رواية أرض الخناجر الفصل الثاني والثلاثون بقلم ايلول
الليلة نتشابگ حدر فيّ الگصايب
يا اعز من الغرب ومن الگرايب .
══━━━━✥◈✥━━━━══
صــيهد:: مــيثم ومحمد هذول!!
طــروادة :: ركضنا اثنينا مسافة عنهم وگبل ما نوصلهم اعاين بريا اجه يركض شمر الملازم من أيده وكض محمد وي مــيثم يطگه، والوادم تفاكك بيهم.
صرنه بينهم اريد بس اكض مــيثم يتراجف ويصيح
-اذبحك أذبحك.
خزره صــيهد يصيح
صــيهد:: شبييك؟؟
محمد:: يله يله شكول كليه انتَ؟ همج رعيان.
طــروادة :: كضيت مــيثم حيل خاف يهد عليه نسيت الغضب الوراي دار على محمد طكه متسودن ويصيح
صــيهد:: السااانك اكصه انعل والدديك.
صياح وغلط والطلاب تعاين لمنّ الأمن سحلونه كلنه، وعلامات الاكس صارت تتراگع واكثر واحد تضرر مــيثم هوه بالشافعات رجع لوظيفته.
طلعنه أنا وياه گدام صــيهد وبريا نمشي للسيارة واحاجيه
-شبيك مــيثم عليمن تعاركتوا؟
-هيج خيولي!
يمشي بحرگه مايشوف گدامه سكتت منه يجوز محترك گلبه علمود بت عمي وليد، تونه وصلنه للسيارة وصيهد ورانه دفع مــيثم على السيارة حيل خازره ينتر
صــيهد:: عليمن تعاركتوا؟؟؟
طــروادة:: مو وكتها خل نرد للقرية وغاد نسولف.
صيح بصوت عالي ويدفع بميثم من صدره على السيارة
صــيهد:: لااا وكتهاا وكتهاا، گلي عليمن عاركته وخلني هسه اوديه لهله جنازه
شلت راسي اعاين خاف واحد يسمعنه.
مــيثم :: لا تلح عوفني ماكو شي گتلك.
صــيهد :: عليمن تضحك انتَ؟ يشهد الحسين احط بيك راشدي وجهك افره، احچيييي احجي عليمن عاركته.
مــيثم :: گتلك هيججج هيج انا مسودن وعاركته.
صــيهد:: لااا مو مسودن كلنا مسودنين وبس انتَ العاقل بينا هسه تحجي عليمن عاركته.
سكت مــيثم وصيهد قافل احاجيه بريا حاجاه بس خل نرد للقرية وغاد اسأل ولا رضى لو اطكك لو تگلي عليمن عاركته حتى اكتله عاينت الميثم من ضحك عرفته شراح يحجي عاين الصيهد مبتسم رگاله
مــيثم :: كرهته وسويتلي عركه وياه بس حتى اطگه.
عاينله صــيهد خازره كضيت ايده
طــروادة :: الووادم تعاين علينه.
صــيهد:: خير ان شاءالله مــيثم خير ان شاءالله امشي وحسابك غاد.
حجاها وراح لسيارته صعدت وي مــيثم وبريا لمن ردينا للقرية تلاكه ويانه شعلان صاح على مــيثم امشي للگيعان هز راسه خوش وگاله
-بس ابدل واروحن.
حجاها ومشه البيتهم وشعلان يعاينلي ضليت واكف عاجز الگه كلمة توصفه يعاينلي ويضحك توه يحجي عفته ومشيت للبيت.
بس ذبيت ملازمي وطلعت من وره السياج رحت لبيت عمي شاكر طبيت للحوش يحجون اثنينهم بالروسي دكيت باب الهول فحته الي بريا
مــيثم:: طــروادة رحمه الابوك عوفني ما اريدن احجي.
- براحتك بس اجيت اكلك انا وياك لان متأكد لو ما محمد غلط انتَ ما تعارك.
كعد وجهه ما يكصه السيف عاين البريا وبريا هم مدري شماله مشه للحمام ضليت گاعد يم ميثم ساكت مسح وجهه بحيرة حطيت إيدي على چتفه
-هونها مــيثم!
مــيثم::مالازم تاخذ محمد.
-لا تتسودن شني السالفة؟
-مو زلمه چنت عبالي زين طلع خنيث ماعده كل غيره.
-شگاعد تحجي انتَ؟؟ مــيثم شسوه سولف سووولف
مــيثم :: صوووتك ما اريدن بريا يسمع لا يحجي يم صــيهد واذا صــيهد سمع يكتل محمد موت.
طــروادة :: تحجي لو انا الاروحن اكتله؟؟
مــيثم :: عاين احنا مانداوم بنفس الغرفة كلمن بمچان صدفة نلتقي بس صاحبي ريسان وياه بنفس الغرفة اليوم كاعد اشتغل واجه ريسان يمي گال شني مطين مره لمحمد گتله اي سكت الولد بس بحلگه حچي لحيت عليه گال يابه هذا من امس لليوم يحجي بيها ومراوي صورتها لصاحبه وصاحبه يگلهم لا خوش ذوق يستعررررض بيهااا!
عفته وگمت اركض جراني دفعته رجع جراني
مــيثم::اووكف لا تندمني لان حجيتلك يكتله صــيهد والله يكتله موووت.
-وخررر ساكت ساااكت انتَ خله يكتله.
-هوه شنو الخل يكتله لعبة هيه؟ هذا ينسجن وعمتي ام صــيهد تموت من القهر هم ابنها وهم ابن اختها اكعد بالعباس اضل كلشي ما احجيلك.
طــروادة:: شتررريد شتريد تضل ساكت لمن البنيه تتورط بواحد ماعده غيرره؟
-لا انا الكالي حل اشوفن شلون اقنع صــيهد يبطل.
درنه اثنينا من انفتح باب الحوش سكتنا طب صــيهد الهوه ماتارس خشمه عبر من يمنا كعد على القنفة وأشر الميثم تعال مشه مــيثم كعد كدامه على الطبله
صــيهد:: سولف!
مــيثم:: هيج انا ضايج منه يضحك وي النسوان وهوه محاجيكم على آختكم.
صــيهد:: عاين مــيثم حبيبي لو تحطلك الف چذبة هم اكشفك احسن الك والي احجيلي السبب الحقيقي وخل اروحن اكتله لا تلعب بأعصابي هنه ضالات خيط احجي سولف شني الخلاك تتعارك وي القندره وتطكه.
طــروادة:: واحد مو ادمي شني تطيه اختك؟
دار مــيثم خازرني يريدني اسكت وصيهد جراه من ياخته
صــيهد:: احجييي شمسوي؟ احجي.
مــيثم :: ما مسوي شي بس بطل لا تطيه اختك.
جريت مــيثم من ايده ضل يفتر مثل المسودن، طلع بريا من الحمام عاين عليهم گال الصيهد
بريا:: لا تتعب، المطي يحجي وميثم ما يحجي.
صــيهد :: يشهد الحسين اذا ما هسه سولفت محمد شمسوي هالشهر ازفله اختي.
صيح بغضب وميثم تسودن وصيهد عاند عافنه وطلع
مــيثم:: يعااند على حساب حياة اخته؟؟؟؟
طــروادة :: انا لو عليَّ اگله ومحمد ما اعديها اله وين ما اكضه اكسر رجله.
صفگلي محترك گلبه ووجهه أحمر
مــيثم :: عفييييه عفيه انتَ هم طكه حتى صــيهد يتسودن فد مره.
هستوني احاجيه ودك تلفوني
-الو!
رنـــه :: طفيت الطباخ وحاجيته
-تجي لو لا متنه من الجوع وين رحت؟
-صبي هسه جاي.
رنـــه :: سديت التلفون منه رديت خابرت عبود
-الو تعال تغدا.
-راح اتغدا يم سجاد ببيتهم!
-يجيك طــروادة انه مالي غرض يطيح حظك ترى.
سد التلفون بوجهي وانه بعدني بهدوم المدرسة اركض بالمطبخ، طفيت الطباخ وركضت للغرفة حسين يصلي وزهره بالهول تعاين افلام كارتون، حسيت حسين اعقل مني اول ما اجه سبح وصله وانه فضلت اطبخ يله اصلي، بدلت توضيت ومديت سجادتي اصلي طب طــروادة عاينلي صحت
-الله اكبر!
طــروادة :: شني؟
-الله اكبر.
تلفتّ بالبيت سجدت. وگمت طب وراه عبود اثنينهم واكفين بباب الغرفة وبكل تكبيره اصيح بصوت عالي
-الله اكبر.
عبود:: نطفي الجدر؟
-الله اكبر.
طــروادة :: نشغل الماطور؟
-الله اكبر.
عبود:: الله أكبر على راسج شتردين؟
عضيت اصبعي أأشر على المطبخ اريدهم يصبون
-الله اكبر.
طــروادة :: الجدوره طافيه شنسوي؟ نجيبلج المطبخ؟
رنـــه :: بس كضيت الفرض الاول صحت
-الله اكبر، نعلعله صبوا الغده.
عبود بساع تمدد بالهول وصاح
-انا گـــلبي يوجعني خل طــروادة يصب.
طــروادة :: ولج هاي النعلعله عليمن؟
-مو عليك على الشيطان، الله اكبر
وكفت أكمل صلاة، وهوه سحل عبود دفعه للمطبخ حتى يصب بين ما هوه يصلي، كضيت صلاة ورحت وره عبود للمطبخ گال
عبود:: اكلج شني لعبتي رواحنه يوميه مرگه وتمن؟
حاجاني وابتلى على روحه اكلته اكلته
-فوگ ما اطبخ واتعب ارد من المدرسة اركض للمطبخ ماعاجبك انتَ كلشي ما عاجبك شسوي ما يعجبكم، ليمت مسويتلكم مرگة وتمن هوه بس هذا الاسبوع؟
احجي احجي وهوه كاض طاسة الزلاطة ساكت وطرواده ضل يصيح
-الله اكبر.
