رواية جراح قلبي الفصل العاشر بقلم جوهرة
چا وين اروحن أنه
البت عمها هالواحد واكل ورثها مايقبل ينطيها شي ورفعنا دعوة القاضي كال خلن يحضر وهو ماهو اشتكيت بالمركز وما مشو شكوى چنه دافع فليسات ومتفق وياهم
تالي شلون تبقى البت هيچ ورثها وحگها ضايع
صفنت بيهن سالفتهن بيها ورث زين هاي المرة شتقربلها
معتصم / شنو صلة القرابة بينكم
/ جيراني واهلها الله يرحمهم خوش اوادم امها من زمان انطتك عمرها مريضة وأبوها العام اندعم ومات الله يرحمهم برحمته
وعمها أخذ فليساتها والبيت باعه وصفت البت بالشارع
معتصم / شو ما مقتنع بسالفتج شلون يبيع البيت وهو مو باسمه
/ البنت من مات ابوها كاللها سويلي وكالة امشيلج بمعامله الراتب اثاري موقعها على وكالة عامه وكبل جم شهر يلة درينا بايع البيت والبت صفت بالشارع وين تروح اخذتها عندي
معتصم / وهاي الفترة جانت عايشة وحدها
/ لا ويانه
معتصم / وليش ماتعيش وية عمها
/ اووف راحت اسبوع وشوفتها مرته الويل مالفتها هججتها طلعو طمعانين بالبيت وجم فلس تركهن المرحوم
معتصم / واضح صار عندي معلومات بس هسة انتي مابيدج شي مادام باع البيت
/ چا شلون ويبقى هيچ محدن يحاسبه
معتصم / انطيني المستمسكات خل اكتب المعلومات
/ هاج نرجوسة وديهن
كامت البنية خلت الفايل عالميز ورجعت فتحته معلومات كامله بي رفعت راسي وعيني بعينه البنت استحت دنكت ..
معتصم / حجية راح اتابع قضيتكم وراح اسويله استدعاء ولو هالشي مو من ضمن عملي بس لخاطركم
/ شوكت نكدر نجي انوب
معتصم / اكول شو انتي تحجين شنو البنت ماتحجي لسانها بي شي
البنت رأسا رفعت راسها وخزرتني اني رفعتلها تك حاجب وداخلي مرتاح لهذا الوجه الحلو
/ ها سيدي مو أنه اعرف كل الصار وياها وهي
بعد بكيفها .. احجي خالة چا شنهي سالفتج شو انلصمتي
نرجس بهدوء / كلامها الحجته كوله صحيح
معتصم / أن شاء الله احاول اسوي اللازم تكدرن تتفضلن
كامن طلعن والبنت التفتت / شكرا سيدي
معتصم / ادللي يابة
طلعن واني بقيت صافن بيها لأن البنت دخلت عقلي هدوئها وشكلها خلاني ارجع افكر بيها رغم شكد يصادفني بنات ما اهتم ابد وحتى رانيا زوجتي ماقاصرها حلا ولا اناقه بس حسيت روحي انجذبت الها ما اعرف السبب سبحان الله الارواح جنود مجنده ...
