 |
رواية الابواب الخمس الفصل العشرون بقلم ريام الهادي
ليلية اگصگص خيط النعاس
عن لا حلم يتناوش الراس !
غصن الظمير تورعشة الفاس
ناسي اطلعوا بس بالإسم ناس
خوله : بت منوووووو
ذكرى : بت اخوج وجليله انتي تندلين بيتها امشي نرجعها لامها مااريدها
خوله : لا علكت وروح ابوي
ذكرى : كومي يمعوده تره راح احرك روحي من وره مصايب اخوج
خوله : كمت والله بس اغسل وجهي والبس وانروح هاي شبيهه تبجي
ذكرى : شمدريني وكمت ابجي وياها
بديعه : اجي وياكم
خوله : ابقي انتي اهنا اخاف يرجع صمد امي اقلها تبلغيهم وين طلعنا
بديعه : سهاد تبلغهم عرفت كلشي
خوله : مكدرتي تسكتين
بديعه : شسكت وصوت صمد ليجوه واصل
خلي اغسل وخري مني
ذكرى : حطيت الطفله بحضني وكعدت على الجربايه انتظر خوله اباوع على وجهه شكد حلو وبريئ وتمص بشفايفها مبينه جوعانه نزلت دمعتي وكعت على وجهه وضلت تحرك بوجهه مبين جوعانه الله يشيلج جليله طفله لحمه حمره بعدها اتذبيها
يله يمعودات وين صرتن
بديعه : اني كملت
خوله : واني هم امشن يله
ذكرى : غطيتها جوه بعباتي وطلعنا وبدعه وصت سهاد عينها على الجهال دنطلع من الباب وصاحت ساهره وين رايحات
خوله : امشي يمعوده مالج دخل بيها
ذكرى : مندارينا وكملنا طريقنا جنت امشي وگلبي يوجعني مدري على حظي لو على هاي الطفله التبجي
خوله : هذا بيتها اوكفي لدكين الباب
ذكرى : ليش
خوله : اهم شى تعرفي اذا انتي عندج لسان هاي عدها اثنين احجي وياها على كيفج انتي مو وجهه بهذله
بديعه : لعد على شنو احنا جايات وياها اذا هي تخاف احنا منخاف شحدها تبهذلها واحنا موجودات
خوله :هو اكو اجبن منج بطلي هذا النفخ
ذكرى : ماعندي حجي وياها تاخذ بتها الشمرتها عليه مجايه اتسامر واخذ وانطي بلحجي دكيت الباب مره مرتين جان تطلع امها
ام جليله : هااي انتن خيرجن شجابجن
بديعه : زين تذكرينا والله ذاكره قويه
ذكرى : بتج وين
ام جليله : وشرايدات منها
خوله : بله حجي زايد تره نعسانه وروحي بخشمي وينها المدلله شوو وخري ودفعتها ودخلنا جانت جليله نايمه وكعدت من نومتها
ذكرى : الج گلب تنامين وبتج مو بحضنج
جليله : شجابكم علينا شتردون
ذكرى : هااج بتج الشمرتيها عليه ودرتي وجهج وطلعتها من جوه العبايه وحطيتها بصفها
جليله : اني مشمرتها عليج انطيتها لابوها
ذكرى : وابوها اجه وذبها عليه بله انتي ام مخفتي من الله شوفيها تبجي من الجوع صدرج مدر ويدور عليها عمرها يوم واحد وتشمريها
جليله :على شنو جايه هداده مره جنت متزوجه وراح اطلك واي شى يربطني برجلي مااريده
ذكرى : ترى هاي روح مو قطعة ملابس تذبيها تذكرج برجلج هاي صارلها تسعة اشهر تاكل وتشرب وتتنفس وياج روح وحده محنتي من طلعت من بطنج مكلتي شون افاركها
جليله : عيني ام يونس هاي السوالف مااحبها مال مناهد والجر وعر والبواجي شغله بيني وبين رجلي شلج دخل بيها
ذكرى : هو اني شلي دخل بيكم اثنينكم عسى ماتحتركون ولا تهموني بس مو تجون تذبون بلاكم عليه اجيتي بيوم وهوستي وكلتي اريد يعترف بوجودج ودكيتي طبل بنص البيت وعفتلج الجمل بما حمل وطلعت وردت اشرد بروحي منه وتالي رجعت وخسرت اهلي
وسكتت كلت قسمتي من الدنيا العوجه هيج
رجعت عرفت بيه هو يبات يمج وبعدج على ذمته عفته الج يبات يبقى ولا الي دخل بيه حتى مااداعي بمصرف وضليت اني وجهالي بحسره الفلس وهو عايش بحضنج ومتنعمه بخيره
جليله : لج عيني ياخير اروحلج فدوة كاتله الفگر من ساسه لراسه شريد منه وصاح ماعندي
