رواية شمس تتحدي الغيوم الجزء الثاني (للعشق كلمته الاخيرة) الفصل الثالث
يستيقظ من نومه على صوت هاتفه ليعلن عن إتصال من زوجته الحبيبه يفتح الخط سريعا ليلقي عليها التحيه ولكنه يتفاجا بصوت بكائها
ينهض سريعا ويجلس على الفراش ليفهم ماسبب بكائها:فى فى إيه يااشرقت حصل إيه بتعيطي ليه
أشرقت وهي تبكي :البيبي تعبان ياعمار وانا خايفه أوي
عمار وهو يمسح على وجهه:أشرقت الله يخليكي اهدي من فضلك وبطلي عياط وفهميني بالراحه بيبي مين اللي تعبان
أشرقت :ابنك ياعمار ابنك اللي لسه مجاش للدنيا
عمار :ماله حصل ايه
أشرقت :الدكتور قاللي ان عنده مشاكل فى القلب وحيحتاج تدخل جراحي اول مايتولد انا خايفه اوى يا عمار تعالالي حالا انا حسه اني حموت
عمار:الف بعد الشر عنكم ان شاء الله تقومولي بالف سلامه
بس فهميني يعني ايه فى مشاكل فى القلب
أشرقت :مش عارفه انا رحت عشان يحددلي معاد الولادة لقيته سابني فى غرفة الكشف ودخل بعد شويه ومعاه دكتور تاني
ولقيتهم بيتكلموا وانا مش فاهمه فى ايه وبعد كده قاللي ان الجنين فى مشاكل فقلبه
وانا مش فاهمه والله مافاهمه انا خوفي وقلقي خلوني مش مركزة فاى حاجه بيقولها
عمار :وازاي مقالش الكلام ده قبل كده امال لو مكنوش فى أمريكا
ولكن اشرقت كانت تبكي ومنهارة على حال طفلها الذي لم ير الدنيا بعد
عمار :خلاص طيب اهدي يااشرقت متخافيش ياحبيبتي وان شاء الله خير وانا ححجز على أول طيارة واجي على طول
أشرقت :بسرعه والنبي ياعمار انا خايفه عليه اوى
عمار :ان شاء الله حيكون كويس ان شاء الله
يغلق معها الهاتف وهو لا يعلم اى شئ سوى انه لابد من الاستعداد للسفر سريعا ولكنه لا يعلم لمتى سيظل هناك وكيف ستجري الأمور
فكر سريعا ثم قرر اجراء اتصالا هاتفيا لإنقاذ الموقف فى هذا الوقت الراهن
قام بالاتصال فوجد ردا بعد فترة من الاتصال :ايوة ياحسن معلش صحيتك من النوم
حسن :صباح الفل يا بشمهندس انا اصلا صاحي بس كنت فى الحمام
عمار :حسن انا محتاجك اوى
حسن :خير يابشمهندس معاك
عمار:اشرقت اتصلت بية وقالتلي ان الدكتور قاللها ان الجنين عنده مشاكل فى القلب واحتمال كبير يحتاج تدخل جراحي وانا لازم اسافرلهم فى اقرب وقت
حسن :الف بعد الشر عنه ان شاء الله تكون حاجه بسيطه
وعينيه ليك يابشمهندس اللى حضرتك عاوزه
عمار:حسن انا ححجز فى اول طيارة وحسافر بس مش عارف حقعد هناك اد ايه ولا حرجع امتى وانا مش حقدر اسيب الفنادق فترة
صحيح فى مديرين ومشرفين بس بردو انا محتاج حد اثق فيه واطمن على مالي وحالي معاه وانا معنديش حد غيرك اثق فيه ياحسن
حسن :حضرتك والله ده شئ يشرفني طبعا بس انا معنديش فكرة عن ادارة الفنادق
عمار :انا حتابعك من هناك ياحسن متقلقش ولو فى اى حاجه وقفت معاك حقولك تعمل ايه بس لازم تكون انت اللي في الصورة ارجوك ياحسن انا محتاجك اوى وعمري ماحنسالك الجميل ده وحدد لنفسك المرتب اللى انت عاوزه
حسن :مرتب ايه بس اللى حضرتك بتقوله ده خلاص يابشمهندس حاضر وربنا يقدرني يارب واكون عند حسن ظنك
