل وان الوفاه مر عليها اكتر اسبوعين وانت بتقول انك نزلتها البدروم وتاني يوم تم اكتشاف الجثة !! هو انت قتلت حسن واستنيت اسبوعين عشان تنفذ خطتك ؟! وفي خلال المدة دي الجثة كانت فين ؟!
عوض يرتبك .. اه ؟!
الوكيل .. ايه مالك .. ارتبكت ليه كده ؟!
عوض .. لا مش ارتبكت ولا حاجة .. هو انا فعلا بعد ما قتلت حسن منفذتش خططتي علطول .. لأن موضوع القتل ده جه فجأة كده
الوكيل .. جه فجأة ازاي وانت بتقول انك كنت مرتب مع بثينه انكم تقتلوا حسن وابوه ؟!
عوض .. ايوه سعتك .. كنا متفقين اه .. بس مكناش محددين وقت معين .. قتل حسن جه فجأة كده
الوكيل .. جه فجأة ازاي ؟!
عوض .. اليوم ده حسن راح عند بثينه واتخانق معاها بسببي بعد ما طبعا جه واتهجم عليا في بيتي وضربني قدام مراتي وعيالي .. وطلب منها انها تبعد عني وعن ابوه كمان وان دي اخر فرصة ليها .. وانها هتفضل طول عمرها بتاعته هو وبس .. طبعا هي جرت ناعم عشان يهدي ويطمنلها وخليته عدم لا مؤاخذة ينام معاها وهدت حيلة بصراحة اليوم ده فنام زي القتيل بعدها اتصلت عليا ورحت فعلا وقتلته
الوكيل .. قلي يا عوض .. هو انت لما رحت عند بثينه الشقة عشان تقتل حسن .. امها كانت موجودة في الشقة في الوقت ده ؟!
عوض يرتبك .. اه ؟! امها ؟! انا بصراحة ما اخدش بالي لحاجة زي دي ؟!
الوكيل .. ما اخدتش بالك ازاي وامها ست كبيرة وقعيدة الفراش يعني مش بتتحرك خالص من السرير
عوض .. اه .. ايوه ايوه .. افتكرت .. امها فعلا كانت موجودة بس كانت في اوضتها طبعا .. ما حضرتك بتقول اهوه ست كبيرة ومبتتحركش من فرشتها
الوكيل مندهشا .. اها .. انت تعرف انه ا
تم العثور علي جثة سيدة شبه متحللة وبعد العرض ع الطب الشرعي اثبت انها مقتوله بعدة طعنات متفرقة بأستخدام سكين وتحريات المحابث اثبتت ان دي جثة لسيدة تدعي اعتماد
عوض .. مين اعتماد دي سعتك ؟!
الوكيل .. دي تبقي ام بثينه صحبتك ؟! الست المريضة اللي مبتنحركش ابدا من السرير !!
عوض مصدوما .. ايه ؟!
الوكيل .. ايوه .. والغريب في الموضوع بقي ان توقيت الوفاه قريب جدا من نفس توقيت الوفاه بتاع حسن !!
عوض .. عدم لا مؤاخذة مش فاهم حضرتك تقصد ايه ؟!
الوكيل .. يعني اعتماد وحسن اتقتلوا تقريبا في نفس التوقيت !! السؤال هنا بقي .. انت اللي قتلت الحاجة اعتماد ام بثينه ؟! صح يا عوض ؟!
عوض مصدوم بشدة وبشعر بأنه قد اغرق نفسه .. ايه ؟!
عوض .. لا ياباشا .. انا مقتلتش اللي اسمها عطيات دي ولا اعرف عنها حاجة !!
الوكيل .. ازاي بقي يا عوض وتقرير الطب الشرعي بيقول ان السلاح الحاد المستخدم في قتل حسن هو نفسه المستخدم في قتل عطيات .. يعني القاتل واحد يا عوض ؟!
عوض .. ايه ؟! يادي المصيبة السودا !!
الوكيل .. فيه حاجة يا عوض ؟!
عوض يبكي .. مفيش يا باشا .. عليه العوض ومنه العوض فيك يا عوض !!
