رواية ارحموني ولو رحمة مرة الفصل الثاني 2 بقلم فراقد حسن علي

محمود/امي شالت فرح وخلتها بحظني

شكد خفيفة وصغيرة //يمه يصير تبقى اليه 

ومن تكبر اني اتزوجها و احبها 

نفس ما أبوي يحبج

حتى رب العالمين ينطينا هدية نفسها جاهل صغير 

فاطمه/ههههههههه ،،الله كريم يمه منا لهذاك الوكت 

-شدكولين سهام ،تنطين فرح لمحمود 

الجده/جدة محمود أخذها مني ،،

فرح الك ماتصير الغيرك 

محمود/ااااي عفة جدة بس انتي شاطره 

-من باجر أشترليها ويايه أبو الجيس (عصير مجمد بكيس)

فاطمة/ههههه ،،لا يمه هي بعدها صغيرة 

ماتكدر تاكل وتشرب مثلنا

محمود/شنو تبقى بدون أكل وشرب ،،

خاف تموت وماتكبر نفس الكائنات الحيه مال علوم

سهام/ههههه ،،محمود فرح صغيره تشرب بس حليب

محمود/هااا،،أفتهمت 

من باجر أجيبلها حليب من صخول بيت علاوي

فاطمه/ههههه تخبل الولد ،،

-يمه أمها ترضعها 

ميحتاج تجيبلها انت حليب

عمة نجمة جابت ولد سموه (رافد )

-وراها ،،عمه كمرة جابت بنيه سموها (نوال)

-يعني هم وفرح بنفس السنة صاروا

-فرح صارت بالبداية 

-ورافد وراها صار بس مو حلو أسمر طوخ

-وراهم نوال صارت من جان عندي امتحان دين 

ومن صارت أمتحانات نص السنة امي طلعت روحي تعال يا محمود اقرأ. روح يامحمود رد أملاء

اكعد أحسب رياضيات 

يومية كل ما ارجع من المدرسة 

اركض بوجهي لغرفة عمي باسم حتى أشوف فرح

-مرات أشوف خاله سهام ترضعها على صدرها 

أستحي واطلع اركض ،،

لان امي كالت عيب تباوع 

على خاله سهام من ترضع فرح

-أبوي ماقبل كال// ما ترحون 

جديتي ام أمي مطلقة 

ومتزوجة رجال غير جدي أبو أمي فاطمة 

-وبيت أبوها ومرت أبوها 

وخوانها هنا بيتهم 

موجودين بالمحوديه

-بس بيت أمها موجودين بغداد 

وهم عدها ٣ خوات من أمها

-أمي خطية مشتاقة لجديتي (أمها )

