رواية جراح قلبي الفصل الحادي عشر بقلم جوهرة
صعب /
ترى دوختونه استقروا عاد
صاح صعب بالجهال الي طلعوا يتراكضون خافو من عمهم يعرفونه من يعصب
حذيفة / شبيك كالب الوجه عبالك متعارك كول يا الله
صعب / حذيفة عوفني ترى البية مكفيني
التفت معتصم عليه وخزره ، يعرفه ليش عصبي وزعلان
عافهم صعب وطلع من المضيف راح وكف برا يريد يطلع بسيارته لحكه معتصم ..
معتصم / اصعد خل نتفاهم
طلعوا بسيارة صعب جان يسوق وهو ساكت طبكها على جهة بفسحه مقابل الشارع التفت على معتصم ..
صعب / شتريد مني يعني اساندك والله العظيم لوما معزتك بگلبي وانت اخوية جان عرفت شلون اتصرف وياك ، ماجنت متوقع تتزوج كلت بس حجاية انكالت بوقتها ، ولك معتصم شلون تتزوج على رانيا انت جنت دوم تتحجج على هاملتني ولسانها طولان طلعت تتحجج متزوج وتريد تبرر سبب لهذا الزواج
رانيا تحبك معتصم شلون هيج تخونها
معتصم / صعب ماخنتها زواجي بالحلال بعدين اختك مامقصر وياها لا ويشهد ربي علية بس هي الي تغيرت بهاي السنوات الراحت ادري قابل اني سبب بالصار هذا قدرها ننحرم من الخلفة ، عمي اني راضي بالعندي من خلفة بس هي متقتنع
وانت تعرف سوالفها وياي مو غريب علية ودوم احجيلك همومي ، لعد لوما انت تعرف بسوالفها وياية واحجيلك جان شكلت
عاتبه وعينه عليه / لا والله صرت حالي حال الغريب من ضميت علية هالزواج هذا
معتصم / صعب صدك تحجي انت ضلعي وسندي والله العظيم أسراري بس عندك حتى اخوتي ميعرفونها اعترف اني ما خبرتك لأن ردت وكت اعلن بي هالزواج
صعب بغضب / كل عقلك تريد تكول والله ام صهيب تتخبل ، متزوج صارلك خمس اشهر وتريدها تسكت هي بدون شي غيرتها مفولة بس الاريد اعرفه شلون ماشكت بيك
معتصم / مامنطيها سبب يخليها تشك اختك مدللة وحياتها سعيده وياي وانت تعرف هذا الشي ، صعب انت تشك اني ممدللها احجي ترى شوفة عينك
صعب / الحق ينكال اختي مدلله وحياتكم حلوة ، وهذا الراح يخبلني من هيج عايش بسعاده شعندك تروح تتزوج
معتصم جر نفس ورد / صعب ترى مو يعني اختك سعيده اني هم سعيد ميحتاج اوضحلك انت تدري بسوالفها
تدري البنت التزوجتها هادئة حيل وگلبها طيب
اهم شي عدها اكون اني سعيد ومرتاح حتى ما يوم ضغطت علية بشي وبينت هي متضايقه وربي عبالك نسمة هوى باردة بعز صيف لاهب
صعب ضيك حاجبه / هه لا الاخ طامس بالعسل ، اسكت اسكت لا تنسى نفسك وتبقى توصف بيها
معتصم / تصنف مو ميخالف تمون
صعب /؛معتصم شلون قبلت تتزوجك وانت على ذمتك مرة وجهال وغريب عنها والله النسوان راح يجلطني شلون عين صلفة تتزوج بدون علم اهل الزوج
معتصم / صعب لو احجيلك قصتها تنقهر عليها البنت وحيدة لا سند ولا بيت صفت هي والشارع لوما أهل الرحم
حجاله سالفتها وشلون تعاطف وياها وكام يهتم بيها من باب النخوة ومانكر اول ما شافها عجبته بس مجان مقرر زواج ولا يتقرب عليها بس من شافها مالها سند قرر يكون سندها ويتزوجها
4
حك خده وأيده بلحيته يمسد بيها / يعني تزوجتها تنقذها من وضعها وبنفس الوقت لأن حلوة اكيد هالشي ، حلوة مو ؟!!!
