رواية تحت التهديد الفصل الثانى بقلم ليل ادم
بعد رجوع عم طارق
عبده: خد ياعم طارق أنا طلعت ٣٠٠ جنيه عيش
عم طارق: خد خلي دي معاك يا عبده
عبده: مش عايز والله يا عم طارق خيرك مغرقنا
عم طارق: ياض امسك
عبده : ست عائشه سابت الورقه دي ليك قالتلي لما عمك طارق يجي أديله الورقه دي
عم طارق: اه تبقا طلبات وريني (وبيفتح الورقه ) ادي ٣٠٠ جنيه طاروا ياعم عبده
عبده : ربنا يخليك ليهم يا عم طارق
عم طارق: خد الورقه دي يا عبده هات اللي مكتوب فيها و أبعته البيت
عبده : حاضر يا عم طارق
سويقه : عم طارق أنا هرجع النهارده متأخر لو كده خلي معاك الفلوس ل بكره
عم طارق: لا خد فلوسك ياعم سويقه امسك
سويقه: تسلم ايدك يا عم طارق
عم طارق: مال وشك ياض اي ده
سويقه : لا مفيش ياعم طارق
عم طارق: هو ضربك تاني
سويقه : والله ما كلمته ياعم طارق أنا وقعت بالعجله والعيش وقع على الأرض هو شاف المنظر قام بدال ما يمد ايده يقومني مد ايده عليا
عم طارق: سويقه عينك في عيني وانت بتتكلم
سويقه: مقدرش اكدب عليك ياعم طارق أنا تربيتك
عم طارق: سيب العجله جمب الفرشه هنا
سويقه: حاضر يا عم طارق بس في اي
عم طارق: (حط ايده علي كتف سويقه ) تعالا معايا
وخد سويقه على فرن المعلم رياض
المعلم رياض: عم طارق منور الدنيا والله اوعا يكون ابن الكلب ده مزعلك
طارق: هو لو مزعلني هاجي اشتكي ما تظبط يا رياض
المعلم رياض: ها لا معلش حقك عليا يا عم طارق مش القصد والله
عم طارق: أنا جاي معاك في سلام يا رياض ايدك لو جت على سويقه تاني هقطعه وصلت
المعلم رياض: والله ما
عم طارق: رياض أنا مش جاي اخد وادي معاك اللي عندي قولته وانت سمعته تعمل بيه بدال ما تعجز يا رياض خصم عليك فلوس يا سويقه
سويقه : حق الناقله كلها والله يا عم طارق
عم طارق: الناقله تعمل ٤٠٠ جنيه انت ٢٠٠ و سويقه ٢٠٠ يا رياض
المعلم رياض: اللي تشوفه ياعم طارق
عم طارق: أمسك
المعلم رياض: اي ده ياعم طارق
عم طارق: ٢٠٠ جنيه بتوع سويقه حن شويه الواد يتيم اب وام خليك حسيس
المعلم رياض: عليه اليمين ما اخد منك جنيه ياعم طارق دي كفايه دخلتك الفرنه
عم طارق: وأنا مش مراتك علشان تحلف عليا يمين فلوسك معاك سويقه ميجيش يشتكي تاني منك يا رياض
المعلم رياض: امرك يا عم طارق
عم طارق: سلام عليكم
سويقه :(جري ورا عم طارق) عم طارق
عم طارق: عايز اي يا سويقه
سويقه : خلي بالك أنا ابويا مش ميت أنا ابويا عم طارق منصور
عم طارق: (مبتسم) ماشي ياعم سويقه بس علشان احبك تخلي بالك من مال الناس اللي عملته غصب عنك عارف بس انت بتجري بالعجله وتدخل وسط العربيات ومليون مره اقولك بلاش
سويقه: حقك عليا يا عم طارق
عم طارق: ماشي يا عم سويقه سلام
سويقه : سلام
عبده : عم طارق الناس على وصول الست عائشه بتقولك حاول ترجع الوقتي
عم طارق: عندك حاجه يا عبده ولا فاضي
عبده : لا فاضي ياعم طارق
عم طارق: خلاص روح كمل يومك على الفرشه وعدي عليا اخر النهار
عبده: حاضر يا عم طارق
ورجع طارق ع منزله كان أهل المنطقة علقوا كهارب و أضواء بدون علم عم طارق
عم طارق: اي ده الف مبروك يا رجاله ليله مين دي