(الأرواح جنود مجندة فما تعارف منها ائتلف وما تناكر منها اختلف) أن تعارف الأرواح لأمر جعلها الله عليه وقيل إنها موافقة صفاتها التي جعلها الله عليها وتناسبها في شيمها، وقيل تآلفها هو ما خلقها الله عليه من السعادة أو الشقاوة، فإذا تلاقت الأجساد في الدنيا ائتلفت واختلفت بحسب ما خلقت عليه فيميل الأخيار إلى الأخيار والأشرار إلى الاشرار
رجعت فتحت الملف وعيني بصورة البنية الموجودة بالبطاقه اسمها نرجس
ورى يومين استدعينا عمها الي ماله ذكر طلع بايع البيت وطالع لتركيا هو وزوجته ماعدهم اطفال هذا العرفته من مختار المنطقه ارسل المعلومات
يعني البنت ضاع حقها والله مسكينه
مر اسبوع والمرة ماراجعت رقمها موجود عندي فكرت اتصل عليها واكيد راح تنصدم
دكيت عليها شوي فتح خط وصوت ناعم حلو
والله خدر اعصابي كثرما هادىء
معتصم / منو وياي
نرجس / انت منو وشرايد
معتصم / اني مقدم معتصم
نرجس / ها العفو سيدي اعتذر اني نرجس
معتصم /؛ماكو داعي للأعتذار بس خابرت لأن عمج طلع مسافر لتركيا حسب المعلومات الي كتبها المختار
صاحت متأثرة / صخام بوجهي يعني شلون ضاع حقي وصفيت من صدوك بالشارع
اسمع بجيها وشهكاتها وبصوت مخنوك .. مشكور سيدي
سدته واني بقيت صافن شبية ليش انقهرت من سمعتها تبجي اني ياما مرت علية سوالف وقضايا تشيب الرأس
طردت اي فكرة من راسي ورجعت اتابع ملف جوة أيدي
ورى جم يوم نفس المرة اجت تقابلني بس وحدها اجت تتوسل حتى اسويلها واسطه للبنت حتى تتعين مخلصه معهد إدارة وتريدني اساعدها
سألتها ليش نرجس ما اجت ردت .. الصدك سيدي نرجس ما تدري عبن حجينا البارحه وماقبلت اجي عليك
معتصم ة/ وليش ماقبلت
/ تكول عيب شيكول علينا تعاطف ويانه مو معناتها نستغله
بلكن تلكالها شغيله خطية البت حالتها حالة لا اكل ولا شرب من يوم العرفت عمها شارد بالفليسات
معتصم / حقها وحدانية ماعدها سند
/ اي والله وتقاعد ابوها تفاليس مايكفي
معتصم / الله كريم يصير خير
طلعت المرة تتشكر واني بالي يم نرجس ضجت لأن هيج جاي يصير بيها .. رجعت اتابع شغلي بس البنت بقت على بالي
ورى جم يوم حاجيت ولد صاحبي بوزارة الصحة إذا يكدر والولد ماقصر
خابرت عليها ومن حجيت شو هاي تخبلت طلع ماعدها علم ومتريد هاي الوظيفة جانت وظيفة عامله خدمة كامت تبجي وسدته اني ضجت هاي شبيها صوجي فوك ما دبرتلها وظيفة اشو بناتنا خريجات بكالوريوس وكاعدات لا واسطه ولا شي
ــــــــــــــــــــ
نرجس /
من يوم التوفى بابا وعمو شهاب يتدخل بكل صغيرة وجبيرة لا طلعين ولا ترحين ولا ولا يوو الا خلاني اسويله توكيل حتى يكمل معاملة الراتب مالت بابا ضحك علية طلع توكيل عام وهالشي خلاه يتصرف بالبيت يبيعه بدون ما ادري الا اجى المشتري يريد يطلعني من البيت يله عرفت افتريت عالمحامين كلهم يدورون اتعاب غالية بقيت محتارة اووف اني صوجي شلون امنت بي واني اعرفه من قبل ماعنده حنية يمكن لان جنت وحيدة بعد وفاة بابا الله يرحمه حسبته سند الي