عبود:: حقج باجر تجين تلگيني انا مسوي غده.
-شتسوي؟
-هم مرگه وتمن چا شسوي؟
حجاها وضحك طكيته اكمل صب شال گعم مال باذنجانه من الجدر اكله وهوه واكف يمي ويگلي
تستمر القصة أدناه
عبود:: بس رنـــه لو تبطلين مرگة البيتنجان والله تلعب الروح.
-يله شيل الصينية.
اخذها وراح للهول، احذت دولكة ماي وسلة الخضره رحت وراهم كاعدين كلنا ملتمين على الصينية المرگة مآل استعجال مو كلش طيبه گوه أكلوها خافوا يحاجوني وادكلهم مناحه، لحد ما حسين گال.
حسين:: عمي اشتاقينه للسمچ هاي رنـــه تركض على البيتنجان حطته بالجدر وحطت عليه معجون.
طــروادة :: هههههه اليوم انصب الشبچ بالنهر وباجر نتغده سمچ.
ردت اعارك بس من شفت بيها يروح يصيد سمچ عقلت حتى بلكن ياخذني وياه لان اموت على الصيد.
كضينه غده كمت غسلت المواعين وطرواده سوه الچاي عبود كنس المچان الاكلنه بيه وبس شربنه الچاي جبنا بطاطين وتمددنا بالهول يم التلفزون بس طــروادة گال انا اروحن للگيعان، گمت وراه من سمعته يحجي بالحوش گبل لا يطلع.
وكفت يم شباچ الهول اعاينله واكف هوه وميثم بالحوش ما فاهمه عليمن يحجون اركز بحجيهم وماكو بس مــيثم اعصاب ويرجف وجهه احمر وطرواده يهدي بيه وهوه يگله.
مــيثم :: يعاندني يحلف هالشهر يزوجهاا.
-خيولي مو بكيفه يابه خلنه نحجيله السالفة انتَ هم تعاند.
وميثم مسح وجهه بحيره كلش محترك گلبه ويحلف بطرواده ما يحجي شي الصيهد گاله
طــروادة :: چا شلون؟
مــيثم :: ما ادري اهدده اكله اذا ما تبطل احجي الصيهد.
طــروادة:: ما ادري، خوش من تروح عليه گلي اروحن وياك وعلي اذا رحت وحدك !
وميثم هز راسه اي وطلع من بيتنا، طــروادة اخذ هاسكي وراح للگيعان، طفيت الضوه ورجعت تمددت يم زهره اعاين للتلفزون غير ولا گدرت انام ضليت افكر عليمن يحجون وليش مــيثم صاير عصبي، وين اكض بريا هسه واسويله لفة حتى يحجيلي.
شبگت زهره ونمت للعصر يله فزيت على فتحة باب الهول طب عبود
-شني رنـــه جا ليمت تدرسون؟
مسحت عيوني وگمت من الفراش كعدت حسين وزهره درستهم وانه يمهم اكتب كضوا دراسه وضلون يحرمصون
-سويله كيكه.
-عدي دراسة والله.
حسين:: شبيج رنـــه جوعانين.
طبگت الكتاب وگمت للمطبخ وهمه وراي يهوسون حسين راح يركض للدجاجات جابلنه بيضات منهن وزهره تدور بالكاونتر وتراويني
زهره:: هذا؟
-اي وبعد واحد اصفر .
دارت تدور بعد وانه حضرت طحين الصفر ضلوا كاعدين يمي صحنه العبود شغل الفرن لان اخاف منه يگب بوجهي، شغله النه وطب يسبح، حطينه الكيكه ورجعت ادرس كاعده يمها طلع عبود من الحمام مشيت وراه الغرفة طــروادة، فتح كنتوره يختارله قميص وانه واكفتله بالباب
-وين رايح؟
دار عليَّ وهوه يلبس بالقميص
-اطلع وي سجاد
-وين؟
-شلج غرض؟
-خاب گلي وين شمالك؟
ضحك وجاب المشط اجه يمي دنك كاض اركبه حتى الوح شعره
عبود:: مشطي شعري واكلج.
مشطت شعره وكاضته من وجهه افر بيه مناه ومناه وهوه يضحك
وكف عاين بالمراية
-يله گلي وين رايح؟
-مااالج غررض.
تخوصرت وهوه يضحك رش عطر واجه يمي يطك بيه
-بس لا تگولين گدام طــروادة خاف مايرضى عود بعدين
-احجي ما اگول
-گولي ولعباس.
-ولحسين ما اگول
-لا گولي ولعباس حتى اسلمج بأيده من تحجين
-خاب ما أحجي شمالك؟
-راح نشتري هدوم حتى گبل الزيارة بعشرة ايام نطلع مشاية انا وسجاد كون طــروادة يرضى.
-هسه هم يخليك تريد تسودنه انتَ ؟
عافني ومشه سكتت متأكدة طــروادة ما يخليه يروح يخاف عليه علمود گلبه، طبيت للغرفة شلت المشط احطه بكنتوره وبس فتحت الكنتور فتحت عيني حيل وغميت روحـــي من تذكرت الخنجر حسيت روحـــي صرت بين نارين اذا سولفت الطرواده يموت عبود يكتله حيل واذا سكتت هذا مانخلص من شره، اخذت الخنجر من الكنتور ومشيت بساع ضميته بهدومي كلت اخابر عفراء اسولفلها واشوفها شتگلي اسوي.
طلعت تلفوني من الكنتور بيه شحن ٩٩ خليته على الشحن حتى يصير ميه، مداريته وما اضل اللعب بيه هواي خاف يخرب مو مثل تلفونات اخواني جنت مطيحة حظهن واذا اكضهن ما اهدهن الا يصير شحنهن خمسه هسه تلفوني اذا وصل للخمسين اصيح راح يطفه، وشاحنته محد يشحن عليها زهره وحسين يتوسلون بيه علمود ينزلون بيه اللعاب ولا مخليتهم اكلهم تزلغون شاشته وذاكرتها تنترس .
واذا راد يطيح من ايدي يوكف گـــلبي وتلفون طــروادة من جان يطيح من عدّي ويطفه اذبه على الميز چني ما مسويه شي وما اهتمله بس هذا تلفوني حسيته ابني ضنايه شلون ما إداريه.
اخذته وطلعت كعدت يم باب الحوش افتح نت على بيت جدي بعيد گوه يوصلني ويضل ساعة يفتر يله يفتح ضوجني عفته
شلت البزونه بأيدي ومشيت للصخلة والدجاجات يفترن جوعانات الحديقة البالحوش خربنها وماضل ألهن اكل شلت راسي عاينت بره السياج يم الحرثة شكد حشيش بالگاع هسه كون اخذها اسرح بيها هيه والدجاجات هم اخليهن يفترن وارنوباتي، انفتح باب الحوش وطب طــروادة گبل گتله
-طــروادة ما تسرح بصخلتي؟ والله ميته من الجوع!
عاينلي وعاين للصخلة
-وين اسرح بيها؟
-هناه گدام بيتنا شوف شكد حشيش خل تاكل خطيه حتى ضعفانه.
-ردت ادرس، يله جيبيها.
-لا يله تولي عوفها روح ادرس.
-لا والله طلعيها هسه بس اجيبن ملزمتي واكعد يمها.
طب يجيب ملزمته وانه مشيتها هيه والدجاجات لباب الحوش اخذ ملزمته وكض الخيزرانه
-مو تطگهن طــروادة!
-لا بس اخوفهن.
طلعهن للــبستان گدام الحوش وانه اعاينله من فتحات السياج دار يعاين كاشفني، اجه يمي گال
طــروادة :: اكلج خاب انا جوعان ما تسويلي شي اكله حتى لو لفة!
-مسويه كيكه هسه تستوي واوديلك وياهاج چاي
-يله خوش جا تستاهلين اسرح بصخلتج.
ضحكت وهو رد يم البستان الصخلة تعوف الحشيش وتروح تاكل ورگ النبكه مدري شمالها، والدجاجات باظافر رجليهن ينبشن الگاع مدري شنو يطلعن من جواها وياكلن، اعاينله كاض ملزمته يدرس ويعاين عليهن .
اجاني حسين
-يله أستوت الكيكه
سويت چاي وطلعتها من الفرن كصيتلهم منها ومدحهم الها خلوني احس مسوية احلى كيكة بالعالم، كصيت بصحن الطرواده عفته على صفحة ومتانيه الچاي يكمل، طلعت اريد اعاينله ماثاقة بيه اخافن الصخلة تشلع گلبه ويطكها. من فتحات السياج عاينت شفته واكف ووياه مــيثم ووهب وبريا يسولفون والصخلة والدجاج گدامهم ياكلن، رديت للبيت زهره مبدله وكاضه المشط بأيدها تريد امشطها حتى يطلعون هيه وحسين يم طــروادة
نصيت الطباخ ومشطتها راحت تركض طلعت وحسين مطنگر لان گتله لا تطلع لمن يكضي الچاي اخذه وروح ضل يصيح
-يله يللله يله.
-ومرض بعده خفيف
-باچة مسويه باچة مو چاي.
طلع للحوش مطنكر شويه ورجع يمي لگاني حاطه صحن كيك واستكان چاي گبل صاح
-الولد واكفين يمه حطيلهم زحمه تحطين بس الطرواده.
-هاه ما أدرّي بيهم هسه احط بعد.