*المشهد الخامس*
سارة في منزل ابيها داخل المطبخ تُعد الطعام لأبيها وفجأة يطرق باب الشقة فتذهب وهي تحمل كبشة الطعام في يدها كي تفتح الباب فتفاجأ ب شهاب
شهاب .. صباح الفل
سارة مندهشة .. صباح النور
شهاب .. ايه بتطبخي ولا ايه ؟! الله .. ريحة طبيخك تجنن !! اظاهر حماتي بتحبني
سارة متوترة ولا ترد
شهاب .. ايه مفيش اتفضل ؟!
سارة .. بابا مش هنا معلش ومفيش حد في البيت غيري
شهاب .. بجد ؟! ايه الصدف الحلوة دي !! دي مش حماتي بس اللي بتحبني .. اظاهر كمان امي دعيالي !!
ثم يتقدم الي الداخل وسارة ترجع الي الخلف في دهشة شديدة من فعل شهاب .. شهاب يغلق باب الشقة
سارة .. قلت لحضرتك بابا مش هنا !!
شهاب .. وايه المشكلة ؟! انا مش غريب
سارة .. من فضلك يا شهاب بيه اتفضل امشي لو سمحت
شهاب .. انتي خايفة مني ولا ايه ؟!
سارة .. لا طبعا .. انا مش خايفة ولا حاجة .. بس وجود حضرتك هنا وبابا مش موجود ميصحش .. وبعدين بابا هيزعل لما يعرف ان حضرتك دخلت في عدم وجوده
شهاب .. ما قلنا بلاش كلمة حضرتك دي !! وبعدين متخافيش بابا مش هيزعل ولا حاجة .. بالعكس ده هيفرح اوي اني كنت هنا
سارة .. هيفرح ازاي يعني ؟!
شهاب .. هيفرح بقي وخلاص
شهاب يقترب من سارة ..
سارة .. من فضلك خليك مكانك ومتقربش مني لو سمحت !!
شهاب .. انتي مالك تقلانه ليه عليا كده ؟! ده انا مفيش واحدة تستجري تعاملني بالطريقة اللي انتي بتعامليني بيها دي ابدا !! انا مش عارف ليه ساكت عليكي ؟!
سارة .. من فضلك لو سمحت خليك واقف مكانك
سارة ينتهي بها الرجوع الي الوراء الي انها اصطدمت بالحائط فتدرك انه لا مفر من شهاب .. شهاب يقترب منها اكثر
شهاب .. يا بت اعقلي بقي انا بحبك !!
سارة .. شهاب بيه لو سمحت ارجع لوري
شهاب .. لا مش هرجع يا سارة .. وريني بقي هاتعملي ايه
سارة .. لو سمحت متخلنيش اتصرف تصرف يضايقك
شهاب .. هاتضربيني يعني ولا ايه ؟!
سارة .. شهاب بيه لو سمحت متوترنيش اكتر من كده !!
شهاب .. وتتوتري ليه بس ؟! خليكى ريلاكس كده وسيبيلي نفسك ع الاخر
سارة .. لو سمحت كفاية بقي
ثم تضربة بالكبشة التي في يدها علي رأسه
شهاب يتألم .. اه .. انتي بتضربيني بجد ؟! انتي اتجننتي يا سارة ؟!
سارة .. من فضلك امشي اطلع برة عشان ما اصوتش والم عليك الناس واحترم نفسك بقي
شهاب .. احترم نفسي ؟! بقي كده يا سارة .. طيب انتي بقي اللي جبتيه لنفسك .. تعاليلي بقي
سارة .. ابعد عني بقلك
وفجأة يدخل يس فيري هذا المنظر .. ساره تجري نحوه تحتمي به
سارة .. الحقني يا بابا .. حضرت الظابط جاي يتهجم عليا وحضرتك مش موجود !!
يس ينظر اليه وشهاب ينظر اليه ايضا في غضب شديد .. يس لم يصدر منه اي رد فعل وبكتفي بأن ينظر الي الارض .. سارة تلاحظ ذلك فتندهش بشدة .. شهاب يغادر المنزل وهو ينظر الي سارة وابيها نظرة غضب ويقول
شهاب .. ماشي يا سارة .. هتروحي مني فين ؟!
سارة ما زالت مندهشة من رد فعل ابيها السلبي فتسأله في حيرة شديدة ودهشة
سارة .. بابا .. هو ايه الحكاية بالظبط ؟!!