شوف حضرتك عاوزني امتى وانا تحت امرك
عمار :طب وشغلك حتاخد اجازة
حسن :انا اصلا كنت فعلا نازل اجازة واحتمال كبير مكنتش حرجع تاني بس خلاص بقى مش حنزل
عمار:انا اسف ياحسن والله ماعارف اقولك ايه أشرقت فاجئتني دلوقتى وحاسس اني عاجز عن التفكير
حسن:ولا يهمك يابشمهندس اهم حاجه دلوقتى نطمن على الباشا الصغير
عمار:يارب ياحسن بارب انت متعرفش انا لما أشرقت قالتلي انه ولد انا فرحت ازاي وكنت بعد الأيام لحد ماييجي بالسلامه
انا حاولت اتماسك وانا بكلمها لأنها كانت منهارة لكن انا ربنا وحده العالم بحالي
حسن :تفاءلوا الخير تجدوه وان شاء الله مش حيحصل غير كل خير
عمار:يارب ياحسن يارب
يغلق معه الهاتف ويحدث نفسه :ياوقعتك السوده ياحسن دي لما ايمان تعرف اني مش نازل مش بعيد تعملني بطاطس محمرة ياسوادك ياقرمط حتروح فين بكلسونك ياقرمط
جالك الموت ياتارك الصلاة انا حتصل وربنا يستر بقى
يعلن هاتفها عن اتصال فتفتح الخط سريعا :سونه حبيبي انت فين ياقلبي ركبت واللا لسه
حسن :لا ياايمان انا ماتحركتش من شرم ومش حقدر اجي
إيمان :نعم قول تاني كده انت بتكلمني انا لا ده انا وربي اولع فيك وفشرم كلها اه مانت خلاص اكلت وشربت وبوست وحضنت وخدت مني غرضك خلاص حتيجي ليه بقى
انا عارفه ان القعده عندك عجباك وجايه على هواك وديني ياحسن لو ماجيت لحكون
حسن :يالهوي عليكي ماتصبري يامجنونه وتسمعي حقول ايه اديني فرصه ادافع عن نفسي
إيمان :تدافع عن مين ياعنيه ليه انت هببت ايه اوعى تكون خنتني واتجوزت علية ياحسن حقتلك يابن سماح
حسن :الله يخرببيته اللي شار علية بالجواز اخونك ايه يابت الهبله هو فى حد بردو عنده عقل يتجوز مرة ويعملها تاني
إيمان :تنزل حالا من عندك وتيجي انا بقولك اهوه انت فاهم واللا لاء
حسن :يابنتي افهمي عمار مسافر امريكا وعاوزني اكون مكانه فى الشغل على مايرجع
إيمان :تكون مكانه فين انت حتستعبطني وانت ايه علاقتك بالفنادق يابتاع السياحه
حسن :ماهي الفنادق بردو سياحه وكله بيسرب على كله
إيمان :ليه هي كانت ماسورة صرف صحي
حسن :اسمعي يابت المجنونه
ايمان:متشتمش امي
حسن :ماشي يابيضه ياهبله ياام شعر اصفر
ابن عمار تعبان وحيعمل عمليه فى القلب وعمار حيسافر امريكا
إيمان :هي أشرقت ولدت
حسن :لسه ده الدكتور هو اللي قاللها كده وعمار مسافر والراجل طلب مني اكون مكانه اعمل ايه بس تفتكري ممكن اتخللى عنه فظرف زى ده
ايمان :ياعيني ربنا يشفيه يارب
حسن:شفتي بقى انك كنتي ظلماني
ايمان:ياحبيبي ياسونه حقك علية يابيضه
بس انا حعمل ايه فشعري اللى صبغته ده هاه اوح اولع فيه
ده انا كمان رحت البيوتي سنتر عملت تنضيف بشرة بالف جنيه وانت جاي تقوللي مش جاي طب اعمل ايه فوشي ده هاه اروح بيه فين
حسن :تجيلي طبعا ياقلبي
إيمان :اجيلك فين يابني ادم انت
حسن:تجيلي شرم خدي اجازة وتعالي نقضي يومين مع بعض ايه رايك
ايمان:ايوة بس انا حخاف اطلب ميرضوش
