رواية أرض الخناجر الفصل التاسع عشر بقلم ايلول
بعدك
ما بنيت لغيرك احلام
ولا لعيونهم مشّيت الايام
وگف ميلي بـرحيلك صارله اعوام
ويلوموني ...
و انه بيا حال وانلام .
══━━━━✥◈✥━━━━══
وهـــب :: بس وصلت رسالة للكل واحد عاين لوجهه الثاني مستغربين وكلمن كض تليفونه جريت تليفوني فتحت الرسالة ولان النت بعيد الصورة طولت ما فتحت شلت راسي اعاين وي سلطان هستوها الصورة فتحت تدنيت عليه اركز وهو طب على الصورة والمحها جثة ممدده لا مبين منها وجهه ولا شي بس الدم يمها طفر سلطان يركض والولد واحد يصيح على الثاني شنهاي شنهاي
وبنفس اللحظة وصلت رسالة ثانية النه واحد وره الثاني مكتوب بيها
"أليسوه والمايسوه اليوم اخليه يلعب بعرضكم.
شلت راسي لصيهد مصدوم وهوه فتح عينه بصدمه همس
-رغد.
كل الصار بثواني بس جنهن عمر وركضنه مثل المسودنين اركض ودرت عيني لسيارة سلطان وشخطتها طلع گبلنه كلنه، ومــيثم وهوه يركض لسلاحه صاح
مــيثم :: سلطااان بلا سلاح.
مــاسه :: كاعدين بغرفة ندى انه والبنات نسولف وهيه كاضه الصايه والحجاب مال رغد راحت بيهن للصالون بيوم العرس، رشتلهن عطر وخلتهم بعلاگه گالت
ندى:: عادي وهـــب يقبل يوديهن الها؟
هستوني احاجيها وفزينه على صياح الولد وركضتهم صرخت هيه فازه من وهـــب دفع الباب وركض صعد على الميز وجر السلاح من فوك الكنتور مافاهمين شي امي تصرخ متسودنه وصوت صــيهد يصيح بحرگة گلب
- والله احرررررررك سلفهم.
طلعنه نركض اعمامي وجدي يتصايحون وامي وجده يصرخن وطب صــيهد الغرفة امي متسودن وامي مجلبه بيده تحاجيه وهوه يرجف بحرگه شمر الفراشات من النضيده وجر التفك وامي تسودنت ضلت تلطم، وصوت طــروادة يصيح عليهم من بره الحوش جدي يغلط عليهم يريدهم يكلوله عليمن هادين،
وهمه يتراكضون طلعوا من البيت وامي تركض وراهم نريد نكضها ماكو وجدي وابوي يخابرون ركضت وره امي من طلعت بره الحوش طاحت بالگاع وتبجي تصرخ
-يمه وووين رايحين ووولك يمه.
كعدت يمها ارجف اريد اهديها صعدوا بالسيارات كلهم من چبيرهم لصغيرهم سجاد وعبود طلعوا من بيت عمي شاكر كلشي مافاهمين حالهم حالنه وصعدوا وياهم شخطوا السيارات وطاروا نشوف وراهم بس الترابه والسلاح طالع من الجامات.
وهـــب :: احس حيلي نهد والمسافة البينا وبينها مو ربع ساعة حسيتها سنين مايكضن، سيارة سلطان كدامنه اشوفها طايره، ووراه صــيهد وطرواده، وانه وسليم وبريا بسياره وميثم وسجاد وعبود ورانه.
ونعاين كدامنه سيارة سلطان طفرت من الشارع للترابي نگلبت صيحنه كلنه بخوف
-الله الله.
صــيهد وصله وماوكف، وكبل ما نوصل سيارة سلطان شفناه طلع من السياره يرول سند اديه على اركبه، وسليم يمي انتهى عباله صار بيه شي ، من وصلناه وكفت بس نزلت سليم عليهم ومشيت، اعاينلهم بالمرايه مــيثم وكف عليهم، وبريا خابرهم
بريا::سلطان مابيه شي؟
ســليم :: وراكم احنا مابيه شي سهلااات.
وهـــب ::وصلناهم نرمي ونزلنه نتراكض بسلاحنه بس نسوان تتصارخ وفروخ تبجي اركض وره صــيهد هوه وطرواده وهمه يدفرون بالبيبان من غرفة الغرفة، ولا وحده البيهن كالت هاي غرفة اختكم، ركضت الصيهد اتعثر دك باب الغرفة ودفره واشوفن رغد مدمايه بالگاع جثة لا تحرك ايد ولا رجل.
من صدمتي بمنظر اختي ماتن رجليَّه وصيهد ركضلها حطها بحضنه متسودن يمسح الدم من وجها ويطك على خدها يحاجيها بصوت يرجف
صــيهد :: خوويه رغد ررغد.
اندفعت من الباب وطب سلطان دمه بطوله ومترب جراها من ايد صــيهد يصيح متسودن
سلطان:: رغددددد رغددد.
رغد :: اريد افتح عيني ما أكدر، صوت براسي مثل الصدى جفنيّ ثگيل ومستسلمه للموت، هاي اخر محطات الصبر، والموت ارحم الي من الاعيشه.
اخذني الظلام وردني صوت صــيهد اريد اكد افتح عيني واحرك شي من جسمي اريد اكله خويه تأخرت عليَّ اريد أكدر انطق واحجيله وياخذ حگي من الكل اولهم أبوي وجدي.
بس كلشي خارج عن سيطرتي احس جسمي مات وروحي مچلبه بالحياة استسلم واحس شي بيه يفز ما يريد يروح، اقاتل وبس أريد ارفع جفني وأفتح عيني، وسمعت صوت فزز وجع بگلبي يعادل وجع جسمي الف مره.
وچن شايله جبل على عيوني احس كل حيلي راح يله گدرت ارفع جفني وألمح وجهه المدمه، بالالف يا علي يله كدرت احرك بؤبؤ عيني الصيهد اللي حاير يلف بيه بعبايه يرجف وشالني على گلبه، عيني كوه فاتحتها.
غمضت ورجعت فتحت خايفه على اخواني وولد عمي خايفه على سلطان، من سمعت صوت زلم السلف تتصايح وياهم، تارسين الساحة، والولد يمشون كدامنه شايلين تفكهم على جتافهم وصيهد شايلني ويمشي وراهم، رديت غمضت وفتحت من حسيت روحـــي بحضن وهـــب همست صوتي رايح وخايفه
-صــيهد.
واسمع صوته يصيح والولد يأيدونه، صاح بحرگه
صــيهد:: لا يضل واحد ببيته سلفكم الليله احركه يشهد الحسين.
وهـــب :: طاحت ايدها الجانت كاضه بأيدي وطاحت وياها روحـــي صيحت على صــيهد
-صــيهد تعااال صــيهد.
