رواية أرض الخناجر الفصل الثالث والثلاثون بقلم ايلول
انت وين شتدري بيَّ ؟
تنام دافي وانا حاير
ريتك الوردية تدري
بريتي نفاضة جگاير ؟
══━━━━✥◈✥━━━━══
مــاسه :: صوت دكة الباب وصوت التلفون اخذن روحي فاتحه عيني بصدمة اباوع لأسمه بشاشة التلفون وارجف كلي شلت راسي لميثم ابجي وصوتي مختنگ
-صــيهد صــيهد
احس وشه صارت بأذني من الخوف عيني الميثم وهوه عيونه على التلفون يرجف بأيدي كعدت على اركبي روحـــي رايحه ودموعي تجري هسه يطب يذبحني فوگ الصور يلگاني ببيته لو اموت ما يسمعني، الخوف اللي تملكني خله كل ذره بجسمي ترجف وانه اتخيله شلون واكف بباب الحوش يدكه والتلفون على اذنه يخابرني شلون سمع صوت النغمه وعرفني هناه راح للبيت مالكاني واجه هناه اجه حتى يذبحني
ابجي بحرگه وباب الحوش يندك ووي الدكه صاح
سلطان:: خااب شني مــيثم.
شلت راسي بصدمه وخوف ما ادري افرح لان مو صيهد اللي بالباب لو اخاف وانرعب من الموقف الاني بيه، اعاين الميثم والدموع مخليه عيوني تغوش وهوه بساع خله ايده على حلكه يسويلي اششش وأشرلي على الغرفة يهمس
-لا تجاوبين صــيهد هسه اجيج طبي للغرفة.
مشيت للغرفه اركض وهوه طلع لسلطان وكفت بباب الغرفة روحـــي رايحه والتلفون خلصت دكته ورجع دك خفت خفت ما اجاوبه مسحت دموعي ورديت بصوت مخنوك واحاول ابينه مابيه شي
-الو.
سكت مارد بلعت ريك امسح بدموعي
-الو صــيهد !
-الو، ها وين چنتي صار شكد اتصل؟
-احم ما ادري بيه صامت.
-شو چنچ نايمه؟مدري باجيه شني؟
-هه لا لا نمت شويه وكعدت !
احجي ودموعي تجري سكت ما مقتنع يسوي هممم ورد گال
-رايح للمحل تردين شي انتِ وهيه؟
-لا.
-حلويات؟ شي شيات راح اجي انا.
شلت راسي لميثم من طب واكف بالباب مسح وجهه من فهم جاي احجي وي صــيهد همست بصوت مخنوك
-بكيفك.
-يله صوج اليخابرج.
سد التلفون بوجهي كعدت بالگاع ضامه وجهي بين اديه ابجي وروحي رايحه
-الله لا يوفقك بجاه الحسين حوبتي ما تتعداك.
مــيثم:: ادعي اذا الدعاوي تبرد گلبج.
وگفت على حيلي امسح بوجهي نار نار مشتعله بگلبي خزرته وايدي ترجف
-امسح صوووري
-من تنلغي خطوبتج من محمد امسحهن.
-حتى لو حجيت الصيهد وكتله ما اريد محمد والله ما اخذك والله لو تضل بس انتَ هم ما اخذذك.
دنك يهز راسه اي ودار وجهه
مــيثم :: ميخالف عسى ما باجر تتزوجين المهم مو محمد، يأذيج والله يأذيج مايهون علي تتعبين مايهون عليَّ اسلم عرضي لواحد ماعده غيره.
مشيت من گدامه مختنگه اريد اطلع من البيت صاح وراي
-اليوم تحاجين صــيهد، وامسحي محادثتي لان راح يدور بتلفونج.
درت وجهي عليه نزل عينه بسرعة اعاينله حايره شنو اليوصف حقارته طلعت وركعت الباب حيل احس بخطواته من اجه وراي طبيت لبيتنا وسديت باب الحوش كعدت على اركبي أبجي بحرگه ميته من القهر، ومن الخوف اتخيل لو وصلن الصور الصيهد لو لوهب شيسوون بيه حتى وهـــب العاقل يموتني والله يموتني.
گمت بساع من تذكرت صــيهد راح يجي طبيت للمطبخ اريد اسكت من البجي واغسل وجهي ما اگدر اشهك ودموعي تجري غسلت وجهي ومشيت اريد اصعد صارت بوجهي جوري هستوها كاعده فتحت عينها بصدمة من شافتني وانه عبالك بس اريدن واحد احجيله مجرد گالت
-يمه مــاسه شبيج؟؟
كعدت بالگاع ابجي بصوت عالي وهيه نزلت تركض خايفه
-ووولج شبيج؟ اهلج صار بيهم ولج مــاسه گـــلبي راح يوكف حاجيني.
هزيت راسي لا وهيه تشيل بوجهي تريدني بس احجي عاينتلها اناشغ
-مــيثم مــيثم بن عمي خليل مصورني من جنت اروح العب بلي ببيتهم .
شهكت ولطمت على صدرها
-يهددني يودي الصور لصيهد والله يمووتني والله يذبحني صــيهد يذبحني.
جــويريه :: اعاينلها بصدمة ما مستوعبه وهيه وجها انطعن من البجي وصوتها اختنك ترجف بخوف وگوه تحجي
-يريد اگول الصيهد ما اريد محمد ليش ليشش شعليك من عدي .
-عزا بعينه ليش هيج يسوي؟
ضمت وجها بين اديها متخبله وتحجي بحرگه لحد ما دك تلفونها
باوعتله بخوف
-صــيهد جاوبيه جاوبيه انتِ واذا كال مــاسه وين كليله بالحمام الفوگ تسبح.
حجت وركضت فوك وصوت بچيها يوجع الگلب باوعتله الحد ما دخلت للغرفة فتحت خط وقبل ما احجي اجاني صوته يرعد
-ما تررردين؟
-الو.
سكت واني عيني ليفوگ بالي يم مــاسه گال
-جا مــاسه وين؟
-تسبح.
-افتحيلي باب الحوش.
سديت التلفون وطلعت بسرعة اركض فتحت باب الحوش وصرت وراه دخل بأيده علاليك وبس دار علي فتح عينه حيل
-حجاااابج؟
حطيت ايدي على راسي أتلمس ماكو حجاب لان بالي يم مــاسه طلعت هيج طبيت گدامه اركض صعدت فوگ مــاسه حاطه وجها بالمخده وتبجي ومن شافتني مسحت دموعها
-هاه سأل عليَّ؟
-اااي اي كومي لا تبجين بعد عيــونج صارن دم دمم مبينات باجيه.
مسحت عيونها وكامت للمرايه حتى بچي براحتنا ما نبچي من وراه صاح من جوه
-وينجن؟
مــاسه :: انتِ انزلي گليله مــاسه بالحمام انه راح اسبح وانزل حتى اگله الشامبو طب بعيوني وهوه يدري عيوني تتحسس تمشي عليه.
هزيت راسي اي
-بس لا تتأخرين فـــدوه ما اعرف شنو احجي وياه وخاف يسألني عليج واحتار شنو ارد.
وهيه باستعجال طلعتلها ملابس وراحت للتلفون بحوشت بيه طفته ومشت للحمام، وانه نزلت مرتبكه اباوعله كاعد بالهول منتجي على المخاد وريموت التلفزون بأيده يدور على القنوات لان جديد اليوم جابوه ما مرتبات القنوات، باوعلي ورجع باوع للتلفزون خلاه على قرايات تصوير ما مشايه بس مو مباشر.
دار عينه الي واني واكفه على صفحة
-وين مــاسه ؟
-تسبح.
هز راسه خوش وگال
-جيبي كلاصات وتعاي.
دخلت للمطبخ زفرت نفس اهدي روحـــي خايفه على مــاسه غسلت كلاصات واخذتهن بصينية خليتهن يمه ووگفت رفع راسه مضيك عينه
-اكعدي!
كعدت بسرعة وما اباوعله عيوني على التلفزون احس بيه هوه يباوعلي ابد ما التفتت الجهته صاح بصوت عالي
-مااااسه، فضيهاا.
بلعت ريك وشلت ايدي اعدل الشال على راسي گال بهمس
-بالحوش مفرعه ويمي مگبعه.
درت عيني اله دار للتلفزون سكتت افكر بموقف مــاسه وشنو لازم تسوي، شكد جانت منتظرة خطوبتها من محمد ومتأمله وفرحانه، حطمها مــيثم وهي الچانت تگول بس ولد عمي خليل يختلفون ماعدهم سوادين شعلان طلع كل أحفاد شعلان يجري بعروگهم دمه ويحملون نفس الصفات ونفس الخبال، درت عينيّ الصيهد يباوع للتلفزون، هذآ اولهم واكثر انسان يشبهه شعلان نفس التصرفات نفس العناد واذا راد شي يسويه لو يعرف يكسر كل اللي يحبونه المهم يسوي البراسه عناد.
درنه اثنينا نباوع للدرج من سمعنه صوت خلخال مــاسه صوت الرنه مالته خفيفه كلش نزلت عيونها مورمه وحمر والضحكه مرسومه على وجها لافه شعرها بخاولي نزلت اخر بايه تباوعله مبتسمه درت عيني اله يباوع لرجليها كعد عدل
صــيهد:: ترحين للمدرسه وهذا الخلخال برجلج؟
مــاسه :: اخليه جوه الجواريب مايطلع صوت والله.
شال راسه باوع لوجها وعگد حاجبه وهيه تتقدم شويه شويه الحد ما كعدت بصفي، عدل كعدته ودار علينه دنگنا اثنينا نبلعم گالها
-شني باچيه؟ عيــونج مورمه!
