رواي عذابي وقدري الفصل الخامس بقلم ارسلان جاف
روان ..من خابرني علاء وكال راح احجيلج كلشي
واوعديني ماراح يتغيير شي من تفكيرج
ولا راح تكولين اتركني…
- اني من كال هيج خفت
من كلامه شنو الي مسوي ويخلي يكول هيج…
كال رنووو سمعيني… كتله اي اسمعك احجي
كال راح احجيلج كلشي وانتي لازم تسمعين مني
للاخير ولا تقاطعيني وبعدين قرري شراح
تسوين بس خلي شغلة وحدة بالج كله هذا جان
ماضي وخلص ماله اي وجود بحياتي… .
- واني راح احجيلج عن حياتي من يام للطفولة
- وانتي احكمي ..روان لاتنسين
اني هسه احبج انتي وبسسس …
روان… احجي علاء اسمعك واني بكلبي اندعي
ياربي دخيلك مااريد انصدم بشي
علاء… رنووو حبيبتي امي توفت من عمري 9 سنوات
تركت دراستي علمود بس اشتغل وانطي فلوس
لمرت ابوية واصرف اني واخويه علي خواتي
من جنه صغار …
عندي من امي وابوية اخ واحد علي و5 خوات
3 متزوجات و2 بعدهم ممتزوجات…
روان .. امووت الف مرة من اشوف خواتي حالهن
حال الخدامات بالبيت لمرت ابوية وبناتها ..
تامر عليهن… اخوي علي اتزوج شهر ومرت
ابوية كتلتها وطردتها من البيت واني جنت اروح
لبيت عمي بس علمود مااشوف الظلم بعيني ..
جان عمري 17 سنة… حبيت بنت عمي اكو شي
اسمه حب واكوو جنون ..
جنت اعشقها بجنون… منها تعلمت اكون جرئ
بالحجي جانت كلشي الي بالدنيا بيوم قررت
اخطبها ورحت واخذت ابوية واخويه واخواتي
ورحنا للبيت عمي نخطبها ..
وجان رد امها احنه ماننطي بنتنه لواحد حافي
ماعنده… بنتي تستاهل انطيها لواحد موظف
وعنده منصب وشهادة … ورفضوني هنا اني انتهيت
والدنيا انتهت بالنسبه الي .
ونخطبت قبل سنة…
تعبت بغيابها وتمرضت ودخلت مستشفى ونمت
بالفراش… وجازتني بشنوو اخذت صديقي
لان عنده فلوس وزنكيل…
هذا الي عندي ردت احجي الج حتئ اكون صادق
وياج ومااخدعج حتى ابدي صفحة جديده وياج
واذا اجه يوم وغلطت كدامج باسمها علمود
تعرفين ليش غلطت صح هسه مااحبها وكلشي
انتهئ بينه ..
بس تبقى بنت عمي ولازم تجي وتكعد وتسولف
وراح تشوفيها… رنووو مااريدج تغارين منها ..
لو تفكرين بعدني احبها… انتهت بالنسبه الي
اني حجيتلج لان مااريد
تسمعين من غيري وتتاذين وادري ب مرت ابوية راح
تسوي المستحيل علمود مانتزوج لان ماتريدني
ارتاح واستقر بحياتي…
وتتوقع اذا تزوجت اخذ مرتي واطلع بيت وحدي
لان هم اكيد راح تسوي مشاكل…
روان… هو يحجي واني دموعي تنزل وبس اشهك
ومااعرف شكله لو شنو اجاوبه…
واني اسمعه ويه كل حجاية يذب حسره شكدهه
اعرف مجروح بس مو بيدي ماحجيت شي…
بقيت ساكته ..
كمل كلامه وكال اني راح اروح تعبان واريد انام
وانتظر منج جواب الصبح…
راح تكملين وتوكفين وياي على مرت ابوية
والزمن وكل شماتي… اخليج بعيوني ..