شاب من المنطقة: لا ياعم طارق دا علشان ست عزه
عم طارق: ليه كده بس ياجدعان والله ما عارف اقول اي
أتلم الشباب حوالين عم طارق لتهنئته وكبار المنطقة وسط دخول عربيه فخمه نزل منها العريس ومعاه والده و أمه
عم طارق: بعد اذنكم يا رجاله معلش والله مش عايز اسيبكم بس الناس جت
المعلم فرج : احنا قاعدين تحت هنا ياعم طارق روح انت
عم طارق: أهلا وسهلا نورت يا خالد بيه اتفضل
الأب: يزيد فضلك
عم طارق: منوره ياست الكل منور يا علاء
علاء: بنورك ياعم طارق
بعد الصعود إلى المنزل والترحيب
الأب: ندخل في الموضوع
عم طارق: اللي تشوفه يا استاذ خالد
الأب: أنا سألت عنك قبل ما اجي وعرفت انت مين ياعم طارق بس حابب اعرفك نفسي
عم طارق: (سند ضهره على الكرسي وانتبه الي كلام الوالد ) اقولك أنا
الأب : (مبتسم) قول
عم طارق: خالد بيه عزت لواء سابق ٥٢ سنه من السبتيه وربنا فتح عليك روحت التجمع طالع من الخدمه بقالك سبع سنين فاتح شركه حراسه عايش منها
استاذ خالد: دا انت روحت السجل بقا
عم طارق: (غمز بعينه ل خالد بيه) عم طارق ميروحش سجل السجل اللي يجي ل عم طارق متقلقش يا خالد بيه مش هديك عزه إلا لما اعرف اصلك وفصلك
خالد بيه : أنا برضوه اعرف عنك كل حاجه يا عم طارق
عم طارق: طبعاً لازم تعرف عني مفيش حد ميعرفش طارق منصور
علاء: (حس أن الموضوع ممكن يبوظ ) اااااااااي يا بابا مش هنتكلم في التفاصيل
الأب: نتكلم مفيش مانع طلباتك ياعم طارق
عم طارق: تلاته تلات طلبات مش اكتر منهم(ورفع تلات اصابع)
الأب: اتفضل
عم طارق:واحد تتقي ربنا فيها اتنين انت واخدها ورده مفتحه تحافظ عليها طول عمرك تفضل ليك ورده مفتحه تهمل فيها أزعل أنا منك وأنا مش بحب ازعل يا علاء تلاته اوعا تفتكر علشان دخلت خدتها من منطقة شعبية أنها جعانه أو احنا ناس فقيره اي حاجه عندك جديده عند بنتي في دولابها زهقت لعب بيها
الأب: (بيضحك) ابني راجل متعلم ومتربي ياعم طارق معنديش راجل يضرب حريم
عم طارق: وأنا معنديش حريم بتضرب نقرأ الفاتحه
بعد انتهاء اليله أثناء عوده علاء وأهله الي المنزل
علاء: مالك يا ماما بس في اي
الأم: مفيش يا حبيبي والله البنت ماشاء الله عليها حلوه جدا ومتربيه بس ابوها مقلق اوي تحس أنه شخصية غامضة قويه جدا كلامه قليل بس حازم جدا انت اي رأيك يا خالد
الأب: من قبل ما اروح وأنا عارف طارق وقولت كل اللي عندي ابنك اللي مصمم يناسب مسجل
الأم: بس شكله مش مسجل خالص يا خالد شوفت الناس في المنطقة بتتعامل معاه اذاي تحسه صاحب المنطقة
الأب: محبوب كله بيقول عليه راجل ابن بلد وكلمته سيف
الأم: بس مش عارفه اي عم طارق دي دا سنه صغير يعني
الأب: اهو بقا يا مرفت مجايب ابنك
في جانب آخر
كابوريا: يعني اعمل يعني يا برازيلي اروح اسلم نفسي
برازيلي: اه يا كابوريا روح طالما عم طارق جالك لحد هنا واتكلم ببوقه يبقا لازم تسمع وتنفذ علشان النازله الجايه محدش حملها سواد الليل هيكون صعب عليك وعلى المحمودية كلها متخليش عم طارق يدخل يخطفك من وسطنا عيب يا كابوريا
كابوريا: خلاص ضم نفسك معايا نعلم عليه ونركب على كتافه
برازيلي: تركب على كتاف مين وتعلم على مين ياعم انت اهبل ده طارق منصور يا كابوريا
