 |
رواية الابواب الخمس الفصل التاسع عشر بقلم ريام الهادي
الفرزن ضحكتي شگد لگة نياح
لو دمعي هينة ، الصيت هم طاح
موش ادم ولانوش تفاح !
امنيتي انام وبالي مرتاح
طب عبيد جان وياهن وسألته عمتي احجي يمه فتن گلبي مريتك واختها كاال
ابن جوحي بلال طلع منغولي
عمشه : ياايمه سوده بوچهي ولك ماله علاچ
عبيد : لا يمه ماله علاج الولد منغولي ومايصيرله كل جاره
ذكرى : حضنته حييل اووي ياعيني
بديعه : قسمت الله خلي تحمد ربها شبيهه ساهره تخبلت وتصيح مااريده
جان نسمع ساهره من فوك تعيط
ساهره : شمروه مااريده ذبوه بأي مكان هذا مو ابني ولكمم مااريده
دخل جوحي ويه عياطها هو وفلاح
جوحي : ياستار خيركم هم تعاركتن
عمشه : لا يمه هاي مريتك تسودنت عبنها خوثه
فلاح : شكو غير وحده تحجي شصار كلها صافنه بوجهنه
بديعه : والله لهسه مصدومين لان ساهره اجت من الطبيب
جوحي : اي وشبيهه بلال
نزلت ساهره تركض وتعيط وراها صالحه تريد تسكتها
ساهره : ابنك منغولي شوفه منغولي مو صاحي
جوحي : شتحجين انتي تخبلتي
ساهره : ولك ياريتني تخبلت خلفتنا طلعت سكط وادك على راسها
ذكرى : كافي عفيه عياطج خوف الجاهل وكمت ابوس بيه اريد اسكته
ساهره : مااريده ولكم ذبووه
خوله : وعلى شنو هذا اللطم والعياط كاافي هرجتينا
ساهره : اي عيني اكيد تكيفين اول وحده انتي متشمته بينا
خوله : شبيج بابا مخبله انتي على شنو اتشمت هي هاي سالفه واحد يتشمت بيها
جوحي : تأكدتي من الطبيب زين احجي
ساهره : تأكدت تأكدت وكعدت بلكاااع تبجي
جوحي : شنسوي هسه وين نودي
عمشه : شنهي وين تودي
جوحي : اني خوما اربي واصرف على جاهل منغولي
خوله : هو هذا الهامك الصرف والفلوس من خرب بفلوسك عساك بلحرك انت وياهن
جان يجيت على خوله يريد يضربها لج حقيره هاي عليمن لزمه فلاح
فلاح : على كيفك وانتي خوله لتحجين شى متشوفين الوضع كدامج
خوله : ياوضع طفل وهاي حالته شون يعني نشمره بلشارع
ساهره : اي نشمره مااريده
جوحي : واني هم مااريده نطي بدار ايتام وفضت راحت
عمشه : يااا كون من فضت روحك انت وياهه شنهي انجلبتو وتذبون بزرتكم بلشارع الوادم تنط ارواحهه على ضفر جاهل وانتم تشمروه
ساهره : اي منريده
عمشه : وچعي بفادج وافاد هذا الاغم
عبن هذا البطر وشتكولون لربكم ذبينااه عبنه مريض
ساهره : خاله مااريده ابني واني حره بيه مااريده
عمشه : وخل خاله التخلخل ضروسج ونزعت النعال وشمرته عليهه تذبين البزره وتنهشه الچلاب انه اعرفنج مابيج حظ وياج ولدي بعير وضاله تسحبين بيه واكولن تهون وتاليها تذبين بزرتكم والاغم راضي چا شنهي ماتعرفون الله ماتهابون عقابه
صالحه :هاا عمه هاي جديده صايره تحجين بلدين لتشوفين روحج صليتي جم ركعه وكمتي تحللين وتحرمين ابنهم وهمه حرين بيه يذبوه يبقوه عسى مايحركوه انتي شعليج
عمشه : شعاله تشعل شعفتج انتي سگتي لا ينولج النعال الثاني چا هيج الله ماسخجن ولا رحمه بگلبجن وليد مثل الورد تذبنه
جوحي : يمه الولد مابيه فايده اتعب واصرف واكبر وتاليته يضل بلشارع الرايح والجاي يعيب عليه ويضربوه ويصيحوله امخبل فوك كل هذا اخوه راح يتاذه الرايح والجاي يگله اخوك المنغولي شلي بعد بهاي الطلابه وشلاع الگلب نذبه ونخلف غيره
خوله : مو هو جيس حب تكرزه طلع الحب معفن تذبه وتروح تشتري غيره ولكم هاي روح شوفه شنو ذنبه
ساهره : شوو جيبي وسحبته حيل من حضن ذكرى وطلعت للشارع
كلنا ركضنه وراهه جان تجره حيل بدعه من ايدها بلطرمه ومنعتها من الطلعه
بديعه : مو متردي اني اريده
ساهره : شسوين بيه جيبي
بديعه : اعتبري انذب وراح وهذا الطفل من اليوم ابني ومالج دخل بيه
ذكرى : اني اربي ويه جهالي والله بس لتذبوه عفيه والله حرام عليكم
صالحه : صارن خيرات ويتعازمن على الخير والله ياالله وتهز بيدها
بديعه : وانتي شلج دخل هو مو ابنج لتدخلين وباوعت على فلاح حضنت بلال حييل وكتله ابوس ايدك لتعارض اخلي ويه بان ومااحسسك بيه والله
ضل صافن عليه وساكت
انداريت على ساهره
هااا شگلتي
ساهره : وين متودوه ودوه المهم مااريده ولا الي علاقه بيه واخاف تاخذي اياج بيوم ترجعي اليه هاي كدام الكل مالي دخل بيه عسى ما يموت