وكامت تبجي وزعلت على أبوي

كالتله// ليش متحس بيه 

اني مشتاقة لامي صارلي ٥ سنوات مشايفتها من يوم جبت أركان 

تخيل نفسك انت كل هاي المدة متشوف أمك شيصير بيك

-وره يومين أبوي كاللها/ ميخالف روحي ٣ أيام وترجعين ،،

اذا بقيتي رابع يوم 

بعد لا تجين أبقي يم أمج

وكالت لجديتي// باجر نطلع الصبح لبغداد

اروح اشوف امي مشتاقتلها

-جديتي كالتها/روحي يمه صلة الرحم حلوه 

وهاي امج هي جنتج وهي نارج 

وسلميلي عليها كليلها //مشتاگه لسوالفها خليها تمر بيه ،،

تدري بيه رجليه سكط 

ومابيه حيل أمشي واتحرك 

الدنيا باردة بشهر الثاني

امي خلت صوبة علاء الدين الخضرة بالحمام. حتى يدفه 

-بعد مادفت الغرفة وفرشت فراشنا 

دخلنا اني واركان للحمام 

-الكاع مال حمام صبة ناعمة وباردة من ينزل عليها المي الحار يصير بخار كثيف

مو تسبحنا لا تعذبنا تكول تغسل بزولية

وكعت جلودنا انوب ليفة هي مسويتها

يعني حياكة خيط كونية وخيط صوف

وتصوبنها بصابونة الركي

فاطمه/بس أسكتوا لا يسمع ابوكم 

ويجي يصلخكم بالحزام

اركان/ترى جلد أبوي أهون من هذا الجلف 

فاطمه/هسه شلون ،،اصوبنكم لو أصيح عادل هو يصوبن جلودكم

محمود/اسكت اركان لا تاخذ المقسوم 

على كولت جدي 

طلعتنا من الحمام مكمطين 

والمناشف على روسنا 

بعد مالبستنا بوفية الهدوم 

رحنا ركض للغرفة طبينه جوه اللحاف 

-وابوي كام شعل الفانوس ونصى الفتيلة 

-وامي جابتلنا كلاصات حليب حار 

شربنا ونمنا مرتاحين 

-وابوي راح ويه أمي للحمام 

هم تجلفه وتوكع جلده 

-اني رحت فتحت الباب مال غرفة عمي باسم

ودخلت عليهم همه بعدهم نايمين 

-ودنكت على فرح وبستها من كصتها

راح اشتاقلها 

-انوب اني واركان وامي سلمنا على 

جديتي وجدي وعمة شمس واكفة تخبز

وطلعنا من البيت 

-ابوي أخذنه بسيارته 

عنده سيارة بيكم يسميها الحيوانة لان تفيدة بالشغل

-وصلنا لبغداد من الصبح 

ودخلنا على بيت جديتي ام امي 

لكيناهم بعدهم نايمين 

-بس رجلها طالع للدوام

هو مضمد يداوم بالمستشفى العام 

خطية جديتي ((صفية ))تفاجأت بينا

وبوست امي فاطمة وكامت تبجي 

لان صارلها هواي مشايفتها

وبقت تبوس بينا خلتنا بحضنها 

وسلمن على أبوي من بعيد 

-خالاتي هنا بغداد ٣ 

((خديجة ،،أمنة ،،بشرى))

-ابوي شويه وترخص وراح

وكال لامي/ ٣ ايام وامر عليج

شكد فرحت جديتي صفية بجيتنا 

وخالاتي حارن شيسون ريوك

-مرت ٣ ايام بلمح البصر 

كلش تونسنا ،، وهواي لعبنا 

طلعنا ويه خالاتي للسوك 

وامي أشترت الها ملابس حلوة 

-واخذت قطع قماش لجديتي وعمة شمس 

-واخذت عطور لجدي ولابوي ولعمامي 

-واشترت دشداشة حلوة لخالة سهام

-وجدي ((سليم)) أبو خالاتي 

حباب وخوش رجال كلش هادي 

مو مثل جدي ناصر عصبي وبس يصيح علينا 

وكل مايجي من الشغل يجبلنه حلاوة دبسية 

وشامية حمرة 

-أجي ابوي علينا العصر 

سلمنا عليهم ورجعنا للمحمودية 

-اول ماوصلنا دخلت اركض للبيت

ادور على مرتي فرح شكد أحبها

شوكت رب العالمين ينطينا هدية جاهل صغير نفسها !!

