رواي عذابي وقدري الفصل الرابع بقلم ارسلان جاف
اذا شفت نفس شي هم أنزل وتدللون داداتي
ماما… رنوو كومي خطيبج علاء راح يجي
بعد شويه واني كمزت من لفراش…
شنووو…
…ماما كومي حضري الريوك اخاف الولد
مامتريك خطية اليوم راح يرجع لبيتم لبغداد
صااار… ماما
طبعا ليوم الاحد واول مرة اغيب عن المدرسة
غسلت وبدلت ونزلت فتت للمطبخ وخليت الجاي
على الطباخ وطلعت من الثلاجة جبن ومربئ
وسويت بيض وحضرتهم وخليتهم علئ ميز
بالمطبخ ..
واني بالي بغير مكان يم المديرة باجر شراح
تسوي بيه ومدرساتي من راح يعرفون انخطبت
راح يبهذلوني والله لان يعرفون راح انشغل عن دراستي
اندكت الباب… رفعت البرده باوعت من شباك المطبخ
ماما راحت تفتحه…
ماما… علاء اتفضل يمه كل الهلا بيك نورتنا يمه
- عمه بلا زحمة عليج بس الاوراق مالاتي …
وصيحيلي رنوو اريد اشوفها لان مستعجل ورايه
طريق طويل…
ماما… لا يمه تفضل ورنو حضرتلك الريوك فوت يمه
اتريك لان اكيد طلعت بدون متتريك…
علاء… اي والله عمه طلعت مستعجل اريد اوصل
للبيت لان عندي هواي شغل هناك…
دخلته ماما وكعد بالاستقبال…
ماما صاحتني روان جيبي كلاص مي لخطيبج
واني كلبي يقره الف من الخوف والارتباك
صح هوه هسه خطيبي بس بعدني ارتبك ومشاعري
تتخربط من اشوفه… اخذت كلاص المي
ودخلت الاستقبال…
وماما طلعت كالت رايحه اجيب الريوك
انطيته اله وكتله ..
صباح الخير…
علاء ..صباح الورد والحب والتفائل والامل ..
اوووف يانبع الحنان… واني ميته من الخوف
هسه وكتج تعوفيني وحدي… احجي بكلبي ..
هاي سوايه تسوينها بيه…
بقيت مصفصفه واكفه… اشرلي بايده
وكال تعالي اكعدي يمي واشرلي على
التخم بصفة اكعد رحت كعدت على التخم بس
بيني وبينه مسافه واني مدنكه…
وجان يكول شبيه هلكد اني اكرص وهيج
منهزمه مني… وضحك…
كتله لا وكمت احجي بس حجي مخربط،مااعرف
يمكن لان صاار يومين من شفته بس كلشي يتخربط
بيه بوجوده…
اوووف ياربي يمكن حبيته وكعتي ومحد سمه عليج ياروان…
علاء… احم احم نحنوا هنا وين صفنتي ..
روان… هااا لا ماكوو شي وياك…
بس راح اكوم اجيب
اوراقك واجي لان البارحة انت نسيتهم بصاله علئ التخم ..
كمت وعلاء صاااح… رنووو حبي جيبي تليفونج
وياج… .استغربت طلبه…
هوه كال حبي لو اني مدري شصار بيه…
كتله ماشي دقيقة اجيبه واجي…
صعدت لغرفتي اجيب الجهاز دورته ماكووو
ياربي وين راح من كد ماتخربطت احوالي…
نسيت نفسي نزلته للصبح وياي وخليته بالمطبخ
نزلت ورحت انطيته الاوراق وتليفوني اخذه مني
وكعدت وجان يقترب مني ويهمس باذني البارحة الليل
كله انتظر مخابرتج ليش ماتصلتي ورقمج موعندي
علمود اخابرج اني…
جاوبته… اني ماعندي الرقم شلون اتصل ..
اخذ رقمي وخزن رقمه بجهازي… وانطاني التلفون
وكال حبيبي اني اروح هسه لان اتاخرت…
روان… علاء والريوك ماكلت شي ..
كال شكلتي…
كتلك الريوك ماكلت شي ..
خفت لاحجيت شي غلط…
كلي عيدي… اسمي علاء… خرررب بيومج ولج
شنوو انتي تريدين تموتيني…
ولزم ايدي وقربني منه وصارت انفاسه قريبه
من انفاسي ..وكال احبج… رنووو
انتي حلالي اني متت بدمي من الخوف وقرب
شفايفه عليه غمضت عيوني وباسني من خدي
شافني خايفه ومرتبكه…
ابتعد وكال راح اروح حبيبي… باي
طلع واني بقيت كاعده بمكاني على التخم جمدت
وايدي على خدي مااعرف شنو حسيت اول مرة
احس بهيج شعور… اووف ياربي شديصير بيه
وشنووو الي اني بي معقوله حبيته هو هذا الحب
هيج حلووو…
قطع عليه افكاري اتصال علاء دك تليفوني
ماانتبهت على الرقم اذا رقم علاء او لا
ماجاوبت رفضته بسرعه…
اجتني رسالة فتحتها مكتوب بيها حياتي جاوبي
اني علاء ..اشتاقيتلج…
ماما صاحتلي… رنووو تعالي…
اي ماما… جايه
طلعت هاااا ماما
ماما ..تعالي بيبيتج تريديج على التليفون تريد
تباركلج بيبيتي ام بابا مريضه مكدرت تجي
اخذت تليفون من ماما… وبديت احجي وياهه
الووو… هلا بيبي شلونج
- شلون صحتج…
هلا رنوو الف مبروك يروحي ..