صاح على صــيهد واحد من اعمامهم
-عمي شني ما صايره زلمه يطك مرته؟
صــيهد:: ضلوا ببيوتكم والكفل اخته احركها هيه والبيها.
صعدوا الولد وطلعنه ، ذبينه الاسلحة بسيارة مــيثم ردوها ســليم وعبود للقريه واحنا رحنه للمستشفى، اخذها صــيهد من ايدي طب للمستشفى يركض واحنه وراه اطاها الهم، وسلطان بباب المستشفى طاح
شگ براسه چبير واصابعه ثنين مكسرات.
"""""
مــاسه :: ليلنه نگلب خوف وصياح وعرك واحنا يكون فاهمين الولد عليمن هدوا وليش، ومن ثارن الطلقات وسمعناهن تسودنه مو كلش بعيدات علينه من حوشنه وسمعناهن، الوادم ضلت تخابر على جدي گالوله عقيل رجل رغد كاتلها.
واحنا تسودنه امي شكت دشداشتها تلطم واحنا نصرخ ونبجي كل ظنه رغد ماتت لمن ابوي صاح
- بالمستشفى اسكتن اسكتن.
بس شيسكتنه، جدي عباله سالفة كتله وبس حتى يستهان بيها، مسحت وجهي وكمت للهول فاتح السماعه مال التلفون ويحجون وي صــيهد هوه وابوي گاله
شعلان:: شني ولك محد طاك مرته وهاد على الوادم؟
واسمع صــيهد يصيح بحرگه
صــيهد:: هاد عليهم؟ شتحجي انتَ عمي وحگ الحسين الليله اخليهم ليلهم احمر الليله بيوتهم من النار ما تطفى.
وليد :: صــيهد حاجيني بويه الوادم تخابر علينه واحنه ما فاهمين شي ما نعارف وين الحگ ونحجي ونردهم ، مخلينه على عمه عيوووونه انتم.
صــيهد:: ودالنه صورتها مدمايه وكتبلنه اليسوه والما يسوه اخليه يلعب بعرضكم، وصلت اختييييي جثة غرگانه بدمهاا يا حگ التحجي بيه انتَ، اريد قندره من شيوخكم يگول الحك الهم الا اكتله وياهم.
ماسه :: حجاها وسد التلفون، ابوي وجدي وعمي شاكر تسودنوا كلمن يخابر بصفحة وكل ساعة واحد مصيح علينه لان نبجي، لمن اجوا سجاد وعبود ووراهم سيارة تجر بسيارة سلطان، طلعن ريمه وميلاد والاء متسودنات ويتصارخن وسجاد يصيح
-مابيه شي والله مابيه شي
لمن جدي صيح عليهن يله سكتن وهوه كض الولد يحجي وياهم ويسأل عبود گاله
عبود:: من وصلنه مالكينه لا رجلها ولا زلمه من بيتهم لا اخوته لا ابوه، بس من اعمامهم وكنالهم الكم مهله ساعتين احنا وياكم گوم، هسه بس يردون الولد من المستشفى، ندكهم ونحرك سلفهم.
شعلان:: شلون ما كتلتوووه بساعتها انتم خنااااث مابيكم خيررر.
سجاد:: مالكينااااه مالكيناه شنكتل؟
تعارك وياهم جدي طلعوا من الحوش طلعنه انه وجويريه شفناهم كاعدين بره الحوش بصف السياج يمهم صناديگ طلق ياخذون ويعبون بالمخازن مشينه من يم مشتمل صيهد نعاين للشارع هلبت يردون، ساعة مرت واشوفن السيارات نزلت على شارعنه طايرات، ركضنه للبيت
-بويه اجوا الولد.
كامولهم وامي ترجف كلها ركضت وياهم، طبوا وهـــب وصيهد للبيت مستعجلين ويتراكضون وصياحهم بحرگه صاح صــيهد على امي
- بساااع بدلي هسّه ياخذج سجاد للمستشفى.
- ووولك يمه ميته لو عدله اختك حاجيني لوعتوا گـــلبي.
وهوه ملتهي لف الچفيه على راسه وتلثم بيها ويشد بمشلح السلاح على صدره، ذولاك خابروا شيوخ والشيوخ خابروا جدّي گالوله
-كض ولدك ذولاك متانينهم يم النهر وره الساتر راح يتكاتلون.
وابوي من يمه صاح
وليد :: اذا ردوا ولدي وما حاركين سلفهم انا الاحطهم على النهر واكتلهم.
وذاك الزلمه يصيح بالتليفون
-عقيل جان سكران ومايدري بروحه، تحاسبون زلمه سكران؟ اطوا مجال يجون يحولون عدكم وتنحل.
وصيهد راح على جدي متسودن جر التلفون من ايده وسد الخط
كاله
- حگ اختي الليله اخذه، لا يحولون عدنه ولا يدورون حل.
جدي صفكلهم يله ما يله، وزلم عشيرتنه مدري ليمت وصلهم الخبر بربع ساعة كلمن جاب سلاحه وسيارته واجه، ترسوا الساحة،
طلع وهـــب من غرفته وهم مشلح الطلق على صدره وندى وراه تبجي خايفه مجلبه بأيد جــويريه
وامي طلعت ترجف سجاد متانيها بالباب اخذها وراح ابوي وعمي شاكر تحزموا وي الولد
وجدي صاح على جده
شعلان::امشي جيبي عيال شامل وعيال شاكر هناه.
وهيه بساع حطت العبايه على راسها وطلعت.
ركضت للمطبخ اعاين من الشباج وكفوا بحوشنه گـــلبي يدك بخوف امسح دموعي ويردن ينزلن، كلهم ملثمين والمشالح وجعبة المخازن تارسه صدورهم، طبت رنـــه واخوانها من باب المطبخ خايفه كلشي ماتدري
رنـــه :: وين راح يرحون؟
درت عليها مختنگه گوه احجي جرتها جــويريه تمسح بدموعها
- لا تخافين.
وهيه تعاين ميته من الخوف هستوهم الولد يردون يطلعون وهيه جرت روحها من ايد جوري وطلعت تركض وترجف صاحت بخوف دموعها خانگتها
رنـــه::طــروادة.
داروا عليها الولد كلهم، ومن بينهم اجوها يركضون عبود وطرواده چلبت بأديهم تبجي وصوتها يرجف
رنـــه :: خاف تمووتون؟ اموتن انه بدونكم والحسين اموتن.
طــروادة خله ايده على راسها وعبود يمسح بعيونها
طــروادة:: افاا رنـــه بت شامل تخاف؟ لا تخافين رادين بحيل الله، انتِ طبي جوه ولا تردين للبيت لمن اجيج خوش؟
بعدهم يحجون وياها وطبوا عيال بيت عمي شاكر ميلاد چلبت بسلطان اصابعه وراسه ملفوفات، تكله لا تروح وهوه ولا دايراها بال طلع من الحوش، وهنه طبن للبيت، والولد عافوا رنـــه وراحوا يركضون ورهم.