-لكيتها نايمة بحضن جديتي 

-بوست جديتي بقوة شلعت خدها

وهي تضحك وتبوس بيه 

تكولي //جدة أشتاقيتلكم البيت مايسوه 

بدون ضحكتكم وهوستكم

واني بعد اريدها صارت مرتي وترى هواي أحبها 

الجميع /ههههههههه

الجد/أبشر فرح الك ماتصير لغيرك 

محمود /ركضت وبوست جدي شلعت خده 

-وين أكو مثلك هيجي جد طيب بكل هاي الدنيا

-رجعت اركض كعدت كدام جديتي 

وربعت رجليه //يلا جدة خليها بحظني

خلتها جديتي بحظني

شكد حلوة صايرة تفتح عيونها ملونة 

وشعرها أسود نفس شعر خالة سهام 

ولون وجها بلون الحنطة 

بس صغيرة وخفيفة مو سمينة 

وهيج مرت الايام حلوة وبسيطة 

وفرح كبرت ودنفشت وكل يوم تصير احلى

-وخالة سهام هم صارت حامل 

-وامتحنت اخير السنة 

واستلمت الشهادة اول على الصف 

ونجحت للصف الثالث ابتدائي

-فرح كامت تخطي على الكرويتة 

وتخاف تشمي خطوة وتوكف 

واني امشي وياها نفس ظلها اخاف عليها توكع

-بيوم اشوف بيت جدي انخبص

-اسمعهم يكولون//طلبوا مواليد ابوي وعمامي للتجنيد ولازم كلهم يلتحقون 

-وجديتي تبجي عليهم ومتقبل يلتحقون 

ابوي وعمي باسم مسرحين من الخدمة 

بس عمي احمد ومحمد لا بعدهم 

-شو صارت هوسه 

وناس خايفين 

نسأل شكو 

كالوا // العراق احتل الكويت

ابوي وعمامي اختفوا

وبعد محد من عدهم نزل مجاز

-وجديتي غدت عود من القهر 

كاتلها الخوف والقهر على ابوي وعمامي

-وتخاف على عمي احمد لا يسجنوه لان فرار 

-بيت جديتي اهل أمي فاطمة اللي بغداد

أجوي يمنا وعاشوا بيت جدي 

يخافون من الاوضاع لا تسوء بغداد

-جديتي صفية تراهمت ويه جديتي خاچية 

عبرت سنة ودخلنا بسنة جديدة 

-يومية بليل أشوف أمي تبجي وتفرش سجادتها وتبقى تصلي وتدعي 

بس كون ابوي يرجع بسلامة 

-بليل ويجفت علينا عمي باسم وعمي محمد

-جدي يبجي ويصرخ //الحمد لله ربي 

رجعت اولادي سالمين

-وجديتي تهلهل وتبجي وتبوس بيهم

-خاله سهام حظنت عمي باسم كدام 

بيت جدي وتبوس بي وتبجي 

-وجديتي نايمة بركبة عمي محمد وتبجي

-وامي أنصكت باب الهول 

لان ابوي ماكو وياهم 

-اجت فرح كلبي تدعبل على عمي باسم

وهو شالها ويبوس بيها 

-وهي خافت من عنده لان لحيته طويلة 

وملابسه وسخه وكله تراب 

وشكله متغير 

وهي فرح كلبي شلون صايرة تخبل 

الحمد لله كبرت وصارت تمشي وتدعبل 

وصارت سمينة وجسمها مليان 

وشعرها خالة سهام تشيله وتسويلها نخلات أثنين ،، 

كل نخلة بجهة

وعيونها تخبل ملونة 

-مرت الايام وابوي ماكو عنه اي خبر 

امي نسلت بس تبجي عليه 

وتدعيله يرجع سالم

-جديتي بين مدة ومدة تروح تشوف عمي احمد خاتل بيت اهل خالة سهام بنهاية الديرة 

لهناك وسمعنا لجت الناس 

وصارت هوسة 

نسأل شكو // 

ناس تصيح صارت الغوغاء 

وناس تصيح صارت الانتفاضة الشعبانية 

وناس تصيح صار استقلال الأكراد عن الحكومة العراقية بغداد

على ما أتذكر استمرت هاي الهوسة لو شهرين لو ثلاثة بسنة ٩١

بهاي الاحداث والهوسة 

خالة سهام جابت بنية ثانية 

وسموها ( منى )

بس مو بحلاة فرح 

منى بيضة وبيها شكار

ولون عيونها عادي 

-بنهاية الشهر واجه ابوي من بعد غياب شهور 

الدنيا أحتركت جدي حار شيسوي

كام يرمي واجوي أعضاء الفرقة الحزبية اخذوه لمقر الفرقة 

بس لان جدي عرف والديرة ناس تعرف ناس 

طلعوا بنفس اليوم 

-ذبح عجل وعزم كل أهل الديرة ثواب لوجه الله لأن رجعه ابوي بسلامة 

والناس يجون مجموعات يباركون 

-يعني ابو صارله اشهور من أختفى 

ومن رجع شعره مكفش 

ولحيته طويلة 

وهدومه وسخه وكلها تراب

وضعفان حيل 

والبسطال لاطش على رجله كصكصه عمي باسم بالموس وهو لابسه يلا كدروا ينزعوه من رجلي 

-وامي دخلته للحمام استلمته غسل وتنظيف

وطلع لابس دشداشة خطية حتى صايرة 

جبيرة عليه هلكد ما ضعفان 

-وبس يتصفن 

وعبالك خايف ما ادري يتذكر مواقف تأذي

-وعمي محمد جاب الحلاق للبيت 

وزين أبوي عدل شعره 

ورتب لحيته ،،تغير شكله 

-من تعشوا ناس وراحوا كلمن لبيته 

ابوي كعد بين جدي وعمامي 

وسولف شنو صار وياه

-بعتبار هو جندي مكلف 

وخادم بالجيش العراقي 

ومشارك بحرب ايران 

-من طلبوا مواليده مره ثانية 

لحرب الكويت شامري بالمتقدم 

-ومن صار أنسحاب الجيش العراقي من الكويت 

ماكدرين ينسحبون عن طريق البصره

-لان الانسحاب صار عن طريق الموت 

هو الطريق السريع رقم ٨٠ 

اليربط مدينة الكويت بمنفذ العبدلي الحدودي 

على الحدود الكويتية العراقية 

ومن هناك بصفوان 

الطريق الرابط من صفوان للبصره

هذا الطريق سقتطه قوات التحالف الأمريكية ودول الخليج 

يقصفون الرتل العسكري بدايته ونهايته 

انوب يبلشون يمشطون ويقصفون باقي الرتل 

اجتهم الاوامر ينسحبون على حفر الباطن 

هاي المنطقة ملازمة للحدود بين السعودية والكويت ومنها يدخل الجيش للعراق 

على محافظة المثنى ( السماوة )