خوله : ليش مو تعرفين ظروفه قابل تزوجتي مدير عام وانصدمتي بيه تعرفي عتاك وعلى كد يوميته وصارلج ست سنوات وياهه شصار هسه وگلبتي عليه
جليله : مليت لعبت نفسي من عيشته ومن فگره ومن ريحته ومن كلشي يذكرني بيه وهااي اول شى يذكرني بعشرته السوده وتأشر على الطفله والسنين الفاتت خلصت شبابي واني انتظر يسوي حل يصير براسه خير يعيشني مثل الناس هلمره اكعيدي عند امي حتى بيت ميكدر يأجرلي ويطلعني من هاي المزبله شسوي بيه بعد المن ضاله وياا تفوو على العيشه الي تخليني بحسرت الفلس واني اشوف المتسوه احسن مني
بديعه : وهاي هسه عرفتي حال صمد شو من جنتي تتختلين وياه وازوجتي من وره مرته محسبتي لعيشتج ومشفتي المتسوه احسن منج ركضتي وهوستي واني حامل واريده يشهر زواجه وصار دم بسببج وتالي هم ضليتي ويااه وره كل هاي السنين جاي تذبين بزرتج منه وتندبين حظج وعيشتج ولج اخاف شايفتلج شوفه جديده وتردين ادعبلين صمد
جليله : استحي على نفسج موعيب هذا الحجي اشايفتني يوميه بحضن رجال
خوله : يااا هاي منو تحجي على العيب الذبت بتها بنفس يوم ولادتها ولجن انتن امهات ااااخ مال على روسج بلشفل ولا اخلي عظمه صاحيه بيجن انتي وذيج السحاره بت غنيه
جليله : لا تضلن وحده ترفع والثانيه تكبس اسمعني زين والحجي الج ذكرى هاي البنيه مااريدها تاخذيها وين ما تذبيها مالي دخل ترجعيها على صمد انتي وياه اني نهيت كل الشغله من البارحه ومنتظره يطلكني واخلص منه ومنكم ولا كل شويه جايتني وحده مطلعه لسانها عشر مترات عليه اني لوما نفسه جان هسه ركعت راس براس ومااخلي حس وحده منجن يطلع لتشوفني هيج تعبانه لو جاياتني غير وكت جان عرفت شون اسكتجن
ذكرى : خافي ربج وراج حساب وكتاب هاي بتج من دمج شوفيها شون تبجي جوعانه ناطه من الصبح على ساعه تموت من الجوع جان تشيلها حيييل وتعيط
جليله : اذا مااخذتيها هسه وروح ابويه اشمرها بأقرب مزبله وانتي تتحملين خطيتها مااريدها هاي الطفله تذكرني بصمد واني اريد انساه اجي اخلي بته يمي
خوله : شكد شايفه كحاب مثلج مشايفه والله وصرتن ثلاثي انتي وبنات غنيه بس لو افهم شمسوين والله يذب علينا هاي الزبايل
خلصنه عمرنا بلعتيك غراض وبشر
ذكرى : ذبيها هاي بتج مو بتي ومااتحمل اي خطيه هاي تشوفيها يوم القيامه تشهد عليج شسويتي بحالها وشون شمرتيها شتكولين لله ضميرج وين هيج ماكو رحمه بگلبج ولا ذرت امومه خلي صمد يجي ويشوف الباعني علمودها شون جازته هاي بتج يمج شسوين بيها مالي دخل بعدت عنج صار سنين حتى رجلي عفته الج لتشوفيني لا وجهج ولا وجهه اي شى منج
امشن يله
طلعنا من البيت وگلبي ناار هاي شبيهه ياربي نمشي وبس ساكته
بديعه : شبيج ذكرى
خوله : تفكر بلطفله متأكده
ذكرى : لج عيني خاف تذبها بلزبل صدك
خوله : المثل جليله تذبها عادي مو ذبتها على ابوها ومرت الاب وحتى مرضعتها يعني ماكو اسهل منها تذبها
ذكرى : خلي ارجع اخذها
بديعه : يمعوده اوكفي شتاخذين
ذكرى : اخاف تذبها بلزباله والحيوانات تأذيها يمه الرحمن ولجن گلبي راح يوكف
خوله : صار ساعه نهوس ونعيط مجان من الاول خليتيها يمج وفضيتيها
ذكرى : توقعت من انروح الها الكاها تبجي تلطم تصدمني وتكولي صمد اخذها كوه مني مردت انطيها تاخذها بحضنها وتبجي وتحس بندم الف شغله حطيت بالي بس محطيت هاي الصلافه والعرامه بيها ومصره تذبها
خوله : واكيد راح تذبها نظراتها لبتها مو راحه نفس نظرات المكبوره سهيره من رادت تذب بلال بس لو افتهم ليش ماكو عدل بلدنيا ناس تذب جهال وناس تبجي على جاهل