بساع طلعت اركض من المطبخ للحوش من يم المشتمل اعاينلهم، السيارات وحده وره الثانيه والسلاح اشوفنه طالع من الجامات، الطامه الاكبر رجل رغد وهوه سكران داز الصورة الغير ولدنه وكاتبلهم نفس الحجي وهمه متسودنين.
رديت طبيت للمطبخ جــويريه حايره بين ندى وبين رنـــه، ندى اول مره تعيش هيج موقف عكسنه احنه متعودين، ورنه مره طــروادة هم هيج عركه وردلها مصوب، هل ميته من الخوف
كومتها ريـــمه غسلت وجها تسأل
ريـــمه :: شصار؟كلشي ما ندري احنه بس گالوا عركه وسلطان مگلوبه بيه السياره.
مــاسه :: عقيل الحقير طلع يسكر وهوه سكران كاتل رغد ومودي صورها للولد كلهم كاتبلهم اليسوه والمايسوه اخليه يلعب بعضركم، والنوب مو بس الولدنه مودّي آلصور حتى الوادم من السلف وكاتب نفس الحجي مايدري بروحه جعل طلعت روحه.
احجي وهيه حاطه ايدها على گلبها بصدمه ومن نظرتها حسيت بيها تدري بسالفة سلطان ورغد درت عيني ساكته اجت جده تغلط على ندى شلون خايفه على وهـــب، وراحت للهول كعدت يم ميلاد ونسوان ولدها فرح والاء.
شويه ودك هورن سيارة طلع جدي واحنه بباب المطبخ نعاين ركضت رنـــه من لمحتها عفراء وجها اصفر وخايفه كلنه نحجيلها
مشينه وراها من طبت للهول سلمت وجده كالتلها
-ياهو الجابج رجلج؟
عــفراء:: لا جده حماي جابني جا منذر وي الولد وما رضى يكلي شني السالفة، هل اجيت.
كلنه صحنه
-دخيلك يا علي
من سمعنه صوت الطلق وبعد ما سكت، كعدت عــفراء يم جده ايدها على بطنها ووجها اصفر حسين وزهره كاعدين يمها وندى بصفها، الاء تعاينلها بطرف عينها، شلت راسي اشرت الريمه وجويريه ورنه وبدور.
اجن وراي وهاجر وي ريمه يمشن على كيف صعدنا للطابق الثاني
-نصعد للسطح؟
رنـــه :: نشوفهم؟
بــدور:: لا بس الطلق مبين ينشاف.
هزن راسهن اي فتحت باب السطح على كيّف خايفه وطلعنه وحده وره الثانيه وكفنه نعاين الرمي مگابل وتارس السما شلون الجمر احمر وينزل عليهم
ريـــمه :: يارب يردون سالمين يا علي.
مــاسه:: كاضين گلوبنه ونراقب، كل طلقة تطلع تضوي للحظة وتنطفي عايفه وراها شريط احمر ملون الليل، سواها صــيهد وخله سماهم حمره من الطلق.
كل شويه ننزل جوه ونرد نصعد ساعة وساعتين مرن وهمه الطلق ما واكف صارت ب٢:٣٠ الصبح كعدنه على حيلنه بالسطح نعاين، احس گـــلبي ارتاح من كمت اشوفن الرمي بس من صفحتنا، وصوت السلااح بده يقل والطلق الاحمر اللي ملون السما هم قل الحد ما بقى بس صوت بيكيسي.
درت الهاجر اللي سانده راسها على جتف ريـــمه تأشر ومافهمتها
رنـــه ::ريـــمه ظلمه مانشوف هاجر شنو جاي تكول.
ريـــمه :: تكول هذا صوت البيكيسي مال سلطان.
جــويريه::وين تعرف بالسلاح؟
ريـــمه :: اول ما اشتراها سلطان وراد يجربها راح للمرعى واخذ هاجر وياه تحب السلاح وتعرفه بانواعه وانه اذا يگلولي جيبي المخازن اخذلهم الطلق عود هسه بديت اتعلم.
مــاسه ::نعاين الهاجر مبتسمين وهيه تمسح على گلبها وتأشر گالت ريـــمه
-تگول لا تخافين يردون سالمين، لو صاير عليهم شي الطلق ما يسكت للصبح.
رنـــه :: احسن منجن تفتهم صح صح هجوره طمنتيني والله.
"""""""
وهـــب :: ما ندري ياهو التصوب وما ندري ياهو النكتل همه شردوا لحكوهم سليم وبريا وخمسه من ولد السلف، وكفنه من الرمي الا سلطان البيكيسي بأيده، وصيهد ركض للسيارة جر القاذفة "RBG7"
كعد ركبه ونص وفجر بيوتهم، عيوني تفتر عليهم واكف وره سلطان اجاه طــروادة يريد يجر السلاح منه وهوه ما يهده، اريد اروحن احاجيه يعوف سلاحه هوه اصابعه مكسره ووضعه مو زين بس ما رضى يضل بالمستشفى وحتى اصابعه ماجبروهن بس لفوهن اله، هستوني اوصلهم ووكفت ما مستوعب كلامه من يگله
طــروادة :: الخاطر رغد، كوم يله حتى نروح للمستشفى، تشوفها راح تموت ولك.
مايدرون بيه وراهم وكفوا اثنينهم ونصدموا من شافوني، شال ايده طــروادة يسكتني گبل ما احجي
-حلكك ما تفكه مو وكتها.
واخذ سلطان مشوا من كدامي
""""
ماسه :: ندعي تكضي على خير وردينه خفنه من صار صوت قوي شلون الانفجار، وراها نعاين وگبت نار عاليه
بــدور::حركوا بيوتهم صيهد حلف يحركهن واخوي گد حلفانه.
جــويريه:: يمه جا والناس ،النسوان الاطفال شنو ذنبهم؟
مــاسه :: لا جوري طلعوا من بيوتهم، الوادم من تصير عليهم دكة عشاير وهمه الغلطانين يطلعون من البيوت ما يضلون تلكينهم من زمان شاردين.
سكتت جــويريه ما مقتنعه، صاحت علينه جده نزلنه جوه جهال مرتضى نايمين يم أمهم بغرفة جده وميلاد تتلوك الجدي تعصر برجليه وتسويله عصير ليمون وكل شويه كالت
ميلاد:: يمه عمي راح يموت صخام دهر الدهر النسوان الزلمه راح يموت.
وتعصر برجليه وتنگل ساعة ماي ساعه عصير ساعة حباية ضغط لمن مل منها طكاها بالسبحه ينتر
شعلان:: ما تولين عني كل ساع وبغگتي راح يموت وراح يموت موت الليلفج امشيي.