جيرانه ام عقيل جانت صاحبة ماما الله يرحمها مرة طيبة وبراسها نخوة أصلها من الجنوب عايشة هي وبنات اثنين وابنها ،زوجها استشهد جان بالحشد خطية اخذتني عدها بالبيت الي قاسمته بعد وفاة زوجها مشتمل مأجرته والباقي من البيت عايشة هي وبناتها الي بالاعدادية يدرسن وابنها عقيل بالمتوسطة
اني استحي قابل شكد ابقى يمهم هي ام عقيل على كد حالها وابنها كاعد يكبر هسة عمره 14سنة
التقاعد يادوب ميكفي شلون لعد لازم أجر مشتمل غرفة لو اروح لخوالي الي اصلا ماعندي علاقة بيهم بابا جان زعلان وياهم واصلا ساكنين بكركوك
يمر اليوم واني اتصفن انوب متت قهر من خابرني الضابط يكول لكيتلج شغل عاملة خدمة خرب حظي بعد الدلال والكشخة اشتغل خدامة صح الشغل مو عيب بس مو اني اقبلها لنفسي
من اجت خالة ام عقيل عاتبتها لأن تصرفت بدون علمي كالت .. شكو بيها مو زين الله يهدي عليج ويساعدج
المهم بنفس اليوم اجى المؤجر انطى خبر كاللها لكيت بيت بغير منطقه وراح ينتقل بعد اسبوع
طخت عندي ومن شفتها ضايجه كلتلها .. خالة اني ااجر المشتمل فدوة خالة لاتكولين لا
ام عقيل / صدك تحجين ولج يمه رويتبج خلي بجيبج الاجار غالي وراج عيشة خوما تصرفين فليساتج الحصلتيهن من بيعه غراض البيت
واذا اخذتي المشتمل هم يرادلج غراض
نرجس / خالة اني مقررة فدوة ولازم اعتمد على نفسي وعندي خوش شغله اسوي اكل بالبيت وابيع مو تدرين بية شكد اكلي طيب وانتي سويلي دعاية شارعنا هنا زين والاغلب موظفين وموظفات يحتاجون هالشي
كوة قنعتها وقبلت تاجرلي البيت وأخذت نص السعر ماقبلت تحاسبني مثل البقية
ورى اسبوعين رحت قبضت التقاعد نزل انطيتها الاجار ماقبلت كالت اكعدي هسة وارتاحي عود سلميني اجار اني رفضت خطية هي صاحبة ايتام وكلهم مدارس
المشتمل غرفة استقبال ومطبخ صغير وغرفة نوم والداخل ممر الصحيات وبيت ام عقيل نفسه بس عدها غرف طابق ثاني
جان الجو بعده صيف ميحتاج فراش هواي بس اشتريت مبردة وبنكة وأخذت مدات ودوشكين زايدات واشتريت سرير نفر وغراض مطبخ ، الطباخ ماقبلت اشتري لأن طباخنا اني انطيته الها مابعته فرجعته كالت يفيدج احسن اني مامستعملته
خطية حتى مواعين انطتني بس اني هم اشتريت المحتاجته نطلع للسوك اني والبنات ونأخذ عقيل ويانه
استقريت بالبيت مطمنة ام عقيل وولدها قريبة علية
افتريت ضايجة دحكت يرادلي شاشة بلازما بس مو وكتها خل اجمع جم فلس يلة
طلعت ثاني يوم اني وخالة ام عقيل تسوكنا واني تسوكت للطبخات الراح أسويها لأن رادو مني جدر مقلوبة يا الله هذا اول رزق جاني
الحمدلله خلال هالشهرين صارو عندي معاميل
بيوم دك موبايلي ونفسه الضابط حجى وياي يريد يجي للبيت اني ارتبكت شيسوي جاي وشنو اليريده وقاحه هاي يعني سوالنه خدمه يريد يستغلنا
خبرت ام عقيل حتى تكون موجودة اشوف هاي عادي ما استغربت اني هم مادققت وياها
اجى جان وكت عصر كعد بالاستقبال لبسه مدني بنطرون وقميص كعد يسولف قصة حياته واني شكو شعلية تسولف حياتك الي اخر شي طرقها السالفة الجاي بيها
من طلع واني كوة لازمه اعصابي رجعت على ام عقيل ..