صعب حب يستفزه
معتصم نتر بي / صعب ترى ما اقبل هيج حجي شنو حلوة مو حلوة ماكاعد احجي على حلاتها لاتخليني اعصب
صعب / والله ابن عمي اثاريك طامس بالحب والدليل ضجت من حجيت عليها
معتصم / مو شغلة حب بس هذه عرضي
دك موبايله / هلو شلونج
نرجس / شو ماكو هلو حبيبتي لازم مكاعد وحدك
معتصم / اي والله شلون صكار واكفلي عالحرف وعيونه راح تطلع من العصبية ههههه
نرجس بنعومة يحبها / منو لازم المرة هاي
معتصم / لا اخو المرة هذا حبيب گلبي وضلعي صعب
نرجس / هههه صعب ؟!!!!! شلون اسم بس لا الة من اسمه نصيب
معتصم / اي والله صدكتي هواي مأخذ من اسمه
نرجس / حبيبي شوكت تجي
معتصم / اسبوع إن شاء الله
نرجس / فدوة لا اطول والله مشتاقتلك
معتصم / احمم واني أكثر يلة ديري بالج على نفسج
صعب منتجي عالستيرن وعينه عليه يشوفه فرحان من يحجي وعيونه تشع سعاده تنهد وسكت ماحجى ميكدر بعد يتدخل بالصار خل يسكت والله كريم وأبو صهيب مو زعطوط يعرف شلون يتصرف
2
ــــــــــــــــــــــ
ايهم صاح على لينا
/ وينج يلة ترى جاي انتظر
لينا / كملت شدعوة مستعجل
انطته القميص الجانت دكمته مكطوعه لبسه ورتب نفسه وراح تعطر لبس الساعة والمحبس
يوسف تقرب عليه حظن رجله .. بابا الوح وياك
دنك شاله وباسه بخده وعضه اووف شلون خدود
لينا باعتراض / ايهم خطية والله خده ترف
تقرب علية ويوسف بحظنه / هو الترف شيخلف اكيد ترف .. غمزلي بحاجبه نزل يوسف وسحبني بحظنه شاورني واني طنشت وابتعدت بسرعة هو كام يتأفاف
ايهم / ابقي مطنكرة اني اعلمج
لينا رفعت حاجبها / أنزل جوا لأن مليت من التهديدات لاتودي ولا تجيب
ايهم جرها بسرعه من أيدها وخزرها وهو يتنفس بقوة / يعني تتحديني مووو ،ترى اخذج هسة وغصب همين ، قرب رأسه يبوسها
لينا باعتراض / ااايهم الولد يمعود شوفه شلون صافن علينا
دنك شاله ويبوس بي ..هههه حبيبي يوسف كاعدين نلعب
يوسف حاوط رقبته بيديه وباس خدي ايوه اللي كزكز عليه / اووف يابة ، يلة خل ننزل جوة هسة عمك صعب يرزلني
يوسف من سمع اسم صعب / بابا بابا
ايهم / اي خوش سالفة اني اخلف وصعب يصيحونه بابا مكبرين راسه ههههه
يم الدرج التفتت على لينا وخزرتها .. وين هيج نازلة
لينا بدلع خلاه يشيط / يوو والله نسيتني انت وابنك
رزلها / انتي فاهية يلة روحي غيري هالثوب هذا
راحت الغرفه واني نزلت يم اهلي ذبيت يوسف راح يلعب وية الجهال سالت على صعب امي كالت طلع برى
رحت عليه جان منتظرني بالسيارة حتى نطلع للموقع الي اختاريته اريد اشتري اني صفيت كولشي بالاردن خلال أسبوع رحت ورجعت
لأن لكيت عمي سامي مرتبلي الأمور
عجبني المكان خوش تصير بي مكاتب واتفقنا الدفع والتسجيل نفس اليوم
ورى الظهر رجعنا ذبني صعب بالباب وراح لبيت عمة ايمان
أبيت ام سما
صعب / السلام عليكم شلونج عمتي
ايمان / هلا بصعب هلا يمه يلة بينما تغسل وتصلي غداك حاظر
صعب / اي والله عمة تسلمين
رحت غسلت وتوضيت صليت صاحت عمتي