بس شنو هنا تم تحشيد قوات التحالف وقوات درع الجزيرة وبدوأ بشن الهجوم على القوات العراقية 

وهنا القوات العراقية وكعت بالمصيدة 

وخسائرها لا تعد ولا تحصى

-وابوي وهو وكم جندي نفذوا بجلودهم 

واجوي مشي بس كاتلهم الجوع والعطش بالطريق

أبوي ماشي هواي ايام وهو يمشي 

وذابحته الصخونة 

بس الخوف من الأسر والموت صارله دافع 

ان يكمل مشواره وينقذ نفسه

والحمد لله اكو ناس بعدهم طيبين 

شايفينه بالطريق ومساعدينه 

وهل رجعلنا سالم 

-الاوضاع شويه هدات واستقرت بغداد

بيت جديتي صفية رجعوا هناك لبيتهم 

كملنا المدرسة وبدينا الدوام 

وصرت بصف ثالث ابتدائي 

-الحصار الاقتصادي الي فرضته الأمم المتحدة على العراق ومنع الغذاء والدواء 

تعب الناس 

جدي وعمامي رتبوا وضعنا

اشتروا حلال (غنم وصخول وهوايش) 

واشتروا دواجن (دجاج ،،بط ،، بش) 

-ورتبوا مكان لصريفة جبيرة بالكاع اللي بظهر البيت خلوها مكان للحلال وصارت شي مرتب مو هوسة ،، وعلفهن من الزرع 