نرجس / خالة صدوك تحجين شلون هيج تتصرفين بدون علمي ياربي شنو الراح يكوله علية والله العظيم متت بدمي لساني انربط ماعرفت ارد عليه
ام عقيل / نرجس اني اريدن مصلحتج وشفته انسب واحد الج وعرفته من اول يوم جان مخلي عينه عليج
فكيت حلكي مصدومة شنو هاي ام عقيل كارثة والله
ام عقيل / حلكج يولي لمي
نرجس / خرب حظي انتي شلون هيج تسوين
ام عقيل / ماعندج اليوجهج طريق صح أنه مثل امج وتهمني مصلحتج
نرجس / خالة فدوة انتي شبيج شنو مصلحتيش ويه هذا الغريب لا اعرفه لا اعرف منين أصله فصله
ام عقيل / ديلة هو شحصلتي من الكرابة هذا عمج الله يمسخه باك الفلوس وشرد بيهم هو ومرتة ام وجه المزنجر وخوالج محد يذكرج حتى من جانو اهلج عايشين مايوم شفتهم وامج الله يرحمها كاطعه نفسها منهم
نرجس بقهر / الله ينتقم منهم إن شاء الله بس والله عيب السويتي
ام عقيل / ولج انتي شمالج هو أنه رحت بحجه يسويلج واسطه انوب وحجيت وياه وسالفة جرت سالفة شفته عنده هوى يمج وكتله إذا الك نيه زواج أنه اساعدك
جريت حسرة وذبيتها مرات مدري شلون تفكر
نرجس / خالة عوفيني هسة فدوة لاتفتحين السالفه الرجال متزوج وعنده جهال اني شأسوي بي
ام عقيل / اششش لاتحجين ، كلشي بالقسمه
عافتني وطلعت لبيتها واني بقيت الوب وأفكاري كلها يم هالرجال معقولة من شافني طمع بية يبو هو اني جنت لابسه جبه سودا وحجابي اسود حتى مجنت كاشخه ، لا مراح اقبل شلي بهالسالفة هذه
اسبوعين مرن وخالة ام عقيل تسالني يومية ها وافقتي واني احس راح أوافق غصبا علية خاصة بعد ما اتصل على خالة ام عقيل وحجى وياها عالمقدم والمؤخر وإذا اريد ياجرلي بيت وراح ياثثه بكولشي النهار كله تزن براسي حتى اقبل وانوب قنعتني ابقى هنا قريبة عليها ، رفضت كلتلها لا صعبة ما اقبل هو جبير اني ممجبورة اتزوجه واني بعدني صغير ، عافتني كم يوم ورجعت تحجي وياية دوختني بسوالفها عدها قابلية عالاقناع فضيعه
واخيرا انطيتها موافقتي لأن زواجي منه راح يحلي هواي امور أولها سند الي مثلما قنعتني ام عقيل بس داخلي جنت ممتقبلته
اجى علينا جايب ذهب انطاني العلاكه بيها العلبه وفلوس كال هذا نيشانج جهزي روحج
وخالة حجت وياه عالمشتمل نكعد بي هو وافق كال اقلها من ماموجود يكون مامن علية يم ام عقيل
بس وراها زعلت وعفتهم وطلعت من كال مهر سيد أعقد وبعدين يصدقه بالمحكمة
ماطلعت عليه بعد وهو راح واستلمتني ام عقيل تحجي علية اخر شي قنعت من كالت حلف راح يصدقه بس هسة لأن محاجي وية أهله بسالفة الزواج
بقيت ايام مطنكرة حتى هو اتصل بية مرتين ومارديت عليه اخر شي اجى للبيت وجانت خالة ام عقيل مموجودة فأستقبلته بالباب ما خليته يدخل هو ابتسم وغمزلي ..