راحت ريـــمه جرت امها من يم جدي ما راضيه وامها تدفع بيها وتخزرها، سكتنه ومر الوكت كاعدين بالمطبخ يم ندى وعفراء، صار الفجر وهمه ماكو وي أذان الفجر يله شفنه السيارات نزلت على شارعنه ونسمع بسّ صياحهم وكلنه كاضين الشياج كل وحده بينا تريد تشوف اخوانها سالمين، لمن الهوه يحرك باب الحوش يله نلمحهم
رنـــه :: طــروادة هذاااك طــروادة، بعد عبود عبووود وينه.
اعاينلها تلوب مثل المحتركه، وعفراء ركضت كعدت حسين من النوم كالتله
عــفراء:: اركض شوف اخوانك وولد عمك كلهم موجودين؟
وحسين النوم بعيونه يفرك بيهن هز راسه اي وصل للباب صاحت عليه بخوف
عــفراء:: حسين ومنذر هم شوفه.
حجتها ودارت علينه تعصر باصابعها صاحت رنـــه
رنـــه :: ذاك بريا وسليم ووهب، عبود وينه؟
بــدور :: وينهم شلون شفتيهم؟
ومدت راسها وي رنـــه تعاين، اجت الاء للمطبخ ايدها على بطنها
الاء:: هاه ردوا، شني شصار؟
محد من عدنه حاجتها صاحت
الاء:: گبور تلفجن بحلكجن عظم ما تحجن.
دارت عليها رنـــه تصيح بعصبيه ماده ايدها وخازرتها
رنـــه :: ههييييي لج سدي حلكج لا اترسه تبن.
وعفراء تسكت برنه وهذيج مدت السانها شبر اجت ميلاد صاحت على الاء طلعت من المطبخ، حسين مارد خلانه ننطحن.
رنـــه :: عبايه معلگه بالمطبخ جريتها لبستها انه لو بييتنا هسه سامعه السالفه كلها وشايفه الوادم كلها اهنا احس روحـــي بسجن صاحت عفراء ما راضيه
- وين رنـــه؟ اكعدي لا تسويلنه مصيبه.
-اعاين من السياج واجي محد يشوفني والله.
هستوها تريد تكضني فلتت من ايدها وطلعت اركض ضلت تلطم مشيت بخوف وكفت يم باب الحوش كاضته بايدي وماده بس عيني، وگلبي يدك حيل صياحهم عبالك جاي يتعاركون كلها ملثمه شلون الكاهم، شفت منذر يدخن على صفحة وياه زلم ما اعارفهم
درت عيوني بعد اعاين شفت عبود واكف يم سجاد خليت ايدي على گـــلبي براحه.
سلطان كاعد على بلوكه مدنك وايده فوك راسه اخوه مرتضى واكف يمه وولد اثنين ما اعارفهم، درت عيني صــيهد وطرواده واعمامي واكفين سوه ووياهم زلم معگله اكثر شي صوتهم عالي همه،
درت عيني للبنات أأشرلهم كلهم موجودين تطمنن، أشرتلي عــفراء "يله تعاي" خازرتني، ما اطاني گـــلبي ارجع اريد اشوفن شصار، لافه راسي بالعبايه ومطلعه بس عيني وفتحة الباب صغيره ماده عيني منها.
اعاين بس الطرواده يدخن ويرد ليوره كل شويه يصيح محترك گلبه وانه مركزه وياهم شهكت ودرت عليهن أشرح
"حمزه ابن علي ال غانم" مصوب وصوابه خطر، غانم يصير ابن عم جدي شعلان، ورجعت عاينت الهم اكو بعد واحد مصوب وصوابه مو خطر من عشيرتنه، هم درت عليهن اشرح واحجي بصوت ناصي وهنه كل شويه ووحده كالت
"هاه" شني" ما نسمعج" اعوفنهن وارد اعاين من الباب.
شويه كبرت فتحت الباب لان طــروادة غير مچانه، خليت عيني وجف شكده شكبره طك الباب حييل نردم راسي حيل رجعت ليوره كاضه راسي دفع الباب ماد بس راسه وانه كضيت الباب ادفعه اريد اسده بوجهه نتر خازرني
بريا:: طبي جوووه.
خزرته احجي بنتر
-شلون تطكني؟ كبر الگبرك.
فتح عينه خازرني سلاحه بأيده يحجي من بين اسنانه
بريا:: ولي مناااه لا افرغلي مخزن براسج.
-رجفتني ، وحكّ الحسين اگل الطرواده عليك اخليه يجرك من شواربك حتى تعتذر مني.
دفع الباب يريد يطب وانه مجلبه بالعبايه وادفع بيه حيل اريد اسده واسمع صوت وهـــب وراه يحاجيه شلت راسي لكيت عيون طــروادة مفتوحه على وسعهن خازراتني هديت الباب وركضت للبيت طبوا وهـــب وبريا للبيت وكف وهـــب بباب المطبخ اعصاب شال ايده يهدد
وهـــب :: بالحسين التوصل الحوش اربطهاااا بيه زلم تارسه الثنيه لحد تطلع.
ندى:: وهـــب.
سكت ودار عينه الها تقدمت خطوتين كدام باب المطبخ، بريا دار وجهه گالتله
ندى:: شلونها رغد؟
زفر نفس متحسر
وهـــب:: زينه، گبل شويه خابرت امي ساعتين ثلاثة ونروح نجيبها.
سكتنا وهمه طلعوا عفراء هزت راسها متحلفه بيه.
""""""
رغد :: بجي امي ونحيبها بس على وجع جسمي، اذا درت بوجع گـــلبي تشگ زيجها وتلطم.
ونيت وهيه دموعها تصب كدامي احس بايدي ووجهي مورمات احس رجليَّه اذا حركتهن مثل السجاجين تكصص بيهن، لمن شوي ارتاحيت كابلتني امي تلومني
-ولج يمه اذا رجلج يشرب ليش ما تكولين، رغيده يمه.
سكتت بس دموعي تنزل بلا صوت شكلج يمه انتِ ما عايزه ضيم واجي ازيد همج، شلت قهري وحدي ما شكيت الاحد كلشي نام بگلبي.
جان عمــري 14 سنه محرومه من كلشي واخاف جان تهديد بالذبح من جدي كفيل يخليني ارجف انام وأحلم بموتي، راشدي من ايد ابوي يخليني اتخلى عن اكبر احلامي،ما وكفت بوجهه احد ما جنت قويه.
