رواية كوميديا سوداء الفصل الثالث بقلم ليل ادم
في مكتب استاذه ريهام
استاذه ريهام: اتفضلوا
الدكتور خالد: استاذه ريهام الإنسان ده زود الموضوع اوي
الدكتور علي: ليه بس كده عمل اي
الدكتور خالد: البيه جاي يعرفني شغلي كل ما اكلم حد من المرضا يقولي الدكتور أحمد قالي انت مش محتاج حاجه امشي ولو استمر في الموضوع ده هيترفع علينا كم شكاوي ممكن نترفد كلنا بسبب إهماله
الدكتور علي: الكلام ده حصل يا دكتور احمد
احمد : وكتاب الله الكلام ده ما حصل
الدكتور خالد: انت بتقول اي هو أنا مش قولتلك متكتبش لحد خروج طالما أنا طالب منه تحاليل
احمد : حصل
استاذه ريهام: طيب يعني حصل اهو أما ليه بتقول وكتاب الله ما حصل
احمد : يا فندم أنا لسه أول يوم ليا وأنا مش عارف طبيعه الشغل حضرتك والمفروض تكليفي يبدأ من بكره قام الدكتور علي قالي لا الدنيا زحمه والاستقبال مليان البس واقعد تكليفك بدأ معلش يعني يا دكتور علي أنا مش فتان
الدكتور علي: لا تمام كمل
احمد : اه قام بعدين اللهم ذكرني احنا وقفنا فين معلش
استاذه ريهام: الدكتور علي قالك الدنيا زحمه والاستقبال مليان البس واقعد
احمد : اه لسه بقول يا هادي لقيت واحد وشه غرقان دم شوفي البالطو بتاعي غرقان دم اذاي دا منظر دكتور والنبي
استاذه ريهام: تمام كمل
احمد : قوم بقا اي اللهم ذكرني احنا وقفنا فين يا دكتور علي
الدكتور خالد: (بصوت عالي) هو انت بتقول اي انت بتتهرب من الكلام
احمد : اه لأ ليه
الدكتور علي: خلاص يا دكتور احمد خليك معايا في فريقي ملكش علاقه ب فريق دكتور خالد تمام كده يا دكتور خالد
الدكتور خالد: تمام
الدكتور علي: ده طبعاً بعد اذنك يا استاذه ريهام
استاذه ريهام: تمام بس عندي كلمتين ل الدكتور أحمد
احمد : تحت امرك
استاذه ريهام: انت لسه اول يوم ليك النهارده في التكليف يا دكتور احمد ف بدال ما حضرتك تدخل اتعرف عليك بسم الله ماشاء الله جاي معاك نائب مدير المستشفى الدكتور خالد ومعاك استشاري جراحة عامه الدكتور علي ومن اول يوم بدأت في المشاكل
احمد : لحظه واحده يا استاذه ريهام ممكن اقول حاجه
استاذه ريهام: قول
احمد : معلش يعني حضرتك اللي قولتي تعالي يا دكتور خالد تعالي يا دكتور علي تعالي يا احمد أنا مجبتش حد
استاذه ريهام: (ثابت القلم وبدأت تتعصب )
الدكتور علي: احمد احمد علي الاستقبال ياله
احمد : بعد اذنكم
استاذه ريهام: ده شكله مش طبيعي
الدكتور خالد: قال أول الدفعه
الدكتور علي: الدكتور احمد خرج مش كده
الدكتور خالد: قول يا دكتور علي أصل انبهارك ب اللي عمله ظاهر عليك اوي
استاذه ريهام: لا يا دكتور خالد احنا نحط كل مقام في مقامه هو شكله فعلاً شاطر جدا