ضل واكف وانه حسيته مفشلني سكتت صبيت چاي على عددهم وحطيت صحنين كيك وديتهن بأيده، وركضت اعاينلهم حسين بس اطاهم الصينية وراح يلعب وي زهره وهاسكي يركض وراهم صوت ضحكهم عالي، والولد واكفين يعاينولهم وكل واحد بيده استكان چاي وياخذون قطع كيك من الصحونه ياكلون ويسولفون، عفتهم ومشيت ادرس.
""
وهـــب :: دفرت بريا برجلي اصيح عليه نسيت سالفته
-خاب اطي مجال ما اكلت انا شمالك؟
وهوه اخذ الصحن ووخر من يمي مايخليني اكل وياه، اريد اصيح عليه نسيت هاي الكيكة من حبيبة گلبه لمن شفت طــروادة شلون يعاينله يله تذكرت گاله
طــروادة :: على كيفك لا تغص.
مــيثم :: جوعان لان ما متغدي.
وهـــب :: شربت الچاي اضــحك اعاينله مديت ايدي للصحن طكاني حجيت بيني وبينه
-رنـــه الزعطوطه مسودنتك.
بريا:: سد حلكك هذا حاط دوبه من دوبي حتى لو اعاين لصخلتها يخزرني.
ضحكت حطيت الاستكان بالصينية ووگفت يمهم يسولفون على الدراسة گال مــيثم الطرواده
-اكلك اريد بعد چاي بس خاف اختك تضل تنعل بينا.
طــروادة:: لا شني السالفة معزبه رنـــه، تعال حسين اخذهن وگل الاختك تصبلنه بعد چاي.
اجه حسين يركض شال الصينية واجاه بريا حط الصحن بالصينيه فارغ وگاله
بريا:: أنا اريد بعد كيكه.
كحينه اثنينا انا وميثم، وطرواده خازره وهوه مسوي روحه مايشوف مغلس حسين اخذهن وراح للبيت ونسمعه من باب الحوش صاح
حسين:: رنـــه.
رنـــه :: شلت راسي من الكتاب لاويه وجهي متانيه يحجي طب والصينية بأيده گال
حسين:: تعاي صبي بعد چاي وبريا يريد بعد كيك.
-اهوووه شني السآلفة واحد مايدرس.
-يله لا تدردمين چنچ جده.
گمت اخذت الصينية منه وغميته طبيت للمطبخ اصبلهم بعد واحجي وهوه وراي يدافعلهم يغث بيه
-وعلي اذا رادوا بعد اشمر عليهم القوري.
-غصباً عليج تسوين غير طــروادة يكضج ويكتلج، وبعد لا تحجين عليهم لا اموتج.
-اكل تبن لا احط القوري براسك وراسهم خل واحد يگول بعد اريد چاي اذا ما افشخة.
كصيت شويه كيكه لان كضت وانه ما ماكله منها حطيت الصينية بأيده طلع وهوه يمسلت رديت ادرس محترك گـــلبي لان ما أفهم بسرعة.
وهـــب :: اخذنه الچاي وبريا اخذ صحن الكيك كعد على بلوكه واستكان الچاي يمه، عبر ســليم من گدامنه مايحجي زعلان وي طــروادة وهوه مشه جراه وشبگه يحاجيه
طــروادة :: انا غلطان بحقك واعتذر بس لا تدير وجهك من تشوفني تمرد گـــلبي.
مــيثم :: ســليم مال زعل هيه؟
ســليم شبگ طــروادة ساكت جابه طــروادة يمنه وصاح على حسين حتى يروح يجيبله استكان چاي وحسين من بعيد صاح
حسين:: ما ترضى رنه والله تضل تحجي توها شگد دردمت وردات تكتلني تگول عليكم ماشايفين چاي واذا بعد ودوا على چاي احط القوري براسهم.
طــروادة خزره متفشل وأحنا نضحك مــيثم دنك كاض ضحكته كوه شرب اخر شي من الچاي وهوه يگله
مــيثم :: الله يسلمها كلش معزبه!
ســليم :: ما اريدن چاي انا توني شربت گبل لا اطلع.
وهـــب :: طــروادة ضاج بساع غير السالفة حسين وده المواعين للبيت ورد يمنه هوه وزهره يلعبون وي هاسكي، وصخلة المسودنه اخذها الواهس ضلت تكمز وتركض مناه ومناه بريا راح وراها جابها، ضلينه يم طــروادة للغروب يله طشينه.
انا وميثم رحنا للگيعان بمچان سلطان وصيهد، وهم لگيت صــيهد وميثم محد يحجي وي الثاني ومايرضون يسولفون ليش متعاركين عفتهم مالي خلكهم أثنينهم .
""""
جــويريه:: التناسي اصعب من الاداراك، محاولة تجاهل ألأفكار وعدم الالتفات للمواجهة اصعب من المواجهه بحد ذاتها.
اشغل نفسي عن قصد أشغل فكري وكل حواسي بس حتى ما افكر باللي عشته ما اريده يخطر ببالي وكل يوم احس بروحي اتعس من اليوم القبله كلشي ينكبت بداخلي، وكل ما اصفن يجي الراسي مثل الصوت ابوج عافج اللي لازم تحتمين بيهم همه الكسروج.
وبسرعة اهز راسي وافتح الكتاب اقرأ اقرأ حتى لو بدون فهم المهم گـــلبي وعقلي ما يرجعون لهذاك اليوم مايرجعون النفس اللحظة واني امشي على حافة الموت.
بس هاليوم ماگدرت هاليوم حتى عقلي وگف ضدي وكأنما يگلي هاي هيه انتِ انهزمتي تقبلي الواقع العشتيه تقبلي هزيمتج من اهلج من ابوچ واعمامج، وكل ثانية يذكرني بموقف واشرد منه افكر بشي ثاني بسرعة افكر بدراستي لو احجي وي مــاسه بس حتى عقلي مايرجعني لهناك.
وماگدرت ماگدرت اشرد اكثر من هيج اذا سكتت ثواني تتزاحم الافكار والحجي والمواقف براسي عبالك كاعده بزاويه واباوع للي عشته ينعاد گدام عيني، استسلمت العقلي وهوه يرجعهن موقف موقف، واجاني صوت جده من جوه تصيح
-وولج جــويريه هلاه
مسحت وجهي بساا وطلعت مديت راسي
-ها.
عضت ايدها بحرگه متحلفه
-تعاااي انزلي انه موس گتلج اغسلي هدوم جدج.
نزلت بساع وصلت يمها اريد ادخل للحمام طكتني على ظهري حيل دخلت طلعتهن من الغساله حولتهم للنشافه وهيه واكفتلي بالباب تغلط شغلت النشافة صار صوتها عالي غمضت عيني براحه من گمت ما اسمع غلط جده، عافتني وراحت، اخذتهن اطيتهن الام صــيهد تشرهن وضليت وي البنات بالمطبخ اگلي وي مــاسه وبدور للعشا لان رغد متمرضه گوه تكوم من فراشها.
حطيت الصينية على الكاونتر اخلي بيها خبز ودرت على الباب من انفتح طب صــيهد بعصبيه رگع الباب رگع عاين الماسه گالها
-جيبيلي زقنبوت غاد ما اريدن وياهم.
هزت راسها خوش دار يريد يطلع ورد التفت عينه بس على مــاسه گالها
-امج وين؟
وعمه وراه اجت گالتله
-هاه؟
أشرلها تروح وياه اخذها وراح للمشتمل گالت مــاسه
-جوري حطي صينية صغيره واخذي من الصحونه خل اوديها اله.
هزيت راسي اي اسويله عشاه وحده شوية وطبت امه باوعت ألماسه گالتلها
-يگول صــيهد بفرحة الزهره تعقدين انتِ ومحمد.
وماسه تباوعلها ساكته. دارت للطباخ تگلي وكوه لازمه ضحكتها بس امها ضايجة ما اعرف على شنو، كملنه العشا وهيه خافت تروحله باوعتلي هزيت راسي لا
-اني شارده من عنده وانتِ تردين توديني عليه.
مــاسه ::بــدور انتِ حبابه والله انه اذا رحت يسألني ألف سؤال
بــدور:: والله ما اروح لو مدري شيصير اخاف.
وماسه بقت تحجي بحرگه لفت شالها عدل تريد تاخذ الصينية
-عوفيها اني آخذها .
-لا عليمن انه رايحه بس هاي الخنيثة بــدور ام خنيس اذا ما اگله عليج ام الصفاره.
مسحت وجها بحرگه اخذت الصينية وراحت وبدور طنگرت وحدها وماسه بساع رجعت گالت
-ماحاجاني شي همزين.
سكتت وهيه بساع صالحت بــدور ما تگدر تخليها زعلانه وره العشا هنه بقن كاعدات ياكلن واني كمت غسلت وحضرت الاستكاين حتى اصبلهم اجه هوه جايب الصينية حطاها على الكاونتر غسل ومشه يريد يطلع وصل للباب وگال
-چاي.
حجاها وطلع لمحته كعد بباب المطبخ يدخن، صبيتله كلاص ومديت ايدي من الباب
-صــيهد.
التفتلي بساع طفه الجكاره ووگف اخذ الكلاص من ايدي مايباوع لعيوني أشر براسه تعالي بس ما متأكده، سألته؟
-هاه؟
-تعاي.
باوعت الدشداشتي وهوه مدنك گال بهدوء
-عدلي حجابج وتعاي.
لفيت شالي عدل وطلعت يمه أشر على الزاويه اللي مابيها ضوه
-اوكفي هناه.
مشيت وگفت يم حايط المطبخ بالظلام وهوه ضل يم الباب بالضوه، اطكطك بأصابعي واباوعله منتظرة يحجي شنو يريد حتى ارجع، دنك شرب چاي سند ظهره على الدنگة مال الباب گال وهو يباوع گبل.
-جاوبتي بالامتحان؟
-اي.
