رواية حرب الارحام الفصل الثاني بقلم جمانه السعيدي
زينب....عمي بس قرب على ابوي عرف هو ميت
حاول يحركه بس بدون فايده
عمي شال ابوي وطلعه برأ صعد بلسياره اني صعدت ويااا بس كلشي مااعرف
عمري هنا ١٢ سنه
وصلنا للمستشفى عمي نزل جاب سرير متحرك اجا وياا ممرض يدفع بلسرير
هو والممرض شالو ابوي وخلو على السرير
دخلو جوا اني امشي وياهم
بس محد منتبه عليه اني عيني على ابوي
بذاك الوقت كنت اعتقد حتلو ابوي ميت الدكتور بس ينطي علاج راح يرجع يعيش
اكيد ابوي راح يرجعلي عمي ليش جابه للمستشفى
لان يعرف الدكتور راح يرجعه النا
الدكتور اجا فحص ابوي كال
هذا الشخص متوفي قبل وقت
تقريبا من سبع إلى تسع
ساعات
ووين جان ليش ما جبت للمستشفى قبل هذا الوقت
عمي... بلبيت وحده وياا بس هاي الطفله كلشي ماتعرف
زينب...عمي يحجي ودموعه نزلن
الدكتور...خلاص اخذ الجثه للمشرحه حتى نتأكد من اسباب الوفاه
الممرض اخذ ابوي يدفع بلسرير المشرحه
اني وعمي نمشي ورا
عمي يمشي ويبجي نسا كلشي حتى اني نساني
بلنسبه اله هذا الخبر حيل مفاجئ
دخلو ابو للمشرحه وعمي كعد بلكاع وكام يبجي
عمي...ياخويه عمت عيني ميت كل هذا الوكت واني ماادري عمت عيني عليك
الله لايوفقها هي السبب اني ليش مااجبت وراك بليل
وعفتك وحدك
اعذرني ياماي عيني كلت مشكله عائليه وزحمه ادخل
بينهم ومرتك وكحه خفت اجي وراك وتتعارك وياك
تكول جاب اخو واجا
عمت عيني عليك الحنيبن شكد صبرت شكد تحملت
زينب...اني من سمعت عمي يبجي قربت علي وكمت ابجي وياااا
حضني عمي وكمنا نبجي سوا
فهمت ساعته من كلام عمي يعني ابوي خلاص
بعد مستحيل يرجع اليه عافني وحدي بهاي الدنيا الغبره
طلع الدكتور وأكد الوفاة بسبب ذبحه صدريه
ابوي كان ضعيف وبنيه جسمه مو قويه كلش وشغل وتعب
وجهد طول النهار
ماكدر يتحمل الصدمه
ماكدرنا نطلع شهادة الوفاه لان أوراق ابوي كلها بقت بلبيت
رجعت اني وعمي للبيت
اخذ أوراق ابوي واخذني البيته
انطا خبر الزوجته وكاللها خبري الاقارب كلهم
وديري بالج على زبنب
جمانه السعيدي
اخذتني زوجة عمي كالت لا تخافين حبيبتي
اني اخليج بعيوني
بيت عمي عدهم ولد اكبر مني بسنه وحده
زوجت عمي دزته يخبر الاقارب بخبر وفاة ابوي حتى يرحون للمستشفى ورا عمي علمود التشييع
اني ماعندي ملابس سود على كدي زوجت عمي دزت على الجواربن حتى يرحون للسوك يجيبولي ملابس
اجمعت النسوان بيت عمي وبدا العياط
وكل الي تشوفني تسئل لعد امها وين شو زوجة ابو زينب ماكوو
زوجت عمي كان عدها خبر من البارحه امي اختفت
لان ابوي اجاهم للبيت يسئل عنها
زوجت عمي ماكان عدها اي رد على هذا الموضوع
كانت محرجه شلون تكول انهزمت
بس الخبر انتشر بسرعه البرق بين الناس
اكو ناس شافو ابوي يدور عليها ويعرفون امي انهزمت
طشو الخبر بسرعه بعد ما سمعو بوفاة ابوي
هاي الفاتحه ماكانت عزا الابوي الميت المسكين
كان تجمع للحش بامي وشلون انهزمت
وشلون هذا الي انهزمت ويااا كان يتردد على بيتنا دائما
كل وحده كانت ازود معلومه من عدها حتى الموضوع
يصير بي اثاره ومفاجئات