الحمد لله ماتأزمت اوضاعنا 

نحصد خيرات زراعة 

وخيرات جني الحلال

-الزرع كلشي نحوي من عنده ،،

الموسم بموسمه 

-الزرع الشتوي بموسم الشتاء،

وامي وجديتي وعمه شمس وخاله سهام 

يرتبن وضعهن ويضمن المحصول الشتوي

بكل انواعه شي يجمد وشي يتيبس 

-مثلا المربى باانواعها يجمدوها

والنباتات الي تنسلك وتنضم هم يجمدوها

-وبموسم الصيف نفس الشي

يجمدن بانيا ،،يكلن بيتأنجان ويضمنه

يسون معجون طماطه ويضمنه 

يسون دبس ،،يجمدن التمر 

وهاي الشغلات يطلعهنا بالشتاء

-يسون كلايد مال فلفل حار ويبسنها

يبسن كرفس وبطنج وهاي سوالف

حتى يستفادن من عدها 

-والحلال طالع من عنده الحليب 

والجبن ،والگيمر ،،والكشوه ،،والألبه

والزبد ،،والبيض ،،

-وشوكت ماعجبهم ذبحولهم 

لو دجاج لو بط لو بش 

-واذا صادفت عزيمة لو شغلة مهمة 

يذبحون طلي

-والحصة التمونينة متوفرة 

هل موجود بيها نستفاد من عندها 

وكل هاي الانعام بتدبير من امي ونسوان البيت

أركان أخوي سجل صف أول ابتدأئي

-وكمت أخذه وياي واجيبه وياي 

واني نجحت لصف الرابع الابتدائي

-وفرح كلبي صارت جبيرة تحجي وتفتهم 

و منى بعدها مخبلة وبس تبجي 

-عمي محمد يريد يتزوج

جدي كاله //تزوج انت واخوك احمد سويه 

علمود هوسة وحده والمصاريف تقل علينا

وثنينكم تاخذون بنات عمكم حمد 

-محد اعترض ،،لان عماتي كمرة ونجمة عدهم

-وهن البنات رجاء لعمي محمد ،،

وهناء لعمي أحمد

-عمي احمد بلغوا عليه الميخافون الله 

وكبسوه الامن واخذوا 

-وكصوا تك اذانه خطيه لان فرار 

-وحكموا ٦ اشهر سجن

خلص ٣ اشهر 

بعدله ٣ اشهر ويطلع ،

ويتزوجون سويه

-نطب نسبح انا واركان سويه بالحمام

-امي من تخلص غسل الهدوم 

تجلف صبة الحمام وتنظفها

وتسد المجرة بوصلة المسح 

وهي صبة ناعمة ترش شويه تايت بالكاع 

تصير تزحلك نبقى نلعب 

لحد ما نتعب 

-فرح تبقى تبجي تريد تلعب ويانه

لان تسمع صوت ضحكنا ولعبنا 

-تلبسها امي بس بجامة بدون قميص 

تكلها // يلا روحي العبي وياهم

-بس ماتسد علينا باب الحمام 

وكلساع تجي تباوع علينا وتروح

-من نخلص لعب ونتعب 

تجي تجلفنا بالليفة بس سيم المواعين اهون 

تجلفنا ثلاثتنا اني واركان وفرح 

انوب تبدل النا ونطلع

-فرح خبلتني كل ما ارجع من المدرسة 

اني واركان وعلاوي صديقي 

-الكاها تلعب بالشارع 

وماتلبس بجامة بس الدشداشة 

لو بس القميص

-لزمتها كتلتها ودخلتها جوه للبيت 

سهام/محمود هاي ليش هيجي صابغ خدها

ليش تضربها ،،

كم مره كتلت لا تضربها

محمود/خاله كاعده بالشارع 

ومالابسه لب اس وطالع ع يبها 

والرايح والجاي يتفرج عليها

لبسيها لباس لو ام وتها بيدي 

شو عارضين بناتنه بالشارع

اركان/خالة ترى المرة الثانية اني ادكها 

شنو هي و منى يدعبلن بالشارع ومالابسات هدوم

خاجيه/يول سهام جويهن 

وبطليهن من هاي السالفة مو حتى جدهن نبج هذاك اليوم على هاي السالفة الكشرة 

سهام /عمة شلعن كلبي اركض وراهن والبسهن وهن ينزعن هدومهن

فاطمة/شوفي انتي مو عندج مكينة خياط 

خيطيلهن شورتات طويلة ومن جوه خليلهن بيهن لاستيكه بعد مايكدرن ينزعن الهدوم 

-واذا مافاد بيهن عود خوفيهن 

هن جهال بسرعة يخافن

اركان/خالة اني كتلج المره ثانية اني ادكهن 

سهام/لا خاله هذني خياتك لا تضربهن علمهن

اكلج فاطمة خيطيلهن انتي فدوة اروحلج 

ما اكدر اكعد على المكينة 

بطني واصله لخشمي

فاطمه/تدللين بليل اخيط الهن 

بس اخلص واجبات الولد 

فرح/ما احبك وجهي يوجع 

ورجعت تبجي ومبرطمة (تحجي بلغة الاطفال حجيها مكسر)

محمود/ كمت شلتها وبوستها 

يول اخاف عليج ،،

وعيب هيجي تطلعين بالشارع 

بدون هدوم الناس تكول عليج مو حبابة 

فرح/ما ،،ما ،،نزلني 

اروح العب ويه اركان ميضربني هو حباب

انت بعد مالعب وياك 

محمود/واذا اشتريلج شامية حمرة من دكان حجي صالح

فرح/تمسح دموعها بظهر ايدها وتضحك منتصرة تموت على الشامية الحمرة 

-اشتري اني و منى 

محمود/روحي البسي بجامة وتعاي اشتريلج

-رحت اشتريتلها هي و منى ورجعنه للبيت

-بدلت ملابسي وغسلت وكعدنه نتغده 

-وخاچية سولفت الصار لجدي ولابوي وعمامي كلهم فرحوا بينا اني واركان 

شلون نخاف على بنات عمنه

-عدت الايام زينة وحلوة 

عمي باسم ضاج بس يكول//نعمة الحمد لله على اتمام الخلقة بس عبالي يجيني ولد 

وعدت الايام حلوة بوجود هالة جاهل جديد بالبيت 

امتحنا أخير السنة 

الحمد لله نجحنا انا واركان 

اني رحت للصف الخامس ابتدائي 

وهو راح للصف الثاني أبتدائي

فرح كبرت يمكن صار عمرها ٣ سنوات وشهور 

و منى سنتين وشهور 

و هالة بعدها صغيرة 

نلعب اني واركان وفرح و منى نلعب ونركض ختيلان ونضم نفسنا هنا وهناك 

أركان لكه على المغسلة 

موس حلاقة مستعمل 

وبقى الموس بيده يخوفنا بي واحنا نلعب ونركض 

هو مو متقصد بس باللعب وصارت 

ضرب فرح بوجهها بالموس

وهي تركض ودمها حار 

غرك وجهها وهدومها بالدم 

-اني شفت هيجي دم هواي 

واول مره اشوف هيجي كميه دم 

خربت ،،وروحي أنسحبت ......

شكرا لزيارتكم عالم روايات سكيرهوم