رواية قلب اسود الفصل الثالث بقلم كاتب الجيل
الناس اتلمت على الراجل اللى وقع على الارض وحاولوا انهم يساعدوه ويفوقوه
لكن قعد يعمل حركات غريبة فى الارض ويتنفض بجسمه كله
دقات قلبه كانت جامدة جدًا لدرجة انك ممكن تسمعها من مكانك
وشه ازرق ولون جسمه كله اتغير ، الناس قطعتله القميص علشان يحاولوا يضغطوا على قلبه
ويلحقوه قبل مايموت ، لكن الكل كان مندهش ، لان كان فيه حركة غريبة جوه بطنه وكأن فيه حاجة
ماشية جواها ، كله خاف وبدأ يبعد عن الراجل اللى طلع فى الروح ومات
بعد دقايق الراجل التانى اللى اتصور مع اللوحة خرج وبالرغم ان الدنيا كانت دوشة وهرج ومرج
علشان الراجل المقتول ، الا انه مشي ولا كأنه شايف حاجة وكأنه متحرك بالريموت كنترول
الناس مخدتش بالها من منظره وهو خارج ، الوجوم كان على وشه وكأن فيه كائن بيحركه ، ولمحت وراه البنت اللى فى اللوحة
بصتلى وضحكت ضحكة مرعبة وكملت طريقها وراه
الشرطة جت وعملت طبعًا معاينة للمكان وخدوا شوية صور للراجل فى مكان الوفاة
طبعًا كلنا كنا مصدومين من مصدره ومن وشه اللى بيتاكل قصاد عينينا ومحدش فاهم ولا عارف السبب ايه
بابا اهتم بالموضوع وكان دايمًا على اتصال بصاحب المعرض وعم سليم صاحب استوديو التصوير
علشان يتابع الاحداث ، وكله كان مهتم وكانوا محتاجين يفسروا هل اللوحة ليها علاقة بالموضوع ولا لا
وفى يوم بابا جه من بره وانا كنت قاعد فى الصالة انا وماما ، واول مادخل باسنى وقالى :
= خش اوضتك ياحبيبي العب بلعبك جوه علشان عايز اتكلم مع ماما شوية
دخلت الاوضة لكن حاولت اسمع الكلام اللى هيقولهولها لانى توقعت ان ليه علاقة
بموضوع اللوحة والراجل اللى اتقتل ، وفعلا قالها ووشه كان باين على ملامحه الدهشة
= النهاردة حصل حاجة غريبة جدًا ياعلياء مش قادر افسرها
.. خير ياعادل مالك ؟ وشك مخطوف كده ليه؟
= النهاردة روحت انا وصاحب المعرض للنيابة واتطلعنا على صورة من المحضر والمعمل الجنائى
واضح كده ان الراجل مات لسبب خفي محدش قادر يعرفه ، وفيه صورة من الصور اللى لقطوهاله بعد مامات
بتبين راس تعبان خارجة من ودنه ، ولما فكرت فى الموضوع افتكرت الحركة اللى كانت فى بطنه
ان ممكن يكون تعبان دخل جوه جسمه
.. ايه اللى بتقوله ده ياعادل ؟ ازاى يعنى تعبان هيدخل فى جسمه ؟! الراجل كان كويس جدًا قدامنا وهو بيتصور مع اللوحة
= ماهو ده اللى قالقنى
.. مش فاهمة
= راس التعبان اللى خارجة من ودن الراجل ، تشبه بنسبة 90 % راس التعبان اللى موجود فى اللوحة
.. يانهار ابيض !!!
= انا خايف يكون الموضوع بسبب اللوحة دى وكمان خايف ان الناس تتأذى بسببها
.. بس معقول لوحة هتعمل كل ده ياعادل
= مش عارف ياعلياء انا عقلى شت ودماغى وقفت عن التفكير خلاص
مفيش دقايق لقيت عم سليم نده على بابا وطلب منه انه ينزله علشان يكلمه وده طبعًا غير معتاد
الساعة كانت 11 بليل والدنيا كانت هادية تحت البيت ، حاولت اتصنت عليه واسمع هيقوله ايه
خاصة ان وشه هو كمان كان مخطوف جدًا ، وفعلا ظنى طلع فى محله
عم سليم قال لبابا :
= شكل موضوع اللوحة فيه حاجة يااستاذ عادل
.. ليه ياعم سليم بتقول كده؟! علشان الراجل اللى مات ؟
= لا انا عايز اقولك ان الراجل التانى اللى اتصور مع اللوحة هو كمان مات
.. ايه الكلام ده ازاى؟!
= بيقولوا ان الراجل قعد اربع ايام مبيتكلمش مع حد ولا عارف يتحرك من مكانه وودوه المستشفى
ودخل الرعاية المركزة ومات جوه ، والغريب بقى ان وشه برضو لقوه بيتاكل لوحده وتقريبًا
نفس حالة الراجل الاولانى اللى مات
.. بص ياعم سليم انا هرفع عنك الحرج ، هستأذنك تجبلي اللوحة وانا هخليها عندى فى البيت
وكل شئ هيبان وربنا يستر
= اوامرك يااستاذ عادل
تانى يوم حسيت برجة جامدة اوى فى البيت كأن فيه زلزال وبعدها بدقايق سمعت عم سليم بينادى على بابا
علشان يديله اللوحة ......
