رواية أرض الخناجر الفصل الرابع والثلاثون بقلم ايلول
ضاگت يا رحيم الكون
بعد ما مش صبر عدنه
ملچومين من كل صوب
الوجع ياخذنه ويردنه.
══━━━━✥◈✥━━━━══
مــاسه :: شهكت وفتحت عيني بصدمة وي حچي صــيهد عاينت لوهب بهت ما يحجي بس كاض التلفون ويعاينله وصيهد مشتعل غلط وصياح ووهب مايرد عليه وهذاك تسودن
صــيهد::ما تحچيييي ما تحچيييي؟
ووهب عبالك بغير عالم حتى ما يرمش صــيهد سد التلفون مديت ايدي على ايد وهـــب فز عاينلي بلع ريك ومسح وجهه يعلين للتلفون همس بصوت مخنوگ
-الو.
-سد الخط، وهـــب شبيك؟
دار يعاينلي يريد يحجي ومختنك كح يمسح على گلبه گال وصوته گوه يطلع
وهـــب::صــيهد گال بطه هناه بالعراق؟
هزيت راسي اي خايفه عليه وجهه صار احمر وحاله حال ما مستوعب عاف التلفون بحضني وفتح باب السيارة نزل اعاينله كعد على الرصيف مدنك وحاط اديه على راسه دقايق ووصلته رساله وراها صــيهد اتصل حاجيته من الجامه مسح وجهه وصعد التلفون بأيدي فتحت خط وسماعة
وهـــب:: ها صــيهد؟
صــيهد::انتَ شني مطفييي؟
صيح ووهب ساكت رد گاله
-وديتلك عنوانها تمشي تجيبها لا اگلب الدنيا على راسك وراسها.
وهـــب :: كافي سد حلگك.
وصيهد صاح بغضب
صــيهد::عاين وهـــب انا جاي لبغداد لسيد عباس بس يشهد الحسين اعوفنه واجيك انتَ لأعلمك شلون تتيه عرضك يا سگط.
هوه يحجي وانه روحـــي رايحه من نظرات وهـــب وصوت نفسه المخنوك سديت السماعه بساع وخليت التلفون على اذني بخوف
-صــيهد!!
سكت ووهب يكح مختنك اخذ بطل الماي ونزل يغسل رد صــيهد نتر
-هااه
-على كيفك ويااه راح يتخربط والله.
سكت وانه عيوني على وهـــب غسل وجهه ورد كعد على الرصيف صافن
-صــيهد انتَ وين حال وهـــب يخوف!
-يجوز ساعة وأوصل بغداد، عاينــي حاچيه لهذا السگط وامشوا اخذوها من الزباله ألهيه بيها.
سكتت سد التلفون بوجهي تذكرت من امس گال اذا جعفر ابن سيد عباس طلع من السجن يجيهم.مديت راسي صحت لوهب عاينلي بضياع وحيره گام من الگاع حاني ظهره صعد شغل السيارة وغمض
-وهـــب.
دار عيونه الي ساكت مديت ايدي امسح على ايده
-صــيهد موديلك عنوانها برساله امشينا ناخذها ونرد لأهلنه.
وهوه ساكت اخذ التلفون فتح الرسالة شاف العنون ومشه طول الدرب حرف ما نطق وحتى لو احجي مايرد عليَّ لمن وصلنا المنطقه وصخة وين ما نريد نصف السيارة يگب صياحهم وهوه يتسودن تالي طلع صفاها بعيد وگال
-تضلين بالسيارة؟
-لا يمه رجلي على رجلك.
زفر نفس بحسره عاين للشارع اليردنه على المنطقة گال
-شلون اطببچ هيچ مچان.
-مانبطي نجيب ندى ونطلع.
سكت محتار نزلت من السيارة وگفت بصفه متلفله بعبايتي قفل السيارة ومشينه سابقني بخطوه مسافة كضيناها مشي وبس طبينه بالأفرع رجع مشه بصفي وساعة يدورني مناه ساعة مناه.
أعاين المنطقة بنياتها قديم ووصخة وكل مچان بيه مجموعة زلم لو يسولفون بصياح لو يفشرون لو يتعاركون وكفني وهـــب على صفحة وراح لواحد ينشده على الشارع اللي بيه ندى.
اجاني ومشينا، المنطقة تخوف، طبينه بفرع اكو بيتين واحد مقابل الثاني من كل بيت طالعه مره بدون حجابات وشكولهن شيطانيه تخوف وحده تفشر على الثانية باوعلي وهـــب جراني من ايدي يمشي سريع
وصلنه ركن ومن عنده دخلنه بفرع ثاني واول ما دخلنه وگف وهـــب بصدمه شلت عيني للشارع واشوفن ندى اجت من الجهة الثانية تمشي، لابسه عبايه ويمها طفل يمشي بعمر ال٣ سنوات كاضته من ايده، وايدها الثانية بيها علاگه تفاح، الطفل يمشي ويطفر وهيه كاضته تمشي وياه وتضحك.
لمن صارت قريبه من عدنا شالت رأسها للشارع وبعدها الضحكة على وجها الحد ما صارت عينها بعين وهـــب واكف بنص الشارع فتحت عيونها بصدمة ووگفت وطاحت العلاكه من ايدها تدحرج التفاح بالشارع والطفل يطك بيها ويجر بأيده منها يريدها تنتبهه عليه وهي نظرتها ثابته على وهـــب لمن استوعبت مسحت عيونها وبساع صارت گدام الطفل تغطيه وجرته تمشي شارده فتحت باب من بيوت الفرع وطبت وصوت بچي الطفل يهز الگلب.
مسحت دموعي ودرت عيني الوهب غمض عينه زفر نفس ومشه بساع ركضت وراه وكف يم الباب ودگاه بقوة
-وهـــب على كيفك.
وهوه عيونه دم وايده ترجف يدك الباب بقوة
-وهبب.
كضيت ايده جراها مني بقوه ورد يدك بالباب، درت عيوني للشارع يطلعن من بيوتهن بدون حجابات يعاينن، دار عينه يدور شاف بلوكه بالگاع شالها خلاها يم الباب وصعد طفر للبيت بس فتحلي باب الشارع وطب بعصبيه سديت الباب وركضت وراه
البيت صغير ما مفروش مابيه اثاث مجرد براد وطباخ وچم ماعون وهوه يفتر يدورها يتراجف صاح
وهـــب :: ندددددى.
ودفر باب الغرفة بغضب اعاينلها كاعده بالزاويه والطفل بحضنها ضامه وجهه بصدرها ودموعها مغرگه خدها همست صوتي مختنك
-ندى.
وهيه ماشالت عينها من وهـــب تبجي ونظراتها تتوسل ووهب يعاين للطفل والطفل يبجي وهي ساده حلكه وحاضنته لگلبها حيل بخوف.
وهـــب :: گومممي لج، اووكفي بساع.
ندى:: عوووفني اطلع بره.
حجت هيه بصوت يرجف وحتى انه فزيت من صياح وهـــب نخرعت وخرت من يمه وهيه فزت وكفت على حيلها والطفل حاضنها من رجلها يبجي خايف، عاينت الوهب عبالك غير شخص .
وگف گدامها وأيده تتراجف وهيه كل بالها يم الطفل اللي يبجي جراه وهـــب يريد ينطيناها حتى يحاجيها والطفل تسودن بالبجي بس وصل الايدي وهيه صرخت متسودنه
ندى:: رضااا رضااا ماما.
حضنت الطفل الگلبي وهوه ملخني يريد يرجعلها وهيه تريده كضاها وهـــب من زنودها مصدوم دفعها للحايط وافتر گدامها بحيره محترك حرگ، الطفل ما گدرتله يبجي ويصرخ
-خاااااله.
نزلته وراحلها يركض يحضن بيها ويصيح
-خاااله.
وهيه لمته الصدرها حيل شابگته وتبجي، كعد وهـــب على حيله كلشي ما فاهم ولا انه الفاهمه ، وهوه كاعد بالگاع يردد بخنگ
وهـــب:: رضا؟ رضا الساكن احلامج؟ رضا؟؟
عاينلها وهيه بسّ تشهگ
وهـــب:: منين نبدي من ياچذبه؟
مسحت دموعها وكعدت عدل تحاجي الطفل
ندى:: اشش حبيبي لا تخاف هسه يرحون.
ضحك وهـــب مستهزئ وهيه عاينتله وتمسح بعيون الطفل گالتله
ندى::شجابك؟
وهـــب:: اشششش انا الاسأل وانتِ تجاوبين، كليلي هم اكو شي صدك حاچيته الي؟
دنگت تمسح بعيونها وهوه يفور من العصبيه صاح
-رضا منو؟ سافرتي شردج ؟ شجابج لهلخيسه؟ همم احجي.
عاينتله ساكته وهوه يريدها بس تحجي تفكر شويه وگالت
-رضا ابن اختي!
-اي وبعدين؟
-اختي وزوجها انسجنوا اضطريت اجيبه واجي.
-ههههه ليمت تبطلين چذب؟ ليمت تحچين الصدك؟ حچيچ مابيه ولا حچاية صحيحه ولج الجذب يفوح بكل سوالفج.
يحجي وياها وهيه حايره تسكت بالطفل،
جان اكو بالجنطه مالتي ككو طلعته أشرت للطفل عاينلي وعاين لندى وهيه تمسح بعيونه وكفته تعدل بهدومه گالتله
ندى:: روح الخاله مــاسه.
وهوه اجاني يمشي ويعاين بين وهـــب وبين ندى خايف وعيونه متروسه دمع يناشغ، حطيته بحضني وانه كاعده امسح عيونه وفتحتله الككو.
وكفت ندى گدام وهـــب گالتله
ندى:: اي اني جذابه وحچيي مابيه صدك، عوفني اعتقني ابتليت على عمــري ساعة العرررفتك.
