رواية انثي من عسجد الفصل الثاني 2 بقلم جوهرة

ثريا / 

كملت حصة الفنية بقيت البنات يرسمن بالكراسات وطلعت من الصف لأن انتهى الوقت متعودة اباوع بالساعة من اشوف الوقت المخصص للدرس ينتهي اطلع من الصف لأن مرات المعلمات المسؤلات عن جدول المراقبة يسختن واني احب كولشي مضبوط ، بيوم اللي اراقب اخليهن بانذار كد ما حريصة ، لاكتني موظفة الخدمة ام حمدية كالت يردونج بالإدارة يم ست سمية المديرة مشيت وراها واني اسألها منو اللي طالبني بالاسم كالت مدري ، 

 اني معلمة فنية يعني متعارف عليه عدنا هنا محد يسأل المعلمة اللي ادرس هيج اختصاص بما أنه اختصاص سهل رفعت حاجبي اول ما دخلت سلمت واشوف مرية كاعدة والكشخة واضحة عليها

 بس مو صغيرة واضح عليها 

عمرها بالخمسين حسب تقديري هذا ، ردت سلامي وعيونها تتفحصني بعدما سمعت المديرة تكللها هذه ست ثريا ،

 والواضح ست سمية تعرفها للمرة لأن طلعت من غرفة الإدارة وعافتنا بوحدنا وهي تكللها أخذي راحتج ام غطفان ، 

جدح الاسم بعقلي ورفعت حاجبي بس بعدني منزلة راسي ونظرتي مثبته على أيدي بحظني مخليتها ، رفعت راسي من سالتني 

ام غطفان / شلونج عيوني 

ثريا بهدوء / الحمدلله 

ام غطفان ( مريم ) / 

من الاخير احجيها احنا بيت

 الشيخ ابراهيم ابو غطفان اللي اجى وحجى وية اهلج وطلبج للزواج من ابنا غطفان

بقيت صافنه ولجمني كلامها شوكت اجى وطلبني وليش ماعندي علم ؟!!!

ثريا / متوهمة خالة لأن ماعندي علم باي كلام من اللي حجيتي 

ام غطفان ضيكت عيونها /

 شنو هالحجي ، ترى بيبيتج تعرف وكالت خلو كولشي علية 

ثريا بدت تضوج / 

مستحيل جدتي تضم هيج سالفه علية ، اني عندي خبر بالموضوع الاول وسالفة انتم تردون عروس من بيت حجي عارف بس سالفة الخطبة بهذه الفترة ماعندي اي خبر عنها 

ام غطفان تنهدت لأن تذكرت ابنها اللي ثار بيهم من سمع أبوه خطبها بدون علمه والسبب بيبيتها اللي اتصلت بالشيخ ابراهيم ، 

ماتدري ليش هيج تصرفت شنو هالقابلية انوب الكل ساكت عنها هالعجوز وتاركينها تتصرف بكيفها !!!!!! 

 والكارثة ابراهيم قابل بسالفتها وفرحان !!

عيونها على ثريا والله البنت حلوة وانيقه بس ابنها شلون رأسه يلين ، هي اجت هنا بعدما سالت وعرفت دوامها بهذه المدرسة ومديرتها صديقتها وبينهم صلة قرابة 

ام غطفان / اللي احجي ماريد يطلع اتمنى تكونين كد ثقتي بيج 

ثريا عدلت جسمها ورفعت راسها / تفضلي خالة 

ام غطفان وبداخلها محرجه جدااا 

/ 

ابني رافض الخطبة نهائيا وياريت تحترمين رغبته 

ثريا / 

حسيت وجهي نار اشتعلت بي 

من الاحراج والقهر ،

 شنو من موقف أمر بي شكد

 صعبة انرفض وجها لوجه 

حقدت على غطفان اللي اصلا ما اعرفه وانقهرت من جدتي اللي ذلتني بطلبها 

وكفت واني اتحمل الموقف المهين والمحرج احاول اتلبس الثقة والغرور وعدم الاهتمام بالوضع ككل /

 إذا ابنج رافض فكوني على علم اني رافضته ومن البداية ومستحيل اقبل بي لو يبقى اخر رجال بهذا العالم ، منو هو حتى اني الثريا اقبل بي ، وصليله الكلام هذا وضيفي عليه اني ما اعرف بتحركات جدتي وية الشيخ ابراهيم اللي اجى وخطبني وحدد كولشي وياها ، 

وابنج خل يفهم اني من الاول رافضته مو هو اللي يرفضني 

عفتها وطلعت واحس جسمي كله يرجف ، شدعي عليج جدة ليش حطيتيني بهذا الموقف 

ــــــــــــــــــ

غطفان / 

ملتحق بالدوام صار كم يوم منازل رغم وقت الإجازة لكن تعمدت اتاخر ماريد ارجع ويفتحون وياية موضوع اكل الدهر عليه وشرب واجى يطيح براسي ادري يابة عندك اربع ولد غير غطفان شلزكت بية !!!