معتصم / تعجبيني والله
صفنت بوجهه رد انوب / تخافين على نفسج وهالشي حلو
مارديت عليه بقيت صافنه بوجهه الصراحه استحيت ودنكت الرجال هيبة مرتب وشكله حلو رفعت راسي من كال
معتصم / ترى زحمه ابقى بالباب واعتبره عيبة بحقي بما انو خالتج مموجودة اترخص اني وانتظر الجواب عن قريب
عافني وصعد سيارته الحديثة واني رجعت قفلت الباب ودخلت البيت افكر بي
بقيت يومين من اجى وما خبرت خالة ام عقيل اخر شي رحت عليها وكلتلها اني موافقة
ام عقيل / اي يمه بالمبارك عليج چا أنه شحجيت من الاول انتي هم مو صغيرة عمرج 23سنه وتعرفين مصلحتج
نرجس / خالة اكبر مني ومتزوج
ام عقيل / خالة نرجوسة ترى ما ممبين عليه ماشاء شباب ومنصب شتردين چا يجيج واحد مختلف ما لاكي ياكل اسكتي خالة وكولي الحمدالله ترى الدنيا غابة خالة واني كله لمصلحتج احجي ، يلة خابريه
نرجس / عزاا لو اموت استحي والله قابل اكوله تعال اقبل تتزوجني
ام عقيل / ديلة أنه اخابرة رقمه عندي
نرجس باستغراب / ها خاله طلع الرقم عندج ومره كلتي ماعندي من سالتج
ام عقيل / والله ليش اچذب انطانياه وكل مرة يتصل يعرف اخبارج
نرجس / امممم وانطيتي سيفي حياتي كلها
ام عقيل / شنو هذا الكلتي عليه
نرجس / هههه قصدي معلومات انطيتي
ام عقيل / هاا هههه اييي ديلة فوك ما اساعدج
نرجس / فدوة خالة والله انتي وكفتج وياي تعادل مية رجال
ـــــــــــــــــــــ
نرجس /
تزوجنا بعد هالاحداث بثلاث اشهر زواجي استمر خمسة اشهر اثثلي المشتمل وجهازي كامل وجاب غرفة نوم تجنن واني بالفلوس الي انطانياها جهزت روحي وياي ام عقيل ماخلتني وحدي
معتصم يكدر يفتحلي بيت بس كال ماريدج تبقين وحدج هنا ام عقيل يمج اني هم ما اعترضت لأن كلامه صحيح
معتصم يكبرني ب 17سنة ، خلال هاي الأشهر تصرفه وياي جدا محترم انسان رائع ومحترم بمعنى الكلمة خلاني اتعلق بي من خلال معاملته الطيبة وحنيته علية
كولشي وفرلي حتى الشغل تركته ماقبل فقبل ما نتزوج عفته
واني هم ابد ممقصرة وياه طبعا خالة ام عقيل وتوصياتها يوو أشكال توصي وتعلم
معتصم / نرجسة وينج
نرجس / اجيت حبيبي اجيت
طلعت من الحمام بسرعه وشعري ينكط مي
هلو حبيبي اليوم من وكت
رفعت جسمي وبسته بخده ماعافني الا باسني بقوة
عينه بعيني وسحب المنشفه وغطى شعري
معتصم / فاهية راح تتمرضين
لفيت شعري / هههه شسوي من سمعت صوتك اجيت ركض
حظني ودخلنا اني وياه لغرفتنا
بات عندي وثاني يوم اخذني تسوكنا وتغدينا بمطعم ورجعني للبيت وكال نازل لديالى اني من اسمعه يكول اروح لديالى كولش اضوج بس ما احسسه بهالشي اعرف عنده زوجة واولاده لازم يلتقي بيهم ويشوفهم هو كولش متعلق بيهم خاصة بنته رونق يكعد يسولفلي سوالفهم بس ابد ما يذكر زوجته يمكن ميريد يضوجني أو عباله اغار ، غصبا علية ارضى بالواقع باعتبار اني نزلت ضرة عليها
اني الغيرة مرات تصعد فول بس احاول اسيطر عليها ولو تظهر من خلال كلمه لو نغزة اسمعه
الي جاي أشوفه وأحسه وياه يحبني ومدللني حتى من ينزل لأهله مخابراته متبطل اني وياه ومن اسأله وين كاعد تخابر يكول بمضيف عمي لو طالع برا
صرت اعتمد عليه بكولشي هو عالمي ودنياي والايام اليغيب بيها ابقى ساعة ساعة اعدها حتى تخلص
مرات اصفن وأتذكر ايامي وشلون جنت متخوفه من هالزواج بس الحمدلله رب العالمين ماكطع بية