الحد ما بدأ سلطان وين ما التفت الكاه، يبتسملي مره يصفن بعيوني مره، وكل هذا بدون ما واحد من أهلنه يشوفه، عودني على نظراته صرت افتقده اذا طول وما اجه يم اخواني، جانوا همه بيت عمي شاكر عايشين وي بيت جدي، واحنا البيتنا وحد،
الحد ما يوم من الايام ودالي رساله بأيد هاجر جانت تحجي ولبقه بكلامها من وهيه طفله گالت
" سلطان يگول ضميها بالليل اقريها وحدج"
اخذتها منها ومتانيه الليل على احر من الجمر، واجه الليل وقريتها وكد ما عدتها حفظت حتى ميلان خطه حفظت مچان كل كلمة وكل حرف شلون راسمه اول كلمة مكتوبه
"نمرشه"
نمرشتي البيضاء
أكتب اليك وكلي تردد، أخشى أن تجرحك كلماتي، فأنتِ انعم من أنّ يُلامسك الألم، انتِ النقاء الذي أخاف أن ألوثه بحرف منّ حروفي.
ولكنّ قلبي لا يحتمل اكثر، يا صغيرتي أنا عاشقاً
هائماً لا يريد سواك، اعلم بأنك صغيرة على هذا ولكن خوفي من ان يلامس قلبك عشق غيريّ اجبرني على اخبارك بما في قلبي.
حبيبتي، لا اريد إجبارك انتِ حرة في قرارك ان كنتِ لا تودينني لن اقف عائقاً في طريقك، سأخذ عشقي معي وامضي، وان كنتِ تكنين لي حباً ولو قليلاً قفي بجاني
ولا تتركيني.
انتظرك اليوم بعد منتصف الليل الساعة 12:00 بقرب شجرتَي التين والزيتون الكبيرتين، لا تخافي فقط أريد جواباً.
"سلطان"
بوقتها حسيت دكات گـــلبي كل اللي بالقريه سمعوها افتر بالغرفه مثل المخبله وابوس بحروفه وأشم بالورقه، ترددت الف مره گبل ما اروحله، طلعتله ارجف ولگيته على الساگيه يم الشجرات متانيني، وبس لمح ابتسامتي ضحك بفرح وعرف جوابي.
الهسه اتذكر شعوري بهذاك اليوم الهسه احس بدكات گـــلبي وخوفي ومجازفتي، لا هوه حجه ولا انه بس واحد يعاين بوجهه الثاني ساكتين
وره يومين عدنه اللقاء بنفس المشاعر بس هالمره حجه وعبر، صوته اليرجف وتردده متوتر گدي واكثر،سنة كامله احنا كل يومين نلتقي يم الساگيه سنة سلطان ايدي ما كاضها، حچايه مو زينه ما مسمعني.
صار عمــري ١٥ وانه لو مو انضرب باليوم الاشوفه بيه ما اهتم أنسى كلشي وانتظر الساعة ١٢ مثّل الهلال، يعاين الايدي ويتحسر يهمس
-نمرشه ايدي خشنه على أيدج الترفه.
وادنك ساكته اعصر باصابعي تارسني الخجل ألحد اليوم اللي گالي بيه
-اعترفتلج شكد انا عاشگج، بس انت ولا سمعت منج حچايه.
عاينتله بخوف وحيره هزيت راسي لا وهوه عيونه ما تنشال من عيني يتحسر ويهمس
-تكرهيني.
-لا.
-جا ليش ما تحجين.
-شحجي ما عارف
-ادري ادري هوه هذا الاريده أنا اعلمج حچايه حچايه.
وكل جمله منه جانت تعيشني بمشاعر عجيبه شعور يترس گـــلبي وحتى الخوف الاعيشه ويآه حلو خجلي وهوه يجبرني احجي واعترفله من يگلي
-يله احجي،
-مو تعرف ليش احجي
-انا احبن اسمع بصوتج.
-شگولن؟
-گولي اعشگنك
وادنك بحيره ارجف شلون احجيها وكلبي من گد ما يدك احسه رأح ينفجر وهوه يعاينلي چن لوحة مرسومه گدامه يتمعن بيها
-احجي رغدي، تعبـــت.
-ما اعارف اكتبلك باجر برساله؟
-لا اريدن اسمع صوتج انا، غمضي عينج وگوليها، گولي اعشگنك.
ويدير وجهه بزعل يخليني آكل بروحي يگوم يم التين يحوش منه ويرد يمي يغسله بالساگيه ويطيني بلا ما يحاجيني، وينطحن گـــلبي لو زعل واضلن بحيره شلون انطق شلون أكله اهمس بصوت يرجف
-سلطاني.
ويعاينلي بضياع عينه بعيني، دكات گـــلبي احسهن يدكن بكلّ جسمي صوتي مخنوك يرجف اعصر باصابعي ودنكت عيني اهمس
-اعشگنك.
جانت حجايه وحده بس ضحكت سلطان ضلت ايام كل ما نلتقي وجهه متروس ضحك ويگلي بعده صوتج احسه يرن بأذني ويرجع يعلمني شني اكله يا حچايه اليحبها من الاگيه وآكله سلطان يگلي
-گليلي يا عشگي، أسمي خيولي، ما احبنه بعد.
-بس انه احبنه.
-جا هنيالي رغدي النمرشه تحب اسمي شني الاريدنه بعد؟
ومرت سنة ثالثة لكفنه بيها طــروادة وبعد اعتراضات وعركه وي سلطان تقبل وسكت، ثلث اسنين عدل مرن علينه ما كاض ايدي الحد ما تمرضت بفقر الدم وحطوا بأيدي كانونه، جانت اول مره ايده توصل ايدي اول مره حرورة اصابعه توصل مسام ايدي يمسح حواف الكانونه ويحجي بقهر
- اخافن على ايدج من ايدي والله اخافن خشونه اصابعي تزلغ ايدج الترفه اخافن اخرب بياضها وتنخدش.
ما نسيت ولا حچايه من حچاياته وشهدن على كل لقاءاتنا شجرة التين والزيتون، شجرة الزيتون اللي كتبنه بيها حروفنه ودمجناهن حرف فوگ حرف حتى محد يشوفه ويشك بينه، جنه نشوف القرية عش محتوينا ومحتوي حبنا، ووكت صار عمــري ١٨ انگلبت سجن وآهلنا الجلاد وكت سلطان حاجه ابوه انگلب كلشي ضدنه وبيوم وليله ودوه للمعامل وجابولي واحد بعمري ما عرفته عقدولي عليه ودفنوا عشگي الجان تارس روحـــي، بگلبي
ابوي ما وكف وياي ابوي كل يوم چان يطكني من دره بيه رايده سلطان، جدي هددني بالذبح وغسل العار وابوي يصيح اكتلنج واكتل اخوتج فوگج.
زوجوني الانسان الحيوان ارحم منه ومن اول شهر دره بيه عاشگه وعرفه سلطان من يوم التمرضت وحجيت بيه بدون ما ادري بروحي ، وضل بالطالعه والنازله يصيح اكتله لو فكيتي حلكج انا صاحب الحك ابن عم مرتي عاشگها، وخلص عمره مطلوب ثار وشارد يوميه متعاركله وي سلف، كتل وشرب ونسوان كل يوم لمدة سنة ونص تحملت كلشي وسكتت تحملت خسارة ابني اللي ولدته بشهر السابع وما ضل عدي غير اسبوع ومات، تحملت ذلة اهله وغلطهم على اهلي، تحملت اهاناته الما تكضي، جان المفروض من البداية استسلم لان الاعوج ماينعدل.
