رواية اتفرج عالحلاوه كامله جميع الفصول بقلم اسيل محمد
بتحب الفسيخ؟
دا كان اول سؤال اسألو للعريس اللى قاعد قدامي
حسن: لا مبحبوش
حبيبه بلا مبالاه: طيب شرفتنا جدا معندناش بنات للجواز
حسن بأستغراب: ودا ليه ان شاء الله؟
حبيبه بعد اهتمام : عشان انت مبتحبش الفسيخ وانا بحبه وعمتا مش هتجوز واحد مبيحبش الفسيخ
حسن بعدم تصديق: انتى بتهزري صح؟ هتبوظي الجوازه عشان سمك معفن؟؟؟؟
حبيبه بعصبيه: انت عبيط ولا اي متقولش كدا ع الفسيخ هوا سمك معفن بس قمر
حسن: شامم ريحه انك بتتلككي عشان تطفشيني
حبيبه: الله ينور علييييك انا فعلا عايزه اطفشك خد بعضك واهلك وامشي معندناش بنات للجواز يعسل
حسن قام وعدل التيشرت الاسود بتاعه وخرج من الاوضه اللى كانو قاعدين فيها
وقبل مايخرج سمع صوتها
حبيبه ببجاحه: ابقي سيب الجاتوه عشان هاكلو
حسن ضحك وحط ايده ع وشه بقله حيله وطلع لأهلها واهله برا ف الصاله
محمد والد حبيبه بص لبنته اللى خرجت ورا حسن وسألها: ها يابنتي نقول مبروك
حسن بسخريه وهوا بيبص لحبيبه: لا قول فسيخ ياعمى
حبيبه بصتله بقرف وخدت الجاتوه ودخلت اوضتها
اما ف الصاله
محمد: فيه اي يابني؟
حسن: مفيش نصيب ياعمي
سهام والده حبيبه: ليه يابني كدا حصل اي
حسن بسخريه وهوا قاصد يعلي صوته عشان حبيبه تسمعو: اصل الفسيخ كان ليه رأي تانى
###############
بعد ما حسن واهله مشيو
ف اوضه حبيبه
سهام بصلها بغيظ وهيا بتاكل الجاتوه ومحمد باصصلهم وبيضحك
سهام ضربتها ع كتفها: عاحبك كدا؟
حبيبه وهيا بتاكل: ياماما وانا مالى ماهوا اللى مبيحبش الفسيخ
سهام بغيظ: ياختي وهوا لو بيحبه كنتي هتوافقي جتك ستين خيبه
حبيبه بكسوف وهيا بتحط شعرها ورا ودنها وبتشبك ايديها ف بعض: ايوه طبعا كنت هوافق الواد طول بعرض وحليوه واسمرانى كدا وبدقن وشعره كيرلي طبيعي ياااااهههه
فاقت من احلامها الورديه ع قلم نازل ع قفاها من ابوها وهوا بيقول
محمد: اتلمى ياروح امك
حبيبه: الاه يابابا ماهوا حلو واقولك ع حاجه انا زعلانه انى رفضته وكملت بلا مبالاه وهيا بتكمل اكل: بس نقول اي بقا مبيحبش الفسيخ
سهام بغيظ: اطفحي اطفحي دا اللى فالحه فيه وياريتك بتتخني بطنك مخرومه
حبيبه: مش احسن ماكون عجله زي بنت اختك
سهام شدتها من ودانها : يبت اتلمى
################
تانى يوم عند بنتنا ف الجامعه وهيا بتمد عشان تلحق المحاضره
ولسوء حظها لقت باب المدرج مقفول دا معناه ان الدكتور دخل
حبيبه وهيا واقفه قدام الباب بحيره: طب ادخل ولا اتجنب الأحراج؟
صوتها الداخلى رد: ادخلى وكدا كدا دا دكتور جديد واول محاضره ويمكن يطلع كويس ويدخلك منغير مايضحك عليكي حد ادخلى يلا
حسمت امرها وخبطت
سمعت صوته مش غريب عليها وهوا بيقول: اتفضل
دخلت وهيا حاطه وشها ف الارض
الدكتور: متأخره ليه يابشمهندسه؟
رفعت وشها: معلش يا.... الفسيخه؟؟؟؟
حسن وهوا بيحاول ميضحكش رغم انه اتصدم زيها: افندم؟!