ضحك يهز راسه اي ولو بأيده يخنگها عاين لرضا بحضني ودار عليها فتحت عيني مصدومة من كلامه
وهـــب:: شغلتج هاي مو؟ ورضا ابنج؟ منين حبلتي بيه تعرفين ابوه لوضاع بين التعرفينهم؟
وبين صدمتي بكلامه شهكت مصدومة اكثر من ندى اللي بنفس اللحظة شالت ايدها وطكت وهـــب راشدي بكلّ حيلها وهوه تسودن لوه ايدها حيل صرخت موجوعة وهوه يصيح
وهـــب:: بت الچلاب ايدج اعلگها برگبتج وانعل ساس أهلج.
رجع الطفل يبجي يريد روحلها صيحت عليه خايفه عليها
-وهـــب وووهب عوفها.
دفعها حيل نرگعت بالحايط وهوه يحير شيسوي يفتر مثل المسودن وندى كعدت بالگاع تضحك بكل صوتها الدموع تجري وترجف عاينلها وهـــب خازرها وهيه صيحت بوجهه
ندى:: ما يحقلك تحاچيييني هيج انتَ ماتعرف شيي ماتعرف اني شنو العشته وشلون ضليت عايشه كل هالفترة.
صاح وهـــب بصوت يرج البيت
وهـــب:: ويطبچ اااالف مرض وذرة طاحت من لساني وانا اگلج احجي احجيي يا بت الناس انطقي وانتِ مثل الچلبه تحيرين شلون تسطرين چذب عليَّ.
وهيه تضحك تهز راسها اي وتمسح بدموعها گالتله بغصه
ندى:: تريد احجيلك مو هههه أسمعني ولا تشرد گبل ما اكمل.
چنت عايشه بين امي وابوي وأختي الاكبر من عندي فرق بيني وبينها عشر سنين لان امي بصعوبه يصير عدها اطفال، اختي تزوجت بالبنان، ضلينه اني وابوي وامي مدلليني وما محتاجه شي الحد ما امي تمرضت، وره فتره قليله توفت عمــري جان ١٣ سنة بقينا بس اني وابوي، واختي كل فترة تجينا هيه ورجلها يبقون يمنه شهر ويرجعون يسافرون ، وكل هالفتره ماصار عدها اطفال السبب منها وما ممكن يصير عدها،وكل ما تجي تبچي يمي وأواسيها واكلها تبني طفل وتگلي لا ما اريد أتبنى اريده من دمنا، واني اموووت من القهر عليها اموت وما چنت ادري شنو نيتها.
لعبت براس ابوي وخلته يتزوج وحده أرمله بالعرب باع بيتنا وبنه بيت صغير يمهم، جابني غصب عني عشت وياهم وبس الله يعرف شنو العذاب العشته وياهم ابوي صفه كلشي ماعنده لا فلس ولا بيت عود اختي من تجي تنطيه.
جانت مرت ابوي بكل مره تگل الابوي خل نزوج ندى الاخوي محسن، هههه عمــري ١٤ سنة ومحسن عمره ٤٥ سنة ما ادري ٥٠ سنة زوجته متوفيه واحفاده بگدي، وابوي يرفض واطمن لان ادري بيه واكف وياي إكتفي بهالشي.
الحد ما اجت اختي اختي اللي من لحمي ودمي متفقه وي مرت ابوي واخوها محسن، تزوجني اله وتاخذ من عندي اول طفل.
مــاسه :: ما گدرت تكمل وانه وي حچيها دموعي تجري ووهب يعاينلها بصدمة ضلت تكح مختنگه وايدها ترجف مسحت دموعها تكمل حجيها بغصه وعينها بعين وهـــب
ندى:: توقعت الكل يأذيني الا اختي چنت احتمي بيها وچنت احچيلها شلون مرت ابوي تريد تزوجني الاخوها الشايب وشلون ضلمتني وعذبتني وشلون ابنها يتحرش بيه جنت اشكيلها كلشي كلشي احجيلها ما جنت ادري كل هذا من تخطيطها ما ادري الذابتني بالنار اختيي.
ومن عرفت خطتها بجيت وعاتبت شلون تفكر تسوي بيه هيج هههههه تدري شگالتلي؟
هههههه تگلي اريد طفل وما اگدر اخذ من الميتم لان من يكبر حرام يلامسني او يشوفني بدون حجاب ههههه تگلي حرام بس اذا من عندج مو حرام
مو حرام تظلمني مو حرام تذبني بنار وتعيشني بوسط الجحيم، والله ما راضيه والله ماجنت راضيه وزواجي مو صحيح وكله حرام بحرام طفله جنت طفله وحطوا السجين على رگبتي حتى اوافق من السيد يسألني وبس لساني نطقها ما چنت قابله والله ما چنت قااابله.
صيحت تبجي وتلطم على وجها كض اديها وهـــب مختنگ وهيه روحها رايحه وتصيح
ندى:: حبسوني عدهم ابوي تمرض مدري همه مرضوه وره مازوجوني المحسن بشهر ابوي مات
وضليت وحدي بين وحوش، اختي رجعت سافرت وعايفتني اتعذب بأديهم الله وحده يعرف شنو من معاناة عشت وياه شنو من عذب وضرب واغتصاب واهانه وذل، الحد ما صرت حامل غير معاملته وياي بدأ يدافعلي ويحميني من اهله جنت اتقبل كلشي منه حتى اقنعه ما ينطي ابني الاختي وبكل مره يگلي لا ما انطيه، الحد ما دخلت بشهري وكتها عمري صار ١٥ سنة.
حجتها وباوعت للطفل بحضني شفايفها يرجفن ووهب بس كاض أديها بحيره مايدري شيسوي وهيه مختنگه گالتله
-ولدت رضا نور عيوني حسيت هاي هي هذا العوض هذا اللي راح يسندني.
عافها وهـــب ووكف مبتعد ومختنگ كعد يم باب الغرفة منطينه ظهره، رضا گام من حضني راحلها كعد بحضنها باسته بحسره وكملت حچيها
ندى:: اسبوعين رضا بحضني اداريه وفرحانه بيه ما همني اي شي بعد المهم هوه بحضني خل يعذبوني يضربون ما اهتميت، بس اختي حالفه ماتعوفني بحالي وما كفاها كل العشته، اجت حضنت ابني على گـــلبي خايفه منها گالتلي
"لا تخافين ما اخذه ومتندمه على السويته بيج " بچت وكسرت گـــلبي عفت ابني بأيدها واباوعلها شلون تبوسه وتشمه بحسره. وبقت يم زوجة ابوي اسبوع مرات اخاف بس ارجع اطمن اكول ما تسويها واقنع روحـــي وارجع اخاف
انام واني حاضنته واخلص الليل افز بخوف احس بيهم راح ياخذونه من عندي والله ما نمت ساعة براحه والله كد ما جنت اخاف ماتعبر ساعة اذا مافزيت مرعوبه عليه، واثاري اختي ماضلت هالشهر حباً بينا جانت تشتغل من جوه ليجوه، اطتهم فلوس ومتفقه وياهم ومسويه اوراق إبني بأسمها، وبليل اخذوه من حضني من بين اديه اخذوا ااابني وحرموني منه.
ضمت وجها بين اديها تبجي وابجي وياها روحـــي رايحه ووهب كاعد بباب الغرفة منطينه ظهره ومنزل راسه بين اديه، كمت من مچاني گـــلبي ممرود عليها كعدت يمها وجريتها الصدري مختنگه وهي ضمت روحها تبجي وتحجي بحرگه
ندى:: محد عاش العشته محددد يتحمل ظلمهم فوگ ما اخذوا ابني عذبوني عذبووني سنين بين اديهم محسن مات وماعافوني حاروا المنو يزوجوني سنتين شفت الموت يمهم سنتين يله گدرت اشرد من عدهم وصرت انتَ بطريقي.
بچت الحد ما تعبـــت صار الليل واثنينهم ساكتين وهـــب طلع بره مشيت وراه غسل وجهه شويه ورجع جوه وهيه كاعده توكل رضا وكامت غسلتله گالها وهـــب وعينه مو عليها.
-شلون اخذتيه منهم؟
دارت وجها عليه مبتسمه بقهر
ندى:: بالحيله واذا تسأل شلون رجعت للعراق رجعت تهرريب وبذل وتعب شنو تريد تسمع اكثر؟
صاح وهـــب بعصبية
-وحضرت جنابج مالگيتي غير هالخيسه تعيشين بيهااا؟
-بكيفي اعيش وين ما اريد.
-سدددي حلكج وبساع امشي لمي هدومج فضييني
ندى:: انتَ تفهمني؟ رجعه وياك للقرية ما ارجع عوووفني مالك علاقه بيه اني اريد اعيش هنا، عبالك اذا رجعتني للقرية ووياي طفل يعوفونك بحالك ويعوفوني؟
هي تحجي ووهب يصيح وينتر
وهـــب:: تمشين غصباً ما عليج .
وگبوا اثنينهم هو يصيح وهي تصيح بحرگه وغضب مو ندى الاعرفها، وهـــب تسودن فلش الباب وطلع من يمنا كعد بباب البيت، وهي غسلت الابنها وحطته بحضنها تنومه اعاينلها ساكته مناه لمن دك تلفوني شفته صــيهد وارتبكت وخرت من يمها وحاجيته
-ها صــيهد.
-ها شكد بعد وتوصلون للقرية؟
-احم بعدنا ما رايحيين ندى ماجاي ترضى
-شني؟؟؟
-ماترضى تريد تضل هناه.
-وهـــب السگط وووينه شني بكيفها تضل بكيفها هيييه؟
سكتت مرتبكه اعاين للباب وهـــب كاعد مايدري شيسوي وصيهد بالتلفون يصيح گتله
-وهـــب گلبه مفجوع لا تزيدها عليه فـــدوه اروحنلك البنيه ماجاي ترضى شيسوي يعني!
-يجرها جر مو بكيفها ما ترضى جايكم انا.
حجاها وسد التلفون بوجهي طبيت يمها للغرفه حطت ابنها بالفراش غطته ودموعها تجري
-ندى ما يرضون تضلين هناه لا تعاندين كومي خل نروح.