/ دشداشتك البيضا معلكه بالزاوية إذا تريد غير ملابسك
غيرت ملابسي بدشداشة جانت مكوية ومعطره اني من اجي هنا واعوف ملابسي وعمتي تغسل وتكوي الله ينطيها الصحه والعافية
كعدنا نتغدى بالهول جابت صينية الغدا مسوية تشريب لحم على حمص ثريد وتمن وطرشي ولبن
ماقبلت تتغدى وياي كالت اكلت كملت ورحت غسلت / والله عاشت ايدج محد يغلبج بالطبخ
ايمان / الف عافية خل اروح اصبلك جاي وعندي سالفة وياك
بقيت انتظرها لما كملت بالمطبخ وجابت الجاي مدري شعدها عمتي
اخذت الكوب شربت شوية واسمعها تحجي بطاري زواج
ايمان / يمه صعب انت كبرت 35 سنة ومامتزوج يايمه والله حرامات اقلها يصير عندك جاهل وليد يشيل اسمك
عكدت حاجبي صح اني محد يتجرأ ويحجي وياي بهيج موضوع بس عمتي الها استثناء هي غير شكل
صعب / عمة شو جنتي ساكته شذكرج بية
ايمان مبتسمة / والله من كثر معزتك البگلبي
صعب / اتشكرج عمة بس تعرفيني زين ميحتاج اشرح شي
ايمان اجس نبضه / اكول صعب بس لا تصير عصبي .. شكو بيها لو خطبت صفا بنت عمك
صعب بغيض / صدك تحجين شبيج عمة ممفكر اتزوج بعدين مالكيتي غير هاي العرمة
ايمان / يااا شبيها جمال وشهاده وبنت عمك
صعب / يمعودة لسانها يلوط اذانها لماظه اصلا متعجبني
ايمان / يبو لو تشوفها ذابحه روحها عليك
صعب / هه تعلميني بيها بكل مكان تكمزلي تردين الصدك ماحبها ماتعجبني ، صلفة وجريئة ، بعدين شعجب كلتي عليها ؟؟؟!!
ايمان / والله أشوفها تتبع اخبارك البنت نفسها بيك صح لسان بس حبابة ولاتنسى عمك ولد عمك يحبونك وإذا تمشي عليها وتخطبها يكبعوها وينطوها الك
صعب / لااا دخيلج سدي السالفة هي بغير شي لازكه انوب تسمع طاري خطبه
ايمان / كيفك عيني براحتك الزواج الغصب مايراد مثل زواج ايهم ولينا همزين صارلهم شهر مبين متفاهمين
صعب / ايي اني هم ملاحظ عليهم وأيهم دوم عيونه عليها بالبيت چنا ماشايف مرة ههههه
ايمان / الله يهدي والف الحمدلله من تصافو
صعب / مدري بعد مبين عليهم متصافين واحتمال بس كدام العائلة وبينهم حرب البسوس ههههه
ايمان فكرت تسال لينا وتتاكد
صعب / خل امدد شويه لأن نعسان
ايمان كامت / خل اجيبلك مخده ودوشك
راحت جابتله وفرشتهن وطلعت لغرفتها وصعب حط راسه عالمخده ينام اجى على باله معتصم اليوم التحق جر حسرة وذبها وميريد يتخيل رد فعل أخته إذا عرفت
ماكعد من النوم الا ساعة خمسة العصر راح توضى صلى وأخذ سويجه وموبايله سمع صوت بالمطبخ استغفر ربه وفات سلم عليهن
ام صهيب وصفا ولينا من شاف ماكو يوسف سال لينا / وين يوسف
لينا / راح وية ابو للمول
صعب رفع حاجبه / وليش مارحتي وياهم
لينا تبرر / كلت اجي اسلم على عمة ايمان
صعب / شلونج ام صهيب
رانيا / الحمدلله شو ماكو هالايام ماشايفتك
صعب / مشغول شوية يلة اخذو راحتكم
ايمان / وين طالع تعال اشرب جاي واكل كليجه رانيا مسويتها
صعب / عاشت أيدها مامشتهي والله
طلعت بالكراج لحكتني صفا راح تخبلني هذه!!!!!!!!