تسلمين بيبي الله يبارك بيج ..
ونسيت علاء اتصل وكال جاوبيني… والتهيت وياه
بيبي واسالها عن عمامي وعماتي واولادهم
وشصاير يمهم وعن صحتها وشلون صارت
بيبي اترخص منج… براحتج بيبي
وسديته منها وبعدها رحت شلت السفره مالت ريوك
اهلي جان يتريكون عليها لان خواتي رونق ورقيه
بالدووام وبابا وهيثم بعده نايم فوك وعلي طلع
لدوامه…
صعدت بدلت ولبست دشداشه ..
وبديت اغسل لمواعين ونظفت المطبخ
والبيت واني كل شويه اسرح بتفكيري لبعيد ..
،وافكر شديسوي هسه وصل لو بعده…
ههههه افكار المخطوبات… وصرت اضحك ع نفسي
وافكر ب علاء ياربي دخيلك احمي ولا تصدمني بشي
واذا علاء مسوي شي لا تخليني اعرفه هيج
كمت اندعي كملت تنظيف وساعدت ماما بتحضير
الغده كملت وصعدت لغرفتي ارتاح شويه ..
شفت الجهاز بي 24 مكالمه حيل هذا منوو
حارك عليه الجهاز حرك…
ورسائل اثنين فتحتهم وحده مكتوب بيها
اني علاء جاوبي…
وثانية بكيفج لا تجاوبين لازم ازعجتج…
اوووف ياربي هذا شبي زعل شراح يقنعه هسه
جنت جوه والجهاز صامت ماادري بي.…
متصل ومااكدر اتصل ارتبكت وحرت شسوي ..
بعدني هستوني اريد اكتب رسالة اتصل علاء
وكلبي كام يدك بسرعه…
وحرت مابين اجاوب لو لا اكيد راح يصير عصبي
عليه لان متصل هوايه ومجاوبته ..
فتحت خط… كلت الوووو
شدعوه عليج عيني متجاوبين عليه لازم اقدم
طلب للوزارة يله تحجين وياي استاذه روان…
واني بلعت ريكي مبين حامي عليه…
روان… علاء والله اسفه الجهاز جان صامت اعتذر
وجنت جوه مسمعته ..
وجان يكولي… اشتعلوا اهلي وعشيرتي
ولج انتي حلالي خرررب عمي هذا صوتج يموت
وكام يحجي ويتغزل كلام جرئ…
واني بلكوه احجي وامتمت
وهو دوكام يحجي ويتغزل كلام جرئ…
واني بلكوه احجي وامتمت
وهو دخل بالعزل والرمنسيه راح زايد وهو هيج كال واني… كبل
سديت التليفون وطفيته وبقيت صافنه وافكر بحجيه اني شراح اسوي اني وين وعلاء وين
يريد وحدة تجاوبه مثل مايحجي هو واني شراح
اسوي اذا اول مرة احاجي وهو هيج يحجي
شلون بيه وشراح احجي وياه…
اتمددت على الجربايه حتى بدون مابدل ملابسي
وبقيت صافنه بحجيه…
ورا ساعتين فتحت الجهاز اتصل اترددت اجاوبه
بعدهه فتحت خط جاوبته…
علاء… الوووو شلونج
روان ..بخير… انت شلونك
اني من اسمع صوتج اصير بالخير…
شكررااا ..
علاء… روان احنه ماحاجين قبل اريد احجي وياج
واتعرف عليج وتحجيلي كلشي عنج واني هم
احجيلج كلشي عني ..
شنو احب وشنو اكره ومن شنو اضوج
روان… ماشي
علاء ..هسه اعوفج لان اني بالمحل ومااكدر
احجي بالليل نحجي ويربالج تخلين الجهاز صامت
اتصل بيج ماشي…
روان… بس اني انام من وكت لان باجر عندي
دوام الصبح…
علاء… بالليل اتصل ونتفاهم هسه باي حياتي
باي وسديته وياه…
ياربي شراح احجيله وشلون اجاوبه اذا سالني
واني من يخابرني كلمتين عدلات مااعرف احجيهن
سوه…
واني افكرر بي نمت وماكعدت لساعة
4 ونص للعصر فتحت عيوني وذكرت باجر عندي
دوووام ليوم مداومت لازم باجر اداوم ومااعرف
شعندي واجبات وين صاار تفكيري كله بحبيبي
ياربي اخذ كلبي وبالي وكلشي بيه…
خابرت على صديقتي تكتم…
روان… الووو خبلة شلونج
تكتم هلا استاذه روان…
- شكوو مامداومة اليوم…
حضري نفسج باجر لرزالة زينة من المديرة
روان… شكوو اليوم كلكم عليه وتكلولي استاذة
تكتم ..ليش وولج منو كلج استاذة غيري ياجكمه
روان حبيبي ..