تكولين مااكدر نكمل راح اقنع اهلج بعذر
وكلمن يروووح بطريقة… بس رنووو احبج والله
يله باي وسد الخط واني ساكته بقيت وبس
ابجي واشهك… ياربي شنو هذا الاختبار الصعب
الي خليتني بي من البجي وتفكيررر ماحسيت على نفسي نمت…
كعدت الصبح وعيوني مورمه من البجي كوه فتحتهه…
نزلت جوه فتت للمطبخ…
شفت ماما ..صباح الخير
صباح النور
ماما ..رنووو شبيج عيونج مورمات شصاير
- مصاير شي ماما بس بقيت سهرانة البارحة
غسلت وتريكت وصعدت بدلت علمود اروح للمدرسة
لبست تنورة سوده وقميص ابيض وستره سوده
ومشطت شعري ولفيته بالقراصة ولبست حجاب
ونزلت سمعت الهووورن عرفت ابو الخط اجه طلعت
الخط بالباب… صعدت صباح الخير
صباح النور…
حسين ابو الخط ..روان خير بيج شي ليش
عيونج مورمة وليش البارحة ماداومتي …
روان… ماكوو شي سلامتك …
اني بالخط وياي 5 بنات بالخط ياخذني اني
اول وحده واخته نور تكون وياه موجوده
جنت بس اريد اوصل للمدرسة اريد احجي
لتكتم لان احس راسي راح ينفجر لطريق كله افكر
اوووف ياربي شنو الحل وشنو لازم اسوي
وصلت للمدرسة دخلت للصف…
صباح الخير بنات… صباح النور…
خيرج روان شبيج…
روان ماكو شي ..بس مريضة
سلامتج ..الله يسلمكم…
دزت عليه المديرة… لان غائبة لبارحه وجان عدنه
امتحان احياء…
رحت لغرفه المديرة دكيت الباب،..
المديره تعالي ..فتت
المديرة… روان ماما…
نعم ست ..خير شبيج…
مابيه شي ست ..بس الي سمعته من البنات
انتي انخطبتي… شوفي ماما انتي شاطره
والسنة سادس هاي اخر سنه الج لا تخلين الخطوبة تاثر عليج ..
ابقى بنفس مستواج وانتبهي لدراستج
لان سلاح المراءه شهادتهه…
طلعت من المديرة واني افكر ماادري اسمع
منوو لماما الي تكوله اذا يريد علاء اتركي دراستج
وبين حجي المديرة وحجي علاء الي ضيعني
ماادري افكر بمنووو…
الدرس الثاني جان عدنه درس رياضيات دخلت ست ابتهال اني كاعدة اول رحله نسيت اكللكم مدرستنا
بمنطقة جديدة يعني مابيهه هواي طالبات
كلنه الي بالصف 20 طالبة فالمدرسات يعرفونه
وحده وحده ويعرفون شبينه اول مادخلت لزمتني
من خدودي وكالتلي رنووو احنه شمتفقين
مو كلنه اهم شي الدراسة ليش انخطبتي
-ست والله مو بيدي اهلي الي قررو بمكاني
وجنت مجبورة اقبل وجان طلع ورقة الامتحان
بالرياضيات درجة 99 كالت شوفي انتي هنا
مو بالزواج والبيت ..
- روان انطيني وعد الحلقة والخطوبة متاثر على
دراستج اني نزلت دموعي وكتلها ست ممكن اطلع
لان حسيت نفسي اختنكت مااعرف الي صار وياي
وتنزل دموعي بسبب وبدون سبب وحجي علاء
يجي بالي رحت كعدت بالساحة دك الجرس
اجتي صديقتي تكتم…
تكتم… رنووو شبيج اليوم ابد مو على بعضج
وصايره ام دميعه ..
شنووو الي صاير وياج احجيلي ..
روان… تكتم احس نفسي مخنوكه ومااكدر اتنفس
وابجي
روان… تكتم احس نفسي مخنوكه ومااكدر اتنفس
وابجي واشهك…
شنو الي مسويته اني سبحان الله ليش هالاختبار
الي اني بيه ...انتهيت غسلت ورحت للصف ..
وكل مدرسه تفوت لصف تحجي عليه لان شاطره
وسادس ومستقبلي راح يضيع بسبب الزواج
خلص الدووام وطلعت اسحل برووحي سحل للخط
بس اريد اوصل للبيت اريد انام تعبانه بداخلي
غصه صعدت بالخط وجان حسين يباوعلي
بالمرايه ادري بيه عنده نظرات اعجاب الي
بس ماجنت مفكرة ارتبط هسه واكثر من مرة
حاجتني اخته نور ومارضيت احجي وياه
باوع على ايدي شاف الحلقة اباوع عليه عيونه
انترست دموع…
اووووف ياربي هسه اني عايزه قهر انوب هذا شبي
بقيت كاعده بالخط انتظر البنات يجن علمود
نرجع للبيت…
كال روان… شوكت انخطيتي…
وليش ماحجيتي شي واني مافكرتي بيه ..
اني ساكته ماحاجيته ..
حسين… روان ..شبيج اليوم مو على بعضج
وليش تبجين شصاير ..
