رواية حرب الارحام كامله جميع الفصول بقلم جمانه السعيدي
اني زينب علي مواليد ١٩٩٤
كل ضياعي وخراب حياتي بسبب امي
اي امي السبب اني بسبب امي صرت وحده مشرده
وحده منبوذه ماعدها بيت تسكن بي
بعمري مراح اسامحه ابد
الله لا يغفر اله وحده انانيه ماكو بكلبها ذرة حنيه
من البدايه هي ماكانت مقتنعه بابوي وحتى اني اجيت للدنيا غصبا ما عليها
كانت دائما تكول انتي غلطه وبعد مااكررها
رفضت الحمل بعدي
رغم ابوي كان بخاطره يصير عنده ولد بس هي رفضت
تكول اريد اعيش حياتي ليش اضيع عمري
اربي واكبر عليمن خل اعيش واتونس مااريد جهال
امي وحده حلوه استغلت جمالها وخربت حياتنا عدها متطلبات وطموح
رغباتها ما تنتهي
على عكس ابوي انسان فقير عايش بحاله راضي بلواقع
لو يلكه خبز وجاي ياكل ويسكت
انسان بسيط وطيب الابعد حد
يطلع للشغل يشتغل اي شي بس حتى يرضيها
بس لو يقدملها كلشي ماترضا
انسانه طماعه وانانيه ورخيصه اي امي وحده رخيصه
بلبدابه اني جنت زغيره وماافتهم بس من وصلت للخامس
ابتدائي كمت افتهم واعرف كلشي
بس مااكدر احجي
لان اذا حجيت هذا البيت يخرب
كنت اشوف امي تخون ابوي بعيوني واسكت
ابوي المسكين من يدخل للبيت لمن يطلع بس مشاكل
امي وكحه بس يدخل للبيت تبدي اطلع مشاكل من جوه الكاع
حتى يطلع من البيت ويخلالها الجو تلعب بكيفها
عدها واحد مصاحبته
بس يطلع ابوي تتصل علي يجي راسا للبيت
حقير مثلها وبلا اخلاق
بدا ابوي يشتغل اكثر من شغله بس حتى يوفر طلبات امي
وترضا علي
هي تريد هيج تريده دايخ بزمانه يشتغل ليل نهار
حتى هي تلعب بكيفها
مسكين بس يدخل للبيت امي تكله جيب وين الفلوس
يطلع كل الفلوس من جيبه
وينطبهن الها تاخذ كلشي منه حتى ما تبقيله أجره
يروح للشغل جمانه السعيدي
بهاي الفتره اني كمت اكرها
اموت منها هي تعرف اني اكرها واعرف كل سوالفها
كانت تهددني اذا حجيت الابوي
تقتلني خلاص
مره كمزت من النوم بليل لان سمعت صوت جلاب تنبح
خفت ورحت الغرفة امي وابوي
ابوي اخذني بحصنه
وهي بقت اتصيح عليه شنو تجين تكعدينا من النوم
شنو هلازعاج حيوانه
من هاي اليله كلما اشوفها تسوي غلط تهددني
تقتلني وتشمرني للجلب
وتكول البابا بنتك انهزمت من البيت
عقل طفله كنت اصدكها واسكت بس بكلبي شكد اكرها
اموت منها
اكيد اصدكها لان هي جانت مستقويه واي شي يعجبها تسوي وابوي ساكت
وصلت للصف السادس وامي وضعها مثل ماهو
الجيران بيوم سئلو ابوي منو هذا الي يدخل عليكم البيت كل يوم
ابوي فقير ابد ماممكن يشك باامي
بلعكس يحبها بشكل مو معقول امي حيل حلوه
واني ورثت هذا الجمال منها
اني بيضه ناعمه وجهي حلو خشمي وحلكي زغار اسناني حلوات شعري لونه نحاسي طبيعي
عيوني شويه بيهن لون على عسلي
كل هاي الصفات اخذتها من امي
اي اني حيل اشبها بلشكل بس بلطبع لا
ابوي كان مجنون باامي ولو كلشي يسمع عنها مايصدك اي احد بس هي يصدكها وبس
الجيران يعرفون سوالف امي حجو الابوي اكو شخص كل يوم يدخل بيتك من تطلع
بيومها ابوي من دخل راسا امي اجته وين الفلوس
هذا الشي هو متعود علي كل يوم
ابوي...كولي الله يساعدك
امي...الله يساعدك وين الفلوس
ابوي...خل اكعد ارتاح
امي...شنو هي قصه شو
دخلت ايدها بجيبه وأخذت الفلوس كلهن
دارت وجها عنه هو راسا سئلها
ابوي...منو يدخل بيتنا من اطلع
راسا امي باوعت عليه وردت علي منو قصدك
ابوي...ماعرف ابو محمد يكول اكو واحد.يدخل بيتكم يوميه
امي...شنو ابو محمد يشتغل حارس على بيتنا ولله عيب علي هاي التصرفات يقبل احنا نحسب علي الناس الداخله والطالعه
ابوي.. مابيه شي
امي...شنو مابيه شي شنو هذا الفضول ولله عجيبه
هو شنو دخله
بعدين هذا اخوي مهدي يشتغل قريب علينا هنا وصار كم يوم يجي يتريك يمنا
ابوي...شنو هو مايعرف اخوج
امي....لا يعرفه بس بي مرض يريد يسوي مشاكل
طبعا يعرف اخوي ولله عجيبه هاي الناس شبيها
كل واحد يخلي نفسه بيته وبعائلته ويسكت
ابوي...ماصار شي ايجوز ماانتبه هذا اخوج
امي...لا ولله يرالدهم واحد يتعارك وياهم صدك ناس ما تستحي
ابوي....عليمن هلمشاكل ماكو داعي الرجال مجرد سئل سوال