وحده تكول طلعت حامل من صاحبها
وحده تكول زوجها رجع من الشغل ولكاهم بغرفة النوم سوا
ما تحمل الصدمه وكع ميت
وهي انهزمت هي وصاحبها
وحده تكول باكت فلوس زوجها ونهزمت
كل وحده خلت معلومه منها حتى تكون مؤثره وتجذب الناس وهي تحجي
ابوي المسكين محد.كان يبجي علي غيري اني وعمي
احنا الوحيدين إلي كنا حزينين على
خلصت الفاتحه واني بقيت ببت عمي مكسوره وحزينه
ومااعرف مصيري شنو
عمي من رجع للبيت بعد الفاتحه
كان يستقبل المعزين بيته وكل الي يجي يعزي يسئل عن سبب الوفاة
منا لمن خلصت السبعه وخفت الناس
يله شويه ارتاحينا من الهوسه
جمانه السعيدي
عمي....زينب انتي بنتي اني رب العالمين مارزقني بنيه
انتي بنيتي واني مراح اقصر وياج
مو هيج ام رياض
زوجة عمي ام رياض....اخليها بعيوني كل عمري اتمنى تصير عندي بنيه
الحمد لله والشكر زينب حبابه واني مراح اقصر وياها
اخليها بعيوني تدلل
كل هذا كلامهم مايكدر يسد النقص الي صار بحياتي
اني فقدت امي وابوي بوكت واحد
وراح اعيش بيت عمي
بدا الدوام عمي قدملي للمتوسط اني درجاتي كلش عاليه
من المتفوقات بالمدرسه
اخذتني زوجت عمي جابتلي ملابس وجنطه وكل الشغلات الي احتاجهن
بس اني كل الوقت ساكته وعازله نفسي
مجاي اكدر اختلط بيهم الجواب عندي على كد السؤال
اذا تطلب مني شي زوجت عمي اسوي واني ساكته
مدنكه على كتابي واقرا ليل نهار
كنت اسمع مضايقات من البنات بلمدرسه يحجن على امي
ويعيرني بيها
بس اني ماكنت ارد عليهن
حتى البنات مايقبلن يحجن وياي لو يطلعن وياي للبيت من تخلص المدرسه
كنت اروح وارجع وحدي
هذا حكم الزمن عليه امي عايشه حياتها واني الحجي عليه
عمي وزوجته كانو شايليني من الكاع شيل
ابد ما مقصرين وياي
مدلليني حتى اكثر من اهلي قبل
زوجت عمي تعاملني احسن من امي
رياض ابن عمي صف ثاني متوسط طبعا هو المفروض صف ثالث متوسط بس راسب سنه
نجحت من اول متوسط درجاتي عاليه طلعت الاولى على هاي المرحله
لان كنت مخلصه كل وقتي قرايه لا اطلع ولا ادخل
كاعده بغرفتي واقرا
طلع رياض دور ثاني زوجة عمي ضاجت كامت تحجي علي بدا يقرأ كدر يطلع من الثاني
اني من انتقلت للثاني
شديت حيلي اكثر كل وقتي اقرا
طلعت من الاوائل اما رياض رسب بهاي المرحله
كان يتحجج الثالث بكلوريا وصعب
بينما هو كان يخلص وقته لعب وابد مايقرا
وهنا اني وياا صرنا بالثالث سوا
هاي صار اتلث سنوات واي خبر عن امي ماكوووو
بما ان اني ورياض نفس المرحله
هنا زوجت عمي كانت تطلب مني نقرأ اني وياا سوا
كانت اضوج لان اني اطلع من الاوائل ورياض يطلع
لو اكمال لو راسب
طبعا هذا الكلام ماعجب رياض
شلون اني وياا نقرأ سوه
رياض....طبعا لا والف لا اني تقريني زنيبه
ام رياض....لا مو تقريك انت وياها اقرو سوا
رياض...لا والف لا
ام رياض...انت ما تستحي جماعتك راح يخلصون اعداديه
وانت السنه بسنتين
بيش زينب احسن منك اكعد اقرا انت وياها بمكان ماطاير كل النهار وياا جماعتك
جمانه السعيدي
بدت زوجت عمي تضغط علي هي وعمي ويجبرونه
يكعد يقرأ وياي