كابوريا: ما ياخد الروح اللي ربنا عيب الكلام ده يطلع من مسجل شقي زايك يا برازيلي
برازيلي: الله يعينك يا صاحبي على عم طارق
مرسي: خلاص عندي حل حلو
كابوريا: اي حاجه غير اني أسلم نفسي يا مرسي
مرسي: ياعم هو أنا جبت سيره حبسه الوقتي
برازيلي: قول يا مرسي
مرسي: اخلع من المحمودية كلها شهر شهرين سنه لحد ما عم طارق ينسا الموضوع
كابوريا: أنا لو خلعت هبقا لبانه في لسان الناس دي كلها يا مرسي
برازيلي: اسكت بس هو اي هري ( وقام من على الكرسي) ورحمه امي لو دخلت بطن أمك هيخطفك يا كابوريا عم طارق مبينساش دورها في دماغك يا اخويا علشان المهله قربت اوي سلام
في جانب آخر
عم طارق: ( طلع تليفونه) ألو
محمد بيه: عم طارق الساعه ١٢ والواد مجاش
عم طارق: محمد بيه انا اللي متصل بيك مش انت اللي متصل نص ساعة تكون عند المستشفى التخصصي تستلم كابوريا من رعد
محمد بيه: ماشي يا عم طارق
عم طارق: سلام
قام عم طارق نزل من بيته فك قيود رعد
حارسه الشخصي كلبه المفترس هجين أسود ممنوع من السير في الشارع ومع كل خطوه من عم طارق تجاه المحمودية كان كابوريا لامم شباب من المنطقة بدون علمهم أن الطرف الآخر طارق منصور
برازيلي: ألو
عم طارق: نعم يا برازيلي
برازيلي: أنا عارف انك جاي بالله عليك بلاش علشان خاطري شكلنا كلنا مش هيبقا حلو يرضيك حد يقول على اخوتك الصغيرين هلس
عم طارق: برازيلي معنديش في الحق خواطر ولو عايز تركب السفينه مع ابن بلدك روح اركب أنا جاي أغرقها باللي فيها
برازيلي: الو الو عم طارق وربنا أنا مليش في ألو
مرسي: قالك اي
برازيلي: قفل في وشي وحطني مع كابوريا
مرسي: كلمه تاني طب فهمه
برازيلي: مقدرش أكلمه بعد ما قفل لو كلمته هحط نفسي أنا هستنه هناك في الشارع وهقف جمبه ل يحطني في رأسه
وبمجرد وصول عم طارق الي المحمودية عرفت أهل المنطقة أن الطرف الآخر طارق منصور ابتعدوا عن كابوريا وبقا وحيد أمام طارق منصور و رعد
توقف عم طارق ونظر إلى رعد وقلع ساعته
عم طارق: رعد مكانك ( واقترب من كابوريا)
كابوريا: والله ياعم طارق كنت جايلك
عم طارق: هشششس ( وبدون حديث بدأ عرض مؤلم و مهين وأكثر شراسة من عم طارق على كابوريا أمام كل اهل المحموديه وسط فرحه معظم أهل المنطقه بعد ما طارق شفا غلهم من ظلم كابوريا عليهم انتها الموضوع بفقد كابوريا وعيه ووقع على الارض دخل عم طارق قهوه خد فارغ الشيشه مليان مياه وصب الماء على رأس كابوريا حتي استفاق ولبس ساعته ونظر الى حارسه الشخصي)
عم طارق: رعد هاته
قام رعد ك الأسد بأمر عم طارق وقفل فمه على زراع كابوريا وشده يمش بيه ورا عم طارق وسط صريخ كابوريا من ألمه
كابوريا: درعي هيتقطع ياعم طارق ورحمه ابوك خلي رعد يسيب دراعي
عم طارق: (بصوت عالي) امشي ياض
وخرج عم طارق أمام كل اهل المنطقة و خلفه رعد جارر كابوريا من دراعه بكل شراسه وسط حديث الجميع عن ما فعله طارق ب الظالم كابوريا وفرحتهم ب عم طارق حتا وصل إلى المستشفى التخصصي لحظه دخول محمد بيه
محمد بيه: ( نظره صدمه أمام جبروت طارق منصور) خلي رعد يسيبه ياعم طارق
عم طارق: الحاجة بتاعت مين ياض
