رواية كوميديا سوداء الفصل السابع بقلم ليل ادم
بعد وصول احمد مع الدكتور علي الي المستشفي
احمد : هو حضرتك برضوه قاعد هنا يا دكتور علي
الدكتور علي: لا طبعاً أنا عندي بيت هنا
احمد : طب ما تخدني انام عندك وربنا خايف انام في المستشفى دي اما وأنا صاحي خايف منها بالك بقا وأنا نائم
الدكتور علي: مس غاده بعد اذنك خدي الدكتور أحمد غرف المغتربين
مس غاده: تعالي يا دكتور احمد
احمد : تعالي ربنا يستر
مس غاده: هتقعد معانا هنا كتير
احمد : انتي قاعده هنا يا مس غاده
مس غاده: اه
احمد : طب كويس هو في هنا ناس كتير اعرفهم يعني
مس غاده: اه طبعاً لأن في مغتربين كتير
احمد : طب كويس اوي
مس غاده: لو حابب تكمل معانا هنا هنسجل الاوضه بأسمك وتبقا خاصه بيك
احمد : اشوف النهارده الأول ولو كده هقولك معاكم أن شاء الله
مس غاده: اتفضل دي غرفتك
احمد : تمام بعد اذنك
مس غاده: مش عايز حاجه
احمد : لا تمام شكرا
مس غاده: الله هو أنا مش عجباك
احمد : مش فاهم
مس غاده: هو انت غاوي رمرمه وشقق مفروشة منا قصادك يا خلبوص
احمد : ينهار اسود انتي عرفتي منين
مس غاده: المستشفى كلها عرفت يا دكتور
احمد : وربنا ما كنت اعرف أنا روحت على أساس انها شقه اسكن فيها
مس غاده: لا الوقتي عندي شغل بعد الشغل افوت عليك تحكيلي
احمد: بعد الشغل اي لا هنام انتي شكلك دماغك فيها حاجه روحي يا ستي روحي (وقفل الباب وشاف الاوضه كان شكلها حلو ومترتب)
احمد: ايوه بقا شكل اللي فات ممل واللي جاي كراميل ولا اي لا عظمه الله الشباك على البحر كمان اي ده ياعم دا انا نازل في فندق مش مستشفى ( وفتح الدولاب حط شنطه هدومه وبدأ يغير لبسه علشان ينام وقفل الانوار وبعد ما دخل في النوم سمع صوت خبط على باب الغرفه ) مين قليل الذوق ده
وفتح باب الغرفه مكنش في حد رجع تاني مكانه بمجرد ما نام على السرير الخبط اشتغل
احمد : اي ده مين الحمار اللي بيخبط كده اهدا ياعم جاي (وفتح باب الغرفه مفيش حد)
احمد : يا صلاه النبي (ووقف قصاد الباب يلتفت شمال ويمين الممر فاضي مفيش حد غيره وفجأة سمع صوت نكش في دولاب الملابس)
احمد : يارب يكون حرامي ميكنش اللي في دماغي صح (ساب باب الغرفه مفتوح وقرب من الدولاب علشان يشوف في اي جوه )
جميله: (بالصدفة شافت باب الغرفه مفتوح بتشوف مين اللي قاعد في الغرفه اللي جمبها دخلت وكان أحمد وقف بيفتح الدولاب حطيت ايديها على كتفه )
جميله: احمد
احمد : اععععععععععععععع اعوذ بالله من غضب الله اعوذ بالله من غضب الله
جميله: في اي يا احمد خضتني وربنا
احمد : انتي دخلتي اذاي
جميله: ياعم انت فاتح الباب
احمد : يخربيتك قلبي كان هيقف
جميله: ليه بس حصل اي
احمد : الباب كان بيتكسر عليا وانا أصلا نايم قلقان امي طول عمرها تقولي ياض يا احمد بلاش طب المستشفيات ظفره و قاعدتها تقصف العمر
جميله: (بتضحك) لا متقلقش أنا في الاوضه اللي جمبك عبال ما أنزل في مكان تاني
احمد : طب كويس ع الأقل حد ياخد حسي
جميله: اي اللي حصل ده صحيح
احمد : دي اقل حاجه عندي يا بنتي لعلمك حاله زهره دي انا أعملها وأنا نائم في بيتنا
جميله: لا مش ع زهره اقصد حوار الشقه المفروشة ده
احمد : أنا طول عمري اسمع عن فضيحه اللحمه في السوق بس اول مره أشوفها ب عيني
جميله: (بتضحك) ليه بس حصل اي
احمد : ياستي دا كل واحد يمسكني يقولي اي حوار الشقه المفروشة محدش جاب سيره كيس البودره كله قافش في الشقه
جميله: اي ده كيس بودره اي
احمد : لا مفيش مفيش الحمد لله الدكتور علي طلع كتوم
جميله: أنا أول ما سمعت قولت اكيد في حاجه غلط شكلك مش كده خالص