باوعت لماسه بخوف لو اني بمكانها هسه اسردله السالفة كلها بس هيه ضحكت ومسحت وجها تگله
مــاسه :: لا هذا الشامبو طاح بعيوني حرگهن حرگ
وهوه يباوع بشك گالها
-جذابه.
دنكت عينها تعض بشفتها واني روحـــي راحت راح تفضح روحها وهوه قفل يحجي بصوت ناصي يجبر الواحد يكعد يشكيله
صــيهد:: عليمن باچيه ياهو وياج؟
شهكت مــاسه وخلتني من يمي ارجف جريتها الصدري واحجي مرتبكة
-على أمها تبجي.
حجيتها وباعتله حاضنه مــاسه الصدري ومغطيه وجها بأيدي وهيه ماصدكت كبل بجت وخلته يباوع بشك جراها من أيدها مسح عيونها وهوه يگلها.
-الصدك بدون جذب عليمن تبچين.
وهيه تمسح بعيونها وتحجي بخنگ
-على امي لان انه ردت وياهم وماخلوني، وخابروني مساع وسمعت صوت لمشايه كلش نقهرت.
يباوعلها عاكد حاجبه وهيه مدنكه وتحجي دار عيونه الي هزيتله راسي اي وطابكه حواجبي يعني متأثره اني بس اقتنع فـــدوه الامك اقتنع.
صــيهد:: باجر بالليل نروح بس ما نبطي ثاني يوم نجي خوش؟
هزت راسها اي طكاها راشدي على كيف مبتسم
صــيهد:: اطيح حظج اذا تبچين بعد.
وهيه تضحك وتمسح بدموعها زفرت نفس براحه من عبرت عليه السالفة احمد ربي واشكره جر علاكه من يمه فتحها بيها حلويات نساتل وجبس وببسي، خلّاها گدامنه
-ما ادري شني التحبنه.
وماسه بس تضحك اباوع الايدها بعدها ترجف اخذت حلويات انطتني وهوه فتح بطل البسبي صب بكلاصات رجع سند ظهره على المخده يباوع للتلفزون وكلاص الببسي بأيده گال
-تداومن باچر؟
مــاسه :: لا مو الحجي راح للزياره ياهو ياخذنا.
-انا اوصلجن لان انا هم عدي امتحان اكمل واردلجن حتى لو بالعشره احاجي المديرة واطلعجن.
هزت راسها خوش ساكته اثنينا لازمين نستله بأيدنا فاتحينها وما ناكل الحد ما باوعلنه عاكد حاجبه بنفس اللحظة اني وماسه اكلنه ودرنا للتلفزون نباوع، نحسه ما مقتنع عبالك كاشفنه ضامين عليه شي، شويه و گام گال.
-يله اقفلن البيبان وامشن نامن.
مــاسه :: عاينت وراه وهوه يروّح للمشتمل أريد ابجي درت الجوري بحيره
-شسوي هسه؟
-كلشي لا تسوين جذب مايگدر يودي الصور الصيهد يخاف منه.
-لا مايخاف يسويها والله يسويها وصيهد اذا ما ذبحني عمــري كله بعد مايعاين بوجهي.
گمت بحيره وجوري وراي صعدنه فوگ دموعي شما امسحهن يرجعن، صارت بالوحده وانه نار تاكل بگلبي سنة صار متانيه ليمت خالتي تحجي وياهم وتالي ميثم يريدني انه الاخرب كلشي وانهي كلشي بأيدي، مسحت عيوني اعاين الجوري صوتي مخنوك
-راح اروح احاجي صــيهد.
-وتعوفين محمد؟
بچيت اهز راسي اي وهيه ساكته محتاره مثلي واكثر لبست حجابي ونزلت غسلت وجهي هوسه براسي حتى ما اعرف شنو راح احجي شنو آكول بالاول واذا گالي ليش شنو اجاوبه، مشيت وانه ما ببالي اي شي مادري منين ابدي فتحت باب المشتمل گـــلبي يدك حيل وصلت الباب غرفته وانه احس بلعومي مثل النار دكيت الباب بأيد ترجف
-تعااي.
فتحت الباب بخوف اعاينله چان كاعد على الچرباية والملازم گدامه يدرس عكد حاجبه من شافني عاف القلم ودك على مچان كدامه
-تعاي اكعدي
تمشيت كعدت كدامه مدنكه اعاين للملازم همست بصوت مخنوك
-تدرس للأمتحان؟
طبك الملازم وخرهن من كدامي عاينت لوجهه مضيك عينه
صــيهد:: عوفي الامتحان احجيلي شبيج ؟ عليمن ضايجة وتبجين؟
زفرت نفس بحسره اباوعله هادئ بس انه خايفه ومحتاره شلون احجي وبأي طريقه همست بصوت مخنوك
-عاين انه يعنّي خايفه.
-منين خايفه؟
دنكت وبأطراف اصابعي اجعص بالفرشه عيوني انترسن دموع مد ايده الوجهي رفعه عاكد حاجبه
-منين خايفه مــاسه؟
ميلت راسي ودموعي جرت اعاين لوجهه وروحي رايحه صوتي گوه يطلع
-علمود ابن خالتي عبير!
رفع حاجبه وگام نزل من الجربايه راح يجيب باكيت الجكاير نزلت انه هم اطكطك بأصابعي شعل جكارته وضل واكف يم الميز ايد وره ظهره وايد كاض بيها الجكاره
صــيهد:: اممم سولفي من الاخير صارلج ساعة تودينها مناه وتجيبينها مناه احجيلي بالنظيف وين تردين توصلين الزبده اريدنها احجي بله.
مسحت وجهي بأثنين اديه مرتبكه وهوه نظرته الي تخوف كوه يحاول يضل هادئ
-ما، ما أريده.
حجيتها وگلبي معصور عصر دنك يدخن وهز راسه خوش يجر نفس وره نفس من الجكاره رد رفع راسه وهم حجه بهدوء
-ليش بله ماتردينه؟
سكتت اطكطك باصابعي وهوه متاني اجاوبه
-ما ادري هيج يعني عاين يعني بعيد عنكم وانه ما اگدر ما اشوفن امي كل يوم عليمن اتزوج بعد اضلن يمها.
احجي وادري بحچيي مايعبر عليه ضحك مستهزئ طفه الجكاره
صــيهد:: خلصتي تمسلت؟ هسه احجي الصدك.
سكتت مدنكه ودموعي تجري اجه يمي وكف گدامي شال وجهي جان هادئ وهسه اعصاب گال من بين أسنانه
صــيهد:: انتِ وامج كتلتن رواحجن عليه وهسه صار ماتردينه؟ شني السبب سولفيلي الصدك مــاسه لا تجذبين لا تخليني اطگج.
دفعني من ايده مبتعد كعدت بالگاع ابجي صاح بصوت عالي
-احجييي.
فزيت من صوته مخروعه وامسح بعيوني
-ما اريده ما اريده.
خزرني بغضب
-حاچيه وي مــيثم ووولج؟
روحـــي راحت اهز راسي لااا نتر
-يشهد الحسين راح اعلگج بالبنكه تسولفين لو شلوووون؟
-باوع والله احجي بس لا تصير عصبي فـــدوه صــيهد.
احجي وارجف مسح وجهه ووگف بصفي وانه كاعده بالگاع عاينلي
صــيهد:: يله مو عصبي أحجي يله.
-عاين.
سكتت امسح بدموعي ما ادري شحجي
-كرهته انه كرهته من انتَ گلت ما يسوه اظفر مــيثم.
صفگ ايد بأيد يصيح
-حلووو حلوو بت ايمان تلعب ساعة هناه ساعة هنااه يعني تردين ميثمممم!
-لاااا لااا والله اكرهه مــيثم .
جراني من زندي حيل دفعني يصيح
-ووولج تلعبين عليَّ انتِ؟؟؟؟
ضميت وجهي بين اديه ابجي وهوه يعت بيه يفور يريد يطگني وگوه كاض روحه اندفع باب الغرفه وطبت جوري بساع دفعت ايده وصارت بيني وبينه وهوه يصيح
-تلعبين عليَّ مــاسه؟ محمد شمسوي سولفيلي محمد شمسوي، حاچاچ مــيثم هاااه حاچاچ سولفيلي.
-لاا.
-بت النعال بعدج تجذبين.
جــويريه :: اخذت استخارة وشافتها مو زينه لهذا السبب ماتريده.
حجت وياه بصوت يرجف وهوه يعاين بغضب صاح بوجها
-انچبيييي انتِ الچذابة الثانية.
رجعنا اثنينا للزاوية وره الباب وهيه گدامي عود تحميني بس خايفه اكثر مني گالتله
-احلفلك.
-سددددي حلكج گتلج، تعاااي مــاسه تعاي يله صيري حبابه وگليلي الصدك خل اطبگ مــيثم على محمد وانعل ساس اهلهم.
مد ايده يريد يجرني دفعتها جوري وهوه يتراجف بساع حط ايده على صدرها جراها من دشداشتها ودفعها لبعيد جراني ودفعني على الميز وجوري من دفعها طاحت على حافة الچرباية ضلت تتلوى موجوعه كض وجهي بين اديه
صــيهد:: شمسوي محمد؟ مــيثم يتعارك وياه ويطگه وطرواده يصيح مو ادمي لا تطيه اختك وهسه انتِ تگليلي ما اريدنه، لازم مسوي شي وانا نايم ورجليّ بالشمس مستغفليني موووو؟
-جوري جوري تعورت.