حجيت اباوع لوجهه سكت عينه بكلاص الچاي شرب اخر شي منه ودار لداخل المطبخ گال
-مــاسه هاج.
ماسه اخذت الكلاص منه ورجع النفس الوگفه يدخن لا هو حاجي ولا مخليني ارجع شويه وگال
-شبيج؟
-اني؟
-اممم.
رفعت اكتافي احجي
-مابيه شي
-شو ضايجة؟
حجاها ودار يباوعلي مضيك عينه مسحت وجهي وأجر بالردن على ايدي اهز راسي لاا
-ماضايجة.
هز راسه خوش حجيت بصوت يرجف
-بردت راح ادخل.
بقى ساكت واني واكفه بمكاني ما ادري ابقى لو اروح، خليت ايدي على زندي امسح عليه ادفيها لان هوا بارد وصوت السعف من يتحرك احس افكاري مثل السعفه بالهوا تروح وتجي.
درت وجهي بشهگه اباوع للنخل من سمعت صوت البومه فاتحه عيني كلها وابارع بتركيز ما اشوفها بس اسمع صوتها وينتقل من مكان المكان واني عيوني تعلكن على النخل بس اباوع واركز اريد اشوفها وينها منا لمن حسيت صوتها يمنا كلش والمحاها على النخله اللي بالحوش، اباوعلها بخوف وگلبي يدك حيل.
ما تباوع لجهتي تباوع لصيهد وهوه هم يباوعلها الضوه مال البلوجكتر مقابيلها مبينه كلش واضحه واول مره اشوفها بهالوضوح وفجأة حركت بس راسها دارت عليَّ وفتحت عينها صفره تلمع نز جسمي بفزه راجعه ليوره بخوف دار عليَّ باوعتله امسح وجهي بأيد ترجف ميل راسه على جهه مضيك عينه وعاكد حاجبة
صــيهد:: تخافين منها؟
بلعت ريك اهز راسي اي
-احجي ما اشوفج زين!
-اي اي تخوّفني هيه.
دنك يهز راسه اي وهيه كل شويه تنعب وتخليني غصب عني جسمي يفز اباوعلها بخوف، رجع باوعلي گال بهدوء
-ماتخوف.
-اني اخاف منها اكرها.
وگف عدل وتقدم يمي صارت مسافه بيني وبينه وهم سند ظهره على الحايط يباوع للنخله ويحاجيني، جر نفس من الجكاره زفره وگال
-حبيها!
-كلش اكرها.
احجي واباوعلها عينها عليه ومن تريد تدور علي ادنك بسرعة اخاف من عيونها گال
-تحبينهاا!
درت عيوني اله مافاهمه ذب الجكارة بالگاع داس عليها وهوه يگول
صــيهد:: اريد تحبينها لان أنا احبها!
زفرت نفسي بحسره گـــلبي يدك حيل ورغم البرد احس بروحي عرگانه ومن خفت حيل عرفت روحـــي اخربط بقيت احجي كلمه كلمة
-ما احبها، اكرها.
تقدم بساع يمي رجعت ليوره بخوف ورافعه راسي اباوعله
-تعلمي تحبينها!
هزيت راسي لاا ودنكت اجر برداناتي على ايدي وهو يردد يم اذني
صــيهد:: گولي احبنها.
رجعت احرك راسي لا واحجي بداخلي ما آحبها مد ايده بسرعة لزم وجهي يرفعه عيني صارت بعينه مد ايده الثانية فاتحها وبنفس اللحظة صارت البومه على ايده شهگت ودفعته مبتعده اصيح
-روخهااا تخرف تخورف.
-اششش ما تخوف، ما اوخرها عاينــي
كعدت بالگاع وغطيت وجهي بأثنين اديه روحـــي رايحه گال
-كومي راحت.
فتحت عيني وشلت راسي اباوعله واكف گدامي وهيه مدري وين راحت مسحت وجهي اتلفت بعدني خايفه
-گومي.
وكفت وعيني مو عليه بعدني اتلفت اباوع للنخل وللسياج
صــيهد:: اشش عاينيلي راحت.
باوعت بوجهه صوت نفسي عالي مرعوبه عكد حاجبه
-ماتاكلج عليمن تخافين منها؟
يحجي واني ساكته بس اريد ارجع ادخل للبيت باوعت لعيونه
-جنها جني
-البومه؟؟؟
هزيت راسي اي ارتفع شاربه عبالك يريد يبتسم وفتحت عيني حييل من سمعت صوتها وره ظهره كلش وعيني على كتفه وهيه من ظهره صعدت الحد ما وگفت على كتفه.
تخبلت جريت اديه من بين اديه وركضت للبيت بخوف، غسلت وجهي بالسنك ايدي ترجف واغلط عليه بگلبي متورطه وي بشر ابد مو صاحي، بعدها الرجفه مارايحه مني وجده صاحت عليَّ.
مسحت وجهي ورحتلها الغرفتها بس دخلت سدت الباب واجتني بسرعة لزمتني من زندي كارصتني وتضربني بحرگه
-عايبه انا شگتلج؟
واني مافاهمه شي بس لازمه بأيدها واحمي وجهي من راشدياتها شالت اديها اثنينهن ضربتني حيل تغلط
-بت الفگر وولج صرتي لعبه ياهو الاجه لعب بيج وعافج ، اذبج ويردونج على گلبي، ووولج صــيهد ضال يلعب عليج وولج ماتاخذين حچايتي.
اشهك بأيدها بلا دموع واهمس
-لاا والله لاا.
رجعت ضربتي وجرت شعري بغضب
-ما يريدج بعد ضال يلعب عليج ليمت ما مل يذبج على گلبي، صايرة. مرتع للزلم بت نضاااال ياهو الاجه وكضها بوويه يكون اذبحج مايبرد گـــلبي .
غمضت عيني گـــلبي احسه يدك براسي وصوت جده مره اسمعه مره يصير وشه بأذني طحت من أيدها للگاع لزمت راسي بأيدي آريد اركز وهيه فوگ راسي تغلط وتسب، الحد ما انفتح الباب ودخلت رغد.
رغد :: اخر مره تحجين وياها والقران اسولف الصيهد اخليه يگلبها عليكم مو ليلة جحيم.
تحجي بغضب وجده طگتها دنگت رغد ما مهتمه جرتني من ايدي توكفني وجده تضرب بيها
-رغيده وبوفاضل لخليهم يكسرون ظهرج.
-ميخالف جده اكسريه.
حجتها وطلعتني من غرفتها سعاد كاعده بالهول تباوع بشماته مشيت للحمام غسلت وجهي واني الشهگه شگت صدري تمنيت ابجي حتى تروح النار من صدري حتى الدموع عاندتني، بقيت بالحمام وكل شويه اغسل وجهي ورغد واكفتلي بالباب الحد ما دخل وهـــب يريد يروح الغرفته وشافنه
-شبيها مرت صــيهد؟
ورغد تنتر بغضب من بين اسنانها
رغد:: والقران احجيله ومحمد احجيله بس يضلون يسوون بيها هيج احجيله واخليه يطيح حظهم من چبيرهم لصغيرهم.
وهـــب :: اشش بس صوتج عليمن شصاير؟
دارت وجها رغد الي محترگ گلبها
-شني السالفة رغد؟
-ما يتزوج صــيهد شمتاني؟ شني المن عايفها يم جده حتى تغث بيها وتموتها؟
-غير محرم!!
اشرتلها أسكتي جراها وهـــب لغرفته يحاجيها، مسحت وجهي وصعدت فوگ مختنگه گوه أتنفس والبنات انصدمن بيه عبالهم صــيهد محاجيني اشرتلهن لا وكعدت صوت نفسي عالي گوه اجر النفس، كتابي بحضني بس اريد انسى حجي جده اريد اشيله من بالي اني مو لعبة الاحد ولا بعمري راح اصير هيج،
الغصه خنگتني وخرت الشكاله من شعري واحسه خانگني اوخر بيه مناه ومناه باوعتلي مــاسه
- اظفرلج كصيبه؟
هزيت راسي اي، جابت المشط واجت كعدت وره ظهري غمضت عيني وهيه تمشط شعري وتحجي وياي
-شبيج مقهوره جوري وجهج اصفر؟ حاجاج صــيهد؟
زفرت نفس بحسره اهز راسي لا
مــاسه:: عاينــي انا صدك اخاف منه بس والله علمودج اوكف بوجهه كلشي ولا انتِ.
حجتها وحضنتني من وره
-تعبانه اني مــاسه اتمنى، اتمنى انام وما اگعد.
بــدور :: اسم الله انجبي انجبيي.
حجت واجت يمي اثنينهم حاضناتني واني احس بروحي وسط نار احترك ومدري شنو اليطفي نار گـــلبي
مــاسه :: لا تحجين هيج جوري والله انتِ اختنا الرابعة ونموت عليج.
سكتت مدنكه ظفرتلي كصيبه وتنزل بكذلتي مبتسمه
-تخبلين يله ادرسي ادرسي وانسي كلشي.
هزيت راسي اي كاضه الكتاب وما اشوف شنو المكتوب بيها حجي جده يدك بگلبي ساعات مرن واني بنفس الصفحة الحد ما مــاسه اخذت الكتاب من عندي گالت
-كافي يولي وجهج صار اصفر نامي
تمددت بلا ما ارد احس شي ببلعومي خانگني دموعي مدري الحجي النايم بگلبي، طفت الضوه وتمددت يمي تحجي وياي الحد ما غفت واني عيوني جافاها النوم ، گد ما عقلي هوسه وحجي متزاحم كمت ما اركز ما اعرف بشنو عقلي يفكر.