عمشه : كون ملچ الموت ياخذ رويحتج چا هاي الشباب الترد الروح تموت وانتي العار ضاله ياوالحظ
بديعه : هااا شكلت فلاح
فلاح : تعالي فوك
بديعة : صعدت وراهه واني حاضنه بلال وهو صافن بلوجوه
دخلنا للغرفه وسد الباب وكاال
فلاح : تشوفين حالنا وعيشتنا هو بنيه وحده عدنا وكوه مدبر عيشتها هلمره ثاني وياريت ابني واكول غصب عني
بديعه : حطيته بحضنه وكتله
احلفك بالله گلبك ينطيك هذا الطفل ينشمر بلشارع
فلاح : اذا همه ابوه وامه ما رادوه اني شعليه يابديعه
بديعه : همه ميخافون الله ولا بگلبهم ذره رحمه بس احنا نختلف انت طيب وحنين مو اشوفك ويه بتك ودوم ماتكسر خاطر احد لتكسر بخاطر هذا الطفل
فلاح : اني على العيشه والله تشوفين يوم بعد يوم تصير اصعب واللكمه كوه مطلعها وهذا يرادله حليب ومصرف
بديعه : اقصر على نفسي والله ومااحسسك بيه والعيشه ربك رزاق وان شاء الله على وجهه تشوف كل الخير اكسب بيه اجر اخوك لتزعل مني موخوش ادمي وميخاف الله وهمه الفلوس حتى لو يذب لحمه ودمه بلشارع بس انت غير وادري بيك مراح تنام ولا ينطيگ گلبك من تشوف هذا الوجهه تاكله چلاب الشارع لو ينذب بدار ايتام وهو مو يتيم
فلاح : اوف يابدعه شطلعتينا بسالفه عوجه
بديعه : والله مو عوجه بلعكس يجوز رحمه ورزق من الله ابوس ايدك فلاح شوفه شكد حلو وهادئ هسه بس انزله مراح يرحموه
احلفك بنتك وبصحتك خليني اربي بقى صافن عليه وبلال يفتح عيون ويسدها يغفى
فلاح : هذا هو بقي امري لله
بديعه : حضنته حييل وابجي جنت حيل خايفه لا ميوافق
فلاح : هاي هيج تحبي وخلاج تحضنيني
بديعه : اشبعك حضن والله بس يبقى ويايه
فلاح : روحي جيبي غراضه من امه اقلها تفيدج ملابس وشغلات
بديعه : اني امه بعد ذيج مرت عمه وانت ابوه
فلاح : روحي يبدعه الله ينطيج على كد نيتج الطيبه
بديعه : وينطيج ويرزقك ياتاج راسي بسته من خده ونزلت اركض لكيت الكل كاعد وساكت وخوله تباوع عليهم تريد تشرب من دمهم
كتلهم هذا هو ساهره اعتبري مالج ابن اسمه بلال اني اربي انطيني غراضه والكاروك مالته
جوحي : متشترين غيرهم اخاف تحبل ونحتاجهم
صالحه : انطيها يمعود خلي نخلص من هاي المصيبه واني من تحبل عود ادز على امي تجهزها
خوله : والله ماكو غيرجن المصايب عساجن لا شفتن خلفه وضليتن بحصرتها طبيت للغرفه وركعت الباب حيل حرگن گلبي
ساهره : سمعتها لاختك
جوحي : خلي تولي مالج دخل بيها
عمشه : چا زين منها تدعي انه لو بيه حيل اكومن اجسر عظامكم
ساهره : ماله داعي بعد عمه الحجي اني ابني مرتضى وبس وراح اسوي طفل ثاني وبلال ابن بدعه وفلاح وخلصنا
عمشه : والغسل هلبراطم ولج ذكرى تعالي ليه اريد تعلميني صلاه كون من اسجد لله وادعي على البگلبي تنحصد رگابهم بحاصوده عميه
صالحه : على منو تدعين عمه
عمشه : چا هو اكو خيرجن بنات غنيه وامجن وياجن عبن امجن راس السمچه الخايسه كلها منها خلفتجن وانه ابتليت
صالحه : شكد متدعين ميفيد دعائج لتعبين روحج
عمشه : اكو الله يچي يوم ويسمع مني عبن
على لاهيتي وانتن اااااخ ولج يلمسودنه
ذكرى : اي عمه اجيت يله كومي
كمت وراهه وكعدت احفظها ايه الكرسي صار اسبوع اعلم بيها وتنسى ومن تنسى الكلام تضربني على راسي وتكول موخوش تعلمين مابيج حظ وابقى اضحك واتحملها شسوي لازم اصبر عليها
طلعت من غرفة عمتي وره مااكلت كفختين وميه مره غلطت عليه لان تنسى اضحك على سوالفها بس بالي يم بدعه صعدت للغرفه لكيت يونس وكاعد يمه مرتضى يلعبون ويشخبطون بدفتر مال مرتضى لان داخل مدرسه ويجيب كتبه اقري مرات هو ومهند وناي بصفهم تخرب لعبهم عفتهم ورحت لبدعه دكيت الباب وسمعت كالت تعال دخلت الها لكيتها تكمط بلال وبان صافنه عليها
كعدت بصفها بلكاع
ليش مبقيتي يمي
بديعه : انتي عندج اثنين وصمد ماشاء الله ساحب ايده منكم كوه مدبره حليب ناي تجين تحيرين بلثاني
ذكرى : قبل فلاح
بديعه : اي الْحٍمَدٍ للـّہ ولو مقابل اضل اتوسل بيه لحد ميقبل
ذكرى : ليش هيج دكيتي رجل اله تاخذي