صفا / صعب تكدر تاخذني باجر للتربية
التفتت / وشتسوين
صفا / علمود التعيينات حتى لينا كالت ايهم قبل تروح تقدم
صعب / اي خوش لعد روحي وياهم اني شعلية
صفا / صعب شبيك وياي ترى اني مو عدوتك
صعب / ومنو كال اصلا ولا على بالي انتي ، بكيفج تحجين يلة تأخرت
عفتها وطلعت .. والله يربي ولا تمل
بالمطبخ كاعدات يسولفن
ايمان من سالت لينا على علاقتها بأيهم كالتلها متصافين لأن ماحبت أحد يعرف لو حتى عمتها اللي تحبها وتريد مصلحتها
ايمان / عفية عليج ريحتيني المهم ابقي دكي ناعم وياه ترى ايهم بطبعه عصبي ميتحمل ومن يشوفج تتعاملين وياه بهدوء واحترام بخليج على راسه
رانيا / والله عمه الزلم مينحزرون
ايمان / ها ام صهيب لازم ابو صهيب مضوجج
رانيا / هههه لا والله اني هواي اضوجه ومتحمل خبالاتي يو شكد الح بسوالفي وهو خطية متحمل وساكت
صفا / يمعودة انتي عصبية والله عمة متشوفيها الا عصبت وكلبت الخلقة بس احنا متحملين لأن مرة الغالي وبنت عمنا
ضربتها رانيا بكفخه على ظهرها / ايا عوبة
صفا حكت ظهرها / ههههه ايي شلون ايد
ضحكن وبقن يسولفن ويشربن جاي وياكلن كليجه
ـــــــــــــــــــ
نرجس /
ساعه وحدة بالليل فزيت على صوت الباب ينفتح كمزت خايفة باوعت من شباك المطبخ الحمدلله معتصم
فتحتله باب المطبخ / حمدالله على سلامتك حبيبي جرني بحظنه وباس خدي .. الله يسلمج مشتاقلج ولج
بست صدره وبقيت راسي وحظنته وأيدي على ظهره / اني أكثر مشتاقتلك أكثر والله
دخلنا جوا ساعدته ينزع بدلتله العسكرية وذبيتها بالحمام حتى اغسلها
نرجس / شنو جاي من الدوام
معتصم / اي وباجر الصبح ارجع ماحبيت اكضي الليل وحدي
نرجس / حبيبي .. مسألتك متعشي لو لا
معتصم / اي الحمدلله بس خل اسبح حتى ارتاح
حظرتله الحمام سبح وطلع نشف شعره واجى انسدح عالفراش كعدت يم راسه ادلكله ماحسيت الا غفى سودة علية لعد شكد تعبان
كمت بهدوء بدلت بدشداشة نوم وطفيت الضوة وانحشكت بحظنه تنهدت مرتاحه
الصبح حسيت عليه يبوس بية وو..
،،،،
سويت ريوك لما كمل سبح والبدلة جنت غاسلتها ومكوية صاحني رحت عليه واكف يبدل تقربت حظنته وبسته بحلكه وأيدي تمسح شفايفه / هسة شكو بيها لو تبقى ساعة انوب
دنك باسني بكصتي وهو يتنفسني / ياريت بس عندي شغل والله يلة حياتي خل نتريك
تريكنا وهو أخذ سويجه وموبايله وطلع طلعت وراه وروحي أحسها مفرفحه عليه صحت وراه قبل ميفتح باب الحوش ..
/ معتصم التفت بكل جسمه ورحت بسرعه حظنته وراسي على صدره قفلني بذراعه ورأسه على راسي باسني رفعت راسي وعيني بعينه ..
نرجس / والله من هاي اللحظه اشتاقيتلك
حاوط وجهي بين ايديه ..
معتصم بحنية عليها /؛يگلبي والله ما أتأخر عليج صيري قوية ماريدج تتخوفين صدك خليتلج مصرف بالكنتور
نرجس / ماريد كولشي بس اريدك انت والله
تنهد بقوة / وتالي راح تخليني ابطل ما اروح للدوام
مديت بوزي زعلانه / لا خلاص روح الله وياك
دنك باسني بشفتي وابتسم وهو يطبطب على خدي بخفه
رجعت يم باب المطبخ طلع سيارته ورجع سد باب الحوش ورفعلي أيده سلم علية وراح
جريت حسرة وذبيتها يربي شلون بية هواي اشتاقله
ـــــــــــــــــــ
لينا /؛
الحمدلله اقتنع ايهم اقدم اوراقي بلكن يطلع اسمي بالتعيينات المفتوحة راحت ويانة صفا مرينا عليها للبيت لأن خابرتني بالليل كالت اخذوني وياكم هي دوامها بمدرسة أهلية يعني مو تعيين حكومي
والطريق كله ايهم يصنف علينا وأكثر شي هو وصفا لأن لسان لماظه تبقى تتجادل اخر شي نترت بية ..