هزت راسها لا كوه تحجي
ندى:: عندي طفل مــاسه شلون ارجع تدرين بيهم شراح يحجون وشيسوون بوهب .
-مالج غرض هوه رجال يتحمل.
-لا ما مجبور يتحمل
-ترى والله ما يعوفونج هناه اخواني شوفي يجوز وهـــب اهون جاي يحاچيچ بتفاهم صــيهد ترى اعصاب والله يسحلج للسياره سحل.
-شنو بكيييفه غير ما اريد ارجع.
سكتت منها طلعت وكفت يم باب الاستقبال اعاين الوهب من صار ليل الفشار صار بفلس نسوان وزلم تفشر طب وهـــب كعد بالحوش يدخن وتلفونه كلساع يدك اعاين اشوفنه صــيهد ما يرد عليه، درت عيني الندى طلعت من الغرفه تلملم بالهول، ندك باب البيت عاينت بخوف كام وهـــب فتحه وطب صــيهد مايشوف گدامه گبل دفع وهـــب وصاح بوجهه
صــيهد:: امشي جيبهااا وتعال.
ووهب ساكت مدنك دفعه صــيهد على البيت صاح
-تحررك خايس امشي جيبهااا.
وهـــب:: ما ترضى.
وصيهد تسودن شنو ما ترضى دفع وهـــب وطب للبيت يتراجف ووهب وراه يريد يكضه شاف ندى كدامه صاح بوجها
صــيهد:: لمييي هدومج وتعاي بساع.
وهيه هزت راسها لا ومشت كعدت بالزاويه وهوه تسودن يصيح ويهد ووهب كاضه طك وهـــب يصيح عليه
-سگط عاايف عرضك بهيج مچان.
ووهب عبالك جان متحمل وخلص صبره بساع رجع الطكه الصيهد ودفعه متسودن صــيهد مصدوم بيه تلازموا واحد خانگ الثاني وانه بينهم روحـــي مفرفحه مچلبه بأديهم ارجف
وهـــب:: خبصتنتتني من حجيت الهسه كلساع وصحت سگط شايفني راضي بكعدتها هنااااه ادررري بيهااا؟
صيح بحرگه وصيهد خازره ساكت مصدوم بوهب، ندى بس تبچي، ضلوا سكاتين شويه ودار صــيهد على ندى گالها بنتر.
صــيهد:: عاينــي مال تضلين هناه لو تموووتين .
ندى:: خويه بس...
ماخلاها تكمل صاح بغضب
صــيهد:: خوووووه الخووواج گوووومي.
فزت وكفت على حيلها بخوف وصيهد فتح عينه بصدمه من سمع صوت طفل يبجي هيه راحت للغرفة تركض وهوه مره يعاين عليَّ ومره لوهب ووهب الدنيا طالعه من عينه گال الصيهد
-ابنها چانت متزوجه گبل لا تعرفني واختها اخذت ابنها منها.
حجاها وطلع بره وصيهد مصدوم طلع وراه ضلوا بالساعة بره وامي كلساع تخابر واكلها بعدنا بالعياده، مناه لمن طبوا الولد مشه صــيهد للغرفه دك الباب صاحت ندى بصوت مخنوك
-تفضل!
فتح الباب صــيهد عاينتلها كاعده بالگاع وابنها بحضنها گالها
-جيبي ابنج وتعاي.
ندى:: خويه والله اني ادبر حالي اكدر اعيش وحدي واذا انتم معتبريني عرضكم لان وهـــب ما مطلگني خلي يطلگني وتخلصون.
صــيهد:: حتى لو وهـــب طلگج ما تضلين هناه يشهد الحسين احط وهـــب وياج بغرفه وارش عليكم نفط انتِ وياه احرگكم شو تمسلتين انتِ شني تضلبن وحدددج فالتوه هييه؟
دنكت ندى تبجي تخاف ترد على صــيهد ووهب كلساع خازر صــيهد ما يريده يصيح عليها،لمن نتر بوجها فززها
صــيهد:: گوووومي يله.
وهيه عاينت لوهب تتوسل يتدخل صاح صــيهد
صــيهد:: فضيهاااا.
-بداعت امك عوفوني.
صــيهد:: وروح عمي شامل لو تكتلين روحج بهالساعة هم اخذج للقرية جنازززه فضيهاا فضيهاا.
مشت الابنها تبجي تلبسه بحذائه وخر صــيهد من يم الباب يغلط، طبيت يمها لميت وياها اغراضها وهيه بس تبجي، شالت رضا وانه شلت غراضها طلعنه من الغرفه اثنينهم متانين بالباب گالت الوهب
-مفتاح البيت شلون اطيه للرجال؟
صــيهد:: تندلين بيته؟
هزت راسها اي وطلعنه هيه صعدت وي وهـــب وانه وي صــيهد، دلتنه على العنوان نزلوا اطول ايجار للرجال رمفتاح وطلعنه من المنطقة صــيهد اعصاب وما يتحاجى مسافة مشينا يله دار عليَّ وگال بهدوء
-شگالولج على ايدج؟
-يكولون عمليه ومارضيت.
سكت بعد ابد ماحاجاني لمن وصلنه للقرية نص الليل كلّها نايمه
بس رغد فتحتلنه الباب شهكت بصدمة من شافت ندى سلمت عليها وعاينت للطفل اللي بأيدها أشرتلها اسكتي، طبينه وهيه ماترضى تطب الغرفه وهـــب دفعها هوه بعصبيه وانه ورغد نجر بيه نريده بس يسكت وندى طبت للغرفه تحجي بحرگه
-والله ما ابقى.
وهـــب:: سدددي حلگج.
مسحت عيونها وتهز رضا بحضنها وهـــب طلع من البيت، وصيهد راح للمشتمل، مشيت اريد اصعد فوگ ارتاح وچلبت بيه رغد بأثنين أديها
رغد:: وين ووين تعاي احجي وسولفيلي
-نعسانه باجر باجر.
-والله ولا اخليج تنامين.
وسحلتني سحل الا احجيلها السالفه النوب تسكت شيسكتها الدموع تجري وتدعي على اخت ندى، حطيت راسي على المخده نمت وفزيت الصبح من هيه كعدت طلعت وراها.
وهـــب وصيهد اثنينهم كاعدين بالمطبخ صــيهد يشرب چاي ورهب يدخن توه الصبح يصير والجو بارد ثلج وبعده محد گاعد، رغد مشت تخبز طلعت يمها اتدفى على التنور واحجي وياها
-شتگولين راح تصير مشكله؟
رغد:: عادي شني يعني احنا المشاكل عدنه زلاطه.
سكتت بحيره، بدوا يكعدون واحنا نحضر الريوك،صعدت كعدت جــويريه وبدور بدلنا وگتلهن جبنه ندى ويانه، نزلنه جوه وصيهد متاني مناه لمن كعدوا بالهول يسألونه على سيد عباس گالهم
-طلع جعفر من السجن والحمدلله اديت الواجب ومريت جبت مرت أخوي واجيت.
عاينوا واحد بوجهه الثاني وهوه دار على غرفة ندى صاح
صــيهد:: ووينج خويه تعاي.
وليد:: شني صــيهد؟
صــيهد:: شني؟
شعلان:: شو مدري شلونك انتَ صاير حجيك ماله معنى؟
وهوه مدنك مضيك عينه ويجر نفس من الجكاره ويرد يعاينلهم داروا كلهم على غرفة ندى من بچه ابنها ومشه وهـــب فتح الباب وطلعت ندى وي ابنها وكفوا جدي وابوي متسودنين وصيهد گالهم.
صــيهد:: البنيه چانت متزوجه گبل لا تتزوج وهـــب صار عدها ولد وتطلكت حالها حال أي وحده ابنها ضل عد اختها، واختها طكها سمّ وماتت هل رديناها بعد خوما نعوف عرضنا.
وهمه تسودنوا غلط وصياح ويحلفون ما تضل ويردون يطردون وهـــب صاح عليهم
وهـــب :: ررررريح رااايح انا هم ما اريدن اضل.
دار على ندى گالها
-جيبي هدوومج وتعاي.
شعلان:: اخذهااا وطلع عار لاينعرف اصلها لا ينعرف فصلها مدري منين جايبها النه.
صــيهد:: انا اطيك اصلها وفصلها منين ومن ياعشيره ومن يا عماام، ابوها ابن كاظم ال** من اعمام*** عشيرة ال****. واريد ابن امه بعد اليصيح عليها بلا اصل.
ندى:: مسحت دموعي اعاينله طب للغرفة بعصبيه صاح بوجهي
-البسي عباتج بساع.
عفت رضا على الچربايه لبست عبايتي شلت ابني حاضنته الصدري اباوع لوهب لم اوراقه خله فلوس بالمحافظة
واسمع صــيهد يتعارك وياهم وهمه يصيحون ما يضل وهـــب هناه لو يردها منين ما اجت لو ما يضل باوعتله مختنگه
-وهـــب خلي اروح عوفني.
مد ايده على حلكي بعصبيه يسكتني عيونه دم جر سويج السيارة ومد ايده يلزم ايدي جراني يريد نطلع وصيهد ما يخليه وصوت امه من الغرفة تبجي ما جنت اعرف ليش ما تطلع.
صــيهد:: يابه يشهد الحسين ما يطلع مناه لا هوه ولا مرته.
شعلان:: انچببب انچب ما يضل هناااه وانه اشمن هوووه.
يصيح ويريد يضرب صــيهد وصيهد يرجف ولازم بوهب ما يخليه يطلع البنات يبجن خايفات على اخوانهن وامهم تبجي وتصيح من الغرفة، صاح صــيهد .
صــيهد:: هاي هيه خل يروح يعيش وي طــروادة ببيت عمي شامل.
وبس حجاها ابوه ضربه راشدي يغلط عليه وهوه متخبل ويجر بتلفونه يريد يخابر طــروادة وجده يغلط عليه ووهب روحه محتركه حرك بس يريد يطلع من البيت يجر بيه مناه ومناه ورضا تخبل من البچي.