احمد : الله يسترك يا بنتي والله خلي بالك أنا ابن ناس وربنا بس مش عارف في اي الدنيا عماله تحط على جرحي كلونيا
جميله: لا ياعم أنا مش مصدقه وخلي بالك محدش مصدق كمان على فكره أصل انت شكلك مريح متربي مش بتاع الكلام ده
احمد : الله يخليكي يارب أنا جعان اوي
جميله: اي علاقه ده الوقتي ب كلامنا
احمد : أنا مش عارف انام والله من الجوع هو انتوا هنا بتتصرفوا اذاي
جميله: تاكل اي
احمد : اي حاجه هتيجي الوقتي هاكلها عارفه لو لحم اليتيم هاكل
جميله: لا ياعم مش للدرجادي سندوتشات ماشي
احمد : ماشي
جميله: أنا كنت هطلب نطلب سوا
احمد : ماشي
جميله: (طلعت التليفون تطلب )
العامل : تحت امرك يا فندم
جميله: عايزه اتنين برجر فراخ من فضلك
العامل : تمام يا فندم
جميله: تاكل اي يا احمد
احمد : سبعه كبده
جميله: سبعه
احمد : واتنين سجق
جميله: احمد انت بتهزر
احمد : واتنين هامبورج فراخ
جميله: يابني بجد هطلب والله
احمد : ووحد حلوه بالقشطه علشان اعرف انام
جميله: أنا مش فاكره حاجه
العامل : سمعت يا فندم تمام على نفس العنوان في المستشفى صح
جميله: اه اه
العامل : تمام
جميله: يا ابني انت هتاكل كل ده
احمد : (هز رأسه)
جميله: أما اللي يشوفك يقول عليك مبتكلش ليه
احمد : اقعدي بقا عبال ما الأكل يجي
جميله: اقعد صحيح خلي بالك الدكتور خالد مش طايق يسمع اسمك
احمد : اه منا عارف
جميله: بس بعيد عن اي حاجه بجد برافو عليك النهارده كنت هايل في تشخيص حالة زهره
احمد : خلي بالك سيبك من الهزار والكلام ده أنا عندي ربع طاير مش هكدب
جميله: خدت بالي فعلاً
احمد : بس أنا بقا عندي موهبه من عند ربك كده
جميله: اي هيا
احمد : أنا اي حاجه أقرأها تتسجل هنا متطلعش ابدا
جميله: انت بتحب تتابع التقرير بتاعت مين
احمد : أنا اي تقرير من اي حته احب اتابع تعرفي أنا حافظ تلات تلاف تقرير وشويه
جميله: ياه
احمد : اه والله
جميله: وعايز تتخصص في اي بقا
احمد : بيني وبينك القلب مجاله واسع وأنا شاطر جدا في تشخيص أمراض القلب بس الدماغ اكتر مركز حساس في جسم الانسان عايز اتخصص فيها بس لسه مش راسي
جميله: اي ده الاكل شكله وصل
احمد : أنزله ولا هو طالع
جميله: لا هو طالع خليك
في اليوم التالي
بعد نزول احمد استقبال المستشفى
مس غاده: الدكتور علي عايزك في غرفه العمليات
احمد : اي ده بجد
مس غاده: هو أنا ههزر في الشغل اطلع غرفه سبعه روح جهز نفسك
في جانب آخر
الدكتور علي: دكتور احمد فين
الدكتور خالد: ليه عايزه في حاجه
الدكتور علي: اه محتاجه معانا
الدكتور خالد: هو حضرتك شاكك في وجودي معاك ولا حاجه
الدكتور علي: دكتور خالد بعد اذنك احنا في غرفه عمليات ممكن هدوء اكتر من كده
الدكتور خالد: تمام تمام بس خلي بالك اخر مره نتشارك في غرفة العمليات
الدكتور علي: اللي تشوفه يا دكتور خالد دكتوره جميله من فضلك شوفي دكتور احمد
احمد : أنا هنا اهو
الدكتور علي: أتأخرت ليه امسك الشفاط
احمد : معلش يا استاذي
الدكتور علي: دكتور خالد اتفضل افتح الصدر
بدأ الدكتور خالد في عمليه قلب مفتوح ل مريضه تبلغ من العمر ٤٣ عام وكان كل شيء طبيعي ومره واحده وقفت أنشطتها الحيوية وبدأ الجسم في الانهيار السريع
الدكتور علي: بسرعه بسرعه شوف الشريان التاجي ل يكون تضرر يا دكتور خالد
دكتور خالد: جميله الأكسجين كام
جميله: ٧٠ و بينزل بسرعه كبيره الجسم بينهار بسرعه البرق دكتور علي شوف حل بسرعه
الدكتور علي: خالد هنفقد المريضه في اي خلاص مش الشريان سيبه
الدكتور خالد: هدوء بس يا جماعه علشان نعرف نفكر بعد اذنكم
جميله: الأكسجين ٣٣ الدماغ هتموت كده
احمد : انسداد تاموري
الدكتور علي: لا صعب
