 |
قصه انتحار طبيب نفسي الفصل الاول بقلم مني محمود بركات
ــ قريت مرة جملة في كتاب للطب النفسي بتقول .. في مستشفى الطب النفسي لا يأتينا المرضي بل ضحاياهم ..
الجملة دي أستوقفتني جداً وقلت لنفسي معقول نكون احنا فعلا محاطين بالمرضي من غير ما نحس ؟
خلصت البوست المسائي اللي لازم أنزله كل يوم علي صفحتي ودوست شير ، كنت ناويه بعد ما اخلص شغل علي الصفحة أقفل اللاب توب وأنام بس قبل ما أقفل لمحت خبر قلب كل حياتي ...
قبل ما تعرفو الخبر اللي قريتو أعرفكم ب نفسي أنا مين !
أنا راجيه الصاوي ٣٠ سنه عايشه لوحدي وعندي صفحة علي الفيس بوك عليها حوالي اتنين مليون وقناه علي اليوتيوب مشترك فيها خمسه مليون غير التيك توك والانستا دي شغلتي مسمينها مقدمة محتوي هادف علي وسائل التواصل الاجتماعي اه والله هي أسمها كدة .. الحقيقه أن زمان اوي كان نفسي أكون صحفيه بس والدي مكنش قادر علي مصاريف تعليمي ف اكتفي بأنه وصلني لحد دبلوم التجارة بس كان قادر يعلم أخواتي الصبيان وطلع واحد مهندس عنده ٢٩ سنه متجوز ومهاجر من سنين وواحد محامي عنده ٢٧ سنه متجوز وقاعد في الشقة اللي فوق مني
وانا من بعد وفاه أبويا وأمي فضلت عايشه لوحدي في شقتهم ومن وقت للتاني أخويا بيعدي عليا ..
نرجع للخبر اللي قريته وكان تريند علي كل المواقع العنوان كان أنتحار طبيب نفسي وتفاصيل الخبر كانت .. أقدم الطبيب النفسي بيبرس.س.ح ٣١ سنه علي الأنتحار حيث تناول قرص غلة وتوفي علي الفور .. يعمل الطبيب النفسي بيبرس في مستشفى القصر العيني بقسم الصحة النفسية ويشهد له الجميع بحسن الخلق والهدوء وأكدو زملاء العمل وبعض أفراد الأسرة أنه لا يعاني من أي مشكلات ويبقي الأمر حتي الآن لغزاً محيرا للجميع
فضلت فترة بعيد في قرأه الخبر مش مستوعبه أن الدكتور اللي كنت لسه عنده من تلت أيام بس وكان بيسمعني وبيحللي مشاكلي النفسيه وبرتاح في التعامل معاه يكون هو دا اللي انتحر ... مش قادرة استوعب ايه ممكن يكون حصله في تلت أيام بس يوصله أنه ينتحر ؟
حسيت اني مخنوقه وفجأة دموعي نزلت حتي الإنسان الوحيد اللي كان بيسمعني مات وبقيت تاني لوحدي تماماً
بس كان في حاجة جوايا بتقولي أن موتة مش طبيعي وفضولي خلاني امسح دموعي واوقف تفكير في نفسي وفي وحدتي وافكر بس فيه هو وايه حصله وقررت اني المرة دي مش هكتفي بنقل الجريمة أو الحادثه زي ما هي وانزلها علي قناتي لا المرة دي انا هكون الصحفيه بجد وهنزل من شقتي واتحرك واجمع معلومات بنفسي لازم اعرف ايه وصله ل كدة واكيد انتحر ولا يمكن يكون اتقتل مثلا .. مكنتش عارفه هبدء منين بس لما جمعت أفكاري وهديت عرفت أن أول خطوة هتكون من العيادة الست اللي شغاله معاه بتحب الرغي جدا
سهرت طول الليل وأنا قاعدة قدام اللاب نص الوقت قضيته علي صفحة دكتور بيبرس يمكن أعرف حاجة منها أو من الكومنتات اللي بتتكتب له والنص التاني بكتب الملاحظات بتاعتي وبرتب خطواتي هتكون إزاي
تاني يوم الصبح أخدت شاور وفطرت وعملت قهوتي ودخلت أشربها في البلكونة زي ما متعودة كنت سرحانه في حالي وحال الدنيا الغريب محستش بالوقت اللي سرقني وأخيرا جه الوقت اللي اروح فيه العيادة كنت طول الطريق بدعي ربنا أن تخميني يكون صح وتكون مدام زينب فاتحة العيادة لأي سبب
مين مدام زينب !
ست كبيره في أوائل الخمسينات بتشتغل مساعدة ل دكتور بيبرس في العيادة وكانت بتشتغل مساعدة ف البيت عنده زمان وهي أصغر من كدة
عرفت منين !