صفا / شبيج خانسة ماحجيتي شوفي رجلج اكلني بلسانه
لينا / والله على أساس انتي قصرتي الطريق كله تحجين
صفا / شسوي مابية اسكت من واحد يضوجني
لينا / هههه اخذتي حقج بلسانج
صفا / ايي ولج غير اكول ابو يوسف ابن عمي وأكبر مني ولازم احترمه
نتر بيها ايهم / غصبا عليج والله خوش ام لسان
قدمنا اوراقنا وجانت هوسة ساعتين ننتظر يلة وصلنا سرى
بعدما طلعنا حجيت وية ايهم / ايهم ودينا سوك اريد ملابس ليوسف
ماحجى شي وبسيارته طلعنا لسوك بعقوبة جانو منزلين الشتوي اشتريتله كم قطعه وحسبت حساب ايمن ابن حذيفة و لأن قريب لقياس يوسف والبنات ملاك وجنات اشتريتلهم
بقو ولد اياد اخذت بس للصغير
ايهم / هاي كلهم ليوسف
حجى ايهم الي جان يكلب بقمصله كولش حلوة
لينا / لا بس اخذت الجهال خطية
صفن علية / اي والله عفية بيج
صفا هم اشترت لروحها اخذت سترة وشالات اني ماخذت شي لروحي ايهم كال أخذي كتله ممحتاجه خزرني وكال روحي أخذي من هذا المحل ، كلتله ممحتاجه هو هم ما لح بعد
دفع الفلوس وطلعنا بعدها تسوك حلويات للجهال ورجعنا
ذبينا صفا ابيتهم واحنا دخلنا البيت تلكونا الجهال ويوسف مبوز زعلان صاحه ايهم ماقبل يروح لأبوه حتى اني صحته رجع يركض للبيت
صاحت ملاك / عمو زعلان من كعد الصبح سال عليكم بيبي كالتله راحو بالسيارة بقى يبجي وقنعته بيبي وماما وبقى ضايج
التفت ايهم علية / ديلة هو هذا شمفهمه
لينا / يضوج من يشوفني مموجودة وانوب اتعلق بيك بعد شيرضي راح يبقى مطنكر
دخلنا سلمنا عليهم جانو بالمطبخ والولد بعدهم بالشغل بس عمو عبدالله موجود ويوسف خاتل بحظنه
كعدت عالقنفة بصف عمتي وفتحت العلاليك وزعتلهم ملابسهم والبنات فرحن بحاجاتهن
علا تشكرت مني لأن دوم اذكر جهالها
ادحك على ايهم سحب علاكه وطلع قمصله الي عجبته بالمحل طلع مشتريها صاح يوسف الي من شافها نزل من حظن جده وراح وكف گبال أبوه
جره ايهم حتى يكدرها عليه اخذها وانهزم يم جده
خربنا ضحك عليه حيال لحكه ايهم وشاله بحظنه يبوس بي ..
ايهم / العصر أخذ وليدي والعصابة ذول نروح بين الجسرين
يوو صياح الجهال وهوستهم ملت البيت صاحت عمتي / وتااالي كلمن تأخذ جهالها دوخونا
طلعتهم علا بالصالة ورجعت حتى تصب الغدا
اني طلعت فوك أبدل وأيهم لحكني جنت دا انزع وما أحسه الا ورايه صار دنك شاورني دفعته بجتفي فرني عليه
ايهم عيونه بعيوني / تالي وياج ترى موتيني والله
لينا / ضوك اللي ضكته
ماحسيت الا أخذ شفايفي بقوة فترة يلة ابتعد واني ضربت صدره رجع كال / يلة ضكت مو انتي تكولين ماضكت
لينا بغيض وهي تمسح شفتها / ماقصدت هالشي بس انت ميولك كلها منحرفة
ايهم غمزلها ورجع حظنها بقوة / والله براسي انحرافات تخليج تبقين تتصفنين وادوخين بيها
لينا شهكت من ايده بدت تتجرأ على جسمها
اندكت الباب صوت جنات تصيحنا عالغدا
رفع ايهم رأسه وصاح .. اي عمو نازلين
راحت البنية والتفتت علية ويركص بحاجبه
ايهم وين ترحين مني ، خل افوت للحمام حظري ملابسي
ايهم /