الدكتور علي: الدكتور أحمد هيكون ليه مستقبل كبير بجد حافظي على الولد ده يا ريهام علشان نظرتي عمرها ما خيبت زاي ما اول يوم دخل في الدكتور خالد المستشفى وكان تحت ايدي وقولتلك هيكون ليه مستقبل كبير وفعلاً حصل انا بقولك الدكتور أحمد من احسن الأطباء اللي تخدي منهم فحص طبي وانتي مغمضه عينك
بعد اذنكم
الدكتور خالد: رغم انك استاذي بس عمر كلامك ما عجبني للأسف
الدكتور علي: ريهام بلاش تمشي ورا دماغ حد سيبي احمد ياخد فرصته كامله
الدكتور خالد: وأنا بتحدك انت معاك طاقم وأنا معايا طاقم وريني الدكتور أحمد ابن امبارح هيعمل اي
الدكتور علي: وأنا موافق بعد اذنكم
استاذه ريهام: دكتور خالد من فضلك بلاش الولد ده كده كده بقا بعيد عن ايدك
الدكتور خالد: طول ما بعيد عن ايدي معنديش مشاكل بعد اذنك
في جانب آخر
احمد : يا بشمهندسه غاده
مس غاده: نعم يا دكتور احمد
احمد : هو مفيش في المستشفى دي تعيين دا انا لو في قسم شرطه هيكون في زياره
مس غاده: الساعه كام
احمد : سبعه وأنا هنا من تسعه الصبح
مس غاده: قصادك نص ساعة وتاخد بريك
احمد : حلو اوي ده انا فعلا محتاج بريك بيكون وقته أد اي ده
مس غاده: عشر دقائق
احمد : اي ده عشر دقائق معقول التبذير ده هناخد اليوم كله اجازه اي الاستهبال ده
الدكتور علي: احمد في حاله بره في الاستقبال روح شوف في اي
احمد : طب كان في مشروع أكل
الدكتور علي: احمد اتحرك
احمد : منا هتحرك منا جاي هنا علشان أكل و أعيش زاي البشر مثلاً مالك يا عم انت كمان
بعد خروج احمد لقي ناس كتير في الاستقبال ومعاهم طفل
احمد : محدش يتكلم سبوني أخمن شرب صابون
الأب: لا
احمد : أكل صابون
الأب: ياعم لا افهم
احمد : طب اي عملته في اي يا كفره
الأم: بلع جنيه
احمد : يعني حضرتك جايه معاكي عشر رجاله علشان ابنك بلع جنيه و الواد جاي ماشي في ايدك عادي وصحته احسن مني هل الاهتمام ده علشان ده اخر جنيه على الكوكب ولا اي الدنيا
الأب: يا دكتور م الجنيه ممكن يصدي في بطنه
احمد : اه ف حضرتك جاي عايزني اخده افتح بطنه اطلع الجنيه منها صح كده
الأب: المفروض
احمد : الرحمه من عندك يارب يا بيه أنا اكلت أربعين جنيه فضه من طفولتي لحد النهارده و اديني وقف قصادك ارحموا من في الارض يرحمكم من في السماء
الأم: يسمع من بوقك ربنا اشوفه دكتور حلو شبهك كده
الأب: اي يا وليه مالك
احمد : لا لا لا طلق مع نفسك أنا وعهد الله ما قادر وبعد ما تطلق خد ابنك و امشي
مس غاده: رايح فين يا دكتور احمد
احمد : اشتري اي حاجه جعان وربنا يا جدعان
مس غاده: خلاص تعالي معايا سندوتشات جبنه خود لك واحد
احمد : منا بقالي ساعه عمل اصوت قصادك هاتي جبنه جبنه يعني التعيين كان هيجبلي لحمه بارده
مس غاده: خد الف هنا انت متجوز يا دكتور احمد
احمد : لا مش متجوز
مس غاده: هما كل بتوع القاهره حلوين كده
احمد : حلو المخلل ده يا مس غاده
مس غاده: قولي يا غاده
احمد : ابقي هاتي منه بكره بحب المخلل موت