كابوريا: بتاعتي وربنا حقك عليا يا عم طارق والله العظيم كنت جاي
عم طارق: (بصوت عالي) رعد
فك رعد زراع كابوريا من فمه ووقف تحت رجل عم طارق ربط عم طارق قيود رعد وعاد بيه الي المنزل
في اليوم التالي
عزه : بابا أنا نازله الجامعة
عم طارق: ماشي يا حبيبتي خلي بالك من نفسك خدي خلي الفلوس دي معاكي
عزه : بابا هو ينفع علاء يرجعني بالعربيه لحد هنا
عم طارق: أول ما تركبي معاه رني عليا ويخدك على هنا أنا متفق معاهم معنديش خروج ودخول اتفقنا
عزه: بحبك يا عم طارق
عائشه: هو في حد ميحبش عم طارق يا هبله
عم طارق: اه هقعد في التطبيل ده أنا بقا (وبيضحك)
عائشه: ياساتر عليك يا طارق جايبني وحافظ دماغي
عم طارق: تربيه ايدي دي يابت يا عزه
عزه : منا عارفه هيا عيوشه تقدر تخبي عني. حاجه
عم طارق: قولي يا عيوشه عايزه اي
عائشه: كنت عايزه انزل اشتري
عم طارق: مش عايز اعرف قولي على طول عايزه كام
عائشه: ألف جنيه بس
عم طارق: بس
عائشه: اه تخيل
عم طارق: تحت امرك يا ست عيوشه يا بكريه طارق امسكي
عزه : اي ده أما هيا بكريه أنا اي
عم طارق: انتي تيجي معايا وهقولك تحت. انتي اي
بعد النزول إلى الشارع
عم طارق: أطلبي اوبر من هنا
عزه : حاضر يا حبيبي
عم طارق: اروح اشوف شغلي أنا
عزه : حاضر يا حبيبي ربنا معاك
بعد وصول عم طارق الي فرشته
عبده : صباح الورد ياعم طارق
عم طارق: اي ده يا عبده انت عجبك الشغل معايا بقا
عبده : اه طبعا حد ميحبش الشغل مع عم طارق
عم طارق: سويقه جاب كام رغيف النهارده
عبده : ٦٠٠ طلع منهم٢٠٠ الفلوس في الصندوق
عم طارق: فطرت ياض
عبده : لا مستنيك
عم طارق: يخربيت عقلك الساعه واحده الضهر انت قاعد من الصبح مستنيني ما انت عارف ست عائشه مش بتنزلني إلا لما افطر
عبده : لا وربنا ياعم طارق مليش في أنا مستنيك احكم ما بنا بعدل ربنا
عم طارق: (بيضحك) خلاص ياعم عبده امسك روح شكل شويه جبن وهات سويقه وحريقه وتعالا نفطر سوا
برازيلي: صباح الخير يا عم طارق
عم طارق: بص ل برازيلي بدون رد ولف وشه ل عبده روح انت يا عبده
عبده : تحت امرك يا معلم
برازيلي: وكتاب الله يابا أنا ولا اقدر ارفع عيني فيك أنا كنت عشمان في أبويه والله
عم طارق: وانا معنديش في الحق عشم يا برازيلي الحق حبيب الله
برازيلي: طب أنا جيت ل ابويا أتأسف معقول يعني همشي من عند ابويا غضبان عني
عم طارق: شد الكرسي اقعد يا برازيلي نفطر مع بعض
برازيلي: تحت امرك يا عم طارق
عم طارق: صحيح في عيل طالع عندكم اسمه صقر عارفه
برازيلي: اه عارفه
عم طارق: لما ترجع قوله عم طارق عايزك بعد العشاء وعرفه عم طارق سمع عنك سمع مش خير وعايزه في كلمتين
برازيلي: من عيوني يا عم طارق اروح اجيبه طب الوقتي
عم طارق: قولت بعد العشاء
وبعد الانتهاء من الإفطار وعلى قرب العشاء كان عم طارق ذهب إلي المسجد
عم طارق: عبده لو جه واحد اسمه صقر سأل عني قوله يقعد لحد ما اجي وشوفه يشرب اي
عبده: تحت امرك يا عم طارق
بعد الانتهاء من الصلاة وخروج عم طارق
عم طارق: الله هو محدش جه يا عبده
عبده : لا ياعم طارق
طلع عم طارق تليفونه
عم طارق: يابني انت مقولتش للواد اني عايزه