تكتم… هلا هلا الخبلة صار عدها حبيب
من شوكت يمه خطيبي وحبيبي .
روان… وزوجي هم بعد ..
تكتم ..العب طلعتي معدل عالي لعد اذا مابطلتي
وره يومين اطلع كلشي ماافتهم لو تعيدين السنة
من ورا ختيبي ههههه ..
روان… ولج كافي كوليلي باجر شعدنه واجبات
اريد الحك اقرا واحضر لدروس من وكت
لان بالليل عندي جلسة تحقيق راح اكون متهمة
ولازم اجاوب على كلشي يسالني بي حبيبي…
تكتم… ان شاء الله اعدام…
روان… ياجكمه ولي يله…
تكتم… عدنا رياضيات واحياء وعربي وانكليزي
ورياضه… هااا وجيبي وياج كتاب اسلامية
وره يومين عدنا امتحان والمدرسه راح تحدد
المادة الداخلة بالامتحان…
روان… شكرررا خبلة،…
تكتم… العفوا يالعاقلة…
باي .. باي…
سديت الخط ورحت فتحت الكنتور اكوو باب
مخليتة للمدرسة بس…
طلعت كتبي وبديت اقرا شعندي من واجبات
كملت ونزلت للعشه…
لكيت ماما والبنات كاعدات بالهول ..
ماما ..وين بابا ..
ماما .. طلع راح يجيب عشه من بره
روان… وهيثم وعلي وينهم ..
ماما .. هيثم بغرفته وعلي طلع يقرا ويه اصدقائه
رونق… والله ماما هذا ابنج هيثم متكليلي
معشش بالغرفه شعنده…
ماما… رونووو حبيبتي…
هااا ماما .. هم اتصل عليج علاء وصل بالسلامه…
اي ماما اتصل وكال بالليل اخابرج لان مشغول
ومايكدر يحجي وهو بالشغل…
ماما ..ربي يسعدج ويوفقج…
ماما… بنتي تعالي اسولف وياج اشويه رحت وراهه
دخلت لغرفتها فتت وراهه…
وكعدت على الجربايه وكالت تعالي كعدي كعدت
ماما… بنتي صيري سباعية ورفعي راس اهلج
الولد خوش ولد واكيد يغار عليج…
وانتي صرتي خطيبتة وزوجتة وام بيتة…
ماما… هسه اذا كلج اتركي المدرسة اتركيها
روان… ماما شنوو اعوف مدرستي،
وليش اعوفها هاي حلمي ومستقبلي الي احلم بي
وتعب كل هاي السنين ليش يروح هيج،…
علمود شنوو والله اكعد بالبيت واسكت…
لا ماما عفيه مااريد اترك مدرستي…
الله يخليج…
كمت واني ابجي واشهك وصعدت لغرفتي حتى
العشه ماتعشيت مااكلت انسدت نفسي…
شمرت روحي على فراشي واني ابجي واشهك بقهر
ودموعي تنزل على خدودي بحركه معقولة
اعوف مدرستي وحلمي ومستقبلي…
اذا علاء يريدني اترك المدرسة ليش اهلي قبلوا
ليش هيج يسوون بيه ليش ظلموني،…
كلشي ولا دراستي اني مااريد شي صعب بس اكمل
السادس،واحقق حلمي واروح صيدله ..
والله واحد غيرة يفتخر زوجتة تصير صيدلانية
ليش اني كلشي الي اريده واحبه يروح مني…
بقيت ابجي واشهك ..
دك تليفوني شفته علاء مرة ومرتين مجاوبته
وبقه يدك ماجاوبت دز رسالة فتحتها مكتوب
بيها تجاوبين لو اطلع هسه واجي للحلة واشوفج
الساعة 12 بالليل…
كلت هذا تخبل يجي ب 12 والطريق بعيد وخطر
خابر وجاوبته ..
واني ابجي… ودموعي تنزل جاوبته وحاولت
ماابين بيه شي…
علاء… الوووو شلونج حبيبتي
روان… الحمدلله… انت شلونك
تمام حبيبتي ..حلالي…
روان .. اني بس اسمع واستحي اجاوبة
وينج روان ..
وياك .. اسمعك
- احبج
من كال احبج حسيت كلبي طلع من جسمي كام
يرجف مادري شنو اجاوبة ونسيت كل الحجي،
ال كالته ماما والبجي…
كتله… اي
كال راح احجيلج عن حياتي كلشي بس
اوعديني ماراح يتغيير شي…
من تفكيرج ولا راح تكولين اتركني
شكرا لزيارتكم عالم روايات سكيرهوم