بديعه : حكمت ربج هسه واكفات بلشارع لا احنا الراجعات للبيت ولا احنا رادين لبيت جليله علمود الطفله
ذكرى : ماادري مخنوكه واريد اعيط اشك هدومي لا بيه اخذها واضل حياتي كلها اربي بت ضرتي ولا بيه اعوفها اعرف تاليها تنذب اذا مو اليوم باجر
خوله : اخذيها ذكرى وربيها
ذكرى : شون اكدر شوون
بديعه : هاي يخلفن ويذبن وتعال ياعمي شيلني يوميه وحده ذابه بزره ونتلاكفه اني وياج
خوله : هههههه ضالات تلمن جهال امداجن
بديعه : غير من وره اخوتج العارات لتخليني احجي
خوله : واخيراً صدكتو اخوتي عارات يراد اهلهل بنص الناس هسه فضنا ضالات مثل تيوله الشارع واكفات نرجع للطفله لو نعوفها
ذكرى : لا ماارجع امشو للبيت
رجعنا للبيت وفكري كله يمها اول مدخلت اجه يونس يركض حضنته حييل وشميته يمه ابني اشتاقيتلك
يونس : ماما اليوم صفكولي
ذكرى : عفيه بلسبع تعالي احجيلي شونها المدرسه
يونس : حلوه وجهال هوايه وانطوني كتب
ذكرى : تعال اشوف جنطتك امشي نصعد فوك
مرتضى : عمه عمه
ذكرى : هاا عمه
مرتضى : جلديلي الكتب مالتي
ذكرى : وامك وين
مرتضى : راح تروح لبيت بيبي وابقى اني هنا والست كالت جلدو الكتب
ذكرى : وخالتك وياها
مرتضى : اي
ذكرى : يعني مهنا وسما هم راح يوكعون براسي
مرتضى : اكول لماما عمه تتعب
ذكرى : لا حبيبي كلشي لتكول وجيب كتبك وتعال
طبيت للغرفه وصحت ناي اجت تركض على كتب اخوها وكاعده تباوع وتريد كتب مثله جمعتهم كلهم الي اجلد كتبه والي اشوف الواجب مالته
طبت ساهره
ساهره : هااي مرتضى يمج
ذكرى : وين يروح لعد
ساهره : اني وصالحه رايحين كم يوم لامي تعبانه نشوفها ونرجع
ذكرى : الله وياجن
ساهره : عينج على الجهال مو تغفلين عنهم
ذكرى : الله كريم ودرت وجهي منها حتى ميعجبني اباوع عليها
ساهره : صدك ذكرى شنو سالفه بت صمد
ذكرى : منو كلج
ساهره : سهاد حجتلي هاي بت جليله
ذكرى : روحي ساهره لتتأخرين وراكم طريق طويل توصلون بلسلامه
ساهره : فوك مااواسيج هم الضره وهم بتها
ذكرى : اووووف الله وياج ام مرتضى
طلعت واختنكت منها بقيت الهي نفسي بلجهال وبدعه وخوله يحضرن الاكل
كملت كلشي وحضرت ملابسهم وخليتهم كلهم ينامون يمي فرشت الهم بلكاع واحد بصف الثاني وسما وناي يمي على الجربايه
غمضت عيني وغفيت شويه حسيت ايدي تكعدني فتحت عيني لكيته صمد وبيده الطفله الصغيره اشرلي براسه تعاي وراي
كمت من فراشي شلت شعري وطلعت وراه لكيته نزل بغرفة عمتي دخلت وراه
عمشه : تعاي يمه اكعدي چا يوميه طركاعه وتلفي علينا
كعدت بصف عمتي وخوله متمدده بفراشها بس كاعده
صمد : ليش رجعتيها
ذكرى : تدري مرتك تكرهك وتلعب نفسها منك هااي العفتني علمودها متريد حتى خلفتك ذبتها عليك مره ثانيه مو
صمد : كتلج تبقى الطفله واذا متردين انتي اطلعين منا
عمشه : دهر اصابك ولفلف عظامك چا هو بيتك وتطرد الوادم بگيفك حط رجولك بلكاع يبن عمشه انه صاحبت الدار وكلكم خطار عندي اركد لاوروح ابيك الزمك الشارع تسرح بيه ويه الصخل
صمد : يمه غير بتي واريدها ويه اخوتها ابقيها بلشارع تقبليها
عمشه : لاتسوي نفسك مسيجين گله البله والطلايب من وره راسك يالاغم انه كتلك تدوهن وتزوج بت السماجه وضل عليها چاشردت من عيالك ومريتك ويوم مالزمتك الباب چاي تلوحي برگابك وهاكم بنيتي ربوها چا ربي رويحتك الاول ربي عيالك ماتعرف گلشي عنهم وفوكاها چاي هداد على البت
صمد : شسوي هسه ذيج باجر اروح اطلكها متريد عيشتي وهاي الثانيه هاجره فرشتها ومانعتني وعندي هاي الصغيره حاير بيها اليوم ام جليله لكيتها براس الفرع كاعده وتنتظر وبس شافتني رجعت اجت تركض تعال اخذ بتك لا نذبها بلزباله وكالت شون ذكرى رجعتها تردين اسكت الها