احمد : الجسم مش هينهار بالشكل ده إلا لو حصل انسداد تاموري أنا متأكد من كلامي
الدكتور خالد: فين تقارير المريضة
الدكتور علي: لحظه يا خالد بشوف حاجه فيهم
جميله: الضغط ٦٠/ ٣٠ والقلب في حاله هبوط
الدكتور خالد: كلام احمد صح دكتور علي بص هنا
الدكتور علي: قرب الشفاط هنا يا احمد
احمد : والله أنا متأكد من كلامي انت ليه مش مصدق
الدكتور خالد: أنا مصدق جميله جهاز بذل التامور
جميله: (سحبت الجهاز بسرعه )
بدأ الدكتور خالد في بذل التامور وبدأت الأوضاع ترجع إلي طبيعتها
بدأ الجميع يتنفس الصعداء
الدكتور خالد: جميله الاخبار اي
جميله: النبض ٩٠ والضغط ١٠٠/ ٨٠ والأكسجين بدأ يطلع بنسبة كبيرة وصل إلي ٦٦ الوضع مستقر
الدكتور علي: برافو تسلم ايدك يا خالد كمل
الدكتور خالد: برافو عليك يا احمد
احمد : (هز رأسه وكان مبسوط)
انتهت العمليه وكانت ناجحة بنسه مائه في المائه
بعد الخروج من العمليه
الدكتور خالد: جميله تابعي الحاله بنفسك لحد ما تخرج من المستشفى تسلم ايديكم يا شباب
الدكتور علي: برافو عليك يا احمد اتفضل على الإستقبال أنا جاي وراك
احمد : بعد اذنكم
الدكتور علي: عرفت ليه كنت مستني الدكتور أحمد يا خالد
خالد : وأنا قولتله برافو صح
الدكتور علي: أنا مش بقولك علشان كده أنا بس عايزك تصدق لما قولتلك أن احمد دكتور كبير اوي بس هو نفسه مش عارف قيمه نفسه
الدكتور خالد: اهو ربنا كرمه ووقع معاك علشان تعرفه انت قيمته بعد اذنك يا دكتور علي
الدكتور علي: اتفضل
في جانب آخر بعد نزول احمد الي الإستقبال شاف بنت صغيره وقفه بعيد وكانت لبسه لبس اكبر من سنها ب كتير وكان ضهرها ل احمد راح احمد شال الطفله من ضهرها
احمد : بتعملي اي هنا يا ككوته انتي
بدأت البنت ترفص احمد بالرجل
الزوج: انت بتعمل اي يا بني ادم سيب مراتي
احمد : دي مراتي أنا ياعم (وبيضحك ) تتجوزيني يا ككوته
الزوج: سيب يا عم انت اهبل ( وعمال يشد البنت من ايد احمد )
احمد : اي ياعم حاسب انت بتتعامل معاها كده ليه (لفت الطفله وشها اكتشف احمد أنها ست كبيره بس جسمها صغير جدا )
احمد : ينهار اسود
الزوج: أنا عايز حد مسؤول عن الهمجي ده
احمد : وكتاب الله أنا آسف أنا مخدتش باللي
الزوجه : انت حيوان حد يعمل مع واحده ست كده
مس غاده: مش عاتق نفسك شقق بالليل و مع المرضا في المستشفى
الدكتور علي: في اي بس
احمد : لالالا مفيش حاجه
الزوج: الإنسان المريض ده شال مراتي وعمال يجري بيها اقوله سيب مراتي يقولي دي مراتي أنا تتجوزيني يا ككوته ككوتت اي ياابن المجانين
الدكتور علي: امشي
احمد : وعهد الله أنا
الدكتور علي: بقولك امشي
احمد: حاضر (وراح بعيد عنهم ) هو أنا يعني كنت اعرف اي الناس دي ( وخرج احمد بعيد عنهم وفجأة واحد مسك ايد احمد )
المريض: انت دكتور
احمد : فين السؤال
المريض: (بيبلع ريقه بالعافيه) انت دكتور
احمد : هو حضرتك البالطو ده مش جاي معاك اني دكتور
المريض: شارب كتير
احمد : هو حضرتك مش قادر تبلع ريقك ليه في اي مالك انت مريض سكر
المريض: ريقي صحراه عايز افوق
احمد : تفوق من اي طب منا مش فاهم
المريض: شارب شاتوه
احمد : طب ماله ده جميل اوي أنا بحب اسقي الشاتون في الشاي بيكون تحفه
المريض: يا بهيم افهم أنا شارب شاتوه بموت يخربيت امك عايز افوق
احمد : منا مش فاهم هو الشاتوه بيتاكل انت شربته اذاي طب هو وقف في زورك مش قادر تبلع ريقك
المريض: أنا مشفتش كده أنا شارب مخدراااااااااااااااااااات يا انسان
ظابط المباحث: (سمع المريض) خود خود تعالي انت فرحان اوي انك شارب مخدرات
المريض: عجبك كده ياللي يتخرب بيت امك سلمتني بسبب غبائك يا جدع