گمت من يمهن لبست شالي ونزلت طلعت من البيت اروح المكاني اكثر مكان اخاف منه واكثر مكان ابجي بيه وارتاح، كعدت صافنه ودموعي نزلت بلا صوت كل مره اعاتب احجي وي روحـــي هالمره حتى حچي ما حچيت ماكو شي يعبر عن البداخلي وعبالك كل ساعة ابجي على جزء عايشته الحد ما وصلت لمواقف ابوي ضميت وجهي بأيدي ابجي بحرگه لو هالغدره من غريب والله ما تقهرني هيج والله ماتقهرني مثل قهري هسه جا هانت على گـــلبي ونسيتها.
بچيت بحرگه روحـــي رايحه واول ما مسحت دموعي سمعت صوت البومه تلفتت ما ادورها ادور القرين اباوع بكل مكان بين النخل وبصفي ووره السياج ماشفته گمت بسرعة مسحت دموعي ومشيت وهيه سكتت، فتحت باب الحوش ودخلت سديته وراي على كيف واول مادرت لمحت صــيهد واكف بباب المشتمل لابس صروال وفالينه تعلاگه سود وجكارته بأيده بقيت وأكفه بمكاني تمنيت مايحاجيني البيه كافيني.
أشرلي بأطراف أصابعه تعالي، مسحت عيوني ورحت قبل ما أوصل يمه دخل للمشتمل وعاف الباب مفتوح زفرت نفسي روحـــي رايحه خاف بچيت شويه حتى ارتاح هسه راح يرجعلي نفس الخنگه، دخلت وراه امسح بعيوني حييل ما اريد ابين باچيه، دخل للغرفه واني سديت باب المشتمل باوعت للمراية اللي يم الباب عيوني منفخة وحمر دم مبينه شكد باچيه.
غمضت عيني گـــلبي يدك حيل هسه يحاسبني لان طالعه وهيج وكت برا السياج وبلا عباية، رجع فتح باب الغرفة درت عليه اجاني بسرعة لزمني من ايدي وسحبني للغرفة بكل خطوه روحـــي تروح وگلبي ينتفض دخلني للغرفة ودار يقفل الباب ويحجي
-ليش بره بهيج وكت؟
ابتعدت ساكته دار علي، واني بس امسح بوجهي حتى ما ابين باچيه همست وصوتي من البچي مبحوح
-هيج.
تقدم خطوة ورجعت خطوتين
-شلون يعني هيج؟
طخ ظهري بالحايط بين الميز والكنتور حطيت ادي وره ظهري اباوعله رفعت اكتافي ما ادري ودنكت عيوني متروسه دموع وكف گدامي بيني وبينه خطوة
-ياهو محاچيچ وليش طلعتي؟
-محد!
حجيتها واني مدنكه دموعي نزلن مسحتهن بسرعة ومدنكه حيل مد اديه اثنينهن لزم وجهي بين جفوفه رفعه غمضت عيني حيييل ودموعي غصب عني ينزلن.
صــيهد:: ياهو بچاچ؟؟
هزيت راسي محدد، حرك وجهي بيت اديه يحجي بحرگه
-فتحي عييينج.
فتحت عيوني ودموعي وحده وره الثانية مسحتهن بسرعة وعيني بعينه ثواني باوعلي وعاف وجهي ابتعد منطيني ظهره
صــيهد:: ليش تبچين؟
-هيج، بوحدي ابچي!
صوتي رايح ومن احجي الكلمة اغص، زفرت نفس اريد بس اسكت وهوه يدور على باكيت الجكاير مشه للجراره فتحها اباوع الزنده صقر مرسوم عليه مثل دكّ النجمة البصدري ، طلع جكاره شعلها ورجع وگف گدامي مضيك عينه
صــيهد:: تردين ابوج؟؟؟؟
سكتت صافنه بعينه وگلبي يدك حييل حسيت واحد يشمرني على واحد وكلها ما تريدني.
-ابوچ المابراسه غيره عار المثله كون يطم روحه.
دنكت اهز راسي اي موافقة على كلامه اليحجيه بس اريد يعوفني ومايحجي اكثر ما اريد يضغط علي
-مابيهم زلم لا اهلج ولا عمامج خناااث لو اكتل منهم مية واحد مايبرررد گـــلبي.
شهكت روحـــي رايحه وخرت من گدامه اريد اطلع سحبني ودفعني النفس المكان
-ترررردين ابوووج؟
هززيت راسي لا اكح وايدي على صدرري
-عوووفني.
-ليش ما تردينه؟
حطيت ايدي على گـــلبي مختنگه وعيوني متروسه دموع
-اختنگت خلّ آروح.
-ما ترحين اختنگي يمي مو وحدج.
كعدت على حيلي جاره رجليَّ الصدري وهوه يحجي سديت اذاني بچيت بحرگه
-ما ارررريدهم ما اريدهم.
-ليشش مو همه اهلج؟
غطيت وجهي بأيدي روحـــي مفرفحة ابجي بصوت واحجي بحرگه وحچيي نصه ما مفهوم بس احجي احجي لان ادري بيه يفهمني، كعد كدامي جراني من ايدي الصدره حاضني .
-بااعني ابوويه باعني بهذلني، شمرني هنا واني شكد توسلت بيه بس خليني يمك خليني ما اريد بيت جدي ما قبل لان زوجته ما تريدني شمرني هناه وراح ما مهتم عبالك شي زايد عليه، وكل ما يجي اتوسل بيه يرجعني وياااه اتووسل خلاني اتوسل يابه بس رجعني يمك اني هنا انضرررب هنا انهان كل يوم ،كال اذا ارجعج الا تتزوجين ابن عمج وهوه يدررري يدري بيه يتحرش بيه من واني طفلة يدري بيه شكد اكرهه وما اهتملي ما حن گلبه علي بهذلني، لا عافني عنده ولا عافني هناااه يوم يشمرني عليكم ويوم ياخذني يفتر بيه ببيوت اعمامي لان زوجته ماتقبل ابقى وياها بنفس البيت، شنووو ذنبي شنوو ذنبي تعبـــت والله تعبـــت كلكم تأذوووني تعبتتتتت تعبـــت .
احجي وروحي رايحه واحس بأيده تحضني اكثر وتلمني الصدره اقوة ما گدرت اسكت دموعي ما وكفن صعب العشته صعب گـــلبي وروحي مكسورات، بالغرفة بس صوت بچيي وهوه ابد ماحجه شكد ما بچيت بقى بس لامني الصدرة بكل حيله حاضني، شلت راسي أريد ابتعد اناشغ والدموع مغرگه خدي.
وكف وياي لازمني من ايدي
صــيهد:: تعاي.
-ار. ارووح.
وهوه ما مهتم سحبني للچرباية وغطاني كعد بالگاع گدامي ومد ايده الوجهي يمسح دموعي
-اشش كافي ارتاحي.
واني عبالك مجمعه بچي مال سنين گد ما بچيت بقيت اكح جر الشال من عندي وخره
-جوري عاينــي عليَّ كافي عيــونج نمردن.
-مختنگة.
مسح دموعي ورفع ايده يمسح على شعري
-انا يمج.
باوعت لوجهه عيوني ذبلانه وصوتي رايح وكل ما تنزل دمعه يمسحها عينه بعيني الحد ما هدأت شويه وهوه باقي على كعدته بصف الچربايه واني ايدي جوه خدي اباوعله، وخر شعري النازل على عيني غمضت گال
صــيهد :: ضلي يمي وفنهم الوصلوج.
فتحت عيوني اباوع لعيونه حمر ومركزات وي ايده اللي تبعد خصر شعري من وجهي همست بصوت مبحوح
-انتَ أولهم!
باوع لعيني رمشت مسح الدموع الجوه عيني
-انا مأذيج؟
حركت راسي اي ضيك عيونه. دار وجهه ومد ايده يجر باكيت الجكاير شعل جكاره ورجع النفس المكان غمضت عيوني اتنفس بقوة حسيت شي من گـــلبي طلع.
صــيهد:: تحسين روحج تورطي وياي وبنفس الوكت ما تردين تعوفيني لان مو بأيدج وتخافين تنشمرين على واحد اتعس مني مو؟
فتحت اباوعله خله الجكاره بين اصابعه ومدهن لشعري يمسد عليه همست
-اي.
-گبل چلبتي بيه بس حتى احميج ومن ماحميتج گمتي تحسيني لا شي وجودي وعدمه واحد مو؟
سكتت عيني بعينه وهوه عيونه وي ايده اللي على راسي رجعها الحلكه جر نفس من الجكاره ونفسها الايد اللي بيها الجكاره تمسد على راسي احس شعري كله صار ريحة دخان باوع لعيوني منتظر جوابي حركت راسي لا
-بعدني محتميه بيك!
ضحك باستهزاء ورجع يدخن ويباوعلي غمّضت عيوني ورجعت فتحت جر اخر نفس من الجكاره طفاها وتقرب يمي زفر الدخان وجر الغطا عليَّ يغطيني زين
-نامي.
بقيت مفتحه عيني اباوعله خله ايده فوك عيوني سداهن وحسيت بشفايفه على كصتي ورگبته احسها بوجهي باسني وبقى ثابت بمكانه گـــلبي يدك حييل منتظرته يبتعد وخر شفته وگال.
-نامي مرتاحة وانا اسهر ملوع.
وبس وخر ايده فتحت مافاهمه كلامه طفه الضوه وعاف ضوه خفيف رجع يمي
-ليش ما تنامين؟
-اريد اروح يم البنات.
هز راسه لا ويتلمس بخدي
-نامي هناه وانا أطلع بره.
سكتت كعد كدامي على طرف الچربايه
-غمضي جــويريه!
نگلبت على ظهري وغمضت عيوني مد ايده يم بطني فتحت بسرعة وهوه رفع الغطا يقربه إلي اكثر عكد حاجبه من فزتي
-يله نامي حتى اروحن.