زوجت عمي تتوقع من يكعد وياي راح يسحب المعلومات مني سحب وراح يطلع نابغه
رياض كان شيطان مو ولد عادي يمشي وياا اولاد بلا اخلاق
من نكعد نقرأ اني وياا يتحرش بيه
لو يلزمني من صدري لو يوكع القلم حتى يدنك ويطخ
رجلي
تعرفون هو هنا بمرحلة المراهقه
كان يتعمد يضايقني حتى مانقرا سوا
اني كمت من اسمع زوجت عمي تكله أقر انت وزينب
اقفل غرفتي واسوي نفسي نايمه
هو يجي للغرفه يريد يفتح الباب يلكا مقفول يكول نايمه زينب
لو اكعد يم عمي حتى رياض مايكدر يتحرش بيه
شويه شويه رياض شاف مابيه مجال
كام ينهزم من البيت حتى مايقرا
شويه يخلي امه تلتهي ويطلع للشارع
ماكان عندي غير هاي الطريقه حتى اتهرب منه
هنا بدت زوجت عمي تخبث وياي
شلون اني أنجح واطلع من الاوائل واني بنيه
وهي عدها ولد وفاشل ما يحب المدرسه ومايربد يقرا
دخل الشيطان عقلها وخلاها تخطط شلون راح تزعجني
بدت تشمر اكثر شغل البيت عليه
واي وقت تشوفني كاعده اقرا اطاع شغل من جوه الكاع
حتى التهي عن القرايه
بس اني كنت سريعه بلشغل اخلص الشغل ادخل الغرفه
ماانام اذا مااخلص واجباتي
جمانه السعيدي
امتحنت وطلعت من أولى على مدرستي
ورياض رسب للسنه الثانيه بلثالث
عمي حيل فرحلي بس زوجته ضاجت مني
كامت تكرهني شلون اني اطلع اولى وابنها يبقى بلثالث
للسنه الثانيه
هنا قرر رياض يترك المدرسه
شكد حاول ويا عمي وزوجت عمي بس ابد كال خلاص اني مااحب المدرسه ومراح ارجعلها ابد
طبعازوجت عمي كامت تبجي وشكد حاولت تأثر علي يرجع للمدرسه بس قفل
اني قدمت للاعداديه
وهنا زوجت عمي تخبلت مني عافت كل شغل البيت عليه
ماعندي مجال اقرا
طول مااني كباله تطلع شغل من جوه الكاع
اما بلنسله الرياض كان تواجده بلبيت قليل
الصبح يبقى نايم للظهر اني اروح للدوام
من ارجع هو يتغدا ويطلع من البيت
يرجع بليل متأخر الكل يكون نايم
ما بطل يتحرش بيه بس اني حيل حذره منه
ابد مااكعد بمكان اني ويااا وحدنا
كل النهار اشتغل بلبيت من يرجع عمي بليل زوجته
ما تخليني اشتغل لان عمي مايقبل
بلنهار اذا هو موهنا تكرب عليه كراب مو طبيعي
بليل من يرجع تسوي نفسها تحبني
تكلي روحي اقري حبيبتي
اني هاي فرصتي الذهبيه اقفل غرفتي عليه
وابقى اقرا منا لمن اخلص واجباتي وانام حتلو ابقى كاعده النص اليل ميخالف اهم شي اكمل تحضير دروسي
رياض من يرجع بليل متاخر امه وابو نايمين
يسمع صوتي اقرا ويشوف ضوه غرفتي مفتوح
يحاول يطلعني من غرفتي
زينب....منو
رياض...اني رياض منو يعني
زينب...شتريد
رياض ...جوعان تعاي سويلي اكل
زينب...وانت شنو ناقصك روح سوي النفسك
رياض...عوفي الاكل تعاي نسولف اليوم شفت شغله تخبل
تعاي احجيلج عنها
زينب...روح اريد انام لو اعيط واكعد عمي
رياض...ومرض شبيج نحجي اني وياج مجرد حجي
زينب...شكرا اريد انام
كنت اعرف نوايا رياض شيطان يريد يضحك عليه
ويستغلني مايعرف اني شكد اكرها اموت منه
من اول مره تحرش بيه
اكثر من مره عاد هاي المحاوله وياي
كل مره يطلع بشغله شكل
بس اني مستحيل اعوفه يضحك عليه
شكرا لزيارتكم عالم روايات سكيرهوم