دار عليها دفعني من ايده يصيح
-لنعل ابوووج لا ابو جوري لا ابو مــيثم خرا بيج احجي وووولج احجي لا اعدمج.
ومن صياحه جوري بساع گامت واجت يمي تركض وحده مچلبه بالثانية وهوه وده يذبحنه
-رنـــه خابرتني وگالت يگول طــروادة لا ترضى بمحمد يصاحب نسوان بالكليه.
حجيت ارجف مدري منين اجتني عاينلي بغضب وصيح
-اطلعييي اطلعيييي مناه .
جرتني جوري وطلعنه للبيت نركض طبيت للمطبخ غسلت وجهي مصخنه وگلبي نار ركضت للتلفون خابرت رنـــه ماترد علي شلعت گلبي يله ردت صوتها مال وحده چانت نايمه
-رنـــه رنـــه ركزي وياي فدووه.
-يمه ها احترگنا؟
-اريد تخابرين اخوج كهلان
-يييييمه گـــلبي شبيه اخووي؟
-مابيه شي مابيه شي رنـــه فدوه خابري گليله، شلون ياربي شتگليله عاينــي وديلي رقمه.
-شني السالفه ما اطي رقم اخوي.
-رنـــه والله محتاجته والله العظيم صــيهد راح يگلب الدنيا على راسي.
-بس مو تصاحبينه.
-لاااا لا والله شبيج.
-راح اوديلج برسالة
سديته منها ارجف جوري گالت
-غلط الكاعد تسوينه هسه راح تجذبين الف جذبه وجذبه تجر جذبه لو حاجيه الصيهد من الاول احسن والله.
وانه اكل بأظافري واعاين للتلفون وصلتني رساله من رنـــه رقم اخوها وكاتبه
-شيريد منج الثور؟
مارديت عليها دخلت رقم طــروادة وماگدرت اراسله خفت حيل خفت مو هيج انه حذفت محادثة رنـــه والرقم وكعدت ابجي بحيره ما ادري شسوي.
"""""
طــروادة :: افتر بالگاع اسگي بس انا وهاسكي يركض وراي
مناه لمن ضل ينبح عاينت ما اشوفن احد ظلمه وهوه ينبح درت الاايت مناه ومناه محد موجود
-شني هاسكي؟
ضل يفتر داير ما دايري وينبح شويه ولمحت سواده من بعيد ما ميزتها بشر لو حيوان بعيده عني وظلام، جريت التفگه من الگاع لمن صار جريب عليه ميزته بشر
-ياهوو هذاا.
مــيثم :: انااا.
كضيت هاسكي حتى مايركض ومشيت عليه
-شجابك؟
مــيثم ::اجينا انا وسلطان طفينه المكاين واجيت اشوفنك خاف تحتاج شي.
-لا كضيت ماضل شي هم راح اطفيهن
مشينا نرد للقرية وسألته
-شسويت علمود موضوع محمد؟
-حجيت للبنيه وهيه راح تحاجي صــيهد حتى يبطل مايطيها اله.
سكتت ما اريد ازيدها عليه تونا وصلنه القرية ولگيت صــيهد متانينه يم باب الحوش بساع جر مــيثم طگاه دفعته ما فاهم صيح
-محاچي اختي ووولك؟ تلعبون عليَّ انتم؟؟
-شبيك وولك تسودنت؟
دار علي خازرني ويصيح
صــيهد:: انتَ تنچب وتسد حلگك، يشهد الحسين حلگه اشگه اليجذب، ياهو منكم محاچي اختي هااااه؟
عاينت الميثم ساكت ايده على خشمه هز راسه
مــيثم :: اول واخر مره تمد ايدك عليَّ انا مو وهـــب ولا سلطان تطگني واسكتلك، محد محاچي اختك ويابه زوجها المنو ماتريد مالي غرض بيكم.
دفع ايده ومشه البيتهم وهوه يصيح وراه متسودن دفعته حيل
-كااافي سد حلكك؟
رد عليَّ يهومش وينتر
صــيهد:: انتَ مخلي رنـــه تكلها محمد يصاحب نسوووان؟
سكتت مافاهم وهوه يعت بيه گتله
-لاا.
-لا تجذب لاااا تجذب تضحكون عليَّ انتم لو انتَ لو مــيثم واحد منكم محاجي اختي وخلاها تصيح ما اريدن محمد وهسه تگلولي محمد شمسوي؟
-انا حجيت يم رنـــه بس ما ادري بيها مخابرتها.
-شحجيت؟
-گلت مو خوش زلمه يصاحب نسوان.
دفع ايدي حيل ومشه ينفض غضب ، الله يهديك.
""""
جــويريه :: شبعت بچي مــاسه الحد ما نامت وكعدنا الصبح على صوته بدلنا للمدرسه ونزلنا مــاسه طبت للمطبخ تسوي ريوك وهوه راح للمشتمل بدل واجه وكف بالباب يعاينلها وهيه عيونها بعدها مورمه تسوي ريوك ومدنكه گالها
صــيهد:: عدج امتحان انتِ؟
هزت راسها لا سكت شويه ورجع حاجاها دنكت مبتسمه مبين يريد بس يحجي وياها لان شافها ضايجة وهيه كملت الريوك خلت الصينيه بالگاع اجه كعد واني خليت صينية الچاي يمه گال
-يله اكعدن.
مــاسه :: اكعدي تريگي جوري إنه شبعانه.
ضل يباوعلها غسلت ايدها وكعدت بصفي تريكتا ساكتين وهوه اول واحد گام غسل وطلع للمشتمل يجيب ملازمه، لبست عبايتي وانتظرت مــاسه لحد ما دگلنا هورن گالت.
-اطلعي جوري وانه هسه اجي.
طلعت قبلها صعدت وره اباوعله يعدّل شواربه بالمرايه مال السياره باوعت لملابسه شكد مرتبات وعطره تارس السيارة اجت ببالي حبيبته وضل السؤال ياكل بگلبي تحمحمت باوعلي همست
-ميخالف اسألك على شي؟
هز راسه اي بقيت ساكته متردده وهوه عيونه بالمرايه عليَّ
-احم اسألك على حبيبتك نجمه هيه وياك بالكليه؟
عكد حاجبه ساكت دنكت مرتبكه ومتندمه لان حجيت شويه وگال بهدوء
-اي وياي.
ابتسمت واني مدنكه رفعت راسي لگيته بعده يباوعلي بالمرايه من حجه بهدوء اخذني الواهس گتله.
-هاا
-اي بس مو نفس القسم.
-اي عادي حتى لو المهم وياك مو اني اگول تروح للكليه حيل مرتب وهاي طلعت علمودها ههههه.
احجي واضحك خزرني ينتر
صــيهد:: شتقصدين ووولج؟
سكتت مرتبكه وهوه خازرني صعدت مــاسه يمه ومن شافته خازرني دارت عليَّ ما فاهمه وهوه فر السياره يحجي
-تدوس بالبطن چنها امها.
-لا تحجي على امي.
نتر
-سدددي حلللكج
درت وجهي للجامه ساكته وهوه بعد ما يسكت لگاله سالفه نزلنا بباب المدرسه وراح گالت مــاسه
-شبيه وياج؟
-مو صوجه اني الغلط من عندي انعل ابوك لا ابو نجمه شعلي بيكم واحجي.
مــاسه :: وولج جاي تغلطين على ابوي.
سكتت دخلنا للمدرسه الطالبات قليلات وحتى المدرسات مو كلهنّ، كلمن راحت الصفها.
"""
ريـــمه :: كعدني سلطان الصبح سويتلهم ريوگ هو وابوي تريگوا وانه بالمطبخ بعدني ما احجي وي ابوي لأول مره زعلنه يطول لاول مره احسه جاس گـــلبي، سلطان گبل لا يطلع گالي
-من تسوين غده احسبي حساب طــروادة
-ان شاءالله
راح وانه نظفت البيت وطبيت للمطبخ اسوي الغده ابوي على العكازه يمشي أفتر بالحوش والنوب أجه للمطبخ
-ريـــمه.
درت عليه يعاينلي ساكت وفتحلي ايده
-تعاي يابعد حيل ابوج
مشيت الحضنه مخنوگه صميت وجهي بصدره وهوه يبوس براسي
-اروحنلج فـــدوه يا بويه جعل ايدي بالكسر يوم الطگيتج
وخرني من صدره يمسح عيوني ويبوس راسي
شاكر:: كون بعدج زعلانه عليّّ؟
هزيت راسي لا گال
شاكر:: طكيتج من حرگت گـــلبي هم انتِ ماعرفتي تصرفين وهم سووني غدار اخوي وانا لابيه واگولن حرمتي السوت كل هالمصايب ولا البيه واسكت اعذريني ريـــمه بويه.
هزيت راسي اي ابوس بأيده
-عاذرتك يابه.
كعد يمي بالمطبخ يسولف وياي وانه اطبخ گال
شاكر:: انا وشامل گبل كله سوه رحنا للجيش النوب شردنا بعد فراريه كضيناها بالهور، نصيد سمچ بفاله هوه يصيد وانا اخبز والنوب يرضى؟ لا مايعجبه هاي الخبزه محتركه وهاي عوجه والا تسويها زينه ولو ما سويت الخبزه عدل ما يطيني من السمچ.
ضحكت مكيفه على سوالفه وهوه يحجيلي والضحكه تارسه وجهه وعيونه متروسه دموع. گال
شاكر:: احنا فراريه والدنيا محتركه علينه وهوه النهار كله يفتر بالفرس مالته لمن الجيش كضوه يم السده گالهم جا تعالوا ناخذ اخوي جابهم واجه عليَّ يگلي ما اطاني گـــلبي انا انسجن وانتَ تضل شارد.