مس غاده: ده من الغالي انت عارف الكيس بكام
احمد : بكام
مس غاده: ٢٥ جنيه الكيس
احمد : لا والله فكره حلوه
مس غاده: فكره اي
احمد : لا لا ابدا شوفي بتعملي اي يا مس غاده عشان عندي شغل بعد اذنك
مس غاده: ماشي يا اخويا منا خارجه
احمد : والله فكره حلوه بدال الهري اللي أنا في ده أنا شوفت النهارده
اللي عمري ما شوفته وعلى أي في الاخر ٢٠ ألف ملطوش لو خدتهم
لا و كمان واحد زاي اكيد اخر الشهر هتلاقي عليه ٦٠ ألف جنيه خصومات يعني قبضي هيكون سالب أربعين ألف جنيه والله ياض يا احمد اربع براميل مخلل من ده واتنين عيال واقفين في السوق الأربع براميل يعملوا ٤٠٠ كيس في ٢٥ جنيه ١٠ تلاف جنيه والله فكره حلوه بدال الهري اللي أنا في بس معقول هبيع كل يوم ٤٠٠ كيس مخلل صعبه دي ولا مفيش حاجه صعبه ما عبد الغفور البرعي بدأ من اي من كام صاموله في الشارع على كام حتت سلك سارقهم من عند المعلم ابراهيم سردينه وبقا صاحب الوكاله كلها والله برضوه حوار النحاس ده فكره حلوه واكبر أبقا معلم كبير محل مخلل ومحل خردوات المعلم احمد
باب الغرفه اتفتح بكل قوه
المريض: الحقني يا دكتور بموت
احمد : اقعد اقعد كلها بتموت والآخر يا شارب صابون يا واكل صابون يا بالع جنيه
المريض: انت بتقول اي بقولك قلبي بموت
احمد : اهدا بس اقفل الحسابات دي علشان لو طلعت ربحانه مش هكشف عليك أصلا
المريض: يا بني ادم بقولك بموت
احمد : انت شغال اي
المريض: ببيع كنزات
احمد : يابن اللعيبه السهل الممتنع اربع شباب زاي الورد تمشي تلم كنزات هو الكنز بالكيلو ولا بالمتر
المريض: بالطن ابوس ايدك بموت يا ابن المجنونه
احمد : حاضر دا انت فصيل افرد ايدك اقيس ضغطك ولا اقيس اي مالك أصلا
المريض: قلبي بيدق جامد اوي هموت
احمد : افرد ايدك ياعم (وقاس الضغط ) اي ده ياعم ١٩٠/ ١٠٠ وتقولي قلبي بيدق دا المفروض يقف خالص افتح بوقك حط دي تحت لسانك وخليك نايم كده شويه
المريض: قلبي مش قادر
احمد : ياعم متقلقش صغطك هينزل تقوم بكره أن شاء الله صائم تعملي تحليل دهون ثلاثيه هتطلع عاليه هكتبلك علاج سيبني اكمل بقا الحسبه بتاعتي الحمد لله الجو هادي
مس ورده: دكتور احمد
احمد : مين
مس ورده: أنا مس ورده خد امضي هنا
احمد : مش هخلص وريني
مس ورده: اي الدوشه اللي بره دي امضي عبال ما اشوف في اي بره
احمد : رايحه فين خليكي الوقتي الباب يترزع بالرجل ويدخل يخدني من رقبتي
مس ورده: اذاي يعني هيا قله ذوق
احمد : بس والنبي متعمليليش فيها شغاله في دار الفؤاد أنا وعهد الله عايز ادخل الحمام من ساعه وخايف حد يدور عليا يعرف اني في الحمام يضرب الباب بالرجل يدخل عليا سلبوطه كده
مس ورده: لا مش للدرجادي
احمد : طب اصبري عدي معايا واحد اتنين تلاته
والآن مع المفاجأة الكبرى (باب الغرفة اتفتح بكل قوه ودخل واحد شد أحمد من أيده )