شعلان:: ضل ضل بس وروح ابوي ان ما راويتكم نجوم الظهر انا مو شعلان.
صــيهد:: ما يضل خل يروح وي ابن عمه يعيش احسن اله.
وضحك جدهم ضحكه رج صوتها بكل البيت وهز أيده مستهزئ
-كل شبر بالقرية الي ولا تخلوني من عين باجر اطرد طــروادة هوّه وهله.
وگبوا وياه اثنينهم وهـــب وصيهد عافوا السالفة كلها وتخبلوا شلون يصيح اطرد طــروادة وهوه يهز راسه متحلف ويحجي بهدوء يخوف
شعلان:: سهله سهله.
يحجون ورغد صرخت متسودنه ركضوا للغرفة كلهم، صوت صريخ البنات وصوت صياحهم وخوفهم على امهم يخلي صدى بأذني ووشه، امسح دموعي ويرجعن ينزلن مناه لمن صارت امهم زينه البنات راحن للمدرسة وهمه شويه سكتوا فتح باب الغرفة وهـــب مايباوعلي گال
-امشي امي تريدج.
اخذت رضا بأيدي الكاعدين بالهول يباوعولي بحقد متحلفين بيه فتت للغرفة كاعدين يمها رغد وصيهد وهيه على فراش وساندين ظهرها على الحايط مخلين وراها مخاد اقتربت يمها مختنگه ما تخيلت أشوفها هيج بستها ابجي
-شلونج عمه؟
هزت راسها تهمس بثگل
-الحمدلله.
باوعت لرضا، ابتسمتله بتعب وهوه خايف من الكل بس يبجي ويگلي آريد ماما روحـــي تنطحن من يريدها، واسكت واصبر نفسي بالگوه، جدهم يگلهم بس يصير عمر ابنها تسعه مايضل هناه توديه لاهله صــيهد گاله خوش وسكتوا متحلفين بوهب وهذا اللي ماردته جنت ادري باللي راح يعانيه بسببي، واول شي حاربوه بيه الشغل هدوا حيله بالشغل من المعامل للگيعان.
ومو ايام احس سم تمر وياهم.
"""
رنـــه :: مرات اتمنى اصير انه الچبيره مال العائلة اول قرار اخذه اعدام شعلان شنقاً وتعليگه بباب بيتهم، متت من القهر من سولفتلي مــاسه على ندى النوب طــروادة ما يرضى اروحن اشوفها وأنه احبها ردت بس اشوفنها ولا خلاني، خابرت عفراء عليه گتلها مايخليني اروحن گالت اي احسن شسوين رايحه قهرتني فوگ ما انه مقهوره سديته بوجها.
ومن كضه محرم ودتلي هدوم ملونه مخيطتهن الي اخذتهن من ايد طــروادة بزعل صاح وراي
-شماالج؟
-عمي اختنكت اريد اطلع اروحن؟
عاينلي مضيك عينه
-وين ترحين؟
-لبيت جدي انه بنيه احبنهم احب جدي واحب جده.
عبود:: المحبه طالعه من عيــونج ماتگدرين تضمينها.
وطرواده هز ايده مستهزئ طب الغرفته يريد ياخذ ملازمه ويروح للگاع بس مالحك اجاه مــيثم طبوا للدوانيه وعبود ماصدك گبل راح السجاد، وانه من الضوجه ضليت أسمع عليهم يحجون على صــيهد بس ما فهمت ليش، توهم بدوا يحجون عليه واجاهم سمعت طــروادة يگل الميثم
طــروادة :: اجانه اجانه اسكت.
مــيثم :: خل اروحن هسه يضل يشمر مالي خلگه.
وصدك مــيثم طلع وصيهد طب صــيهد يحجي على مــيثم وطرواده يعززله شويه ورد گاله
صــيهد:: محمد مفصول شني؟ شو لا لگيته ببيت لا لگيته بالكليه شني الفلم مــيثم ما سولفلك؟
طــروادة:: شتريد منه؟
-هيج أنشده على سالفة.
-انچب ترى شكوه وحده بعد ويترقن قيدك.
سكت صــيهد ضلوا شويه ومشوا للگيعان،كعدت يم حسين وزهره نعاين افلام كارتون شويه وعفتهم كمت ابحوش بالاغراض فتحت خانة عفراء اعاين بيها لگيت حنه بعلاكه جابته النه بالعيد وما حطيناه، طلعته وصحّت الزهره اجتني تركض
-نحط حنه لادينه؟
هزت راسها اي حسين اجه يمنه لازم يعيب علينه يريدني گوه اكتله، عفته وگمت عجنت الحنه وعفتها شويه مثل ما چانت امي تسوي، فرشتلهم حسين تمدد بفراشه وزهره متانيه شوكت احط حنه باديها كاضه علاليك سود اثنين حتى من احنيها اشد اديها بيهن ، انه طلعت لميت الهدوم من الدنيا كامت ترعد وغطيت الماطور والتنور وادخل الطيور للبيت واحط القمرية مال الشرك للصخلة والف شغله وشغله اسويها من تريد تمطر، منا لمن بدت تمطر ركضت جوه لگيت زهره غافيه وعلاليگها بأيدها.
غسلت واجيت يمها فتحت اديها لبست علاكه بأيدي حتى ما تتصبغ ومن احني يصير مو حلو، حطيت حنه بوسط ايدها واسدها واخلي على اضافرها، كملت أديها اثنينهم وشديتهن اباوعلها اضــحك، غطيتها وگمت كلت اكضي كل شغلي گبل لا انه احط حنه.
حسين هوبز شويه فوگ راسي ونام ضليت وحدي كنست وعزلت البيت ورحت فرشتلي فراش وكعدت صفنت بالحنه كل مره عفراء تخليلي وتشد اديه بعلاگه هسه انه شلون اسويها؟ وعبالك اريدلي حجه لان الجو بارد وصوت مطر ووحدي صارلي واهس ابچي كابلت الحنه وبچيت كل حجتي لان محد يحنيني.
شلت راسي على فتحة الباب مد راسه مبتسم ومن شافني ابجي فتح عينه بصدمه
طــروادة :: شبييج رنـــه؟ عليمن تبجين؟
مسحت دموعي اعاينله متنگع من المطر
-محد يحطلي حنه .
احجي وابچي مختنگه مو علمود الحنه مدري عليمن لان الجو يبجي، عاينلي گال
-خل اسبح واجيج!
هزيت راشي خوش كمت شعلت الصوبه من جديد وجبتها يمنه للغرفة سبح واجه يرجف حضن الصوبه
طــروادة:: والله باارده تكتل.
-اي.
دار عاينلي
-ولج هاي الضوجه كلها على الحنه، هسه انا احنيج.
-وين تعرف انتَ.
-اتعلم.
سكتت لف روحه ببطانية واجه يمي گال
-ما اريد يصبغ ايدي زحمه.
-اي عوفه يولي ما اريدن بعد.
-لا لا جيبي هاي العلاگه.
اخذها لبسها بأيده يضحك جر ايدي واخذ منّ الحنه حط بوسط ايدي يريد يسوي دائره بالوسط گتله
-لااا، هيج خليها بالطول تصير تخبل هيه تتوزع من اسد ايدي.
سوه مثل ما گتله ومن سديت ايدي حطالي على اضافري واطراف الاصابع شداها بعلاگه وحته الثانية وهم شداها كام ذب العلاگه من ايده غسل صحت عليه
-طــروادة تعال.
مد راسه من الغرفة
-تعال طفي الصوبه انه بعد كلشي ما اگدر اسوي.
طب للغرفة شالها اخذها طفالها بالهول صحت عليه من جديد.
-اريد ماي شربني.
راح جاب ماي واجاني شربني وگبل لا يطلع گتله
-خل انامن وغطيني.
-راح اكتلج.
ضحكت تمددت على فراشي جر الغطا فوگاي كتله وانه اضــحك
-هسه اذا اريدن اروح للمرافق شلون؟
طكاني على راسي
-نامي نامي.
غمضت عيني اضــحك، للصبح يله كعدت بحماس ركضت فتحت العلاكه وغسلت اديه فرحانه بيهن لان صاير الحنه عدل لونها ماروني والخط اللي بالنص مالايحه حنه صاير حلو مخطط كعدت زهره من نومها عود اليوم جمعه ولازم اخليها نايمه بس متحمسه اشوفن ايدها ما گدرت، غسلتهن صايرات يخبلن.
زهره:: بله ايدج؟
مديت ايدي اراويها باستهن شلتها ابوسها واعضها.
-انتِ العسل مالي.
وهيه تضحك، طلعنه انه وياها للحوش بارده حيل تكص الخشم والگاع مبلله، فتحنه بيبان الحيوانات طلعن يفترن بالحوش واحنا رجعنا للبيت وفاتحين باب الهول كعدت زهره تعاين للتلفزون وانه طبيت للمطبخ سويت چاي ومن فار اخذته حطيته على الصوبه ورديت للمطبخ مناه لمن اجه طــروادة جايب الشبچ مال الصيد جان مادهن بالشط، طب للبيت اصابعه جامده غسل وكعد يم الصوبه يتدفه وزهره اجته ومدتله اديها تسأله
زهره:: حلوو؟
كض اديها اثنينهن يبوسهن ويگلها
طــروادة:: يخبلن.
اخذت الريوك وكعدت يمه مديتله ايدي
-جا وانه؟
ضحك طكاني على ايدي
-زهره احلى منج.
عيبت عليه لمن كعد حسين شافنه جاي نتريك وما مكعدينه طنگر راح توضى واجه يمنه يصلي كضه وكعد على صفحة گاله طــروادة
-تقبل الله شيخ حسين.
-خوش.