-هههههههه والله عليه سوالف
هز ايده يضحك
-اااووه كارثة عمج وعنودي چان دوم معاند ابوي مره جدج جبره يكعد بفصل والحجي ماعجبه طك الشيخ بنفاضة الجكاير خله الفصول تتراگع نريدها تنسد ماكو.
-اي هوه عصبي هههههه انه اتذكر مره وحده طكاني راشدي من جنت صغيره، حجيت حچاية مو حلوه طكاني وگال النوب اچويچ.
ضحك ابوي وهوه يگلي
شاكر:: ربيتي عدّهم انتِ
اشتغل واحجي وياه واضحك عبالي قصده ربيتي عدهم لان دوم اروحلهم ماجنت ادري قصده شي ثاني.
ضل وياي يسولفلي وانه اطبخ ومكيفه بسوالفه شويه وراح لغرفته نام كضيت الغده وعزلت الطرواده بجدوره صغار اثنين
مشيت خابرت سلطان من تلفون ابوي گتله
-اكلك هوه طــروادة وين؟
-راح للكليه، خير ليش؟
-ها مو كضيت الغده ردت اوديه لبيتهم.
-لا من اجي انا اوديه.
-يله خوش.
سديت التلفون رمشت السجاد خابرني
-الو، الله يساعدك
-هلا يابعد روحـــي شلونج.
-الحمدلله انتَ شلونك ها خوماتعبانين؟
ضحك يحجي وي عبود
-ولج كضيناها صعدت ورمت رجلينه وكل شويه صاعدين بسيارة.
-هههههه خوش مشايه.
-يجوز الفجر نوصل يم اهلنه للحسينية وباجر نروح نزور.
-الله يسهل يله اخذ راحتك سلمنه.
-عليمن؟
-على هجوره من تشوفها.
ضحك وسد التلفون اريد ارجعه ورجع خابر سلطان بس حاوبته گال.
-اگلج انا بالمعامل لمن يكضون واجيب الفلوس سالفة انا والوحده ودي غده طــروادة وردي للبيت هوه اظن ب١٢ يرد .
عاينت للساعة بعدها بهدعش سديت التلفون رجعته يم ابوي لبست عبايتي اخذت الغدا ومشيت بعدني ما واصله وأسمع الصخله تصيح والدجاج وصوت هاسكي فتحت باب الحوش ومديت بس راسي خاف مفتوحه سلسلته لگيته مربوط ويفتر داير ماداير السلسله وبس لمحني نبح عبالك كاتله ابوه يريد يجيني غميته وطبيت شكد يكرهني.
عبالي باب الهول مقفول كل مره اذا مقفول ألكه المفتاح يم البلوكه البصف الحوض هالمره مالگيته وبس سحبت السيمه انفتح الباب استغربت محد بالبيت ليش عايفينه مفتوح والتلفزون ضال مشتغل طبيت للمطبخ حطيت الجدوره على الطباخ.
وعاينت الجدر الخبز حطيتلي ماعون نگعت بيه الخبز ومشيت يم دجاجات رنـــه اطيته الهن وضلت الصخله هم تفتر وراي
-والله لو تدري عايفينجن جوعانات الا تنحرهم.
رديت للمطبخ جبتلها خبز اكلته وهاسكي اطيه خيز يشمه ويعوفه مايعجبه ياكل بس خبز يريد لحم لو سمج
-ضل جوعان هذا الموجود.
عاينلي عيونه تخوف واشوفن السلسله الحلقة اللي مثبته برگبته ما مسدوده ضاله مفتوحه بس يضل يفتر شويه بعد تفلت درت وجهي منه شلت الصونده من الگاع ترستلهن ماي عاينت بعد ماكو شي كلت خل افلت گبل لا يفك روحه من السلسله ويطلع قهره بيه
مشيت اريد اطلع وتذكرت التلفزون ضال مشتغل طبيت للهول طفيته وصارت عيني فوگاه
"البوم صور" وبره الالبوم صورة ابيض واسود لعمي شامل ابتسمت لزمتها بين اديه اعاين لملامحه.
جريت الألبوم وانه واكفه اگلب بيه صور كلهنّ قديمات اللي يخصن عمي شامل بالابيض واسود واللي يخصن عائلته ملونات وانه اگلب بيه طاحن بالگاع من بين صفحاته أربع صور، رجّعت الالبوم على التلفزون ودنگت شلت الصور من الگاع اركز بيهن هاي عمتي ام كهلان وعمي شامل وطفلة بعمر سنة بينهم لمن ركزت زين هاي انه شايفتلي صور عد امي واعرف شكلي ضحكت شلون كاضيني بيناتهم وضاحكين
حطيت الصوره الثانية فوگ الاولى راحت ابتسامتي وانه اعاينلها هاي بالزيارة واكفين وانه بأيد عمي شامل شايلني وعفراء وطرواده بالگاع واكفين كدام أمهم وابوهم، درت الصورة الثالثة بساع هم انه بين عمي شامل وزوجته والرابعه نايمه بين عفراء وطرواده كلهن تقريباً عمــري سنة آو سنتين
شلت راسي بصدمه على فتحة باب الغرفة طلع طــروادة بدون تشيرت ووجه احمررر وشعره مخربط الفراش طابع بزنده صاير خطوط حمر فتح عينه بصدمة من شافني وانه عقلي يودي ويجيب من الصور ومن صدمتي بوجوده دنگت بسررعة وهوه رجّع للغرفة وصاح
-لا ترحيين.
جريت الالبوم وكعدت بالگاع اگلب بيه بساع ليش هلكد الي صور عدهم ليش حتى بالزيارة وياهم ونايمه عدهم، گلبت بالألبوم بسرعة صارت بوجهي بعد صوره طفله بالگماط بحضن طــروادة وهوه بعمر الست سنوات او اقل ما ادري يضحك بس ما متأكده اذا هاي هم انه لو رنـــه شلت راسي من اجه لابس قميص عاينلي اگلب بالصور بلع ريك مسحت وجهي ودرت الصوره عليه
-هاي انه اللي بحضنك؟
عاين للصوره وهز راسه اي، شلت الصور الاربعه اراويهن اله
-وهذن هم انه مو؟
-اي
حجاها واجه جر الالبوم من أيدي رجعه على التلفزون مسح وجهه وگفت والصور بأيدي اعاينله وگلبي يدك حيل اجت ببالي الف فكرة وفكرة
-ليش هلكد الي صوّر يمكم؟
جر الصور من الطرف اخذهن من ايدي رجعهن بالالبوم گال
-امي وابوي اثنينهم يحبون التصوير والذكريات وچانوا يصورون كل ولد عمي مو بسّ انتِ.
مسحت وجهي اهز راسي لا اكو شي انه حاسه اكو شي غريب عاينلي عينه بعيني وجهه احمر وعيونه ذبلانه وكل شويه يكح
-بس بس يعني انه وياكم حتى بالزيارة وهم نايمه بفراشكم انتَ وعفراء يعني حتى چنت انام يمكم.
مسح وجهه ودار يكح رجع عاينلي
طــروادة :: ما ادري هوه امي وابوي يحبونكم كل ولد وبنات اعمامي چانوا دوم عدنا هذا الاتذكره.
سكتت وانه اعاينله بشك ما مقتنعه عاين عليَّ گال
-تذكرت انتِ ضليتي يمنه مده لان امج وابوج چانوا يردون يتطلكون.
حطيت ايدي على گـــلبي وزفرت نفس براحة همست
-خفت عبالي انه بتكم .
-وليش خفتي؟
عاينتله رفعت اكتافي ما ادري دار وجهه گال
-لا اطمني مو بتنا شني فلم هندي مو بتنا بت ميلاد انتِ بس ضليتي عدنا مده لان رادوا يتطلكون اهلج وانتِ صغيره انا هيج اتذكر وبعد ما ادري.
-ميخالف تطيني الصور اراويهن الابوي واسأله؟
هز راسه لا
طــروادة :: لا.
-أرجعهن والله.
شال الالبوم وراح الغرفة رنـــه مشيت وراه احجي
-العصر ارجعهن والله.
-والله ما اطيهن.
ضم الألبوم بكنتور رنـــه وسداه دار عليَّ گتله
-هاي هيه براحتك.
ودرت اريد اطلع اجه وراي
-ليش اجيتي ردتي شي؟
-لا جبتلك غده.
دار للمطبخ ومشه بساع شال الجدر واجه علي وهوه يگول
طــروادة :: ليش تعبتي روحج اخذيهم انا اسويلي غده.
حطيت ايدي ادفع الجدر بأيده احجي
-لا والله لا تعبـــت ولا شي من غدانا ألف عافيه.
-ريـــمه آخذيهم.
-والله ما آخذهم ماتعبت شسالفة.
انه ادفعهن عليه وهوه يدفعهن عليَّ الحد مادفعهم على ايدي حيل وگال
-ينذب حرامات.
ووي حجايته دفعتهن بأيده وهوه عباله جاي اكضهن طاحن بالگاع تبدن التمن صار طشار والمرگه تلفت عبايتي
عاينتله ميته من القهر ودنگت الم التمن بأيدي رغم حار واحجي بحرگه
-ليش تشلع الگلب انتَ تبده ارتاحيت هسه.
مشه للمطبخ جاب وصلت المسح ودنك يمسح وانه روحـــي طلعت أحجي بقهر وهوه يمسح وگال
طــروادة:: ما اكل من بيوتكم انا.
درت عليه مصدومه انه جان عبالي لان يستحي ياخذ من عدنه اكل، شلت جدر التمن اعاينله ومدري شبيه انقهرت حيل
-انه طابخته ما مخليتلك بيه سم ترى.