رجعت غمضت وادري بيه يباوعلي من ريحة الدخان والعطر اليمي، الحد ما غفيت.
"""
رغد:: بالي يمها، شفته من صاحلها خفّت يحاجيها لان طالعه بره بس ما گدرت اتدخل بينهم، ضليت بالمطبخ الوب مقهوره وكل ساعة اعاين من الشباج مناه لمن شفته طلع واجه باتجاه البيت، مشيت اركض طبيت للغرفة وتغطيت بفراشي فتح باب الغرفه ومن الباب يهمس
-يمه، يمه.
فزت امي مخروعه
ايمان:: هاه يمه هااه.
ضل ساكت وهيه كعدت على حيلها گالها وصوته مخنوگ
صــيهد:: تخليني على رجليج راسي حيل يوجعني.
ايمان:: يا يمه سوده بجهي تعال يابعد حيلي.
اعاينلهم مطلعه بس عيني من الغطا طب للغرفه تمدد وحط راسه بحضن امي وهيه تبوس بيه وتحجي وياه
-شبيك يمه عليمن ضايگ خلگك؟
وهوه ساكت ضلت تحجي وياه وتقرأ على راسه شويه وگالها.
صــيهد:: اموتن من احط عيني بعينها، تكرهني ورضت بيه بس حتى احميها تالي لا انا الحميتها ولا انا الهادها ومفتكه مني.
ايمان:: انسى يا يمه وخل البت تنسى، لو ضلينه نعيد بنفس السالفة ونلوم بروحنا جا متنا، هج الحياة ما تمشي صــيهد، لازم تنسى هذا وتتغاضى على ذاك يله تكضي.
سكت وهيه طولت تحجي وياه ضليت اسمعلهم الحد ما نمت، ومن فجر كعدت مالگيته ولگيت امي تصلي سألتها
-صــيهد وين؟
-گبل ساعة راح للمشتمل النوب راح للگيعان.
كمت بساع لبست وطلعت للمشتمل طبيت للغرفة
-جورري.
جــويريه :: فزيت على ايد رغد كعدت بخرعة شفتها گدامي وتلفتت مناه ومنّاه أستوعبت گالت
-بساااع تعاي گبل لا تكعد جده.
حجتها وسمعت صوت بره راحت تركض تشوف شكو وانه اتلفت بالغرفة لميت شعري كصيبتي مفتوحة والشكاله الچانت مــاسه شاده بيها طرف الكصيبه ماكو، نزلت من الچرباية عدلتها شلت شالي من الميز البسه رجعت دخلت رغد
رغد:: مديتلها ايدي كضتها وطلعنه بساع طبينا للمطبخ ضحكت
-ضل گـــلبي يمج.
مسحت وجها منحرجة ماتدري شلون تحاجيني دنگت گالت
-ماردت انام هناك غفيت بلا ما احس.
-عادي بيتج هوه يله اصعدي كعدي البنات وانزلن وراجن مدرسة.
راحت هيه صعدت فوك يم البنات وانه خبزت بمچان امي، وره الريوك البنات راحن للمدرسة ابوي وجدي راحوا لبيت غانم، ضليت بالمطبخ يم امي تسوي الغدا، للساعة بالعشرة ونص اجه جدي فتح باب المطبخ الخارجي ووكف گدامنه بلعت ريك من لمحت سلطان وسليم فتحوا باب الحوش جايبيله فلوس المرعى وهوه وشال عوجيته يأشر علي وگال
شعلان:: حضري روحج ولج، وره محرم عرسج اطيتج لحمزه ابن علي ال غانم من وراج ووره مصايبج الزلمه رجله سگطت.
فاتحه عيّني مصدومة ما اعاينلهن اعاين لسلطان اللي وگف وراهم مصدوم وصاح بغضب
سلطان:: ما تطيهااا مو بكيفك.
كعدت بالگاع گـــلبي يوجعني چم مره يردّون يبيعوني بعد، واسمع صوت سلطان متسودن يتعارك وياهم ويصيح وامي تحوم فوگ راسي ميته من الخوف عليَّ شلت راسي اعاينله جدي طگاه وسليم كاضه صاح بحرگه
سلطان:: والله والله بعالي سمااه اكتلهم انا ناهي عليها والزلمه يگربلها.
شعلان:: والله اطيهاا وگدام عيونك ازفنها اغمم كل خير مابيك انتَ والنهوه شني؟
سلطان:: تطيهاااا؟
صيح يتراجف وفلت من ايد سليم ركض البيتهم وسليم ركض وراه وابوي وجدي يغلطون وراه ويصيحون "فنك الفكيت حلكك، امشيي امشي يم مرتك"
وداروا علي يردون يحاجوني امي سدت الباب بوجهم، واني ايدي على گـــلبي.
ريـــمه :: فزيت مخروعة على ركض آخواني طبوا الغرفة ســليم أثنينهم مشيت وراهم وبس شفتهم يجرون بالسلاح صيحت بخوف
-يمممه وين رايحين.
وهمه مايشوفون گدامهم حطوا المخازن بالتفك وامي شافتهم وضلت تصرخ وابوي كاملهم على العكازه يحاجيهم طلعوا يتراكضون روحـــي راحت وابوي وامي طلعوا وراهم ركضت للسطح اريد اشوفنهم وين راحوا لان ماشغلوا سيارة والمحهم بالبستان يركضون باتجاه بيت غانم من نص البستان رموا بيت غانم " دخيلك ياربي دخيلك يارب استرنا.
صوت الطلقة عبالك ببيتتا گد ما قريبين علينا واعاين جدي وعمي طلعوا يتراكضون ومرتضى من يم العمال ومشه عليهم يركض كضوهم متسودنين ومن وكف الرمي طلعوا بيت غانم عليهم وسلطان روحه مفرفحة يصيح بحرگه
سلطان:: بت عمي انا ناااااهي عليها واليوصلها اكتله بمچانه.
وكلمن يصيّح بصفحة بيت غانم يتعاركون وياهم نزلت. بساع خايفه لان العمال اللي يبنون ببيت مرتضى صعدوا على البنيان يعاينون للعركه، ضليت جوه اكل بروحي من الخوف والاء تفتر علي ببرود تكلي
-شصاير؟
سكتت افتر بالحوش ايدي على گـــلبي غمتني وردت طبت جوه ابنها بأيدها عاينت من الباب اجوا الولد وهـــب وسجاد وعبود وبساع مشوا عليهم يركضون، گـــلبي نار بس اريدهم يرجعون صياحهم يوصل الراس الشارع سلطان ووهب متسودنين ومحد گدر يسكتهم صوت وهـــب هزهم هز من صاح
وهـــب :: اكتل شعلاااان واكتل ابوي وما اطيكممم رغد.
والصياح يگب شعلوه بالساعة همه يتعاركون لمن اجوا الولد ســليم وسلطان يتراجفون طبوا للبيت وامي وراهم مفرفحة وتطلم
ميلاد:: والله ما تاخذهااا.
طب ذب السلاح بغرفة ســليم وطلع للسنك حط راسه جوه الحنفيه اجه ابوي وراهم كوه يمشي صيح عليهم ويغلط على سليم شلون هد وي سلطان بدال ما يكضه وامي ترجف تررجف كلها وتصيح
ميلاد:: ماتاخذهاااا سلطان ماتاخذها عاين عليَّ يكون عاندت واخذيتها لا انتَ ابني ولا انه امك.
دار عليها عيوه حمر وروحه محتركه حرگ گالها
سلطان:: اخذها رضيتوا مارضيتوا اخذها لو شما تسوين.
وهيه شگت دشداشتها تلطم متسودنه والاء من فهمت السالفة گلبت الدنيا گالها
سلطان:: تردين تضلين خير على خير تردين تطلگين بكيفج ما اگلج لا، اختاري ووين ماتردين انا وياج.
شاكر:: ولك تسودنت؟ تكتلت زلم من وراها وهسه تريد تاخذها.
سلطان:: اخذهاااا اخذهاا لا تحاولون وروّح الحسين اخذها واطلع من القرية وابن امه اليلگالي اثر.
ســليم :: احسن شي تسوووويه.
طلعوا من البيت واهلي متسودنين گامت امي تريد تروح تعارك بيت عمي وليد مديت ايدي اريد كضها طگتني حيل عفتها جسمي تعبان من ضربها إلي البارحة ركضت هاجر عليَّ كضت ايدي مكان الحرك اللي چوتني بيه امي امس، تنفخ عليه
اخذتها من ايدها مشينه نصعد فوك والاء صعدت كدامنا تلم هدومها حتى تروّح الاهلها.
رغد:: كومتني امي أغسل وجهي وهيه تتعارك وي جده، جدي وابوي راحوا لبيت غانم، طب وهـــب يرجف ويغلط عاين للمطبخ شافني وصاح بحرگه
وهـــب :: علييييمن تبچين؟ والحسين ما اطيج لبيت غانم لو يمدولج الدرب ذهب.
وجده تغلط عليه وتصيح
-مالك غرررض بيها انتَ لو بيك خير ما عافتك الفرخة المدري منين جبتها مدري شباگت منك وشردت.
حجتها وهوه تسودن دولكة كزاز يمه شالها ورگعها بالتلفزون ركضتله امي تكضه شال ايده الترجف وعيونه فاتحهن حيل
وهـــب:: ديررربالح تعيدينها!
سعاد:: هيييه هاي خلللفتج لا يحترمون ابو لا يحترمون جدادهم.
تكامشن هيه وامي رغم سعاد خشنة وامي كصيره وناعمه بس مدري شلون ما تگدر الامي تنام وتضل بس تصرخ وامي تكتلها، وطبت ميلاد تركض ركضت اكضها من امي ووهب يعاين ما گدرت الميلاد لحد ما صاحت امي
-اكرررصيها
وأشرتلي كرصتها چلبت بأيدي تصرخ وتريد تعضني كتلناهن انه وامي لمن جده هدت علينه فرغتهن من عدنا.