-شني شو ضايج معاركينك باحلامك؟
حسين:: عود شيسمونها هاي تتريگون ماتكعدوني؟
يحجي وشايل خشمة وطرواده يضحك، كضينه ريوكنه وهوه راح للمطبخ طكاله بيضه وكعد عبود اكل وياه ماخلاه ياكل وحده، صرت احبن يوم الجمعه مو بس لان عطله، ولان نلتم كلنه سوه، وره الريوك طــروادة وعبود طلعوا بالحوش، صفوا الشبچ مال الصيد وطلعوا السمج اخذته منهم وكعدت يم حوض الماي غسلته ونظفته حطيتله ملح ضمت جزء وجزء عفته للغدا، وهمه غسلوا الحوش من كضوا، طــروادة سبح وراح للگيعان وعبود ركض السجاد فارگه هواي.
طلعت اطي اكل للدجاجات واجتني حجاره صغيره براسي صيحت بحرگه اعاين مناه ومناه
-صخونة كووون.
بريا:: الصخنتج تعاي.
عاينت للسياج ومشيت بعصبيه صعدت على الگن شال راسه يعاينلي مبتسم وانه هداده
-شماالك تشمر حجار؟؟؟
-صباح الخير.
حجاها مبتسم درّت وجهي منه گال
-من امس لليوم افتر هناه وما تحاچيني اليوم كلت لو افشخها همّ احاجيها.
-فشخوك كون وخلو دمك بطولك، بله طكيتني بعيني؟
ضحك ومن يضحك عيونه تضيع لابس عباية ام الفروه لونها جوزي فوگ هدومه،گال
بريا:: تصيرين عوره وبعد محد ياخذج.
-يا والله محد يأخذني بالحسين خل اكبر يكضون سره عليَّ.
-شني ياهي انتِ؟
-رنـــه.
حجيتها ومديت راسي عود اتحداه ابتسم عينه بعيني صاير عاقل ما يعجبني
بريا:: الغزاله.
-شني؟
-رنـــه الغزاله.
ضحكت تذكرت ابوي چان يگلي الغزاله وهوه هم ضحك دار وجهه ورد عاينلي من البروده خشمه احمر حييل لحيته وشاربه شگر بس مو كلش لونهن عسلي اكثر من الشگار.
بريا:: ليش ضحكتي؟
-تذكرت ابويه چان يگلي رنـــه الغزاله.
-وصدك انتِ غزاله.
ضيگت عيني ماعجبني شلون حجاها نبرة صوته ماعجبتني تحمحم ودار وجهه شويه ورد عاينلي گال
-انا ما متريك ترى.
-صدك؟ اكلك ياهو يطبخلكم من عمتي ام صــيهد تمرضت؟
-مــيثم بس اكله يلعب الروح.
-يا سوده عليَّ والله انه حيل ينكسر خاطري عليكم وعلي
-ليش؟
-هوه لان تضلون جوعانين، تدري والله حتى من تتعدون مناه واشوفنكم اشوف وجوهكم صفره اكول والله خطيه واتمنى اطبخ واوديلكم بس ما اطبخ لان والله انه الاخواني كوه اطبخ.
ضحك مختنك وانه اعاينله بردت، الدنيا تمطر مطر خفيف كلش نزلت من الگن صاح
بريا:: لا رنـــه وين رحتي؟
-راح اسويلك ريوك شني فلشت گـــلبي .
-اسم الله على گلبج، لا تتعبين روحج حتى لو لفه.
عفته ومشيت للبيت بساع حطيت قوري الچاي على النار احميه حسين يعاينلي بطرف عينه سكتت منه جابلي تلفوني گال
-افتحيه خل اعاين بيه.
عاينت مابيه شحن گتله
-حطه على الشحن خل يصير ميه واطيكياه.
اخذه وراح طلعت من الجبن حطيت بالخبزه سويتله لفة وصبيتله چاي صعدت على گن الدجاج ومديتله ايدي صاح
بريا:: الله شنو هااي ايدج شحلاتها.
يحجي واخذ اللفه والكلاص من ايدي حطيت اديه على السياج اعاينلهن واعاينله وهوه ياكل
-هاي البارحه حطيتلهن حنه.
-حلوات صايرات.
-جا هنه اديه من زمان حلوات.
ضحك يهز راسه اي وياكل يكسر الگلب ياكل سريع من گد ما جوعان يجوز مو بس ما متريك حتى البارحه ما متعشي احجي وي نفسي گلت اسويلهم غده اليوم واخلي طــروادة يوديه الهم خطيه ايتام بيهم اجر وثواب.
كضه اللفه وشرب الچاي كله مدلي الكلاص كضيته من فوگ وهوه كاضه من الطرف مايهده يعاين الايدي مبتسم جريت الكلاص منه
-يجوز اليوم اوديلكم غده.
-لا لا زحمه من طــروادة هوه مــيثم يطبخلنه والله.
-لا وعلي انه اطبخ واخلي طــروادة يجيبه الكم.
-خاف تتعبين.
-اي بس ميخالف.
ابتسم يهز راسه خوش گتله
-يله انه راح اروحن
راحت ابتسامته وحجه بجديه
-ليش مو بعدني ما..
-شنو؟
-ماضاحك بعدني ضايج وانتِ تدرين محد يضحكني غيرج.
-جا بردت والله.
نزع العباية ام الفرو اللي لابسها ومداها الي
-البسي هاي تدفين وضلي وياي شويه.
-لا ما اريدنها.
-اخذيها.
-ما اريدنها شني؟
خزرته وهوه خازرني گال
-ترى هاي مالت ابوچ چانت عد ابوي وهسه أنا لبستها.
-جذذاب؟
-لا مو جذاب.
اخذتها من ايده اعاين بيها گلبتها مناه ومناه شميت عطرها
-ريحة هدوم ابوي اعارفها هاي مابيها ريحته.
-غير انا لابسها صارلي چم سنة البس بيها بس هيه مالت ابوچ، يله حطيها على جتافج راح تبردين.
لبستها وانه بين المصدگه وبين الما مصدگه بس لان اتذكر عفراء گالت مره، عمي خليل وابوي يلبسون سوه. عاينتله وانه لابستها هيه جوزيه وايدي بيضه وبيها حنه صارت كلش حلوه وي ايدي اعاينلها واكولن من اطبن للبيت اصورها ضحك عينه هم على ايدي
بريا:: تلوگلج.
-غير بت شامل انه.
-والنعم.
عاينت لوجهه مبتسمه وتذكرت صورته ضحكت وهوه مبتسم ومايدري عليمن اضــحك كتله
-لگيتلك صور عدنا شكثر!
-صدك؟
-والله ههههههههه.
-ههههه جا ليش تضحكين شبيهن الصور؟
-مابيهن شي هههههههه
-رنـــه شبيهن؟
-خاف تضوج؟
-لا احجي شني عريان؟
-لا بس لابس شماغ وعگال وبدون بجامه هههههههه
ضيك عينه ودار يمسح وجهه وانه اضــحك
-زحمه رنـــه لا تحجين هيج ولا تعاينين عليهن.
-ترى زعطوط جنت اصغر من حسين.
-ميخالف.
-يله هسه شني هنه على حورهن اصلاً كاتلك الوصخ بيهن مدري عليش مصورينك!
-تأدبي.
-لا تضوجني ترى والله هسه اتعارك وياك ياهي مالتي انه غير همه مصورينك وانتَ جنت ماتلبس بجامه يكولون يلبسونك وتنزع ههههههههههه.
عاينلي بضوجه يريدني اسكت بس انه اريد اعصب ما اگدر تلزمني الضحكه من اتذكر صوره لمن سكتت وحجه بهدوء
بريا:: رنـــه ولد عمامنا هم الهم صور عدكم؟
-اي كلهم.
-همم، زين وهم مثل صوري؟
-قصدك بدون بجامه؟
هز راسه اي
-لا عمي كلها مستوره الا انتَ ههههههههههه.
خزرني ضميت شفايفي اضم الضحكه وخليت ايدي على حلكي اسكت روحـــي وهوه يريد يغير الموضوع گال
-بهذن اديج محمرات.
عاينت الاديه
-شكد چذاب توك گلت حلوات.
-بله مديهن اشوفنهن عدل.
مديتهن گدام عينه ضحك گال
بريا:: هنه حلوات بس انا اكرهه ربحة الحنه.
حطيت ايدي على خشمي اشمها واگلب بيها وارجع اشمها
-ترى غسلتهن وراحت ربحة الحنه مابيهن ريحه.
ضحك عاين بعيوني وحجه بدون ابتسامه
بريا:: خل اشمهن.
فتحت عيني حيل
-انچب وتأدب.
فتح عينه خازرني
-حيووانه چم مره گتلج لا تغلطين.
نزلت من الگن اغلط
-ما تستحي انتَ وعلي عاتبني لو ما گلت الميثم عليك اكله يريد يكض اديه.
وهوه يغلّط بعصبيه
بريا:: لج حيوووانه انتِ ما تتغيرين ما تعلقين ادبسززز.
-والله انتَ الادبسز.
-وعلي اذا اجيتج حظظظج اطيحه.
-خااااب گم ابو بجامة المنزوعة.
هز السياج بعصبية يصيح
-الا اشگ حلگج.
-يله ولي مناه لا تدوخني وعلي اطي صورك للولد واخليهم يسوونك مضحكه.
صاح بغضب
-فننننج بت ابوج سويها.
-خوش نشوف.
اهدد وانه جذب ما اسويها اخاف من طــروادة ضل يغلط ما يسكت وهاسكي مو هناه حتى اهده عليه ويروح حرت شلون اسكته طبيت جوه وعفته شويه واحس بروحي عركت قست السكر لگيته مرتفع شربت حبايه وكعدت عاقله،
اول ما تعاركت وياه كلت لو يموت ما اوديلهم غده بس وره ساعة من راحت العصبية طبختلهم تمن وطبخت النه هم، وي الصلاة اجه طــروادة وخابر على عبود، همه يصلون وانه اگلي سمچ واسوي زلاطه لمن طــروادة كضه صلاه اجه يمي عاين للطباخ جدرين تمن وسمچ مگليه هواي
-هاي المن؟
-لبيت عمي خليل خطيه تلكاهم ميتين من الجوع
عاينلي ساكت صاح على عبود ودالهم الغده وصبيت غدانه كعدنه بالهول وانه ساعة جاره الصوبه يمي ساعة محتره ودافعتها،لوره الغده. غسلت مواعين وعبود يمي يريد ياخذ الچاي اعاين لحسين يشاور بطرواده ولا ارتاحيتله.