حبيبه بصدمه لا لا انا اسفه.. احم معلش اتأخرت عشان اااا عشان اه كنت بذاكر ف الكافتيريا
حسن بجديه: تمام اتفضلي وياريت متتكررش تانى
دخلت منغير ماترد وراحت وقعدت وكان وشها احمر
حسن وعرف بنفسه
حسن: انا دكتور حسن دكتور جديد هنا وهديكو ماده ***** ان شاء الله عندي ٢٩ سنه ياريت تعرفو بنفسكو ياشباب
كل واحد وواحده بدأو يعرفو نفسهم والدور جه ع حبيبه وحبت تستخبي لكن هوا لاحظ وقال: اتفضلى ياآنسه
حبيبه قامت وهيا وشها احمر: احم انا حبيبه محمد عندي ٢٣ سنه
حسن وغمزلها: بتحبي الفسيخ؟
حبيبه ورفعت حاجبها: جدا يادكتور انت بتحبو؟
حسن بابتسامه سمجه: لا
حبيبه بنفس الابتسامه: يبقي متاكلوش
وقعدت وهيا بصالو بتحدى وهوا حابب انه ينكشها
###############
عند باب الجامعه بعد ما اليوم خلص حبيبه كانت واقفه مستنيه تاكسي فاضي عشان تروح
لمحت طفل صغير قاعد ولبسه كان متبهدل جدا وكان ماسك لعبه مكسوره ف ايده
حبيبه بلطف: مالك ياحبيبي قاعد لوحدك ليه؟
الطفل بحزن: اصل ماما كانت هنا ومشيت وانا وفضلت ادور عليها كتير ووقعت واللعبه اتكسرت مني وهدومي بصى عامله ازاى
حبيبه بحزن وخرجت مايه من شنطتها وغسلت وشه وايده وراحت قعدت جمبه وقالتله: انت اسمك اي بقا
الطفل ببراءه: مالك
حبيبه: طب ياعم مالك وانا اسمي حبيبه هات بقا اللعبه دي اما نشوفها
ومسكت اللعبه وركبتها تانى
مالك بفرحه: الله انتى قويه اوي ازاى صلحتيها
حبيبه بفخر وعرفت ازاى ترسم الضحك ع وشه: شوفت بقا يعم مش اي حد انا
وراحت طلعت من شنطتها توفي وادتهوله
فجأه واحده جريت عليه وفضلت تحضن وتبوس فيه وهيا بتحمد ربنا
وانا عارفه انكو عرفتو انها ام الطفل
نرجع بالكاميرا شويه بقا هنلاقي ان ابننا حسن واقف باصص ومتابع الموقف كلو وابتسم لانه حس انها طيبه جدا ، خد خطوه واتحرك ناحيتها وهيا واقفه بتبص ف الموبايل بعد ما ام الطفل شكرتها ومشيت
حسن وهوا واقف قدامها: احم
حبيبه اتنفضت مكانتش مركزه ف حاجه ، رفعت وشها: اااا ازيك يادكتور
حسن بابتسامه: الحمدلله انتى عامله اي
حبيبه بتوتر: امم الحمدلله
حسن بغمزه: الجاتوه كان حلو؟
حبيبه من غير تفكير: يقرف.
حسن كشر وحبيبه استوعبت هيا قالت ايه
حطت ايدها ع شفايفها وبرقت عنيها ورجعت خطوه لورا بعد ماشافت ان عضلات وشه اتشدت وودانه بتطلع دخان
حبيبه بأرتباك: انا انا اسفه اسفه والله الجاتوه كان زي القمر وانا اسفه انى اتأخرت انهارده ع المحاضره وبابا مستنيك انهارده الساعه ٨ عشان نتجوز
قالت كدا وطلعت تجري من قدامه وهيا بتنده ع تاكسى عشان تروح
حسن واقف مصدوم من القنبله اللى رمتها ف وشه بس بعدها ابتسم لانه بيحبها من زمان جدا بس حاول انه يكلمها كتير بس كانت بتصدو
وكان فرحان جدا لما عرف انها اختمرت ودخل البيت من بابه زي ما الأصول بتقول بعد ماأتاكد انها مش زي بنات اليومين دول وهيا دي اللى هتكون ام عياله وتعرف تربيهم
##############
بليل الساعه7ونص
حبيبه لابسه دريس اسود ع خمار اوف وايت وكان شكلها عسل وهيا متوتره ورايحه جايه ف الصاله واهلها قاعدين كاتمين الضحكه وهيا بتكلم نفسها وبتقول
حبيبه: مكانش ينفع اقولو كدا طب لو رفضته اكيد هيزعل
صوتها الداخلى: مايزعل ولا يتفلق انا مالى
حبيبه: بس لو زعل هيسقطني
صوتها الداخلى: يمراري يمراري
الجرس رن
ومنغير تفكير فتحت الباب لقته ف وشها وهوا مبتسم ابتسامه عمرها ماهتنساها واهله واقفين وراه
حسن بأبتسامه: اهلا ياعروسه