حجيتها ونزلت دمعتي بساع حيل قهرني مسحت عيني بردني وجريت الجدر الثاني من الگاع حطيته على جدر التمن شلتهن ومشيت وهوه وراي
-اووكفي ما فهمتيني مو عليج انا اوكفي.
وانه بس اريد آرد لبيتنا وصلت لباب الحوش اريد افتحه جراني من عبايتي من يم ظهري
-وووخر.
نتر
-اصبررري.
عاينت لعيونه احجي ومختنگه
-ترى لا انه وصخه ولا ما اعرف اطبخ ولا مخليتلك سم ولا انه سحاره حتى تشمر الاكل بالگاع وتصيح ما اكل من بيوتكم .
هز راسه اي
-ادري بيج انا مو عليج ترى يعني لو طابخة ببيتنا ومن مسواگنا آكل والله.
دنكت آمسح عيوني حيل قاهرني گال
-ريـــمه عاينــي والله انا ما اجذب، مو مثلج.
شلت راسي خازرته وهوه كوه فاتح عينه مصخن مدري شنو ضحك
-ضل لا تاكل انه هم لو ما سلطان فلا اجيبلك غده ياهي مالتي بيك.
-انعم الله عليج وعلى سلطان ما تقصرون.
حجاها وكح مختنك بعد ما تنفس جلبت بيه الكحه ضليت اعاينله وهوه كعد على الدچه مال الحوض يكح حيل
-اجيبلك ماي؟
وهوه مختنك عفت الجدر بالگاع ومشيت للمطبخ اركض جبتله كلاص ماي يريد يشرب مايگدر كد ما الكحه خنگته
-هاي انه شورت بيك.
عاف الكحه والخنگه بس حتى يرد عليَّ
طــروادة :: ما تشورين انتِ بت ميلاد.
-أشرب اشرب قريتلك عليه
شرب ماي نزل الكلاص وهوه يگلي
-سحرتيني قصدج؟
-هااه شفت والله العظيم انه كاشفتك ماتاكل طبخي عبالك انه سحاره والله مبين مبين ترى.
ضحك حيل وكف يمسح بوجهه وانه ميته من القهر درت اريد اخذ جدورتي وانصدم بهاسكي فالت من السلسه ويلحس بجدر المرگه كشت روحـــي صيحت عليه وهوه ماصدك شافني عبالك متحمل عليَّ ركض عليَّ بكل حيله مدري شلون لحگت اشرد واصرخ چلبت بظهره
-يممممه يمممه اكلاااانه اكلااانه.
افر بيه متسودنه وهوه يصيح على هاسكي وهاسكي ولا يرد منه متسودن عليَّ يريد ياكلني عجبته ينبح ويفتر علي وطرواده يريد بس يحميني منه
-يمااااااي يمااااي.
-وولج سدي حلگج ، هاااسكي شمالك تسودنت وووولك.
وانه نبشت ظهره نبش كل حيلي مچلبه بالقميص وافرفر بيه مناه ومناه يريد ينزل يكض هاسكي وانه آجره اصيح وهوه يصيح
طــروادة :: هددديني انتِ بس لا تكضيني
-يعضنننننني.
-هوه لان كاضتني يريد يعضج هدددي شكيتي القميص.
فرريته حيل اريد بس أوصل الباب الهول حتى اطب بالبيت وأسد الباب وهاسكي ولا معترف بطرواده مطلع سنونه هلكد السن چنه مال اسد ويريد بس يكضني ويفترسني
-هااااسكي ووولك، خااب هديني بس خل اكضه
-ما اهدددددك والله ما اهددددك.
واسحل بيه كل حيلي ما احس الا القميص اجه بأيدي وهوه بساع كض هاسكي سد حلكه وانه بس القميص ضلّ بأيدي دار علي يريد يحاجيني وانه ركضت ما اشوفن دربي حتى جدورتي عفتهن بعد ما اريدنهن.
طبيت لبيتنا غسلت وجهي اديه يرجفن من وراه بليس بلسس مو چلب حاط دوبه من دوبي حسره يشوفني چن شايف كتال اهله الچلب ابن الچلب، كعدت شويه اريد نفسي يستقرّ منا لمن صارت الصلاة كعدت ابوي صله وگال ما نتغده نتاني سلطان يجي كعدنه بالهول گتله
-اكلك بويه ذاك اليوم رنـــه راوتني صور وشكد الي صور يم بيت عمي شامل من چنت عمــري اظن سنة مدري سنتين وماخذيني وياهم للزيارة وحتى صوره الي نايمه ببيتهم.
-اي چان عمج يموت عليج وياخذج يمهم نوبات تظلين من الصبح لمن تنامين يجيبج.
-هاه
هز راسه اي سكتت لمن اجه سلطان تغدينه سوه للعصر كعدنه انه وياه بالمطبخ اسويله چاي وابوي على العكازه راح البيت غانم يتعذر منهم لان زعلانين علينه منهد سالفة سلطان، دك تلفونه وهوه يقرض بأظافره رد وفاتح السماعة سمعته صوت صــيهد يحجي وياه من وره خشمه
صــيهد:: ياهو منكم يروح وي الفلح اليوم؟
سلطان:: شويه واروحن.
-اذا تعبان خل بريا يروح لمن انا اجي.
-بريا الفجر طلع للزياره
ختم المكالمه وياه شرب چاي شويه واهل الاء جابوها، اخذت غيث منها ابوس بيه يخبل يخبل ضلت هيه يمي بالمطبخ تسأل منو ومنو راح للزياره وانه اسولف وياها وابوس بغيث سلطان يم اخوتها بره لمن راحوا وطب للبيت اخذ غيث من ايدي شبگه وباسه يحجي وياه
سلطان:: بااابا غيوثي حبيبي.
الاء:: مشتاق بس الابنك.
عاينلها ساكت شال غيث بأيد وحده ومشه يمها باسها من راسها. وابتعد يحاجيها بهدوء
سلطان:: ما محاچيچ انا الاء انتِ رحتي.
-غير تريد تتزوج عليَّ شني ضلتي هناه.
سكت سلطان مقهور وهيه همّ حقها شما تحجّي حقها اثنينا مدنگين نسمعلها لمن گالتله
-انه ولحسين لو تتزوج عشرة مالي غرض بيك ولا اهتمن بالعكس افتك منك بس ما تتزوج رغد.
فتحت عيني مصدومة جرت غيث من ايده وهيه تگله
الاء:: لو تريد باجر اخطبلك عدي بت عمي تسودن من الحلاه اخذها واخذ فوگها اثنين وألله أكيف هم الي غرض بس رغد والله ما اخليك تاخذها لو شسوي.
يعاينلها مبتسم وگالها بهدوء
-آخذها لو شما تسوين.
-خوش نشوف ياهو اليمشي حجيه انه لو انتَ.
وهوه يضحك مصدوم بيها مشت تريد تصعد الغرفتها صاح وراها
-الغرفة منظفها اذا اجيت ولگيت بيها ريحه الا احركها عليج.
طلع من البيت مقهور رغم هوه ماينام بغرفتهم بس يطب ياخذ هدومه وينزل ينام بالدوانيه الا اذا انتبهوله الولد يستحي ويصعد يضل شويه ويطلع لو يروح يم بيت عمي خليل لو للگيعان .
"""""
رنـــه :: زرنه النجف ورحنا للمگبره زرنا أهلنا وراها طلعنه لكربلاء طول الطريق مواكب والناس تمشي تمنيت احنا هم نمشي گالت عفراء
-من نوصل الحسينيه ونرتاح نضل نتمشى.
هزيت راسي خوش لمن وصلنا للحسينيه مالتنا بالليل قريبه على كربلاء
العالم تمشي بالملاييين، عفنه سيارتنه بسايد وعبرنه حتى نوصل للحسينيه عاينت وضحكت بفرح من شفت ولدنا يم مناقل الفحم يشوون ويوزعون للناس شافنه وهـــب واجانه بساع سلم على منذر گاله
-خل اوصل البنات واجيك.
ومشه گدامنه نفتر من وره الحسينه على البستان الغرف الوره النا طبينه انه وعفراء، صارت بوجهنا رغد ضحكت وهيه تصيح
-ياا هلاااا.
وشبگت على عفراء تبوسها واخذت شمس مكيفه بينا وانه بس اريد اكعد تعبانه عفتهن ومشيت طبيت للغرفه لعبت روحـــي من شفتهن ميلاد وسعاد وجده كاعدات سلمت على ام صــيهد وعلى مرت مرتضى ودنكت باوست جده صاحت ميلاد
-جا احنا مو بعينج ولج شو ما تسلمين.
-بكيفي انه يعجبني اسلم بس على جده.
جرتني جده من ايدي كعدتني بصفها باستني تضحك مدري شعجب الله هاديها لان جايه للزياره.
طبت وراي عــفراء سلمت على جده وعلى سعاد وعافت ميلاد وهيه تسودنت تغلط عليها وجده تردها وتتعارك وياها عاينت على صفحة بــدور نايمه وفاتحه حلكها كعدت يمها حطيت اصبعي بحلكها
-اكعدي يمعوده.
مارضت تكعد ضجت كمت وي عفراء غسلنه بالحمامات، الحسينية مقسمه صالات كبار گدام هاي للزوار ووره غرف الاهل الحسينية
ام صــيهد خلت غراضنا بغرفة وحدنا صلينه بيها شويه وسمعت صوت وهـــب من بره يصيح طلعتله عــفراء جابت منه صينية عشا موديها منذر اكلنا وحسين وزهره طلعوا بره يم الولد يعاينون للزوار وانه تمددت تعبانه خابرت عبود گالي الصبح انه يمج
-اذا نايمه مو تكعدني اموتك
-خوش ولي يله خل نمشي شويه بعد گبل لا نصعد.