عبود اخذ الاستكاين وراح للهول وانه من كضيت مواعين اخذت قوري الجاي ورحت يمهم طــروادة يعاينلي بضوجه وشرب چاي ساكت وحسين من اعاينله يدور من عدي خايف گـــلبي لعب ولا ارتاحيت شويه وطرواده طب الغرفته وصاح
-رنـــه.
عاينت لحسين متحلفه شوف شگاله غسلت اديه ومشيت وراه طبيت للغرفة، وهوه واكف يم الكنتور يطلعله قمصله لبسها ودار عليّّ
طــروادة :: شعدج وي بريا؟
بلعت ريك مرتبكه وكف گدامي
-ها رنـــه؟ اطلع مناه تكضين السياج مناه؟
-ما مسولفه.
-لا تجذبين عليَّ حتى ما اقهرج.
عاينت لوجهه يحاجيني بهدوء
-عاين والله يكسر خاطري جيه احسه جوعان اطيه لفات ونوبات اتعارك وياه والله بس هيج.
هز راسه خوش ماحاجاني شي عافني وطلع بس تأكدت منه راح للگاع ركضت ادور حسين گلبت البيت بس اريد اكضه واعضه مالگيته وزهره ماترضى تگلي وين لبد
-لو تطير حسين لو تطير هم اكضك تطلع لو ما تطلع سهله خاب الكسولي امداني لو درستك بعد.
حرك گـــلبي حيل بس مالكيته بعد، شكد دورت ماكو ومتأكده ماطالع من البيت لان زهره كلساع تطب الغرفة اهلي اطب وراها ادور وره البرده بالخانات ما الگاه، للعصر كاعدين بالحوش انه وزهره ندرس واسمع صوت سيارة تريله، ركضت اعاين من فتحات السياج واشوفنها سيارة محمله بلوك وطرواده وياهم.
غير متت من القهر نزلوا البلوك وياهم ولدنه، لمن نزلوه كله اجاهم شعلان وتعارك وي طــروادة ما يرضى يبني وطرواده يگله
-والله ابني وشتريد تسوي سوي.
وضلوا بالساعة يتعاركون وصيح على الولد ما يرضى يساعدونه وطرواده طب للبيت بعصبيه عاينلي درت وجهي ساكته گال
-طبي جووه.
طبيت للبيت واعاين من الشباج يخطط يريد يكبر الحوش ويعزل جزء لحيواناتي وجزء يريده للخضره لان من جبت صخلة بعد ماضلت عدنه خضره، درت وجهي للغرفة من طلع حسين ومبتسم بخباثة
-وين جنت خاتل؟
-فوگ الفراشات .
-سهله بس خل يطلعون الا ازورك جلدك.
عيب عليَّ وطلع، عفتهم وطبيت للغرفه مقهوره، وطرواده هوه وعبود بدوا يبنون سياج ابعد من سياجنه ومن يكضون بنيان يله يشيلون هذا السياج، سووا بابين باب من يم گن الدجاج وبابنه اللي گبال بيت عمي شاكر ضل بمچانه هم .
الغروب طبوا للبيت عبود بأيده العبايه اللي انطانياها بريا چنت شارتها على الحبل گال طرورده
-هاي عبايه بريا شتسوي عدنه؟
مشيت للمطبخ وانه احجي
-وداها بأيد زهره غسلتها.
عبود لبسها افتر بيها
عبود:: وعلي ولا اطيها البريا بعد.
سكتت سويتلهم عشا بس اكلوا وردوا يبنون يقهرون بيه عفتهم ونمت.
""""
مــاسه :: مشكله وره مشكله حتى مانلحك نتنفس، امي التهت عني من شافت وضع وهـــب التهت وياه، وهوه وهـــب حتى ما يجي للبيت ضال يروح للمعامل ويرجع للگيعان وميت من التعب
، وندى وابنها اللي بس يبجي ويريد امه واكفه يمها بالغرفة اعاينله كطع روحه من البچي وهيه مكابلته بحيره گالتله
-اني امك.
طكاها ويطك رجليَّه بالگاع يصرخ وجدي يصيح
-دوختوووونه ترى.
وندى تريد رضا يسكت ماكو عجزت تسكته
ندى:: بالليل تجي ماما.
وهوه يدك روحه بالگاع ويبجي مفرفح طبت رغد اخذته منها وطلعت للمطبخ افترت بيه وتحجي وياه اعاين لندى ضمت وجها بين أديها تبجي مقهوره.وما الومها بس الحجي اللي تسمعه من سعاد ومن جده كلش كافي.
سكتت وثاني يوم بالمدرسة بالفرصة مشيت يم جــويريه وهيه تراجع امتحان كعدت يمها واجت يمنه رنـــه وراها بــدور، عاينه لساحة المدرسة البنات تجمعن وسون شدة يا ورد چبيرة
رنـــه :: الله خل نلعب وياهن؟
جوري:: عدي امتحان اني اريد اراجع.
ورنه ولا مهتمه جرتها من ايدها وركضتنه وي البنات كضينه ايد بأيد والبنيه دفعت رنـــه بالدائرة يوسطنا صارت واحنا نفتر ووحده من البنات تصيح
-شده يا ورد
واحنه بصوت واحد نرد وراها
-شددده.
-منهيه الورد؟
-شددده
-سعديه الورد
-شددده
-تاكل رمان
-شددده
-تاكل ريحان
-شدده.
بلحظة نسينا كلشي ولعبنه كأنما اطفال والضحكة ملت وجهنا الحد ما دك الجرس وكلمن ركضت الصفها، ووراها بالفرصه ماشفت البنات بس بنات غانم غثتني وحده منهن گالتلي
-اكضج بالحله احطج جوه السياره.
-روحـــي مناه ماما روحـــي لا اسويج مضحكه للطالبات.
غمتني ومشت، بالحله رحت لصف جوري وكفت بالباب متانيه ماتطلع من وكت هيه لان سادس تعاينلي وتكتب وره المدرسه لمن المدرسة طلعت من يمهم طبيت وياها البنات نصهن يكومن من الرحلات يوكفن يم السبوره يكتبن والبقيه يضلن يصيحن
-وخرن ما نشوف.
ومحد تهتم كلمن تفكر بروحها وتريد تكضي كتابه حتى تروّح الاهلها، اخذت الدفتر من جوري
-انتِ لمي كتبج والبسي العبايه انه اكمل كتابه.
اخذت دفترها ومشيت يم الرحله الاولى سولي مچان يمهم وكعدت اكتبلها بين ما كضيت ضمينه الدفتر ومشينه بس وصلنه لباب المدرسه اسمع صوت بــدور تعارك ومافاهمه شي ركضنه والكاها وي بنات غانم هنه يغلطن وهيه تغلط وترجف محترك گلبها چنها صــيهد اذا احترك گلبه
-حاجيني شبييج؟
بــدور:: يشهد الحسين دفن ادفنهن.
وهنه يمدن اديهن والسانهن ويصيهن
-ياااا خاب فنج تعاااي تعااي.
وهيه تريد تهد وانه كاضتها دارتلي بحرگه. تصيح
بــدور:: يغلطن على رغد ولج الخنيثات ترحن فـــدوه لتراب رجليها.
وما احس الا تفلن علينه عاد بــدور بعد ماگدرتها رگضت عليهن هنه ضالت بس اثنين البقيه رايحات بنات خالاتهن، هدينه وي بــدور نطكهن ويطكنه ووحده مچلبه بالثانية رنـــه طالعه ماهيه جان سحلتهن عدل، الچلبات احنه نطكهن بس ولا جرينه عبيهن هنه يهومشن طيحن عبينه ويجرن بحجاباتنا، من شفناهن هيج بعد ما اهتمينه احنه هم سوينه مثلهن وكتلناهن والوادم تعاين علينه واحنه منومينهم بالتراب، جريت بــدور منهن وهيه تتفل عليهن وتغلط
بــدور ::هاااه ياهو الدفن هسه؟ فنچن الحجيتن برغد بعد اكص السانها التحجي.
وهنه كامن يغلطن نكثنه عبينه من التراب ومشينه للسياره الحجي لو نتذابح لا يدخل روحه ولا يسأل ولا يگول ليش واحنا وحده توصي الثانيه محد تحجي سكتنه وصلنه للبيت واول ما وصلنه فلتناها سولفنه لرغد وهيه ماراضيه علينه.
سكتت كملت صلاة ونزلت يم امي فتحت باب الغرفة مبتسمه وهيه سدت ألقرآن من شافتني وفتحت ايدها مشيت الحضنها ابوسها واشم صدرها ترد روحـــي .
-شلونج يمه؟
-تحت رحمته.
-مبينه زينه چنتچ يمج هاه ها ايمانو؟؟
-هههه مگروده جايه يمي ملتهيه وي وليدها شالع گلبها.
-والله يمه لو تسمعين شكد متلوعه مدري شلون تحملت كل هذا.
-سمعت يوم السولفتي الرغده.
-يا يمه جا تتنصتين علينه حرام.
-لا انه نويمه وانتن اجيتن فوگ راسي شلي غرض.
تحجي مبتسمه ضحكت نمت على رجليها تلعب بشعري واجن البنات بــدور وجويريه ماخلني مستمتعه سحلني دفعني وتمددن على رجليها هنه وهيه تبوسهن تضحك.
مشيت وي رغد وندى صبينه الغده واحنا صبينه وي امي رغد تكعد بصفها توكلها لان امي ايد وحده الثانيه ابد ما تتحرك
وابن ندى يفترّ علينه وهيه تنقهر عبالها نضوج لان مايضل كاعد بمچان واحد، نضحك وياه ونشاقيه بس حتى ما تنقهر.