واخر عركه جان شارب واجاني تعاي سولفيلي هم شفتي ابن عمج سلطان شگالج شحجيتوا
عفته وكمت شال ايده يطكني يصيح
-شصار بگلبج ضجتي لو لا احجي سولفيلي،
دفعته اصيح
-ماشفته ما شفته.
رجع علي يطكني بحقد يصيح،
-ليش ما شفتيه ليش ما احتررك كلبج انا اخليج ترحين بس حتى تشوفينه وتنقهرين.
-لانك مو زززلمه ومابيك خير.
وهوه مسطور من الشرب حار بيش يطكني وجسمي متعود احس كمت ما انوجع الحد ما يغمى عليّ.
مدت أيدها امي تمسح دموعي دارت وجها على صوت طــروادة بره الردهه گالها
-عمه تعاي شويه.
صاحت عليه امي
-تعال يمه كهلان.
وهوه يگلها
-اريدنج بسالفة بس تعاي.
كامت امي طلعتله حركت راسي بوجع وفتحت عيني گـــلبي دك بخوفز من طب سلطان يتلفتت، اجه يم السديه يعاينلي، فوك حاجبه مورم ورأسه ملفوف عاينت لعيونه ساكته اشكيله وعيونه تسأل عن حالي نزلن دموعنه سوه حرف ما نطقنه، مثل اول لقاء النه أثنينا ساكتين.
شال ايده يمسح عيونه اصابعه ملفوفات بلفاف ابيض ومتوصخ اطرافهن صايرات زرك همست صوتي مخنوك
-شبيهن اصابعك؟
عاينلهن وهز راسه مابيهن شي، دنك ساكت ايده الثانيه كاض بيها تجوة السديه بقوة دنكت عيني ساكته همس بصوت مخنوگ
-نمرشه.
رفعت راسي آله شفايفي ترجف انشالت البرده التفت بساع صوت طــروادة گاله
-اطلع بساع.
هز راسه سلطان لا وطرواده مد ايده جراه طلعه ، غمضت عيني بخوف من سمعت صوت صــيهد گـــلبي يدك بقوه طبوا يمي وانه مغمضه صوت ابوي وصوت وهـــب احس ايد مسحت على ايدي وصوته مخنوگ يهمس
صــيهد:: رغد خويه، رغده.
فتحت عيني بعينه طبت امي بأيدها علاكه حلويات وصيهد ماشال عينه من عيني يلومني مدري يلوم روحه تدنه يمي اكثر مد ايده الحجابي يضم شعري جواه زين وحجه همس يم اذني
صــيهد :: هججتهم وحركت بيوتهم وشيلت سلفهم وعقيل وراه وراه لمن اكتله، بس...
قرب روحه اكثر اعاين الركبته يحجي بغصه كوه على روحه شاورني
- محد واصل طرف ثوبج؟ رغده احجيلي وبوفاضل اگطع نسلهم.
ابتعد يعاين بعيوني ودموعي التنزل مد أديه اثنينهم يمسحهن مختنك اكثر مني
-احجي رغده راح انجلط وعلي راح انجلط.
هزيت راسي دموعي تارسه عيوني.
-اموتن وما اخلي واحد يدنسني.
زفر نفس براحة ودنك باس كصتي وخر وكاض بأيدي وهـــب يبوس ايدي احس عيونه متروسه دموع امي سلمت عليه وغمضت عيني من كالتله
-هناه رحت حاجيت طــروادة خطيه مشتري اغريضات المره فقيرة ويستحي يطيهن الها.
وكف صــيهد يسأل.
صــيهد:: طــروادة هناه؟
-اي جايب سلطان اصيبعاته مكسرات يجبرونهن.
دار عينه الي درت الوهب شفت نفس نظرات صــيهد، كاموا اثنينهم طلعوا من يمي وابوي من بعيد شال ايده يغمني وينتر على امي
-يله لبسسيها عبايتها خل نولي مناه.
وامي مفرفحه من القهر، رجع وهـــب علينه رجلي مرضوضه ما اكدر امشي عليها خلاني بعربانه ووصلني للسيارة، لمحت سلطان طلع هوه وطرواده عاينلته دايخ وطرواده كاضه من ايده لزمني صــيهد من فكي درت عيني عليه بلا مايحجي خله عينه بعيني دنكت ساكته، صعدني للسياره ووهب رجع العربانة.
"""""""""
رنـــه :: من دريت الكعده راح تصير بالديوان دكيت رجل گلت العفراء لا ما اردن بالبيت اضلن هناه اساعد البنات يتعبن وحدهن،
الكعده الراح تصير مابيها ولا واحد من اعمام رجل رغد كالولهن اليجي نكتله لو مو دايس بساطنه، ودوا شيوخ ووادم عود خيره حتى يحلون المشكله، جابوا رغد وماسه وبدور تسودنن يبجن عليها من شافنها شلون وجها مورم وماتكدر تمشي الولد يشيلونها.
وانه وي جــويريه وندى بالمطبخ وجده تفتر علينه كل دقيقتين غالطه على وحده بينه بيها سوله اذا ماتغلط تموت، للعصر أجّت الوادم التمت، طلعت من المطبخ اتختل افتريت، لكيت تنكات اثنين شمره وحده بره ووحده صعدت عليها مخلين شرك فوگ السياج كوه عبرت وصلت لشباج الديوان حاطين مبرده چبيره ، لفيت العبايه عليَّ تربعت وكعدت على حيلي المبرده سطرتني بس ميخالف المهم اسمعهم،
النوب عضيت اصبعي متحسفه كون انه ولد هسه بنصهم واطيهم حلول وبس واحد يحجي حجي زايد اركعه باستكان الچاي واليعترض اكومن واكتلنه بعگالي واطرده من الكعده خرب حظي.
سكتت اسمعلهم الولد الواصلتلهم صورة رغد من غير ولدنه اربعه وصيهد مسحهن من تلفوناتهم بالكعده، همه مصوبين من عدنا اثنين وولدنه مصوبين منهم اربعه وحركوا بيوت وشيلوا عيال رغد واعمامهم اثنين باعتبار ثلث بيوت.
جان كل الحك النه لمن واحد من الشيوخ الهمه مودينه كالهم.
-بتكم عاشگه إبن عمها سلطان، وزلمتها كضها تحجي وياه هل بسطها ويوم الوده صورها جان مايدري بروحه.