حسن :علية انا بردو ده احنا دافنينه سوا
إيمان :ماشي حروح وارجع اقولك
بعد مرور بعض الوقت تقف امامه فى مكتبه
ايوة ياايمان فى حاجه
إيمان :ايوة يابشمهندس
وتحكي له عما حدث فى شرم
يزيد :لا حول ولا قوة الا بالله ربنا يشفيهوله يارب
ده انا لازم اكلمه واشوفه لو محتاج حاجه الراجل مسابناش فى الوفاة وفضل قاعد معانا طول ايام العزا
ربنا يشفيهوله ويجيبهوله بالسلامه ان شاء الله
ايمان انا عارف انك عاوزة تروحي لحسن روحي ياايمان
إيمان :انا متأسفه والله يابشمهندس بس بصراحه
يزيد :عيب عليكي ياايمان متقوليش كده كفايه الشغل اللي شيلاه وولادي كمان اللى تاعبه نفسك معاهم معظم الوقت
إيمان :ولادك طب اقسم بالله العظيم اني لو علية ماعاوزة اسيبهم لحظه ده انا وانا رايحالهم بيبقى عيد عندي والوقت اللي بقضيه معاهم اجمل وقت فحياتي
.يزيد :ربنا يكرمك يارب ياايمان ويديكي على اد نيتك وقلبك الأبيض وميحرمناش منك ابدا
بس بقولك ايه ماتروحيش وتقولوا عدولي اه متستعبطيش هما اسبوعين وترجعي تمام
إيمان :اسبوعين يامانت كريم يارب ان شالله تنستر ياباشا
يزيد :هههههه
إيمان :ياختي على ضحكتك العسل اللى انت حارمنا منها دي
يزيد :ربنا يخليكي يا إيمان
إيمان :بس الشغل
يزيد :ماله الشغل ماهو زى الفل وبعدين من وقت ماعهد بقت تقريبا مقيمه عندنا وسيف التزم فى الشغل
إيمان :ربنا يتمملها على خير يارب هي وشمس
يزيد:تشوفيهم وهما قاعدين فوش بعض تقولي قاعدين فى مستشفى الشاطبي
إيمان :هههههههه
يزيد :عقبالك يارب ياايمان
إيمان :يارب بس على فكرة بقى انا زعلانه منك
يزيد :ليه بس
إيمان :مبقتش بتقوللي ياموني ولا منتي ايه ياباشا احنا خلاص راحت علينا واللا إيه
يزيد :معلش ياايمان انا والله مافايق لحاجه ولا بقيت قادر على الكلام اصلا انا حاسس اني عايش حلاوة روح
إيمان :كله حيعدي ان شاء الله قول انت يارب وربنا يخليلك عشق وسليم ولولو حبيبة قلبي ده النظرة فوشهم تنسي الواحد همومه كلها
يزيد :واشمعنى بقى لولو هي اللي حبيبة قلبك ياهانم
إيمان :مش عارفه بس وهي فحضني بحسها حساني اوى بصتها لية غريبه اوى بحسها زى ماتكون بنتي بنت اختي اخويا حد قريب مني اوى مش قادرة اقولك بحبها اد ايه
وسولي والله بحبه اوى بس لولو حاجه تانيه وعشق كمان صاحبتي وحبيبتي بس بردو لولو دي لاء بجد انا حسه انها حتطلع
يزيد :لمامتها هي حتطلع لعاليه ان شاء الله
إيمان :انا وانا معاهم بنسى انا فين بنسى مشاكلي زعلى من اى حاجه بنسى الدنيا كلها ربنا يباركلك فيهم يارب
يزيد :يارب ياايمان يارب
🌹تخرج من المكتب فتقابل علي وتسلم عليه بينما هو يدخل عليه المكتب فيجده يستعد للخروج:انت رايح فين يايزيد
يزيد :مخنوق اوي ياعلي مش قادر اقعد ولا عارف افكر فى حاجه
على:يزيد ربنا العالم بينا احنا شغالين ازاي بس حنعمل ايه لازم ننسى احزاننا ونيجي على نفسنا عشان الدنيا تمشي
يزيد :بحاول والله ياعلي بس غصب عني
علي:بقولك ايه فاكر لما شمس وعصام سابوا بعض.