بديعه : شفت بيه نفسي هيج اهلي شمروني ومرادوني بس الفرق هو صغير ما واعي ولا سامع ولا شايف بعينه شون اهله تخلو عنه اويلي عليه اني زوجوني ودارو وجهم وراحو
حتى من اجوي عزموني ومرحت للعرس ماكلف واحد منهم نفسه ويكول اخاف بيها شى صار على بتها رجلها شى
ولج صارت الحرب والعراق انهجم واني گلبي نار عليهم لان بلبصره وحيل القصف صار عليهم وخليت فلاح يسأل وشهر انتظر لا ليلي ليل ولا نهاري نهار من الخوف كلت صار بيهم شى لان مامعقوله ميسألون بعد كل هاي المده تدرين شطلع
ذكرى : شطلع
بديعه : اهلي شايلين لبغداد ولج هياتهم يمي ومحد دك بابي
ذكرى : صدك تحجين
بديعه : وداعت بنتي متعرفين حركت گلبي عدا شكد فشلت من فلاح وهو مستغرب شون اهلي هيج مامهتمين بيه وحلفت يمين مالي دخل بيهم ليوم الدين لج حتى مافكرو يشوفوني متت بلقصف صار عليه شى رجلي ذبني هاي دنيه كلشي بيها شون ينامون مرتاحين على المخده ماادري ومن شفت ساهره شون تريد تشمر ابنها عرفت هواي اكو اهل سكط مو بس اهلي
شكل بلال خلاني اموت بلحظتها وكلت مااخلي ينشمر لو اعرف ابوس رجل فلاح حتى يقبل والحمدلله رجلي طيب وقبل والله لايسامح كلمن يخلف ويشمر
ذكرى : اي والله ليش مكلتيلي على الصار بيج وقلقج ولج ولا مبين عليج شى
بديعه : هو حيري بهمج الاول وبعدين شيلي همي
ذكرى : ليش شكوو
بديعه : سوالف صمد المتنجرع
ذكرى : تعلمت يمعوده شسوي الي الله اهم شى جهالي بخيرومنتظره خبر عن اهلي بلكت يرجعون
بديعه : يرجعون بلسلامه
ذكرى : الله يسلمج ولك بلبل فدووة لهلوجه احبه من يضحك
بديعه : كبر لطم امه متعرف النعمه الي الله انطاها الها
ذكرى : خلي تولي هذا بلبل صار ابنج مالج دخل بيهم بعد
بديعه : شبسرعه طلعتي دلع اله
ذكرى : احسه مثل البلبل نقي وحلو ويريد يطير واسهل من بلال
بديعه : هذا هو عيني تسمع بلال صار اسمك بلبل يمه اروح فدوة لابني الحلوو
ذكرى : الله يرضى عنج شكد طيبه انتي
بديعه : بس ماانوكل بلخبز
ذكرى : هههههه على ذكر الخبر العجين وصل للجيران تره اختمر
بديعه : هااج خلي يمج بين مااخبز وارجع
ذكرى : صار عندك اثنين امهات يبلبل شتريد بعد
بديعه : الله يحبه خلصه من ساهره السحاره
ذكرى : هههه ولج لتسمعج
بديعه : قابل جذب
ذكرى : روحي كملي الخبز واني رايحه للجهال بلغرفه اخاف يتعاركون وراح اخذ بان ويايه تعالي امي شلت بلال وبيدي بان ودخلت عليهن
وكعدت بصف جهالي وحطيت بلال بحضني وبان يمهم واجه مهند كعد وياهم اباوع على كل واحد بيهن
هنا عمرهم مهند ٨ سنوات ومرتضى ٧ سنوات بان ٥ سنوات ويونس ٤ سنوات وناي حبيبة امها سنتين تلعب بين رجلهم وتكمز
بدت الايام تمشي بينا الحصار دمر كلشي واحنا اصلاً حالتنه فقيره ومنا صار الحصار خله وضعنا اسوأ
كاعده امسح البيت واجت بدعه
بديعه : اكلج تره يمكن اهلج اجوي
ذكرى : صدك تحجين
شمرت الوصله وغسلت ايدي سحبت العبايه وطلعت اركض
بديعه : وين يمعوده
ذكرى : خلي اشوفهم طاك گلبي عليهم
طلعت امشي سريع لكيت الباب مفتوح من لوعت گلبي على فركاهم طبيت ركض
جان يصير فوزي گبالي اني شفته لو دموعي تنزل من وحدها جنها عيوني تشكيله گبل لساني
ركضت عليه احضنه جان يدفعني
فوزي : شكو جايه
ذكرى : جفلت من حجايته ودفعته رجعت نفسي خطوه ليوره وكفت گباله وكتله واني ابجي ضل بالي عليكم واشتاقيتلكم
فوزي : اني مو كتلج مالج اهل بعد وهذا البيت مدخلين اله
ذكرى : فدوة فوزي لتزيد همي متعرف شديصير بيه بلياكم
فوزي : ورجلج الشفيه مو فضلتي عليه وعلى اهلج مبين معوضج عنا
ذكرى : محد يعوضني عنكم غير انتم روحي
فوزي : سمعي لج جيه هنا ماكو ترجعين للبيت الفضلتي علينا واياج اسمع بيوم جايه وداخله هذا البيت
ذكرى : حرام عليك فوزي صار سنه ونص مابرد گلبك ماحن على اختك
فوزي : يوم بعد يوم احقد عليج واتذكر شون كسرتيني وبكل عين صلفه قبلتي بلنكس رجلج وتنازلتي عن خوتنا تنسين هنا مثل مااحنا نسيناج ورجلج مدوس هذا البيت افتهمتي
ذكرى : كمت اشهك داحجي جان تطلع امي اني شفتها وركضت عليها وشمرت نفسي بحضنها ونبجي سوه بست ايدها وراسها
ماما اشتاقيتلج وخفت عليكم
ام فوزي : يانور عيني مو بكدي والله