زينب...هلكد ماامي حجت وكثرة بلحجي ابوي سكت
يريدها تسكت لان جاي تعبان من الشغل
بمكان ما تلاكي بهلا ومرحبا كامت تحجي وتتعارك ويااا
جمانه السعيدي
امي ثاني يوم سوتلها عركه ويه بيت ابو محمد
علمود المجاري والزباله هي خلقت هاي العركه
حتى يبطلون يحجون عنها
صياح وعياط لمت الشارع عليهم
جاي تهددهم من جوه ليجوه حتى بعد لايجون عليها
من يجي عشيقها أدخلني بلغرفه وتقفل عليه الباب
بس اني اسمعهم يسولفون ويضحكون
لو تتصل علي من اروح للمدرسه
كان آخر يوم عندي وزاري رحت امتحن ورجعت
لكيت امي ماموجوده بلبيت
دورت عليها ماكو
دخلت بغرفة نومها لكيت الكنتور مفتوح وملابسها
ماكووو
حسيت هي عافت البيت بس مجرد احساس
ماكنت مصدكه
بقيت طول النهار وحدي بلبيت
اني جايبه وياي بسكت ونستله اكلتهن بدلت ملابسي وبقيت منتضره
امي ترجع وابوي يجي من الشغل
ابوي يطلع من الصبح ومايرجع اله بعد اذان المغرب
للبيت
كل هذا الوقت اني وحدي بلبيت
دخل ابوي استغرب امي ما واكفه يم الباب تطلب منه فلوس
بس شافني سئلني
ابوي.... زينب امج وين
زينب...مااعرف من رجعت من الامتحان ما لكيتها بلبيت
حتى ملابسها ماكو
ابوي....شنو يعني ملابسها ماكو
زينب...الكنتور مفتوح وملابسها ماكو
جمانه السعيدي
دخل ابوي غرفة النوم فتح الكنتور مالكه اي شي
استغرب من هذا التصرف
لان هو بعقله امي مدلله هو مدلله دلال ماله مثيل
يشتغل من الصبح لليل علمودها
علمود ترضا علي يعني ما ناقصها شي
اي شي تطلبه تاخذه
بعمره ماكسرالها كلمه الي تكول علي يمشي
يعني ماكو اي سبب حتى تعوف البيت
ابوي.. تعاي نروح بيت جدج نشوف امج ليش عافت البيت
اخذني ورحنا البيت جدي
بس الكارثه بيت جدي مايعرفون امي وين
ولا شايفينها
بيبي تخبلت من عرفت امي ماخذه ملابسها وطالعه من البيت
استغرب بابا وبدا يخاف لاتكون صدك مهزومه من البيت
راح البيت عمي ماكووو
سئل الجيران محد يعرف شي
الجيران حتلو شايفينها بعينهم ما يحجون يخافون من السانها
رجعنا للبيت وجه بابا صار اسود
تعبان ومهموم والدنيا طايره من عينه
حتى ملابس الشغل ما غيرهن
كعد يفكر يعني وين راحت
رجع البيت جدي حتى يسئل خالي عنها
ابوي....مهدي هي شكالتك
مهدي...اني وين شايفها حتى تكولي
ابوي...مو انت يوميه الصبح تتريك يمها
مهدي...صار فوك الاسبوعين ما شايفها ولا اعرف اي شي
عنها
ابوي... هي كالت انت تجيها كل يوم الصبح
مهدي....خل تولي جذابه وين اني شايفها
هنا ابوي بدا يشك بكلام الجوارين
رجعنا للبيت ابوي لازم راسه يريد يعرف شنو القصه
كعد بلغرفه تايه بزمانه
التفت عليه
ابوي...بابا زينب منو هذا الي جان يجي للبيت من اطلع انتي هم شفتي
زينب....مااعرفه
ابوي...يعني مو خالج مهدي
زينب....لا مو خالي مهدي واحد غريب اسمه حازم
ابوي...كل يوم يجي
زينب...اي كل يوم امي ما تقبل اكعد وياهم أدخلني بلغرفه وتقفل للباب عليه
ابوي...ليش ما كلتي
زينب...امي تخوفني تكول اذبحج واخلي الجلاب تاكلج
واكول الابوج انهزمت من البيت
جمانه السعيدي
ابوي.....شيسون مثلا
زينب....اني اسمعهم يسولفون ويضحكون بعدين يدخلون بهاي الغرفه ويسدون الباب
زينب...راسا ابوي كعد بلكاع خله راسه بين رجلي وكام يبجي
اول مره اشوف ابوي يبجي هيج
يبجي بحركه بعدين كام جسمه كله يرجف
اني رحت جبت بطانيه وغطيته
بقيت كاعده بصفه منا لمن غفيت واني خاله راسي على جتفه
وهو سكت عبالي نام
بس هو سكت وبعد لا حجا ولا تنفس
الصبح من كعدت من النوم
زينب...بابا بابا اني حوعانه من امس مااكلت شي
كمت اهز بي بس هو ما يتحرك
عبالك خشبه ويابسه
اندكت الباب
عفت ابوي لان اني اصلا مااعرف هو مات مااعرف الميت شلون
رحت فتحت الباب
اجا عمي يسئل على ابوي لان البارحه ابوي راح علي علمود يسئل عن امي وبعد مارجعله خبر
عمي....هلو زينب وين بابا
زينب....بابا بلغرفه احجي وياا مايرد عليه
عمي توقع ابوي مصدوم لو مريض
دخل للغرفه يحجي ويااا بعدين قرب علي وخلا راسه
عل صدر ابوي
شافه ما يتنفس مي ت
امي ق تلت ابوي هاي اولمصيبه صارت بحياتي