منها لأنها ست ودوده جدا وبتحب تتكلم مع الناس وترغي وتفضفض كتير
لما وصلت لاقيت فعلا العيادة مفتوحة ومدام زينب لابسه أسود وقاعدة سرحانه ودموعها نازله قربت منها واتكلمت بهدوء
ــ مساء الخير
ــ مساء النور ... اهلا يا آنسه راجيه اتفضلي
ــ البقاء لله يا مدام زينب ربنا يرحمه ويغفر له ويسكنه فسيح جناته يارب ويلهمكم الصبر حبيبتي
بكائها زاد وهو بترد عليا
ــ ونعم بالله يا حبيبتي ونعم بالله
ــ ا انتي فاتحة العيادة ليه ؟
ــ في ناس متعرفش الخبر ف كان لازم افتح عشان ألغي بنفسي كل الحجوزات وأسيب ورقه علي الباب فيها الخبر
ــ اه فهمت ... ربنا يرحمه أنا بصراحة اتصدمت اوي مكنتش مصدقه نفسي وأنا بقرأ الخبر علي الفيس
بصتلي بأستغراب
ــ الفيس !! الله ولما أنتي عارفه من علي الفيس جيتي ليه ؟ وبعدين أنتي اصلا معادك مش انهاردة
اتوترت شويه بس سيطرت علي نفسي وأنا برد عليها
ــ لا ما احم أنا عارفه أن معادي مش انهاردة بس أصل قلت يمكن الخبر أشاعه سخيفه وجيت أتأكد بنفسي
ــ للأسف مش أشاعه ربنا يرحمه ويسامحه بقا
ــ مدام زينب ممكن اسألك سؤال ؟
ــ أسالي يا بنتي
ــ هو دكتور بيبرس أنتحر فعلا ولا
قاطعتني بحزم وثقه
ــ مفيش ولا أنتحر
ــ وحضرتك متأكدة كدة ليه ؟
ــ لأني ببساطة كنت عندهم في البيت لما دخلو عليه وأكتشفو أنه انتحر
الحزن سيطر عليا ودموعي نزلت من غير ما أحس
ــ طب ليه ؟ ليه دكتور زيه في بدايه حياته وشاطر ومحبوب من كل الناس يعمل في نفسه كدة ؟ أنا مش قادرة أستوعب ... تعرفي يا مدام زينب أن دكتور بيبرس كان سبب أساسي أني أقدر أكمل حياتي وأقف علي رجلي بعد كل الصدمات اللي خدتها ... كل مرة كنت باجي هنا كنت بنزل من عنده وأنا كلي طاقه ايجابيه وحاسه بتفائل وراحه كبيره ... ازاي ينتحر ؟ ازاي ؟ في حاجة غلط والله مش معقول بجد
ــ نصيب يا بنتي نصيب ومقدر ربنا يصبر أهله يارب أنا سايبه مدام إلهام والدته في المستشفى مستحملتش المنظر و وقعت من طولها ربنا يصبرها يارب
ــ أنتي بجد متعرفيش هو عمل كدة ليه ؟
بصتلي بهدوء وسكتت استجمعت شجاعتي وقررت أواجه وأبطل هروب واتكلمت بصراحة
ــ بصي يا مدام زينب أنا مش هكدب عليكي بصراحة أنا كنت شبه متأكدة أن الموضوع جريمة قتل لأني عارفه دكتور بيبرس من مدة طويله وعمري ما تخيلت أنه ينتحر وجايه عشان ابدء ادور في الموضوع وانشره علي صفحتي وقناتي بس لما انتي اكدتيلي أن الدكتور أنتحر أنا دلوقتي عايزة افهم ل سبب شخصي والله العظيم مش ل صفحتي ولا قناتي أنا كنت بكمل بشغف وطاقه عشان كلام الدكتور ليا عن الحياه والمثابرة والنجاح أمنت بكلامه وصدقته ف لما الاقيه أنتحر كدة كل اللي كنت بسمعه منه كدب في كدب أرجوكي لو تعرفي حاجة قوليلي خليني أرتاح لما أفهم وأوعدك إني منزلش ولا كلمه في الموضوع دا ابدا والله ارجوكي
قولت اخر كلامي وانا دموعي نازله ... كنت فعلا حاسه باليأس جدا ازاي مصدر الطاقه ليا ينتحر ازاي اصدق كل كلامه ليا عن الحياه والحب والشغف ازاي ؟؟
مدام زينب بصتلي بشفقه وتفكير وانا فضلت بصلها برجاء ودموعي مش بتقف كل اللي فكرت فيه ورتبتله وأنا جايه رميته ورا ضهري مبقاش مهم خلاص مش مهم الصفحة ولا القناه مش مهم السبق الصحفي مش مهم اي حاجة قصاد اني ارتاح من الإحساس اللي جوايا دلوقتي
اتنهدت تنهيدة طويله قبل ما تنطق وتقولي
ــ هقولك السبب يا راجيه هقولك عشان ميحصلكيش أي انتكاسه وأكون ليا يد فيها يا بنتي كفايه اللي راح في عز شبابه كفايه اوي كدة