جان يسحبني فوزي من حضنها
فوزي : روحي لصمد وابجي بحضنه هنا مالج حضن ولا ام
ام فوزي : يمه اروحلك فدوة بس اشوفها واشبع من ريحتها
جان يطلع ابويه هو شافني عااط
هااي شعدها هنا مو كلت مااريدها تدخل بيتي
ام فوزي : حرام عليك شون يعني اتبره من بنتي
ابو فوزي : مالج بنيه وانتي امشي اطلعي بره واياج تجين هنا
ذكرى : بابا ابوس ايدك ورجلك ارضى عليه
ابو فوزي : ماارضى عليج دنيا واخره تدرين شون صرت سالوفه بحلك المنطقه ومن وره شنو علمود ناس متسوه مداسي وكله بسببج هيجت من المنطقه كلها وحتى عيني مااحطها بعيون الناس ياهو الجان وسأل صدك بتك انهزمت من بيتك ورجعت لرجلها ومتريدكم
ذكرى : صخام بوجهي منو يكول هيج
ام فوزي : كل المنطقه بنيتي عيالج طيحو حظ سمعتنا وعلى اساس احنا اخذناج كوه من عيالج وطلعو الصوج بينه
ابو فوزي : شوفت وجهج مااريدهه واخاف اموت اياج توكفين على جنازتي سمعتو هاي متوكف على جنازتي وماابريكم الذمه اذا وكفت
ذكرى : حطيت ايدي على وجهي وكمت اشهك والله رجعت غصب عني والله مدري شجاني ورجعت بيوم وليله عطت واصيح اريده واني مجنت رايدته احلفكم بالله ورسله لتظلموني متعرفون حالتي
فوزي : كومي لج وسحلني من ايدي وجرني حييل امشي طلعي بره
ذكرى : ااااخ ايدي اني اطلع والله بس عوف ايدي وكفت على حيلي وكتلهم اني محتاجتكم كلش وانتم سديتو بابكم بوجهي يجوز غلطت بدون قصد بس انتم غلطتو بحقي بقصد جان على الاقل افتهمتو مني شسواني هيج او سامحوني وانطوني فرصه
بس انتم قسيتو گلوبكم عليه الخلاكم تنطوني لواحد مثل صمد لا من ملتنا ولا مستوانه ولسانكم انعكد وزوجتوني اله هو نفس الخلاني ارجع بليله ظلمه واصيح اريده واذا اكو احد غلط من الاول فهو انتم مو اني
واني مسامحتكم لان اعرف لو يرجع الزمن وبأرادتكم مستحيل تنطوني اروح ارجع للبيت البيه عذابي وقلت حيلتي والي الله يوم ديري بالج على نفسج
عدلت عبايتي وطلعت ابجي الرايح والجاي يباوع دنكت اريد اوصل للبيت اول مدخلت اجت خوله عليه
خوله : طردوج مو
ذكرى : ايي وشمرت نفسي بحضنها
خوله : حقهم الصار مو قليل اعذريهم
ذكرى : ابويه واخويه نكروني حتى بوجهي ميباوعون
خوله : الدنيا تنسي ويجي يوم ينسون ويرضون عنج المهم شفتيهم وهمه بخير
بديعه : كومي غسلي بتج تبجي
ذكرى : كمت من حضن خوله
خوله : مجان سكتيها انتي
بديعه : هاي تضل تبجي لباجر بس جهالها ينسوها
خوله : كله من وره العارات الفوك هسه اذا اشمرهن من السطح احد يلومني
بديعه : اني ابوسج اذا سويتيها
خوله : خلي اني اخبر اليوم ضايجه
بديعه : يااا عساج دوم ضايجه حتى تخبزين وتخلصيني
بديعه : كل وحده بهذا البيت تعاني بس على اشكال مختلفه صارت ذكرى اقرب من روحي وهي هم صرت الها كلشي كمنا اكلنا وكعدتنا وكلشي سوه
سهاد جانت منعزله ومالها دخل بينا تنظف وتدخل غرفتها وبيوم عمشه لزمتها
عمشه : أكلج يمه مامش فريخ منا منا چا شنهي كاااع بور انتي
سهاد : مفهمت عمه
خوله : قصدها امي ليش لهسه محبلتي
سهاد : شمدريني بيد الله
عمشه : چا انه گلت بيد عبد الله اعرفن بيد الله لجن روحي شوفي عند الدكتوره شنهي التأخير هاذ
سهاد : ميقبل نجم انروح
عمشه : چا بكيفه گل وليداتي عدهم فروخ اله انتي
سهاد : الله كريم اروح عود
بديعه : هنا بدت مشاكل نجم وسهاد دوم نسمع صوت طالع من غرفتهم ومندخل رغم عمتي تفتر تريد بس تعرف شكو ومن تسأله اذا طلع من الغرفه يگلها ماكو شى
لحد مابيوم راحت سهاد للدكتوره بليه علمه ورجعت للبيت وگبت العيطه
نجم : اني مو كتلج مترحين وحدج
سهاد : من وراك كتلك الف مره اريد اراجع اريد اشوف العله وين
نجم : وشفتيها
سهاد : مابيه شى طلعت وكالت الدكتوره وضعج زين
نجم : ارتاحيتي
سهاد : اي طبعاً ارتاحيت بعد السبب بمنو الله اعلم
نجم : شنو قصدج
سهاد : لا قصدي ولا شى اروح لغرفتي جان يجرها من ايدها تره اني كلشي مابيه
سهاد : واني شكلت حتى هيج تتعصب
نجم : هذا الموضوع مينفتح واذا النه رزق يجينا
سهاد : والله اني مابيه شى يعني الرزق المفروض يجي مو يوكف هيج وكفه
عمشه : شنهي بلاكم اصواتكم ليغاد