ابن المريض: الحق اوبوياااااااااااااا
احمد : ألحقه فين ما تجيبه المستشفى هنا
مس ورده: عيب كده سيب الدكتور
ابن المريض: امشي معايا اسكتي انتي
احمد : اه معلش يا مس ورده اسكتي انتي بقيت بحب المسكه دي جدا بينا على ابوك
بمجرد خروج احمد لقي واحد ماسكه من البالطو
احمد : نفسي اعرف ليه مضايقين من البالطو اي مشكلته طب منا جاي معاكم
ابن المريضه: امي بتموت
احمد : اه دا انت غيره طب نشوف أبوه وبعدين نشوف امك
ابن المريضه : امي الأول
ابن المريض: لا ابويا الأول
احمد: البالطو الأول والنبي والله كده غلط أنا عايز دكتور يكشف عليا من اللي شوفته هنا
ابن المريض: اسكت انت
احمد : ياعم اهدا انت انا عندي حل حلو انت هات ابوك وانت هات امك وهكشف على الاتنين سوا انطلقووو
مس ورده: رايحه انده دكتور علي
احمد : و اندهي ابويا والنبي يا مس ورده قوليله هسمع كلامه وهشتغل في السوبر ماركت اللي حمبينا
ابن المريض: انت لسه وقف اخلص
احمد : فين ابوك ياعم مالك يا حج
المريض: جسمي كله منمل
احمد : انت متعشي عسل ولا اي (وبيضحك)
ابن المريض: انت بتستظرف
احمد : ياعم انت مخوفني اوي خلي بالك
مس غاده: قياس ضغط وسكر للحج
مس غاده: حاضر يا دكتور احمد
احمد : مالك يا امي
المريضه : وشي أتعوج مره واحده كده
ابن المريضه : شوف امي يا دكتور
احمد : مش دي امك يابني
ابن المريضه : اه
احمد : أما اي شوف امي دي انت متخلف يابني
ابن المريضه: انت لسه هترغي
احمد : وعهد الله أنا هعيد النظر في موضوع عبد الغفور بعد ما شوفتك انت والإنسان اللي هناك ده
الدكتور علي: خير في اي
مس ورده: السكر مظبوط يا دكتور احمد بس الضغط عالي جدا
احمد : أفردي دراعك يا امي
ايوه عالي كام يعني يا مس غاده ولا قفل اللعبه الجهاز مش جايب رقم
مس ورده: داخل في ٢٠٠/ ١٢٠ ألحقه بسرعه
احمد : اهدي يا مس غاده مفيش حاجه اهدي
الدكتور علي: دكتور احمد بتقولك ٢٠٠ قائم
احمد : حبايه اوزول تحت اللسان وعلقي محلول اضربي فيه اربعه سنتي فيسكون الأزرق مش العلبه الصفره
مس غاده: حالا
(الارتباك ظاهر على دكتور علي وعلى مس غاده بعد ما بدأ يفقد المريض وعيه بس هدوء احمد كان مطمن الجميع)
احمد : ضغطك مظبوط يا امي افتحي عينك وخليكي مع الليزر اللي في ايدي
المريضه : حاضر
احمد : خلاص تمام
ابن المريضه: في اي يا دكتور امي عندها حاجه خطيره
احمد : الوقتي قلبت كتكوت شعب ملهوش إلا فرعون
ابن المريضه : ياعم اخلص امي فيها اي
احمد : عصب سابع ياعم تمشي على العلاج ده يا امي وتبعدي قدر المستطاع عن المراوح و اي درجه رطوبة عالية اشوفك كمان تلات ايام أن شاء الله تكوني تمام اي تنميل في الوش اي شد اعصاب كل ده طبيعي علشان بس المجنون ابنك ده بيجي زاي الحمار يشدني من البالطو
ابن المريضه: هسيبك بس لجل ما اطمنت على امي