خوله : هو انت كادر على هاي الفقيره وذيج العرمه تبلع لسانك يمها مجان كمشت ذيج وطيحت حظها وكسرت عظامها على سوالفها مو جاي تهوس وتعيط وتبيع مرجله براس هاي الفقيره
صمد : لتدخلين انتي وانجبي واسكتي واذا متسكتين اطلعي بره
خوله : بغرفتي نايمه تريد انت اطلع بره اني مو ذكرى وتطردني
ذكرى : كافي عفيه لتتعاركون
صمد : ذكرى انتي تخافين الله وانسانه صايمه مصليه ينطيج گلبج تنذب هاي الطفله صار يوميه افر بيها حتى وجهه اليوم انگلب اصفر
ذكرى : اي صار بيها ابو صفار
عمشه :خايب من عمت عينك مره تلعب بحالك هيچ كولبت بيك عليش هاي الشوارب يمه شيلهه ماتسوى بعد حاطهه
صمد : يمه انتي ويايه لو عليه الطفله راح تموت وضال افتر بيها ذكرى احلفج بيونس وناي خليها وياهم واني مستعد اتحمل مصاريف الجهال كلها وبعد شأشتغل احجي واحطه بيدج بس خليها يمج والله تكسبين اجر بيها
عمشه : يمه خذيها اعرفنج گلب ابيض مثل الحليب وهاي دخيله عندج وانتي بت اصول ماتردين الدخيل
صمد : هااا شگلتي
عمشه : اسگت غثيث وماتنجرع خلي البت
تفكر اعرفنهه گلبها رچيج وماترد محتاج
ذكرى : اباوع على الطفله النايمه الوجهه اصفر من ابو صفار وبين عليها التعب والتمرمر سحبتها بهدوء من حضنه وكتله روح جيب ممه صغير وحليب
صمد : اي اروح بس تبقيها يمج
ذكرى : لخاطر حوبت هاي الطفله مو لخاطرك هاي كدام عمتي متتقرب مني لتشوف نفسك راح اطلك وتجي تركض عليه اني ام جهالك وبس تريد تروح تتزوج تعاشر تصادق مالي دخل بيك عليك المصرف واني عليه اربي واگبر
عمشه : چا امداهه التاخذه جنهه جربوع مكطوم ذيله
خوله : هههههههه اي والله
صمد : خوووله
خوله : امك تكول اني شعليه احجي وياها لو لان متكدر اتجاوبها تعيط عليه
عمشه : بسگ من البت ولي اشتري لهاي الجاهله شسمهه
صمد : بعدني ممسميها
ذكرى : صفنت عليها مديت ايدي على وجهه وخدودها وكلت اسميها شرهب
عمشه : شنهي شربت
ذكرى : شرهب عمه
خوله : وشنو معناه
ذكرى :جذر يمكن ما متأكده سامعته وحبيته
عمشه : يمه سميهه عمشه شحلاته يرطن بلاذان رطن جنه جرس الحله مال طلاب
خوله : حتى الجهال يضحكون عليها انتهى مستقبلها قبل ميبدي
عمشه :اصفكنچ بتوثيه افتح راسج المجيم چا اسمي موش زين هذا الوادم كلها تحلف بيه ماعاجبج يبت فرج غمه موش بيدج على خالتج
خوله : لا فدوة ابوس ايدج شبهيني بإي احد لا على غنيه
عمشه : هااا اتكدرتي (ضجتي) چا اسمي موش زين
خوله : يخبل ويموت بس لتشبهيني بخالتي
عمشه : اي هيچ جري عدل لا امدج بلكاع ودك على راسچ افوخ گلبي يلكرطه
ذكرى : كمت وبيدي شرهب وصعدتها فوك دكيت الباب على بديعه وشافتها بيدي ضلت صافنه
راح ابقيها حالها حال جهالي شسوي مو بيدي بيد هذا الاثول گلبي يرجف على گلشي
بديعه : الله ينطيج على كد نيتج
ذكرى : فدوة شعندج حضاين لكافات عصابات مال بلال او قديمات مال بان ضامتهن انطينياهن ماعندي
بديعه : هنه مال يونس وناي بعدهن يمي مااستخدمتهن هوايه باجر نطلعهن ونغسلهن ويه كم حاجه مال بلال بصابون رگي ومي حار يرجعن جدد
ذكرى : اي عفيه واذا عندج هسه كماط جوه ايدج وملابس جيبيلي لان موصخه خطيه
بديعه : هسه اجيب ملابس ونغسل الها وباجر انسبحها بلنهار على دفو الجو
ذكرى : ان شاء الله
غسلنا الها حسيتها حيل ارتاحت وصمد جاب الغراض ودخل للهول ينام عفته مابيه حيله وره مرضعتها جوعانه جبت غرزه مال ابو صفار وثوم وربطه بكماطها بلكت يخف عنها دورت على الكاروك طلعته ونفضته وحطيت فراش بيه ونومتها