حجاها وكبت العركه وبدل ما يلكون حل زادت المشكله صــيهد ما يرضى بهالحجي سمعت صوت طــروادة وابتسمت بفخر الكل ساكت وبس صوته تارس الديوان گالهم
طــروادة :: لو سلطان عاشگها ينهي عليها وياخذها ابن عمها ومحد يگدر يفك حلكه، عقيل شاف روحه الغلط راكبه من ساسه الراسه، راد يحط عله بأختنه ويطلع روحه من السالفه، الحرمه اشجع منه لو زلمه ماصور مرته، عرضه وشرفه يطي روحه ومايرضى تمسها حجايه، مو يصور بيها مفتخر طاكها؟ بايعينهااا الك على اي اساس يطكها؟
نخمس گـــلبي من ضل يصيح بعصبية محروك گلبه
طــروادة:: اذا هوه ماعده شرف احنا بويه عرضنه غالي ومو گليلين شر حتى نسكتله، يعزم على عرضنه احنا نعزم الچلاب على جثته، وكل واحد خير ويخاف الله يعارف الحك وين وويامن لا تحرفونه.
وعج صوت الكاعدين ناس وياه وناس تكله على كيفك لمن واحد كاله
-انتَ بويه مو ابن شامل لو غلطان؟
شعلان:: اي سيد هذا حفيدي أبن شامل.
-ونعم منه ومن ابوه، عرفته انا من حچاياته نفس حچايات ابوه، بس يا كهلان يرضيك انتَ يوميه واحد مكتول؟ ناس مالها ذنب تتكتل؟
طــروادة :: مولانه جا اعمامه شايفينه باطل وواكفين وياه شنسويلهم؟ شنگلهم وخروا على صفحة خل نكتل ابنكم، كنالهم ابنكم غلط احنا وياكم گوم، صاحوا هلا بيكم احنا يم النهر ووره الساتر متانينكم
المايريد يموت لا يوگف وي باطل.
رنـــه :: كل ساع واحد حاجي مره يحجون بهدوء ومره تصير مصايح، كاضتلي عوده احفر بالگاع بالتراب واسمعهم كاتلني الحر واحس وجهي جمر من الحروره وهمه المبردات تدك عليهم هسه انه شجابرني، فضولي جابرني أتحمل ميخالف.
احفر احفر بالگاع وصار گدامي ظل، راس هاكده صار على رجليَّه، بلعت ريك مرتبكه شمرت العود من ايدي وشلت راسي مخموش گـــلبي عبالي طــروادة والكاه بريا غميته وخليت ايدي على گـــلبي
-امداك متت من الخوف عبالي طــروادة طار گـــلبي.
بريا:: هاي غميتيمن حيوانه؟
سكتت اعاينله كاضله عصا وصاير اعصاب ينتر يريد اكومن
-انتَ ياهو مالتك بيه تفتر وراي حسره امد راسي تكضني شني؟
-بس شفت خيال يم الشباج بين بالبرده عرفتج انتِ ام المصايب گومي لا اسحلج للديوان اخليهم يطونج فصليه.
-مالك شغل بيه وعلي لا تعاديني وتصير چلب وياي اصيرن اچلب منك يوميه اهدن هاسكي عليك.
اجاني شايل العصا كمت بساع أنكث بهدومي مبتعده واحجي بحرگه خاف يفوتني حجي منهم
-انتَ ياهي مالتك شلك غرض.
-جنج مجدايه بالحسين امشي عاب هالوجوه.
حرك گـــلبي وعرفت ما راح يولي مني ويضل يلح مشيت من يمه شويه ودرت عليه
-خايب أبن الروسيه.
شمر العصا البأيده عليَّ ركضت اريد اشرد وهيه أجتني تهفي طكت برجليه اثنينهم روحـــي شاطت اصرخ بلا صوت طحت بالگاع شفته اجاني واجلب بطابوكه شكدها شلعتها ووكفت شمرتها عليه غطه راسه بأيده طكته صاح
-اااخ.
-ومشجاااخ.
إجاني يركض شردت انه وعبايتي اركض صعدت على تنكه اريد اطفر من فوك السياج ولان مستعجله بس شمرت روحي جلبن دشداشتي وعبايتي بالشرك وضليت اتلولح لا انه الطايحه هناه ولا انه الطايحه غاد فرت من القهر من سمعته يضحك عليَّ ، جني مشنوقه صعد على التنكه ومد راسه يعاينلي يضحك وعيونه مدمعه
- جنج جريذي مچلب بمصياده
خزرته افور
-فرغني، ما تستحي تعاينلي وانه مشنوقه.تذكر من فرغتك لمن كتلوك جدي وعمي شاكر وتذكر من بحيت عليك لمن خطفوك شكد مسويتلك زينات.
-ههههههه اصورج واهددج بس تحجين اراويهن الطرواده.
-والحسين انعل والديك.
طلع تليفونه يريد يصورني فرفح گـــلبي لا اكدر اغطي وجهي بجيت محروك گـــلبي
-لا تصووورني.
وخر التليفون عاين الوجهي
-ما اصورلج اتشاقى وياج.
مد ايده فرغ عباتي ودشداشتي من الشرك طحت بالگاع غمضت موجوعه مد راسه يسأل
-ها تعورتي.
-مالك غرض.
-يله امشي امشي مناه لا اراوي صورج لطــروادة.
وكفت امسح بوجهي واخزر بيه
-مو كلت ما صورررتج؟
-اي تندمت لو مصورج.
طكيت ايد بأيد غميته ومشيت صاح وراي
-المشنوقه ام المصايب.
درت عيني عليه وانه امشي
-المكتول ابن الروسيه
.
سوالي بأيده سهله عفته وطبيت للمطبخ كضتني عــفراء عضتني كدام مــاسه وجويريه، اكلها لا تعضيني كدامهن عضيني بالبيت ما ترضى عضتين عضتني، مشيت للسنك ابجي اريد اغسل وجهي واحجي عليها
مــاسه :: عــفراء جــويريه تگول امنيتي اجرب عضتها.
جــويريه :: يااا لا والنبي ماكايله، ترى جده تعضني كلّ يومين
رنـــه :: اااي اي هيه جده تعض وعفره ورثت العض منها كون يطيحن سنونج وتصيرين عجوز حتى بعد ما تعضين.
جــويريه :: ولج هاي جده عجوز وتعض، شبيج انتِ.
سكتت منهن زعلانه على عفراء، كضت الكعده وبس طلعت الوادم كبّ الصياح والعركه بين سلطان والولد وجدي واعمامي
بالحوش يتعاركون،
عمي شاكر طك سلطان يغلط عليه كدامهم وعمي وليد وشعلان يصيحون رغد نكتلها والولد يتصايحون
-رغد محد يوصلها.
وضلوا صياح وغلط للتسعه بالليل يله طشوا، واحنه ردانه عبود لبيتنا.