سديت التلفون منه ارتاحينا للهدعش گالت عفراء
-نطلع بباب الحسينية على الكراسي
-آي ياريت
لبسنا عبينه شمس نايمه عفناها يم ام صــيهد وطلعنه كعدنه بباب الحسينة على المصطبات ونعاين للشارع يروش من الزوار وصوت القصايد الحسينية تارس الشارع كلها مشغله المسجلات،
درت اعاين لكلشي واحفظ كلشي اشوفه بأدق تفاصيله، مناقل الفحم النار مشتعله بيها وقواري الچاي الكبار تفور، وابعد منها منها ترامز الماي وصوت الحجي اللي واكف يم الچاي وهوه يصيح
-تفضل يزاير چاي يزاير.
ويوكفون يمه وهو يصبلهم چاي بفرح مكيف بيهم وكفوا يمه منذر ووهب يساعدونه ويحضروله استكاين يخلون بيها شكر عاينلنه منذر وصاح لحسين ودالنه بأيده چاي درنه وجهنه من الشارع وشربنه ســليم شافنه واجه يمنه باله يم عفراء عباله زعلانه منه دار وجهه وگالها
-شلونج خويه؟
-الحمدلله الله يخليك انتَ شلونك؟
-الله يسلمج، ما محتاجه شي؟
-سلامتك خويه.
-خوماضال بخاطرج مني؟
عــفراء:: ياا لا والله وروح ابوي.
سكت اخذله شويه وماگدر يضمها گالها
-جا المن كاعدات هنا؟
-نعاين للزوار لمن تكعد بتي واطبن.
سكت راح وهيه مغطيه وجها بردن العبايه وانه اذا ابتسم تخزرني ماترضى، شويه واجت يمنه بــدور توها كاعده وبدور شلون عليها ضحكه ضحكت وخلتهم يخوزون بينا عفراء ضاجت كمنه طبينه جوه بساع لفيت راسي ونمت للفجر احس واحد يشبگ بيه ويبوس بخدودي
عبود:: ووولج اكعدي
شلت ايدي شبگته وانه مغمضه باسني ووخر يضحك ويحجي وي عفراء فتحت عيني شفته گالها
-يجوز بهدعش بالليل اليوم يطلعون صــيهد وطرواده وباجر بالليل يردون.
عــفراء:: اي خابرني گالي.
رنـــه :: جر طرف البطانيه من عدي وتمدد يم زهره شبگها ونام
كمت توضيت وصليت وعفراء تلبس بجواريبها
-وين رايحه؟
عــفراء:: اكعد بالباب يم عمتي ام صــيهد وجده
لبست عبايتي ومشيت وياها بعده الضوه توه يطلع الزوار يمشون وتسمع بس صوت الخطوات وهـــب وسليم وسجاد واكفين يم مناقل الچاي ويمهم صمون وأجبان كامت ام صــيهد جابتلنه من يمهم تريكنا، وبعد ما طبيت جوه عفراء راحت وانه ضليت يم جده منا لمن كعد عبود وچلبت بيه
-خل يشغلون بالمسجل قصيدة يسجلني كلساع اسمع موكب مشغلها بس احنا لا.
راح الوهب حاجاه ووهب راح شغلها، دار عبود عاينلي هزيتله راسي بفرح، أصور فديوهات صورت الزوار النوب صورتهم للظهر شفتهم يسلمون على واحد ما انتبهت منو ظهره علي الحد مادار وانتبهله بريا عاينلي ودار للولد يحجي وياهم كمت طبيت جوه نمت يم عفراء والعصر هيه كعدتني تحجي عليَّ
-گومي خل نمشي چم خطوه جا جايين ننام احنا.
- نعوف غراضنا هنا؟
- اي هيج نمشي شويه ونرد.
گمت لبست وبدور وهاجر وام صــيهد اجن ويانه وحسين وزهره الولد من شافونه گالوا العبود روح وياهن اجوا هوه وسجاد وبريا يمشون گدامنه واحنا حالنا حال الزوار نمشي بس انه اتلفت واعاين لكلّ موكب الحد ما زهره شافتهم يوزعون عصر رادت من عده بس مو وگفنا كسرت خاطري بالموكب الثاني شفتهم يوزعون ماكتلهن راح اروح گبل رحت جبت العصر اجيت مالكيتهن مشيت ليگدام ماكو تلفتت محد وانه تلفوني ضال على الشحن ماجبته وياي عشر دقايق صبرت ادور من مالكيتهم الدموع جرت.
وكفت على صفحة امسح عيوني واعاين بخوف ساعة ارجع ليوره اكول خاف رجعوا يدورون عليَّ ساعة امشي ليگدام، ادور والعصير بأيدي ماذابته شويه واحس جسمي كام يرجف وحلكي نشف كامت عيوني يغوشن كعدت على كرسي ابجي ومسافه عني كاعد رجال چبير على رگبته چفيه خضره اجه يمي وگال
-ها بويه ضايعه من اهلج؟
بجيت اهز راسي اي گال
-حافظة رقمهم.
-اي حافظته.
اطاني تلفونه وابتعد من يمي مسافه دكيت رقم طــروادة بس هوه حافظته بس كال الو حاجيته وآنه ابجي
-الو طــروادة ضيعوني.
-الوو.
-ضعت انه ضعت.
-رنـــه؟؟؟
-اي انه رنـــه ضعت منهم.
وابجي مگطعه روحـــي وعرگت رغم الجو مو حار بس انه انتهيت من السكر وطرواده مايعرف شيگلي صوت سيارة وصوت صــيهد يمه رجع گالي
-وين انتِ؟
-بالشارع.
-ادري بالشارع وين؟
-كاعده على كرسي، سكري تخربط جاي ادوخ وهمه ماكوو
-رنـــه فـــدوه اروحلج لا تجلطيني هسّه اموتن والله بس يصيرلج شي.
واسمع صوت صــيهد يمه يگله
-خل تشوفلها عمود توكف يمه وتگللنه يارقم
درت عيني عاينت الرقم العمود گتله
- ٩٨٨ مقابيله انه كلش.
-يله لا تخافين راح اخابر عفراء ضلي كاعده بمچانچ لا تتحركين ابد.
-اي.
-هذا تلفون المن؟ وتلفونج وين؟
-هذا تلفّون زلمه اطانياه تلفوني عفته بالحسينه على الشحن.
-يله رنـــه لا تخافين حبيبتي لا تخافين هسه اخابرهم.
سد التلفون اطيته للحجي ايدي ترجف وضليت كاعده بمجاني بس روحـــي رايحه دكات گـــلبي تخربطت امسح بوجهي من العرك طاح كلاص العصير من ايدي، كعدوا بالكراسي اليمي شباب گمت ابتعدت وكفت بصف العمود واعاين وينهم ليمت يجون .
كمت شويه شويه عيوني يصيرن ضباب اريد اطيح وكوه مقاومه الحد آخر لحظة شفت عبود يمشي باستعجال يفتر يدور هوه وسجاد وبريا رفعت ايدي لمحوني وطحت على اركبي كوه اشوف اجوني يركضون كضاني بريا من ايدي وعبود من ركض ضل كوه يتنفس صوت نفسه يخرش
عبود:: رررنه.
چلبت بأيده آيدي ترجف وبريا كاضني من أيدي الثانيه كوموني للكراسي كعدت وعبود كعد كدامي وبريا واكف يمي سجاد ركض جاب ماي واجت عفراء روحها رايحه خايفه عليَّ ومن شافتني بساع صاحت
-هبط سكررها شي حلو شي حلوو.
ركضوا بريا وسجاد على المواكب وام صــيهد كعدت يمي تمسح بوجهي
-اسم الله الرحمن شبيج يمه؟
-خفت.
عــفراء:: وووين رحتي مو ويانه انتِ؟
غمضت عيني ساكته لمن سمعت صوت بريا جايب عصير شربني عبود وضلينا كاعدين بنفس المجان مغمضه عيني وهمه فوگ راسي خايفين علي الحد ما ارتاحيت شويه وكمنا نرد للحسينيه،
حاطه ايدي بأيد عبود مستنده عليه سجاد وبريا يمشون گدامنه وهوه كلساع يلتفت يعاينلي،
لمن وصلنا للحسينة دخلت للغرفة وعبود قاسلي السكر من الهبطه والدوخه نمت ما كعدت الا على ايد طــروادة تمسح بوجهي
-اجيت؟
يعاينلي بقهر كعدت سلمت عليه
-شلون صرتي؟
-الحمدلله زينه.
-جا شلون ترحين وتلفونج يضل هناه.
-جان مابيه شحن.
عــفراء:: بيه ستين تگول لا يطفى خلته على الشحن.
جراني الصدره متحسر گتله
-اكلك ودجاجاتي وصخلتي ياهو يطيهن اكل؟
-وصيت سلطان عليهن.
-يله ريـــمه تدير بالها عليهن.
طــروادة :: اجت ويانه ريـــمه .
شلت راسي من صدره بفرح
-صدددك؟
هز راسه اي واندك باب الغرفة عمتي ام صــيهد والبنات وراها طــروادة بساع كام سلم عليها وطلع من الغرفه طبن البنات مــاسه وجويريه وريمه وبدور ضحكت مكيفه بيهن
-عبالي ما تجين.
ريـــمه :: اي هوه على اساس ما اجي بس سلطان كال لا روحـــي وي البنات.