مس غاده: دكتور احمد بدأ يفوق تاني اهو
احمد : طول ما ضغطه عالي هيفضل في نفس الحاله أول ما يبتدي ينزل هيبتدي التحسن تدريجي
(فك الكانيولا ل المريض)
الدكتور علي: ليه لسه بدري سيبه بدال ما يدخل في كومه
احمد : يدخل الحمام ويرجع يكمل
المريض: اه اه والنبي يابني لسه كنت هقولك عايز ادخل الحمام
احمد : معلش يابا ( وبصوت واطي) خلي ابنك اللوح ده يخدك الحمام ويجي تاني تكمل المحلول
ابن المريض: بتقول ل ابويا اي
احمد : ياعم رايح الجو مريح والنبي
دكتور علي: (بيضحك) بقيت تتكلم زايهم من يوم واحد اهو
احمد : أنا مش قادر وربنا أنا عايز اسيب الدنيا كلها و اطفش بص والنبي ده شكل بالطو دكتور أنا ولا جزار في المدبح
الدكتور علي: بكره تتعود انت بس علشان لسه في جو جديد عليك
احمد : يا مؤمن أنا من الصبح على سندوتش جبنه استغفر الله العظيم يارب وعهد الله الجوع كافر بجد
الدكتور علي: مخدتش بريك لحد الوقتي
احمد : والله العظيم ما حصل
الدكتور علي: روح خد بريك وأنا هكمل
احمد : الله يكرمك (وخرج من الغرفه جري يدور على مكان البريك قبل ما حد يجي يشده من البالطو شاف مكان شبه الكافيتريا دخل في )
احمد : لو سمحت ممكن اقعد هنا علشان مفيش مكان
جميله: اتفضل (وكانت لهجتها من القاهره)
احمد : اي ده انتي من القاهره
جميله: اه وانت من القاهره
احمد : اه النهارده اول يوم ليا هنا
جميله: أنا بقالي هنا سنه
احمد : الله يكون في عونك أنا عايز اطفش أنا مش قادر الوضع هنا قله ادب
جميله: بص كلنا جينا قولنا زايك كده بس ادي نفسك فرصه وهتلاقي نفسك حبيت المكان
احمد : حبيت اي بس أنا أول ما جيت وقعت مع الدكتور خالد ابو وش كشر ده يا ساتر رهيب بجد
جميله: ليه ماله
احمد : لا بجد صعب لو ضحك وشه هيشقق طول النهار عامل كده
جميله: (بتضحك ) عامل اذاي
احمد : عامل كده
جميله: انت مشكله والله
احمد : انتي اسمك اي صحيح
جميله: اسمي جميله وانت
احمد : احمد انتي قسم اي
جميله: جراحه عامه
احمد : الله أما مش معايا ازاي
جميله: أصل أنا في فريق دكتور خالد
احمد : (من الصدمه قعد يلعب في دقنه وساكت )
جميله: (بتضحك) مالك في اي
احمد : طبعا اللي قولته ده كله كلام هبل الدكتور خالد ده اجدع واحد هنا وراجل رايق في نفسه
جميله: ياعم مش هقوله حاجه خليك قاعد كمل أكلك
احمد : ما الراجل الصبح قالي مش هقوله وسرك في بير وراح قاله لا انتوا هنا ملكوش أمان
جميله: لا والله وعد مش هقوله
احمد : حيث كده لو عايزه اي حاجه أنا ممكن اساعدك في اي وقت
جميله: شكرا يا احمد كمل أكلك
احمد : (شاف جميله سرحانه في تقارير وكانت حزينه ) شكلك مشغوله اوي بسبب التقارير دي
جميله: اه والله بنت ٢٧ سنه وعندها فقد احساس بكل أطراف الجسم و شلل على مستوى الساقين وكل ده حصل في يومين مش اكتر
احمد : ياه اي السرعه دي