يزيد :مش فاهم عاوز تقول ايه
على:مش وقتها بقت تنزل المواقع وترهق نفسها فى الشغل وانت بنفسك قلتلي خليها تنسى ياعلي
ايه رايك يايزيد ماتعمل زيها
عندنا اكتر من موقع فيهم شغل الشركه الجديده
ومستشفى الدكتورة نادين والكومباوند بتاع سموحه اتحرك روح باشر الشغل واقف مع المهندسين والعمال
يزيد :معاك حق ياعلي انا فعلا محتاج اعمل كده قللي اخبار المستشفى ايه
على:العمال شغالين والله وعمر بيروحلهم تقريبا كل يوم بس هو النهارده عنده شغل هنا فى الشركه تحب تروح انت
يزيد :ماشي مفيش مشكله اروح شويه
يتحرك يزيد تجاه موقع بناء مستشفى الدكتورة نادين الحداد
فيجد العمال يعملون بكل همه ونشاط
يتحدث إليهم ويصعد إلى الأعلى ليتاكد من سلامة العمل
يسمع صوتها وهي تتحدث للعمال ولكنه لم ينتبه لحديثها معهم :الله ينور يارجاله ثم تنادي على المشرف على العمال فياتي اليها مهرولا :ايوة يادكتورة
نادين :افتح شنطة العربيه من فضلك فيها أكياس للفطار ريحوا شويه من الشغل وافطروا وبعدين كملوا
المشرف :حضرتك تعبتي نفسك ليه بس ماهما بيتصرفوا
نادين :مفيش حاجه ياللا بقى بسرعه قبل الاكل مايبرد
وبعدين انا حاكل معاكم انا كمان مزاجي رايق النهارده وعاوزة انبسط
المشرف: ده احنا يحصلنا الشرف والله وربنا يروق بالك دايما
نادين : طب ياللا بقي بص كل الأكياس زى بعضها وانا جايبه وجبات بعددهم وفى زياده كمان نادي بقى على المشرفين اللى معاك ونقعد ناكل فى المكان ده
كانت تشاور على احد المكاتب الموجوده فى الموقع
المشرف :على فكرة ده البشمهندس يزيد هنا اناديه يفطر معانا
نادين :معقوله البشمهندس يزيد هنا هو فين
المشرف :طلع فوق اطلعله
نادين :لاء خليك انت انا حطلعله انت بس خللي العمال يفطروا وحجيب البشمهندس وننزلك
بينما كان يزيد فى الاعلى يشاهد بنفسه العمل سمع خطواتها بكعبها العالي تصعد اليه فتحرك ناحيتها:خاللي بالك الخشب والمسامير
نادين :متخافش يابشمهندس انا باجي هنا على طول
يزيد :قلقانه ميكونش الشغل ماشى كويس
نادين :لا وربنا ابدا بس فراغ بقى حتقول ايه
تصل اليه ثم تمد يدها اليه للسلام عليه:الف حمد لله على السلامة يا بشمهندس
يزيد :الله يسلمك يادكتورة
نادين :عامل ايه دلوقتي يارب تكون احسن
يزيد :الحمد لله والله نحمد ربنا على كل حال
نادين :: انا اسفه لو كنت قصرت فى السؤال عنك
يزيد :ليه بتقولي كده مانتي جيتي ومعاكي سيادة النائب والكابتن فادي وقدمتوا واجب العزا
نادين:ده الواجب يابشمهندس واولادك عاملين ايه
يزيد :الحمد لله بخير المهم قوليلي ايه رايك فى الشغل
نادين :زي الفل بقولك ايه انا جايبه فطار تحت ممكن حضرتك تتفضل تفطر معانا انا والمشرفين
يزيد :بألف هنا ليكم انا فطرت من بدري
نادين :تمام اوى من بدري يعني اكيد جعت وانا جايبه اكل اصلا يفتح النفس
يزيد :مش حقدر والله
نادين :لاء بص حزعل وربنا ياللا بقى الاكل حيبرد وانا والله لومانزلت واكلت معانا مش حاكل وذنبي حيبقى فرقبتك قلت ايه بقى
يزيد :قلت لا اله الا الله
نادين:محمد رسول الله ياللا بقى بص ريحة الاكل حتخليك تاكل من غير ماتحس
يضطر للموافقه أمام إصرارها الشديد على النزول معها