وبعد فترة نزلت واسمع خبر خطوبتي والكل يبارك يا يابة عقلي ضرب وكما اصرخ واكسر بالاثاث واول الخسائر شاشة اللازمة اللي محتلة جدار الصاله ، عاطت امي تهديني هي وفنار اختي ، صار راشد بوجهي / اهدا شبيك ؟!!!

غطفان بغضب / ابوووك وينه ؟ شنووو ماعندي قيمة ولا قدر يخطب بدون علمي ، الف مرة كلتلكم ما اتزوج شنو زعطوط اني يروح يخطب من ورى ظهري 

راشد / اهدا ياعيني وتعال اكعد هسة أبوية على وصول

غطفان بحرقة وضرب الطبلة برجله وشمرها / ما اهدااااا

/ غطفااااان 

الجو مشحوون وبوصول الشيخ ابراهيم ازداد أكثر ، شمر العوجية اللي جان يتكا عليها / 

والله خوش يا غطيف مالي احترام ولا قدر واني اشوف البيت مكلوب وعايث بالصالة دمار 

باوع لشاشة البلازما المتكسرة وحرك رأسه ممتقبل هيج تصرف راح كعد عالقنفه وعينه على ابنه اللي واكف متخوصر / 

حمدالله على السلامه ، 

صار شهر ما شايفك ،

 اجي والكاك مسويلي حفلة !!!!

تنفس بقوة / يابة ليش تتصرف بدون ماتنطيني خبر وانت تدري اني ماريد ولا اواطن طاري الزواج

الشيخ وأيده تلعب بسبحته وبلا ما يباوع لابنه شغل عينه بخرزاتها / 

 بس تواطن ذكرياتك وعايش بيها وتحن وتون للي باعتك وراحت للغريب 

شهكت ام غطفان لأن داس على جرحه واذاه ، وفعلا عاط غطفان مقهور وضرب ايده عالجدار بلا مايحس وأيده تاذت وسال دمها لأن الضربة جانت قوية وتزلغ جلد ايده ورد عيونه تلمع بدموع مكبوته / 

متعمد تذبحني يا ابو غطفااان 

عافهم وطلع من البيت وراشد اخوه يركض وراه يريد يتطمن عليه من شاف الدم ينفظ من ايده 

ـــــــــــــــــــ

شيخ ابراهيم / 

شفتي ابنج شلون مكار مانزل إجازة يعاند ومن نزل سوى هالفلم هذا 

مريم بحزن / دخيلك عوفه والله متحطم وانت اذيته بكلامك وياه وتصرفك بهذه الخطبة 

ابراهيم تنهد وهو يمدد عالفراش / لو ما اسوي هالشكل ماراح يتغير ، بعدين يشكرني ويبوس ايدي عالشي هذا 

سكتت مريم وقررت تسوي اللي كال عليه ابنها بعدما رجع تالي الليل مضمد ايده وحجت وياه وتطمنت عليه وقررت تساعده بالتكدر عليه وفعلا سوت مثلما راد 

ـــــــــــــــــ

ثريا / 

عيوني مورمة من البجي طلعت للحديقة اتنفس الهوا احس مخنوكة ، صافنه بيها ما احس الا انظرب جتفي لفيت راسي على جدتي واكفة وراية /  

ادخلي للبيت اريد احجي وياج

رديت والعبرة بصوتي / عوفيني لخاطر الله ، ترى رخصتيني واني العزيزة

الجدة / انا امك يحاتم ، شلون هيج تحجين ، الشيخ بنفسه جا وخطبج 

ثريا / وهذا كل اليهمج الشيخ اجى وبعدين ؟!!!

 هااا بعدين شنو يصير ؟! 

جدة ابنهم رافضني وأمه اجت للمدرسة وحجت وياية ،

 والله لو ميته ولا سامعتها وهي تكولي ابني رافضج ورافض الخطبة 

الجدة / نسوان عقول صغيرة ، شنهو تتصرف من كيفها ، خل يسمع الشيخ لا ينعل سلفاها

jawhara_2028

ثريا رفعت راسها للسما ورجعت باوعت لجدتها / ياربي ، اني وين احجي وانتي وين ، جدة احنا بزمن مو ذاك الزمن فدوة لعينج ارحمي بحالي وعوفي السالفة اللي تفشل 

عطت من ضربتني على ذراعي بعوجيتها ، عفتها ودخلت للبيت وصعدت لغرفتي قفلت الباب ومقررة ما أنزل يمهم حتى دوامي اتصلت بالمديرة اخذت إجازة واني احاول افكر اريد مخرج لهذه السالفة اللي انقرضت علية ، يعني الولد رافض على شنو أبوه يتفق هو وجدتي ، والله راح يخبلوني !!!!!

شكرا لزيارتكم عالم روايات سكيرهوم