روان ..حسين رجاءاممكن تعوفني .. بحالي
ماريد احد يعرف الي بداخلي او يشاركني بي
سكت وبعد محجه شي ..
اجوي البنات وصعدو بالخط وصلت للبيت،
دخلت للبيت شفت ماما… هلووو ماما
ماما… هلا يروووحي
الحمدلله ماما…
ماما ليش تاخرتي لليوم…
روان ..ماما البنات عدهم درس اضافي وانتظرناهم
يله ماما… روحي غسلي وبدلي ملابسج وتعالي
نصب الغده ونتغده هسه ابوج على جيه ..
روان ..ماما مااشتهي اكلووو انتووو بالعافيه
اريد انام عندي صداع قوي…
ماما… شبيج بنتي اخذج لدكتور
لا ماما بس صداع هسه اخذ حبايه براسيتول
وانام واصير زينة…
صعدت لغرفتي وبدلت ملابسي ولبست تراك
لون سمائي وشمرت نفسي على جربايتي
ذكرت علاء ..
طلعت تلفوني من المجر وفتحته لكيت رسائل
من علاء وحده مكتوب بيها…
صباح الورد حبيبتي كعدتي بعدج ورسالة ثانيه
مكتوب بيها ماخابرتي وليش جهازج مغلق
فكرتي بكلامي الي كتلج عليه البارحة
اني اريدج الي ..
ومنتظر قرارج احبج حبيبج…
دزيتله رساله لان اعرف هو بالنهار بالمحل
وعنده شغل واني مااكدر احجي وياه وبعدني
ماقررت ومااعرف شراح احجي وتفكيري مشوش
كتبتله بيها ..
مساء الخير ..اسفه جنت بالدووام ومااكدر اخابرك
الصبح اخاف بعدك نايم…
مااريد ازعجك…
شافهه علاء ورد عليه … مساء الورد يرووحي
شلونج
الحمد لله.. انت شلونك
علاء… بخير بوجودج وياي حبيبتي ..
روان ..ان شاء الله دائما بخير
علاء ..يله بعدين اخابرج اجه زبون للمحل
باي حياتي… باي
خليت الجهاز على المخده واخذت 2 حبايات
براسيتول لان احس راسي راح ينفجر من الصداع
ونمت ماكعدت للمغرب .
ردت اكوم ماكدرت احس نفسي دايخه وتعبانه
بقيت بفراشي نايمه…
شويه وصعدت ماما… هاا ماما شلون صرتي
اجتي وكعدت يمي شبيج وجهج اصفر كركم
وخلت ايدهه على كصتي…
ماما… هاي شنووو وجهج وجسمج صااير نار من لصخونه ..
ماما… كومي ماما سبحي بلكي تنزل الحراره
كمت وحسيت ..
الدنيا افترت بيه ..وعيوني غوشت وبعدهه
ماشفت شي الدنيا صارت سودة وبعدهه ماحسيت
بشي الا من صحيت على صوت ماما…
فتحت عيوني…
ماما… الحمد لله على سلامتج
روان ..ماما اني وين…
ماما ..ماكوشي حبيبتي بس صار عندج هبوط
بالضغط وجبناج للمستشفى.. وهسه زينه وراح
نطلع لان مماكله .. شي ..
روان ..بابا وماما بالمستشفئ وياي .
اجه بابا… الحمد لله على سلامتج ابنيتي
وكال راح اروح لدكتور حتى نطلع ..
راح ورجع كال بس يخلص المغذي طلعوا
طلعت من المستشفى…
وبابا وماما لازميني للسيارة لان بعدني دايخه
وتعبانه بلكوة امشي…
وصلنه للبيت تقريبا الساعة 8 او 9 بالليل ..
اخذتني رونق وصعدتني فوك ..
ونمت بدون مااكل حسيت نفسي بس اريد انام
خليت جهازي عام اخاف علاء يتصل ..ونمت
وماحسيت الا على صوت التليفون يدك ..
باوعت لساعة ب 12 وربع بالليل ..
كووة فتحت عيوني بس احس نفسي صرت احسن
شفت علاء المتصل ..
حرت وحتاريت بين ارد عليه لو لا واذا رديت عليه
شراح اكله شحجي واني هيج حالتي وتعبانه…
وقبل لا افتح خط فكرت بكلام بابا ..
وانتهت المكالمة ورجع اتصل مره ثانيه…
قررت اجاوبه…
كل يوم بارت… ..
شكرا لزيارتكم عالم روايات سكيرهوم