ينزل فيجد العمال متجمعين يتناولون مااحضرته معها بينما قام المشرفين بفرش المفرش الذي احضرته لتضعه على المكتب ووضع العلب عليه
تجمعوا جميعهم واكل معهم وهو يتحدثون عن العمل بالمستشفى والوقت الذي سينتهون فيه من العمل
بعد مرور بعض الوقت وبعد الانتهاء من تناول الطعام قاما واخذا يتحدثان فيما تريده وماتسعى الى تحقيقه
فجاة يعلن هاتفه عن اتصال
بعد اذنك حرد على أمي :ايوة ياماما
هاله :يزيد الحقني يابني ابوك تعبان اوى هات دكتور وتعالى بسرعه
ينهي معها المكالمه :دكتورة نادين انا مضطر استئذن دلوقتى
نادين :خير يا بشمهندس في حاجه
يزيد :بابا تعب شويه حاخد دكتور واروحله
نادين :تاخد دكتور وانا موجوده
يزيد :حضرتك
نادين :هو حضرتك ناسي اني دكتورة واللا إيه
يزيد :لا طبعا بس مش عاوز اتعبك
نادين :مفيش تعب ولا حاجه انا اصلا مورييش حاجه
يزيد :تحبي تركبي معايا واللا تركبي عربيتك
نادين :لا حركب معاك افضل واهوه على الاقل اريح شويه من السواقه
يزيد :تمام اتفضلي
بعد مرور بعض الوقت تقوم بالكشف على شاكر:لا ده احنا بندلع عشان نعرف غلاوتنا مش كده
هاله :يدلع زى ماهو عاوز على قلبنا زى العسل
يزيد :طمنيني يادكتورة بابا عامل إيه
نادين :بابا كويس وزى الفل بس يريح اعصابه عشان ضغطه عالي شويه ممكن
شاكر :ان شاء الله
تنزل معهم للاسفل ويشكرونها على حضورها
نادين :مفيش حاجه ياجماعه انتوا ليه عاملين تكليف بالشكل ده
هاله :انتي رايحه فين
نادين :حمشي ياطنط
هاله:وده يصح بردو ايه يايزيد مش تعزم على الدكتورة تتغدى معانا
نادين :لا غدا ايه ميرسي اوى ياطنط انا لازم امشي وبعدين احنا اصلا اكلين فى الموقع وشبعانه جدا
هاله:ايوة بس بعد شويه اكيد حتجوعي انتي حتقعدي معانا شويه وزمان عمر وسيف جايين دلوقتي
يزيد :امال فين شمس وعهد مش شايفهم
هاله :كل واحده راحت لدكتورها يابني ربنا يكملهم على خير يارب
امال انتي بقى عندك ولاد اد إيه يادكتورة
نادين :لاء انا معنديش ولاد ربنا مرزقنيش من جوزى الله يرحمه
هاله :انا اسفه والله يابنتي ان شاء الله ربنا يكرمك يارب
نادين :لا ياطنط مفيش حاجه والله وبعدين كل واحد بياخد نصيبه
هاله :خلاص يبقى حتتغدي معانا
تضطر نادين امام اصرار هاله عليها على الموافقه
بعد قليل يتجمع الجميع عمر وسيف وشمس وعهد وعشق ويرحبون بالدكتورة نادين
يتناولون الطعام فى جو عائلي وتتحدث اليهم فى بعض الموضوعات حتى يمر الوقت سريعا
تجلس عشق على قدم أبيها
نادين :اسمك ايه ياحلوة انتي
عشق :عشق
نادين :الله اسمك حلو أوي
عشق :عشان بابي بيحب مامي اوى وسماني عشق عشان بيحبها وسمى اختي عاليا على اسمها كمان
يعلن أنس عن دخوله اليهم ويسلم عليهم جميعا ويعرفونه بنادين
أنس :خالو بعد اذنك انا عاوز عشق فموضوع
يزيد :موضوع ايه ياانس وفين بقالك يومين مش بتيجي يعني
أنس :عندي مذاكرة ياخالو
يزيد :اتفضلي شوفبه عاوز ايه
يجلسان قريبا منهم جميعا:عشق انا زعلان منك اوى
عشق:انس متقولش لبابي عشان خاطري حيزعل مني
أنس :تنقصي خمس درجات فى الامتحان
عشق :خلاص والله اخر مرة مانا مش عارفه اذاكر والله
أنس :عاوزة حاجه تقوليلي لكن الدرجه دي مشوفهاش تاني
عشق :حاضر حاضر
يقومان ويرجعان إليهما