سهاد : عيني عمه اني رحت وفحصتني الدكتوره وكالت مابيه شى شوفي ابنج اخاف العله منه
نجم : تره تجاوزتي حجايه لخ تصير موزينه
سهاد : متكولي ليش متريد جهال اكو واحد ميريد اله بيه العيب
نجم : اني راجعت گبلج تره ومردت اكسر خاطرج وكلشي مابيه
سهاد : هاااا شوكت وشو ماكلت
نجم : كلت اخاف بيه السبب حتى مااظلمج ويايه وطلع كلشي ماكو وروحتج اليوم معجبتني واذا اريد هسه اسحلج لدكتوره ثانيه واتإكد من كلامج لاتضلين تذبين تهم عليه
سهاد : نروح شعدنا
بديعه : استهدو بالله تره تصير اثنين مابيهم شى وميصير عدهم لتضلون تتعاركون
سهاد : وانتي شدخلج
بديعه : هااي فوك منهدي النفوس مو صوجج اروح لجهالي احسن
سهاد : قصدج المنغولي
بديعه : اجيت عليها وبوجهه كلت هلمره عدتيها وراح اعبرها لخاطر وكفت نجم وعمتي مره ثانيه اسويج انتي المنغوليه
نجم : انجبي سهاد وامشي ادخلي ودفعها حيل من جتفها
بديعه : لو بيج خير جيبي مثله مو تعيرينا بيه
سهاد : غدي اني اجيب هيج واحد الله لا يكولها اضل بليه خلفه ولا هيج
نجم : سهااااااااد ليش متحترمين نفسج هااا وجرها من شعرها امشي لج ولي لبيت اهلج ومن تصيرين ادميه يله ترجعين
سهاد : هدني فوك ماكاعده بهاي المزبله محملني منيه
عمشه :يايمه حگها چا غير من بيت سجوده جايبينها
سهاد : تستهزأين عمه
عمشه : يلخوثه شنهي معناه تستازهين
بديعه : تستهزأين عمه يعني تصنفين او تقلدين
عمشه : چا اله تعوجين حلكچ وترطنين يلوك لام شلوك يمه لطهه على حلكهه عبن اعوج ويرادله تعدل مسيجينه الچلمه عوجه مثلهه
بديعه : عوفها نجم لتسوي مشكله
نجم : هي تلوب صار فتره على مشكله واني ساكت واكول خليها بلكت تحس
سهاد : هاي فوك مااطيب خاطري لان مديصير عدنا جهال
نجم : شبيج انتي داحجي انكليزي اكلها السبب مو مني اعيط مووووو مني وانتي هسه رجعتي وتكولين مابيج شى شنو بعد هذا الحجي الماصخ اسمعي سهاد تردين تبقين هنا روحي لغرفتج وانجبي تردين تولين لاهلج روحي وحسبي احسابج ماارجع مره اني التطلع من بيتي هي ترجع وحدهه
سهاد : هيج صارت نجم هاي تاليهه
نجم :العندي كتله اني طالع وشسوين سوي
طلع نجم وبقت سهاد تباوع بلوجوه
عمشه : ادخلي لغرفتج وانعلي ابليس ولا تكثرين بجلماتچ ولدي واعرفنه يطلع نار يرد رماد لاتكسرين بختج بيدج والخلفه رزق انتظري رزقج
سهاد : مشفتي عمه شون يحجي ويايه
عمشه : يااا انه لون بمجانه اكسر ضروسج عبن تراددين وحسچ الوادم كلها سمعتها چا فوك شينه كوات عينه
سهاد : ابنج اكيد متنطين بيه
عمشه : چا هذا العزيز انطي بيج وبلخلفج ولا وليدي يتكدر
بديعه : اكعدي وارتاحي ولتسوين مشاكل تره اذا طلعتي والله ميرجعج
عافتني ومجاوبت ودخلت لغرفتها
عمشه : اگلج يلمدهربه
بديعه : كولي عمه
عمشه : وره يعلم ما بين أيديهم وما خلفهم شنهي
بديعه : ولا يحيطون بشيء من علمه إلا بما شاء، وسع كرسيّه السمواتِ والأرض
عمشه : بسچ اعرفنهه وجع انه حافظتهه لجن ذكيره نعجه تصفن بوچهي وماتجوز اله اكولنهه
بديعه : اي عمه عفيه احفظيها
عمشه : ميلي مني لا بارك الله بيجن مايحفظني زين گلجن غمات وحدتجن الليل كله تعلف وايه ماادبرنهه يايابه يابويه چا رحمه على روحك بويه علمتني الحمدو بصوندتين چملها وصوندتين واحفظ الكرسي گله من وراهه عافني بيد الجناين
بديعه : مو حفظتيها ياعمه وبدون صوندات
عمشه : عكبيش يملطومه ضاله الليل كله ارطن ويه رويحتي وانسااهه كله من وراجن حريشي مايطبجن واخلص منجن ماتعلمني عدل
بديعه :ههههههه وثولات وكلشي المهم تحفظين يله ارجعي اقريها قبل متجي ذكيره وتسمعها الج ههههه
عمشه : كومي مني لا بارك الله بيجن ناصبات علي
بديعه : كمت اضحك على عمتي والله مرات عليها سوالف ابتلت ذكرى علمتها مرات تكعدها بنص الليل تعالي شكول بعد وذيج بليه وجع گلب تنزل وبعيونها النوم تتوضى وتصلي وياهه وترجع تعلمها
صعدت لكيت ساهره وصالحه كاعدات يتفرجن علينا من فوك
خلص الفلم العربي
صالحه : وانتي شكو قابل يمج احنا
بديعه : لا بس كلت اخاف عبالجن يصير شى
ساهره : سمعت بلال يبجي
بديعه : مالج دخل بيه يبجي يعيط ابني مو ابنج