ووهب واكف بالباب صاح
وهـــب :: يابعد ايدي.
وميلاد تغلط وتسب وسعاد تهدد تخابر ابوي وكفت ميلاد بالباب صاحت
ميلاد:: خايبه انه ما تمشييين بناتج براس ولدي دام انا اشمن الهووه سلطان ما ياخذهااا.
ايمان:: خايبه انه المارضيت اطيها اله بس دامج هيج الا ازوجها آله وشوفيني اذا ما زفيتها اله گدام عينج انا مو بت بوي.
غلطت عليَّ وعلى امي متسودنه صحت عليها
رغد:: ما اريده انه ما اريده بس عوفوني بحالي.
تفلت علي تفشر وراحت البيتهم وسعاد طبت الغرفتها تخابر ابوي، طبيت للغرفة محترك گـــلبي ابجي واجه وراي وهـــب
وهـــب:: والله ما اطيج خل يسمع صــيهد اذا ما لعب بيهم طوبة، كافي اسكتي.
مسحت دموعي خايفه، للعصر صــيهد سمع بالسالفة والاستغربته ماحجه شي بالليل جدي وابوي وجده كاعدين بالهول وهوه بالمشتمل توني طلعت من غرفة امي وطب هوه سلاحه بأيده وجكارته بحلكه لابس دشداشة اسود عاينلي مضيك عيونه من دخان الجكارة طبلهم للهول وكف ابوي خازره وجدي بادن رجليَّه ضل على كعدته
صــيهد:: المن تردون تطون رغد؟
وليد:: حجايه نگالت وبن عمك صاح منهي عليها ونسدت السالفة.
صــيهد:: لا اشك حلگه اليصيح منهي عليها، سولفو بله يا خير گالهم اطيكم رغد.
شعلان:: انتم ماتفتهمون؟ لو ماعركتكم وي عيالها چا ماتصوب وسگطت رجله.
ضحك صــيهد يهز راسه ذب الجكاره بالگاع داس عليها وعاينلهم
صــيهد:: عاين من الاخير، ألبيه خير يگرب المرتي واخواتي، كلشي يخصهن مالكم غرض بيه، ويشهد الحسين على رغد اكتل سلف، ولو جبتوا طاريها النوبه حرام بالحرم اطببكم بفصل واطلعكم بفصل ياهي التگلوله الك مره من عدنا اكتله ما اخلي على حالكم فلس.
اجاه ابوي بحرگه طكاه وانه اعاينله ودموعي تجري ليش اخاف احجيله ليش اتحمل كلشي منهم وما اسولفله بسبب هاي عصبيته وحرگت گلبه، تعارك وياهم يرجف ووهب جر السلاح منه اخذاه وراح وجدي حلف اذا مايرحون للمعامل يطردهم من القرية ابوي خابرهم يجبرهم يرحون للمعامل، يومين وردوا.
""""
رنـــه :: شديت حيلي على الامتحانات الشهرية اريد من الاول اخذ درجات زينه، وزهره هالسنة شاطره وحجيها متحسن طــروادة جان يگول عليها عاقله تشبه عــفراء من گامت تحجي واضح غماني گال
-نفس لسانج.
-تربيتي.
ضحك وراح يسبح، جدي وعمي وليد راحوا للحسينية يعدلون بيها گبل الزيارة، من يطلعون من القرية يصير هدوء لا عركه لا شي مرات اضوجن لان وحشة محد يعارك، عبود بعده يدك ناعم لطرواده وخايف يگله اريد اروح مشايه، گمت من طــروادة صاحلي علئ دشداشتها اخذتها اله حط الفلوس بعلاگه اخذ ميىثم وراحوا يجيبون سيارتنا.
وحسين وزهره كل واحد كاضله بيضه متانين ليمت يجي حتى يكسرون البيضه على تايرات السيارة، للغروب يله اجوا اعاينلهم من فتحات السياج الولد ملتمين عليه هذا مشغلها وهذا فاتحها ويعاين بالمكينه مالتها، حسين وزهره طلعوا يركضون كسروا بيضات على التايرات.
بالليل وره العشا عبود بعد ما گدر گاله
-طرراده شتگول اروحن وي سجاد مشايه؟
وطرواده مدنك على الملزمه يدرس وهز راسه لا
عبود:: ليش؟
-تتعب گلبك مو زين!
-ما نمشي حيل وراح نطلع من وكت حتى نمشي على راحتنا.
-لا.
سكت عبود ضايج وطرواده مشه للگيعان مانمت لمن اجه حاجيته
-خطيه خل يروح.
-لا رنـــه بله تشاقوا وياه ولد وطگوه على گلبه بله صار بيه شي ترا هوه يمشي شويه يتعب.
-بس هذا طريق الامام الحسين عليه السلام ورب العالمين يحمي زوار الحسين مايصير توگف بوجهه .
مسح وجهه محتار تمدد بفراشه يعاينلي
-شتگولين اگله روح من نجف الكربلاء ؟
-ما اظن يرضى هوه صارله مده يخطط وحتى هدوم أشتره.
-بله صيحيله.
گمت بساع للدوانيه دكيت الباب عليهم هوه وسجاد، صاح
عبود:: تعاي وحدي.
فتحت الباب اعاينله
-طــروادة يريدك.
اجه وياي بحماس هاي الخطوتين الرحتهن للدوانيا اصيح لعبود وارجع بس فتحنا باب الغرفة لگيناه نايم فاتح حلكه من التعب، لان يگضيها بين الگيعان والجامعه ماينام لو ساعتين لو ثلاثة.
عبود:: هههه تعبان غفه.
فز من سمع صوت عبود مسح وجهه گاله
طــروادة :: ترحون وحدكم بس انتَ وسجاد؟
-اي والله محد ويانه خاف عبالك جماعة .
-وعلي خايف عليك بس شسوي هاي هيه روح.
ضحك عبود مكيف باس طــروادة وگاله باجر العصر نطلع وصدك ثاني يوم العصر حضرتله هدومه بجنطه، وكعدت يم باب الحوش انزله قصائد حسينية واگله، دوم شغل هاي مال يسجلني واهديلي خطوات من تمشي.
-صار.
-واشتريلي وياك لعابه.
ضحك ومد ايده سلمت عليه وشبگته
-راح اشتاقلك
كرصني من خدي يضحك باس حسين وزهره وطلع راح للگيعان سلم على طــروادة ومشوا هوه وسجاد.
وگبل الزيارة بخمسة ايام، راحوا جدادي، بيت عمي شاكر ضلوا بس ريـــمه وسلطان وابوهم، وييت عمي وليد ضلوا صــيهد وجوري وماسه، وولد بيت عمي خليل محد راح، القرية فرغت العصريات اطلع الصخله واوكفلها بالباب انه، طــروادة مره لگفني ماحاجاني گال ميخالف بس لا تطلعين بدون عبايه، ومره اخذني وياه للــبستان ومره الفجريات رحنا للصيد،
الحد گبل الزيارة بثلث ايام خابرتني عفراء گالت
-اكلج انه ومنذر راح نروح للزيارة للحسينية ترحين ويانه انتِ وحسين وزهره؟
-خاف طــروادة ما يرضى وشلون يضل وحده ياهو يطبخله.
-هوه يطبخ لروحه متعلم علمودج انه صارلج مده مازايره.
-عاينــي خابريه وگليله انه راح اسوي روحـــي ما ادري بشي.
سديت التلفون منها، ومشيت گبل غسلت هدوم وعبايتي شريتها، اجه طــروادة الغروب گال
-شو عفراء تگلي خل رنـــه والفروخ يرحون وياي.
-وين؟
-للزيارة!
-يااا، شو ما گالتلي؟
دار عاين للحبل وهز ايده
طــروادة :: انتِ غير حتى العباية محضرتها شلج بهاي السوالف بعد.
ضحكت
-لا والله آذا ماترضى عادي ما اروحن.
-ما ادري ما مقتنع انا بس هيه حرجتني وحتى منذر خابرني.
-بكيفك ولا عبالك اضوجن والله عادي شتگول عادي.
سكت محتار طبيت للمطبخ اسوي عشه شويه وصاح عليَّ
-رنـــه بالتسعه يجون عليج ترى حضروا رواحكم.
كيفت وبساع خلصت العشا، وطلعت يم الحوش علمود النت راسلت ماسه
-اكلج تجين للزياره لو لا؟
-خيه ما ادري اظن گبل الزيارة بيوم نجي وي صــيهد نزور ونرجع.
-وريمه؟
-لا اظن ما تجي علمود عمي شاكر.
-انه راح اروح وي عفره هسه راح نطلع.
-ياا توصلون بالسلامه، جا تلكين بــدور گدامج وبلكن احنا هم نلحك عليكم.
-ان شاءالله.
كمت بساع سبحت حسين وزهره وحضرت هدوم وهوه وياي اخذوا هيج بارده لبسيهم هيج، مد ايده بيها خمسين الف
-رنـــه فلوسي گضت والراتب بعده ماجاي هاي خمسين الف وعلى كيفج لا تصرفين على كلشي.
-اصلاً خمسة وعشرين كافي هواي هذن شسوي بيهن ششتري؟
-ميخالف خليهن بجنطتج كلشي يصير، واذا اخوتج رادوا شي انتِ اشتريلهم لا تخلين عفره تشتري.
هزيت راسي خوش للتسعه اجت عفراء وشمس بأيدها اخذها منها طــروادة يبوس بيها وهيه تضحكله مسودنته، عفره بساع لبست زهره وتسألني شنو اخذت من هدوم تأكدت منهن سلمنه على طــروادة وطلعنه لگينه الولد صــيهد وبريا وميثم وسلطان واكفين يم منذر.