العصر كاعده يم امي وردت فتحت موضوع مــيثم عاينتلها مقهوره وهيه تگلي
-يصونج .
-ما اريده يمه ما أريده شني الغيرج؟ مو چنتي بس ترديني ارضى بمحمد وهسه من محمد حولتي لميثم ما اريده يابه كارهته كره بس الله يعلم بيه مو زلمه.
طگتني على حلگي ما راضيه
ايمان:: لا تگولين مو زلمه كون اخوتج يسمعونج يكصون لسانج، زلمه ومعدل وسوايته ماكو واحد مسويها، انه نغشيت بمحمد ابن اختي وعبالي بس هوه وبس تالي خيبه يرواي بصورج لصحبانه.
-هههه هاي جذب عليج مــيثم وصدكتيه؟ يمه ترى سوه وياي سالفة ماكو رجال يسويها ولو تموت يا مــيثم يا ابن الروسيه ما اخذك.
طكتني على ايدي
-انجبي شمسوي، تاخذينه.
-والله ما اخذه وهسه اگل الصيهد والله.
وكمت من يمها بعصبيه محترك گـــلبي شلون هيج ضحك عليها وفر عقلها فر، طلعت من الغرفه ارجف واحجي بحرگه
-وينه صــيهد
رغد:: يا شبيج؟
عفتها. ومشيت. بحرگه للمشتمل فتحت الباب احجي
-صيهدد.
طلعلي من الغرفه عاكد حاجبه وكفت كدامه بچيت
-عاين ترى لو تموتني انه ما اخذ مــيثم.
-شبييج لج.
-ما اخذه والله لو يموت شني ثگلت عليكم خبزتي؟
-احجييي عدل.
دنكت آمسح بعيوني
-عليمن تبجين بله؟
-امي تكلي اخذي مــيثم وانتَ من امي تحاجيك بساع ترضى.
-هسه اطكها على حلگها شو صايره تليصين انتِ؟ شني بساع ارضى جابرج على قندره اناااا؟
هزيت راسي لا
-جا شلج بهالحجي بعد
-هيج احترك گـــلبي لان كل ما اكعد يم امي تكلي اخذي مــيثم.
-مالج غرض بيها انا احاجيها.
اخذ سويج سيارته وطلع ضليت كاعده وحدي مقهوره شويه رديت للبيت امي ماتحجي وياي دايره وجها شكد حاولت اصالحها ما تحاجيني، وي صلاة العشا رغد خبزت ومسويتلهم عشا طبت للغرفة گالت الامي
-يمه سويتلهم عشا تخابرين عليهم يجون ياخذونه؟
-لا يستهضمون، البسي عباتج وروحي وديه الهم وتعاي، صــيهد راح للمدينه ما يجي هسه
رغد:: انه اطلع؟ لا يمه فـــدوه خابريهم ما اروحن انه.
دارت امي تعاينلي سكتت گمت الف الشال على راسي زين لبست عباية اخذتهن من رغد وطلعت ادعي من كل گـــلبي الكه مــيثم اريد احاجيه وصلت الباب الحوش واسمع واحد يدندن شلت راسي اعاين بريا يمشي يفر بالسبحة مدنك ومدري شيحجي وي روحه وصل شويه عني وشال راسه بس شافني افتر وراح رد منين ما اجه " الحمدلله والشكر"
فتحت باب الحوش وطبيت دكيت باب الهول لان لكيته مقفول سمعته صاح
-الله اكبر.
ضليت واكفه بمچاني لمن كضه وفتح الباب انصدم بيه عبرته ما مهتمتله طبيت للمطبخ حطيت الاكل ومشيت طلعت للحوش وهوه على نفس الوكفه كاض باب الهول وكفت بالحوش وعاينتله
-مسحت صوري؟
هز راسه اي ومايحط عينه بعيني
مــيثم :: صورج ورقمج كلهن نمسحن.
-خوش امسحني انه هم وكف شرك عني ترى جاي تسوي مشاكل بيني وبين امي وكل يوم انامن والدمعه بعيني من وراك وبكل صلاة ادعي عليك، خابرها وگلها ما اريدن مــاسه ليش مخليها تضغط عليَّ بزعلها ترى والله العظيم لو جبرتني ارضى بيك اكرهك بعيشتك لا عبالك انه فقيره ترى شيطانه انه والله واسوي مشاكل وبس اعارك اربعه وعشرين ساعة، احسن الك خابر امي وكلها ما اريدن مــاسه.
مــيثم :: تدللين شويه واخابرها.
درت وجهي منه ومشيت طلعت من حوشهم حديقتهم كلها ورد بس همه عدهم ورد بيناتنا لان امهم جانت تحب الورد دوم يزرعونه بحوشهم. رديت لبيتنا كعدت بصف امي متانيه ليمت يخابرها صدك كبل العشا خابرها وكبل ما ترد عليه طردتني من الغرفه
وكفت يم البنات بالمطبخ شلت رضا من ندى وهيه تگلي وسعاد تهوبز عليهن سون هيج سون هيج وهنه لابساتها محد تمشي بحجيها، لمن اجوا ودينالهم عشاهم واحنا رحنا للغرفه يم امي. دايره وجها زعلانه ومختنگه مارضت تاكل ويانه، انه هم نقهرت وكمت اريد اصعد صاحتلي وكفت يمه گالت وصوتها مختنك
ايمان:: عاينــي انه كبل غلطت عبالي مصلحتج بعيد وهسه عرفت وين سعادتج وانتِ ما راضيه وهاي هيه يمه انتِ التختارين حياتج وبكيفج بس اذكري حجايتي لو ما رضيتي بميثم انتِ الخسرانه.
عفتها ومشيت صعدت للغرفة گـــلبي محترك حرك حيل مقهوره
ضليت بالغرفة احجي وي رنـــه مراسله واسألها على ريـــمه لان امها كلش منعتها من عدنه كمنه ما نشوفها الا صدفه، شلت راسي على صريخ رغد شمرت التلفون ونزلت اركض وهيه حاضنه امي وتصرخ وهـــب توه طاب للبيت شالها من بين اديها وركض للسيارة حسيت الدنيا وكفت بعيني واكفه بالنص والبنات يتراكضن وانه مثل الصنم هاي امي عزيزة روحـــي راح تموت من وراي كل الصار بيها من عدي وهسه هم .
جرتني جوري الصدرها وانه دمعه مانزلت من عيني كعدت على اركبي نار تحركني حرك أريد اموت، جوري كلساع تخابر وهـــب من تلفوني گالت
-يگول زينه معلكيلها مغذي شويه ويجيبونها.
هزيت راسي خوش روحـــي رايحه الحد الساعة ب١١ يله جابوها هوه وصيهد ورغد، حطوها بفراشها وجها اصفر اعاينلها من الباب مارحت يمها همه ملتمين عليها، رغد راحت تسويلها شوربه وبدور نامت بحضنها، صــيهد شال الكانونه من ايدها ووهب يغطي برجليها انه الوحيده وكفت بعيد عاينتلي تأشرلي تعاي أقتربت يمها مقهوره.
وكل حركت گـــلبي جان سببها مــيثم كلشي صار وجاي يصير هو السبب بيه، كاموا من يمها الولد وهـــب راح يسبح وصيهد مشه للمشتمل، حطيت ايدي فوگ ايدها صايره زرگه من الكانونه شلتها الوجهي بستها بحسره وعاينت لوجها
-يمه انه راضيه بميثم.
حجيتها وانه گـــلبي كله حقد جرتني الصدرها تبوسني وتگلي
ايمان:: خايفه عليجن يمه خافن اموتن وتضلن بيد اللطامات.
بلعت الغصه ماريد ابجي يمها
-عمرج طويل يمه.
وخرت من صدرها گوه كاضه دموعي كمت من يمها صعدت فوگ ماكدرت اروحن للغرفه طبيت للحمام ساده حلكي وابجي بحرگه نص ساعة واجت بــدور دكت الباب
-شترردين جاي اسبح!
-صــيهد يگول خل تجي للمشتمل بساع.
غسلت وجهي وطلعت
-اعصاب لو زين؟
-اعصاب خاف عرف بينا كتلنه بنات غانم؟
-لا لا ما اظن.
نشفت وجهي ونزلت مرتبكه رحت للمشتمل دكيت باب غرفته
-تعااي.
بلعت ريك من سمعت صوته ينتر فتحت الباب وطبيت فاتح الجراره يعدل السبح اللي بيها كون كلهن ممدودات عدل والخرز متساويه، عاينلي سداها ودار علي مضيك عيونه
-ها ست مــاسه
-ها؟
-شني رضينه بميثم؟
دنگت أعصر بأصابعي
صــيهد:: انتِ ليش ماعدج لا حچايه ولا شخصية؟ گلتي ما اريدنه ليش ما تثبتين على حچايتچ؟
عاينتله مرتبكه واحاول ما ابجي
-مو ما چنت فاهمه!
-شفاهمه؟
-يعني اذا اتزوج هناه بالقريه اضل يمكم وهاي احسن مو؟
نتر بصياح
-نچبيي، الظهر اجيتي تتراجفين وتصيحين لا تطيني الميثم وهسه تگليلها اريد مــيثم تلعبين انتِ؟ بالحسين اذا صار بأمي شي من وراج اكضج واكتلج.
دنگت دموعي ينزلن سكت وهوه دار وجهه بعصبيه وگال
-امشي گليلها ما اريدنه يمه اريد ادرس بعدني زعطوطة وميثم بگد البغل.
وانه مدنگه همست
-اريده.
وبنفس اللحظة حسيته واكف گدامي كضاني من زنودي بقوه شلت راسي اعاينله وعيوني من الدمع مغوشه خازرني بغضب
-بت النعال تلعبين عليَّ؟؟
هزيت راسي لا اريد افلت اديه منه دفعني حيل طلعت من يمه روحـــي رايحه، وصعدت گبل ضميت روحـــي بفراشي نمت ودموعي على خدي.