كعدت الصبح على صوت ناي تصيح وتكمز
ناي : ماما اليدها نونيه
ذكرى : تذكرت على شرهب جريت نفس وضحكت بوجهه درت وجهي لكيت الجهال داير مدايرها كلها صافنه عليها هاي منو
مهند : هاي منو عمه
ذكرى : صفنت انتي منو بتي لو بت ضرتي
جريت نفس وكلت
هاي اختكم الجديده بتي وبت عمو صمد
يونس : ماما عندي اخت صارو اثنين
ذكرى : اي حبيبي صارو اثنين
مرتضى : شسمها عمه
ذكرى : شرهب
صفنو بوجهي ضحكت اسمها شرهب
عيدو ورايه وكامو يعيدون واكيد ناي متلفظها صح اخر شى تعبو كتلهم سموها شوشو يله ارتاحو للسهوله
كعدتهم عمتي كلهم وحجت الهم على شرهب الكل بقى ساكت اما نجم عااط
نجم : تبقى هيج لا ابالي مستحيت من خلفت وشمرت على مرتك
صمد : وانت شعليك احد طلب رأيك وهي قابله
نجم : انتي قابله بهذا الوضع
ذكرى : وحتى اذا ماقبلت مالي غير حل
نجم : شفت يعني مقابله لك هيج ماعندك ناموس غيرتك راحت تتزوج سنين وتشيل ايدك من مرتك وجهالك وتالي اتجيب خلفتك من ذيج وتشمرها تعاي ربيها هم بعد جم يوم تروح تشوفلك وحده ساقطه جديده وتتونس وياها وتحبل وتخلف وذب هنا وروح
صمد : انت شلك دخل شحارك حمامك انت مرتي لتدخل تره تصير موزينه اني زايده مني كاعد واحجيلكم هاي حياتي وحر بيها والميعجبه يركع راسه بلحايط انتي لج راضيه لو لا
ذكرى : راضيه والله راضيه بس كافي مشاكل وعركات
عمشه : چا يمه مايفيد اذا مانصبح بطركاعه ونمسي بطركاعه هاي كتبت الله والوعد
نجم : انتي ابقي هيج تستاهلين كلشي صار بيج
ذكرى : اي استاهل شعليك انت وكمت وعفتهم
عمشه : يايمه بسگ البت وراضيه لا تكدر رويحتك
عبيد : هذا هو البنيه بتنا ومو مهم امها منو وراح تبقى ويه جهالك فضو عااد ورانه شغل مكوم يمه هذا الحجي ابوسلام ضلت عليه فلوس والسوك مجزر وشغل باجر مانعرفه شون حليها
عمشه : انه احجي ويااه چا شنهي يباتن يمه الغريضات ماحصلنا گلشي منه ذكرني يمه من صباحيات الله اشوفن شنهي سالفته
ذكرى : كمت اركض بلبيت منا تدريس الجهال ومنا حمويني والشغل وبدعه ويايه سهاد يوم تشتغل وعشره لا وخوله من تشوفنا نتعب تكوم تساعدنا واحنا نستغلها لان طبخها يخبل ونذب الاكل عليها ومن تزهك تعيط وتعوف كلشي ونضل نضحك ونكمل احنا مدري ليش البيت من ساهره وصالحه مو بيه هلكد مريح
صمد رجع ينام بلغرفه بس كلمن بحاله والعرفته من خوله طلك جليله والظاهر مقهور عليها لان عافته
اما شرهب سبحان الزرع محبتها بگلبي كمت احسها قطعه من روحي واذا تبجي اجي اركض عليها
خلال كم يوم تعلقت بيها وناي مكابلتها وكاعده
رجعت ساهره وصالحه بعد اكثر من ٢٠ يوم وشافن شرهب واكيد متفوتهن سالفه اله يغثن الواحد حاولت مااسمع الهن واطنش
سويت جاي لعمتي وكال عبيد
ام يونس جاي وياج رحمه لاهلج
ذكرى : صار
جوحي : اني هم اذا اكو
ذكرى : من عيوني
صالحه : اني مو كاعده شو مطلبت
عبيد : مو كتلج وسويتي نفسج مسمعتي وذكرى بس الواحد يطلب منها خلف الله عليها تركض وتسوي بليه عجز
ساهره : خوش والله صايره هيه ام البيت
جوحي : اكعدن بيتجن ويصرن ام البيت وابوه احد لازمجن
ساهره : عفتك جم يوم صرت تتبطر
جوحي : هو استكان جاي شرايد وكلتي بطر
ذكرى : هاك ام مهند وهذا استكانك ابو مرتضى
صالحه : والله خوش مدلله زلمنا
ذكرى : اخوتي ليش ماادللهم
عبيد : والنعم منج ام يونس
بديعه : ذني شبيهن
ذكرى : والله ماادري طاكه خبالاتهن