يزيد :يارب خير ان شاء الله
أنس :طبعا خير ياخالو انا حاخد عشق ونطلع لعاليا وسولي شويه
يزيد :اتفضلوا
تنظر لهم نادين بدهشه
يزيد:اصل انس بيحب عشق وتقريبا كده مخطوبين
نادين :ههههههههه مخطوبين بتهزر صح
هاله :لا والله ده حتى ملبسها الشبكه
نادين :معقوله الكلام ده
يزيد :ايوة
نادين :يااه ده الوقت جري اوى انا حستئذن بقى
هاله :نورتينا والله يابنتي
نادين :ده نورك والله ياطنط وميرسي اوى عالعزومه الحلوة دي
هاله :مع السلامه ياحبيبتي وياريت لو نشوفك تاني
نادين :ان شاء الله
يزيد :عمر ممكن توصل دكتورة نادين عشان عربيتها فمكان المستشفى
عمر :اه طبعا اتفضلي يادكتورة
نادين :مفيش مشكله انا حتصرف حاخد تاكسي
يزيد :ميصحش يادكتورة انا عارف ان المفروض كنت اوصلك انا بس والله تعبان شويه
نادين :لا عادي ميهمكش
عمر :اتفضلي يادكتورة
تخرج معه نادين بينما تكاد شمس ان تنفجر غيظا
عهد :مالك ياشمس انتي تعبانه
شمس :انا حسه اني حنفجر
عهد :ليه بس
شمس :كان لازم يعني يقول لعمر يوصلها
عهد :انتي غيرانه واللا ايه
شمس :بصراحه ايوة انتي مش شايفاها شكلها عامل ازاي ده الواحد يروح يولع فنفسه أحسن
عهد :لا ياحبيبتى اطمني عمر بيحبك ياشمس
شمس :بشكلي ومنظري ده تفتكري
عهد :هما مش ولادهم
شمس :على رأيك بقولك ايه انا جعانه
عهد :يالهوي مااحنا لسه واكلين
شمس :مانا لما اكون متغاظه بجوع
عهد :هههههه
بينما يقوم عمر بتوصيلها الى سيارتها والحديث معها فى عدة موضوعات
تصل الى بيت اختها لتسلم عليها وتجلس معها
اهلا يانودي كده بردو بقالك يومين مجيتيش
نادين :مشغوله فى المستشفى والله عاملين ايه ياقلبي
ليلى :تمام والله ياحبيتي جايه منين كده
فتحكي لها نادين عن يومها
ليلى:وانتي ايه رايك فالموضوع ده
نادين :تقصدي ايه بالطبط ياليلى
نادين :اقصداللى جه فدماغك ياقلبي
🌹🌹🌹🌹🌹🌹🌹🌹🌹
فى الصباح يعلن جرس الباب عن حضوره لاعطائها الصغيرة كمثل كل صباح
تجري على الباب لتفتحه وتلتقطها من بين يديه
سريعا
فحبها لها اصبح يفوق كل حد ولم تعد تطيق بعادها عنها وتتحمل مرور الليل بفارغ الصبر
عصام :صباح الخير ياسلمى
سلمى وهي تاخذ دارين:صباح الفل ياعصام ثم تقبلها دودي حبيبتي وحشتيني
عصام :ده يادوب الليل
سلمى:بتوحشني اوى ياعصام
عصام :بس كانت بتزن بالليل أوى
سلمى:عشان بتسنن حبيبتي
نادين تنطق لسلمى :ماما
تاخذها فى احضانها وتقبلها بقوه:ماما ياروح ماما ياقلب ماما
يخرج علاء من غرفته وهو يتثاءب:صباح الخير يا عصام
عصام :صباح النور يا علاء
علاء:ماتدخل يابني
عصام :حتاخر ياباشا مانا مش حر نفسي زيك
ياللا سلام
يمشي عصام بينما تاخذ سلمى الصغيرة على غرفتها
ويدخل علاء لنيرة فيجدها مستيقظه
مالك ياعلاء، فى حاجه
علاء:مفيش ياحبيبتي
نيرة :لاء، فى ياعلاء وانا عارفه السبب
علاء :طب لحد امتى بس
نيرة:لسه شويه ياعلاء، متستعجلش ياحبيبي
علاء :خايف عليها يانيرة دي اختي الوحيده مقدرش اشوفها بتضيع عمرها وانا اقعد اتفرج عليها
نيرة :بتحبه ياعلاء غصب عنها مش بايدها
علاء :مانا لو شايف ان فى امل لكن عصام مش على باله خالص
نيرة :غصب عنه والله
علاء :العريس اللى جالها الاسبوع اللى فات ورفضته واللى قبله انا زعلان عليها اوى