ساهره : شكلت وهيج نطيتي
صالحه : هاي يوم مااجت ذكرى لهذا البيت وهي مستكويه وطولان لسانها جانت گبل صوتها منسمعه
ساهره : اي والله وصوجنا لو كارصيها جان جرت عدل تره ذكرى متفيدج تستقوين بيها
بديعه : لا تكرصني ولا استقوى بأحد اني بعدني مالي دخل لا بيجن ولا بسوالفجن
ساهره : سوالفج انتي وذكرى معاجبتني هاي سوالف الصلاه وقرايه القرآن صارت ماصخه
بديعه : استغفر الله يعني الصلاه شغله ماصخه
ساهره : مكلت هيج اقصد سوالفجن وراها انه ممرتاحه لهاي الشغله مكابلات عمتي وتعلمن بيها اخاف الجن نيه ثانيه
بديعه : المره جبيره بلعمر وحبت تصلي قابل شمسويات الها
صالحه : كولي لتكج تره تتعب ومتكدر علي ابالها
بديعه : تدري تره متشوفين البنيه حتى متتقرب منجن
صالحه : احسن الج والها
بديعه : شفتج ذاك اليوم بليل تحركين ورق
صالحه : اعرف بيج شفتيني لمحتج ليش اكلج لتدخلين
بديعه : سنين اشوف بعيني سوالفجن وساكته قابل شتغير واحجي
ساهره : وخلي ذكرى شويه تثكل لتسوي نفسها الجنه المحبوبه
بديعه : هاي فوك متخلص شغلجن اريد مره تحمدن بأحد لا الكاعد وساكت ولا اليشتغل
صالحه : انتي مو صعدتي لجهالج روحيلهم
بديعه : اوووف عفتهن ودخلت لغرفتي كمشت السبحه واسبح واباوع على بان تلعب ويه بلال وتضحكه
ذكرى : وكت العصريه جنت ادور على خوله سويت حلاوه جزر فتحت الغرفه ماكو شعجب
بدعه وينج
بديعه : خير
ذكرى : وين خوله
بديعه : شفتها صعدت فوك اخاف رايحه تذبح وحده من نسوان حموينج
ذكرى : ههههه لا متسويها امشي نصعد نشوف اخاف لو بغرفتي لو بغرفتج
بديعه : خلي ناخذ الحلاوه ويانه
ذكرى : هاي ماعون جبير جيبي خواشيك اخذتهم وصعدنا دورنا بكل الغرف ماكو
بديعه : اخاف بلسطح
ذكرى : امشي نصعد صعدنا لكيناها كاعده وصافنه بنهايه السطح وايدها على خدها وصافنه على بيت اكرم
ذكرى : تقربت منها وهمست هااا حنيتي
خوله : فزيت والله شبيجن تفترن ورايه
بديعه : شوفي ياحلاوه هااي
خوله : اي انطني اكل احبها
ذكرى : ليش واكفه هنا وصافنه
تقربت منها وكفت على جهتها اليمين والجهه الثانيه بدعه وتلاثتنا نباوع
الجو حلوو وبدايه غروب والطيور تروح وتجي فوك روسنا
خوله : ماكو واحد ينسى بسهوله بس السبع اليكدر يعيش واني عشت بس مانسيت
ذكرى : وكفتج هاي ادل بعدج تشتاقيله
خوله : عوفج مني شنو سالفتج انتي وصمد ذاك اليوم امي رادت تصيحج وماخليتها رجلج مديجي للبيت يطلع الصبح للشغل ويه امي وميرجع وياهه
ذكرى : غير يم مرته الثانيه
خوله : عزه العزاج تدرين وعادي
ذكرى : يعني شسوي اشمر روحي من السطح واصيح صمد مااكدر اعيش بدونك
بديعه : ويجي صمد يلزمج مثل رشدي اباضه ويبوسج ويكول مااكدر اعيش بدونج ارحميني
ذكرى : هههههه لو حلو مثل رشدي اباضه خلي يخوني واني ازوجه بيدي
خوله : ليش شبيهه صمد
بديعه : كلشي مابيه بس مجعمر
ذكرى : ولا واحد من اخوتج حلوو تره بس انتي ونجم على امكم طالعين بيكم شوفه
بديعه : ليش عيني وفلاح
ذكرى : ولو فلاح مثل اخويه بس شايفه خشمه جنه كبة جريش
خوله : ههههه اي والله همزين بتج ماطلعت عليه جان تضل هاي ضلتها اخوتي محلوين بس نسوانهم حلوات والله مبختين
بديعه : اكو وحده تعيب على اخوتها
خوله : اي اني محلوين هيه كوه هسه عوفونه من التقليد الى متى تضلين هيج ذكرى
ذكرى : تشوفين ذاك البيت واشرت بأيدي بأتجاه بيت اهلي ذاك اليوم انطردت منه ومالي مكان بيه وين اروح ابقى على جهالي وسكف يلمني احسن مااحير بجهالي وين انومهم اخوج غسلت ايدي منه دربه مو دربي مكابل ذيج وكاعد
واني ماعندي حيل اتعارك واهوس لان ميفيد ذيج ثوبي يخوله ذيج التعرف دماراته اني لا يوم راح اصير مثل ميريد ولا هو راح يصير مثل مااريد خليني ساكته وحاطه جهالي بحضني اتعب واربي واكبر عسى ولعل واحد بيهم يطلع على گلبي ويخلصني من هذا البيت وضيمه
اكلن ولتفكرن بيه عايفتها على الله
بديعه : كعدنا ناكل ونباوع على الجو عيون ذكرى على بيت اهلها وعيون خوله على بيت اكرم وعيوني على السما اتخيل اهلي شون عايشيين وناسيني كل وحده بينه مخذوله ومتأذيه بس مابيدها شى تغيره عفنه الامور على حطتها عسى ولعل تتغير