جميله: منا بقولك محدش قادر يفسر اي ده
احمد : ممكن اشوف التقارير
جميله: اتفضل
احمد : القيم كلها كويسه والمؤشرات الحيوية كلها تمام والرسم الكهربائي وكله تمام
جميله: المشكله في اي بقا محدش يعرف
احمد: هيا البنت دي كانت في دوله من دول أوربا
جميله: ليه اشمعنا
احمد : النهارده الصبح كنت متابع تقرير ل دكتور فرنساوي كان بيتكلم عن حاله بيتسبب فيها فيروس نفس الأعراض دي بس دا فيرس نادر يعني بين كل مليون واحد ممكن يطلع منهم واحد وممكن صفر
جميله: طب ما ممكن الفيرس ده يجلها هنا هو لازم تروح تخده من اوربا
احمد : لا مينفعش لأن البيئه اللي بينشط فيها الفيرس دي بتكون رطوبتها عاليه جدا عكس الأجواء عندنا
جميله: لا دي بنت بسيطة لا يمكن تكون جايه من اوربا خالص
احمد : أنا شايف انك تسأليها مش هتخسري حاجه
جميله: هسألها و وده امل ضعيف بس اتمنا تكون جايه من اوربا فعلاً ويطلع كلامك صح البنت حالتها النفسية صعبه جدا صعبانه علينا كلنا
احمد : لا يمكن تكون صعبانه على دكتور خالد اكيد طلب منها تحاليل ب اتنين مليون جنيه أنا عارفه
جميله: (بتضحك) ياله بعد اذنك
احمد : اتفضلي (تليفون احمد بيرن)
احمد : ألو
الدكتور علي: مش ياله بقا
احمد : حاضر جاي حالا
في جانب آخر
جميله: ازيك يا زهره عامله اي الوقتي
زهره: الحمد لله طمنوني وصلتوا لأي حاجه
الدكتور خالد: لا لسه الفحص شغال عايزك وثقه في ربنا احنا لسه مشوارنا طويل ثما أنا جاي علشان اخد منك موافقه ع عمليه تنذير
جميله: تنذير اي علاقه التنذير ب حاله زهره يا دكتور خالد
الدكتور خالد: ما هو مش تنذير في المعده يا جميله
زهره : أما اي
الدكتور خالد: على مستوى الرأس
زهره : مش فاهمه
جميله: مستحيل يا دكتور انت بتقول اي دا خطر وإجراء جديد عمره ما أطبق قبل كده
الدكتور خالد: في حل تاني قصادك
جميله: (سكتت)
زهره : موافقة
جميله: زهره انتي سافرتي بره مصر قبل كده
زهره : أنا كنت وخده منحه تعليمية في روسيا
جميله: احمد صح هو الفيرس (وخارجه من غرفه زهره تجري على الاستقبال علشان توصل ل احمد)
الدكتور خالد: جميله اقفي هنا رايحه فين
جميله: مش محتاجه تنذير ولا اي حاجه نفس الأعراض دي معمول بيها تقرير فرنساوي بيتكلم عن الفيرس اللي نفس اعرضه عند زهره
الدكتور خالد: مين قالك الكلام ده
جميله: دكتور لسه جاي جديد اسمه احمد
الدكتور خالد: اه طب اسمعي اللي قاله الزفت اللي اسمه أحمد ده تنسيه أنا كمان ساعتين هكون في غرفه العمليات جهزي زهره علشان عمليه التنذير
جميله: حضرتك بتقول اي تنذير في مجال المخ والأعصاب انت بتحكم عليها أقل حاجه ب العما دي اقل خساره ممكن تحصل لو بس الشفاط اتهز في ايد حضرتك
الدكتور خالد: والله عال كلك واحد منكم افتكر نفسه دكتور وعايز يمشي الكل على رأسه قصادك ساعتين تكوني في غرفه العمليات انتها الكلام