بديعه : عوفيهن وامشي حسيت الوضع توتر بس هذا الشى مو جديد صار سنين البيت عليه ذني شذكرهن هسه
وبيوم كتلني الشوق لامي حيل صار فتره مشايفتها باوعت الجو مغيم وبارد بدايه شهر ١٢ / ١٩٩٣ وكت مغربيه اخذت شرهب ورحت اعرف هيج وكت ماكو ابويه يصلي بلجامع واكيد فوزي ماكو
دخلت عليها هي شافتني وعاطت
يمه بنيتي تعالي بحضني شمرت نفسي بحضنها جنت حيل اشتاق الها روحي مفرفحه عليها بجيت كل البجي الحابسته من ايام
ام فوزي : يمه هاي منو
ذكرى : بقيت صافنه شكول لا ارادياً كلت هاي بتي ماما
ام فوزي : شوكت حبلتي
ذكرى : محبلت
ام فوزي : شنو حزوره احجي بت منو هاي
ذكرى : بت صمد من مرته الثانيه
ام فوزي : صدك تحجين اكيد تخبلتي تربين بت ضرتج وامها وين كعد اسولف كلشي لامي بلبدايه مقبلت على قراري ومن حجيت الوضع الي انحطت بيه الطفله سكتت وكامت تبجي
ام فوزي : كله من وره ابوج واخوج خلوج تتحملين المر حتى تبقين عايشه هناك
ذكرى : الْحٍمَدٍ للـّہ على كل حال اروح قبل ليجي بابا ويعيط
ام فوزي : ديري بالج على نفسج
ذكرى : فوزي شونه ماما
ام فوزي : زين بنيتي لايضل بالج هااج
ذكرى : شنو هاي
ام فوزي : جم فلس اخاف تحتاجين شى
ذكرى : مستوره يوم مامحتاجه
ام فوزي : ذني مني والله اني جامعتهن الج اخذي يمه لتشلعين گلبي فوك هو مامشلوع
ذكرى : اخذت الفلوس منها وبست ايدها وراسها وطلعت من بيتهم الجو بدا يمطر حطيت شرهب جوه العبايه لتبرد واني امشي جان يشوفني صمد ضاج ويأشر ارجعي للبيت
دخلت للبيت الكهرباء طافيه مشغلين لاله وضواها بس موجود بلمكان لكيت عمشه كاعده بلهول ويمها الجهال لامتهم وتسولف الهم حياتها وبطولاتها وكلها مخلوسه يخافون يكومون لان تضربهم
ضحكت على كعدتهم عفتهم وصعدت اجه صمد ورايه خليت شرهب بلكاروك
صمد : اني مو كايلج مترحين لاهلج انتي هيج ماعندج كرامه بابا ميردوج
ذكرى : رحت لامي شون ماازورها
صمد : اي مترحين ذاك اليوم ابوج شافني تفل بلكاع ومشه يعني عليه اعرف متقصدني
ذكرى : من ضيمه غير ليش السويته بيه قليل جريت ملابس عندي على الجربايه اصفط بيهن حضاين مال شرهب وملابس ناي ويونس
صمد : لا كل مره تعيديها انجبيتي وبقيتي هنا لا كل شويه ضيمي وضيمي العليه داسوي اشتغل وانطيج تربين الجهال وشايل ايدي منج تره احط عقلي وياج وارجع مثل قبل ادمر اعصابج وروح ابويه
ذكرى : اووووف هذا هووو صمد فدوة راسي يوجعني
جان يطب يونس وبيده ناي
اسمعي لج روحه لاهلج ماكو واذا وصلتي بعد رجلج اكسرها
ذكرى : هزيت راسي بدون ماارد
طلع صمد وركع الباب حيل وسحبت ناي الصافنه على وجهي وحطتيها بحضني
فدوة للبنات عشره واكول گليلات وابوس بيها اعرف تخاف من عيطت ابوها نزلت من حضني وراحت على الكاروك وصافنه على شرهب
تباوع بعيون بريئه على اختها الصغيره النايمه بلكاروك
ماما يونس افرش الك ولاختك ونامو
يونس : هسه افرش
نمنا ومندري اطفال وكلنا امل بلدنيا واااخ منها للدنيا
بقيت حايره بلعيشه وبيوم ماطره قووي وعمشه ضاله تشتغل وماطره عليها ومدايره بال ورجعت لليل صخنت
عمشه : الحكن ولجن يمدهربات راح اموتن
ذكرى : عمرج طويل عمه هيه صخونه لتخافين فلاونزا وتروح
عمشه : چا شنهي تعرفين احسن مني اگلها لعب بيه فلك جسمه كلاته يون علي
بديعه : هسه سويتلج ورد ماوي وانطيتج علاج وفورت الج ورق غار راح تصيرين مثل الورد كل شويه ترزلينا والله كلشي سويت وماترضين ساعه السوده من تمرضتي لو اني متمرضه ولا هذا الشلعان الگلب
عمشه : وشلعتهم چا انه لون اضل عليجن تمردني مرد چا ماترتاحن اله اموتن وادفنني يم ابوي مخلصاتها علي ورد وزرع جني صخيله وتكرط بيهن