جــويريه :: كلها صايره اعصاب وتخوف وهـــب طب للبيت كعد بالغرفه يم رغد هوه والبنات وهيه تبجي وتحلفله لا حاجيه وي سلطان ولا مراسلته، كالها
- الا احنا مكتلين يله يوصلونج.
وهيه ميته من البجي. واخواتها على بجيها يبجن
طلعت للمطبخ اركض من صاحت عليَّ جده مطفيه الطباخ الچاي فاير ومتبدي من عده شويه بعدني ما محاجيتها وشالت ايدها طكتني راشدي احس نار اشتعلت بخدي جرتني من زندي كارصتني وتحجي بحقد
-ليمت تبطلين هالثول هذاااا؟
- منصيته جده والله منصيته ما ادري ياهو علاه.
دفعتني وهيه تطك
- صبي الجدج.
مشيت ساكته حطيت استكاين بالصينيه صبيتلهم وديته للديوان نتر جدي
شعلان:: صارلج ساعة بهالچاي من لا بارك الله بيج.
انطيتهم كل واحد استكان وطلعت للمطبخ لكيت ام صــيهد تكصص معلاك تريد تشويه الرغد واجتها بــدور تركض تلفون امها بأيدها كالتلها
بــدور :: يمه صــيهد.
فتحت خط والسماعه الخارجيه كالها
-يمه خل البنات يجيبلي چاي وحبايه راس.
- صار يمه صار.
سدت التلفون بييي مدت ايدها يجيبها طلعت شريط الحبوب خلته على الكاونت كالت
-اطنه حبايه وردنه الي
ام صــيهد گالت البدور
-صبي لخوج چاي ووديه اله.
بــدور :: ياااا والحسين هم اروحن، كبل شويه راد يكتل سلطان هسه اسوي شي غلط ويحط الصينيه براسي.
وام صــيهد محروك گلبها رادت بس تغسل ايدها حتى تكتل بــدور شردت مالحكت بيها صاحت جده.
-صبيله چاي ووديه اله ولج امشي لا خير البيج.
ام صــيهد:: ياهي مالتها البت، عمه هذن اخواته يكومله جــويريه ما مجبوره تحطله چاي وتوديه اله هسه اخابرنه هوه يجي ياخذهن.
دفعتني جده منً الكاونتر تنتر
- لا الا هيه توديه، اريدن اسوي براسها خير كون تصير فطنه مو مطفيه كلشي ماكو امشييي.
جطيت كلاصين بالصينية چاي وماي خليت شريط الحبوب ام صــيهد تحجي ما راضيه غسلت أديها كالت
-تعاي يمه انه اوديها.
وجده تصيح
- جــويريه الليله ما اخليج تنامين من الدكاك لو ما وديتيها.
باوعت الوجهه ام صــيهد
-عوفيها عمه اني اوديها.
لبست العبايه وطلعت محروك گـــلبي من جده طبيت للمشتمل دكيت باب الغرفه گال
-تعااي.
فتحت الباب الصينيه بأيدي صار بوجهي واكف يم الكنتور لابس فالينه تعلاكه وشورت طويل من دار وجهه ولمحني دنكت عيني بسرعه گال
- عبالي مــاسه.
دخلت ساكته خليت الصينيه على المبز ورفعت راسي من لبس دشداشة سأل بهدوء
-مــاسه وين ليش ماجابته هيه؟
-يم رغد، وايدها ما تكدر.
-بــدور؟
سكتت رفعت اكتافي ما ادري تحسرت أأشرله على شريط الحبوب
-تكول جده خل يشرب وحده ورجعوه الي.
اجه يم الصينيه اخذ حبايه شربها ومدلي الشريظ اخذته ودرت وجهي اريد اطلع بس فتحت الباب گال
-جوري.
درت وجهي عليه يباوعلي عاكد حواجبه هز رأسه يسأل
-ياهو وياج؟
شلت ايدي امسح خدي الطكتني بيه جده همست
-محد.
- انتِ مسحتي مچان الطكه شلون محد؟ ياهو الطگج اصابع مطلعات بخدج ؟
دنكت ساكته شيصير اذا حجيت يدافعلي يتعارك وياهم ويزيدون بحقدهم علي، عفته وطلعت بدون ما احجي شي.
ريـــمه :: الاء گلبت الدنيا على سلطان من درت بسالفة رغد وهوه ساكت يحاجيها بهدوء
-مابيني وبينها شي.
-متسودن عليهاا ما تشوفني.
جر باكيت الجكاير وطلع مشيت ورّاه طلع بره الحوش وكعد وره السياج،مناه ابوي وجدي ومناه امي والاء راح يسودنونه.
رديت للبيت جبت عبايتي ونعالي اريد اروحن يمه اول ما فتحت باب الحوش صار بوجهي طــروادة وهاسكي ، سلطان وره لا يوشفني ولا يشوف طــروادة، أشرلي خازرني
"طبي جوه"
شلت ايدي أشرتله "روووح"
ومديت رجلي خطوه بره الحوش أريد اطلع أشرلي على هاسكي خزرته وأكفه بباب الحوش وصل يم الباب وحجه بهمس
-طبي جوه.
-اخذ هاسكي وروح مناه، انه اريدن امشي يم سلطان.
-فنج الطلعتي، هاي النبگه مو انتِ گبل زارعتها ادفنج جوها.
-دفااان أبن شامل.
مشه ورد خازرني تندمت رغم ماحجيت شي
- اسم ابوي لا تذكرينه فهمتي؟
عاينت بعينه
-عمي واحبنه اذكره شوكت ما اريدن.
درنه ثنينه على سلطان اللي واكفلنه يعاين مضيك عينه
سلطان:: خيررر؟
طــروادة :: ماكو شي سألت عليك.
سلطان:: طبيي جوه.
سديت الباب بوجهم وهمه راحوا كعدوا يم السياج كعدت وين ماكعدوا اسمعلهم وكلبي يوجعني من يگله
سلطان :: ماينحمل وجع گـــلبي لا تگلي تهون، ما تهوون والله ما تهون.
طــروادة :: گول يا الله وهيه تهون.
- ولك انا ما جنت اكضن ايدها خاف تنجرح وهل ابن الچلب يطكها، خويه نار بگلبي والحسين نار بگلبي كهلان هاي رغده الگضيت عمــري عاشگها تنطك وما بأيدي شي اسويه، تبجي وانا ماكادر حتى امسح دمعتها.
- نلكااه وين يروح يطير يجيه يوم.
- حتى لو كتلته بأيدي هم نار الوجرت بگلبي عليها ما تطفه، أنا اليوم شفت بعيونها عتب سنين شفّت بعيونها حزن زلم ما تحمله، ولك نظراتها تلومني تعاتببني.
ريمه :: وجعني گـــلبي من سمعته يشهك وخرت اريد اروحن ما اكدر اسمعه واول ما التفت فتحت عيني وشهكت مصدومه.