اليوم كاعده من الصبح فرحانه لان اول يوم مدرسه ليونس شبسرعه مرت الايام واخيراً راح اشوف ابني بلمدرسه احنا بسنه ١٩٩٣ كل الاشهر والايام الفاتت حياتنا هاديه كلمن بغرفته بس وكت الاكل ننجمع وراها نخلص شغلنه ومالنا دخل بأي احد خاصه اني وبدعه
كعدتيونس ابوس بيه يله امي اكعد وراك مدرسه فتح عيونه مكيف طفر بحضني
ذكرى : ولك كبرت مابيه اشيلك
يونس : حبابه ماما نعسان
ذكرى : يله ادلل عليه بس اليوم لان ممتعلم
نزلته اغسل وجهه
لكيت مرتضى ومهند يتعاركون
مرتضى : اني اغسل
مهند : اني اكبر منك واغسل قبلك
ذكرى : ليش تتعاركون لخاطر الله يعني مكان ماضيعتو الوكت لو واحد وره الثاني مغسل جان هسه كعد تبدلون
مرتضى : عمه والله اني نزلت قبله
مهند : اني نزلت وياك وانت سبقتني ولان اني اكبر اني اغسل
ذكرى : اششش كافي شوو تعالو انزل ماما يونس لزمت مرتضى غسلت اله ولزمت مهند هم غسلت يله اركضو بدلو
تعاال ابني غسلت ليونس وصعدت بدلت اله ونزلت لكيت بدعه محضره كل واحد اله لفته خبزايه وبيها جبن وخيار ولافتها وكلمن بعلاكه
تقربت وحضنت يونس اوووف شون راح افاركك
يونس : ماما كبرت عيب
ذكرى : ههههه يمه فدوة وليدي كبر يله روح ويه ولد عمك
عينكم عليه مرتضى مهند لتعوفوه عفيه
مرتضى : مااعوفه عمه
بديعه : شبيج راح تبجين
ذكرى : لج عيني گلبي نار اول مره ابقى بلياه
بديعه : مثلي من دخلت بان اول يوم هم الدمعه بعيني خيه بس اول يوم وراهه بس تردين يروح حتى تخلصين من دوختهم
ذكرى : اني اخاف على يونس لان فقير شفتي ولد عمه شون حرگين ويوميه مكتلوين بلمدرسه لعد هذا الفقير شون يخلصها
بديعه : عادي ينكتل مره مرتين ويتقوى گلبه امشي نكمل شغلنا بتج نايمه
ذكرى : اي نايمه همزين جان شخلصني لو شايفه اخوها بلبس المدرسه
بديعه : مكتلي منين اشتريتي الملابس
ذكرى : ينطي العافيه لنجم وخوله كل واحد جاب حاجه وكملت شغلاته
بديعه : اوف ياصمد مايجي غير بلشهر مره ومايذكركم بخبزه
ذكرى : تعلمت يمعوده عاادي وين ساهره قبل شويه سمعت صوتها
بديعه : نزلت ابنها وصعدت هلمره سمعتها تحجي ويه صالحه يردن يروحن للبصره اكو دكتوره زينه هناك
ذكرى : متروح بعد احسن
بديعه : ويضلون الجهال براسنا
ذكرى : الجهال بكل الاحوال اني ادرسهم متشوفين كل شويه واحد جايب كتبه ودفاتره وجاي
بديعه : خوش تعلمن على الخده
ذكرى : اني انقهر على الجهال ذاك اليوم مهند يبجي يريد احد يدرسه جغرافيه صحتي وكعدت ادرسه كاتلات نفسهن على الخلفه وخلفتهن ميدرون بيهم وين
بديعه : على كولتج خلي نخلص منهن خلي يروحن عمتي طالعه اليوم للشغل
ذكرى : اي من البارحه كالت لان لا جوحي ولا عبيد كعد يجيبون وارد زين وكامت تعيط وتالي سمعت صوتهم على صلاه الفجر مديت راسي لكيتها تصلي همزين مطلعت قبل متصلي
بديعه : غير انتي تفترين وراهه
نزلت ناي تبجي
هاا ماما
ناي : لاح موو للمدسه (للمدرسه)
ذكرى : ياعيني المن هاي الدموع تعااي هسه نكعد نتريك اني وياج وننتظره لحد ميجي
ناي : مااا مااتول مااليد
بديعه : ليش باع الدموع ههههه
ناي : اليد يويو
ذكرى: هسه يجي يويو من المدرسه لتبجين كاافي شلتها وابوس بيها افيييش ياريحتج
بقيت اليوم عيوني على الباب شوكت يجي ابني والوب وخوله وبدعه يضحكن عليه
سهاد : على كيفج قابل رايح للحرب
ذكرى : شسوي مو بيدي
كل شويه اوخر البرده مال المطبخ وشفت الباب انفتحت ركزت بيده طفل مكمط دخل للمطبخ وجهه ميتفسر والطفل نايم ومبين ابن انفاس
صمد : السلام عليكم
بديعه : هله ابو يونس هذا منو
صمد : تعالي ذكرى اريدج
ذكرى : مشيت وراه واني الف سؤال براسي
صعدنا للغرفه سديت الباب راح بأتجاه الجربايه وكعد والطفل بحضنه
صمد : ادري الراح احجي ثكيل عليج ومراح تتحملي
ذكرى : شكو صمد تره حيل مابيه هبطات هذا الولد المن
صمد : بنيه مو ولد
ذكرى : زين هاي البنيه المن
صمد : بنتي من جليله
ذكرى : ضليت صافنه وباهته احس لساني انبلع
صمد : جبتها هنا ويه اخوتها
ذكرى : بلعت ريگي وكتله وامها وين
صمد : متريدها