خوله : يمه شنو السالفه من المغرب لهسه كاعدين يمج نداري ونمسد وندلل شتردين
عمشه :چلبب الچلبج انه بعدني بحيلي وتزمخين علي لو اطيحن شون
خوله : مو هستوج تكولين راح اموت
عمشه : چا كون بعدويني وبغنيه وبنياتها
خوله : يمه ابوس ايدج طيبي لان اذا تبقين هيج يمكن اني انجلط وانام بمكانج مثل الطفل بس تدلل ومعاجبج كلشي حرنا شسوينا ولازمتنا دك رزايل
عمشه : چا انه مسيجينه وتزمخين وتراددين
وملچ الموت يفتر فوكاي هسه اموتن وتضلين وحيدج
حطت الفوطه على وجهه ونعت
جينا ولكينا الدار خاوي
مدري على سفر ياحني داوي
ياملچ الموت گلي عليش ناوي
بعد المن اسامر وياهو اخاوي
ذكرى : هههههه عمه فدوة شصار مابيج شى والله ولج خوله جوزي منها معليج عمه اني ادللج احطج على راسي عناد بيها وضلي ادللي وعيطي واضربي واشوف منو يحجي وياج
عمشه : يايمه فدوة لهوجهه المدعبل تعلمي منها يملسودنه
گلكم مابيكم حظ ورجا
بديعه : ليش عمه واني
عمشه : ساعه هيچ وساعة ثور الله بأرض الله مامنچ نفع
ذكرى : هههههه حيل تستاهلن
عمشه : يمه ذني موخوش انه انطيج البيت الج
خوله : يابيت
عمشه : هذا البيت اسجله بأسمها عبنهه طيبه وعلمتني الصلاه ولا وحده منجن علمتني واطردكم كلاتكم بلشوارع عبن تحسون بنعمتي وتداروني زين
صالحه : يابيت عمه
عمشه : بسم الله نعله الله على ابليس
چا شنهي دكي الباب تنحنحي جنج بليس يتخشخش ومانحس بيه شنهي ماده راسج
صالحه : يابيت عمه
عمشه : وانتي ياهو وتحاسبيني
ذكرى : تشاقه عمتي شبيج صالحه
عمشه : ماتقشمر وانه صاجه بيتج لو بيتي
صالحه : بيت الكل عمه
خوله : يمعوده كعد تتشاقه روحي منا هي مريضة لا اداهريها
صالحه : اعرف هاي سوالف المسح يوميه والبخور والشغلات الي ترشيها الله اعلم شنو شربتيها وهيج كامت تحجي
ذكرى : اي والله شربتها هسه ورد ماوي فدوة لعينج ام مهند تره تعبانه ومالي حيل لا نقاش ولا عركه
صالحه : حطي بالج عمه اذا هذا البيت تسجل بأسم واحد والباقي انحرمو وداعت ولدي احركه عليكم
عمشه : ولي لا بارك الله بيج ولا بلبطن الجابتج هدني عليها اليوم ابيس بيها
خوله : عوفيها يوم وكملي البابونك مالتج
عمشه : ايييع ماطيب ولجن
ذكرى : اني اشرب وياج يله فدوة حتى اطيبين
بقيت ايام اداري عمتي انتكست حيل الفلاونزا حيل اذتها ومخليتها تكطع الصلاه جنت اخليها تصلي وهي كاعده وياها وياها وخليت بدعه ادير بالها على الجهاال
وخوله ويايه
لحد مارجعت عافيتها وكامت بلسلامه
هاي الفتره كلها وساهره وصالحه ساكتات بس اي شى اسوي بلبيت الكاهن فوك راسي ذني شبيهن حتى الجهال منعوهم مني مااقريهم بس مرات مرتضى يتعارك ويه امه ويجي اقري وترجع تضربه وتاخذه
ماسويت شى الهن بس هنه من وحدهن ابتعدن
دخلنا سنه ١٩٩٤ جان شعبان علمت عمتي على الصوم بغير وقت رمضان كامت تصوم ويايه الاثنين والخميس وتشجعت بدعه همين نصوم سوه ونفطر سوه بس خوله تشاركنا الاكل
جنت حيل فرحانه لان عمتي تغيرت اقلها تصلي وملتزمه صح لسانه بعده بس متعلمين كلنا عليه مترضى على اي احد
بيوم واكفه اسوي سحور باجر خميس كلت اكمل السحور واكعد بدعه وعمتي حطيت القوري على الجوله وحضرت الجبن وسلكت بيض وداغسل بالاستكاين سمعت طكطكه انداريت لكيت نجم
نجم : شو كاعده
ذكرى : اسوي سحور باجر صيام محتاج شى اسوي الك
نجم : لا مشكوره
ذكرى : براحتك درت وجهي عنه واكمل بشغلي جان يكول
نجم : البارحه جنت يم فوزي
ذكرى : وكع من ايدي الاستكان بيه شى اخويه