عاينت الماسه ضايجه مدريّ شبيها شويه وجريتها احاجيها ماسولفت شبيها ضلت ساكته عفتها على راحتها، للغروب ام صــيهد كالت تعالن نطلع بره لان هذا اخر يوم بالليل نروح نزور ونرجع الاهلنه.
مشينه كعدنه وكلنه مغطيات وجوهنه وولدنا يجهزون بالعشا حتى يوزعون اعاينلهم ولا واحد بيهم ما يشتغل كالت بــدور
بــدور:: صــيهد بالبيت استكان چاي ما يسوي الروحه وهسه يصب للوادم كون بالبيت جا كال ما اعارف اكض القوري.
جــويريه :: ضحكت اعاينله دار علينا غطيت وجهي زين، بصفه طــروادة اثنينهم لابسن اسود ولافين شماغ على روسهم واثنينهم يدخنون مقهورين مدري عليمن، عافوا الچاي بأيد وهـــب وراحوا للشوي من بدوا يشوون شياش الكباب على مناقل الفحم، والزوار لازمه عليهم سره يجهزون لفات ويطونهم منظرهم حيل مريح ويطمن.
رنـــه :: وخر طــروادة من يمهم راح للمسجل شغل قصيده يسجلني علاها ودار عينه الي ضحكتله اشري غطي وجهج كرصتي عــفراء
عــفراء:: مكشره رنـــه غطي حلگج.
حطيت العبايه على وجهي، مره اعاين للزوار مره اعاينلهم خلصوا العشا واجه موكب يلطم استعراض وهمه كلهم دخلوا بنص الموكب يلطمون وياهم الحد ما الموكب راح وكعدوا يرتاحون.
للتسعه منذر گال يله وطرواده عافهم واجه ويانه رحنا الكربلاء زرنا وطلعنه للسوك اشترينا وبنفس الليله ردينا للقريه طــروادة اللي يسوق لان منذر تعب، وصلنا الفجر، عفراء نزلت ويانه ومنذر راح الاهله، بس بدّلنا ونمنا عبالك صار سنة مانايمين.
كعدت الظهر لكيت عفراء منظفه وطابخه غده وغاسله هدوم وعبود هم لكيته واصل كلها ردت للقرية ضلوا بس جدي وعمي وليد يكفون الحسينية ويجون.
كاعدين بالغرفة عفراء تدور على ممية شمس وماكو روحها طلعت طب طــروادة اخذها منها يسكّت بيها كمت فتحت كنتوري اريد اغسللها الممه العندي طاحن البومات الصور بالگاع عفتهن ورحت غسلتها بماي حار واطيتها العفراء سوتلها ممه وحطتها بحضن طــروادة كاضلها الممه هوه ويضحك عليها
دنكت للاالبوم اعاين بالصور گال طــروادة
-اولت امس ضليت اعاين بيهن من الضوجه وحدي.
-والله عرفت لان انه ما مخليتهن هناه.
ضحك وانه اگلب بيهن درت صوره الهم
-هاي انه بالمرعى وي ابوي؟
عــفراء:: اي والله چنتي لزگه وين مايروح تبجين وتردين وياه.
ضحكت ادور بالصور واضحك صوره منهن واكف هوه وعمي شاكر بالزرع لابس دشداشة وچفيه لافها على رگبته، وصوره ثانيه اربعتهم سوه ابوي وعمامي ويضحكون، وصور للكل ضحكت وشلتلهم صوره ولد صغير بلا بجامه بس الفانيله طويله مغطيه زروره وعلى راسه جفيه وعگال ابوي شايله ضحك طــروادة كتله
-هذا ياهو؟
طــروادة:: هههههه بريا .
وانه متت من الضحك
-شماله مالابس بجامه؟
عــفراء:: جان يكرها وابوي يوميه يكتله علمودها يلبسونها اله وينزعها.
-ههههههههههه همزين گتولي.
طــروادة :: فنچ العيرتيه بيها غير اموتج.
-لا اتشاقه
سكتت اعاين بباقي الصور كلش هواي ردت اضمه من شلته ضلن صور بالگاع شلتهن درتهن الهم
-هاي انه؟
عــفراء:: لا ريـــمه.
عاينت بالصور معزولات عن باقي الالبوم طايحات وحدهن وكلهن بيهن ريـــمه ووحده نايمه بين طــروادة وعفراء استغربت عاينتلهم
-شو ريـــمه حتى جانت تنام عدنه وهيه صغيره.
طــروادة :: عفره هيه مو ضلت عدنا مده امها وابوها رادوا يتطلكون مدري شني؟
عــفراء:: لا خاب مو هيج گبل جانت ميلاد تزامط وتعير امي وعمتي ايمان تكلهن انه خلفتي بس زلم هذا الحجي هيه حامل بريمه وعدها كبل ريـــمه الولد ثلاثتهم، تمرضت هيه بريمه وصلت الموت لمن خلفت وطلعت بنيه تسودنت ماتريدها تريد تذبها، امي جان عدها بس انه وطرواده وكبار اظن اعمارنه ست سنوات مدريّ خمسه
امي اخذتها كالتلها انه اربيها
ويحبونها امي وابوي يتسودنون عليها ميلاد للاربعين حبلت بسجاد وجانت خايفه هم خاف يطلع بنيه لمن جابته ولد تسودنت عليه وكل هالمده ريـــمه عد امي وابوي بس بالاسم هيه بت شاكر، مناه لمن صار عمرها سنتين ضلن اخواتها يگللها باجر عگبه تكبر وتخدمج اخذيها وهيه تصيح اكرها ما أريدها، سنتين ونص اجت لبابنه صاحت اريد بنتي امي تسودنت تبچي مربيتها من عمر يوم وهسه تريد تاخذها منها، بس ابوي ضال يگلها عوفيها وبتهم وحقهم، اخذوا ريـــمه بس ضلت دوم تجينا
طــروادة:: ميلاد چلبه بت سطعش چلب.
رنـــه :: صخونه بگلبها جا چانت تكرهه ريـــمه وهيه بتها.
عــفراء:: انه من جبت شمس گمت ما اكضن الساني مدري شمالني خاب مو تحجون يم ريـــمه تتسودن ترى خطيه تنقهر.
رنـــه :: متت من القهر وضليت اعاين بصور ريـــمه، طــروادة شويه وراح للگيعان ضليت طول اليوم افكر بريمه ولا گدرت اشيلها من بالي.
""""
مــاسه :: من رجعنا الحد ثاني يوم انه كاضه گـــلبي بأيدي وكل ساع ابجي وادعي على مــيثم بحرگه گلب، ثاني يوم الظهر كاعدين يم امي وطب صــيهد عاين علي ودار الامي گالها
صــيهد:: يمه هاي بتج ماتريد محمد خابري خالتي عبير گليلها ما الكم مره يمنا وصيهد وين مايلگه محمد يكتله.
شهكت امي لطمت على صدرها ودارت تعاينلي مصدومه هيه ورغد دنكت ساكته
ايمان:: يمممه صــيهد شني تسودنت؟
هز راسه لا يعاينلي
-اسألي بتج.
عافنه وطلع وامي تسودنت طردت البنات وخلتني بس انه كضتني من اذني ميته من القهر
-شني لعبه هيه يوم اي يوم لااا؟
بچيت مچلبه بأيدها.
-ما أريده
عافتني مصدومه
-خافن مــيثم حاچاج؟
دنكت ساكته امسح بعيوني وهيه ترجف ميته من القهر ومتحلفه بميثم، الغروب اخذتلهم خبز وراحت وانه الوب نص ساعة وأجّت عيونها حمر وترجف طبت للغرفه ومشيت وراها اعاينلها خابرت على خالتي عبير مختنگه گالتلها
-الله يساعدج خيه؟ الله يسلمج بعد روحـــي عبير خيه ردت اكلج شوفيلج مرّه لمحمد مــاسه ابن عمها خليل يريدها ومايرضى تاخذ غيره اطيناها اله.
فتحت عيني بصدمة وهيه تعاركت وي خالتي عبير وسدت التلفون تبجي
-يمه انه ما اريد مــيثم.
وهيه ساكته تمسح بدموعها وايدها ترجف طلعت من يمها وصعدت فوگ ابجي كل الغلط من عدي انه غلطت غلطه وحده وسويت شي بدون علم اهلي اطلع من بيتنا لييت عمي بدون ما واحد يدري واللعب بلي ضيعت نفسي لو ما الصور انه هسه ما مجبوره اسوي هييييج.
ابجي بحرگه لوره العشا اجتني جوري تركض خايفه
-خالتج عبير اجت.
نزلت وياها وانه على الدرج اسمع صوتها تحجي بحرگه وكفت على اخر بايه من الدرج وهيه بنص الصالة تتعارك وي امي وامي تسد بحلگها وتگلها
-اجيج البيتج ونسووولف.
وخالتي عبير متسودنه دفعت امي حيل وتصيح گدام سعاد وجده
عبير:: ايمان انه تغدريني هييييج انه، شييه محمد كل ما راد يتزوج وگتله بت خالتك الك هسه تگليلي مطيتها لابن خليل مضحكه كدامج انه.
وامي تسودنت تريدها بس تسكت وجدي سمعها طلع يصيح عليها
-تلعلعين مالكم مره يمنه.
دارت على جدي تصيح
عبير:: وليش ما گلتوا من الاول ابن خليل يررريدها ليش خليتونه نقرأ الفاتحه ومتأملين بيها.