"""""
طــروادة :: عدنه امتحانات ونداوم مثّل الاوادم كلمن يجرله بصفحه گمت اعوفنهم كلهم واروحن وحدي امتحن واستاذ صــيهد يجي وره ربع ساعة وبمزاجه مره يجاوب مره ينقل من عدي، يجي للأمتحان وراي ويطلع گبلي.
وادري بيه يطلع بس يريد يلگه محمد ابن خالته وهذاك طافر ما ادري وين، عاينت الصيهد سلم اوراق الامتحان وطلع ربع ساعة وطلعت وراه دورت عليه مالگيته اخابره مايرد مشيت واشوفنه بباب الشؤون الا هنا الا هنااا يكتل محمد، مدميه فاشخة بحديدة وبنفس اليوم ترقن قيده سنة كامله ضاعت من عده، اخذناه انا وميثم ميتين من القهر.
مــيثم :: ما تنقهر انتَ ما تضوج سنة من عمرك راح تضيع.
صــيهد:: لا ما انقهر كتلكم لو تگلولي محمد شمسوي لو اكضه واكتله.
طــروادة :: انچب انچب يله كل عقل ماعدك مسودن الغسل الهالسوادنين هاي.
عافنه ومشه صحت وراه
-وين رايح
-ارد البنات من المدرسه
سكتت و مــيثم شكد حاول وياهم مارضوا يلغون ترقين قيده
-هسه هذا شتحجي وياه؟
مــيثم :: وتردوني اسولفله محمد شسوه غير يجيب سلاحه ويكتله بباب الجامعه ويكتل حتى صاحبه الشاف الصوره.
سكتت محتار وميثم هم ميت من القهر كعدنه بمچان گال
مــيثم:: محتار شسوي عمتي ام صــيهد تگلي بنتي الك والبنيه تگلي لو تموت ما ارضى بيك وصيهد يهدد ووهب يخزر، امس خابرت ام صــيهد گتله عمه ما اريدنها زعلت عليَّ.
-سالفتك داچه انتَ يابه شخبصتنه اخلي عفره تخطبلك من سلفهم؟
-لا على بختك انا لو ما اخذت الهاويها اضلن طول عمــري بدون مره.
ضحكت اهز ايدي گال
مــيثم :: الله ما يهديك وترضى ببريا.
-لا مايهديني واذا اشوفنه واصل سياج بيتي اكسر رجله.
-دگيت السياج بلوك من وراه؟
-اي والله من وراه مــيثم ترضاها يحاجيها النهار كله كاضلها السياج؟
-لا والله ما ارضى بالحرام اطيها اله وخل تصيّر بالحلال.
عفته وگمت ضايج منه.
"""""
جــويريه :: تعبـــت ايدي تتشنج من الكتابه وواعاين بالحله مــاسه توكفلي بباب الصف، لميت كتبي لبست عبايتي وطلعت وياها اجتنا بــدور تركض تعيب على مدرستنا ماتعجبها تريد ترجع لمدرستها، ضحكنه ومشينا نريد نطلع من المدرسه ولكينه بنات غانم مسوياتلهن شله بنات خالاتهن ومدري شيعودلهن وبلا تفاهم جرنه يتعاركن ويانه احنا ثلاثة وهنه بيهن ثمانية ملخنه والطالبات الواكفات بس يباوعن محد تدخل والسواق بسياراتهم يباوعون علينه
اكثر وحده كتلنها بــدور حاقدات عليها دافنها بالتراب وانه وماسه هم سحولنه يردن يمدنه بالگاع واني على العمياوي اضرب واخمش بأيدي جرن عبايتي شمرنها وچلبن بحجابي يردن يسحلنه واحس البنيه انسحلت من عدي ونشمرت لبعيد واباوعلها رنـــه بأيدها صونده خضره وبكل حيلها تضربهم وصريخهن ما بقى واحد ما سمعه
جرينه بــدور من التراب حالها حال وصايره ملحه دفننها دفن وكفتها انكث بيها واغطي بشعرها وماسه ورنه بعدهن يعاركن درت اريد اجر عبايتي أحطها على راسي وشهگت شهگه موتتني بمكاني من شفته عيونه يردن يطلعن من مكانهن جر العبايه حطاها على راسي دمغغ وصاح من بين اسنانه
صــيهد::مااااسه.
دارتله مــاسه ورنه بساع شمرت الصونده تريد تمشي جراها من عبايتها يحجي من بين اسنانه
-بساااع للسيارة.
باوعت الماسه وجها صار اصفر وبدور ما ينشاف لون وجها لان كله تراب حتى بحلكها داخل تراب ورنه وجها احمر معصبه،
واني روحـــي رايحه ادعي يطلع حلم، نمشي واه نرجف صعدنه بالسيارة شخطها من بين السيارات حرف ما ينطق ولا صوت بالسيارة بس رنـــه تدردم بينها وبين روحها
رنـــه :: النوب عليَّ بنات غانم الدايحات.
وهوه ساكت واني طول الطريق اقرأ الفاتحة وادعي كون يبرد گلبه ومايحاحينه، بس صف السياره بالحوش فتحنا البيبان ونزلنه نتراكض، رنـــه ركضت لبيتهم وماسه وبدور ركضن للبيت واني بدل ما اركض وياهن من الخوف ركضت للمشتمل واتلفت شفته راح وره البنات ركضت للغرفه ادورلي مكان اختل بيه.
مــاسه:: ركض دخلنه لغرفه امي وختلنه بظهرها وهوه اجه ورانه يا امي يا دنيا جرانه اثنينا من وراها عيونه دم ويرجف كاضنه من اجتافنه كل وحده بأيد امي تصيح عليه ورغد وكفت بينه بس تريده يهدنه وهوه متسودن. صيح على رغد خازرها
صــيهد:: وخررررري وخررري لا اطبگج انتِ وياهن، خررررب.
ايمان:: والله لو مديت ايدك عليهن اعمي عيووونك ولك صــيهد هدددهن.
وهوه يهزنه هز بأيده ينكث بينه ويصيح
-مووووديچن تعاركن؟ وووولج مااااسه ولج بنص الزلم مدنگه وبلا عباااايه
ابلعم ومچلبه بأيده
-عالن بينه والله عالن بينه.
وهوه متسودن ياخذنه مناه ويجيبنا مناه عبالك ريشات بأيده ركع راسي براس بــدور، ورغد دفعته وطكته على صدره
رغد:: حرگت گلب اااامي عوفهن.
ايمان:: خوش أمنت عليهن يمك.
وبدور غمضت عينها تسوي روحها اغمى عليها وانه ادري بيها جذابه دفعنه من ايده وافتر مثل المسودن يدور ويصيح
-وينهاااا هذيج ووينها.
ومشه يريد يروحلها للمشتمل امي صاحت وراه
-عليك بروح شامل لا تطگها
بس طلع بــدور شالت راسها تريد تگعد ورجع طب للغرفه ردت غمضت عيونها خزرني وصاح
- حلفتي الدك البأيدج محد يشوووفه اذا ما مسحته بتيزاب انتِ وهذذذيج انا اعلمچن.
ايمان:: صــيهد حلفتك بروح عمك لا تطگها.
وهوه طلع من يمنه رعيده.
جــويريه:: طبيت بالكنتور للزاويه الاخيره ماضليت يم الباب اللي ينفتح وتغطيت ببطانيه ارجف بخوف وهوه طول ما اجه ومن الخرعه اغمى علي مدري نمت صدك، احس بروحي اشخر وفزيت اول ما فتحت عيني لگيته طاب وياي بالكنتور بلعت ريك مد ايده جراني من صدر السدريه طلعي من الكنتور وكضني من اذني حيل چلبت بأيده
صــيهد:: بتتت الحيوان موديچ للعرك انااااا؟
هزيت راسي لا وهوه ياخذني ويجيبني يفور ويغلط
-هنه والله هنه.
- انچبيييي انچبيييي.
عاينتله عيوني مدمعه ومچلبه بأيده اذني راح تنملص وهوه ماهادها يريد يضربني وشال ايده يهدد
صــيهد:: اذا ما اكرهجن بعيشتجن انتن الاربعه أمهات المصايب امشيييي امشي يله.
طلعت من يمه اركض واريد بس اوصل البنات حتى ابجي وياهن لگيتهن غاصات من الضحك وگبل گاللي
-ها كتلج؟
-لا بس كضني من اذاني جنت نايمه انه.
بــدور:: ههههههههههه انه اغمى عليّ
مــاسه::والعباس جذااااابه تمثل تمثل انه اعرفهاااا.
ايمان:: مابيه خير كون كاتلجن صددك.
رغد:: جا ياهي الرادت تتخربط علمودهن وتريد بس تكوم تحميهن.
ضحكت ام صــيهد واحنه ولا جنه مكتولات صعدنه بدلنه ونزلنه بس من رد هوه طب للبيت ركضنه فوگ شاردات كلنه .
""""
رنـــه :: طبيت للبيت طــروادة توه راجع من الكليه سولفتله العركه وعود زعلانه ما احجي وياه بس ما گدرت ما احجيله، عفته ومشيت للمطبخ ضايجه منهم لان سووا السياج بلوك وعالي خنگوني خنگ.
صبيتلهم غده وحسين يتشگى الطرواده شلون ما ارضى اقريه وطرواده ساكت خاف يحاجيني خاف انهد بيه علمود السياج.
وكل ما اطلع للحوش اصيح بصوت مسموع
-اخنگونه فوگ ما احنه مخنوگين.
وهمه يسكتون ماخذيني على گد عقلي، العصر طــروادة توه كضه بنيان وجاي اسويله چاي وسمعت صوت سيارة شرطة دك گلبي بخوف دقايق وندك باب حوشنه ركضت لباب الهول اعاين طــروادة فتح الباب الشرطه ببابنا وشعلان واكف يمهم أشر على طــروادة وگاللهم
شكرا لزيارتكم عالم روايات سكيرهوم