نجم : انجرحتي
ذكرى : عفيه بيه شى
نجم : لا بس كلت احجي وياه بلكت وره هاي السنين يحن عليج ويكسر حاجز الزعل
ذكرى : وين شفته
نجم : راجع من ديالى عنده كم شغله هنا وشفته وضلينه نسولف
ذكرى : عفيه شكال مشيت بأتجاه ودست على الكزاز جنت مثل الفاقده اريد بس يكول اخوج رضا عنج
نجم : رجلج وين وين
ذكرى : باوعت دايسه على الكزاز بس لابسه نعال عادي ماانجرح
نجم : ميخالف وخري لتنجرحين
ذكرى : ماكو اقوى من جرح گلبي ينجم احجي عفيه
نجم : حجيت كلشي اله حتى على شكوكنا بأن جنتي مو طبيعيه
ذكرى : وشگال
نجم : بلبدايه عيط ومقبل اكمل كلامي شكد عصبي اخوج يايابه بارود تالي حلفته وكوه كملنا الكلام اخر شى سكت وكال الله كريم افكر بحجيك
ذكرى : نزلت دمعتي معقوله يرضى عني
نجم : يرضى اخوج طيب بس عصبي ويحبج ومن محبته وخوفه عليج هيج سوه
ذكرى : مااعرف شون اشكرك
جنت حيل قريبه منه محاسه بروحي اريد بس اسمع ولو امل بسيط يحي بيه الحياه الماتت بداخلي واخويه هو حياتي
نجم : امسحي دموعج غاليات ذني ذكرى وربج يرجع وتبجين بحضنه هم
ذكرى : يوم عيد يانجم يوم عيد
جان اسمع صوت سهاد
سهاد : شعندك بليالي تتختل بلمطابخ انت ومرت اخوك
نجم : شنو هذا الحجي سهاد عيب عليج
سهاد : هو اني العيب لو انتم
نجم : غير مرت اخويه بحساب اختي
سهاد : لا عيني مو اختك هاي مرت اخوك وتحل عليك
ذكرى : صوتج عفيه اخاف يكعدون
سهاد : خلي يكعدون يشوفون ست ذكرى الفقيره المسكينه تتختل ويه حماها الفجريه
ذكرى : حرام عليج مو كدامج اسوي سحور لعمتي والي ولبدعه ونجم شافني واجه يكولي على اخويه ليش تضنين السوء
سهاد : ماضانه تره هواي شغلات حاسه بيها ومعبرتها بس زادت عن حدها
نجم : اذا ماسكتي هسه احركج بهذا الجااي امشي يله زودتيها هوايه
سهاد : ماامشي خلي يكعد رجلها ويحط حد لسوالفها
ذكرى : هسه اني شمسويه حرام عليج والله
اخويه نجم حاله حال حمويني واذا وكفت وياه قابل جرمت
سهاد : جرمتي يذكرى
بديعه : شكوو نزلت على السحور وسمعت صوتكم
نجم : امشي لج كدامي لزمها من جتفها حيل وسحلها
سهاد : تسكتني علمودها موو اني الكم
نجم : جان يضربها على راسها انعل ابوج لابو الساعه التزوجتج بيها ادخلي ودخلها للغرفه
بديعه : شصاير
ذكرى : هاي عبالها عندي شى ويه نجم والله جان يحجيلي عن اخويه
بديعه : خلي تولي تركع راسها بلحايط هسه يسكتها نجم واني جم مره كتلج لتنجمعون وحدكم سوه
ذكرى : والنبي صار شكد محاجيه ويااه
بديعه : لتخافين كمتي ترجفين صدك جذب طبها مرض وان حجت
ذكرى : هو اني بيه حيل مصايب حتى هاي تزيدها عليه
بديعه : خلي نتسحر ولتفكرين مبقى شى للاذان خلي نستعجل
امور تتراكم وتتعقد والكل فاهم غلط من حجايه بشقه ترتبت احقاد ومن موقف برئ تغلغل الحقد
وعدو البارحه اليوم صديقي
: يمعوده شكعد تسوون اني مالي دخل بيجن
_ : اذا مصرتي ويانه معناها علينا وقسماً بالله اذا حجيتي شى لااندمج على اليوم الي انولدتي بيه
_والله حرام عليكم هاي روح لهاي الدرجه الكتل حلال عدجن ومو بهاي الطريقة البشعه
_احجي انتي الثانيه شو ساكته
_شحجي اني وياج شسوين اسوي المهم نخلص من ذيج لعبت روحي منها حتى رجولتنا تحبها تكول بس هي الطيبه احنه الموخوش اوادم تكول عبالك بس هي جنة هذا البيت واحنا مزهريات مالنا داعي
_والله انتن شياطين مالي دخل
_تنجبين وتسكتين لتخليني احطج براسي واخليج تلحكيها وتونسيها بكبرها
_اسكت والله بس لتأذوني
_سدي الباب واكعدي نتفاهم اليوم ننهي حياتها