ذكرى : شنو متريدها
صمد : البارحه جابت وكالت مااريدهه وتريد تطلك مني
ذكرى : هي مو جانت حامل قبل سنين تره كلشي مكعد افهم
صمد : قبل من سوت الهوسه مجانت حامل ومطلكتها كلت للكل طلكتها وهي سكتت وقبلت تعيش ويايه مثل قبل لان كذبت عليه وانتي من مردتيني رجعت الها وعشت وياهه وتشوفين وين يله اجيج
ذكرى : واكيد هذا الشى معجبها لان عاشت وياك وعلى حقيقتك وشافتك انت شنو
صمد : ذكرى الزمي لسانج
ذكرى : يالسان تحجي عني ولك مره حس بيه الكدامك بني آدم مو صخر اتجيب وتحط فوك راسي تجيب واطمس وجهي بلطين وساكته رضيت اكون مره بس بالاسم وكلت احسن اقلها ماكو مشاكل رضيت بقلت الحال وجهالك عايشين على امك وكلت عادي انتي كعد تشتغل وياهه ادري بيك متزوج وكلت اعوفه مالي دخل بيه
تدري اليوم اول يوم مدرسه لابنك وانت متعرف بيه كعد انتظر يرجع من المدرسه اطبلي بطفله وتكلي هاي من ضرتج هااج حطيها ويه جهالي هو انت تعرف جهالك شبيهم مابيهم تعرف اعمارهم ذيج ناي جوه تعرف شكد صار عمرها اتحداك وجاي جايبلي طفله بنت انفاس ولازم اخذها من ايدك واحطها على گلبي واربيها يعني لهاي الدرجه عندك اني حيوانه متحس
صمد : شسوي امها وشمرتها قابل اشمرها بلشارع
ذكرى : مو هاي امها الذبحت روحك وتزوجتها مو هي العفتني وعفت كلشي ورحت نمت بأحضانها مو هاي الي بسببها رحت اني لاخويه اركض مثل المخبله حتى يخلصني منك تريد هسه اخذ بتها واربيها لا لهنا وكاااااااافي ارحمني الله لا يرحمك
صمد : لتعيطين وهي باقيه هناا وبيتي مو بيتج ميعجبج طخي راسج بلحايط روحي لاهلج خلي يلفوج
ذكرى : نزلت دمعتي وكتله حقك تعرف محد يلفيني لهذا مستكوي عليه
ااااااااخ من امداني واضرب على كصتي
شدعي على الجان السبب متكولي شدعي
صمد : باعي ذكرى هاي بتي حالها حال ناي ويونس وراح تبقى هنا
ذكرى : وانت تروح تخلص ونستك ويه امها موو
صمد : لا طلكتها الجليله
ذكرى : مثل ذيج المره أكيد
صمد : يمعوده والله طلكتها هي مرادت العيشه ويايه وصار فتره مشاكل وعركات وكالت بس اجيب اخذ بتك وطلكني عبالي سوالف حوامل ومن تجيب تنسى وتغير رأيها هي جابت شالت امها الطفله وحطتها بحضني وكالت روح حير بتك وبنتي اطلكها مالها عيشه وياك حاولت اقنعها جانت قافله اتصوري حتى مقبلت ترضعها
ذكرى : ياعيني وانت مقهور على الطفله لو على امها احرك روحي حتى ترتاح
صمد : هاي يمج بقت تردين تبقين هنا ويه جهالج هاي الطفله مسؤوله منج متردين امشي لمي ملابسج ولي لاهلج وعود خلي فوزي يلفيج
عافني وطلع كعدت بلكااع الطم على صدري ورجلي اضرب بكل حركت گلب واعييط الله يشيلك الله ياخذك دخلت تركض بدعه
بديعه : شكوو شكوو
ذكرى : لج جايبلي بت ضرته ويكولي ربيها شايفه هيج نذاله
بديعه : هااي بت جليله من سود الله وجهم اثنينهم وامها وين
ذكرى : متريدهه واطلكت من صمد واني لازم اربي بت ضرتي واشوفها يوميه كدامي شون تكبر حتى تذكرني بكسرتي وضياع شبابي ويه واحد ميسوه
بديعه : على كيفج بلعومج اتجرح من العياط
كامت الطفله تبجي وتصرخ
بديعه : هااي شنو هسه بيها
ذكرى : مااريدها ولكم هاي سجين جديده تنغرز بصدري ماضل مكان انطعنت بكل جهه
بديعه : الطفله طكت من البجي
والله امهات برابيك ذيج تذب ابنها وهاي بتها هاي شبيهه الدنيا شجرالها
ذكرى : بله هذا ابن حماج ومنطاج گلبج تذبي اني هاااي بت ضرتي ياناس
بديعه : هو وين راح
ذكرى : النذل دار وجهه وراح عافها عليه والله اعلم شوكت يشوفني وجهه ادري بيه طفر حتى اتحمل مسؤوليتها
بديعه : وشراح تسووين
ذكرى : ارجعها لامها جيبي عباتي وصيحيلي خووله اروح لجليله
بديعه : شيوديج يمخبله
ذكرى : هااي البنيه لحظه متضل هنااا
جريت العبايه وسحبت الطفله وحطيتها جوه العبا ونزلت اركض
خووله خووله
خوله : خير شكوو مكعدتني
كومي
خوله : منو مات
ذكرى : جريت الغطا من راسها كوومي
خوله : يمعوووده شرايده كعدت عدل فركت عيوني هاي منو
ذكرى : امشي ويايه لبيت جليله نرجع بتها
خوله : بت منوووووو
ذكرى : بت اخوج وجليله انتي تندلين بيتها امشي نرجعها لامها مااريدها
خوله : لا علكت وروح ابوي