اعاينلهم روحـــي رايحه وهمه صوتهم عالي وامي بس تريد تسد السالفة جدي وابوي مايدرون شني الموضوع وكفت خاله بالباب غلطت على امي رغم هيه اصغر منها وصاحت عليها
عبير:: كون الله يحرگ گلبج عليها مثل ما حركتي گـــلبي.
ومشت طلعت من بيتنا وجده وسعاد وجدي حاروا شيسوون بأمي وشيحجون عليها ويعيرونها وهيه بس دموعها تجري طبت الغرفتها وسدّت الباب وجدي عاينلي صاح على ابوي
-هاي بتك عاشگه إبن خالتها.
وابوي هد يريد يطگني ورغد واكفه بيناتنا جرتين جوري صعدنه فوگ صميت وجهي بالفراش أبجي بحرگه روحـــي رايحه.
"""
رغد:: لگولهم سالفة بعد شيسكتهم ويحجون كله بصوت عالي يقهرون بأمي تمنيت صــيهد ووهب يجون اقلها يسكتونهم للتسعه بالليل يله طبوا اثنينهم وانه بالمطبخ گال صــيهد
-امي وين؟
درت عاينت للباب ومشيت يمه
-بغرفتها اجت خاله عبير تعاركت وياها فـــدوه لا تقهرها انتَ هم.
مسح وجهه يهز راسه لا گال
-صيحيلها خلّ احاجيها ضوجتها مساع أريد اراضيها.
عفتهم هو ووهب ومشيت الغرفة امي بس فتحت الباب صرخت من شفتها طايحه بالگاع وعيونها مگلبه ليفوك وحلكها صاير على صفحة روحـــي راحت. رجليَّه بادن مدري شلون ركضتلها اصرررخ حطيتها بحضني واكض بوجهه اريد عيونها وحلكها يتعدلن اصرررخ بكل صوتي وطبوا الولد متسودنين جروها من أيدي اديها متشنجات فرفحت روحـــي ، نزلن البنات وشافنها تسودنن مدري شلون غطيتها بالعبايه شالوها للسيارة يركضون وانه وراهم ارجف وابجي، طاير صــيهد بين السيارات
وهيه تحرك شفايفها تريد تحجي ماتگدر لمن وصلنا للمستشفى اخذوها من عدنا الدنيا ظلمت بعيوني منظرها مايروح من گدامي ركضت اخواني بين الدكاتره يفجع الگلب، كعدت بالگاع على حيلي ابجي وادعي تعدي على خير وامي تطلع منها سلامات، نص ساعة والولد ترسوا المستشفى وميثم مايحط عينه بعين واحد من الولد اعاينله عيونه دم وهمه ساكتين منا لمن گالهم الدكتور"جلطة وصار عدها شلل بالجهة اليسرى "
وهذا جان خبر يهدمنا إنه واخواني صــيهد طلع من المستشفى مختنك ووهب كعد بالگاع مغطي وجهه، اصعب من كل العشته هالايام المرت وامي مجرد جسد ممدد على السديه نطب يمها انه والولد نبوس بأديها وهيه كلشي ماتحرك، ثالث يوم شويه وعت تحجي بالسان ثگيل صــيهد يبوس برجليها مختنك ويگلها
-يمه اطيج عيوني بس تردلج صحتج.
اشرتله بعيونها تعال وبأيدها اليمنى شبگته ماتگدر تحجي لسانها ثگيل ضم وجهه بصدرها مختنك ووهب كاعد بالگاع يبوس بأيدها، حاجتهم گوه تنطق الكلمة
-گوموا.. اريدن ... مــيثم.
عاينوا واحد بوجهه الثاني وطلع وهـــب يصيح الميثم مدنك عينه مستحي مدري حاس بذنب صــيهد يعاينله بغضب وكفّ يمها مايحط عينه بعينها وهيه شالت ايدها كوه تريد تكض ايده مد اديه اثنينهن لم چف ايدها بين چفوفه ودنك باسها مختنك
-مــيثم..
همست حجيها مره ينفهم ومره لا گد ما لسانها ثگيل وحلكها مو عدل
-خاف،، خاف اموتن... مــاسه الك.. هاي.. هاي كدام اخوتها.. وصيتي مــاسه تطونها لميثم.
دنك مــيثم مغطي عيونه بأيده ويحجي صوته مبحوح
مــيثم :: عمرج طويل عمه تطلعين بخير وسلامه وتزوجينها للأحسن من عدي وتفرحين بيها.
وماگدر يضل اكثر من هيج باس ايدها مره الثانية وطلع، بالليل وهـــب جاب البنات شافنها وتسودنن يبچن ويبوسن بيها گوه سكتتهن وقنعتهن يردن للبيت ثاني يوم خالاتي اجن بس عبير ما اجت وهنه كلهن زعلانات من عبير ضلن يم امي مناه لمن طلعونه من المستشفى گالوا تضل على العلاج الطبيعي حتى ترجع تمشي. بس امي بعد مارجعت تمشي امي صحتها انتهت.
ويا شماتت ميلاد وسعاد بيها من اجن كابلنها وكعدن وكلساع بازاتها بحچاية گـــلبي صار هلكده منهن صيحت بوجهن اطرد بيهن طلعن من الغرفة يحجن ماراضيات، وابوي ماطب وگالها الحمدلله على السلامه جدي اجه وحاجاها
شعلان:: ها موينه الحمدلله على السلامه شني تردين تموتين.
وامي بلسان ثگيل گالتله
ايمان:: وراك.. من تموت انتَ.. احنا هم... نتوكل.
ضحك بصوت عالي ورد گالها
شعلان:: طيبه طيبه ان شاءالله
-مو من گلبك عمي.. تدعي عليَّ هسه ادري..بيك.
شعلان:: لا شأريد منج جا ياهو يطبخلنه بالعزايم هاي سعيده كل خير مابيها بس مال علف.
وشال ايده غم سعاد واكفه بباب غرفتها، مشه للديوان وماسه حيل متأثره ما تمر ساعة اذا ما بچت على امي، وبيتنا مافارغ من الخطار كلساع وحده جايه تشوفها وخالاتي ما متيهاتنه مر اسبوع على طيحة امي واجت خالتي عبير تبجي وامي الفطيره سامحتها بس انه ضل گـــلبي حاقد عليها مقهوره منها حيل.
مــاسه :: تمنيت ميته ولا صاير بأمي هيج وانه السبب كله من وراي والسبب الرأيسي مــيثم لو ما تهديده ماصار كل هذا، ردينه من المدرسه وبس بدلت صليت ونزلت يم امي للغرفه بستها واحجي وياها
-شلونج اليوم؟
كضت ايدي تعصرها بين اديها
-الحمدلله... مــاسه.
-ها يمه؟ ها يابعد عيون مــاسه.
بست ايدها، رغد مكعدتها وسانده ظهرها على الحايط عاينتلي بقهر گالت.
ايمان:: اريدن تاخذين مــيثم خليني افرح بيج گبل لا اموتن.
اعاينلها مصدومه هزيت راسي لا
-لو يموت ما اخذه يمه فـــدوه اروحلج عوفي هالسالفه صيري زينه وكلشي ما اريدن.
-لا.. يمه ترضين ترضين خليني افرح بوحده منجن ترى انه مو صاحبة طويلة.
بجيت احجي وياها وانفتح الباب طبوا صــيهد ووهب دنكوا يبوسونها گالتلهم
-اريدن تعقدون لميثم على مــاسه.
صــيهد:: يمه وكته هالحجي؟ مــاسه ما تريده لو يموت ما اطيها اله.
وهـــب:: صيري زينه وكلشي يهون يمه.
عاينتلي امي وردت عاينتلهم گالتلهم
-تريده تريده هيه گالت.
عاينلي صــيهد خازرني دنكت امسح بعيوني وگلبي يوجعني ليش تسوين بيه هيج يمه ليشش، سكتوا اثنينهم گالتلهم امي
-اديتها توجعها البارحة ضلت تبجي منها
جر ايدي وهـــب عاين بيها مصدوم
-هاي ضاله عوجه من الكسره؟
كضاها صــيهد
صــيهد:: وولج انتِ ثوله؟ هاي ضاله عوجه. غير تحجين
-ابوي گال هيه هيج عادي، والوجع يكول عادي بس بالبروده توجعج
وهب ::حتى ما راويتيها النه لا اجيتي وگلتي يابه إيدي عوجه وتوجعني
تعارك صــيهد وي ابوي وابوي يكل
-جا توك يله فطنت راح تعبر السنه كسّرت ايدها.
-وانا وووين شايف ايدها بس مو صوجك صوجها هيه الحاسبتك ابو وتشكيلك.
سكتت مختنگه من كد العركات الجاي تصير بسببي، وهـــب خابر حجز عد دكتور ببغداد وطلعنه من الفجر، وللعصر يله رحنا للعياده فحصها وخصصلنا يوم عمليه يكسرها ويرجعها عدله اشرت الوهب اطلع ما اريد. وهوه ما مهتم اخذ الوصل والعلاج طلعنا هستونا حركنا من يم العياده ودك تلفون وهـــب شفته صــيهد
ولان يسوق فتح السماعة واجانه صوت صــيهد يرعد
-صفففف على صفحة.
وهـــب :: شني السالفة شبيك.
وهوه متخبل غلط غلط بعمري ما سامعته غالط هيج طبك وهـــب على صفحة اعصاب جر التلفون
وهـــب :: ليشششش تصييييح.
وصوت صــيهد يرجف من العصبيه نتر
صــيهد:: عااااين وهب مرتك يمك ببغداد باخيس منطقة تروح تجيبها لا اجي احرررركها ومحمد احررگهااا.
شكرا لزيارتكم عالم روايات سكيرهوم