سلمت عليهم عفراء وهمه كلهم يگلولها
-هلا بيج خويه شلونج؟
واخذوا شمس من طــروادة يبوسون بيها ومنذر يگلهم
منذر:: ما ارضى تبوسون بتي.
سلطان؛: انتَ حاقد علينه لان كتلناك! اذا ابني كبر وراد بتك تطيها ؟
منذر:: افكر.
ضحكوا صعدنه انه وزهره بالسيارة، وعفره واكفه بصف طــروادة مبتسمه وشمس بأيدهم من واحد الواحد اخر واحد بريا من صارت بأيده اختلفوا عليه گالوله
-انتَ اخر واحد كضيتها لازم تطيها خمسة وعشرين
وهوه يضحك مد ايده بجيوبه يدور طلع خمسه وعشرين من محفظته خلاها عليها ويگلها
بريا:: بعد اذا گالولج هذا خالج بريا روحيله گليلهم ماعرفه.
ضحكوا اخذها منهم طــروادة اطاها العفره سلموا عليهم وصعدوا افتر طــروادة من جهتي يحاجيني
-تلفونج مو يكضي شحن كون كل ما اخابرج تردين
-ان شاءالله
-ديربالج على اخوتج اذا ضاع واحد منهم انتِ وعفره لا تجن ضلن غاد بالحضره
يحجيها بضحك وعفراء تگله
-مايضيعون
ضحك وابتعد رجع وكف يم الولد ومنذر صعد يفرّ السيارة اعايلنه مبتسمه لمحت بريا واكف وراه يعاينلي ردت اعايب عليه وخفت من طــروادة سكتت، منذر دكلهم هورن وهمه رفعوا اديهم وصاحوا وراه
-بالسلامة.
"""""
مــاسه:: بس انه وجويريه بالبيت وصيهد طالع سوينا عشه جــويريه تدري بيه راح يجي سوتلها لفه وصعدت فوگ من اجه سأل عليها گتله نايمه سكت كعدنه انه وياه تعشينا من كضه عشا وشرب چاي گال
-اطيني رقمج راح اروحن للگيعان اقفلن البيبان ونامن يجوز ارد بثالثة اخابرج تفتحيلي الباب.
اطيته تلفوني كله ما اعرف شلون اطيه الرقم گلب بيه لگه بس محادثة وي وهـــب ومحادثة وي رنـــه هز ايده ماراضي وماعاجبته سالفة التلفون گلب بيه مناه مناه رجع على محادثة وهـــب كاتبه على رقمه سندي، سجل رقمه وماكتب اسم اطانياه وضل يعاين وياي گال
-ثبتيه ودكي عليَّ حتى رقمج يصير يمي.
ضليت كاضه التلفون ومحتاره خاف اكتب شي حلو خاف يعيب عليَّ خاف اكتب اسمه خاف يضوج لان كاتبه على وهـــب سندي كال
-فضيها اريد اروحن.
بساع كتبت "رويحتي" ودست اتصال اعاينله علن شواربه مدنك مبتسم، طلع رقمي يمه.
-شنو راح تكتب على اسمي؟
-اخوي جبار.
تستمر القصة أدناه
-هههههه.
ضحكت مكشره بوجهه وهوه يسجل بالاسم وانه اريد امد راسي واشوفه بس اخافن سجل الرقم ودار التلفون عليَّ كاتب "امي٢"
48
-ها عجبج؟ لو نرجع على جبار.
-ليش ما تكتب مــاسه؟
راحت ابتسامته عاينلي بطرف عينه
-يله يله كافي تعاي اقفلي البيبان وراي.
طلع ومشيت وراه قفلت البيبان وصعدت فوك اركض اريد اضــحك وي جــويريه لگيتها صدك نايمه، فرشت فراشي وضليت العب بالتلفون اطلع مقاطع تضحك وناطه من الضحك وحدي
مناه لمن وصلتني رسالة من رقم مكتوب
"مــاسه"
كعدت عدل خايفه وايدي رجفت عاينت للباب وعاينت للرساله گلت هذا صــيهد يريد يختبرني ما افتحها اجت وراها رساله ثانية مكتوب
-لازم احجي وياج، تجين؟
بلعت ريكي بخوف نرعبت فتحت الرسائل واشوفنها صورة مــيثم فتحت عيني بصدمة ما مصدكه عيوني رد كتب
-اعتذر على المراسله بس مجبور وضروري احاچيج تعالي للبيت.
وايدي ترجف كضيت التلفون اكتب
-هسه اخابر الولد اسولفلهم عليك والله العظيم شكد ما تستحي انتَ؟
شاف الرسالة ومارد وانه ميته من الخوف والقهر شلون يراسلني دز صورة متانيه لمن فتحت ذبيت التلفون وخليت ايدي فوك راسي ما مصدگه الاشوفه ملخت خدودي بدون صوت صورتي وانه ببيتهم العب بلي، يمه صخام بوووجهي يمممه .
ارجف ارجف وروحي رايحه رد كتب
-تعاي جاي تجبريني احاچيچ بطريقة لا تناسبني ولا تناسبج، عشر دقايق مــاسه عشر دقايق.
لطمت على وجهي متسودنه غير يذبحوني اذا شافوها يمووتوني والله يموتوني شلون صورني شلون، طلعت من يم جــويريه اركض للحمام ارش مالي على گـــلبي واعض بأصبعي والطم على رجليَّه من اتذكر شكد لعبنه بلي ببيتهم جنه نذب حتى حجاباتنا انه وبدور
رحعت للغرفة امسح بدموعي شفته كاتب
-تأخرتي.
اخذت التلفون بأيدي ونزلت ارجف حيل خايفه من صــيهد، امشي وأتلفت بخوف اگله امسحهن اكله اذا ما تمسحهن اسولف الامي امشي واحجي وي روحـــي لمن وصلت بيتهم دخلت بساع خايفه، باب الهول مفتوح طبيت للهول اتلفت طلع من المطبخ ضليت واكفه يم باب الهول مچلبه بعبايتي نترت من بين دموعي
تستمر القصة أدناه
-انتَ شتررريد مني؟ ما تستحي بت عمممك انه شلون تهددني؟
دار وجهه مايعاينلي أشر على القنفه.
مــيثم :: اگعدي خل احاجيج.
-ما اگعدددد شتريد مني شتريد؟
مــيثم :: مــاسه اكعدي احاجيج وترحين هاي هيه.
مشيت لنص الهول اصيح
مــاسه:: انتَ منين جبت رقمي وشلون گدرت تراسلني ما تخاف منّ خواني؟
مدنك وهز راسه لا
مــيثم :: ما اخاف من احد لمن الموضوع يخصج.
بچيت عيني على باب الهول اتخيل بأي لحظة يطب صــيهد
-عليك بروح عمي شامل امسح الصور والله يموتني صــيهد حباب بداعة اخوك والله بعد ما العب والقران حتى ما اوصل بيتكم بعد.
احجي وهوه مدنك مايعاينلي مسح وجهه بأثنين اديه وشال راسه ليفوك زفر نفس ورجع دنك گال
-شي واحد اطلبه منج سويه والصور ينمسحن.
-شترريد؟؟؟
مسحت دموعي روحـــي رايحه شال راسه عاينلي ساكت بلع ريك وحجه بتردد
مــيثم :: ترحين لصيهد تگليله ما اريدن محمد.
سكتت استوعب كلامه وهوه يعاينلي متاني ردي هزيت راسي لا
-ياهي مالتك اخواني واهلي رضوا انتَ شلك غرض؟
-لان واحد مو خوش ادمي يستعرض بصورتج يم صحبانه ولو على كص رگبتي ما اخليج تاخذين هيج واحد.
-حچيك كله جذب تريدني اكله ما أريده حتى انتَ تاخذني! ليش تسوي هيج مو چنت حباب ليش تسوي بيه هيج؟ والله ما اگله ومحمد اتزوجه انتَ مالك غرض هوه ابن خالتي ويريدني انه ما اريدنك والله ما اريدنك .
احجي بحرگه وحچيي مره هيج مره هيج هز راسه اي وعيّنه بالگاع
-الليله تحاچينه للصبح اذا مارفضتي محمد كل الصور يوصلن الصيهد .
-لاااا بداعت اخوك عليك الحسين لااااا .
بچيت ارجف
مــيثم :: لا تبچين يرحم اهلج لا تبجيييين.
صيح وانه مصدومه بيه ما مستوعيه هذا مــيثم الهادئ اللي كلها تحمد ييه وامي تموت عليه ما مصدگه مــيثم يهددني
مــيثم :: مــاسه اليوم اليوم تحاجين صــيهد وتگليله ما اريدن محمد سمعتي ااااليوم.
-بمنو احلفنك تمسح الصور ؟
دار وجهه يهز راسه لا
مــيثم :: ما امسحهن هسه لمن ترفضين محمد.
بچيت خنگ صوتي گوه يطلع
-شايفني بدووون حجاب انتَ ؟؟؟؟
هز راسه لا بسرعة
مــيثم :: لاا.
-جذاب جذذذاب مصورني بلا حجاب.
-لا ، لا شايفج بدون حجاب ولا مصورج وحگ عيــونج .
-الله لا يوفقك الله لا يوفقك دنيا وآخره دعوة من كل گـــلبي.
دار يريد يحاجيني ودرنه اثنيا بصدمة على دگة باب الحوش فتحت عيني على وسعها وهوه هم يعاين للباب ساكت. ودك تلفوني بأيدي كعدت بالگاع من شفته صــيهد المتصل.
شكرا لزيارتكم عالم روايات سكيرهوم