برازيلي: وربنا قولت ياعم طارق
عم طارق: أما مجاش ليه
برازيلي: لحظه واحده اكلمه أشوفه فين
عم طارق: ماشي سلام
في جانب آخر
برازيلي: ألو
صقر : اي يا اخويا
برازيلي: انت فين يابني عم طارق لسه قافل معايا بيسأل عليك
صقر : ورب الكعبه أنا قصاد الفرشه بس مستني ينده عليا هو لسه خارج من الجامع وسلم عليا قولت استنا لما ينده عليا
برازيلي: يابني هو مش عارف شكلك استنا طب أكلمه
صقر: ماشي يا برازيلي
اتصل برازيلي ب عم طارق
عم طارق: ألو
برازيلي: الواد وقف عندك ياعم طارق مستني تنده عليه
عم طارق: هو أنا اعرفه يا برازيلي أصلا
برازيلي: والله بيقولي بالإمارة لسه عم طارق خارج من الجامع ومسا عليا وهو طالع
عم طارق: اه طب خلاص روح انت
برازيلي: تحت امرك يا عم طارق
عم طارق: صقر
صقر: نعم يا عم طارق
عم طارق: انت عبيط ياض ما تدخل تسلم عليا وتقعد
صقر : معلش يا عم طارق حقك عليا
عم طارق: لا ياحبيبي مفيش حاجه عبده شوف عمك صقر يشرب اي
عبده: ماشي يا معلم
صقر: اشرب شاي ياعم طارق
عم طارق: روح وهات ليك حاجه ساقعه برتقان الواد مدمن برتقان ياض يا صقر (وبيضحك علشان حاسس ان صقر مرعوب حب يطمنه)
بعد رحيل عبده
صقر : خير يا عم طارق تحت امرك
عم طارق: خير يا حبيبي جالي تليفون من القسم كلام عبيط زعلاني منك
صقر : أنا ليه بس ياعم طارق والله ما عملت حاجه
عم طارق: لا عملت يا صقر
صقر : عملت اي طب ياعم طارق
عم طارق:(مد ايده رفع دقن صقر وحط عينه في عين صقر ) بتبيع بدره بقالك شهر وضربت ناس كتير بيها كمان ينفع
صقر: لا مينفعش يا عم طارق
عم طارق: أنا حبيتك من أول ما دخلت عليا حسيتك محترم والوقتي حبيتك اكتر علشان طلعت راجل وجيت سكه.
استنا لحظه ارد على التليفون
عزه : ألو يا بابا أنا خلصت في السنتر كمان
عم طارق: ركبتي مع خطيبك
عزه : اه لسه ركبه حالا
عم طارق: مستنيكي على الفرشه مش طالع إلا بيكي
عزه : حاضر يا حبيبي
عم طارق: كمل يا صقر
صقر : شوف ياعم طارق اللي انت عايزه
عم طارق: ماشي يا عم صقر مشكلتك مع القسم خلصتها تمام ياعم
صقر : تسلم ياعم طارق والله بطني وجعتني لما عرفت أن القسم طالبني
عم طارق: متقلقش يا صقر من القسم أخرهم حبسه اقلق لو طارق منصور زعل منك علشان ملوش اخر
صقر: ربنا ما يجيب زعل ياعم طارق أنا من ايدك دي ل ايدك دي
عم طارق: الموقف كله محدش يقدر ينزل في تذكره بدره وانت عارف بالكلام ده أنا اعتبرتك ناشئ ومكنتش حاضر لما نزلت جبت عادل رفعت من الموقف وقطعت رجله وحكمي عليك من دلوقتي ياعم صقر
صقر : (بيبلع ريقه بخوف) تحت امرك يا عم طارق
عم طارق: تذكر بدره تظهر في الموقف هنزل اجيبك ياعم صقر غلطان في حاجه
صقر: لا يا عم طارق
عم طارق: تمام وادي عبده جه اشرب الشاي علشان تيجي تتعشا معايا
صقر: والله ما اقدر ياعم طارق حبيبي انا هشرب الشاي وامشي مش عايز أعطلك يا عم طارق
عم طارق: هو أنا بعزم عليك أنا عامل قاعده تحت البيت عازم اخوتك كلهم علشان امبارح كانت خطوبه اختك عزه بنتي
صقر: لا كده يبقا أنا معاك للصبح يا عم طارق
عم طارق: سبعه برتقان من الصبح يابن الكلب هتخرب بيتي (وبيضحك)