كملت سبح ونزلت ، لينا لكيتها كاعدة وياهم ويوسف من شافني نسى طنكورته واجى بصفي أنتجى بيده على رجلي دنكت بوسته وبديت اتغدى اني وياه
ـــــــــــــــــــــ
ايمان /
شبيك صعب ما عاجبني هالايام عندك مشاكل بالشغل
صعب / لا ليش
ايمان / مادري تضرب صفنات صاير بعدين ماتغديت زين خاف الاكل ماعجبك
صعب / عاشت ايدج عمة وين اكو مثل طبخج
ايمان / الف عافية يمه
راح غسل ورجع كعد بالمطبخ أخذ موبايله يكلب بي
اندكت الباب راح فتحه دخلو صلاح وسما الي جانت كالبة الخلقة
سلمت على امها وراحت جوا
دخل صلاح وصعب / السلام عليكم شلونج عمه
نشفت ايديها / وعليكم السلام هلة بوليدي استريح
صلاح / لا مو صاحب كعده جبت سما اريدج تعقلينها
ايمان / اسم الله شكو بس لا زعلانه
راحت وكفت بالباب الداخلي وصاحت / ولج سمو إذا جاية زعلانة الطريق الاجيتي بي ترجعين بي
طلعت سما وابنها بحظنها عمره سنتين / ماما صدوك تحجين
ايمان / اي والله لأن ماعندي بنات يزعلن
صلاح / عمة عوفيها اني رايح
رجعت على صلاح / شنو شبيكم بعدين ليش ماتقبل تحجي صاير شي
التفت على صعب الي جان صافن عليهم ماحب يدخل نفسه
صعب / اني رايح اخذو راحتكم
كام صعب وصلاح سحبه من أيده / اكعد يرجال انت مو غريب بنت عمتك تريد بيت وحد كلتلها خل اجمع جم فلس لأن العندي ميكفن ونبقى أبيت اهلي ماشاء الله بيت جبير ومامضايقين ومن البارحه مطنكرة وقبل شوية لأن رزلتها زعلت والا توديني لبيت اهلي
ايمان / ايا عوبة ولج تعاي هنا اني مو كلتلج قبل جم يوم لاتحجين هو رجلج يدبر أموره شلون بيج
دخلت عليهم / ماما هسة كفرت اني اذا كلت اريد بيت وبعدين عنده فلوس ليش ميشتري
صلاح / ههه ديلة اليسمعها يكول اطشر بالفلوس شو سلف اسوي ودخل الصيدلية يلة يادوب جمعت جم فلس
ايمان / كافي سما اني ما اقبل على سالفتج لاتبقين تلغين ورجلج يبزع منج
سما / خلاص عيني لايبزع ولا يضوج اني باقية هنا
صلاح / خل اكوم لأن ماكو فايدة
ايمان / عوفها يمه اني اعرف شلون اتصرف
طلع صلاح وصعب التفت على سما / انتي صدك مابراسج عقل مدوخة الرجال وياج والله لو منه اكفخج واجعمج بغرفتج نسوان عوبات متعرف تتصرف
فكت حلكها على صعب ماكدرت ترد تخاف منه عافتهم وراحت للغرفة
ايمان / ديلة عود اكول عليها عاقلة
صعب / لاتنطيها مجال شفتي رجلها شلون ضايج
ايمان / هسة انوب ام معتصم تستلمه على تسمع كلام مرتك وبكيفكم تتصرفون يوو أشكال
صعب / هههه اي عمتي ام معتصم هم تلح
ايمان / اكوم احجي وياها
كامت عمته وهو بقى وحده بالمطبخ راح طلع نركيلته والفحم وكعد يعمر بيها كمل وكعد ينركل مامهتم لأي شي صافن بسوالفهم ومشاكلهم كل واحد عنده قصة شكل
ـــــــــــــــــــ
علا /
خفي ايدج ورانا خبز
لينا / يبوو والله دخت حتى الخبز نسيته
علا / ليش حبي دختي بس لا حامل
لينا ابتسمت / لا يمعودة معنى الحجي هههه
علا / صدوك لينا شلونه هالوكت وياج أشوفه مرتاح ودوم يوسف وياه يعني بعدما يفكر بغيرج
لينا بتفكير فعلا ايهم مرتاح حتى هي ومابينهم مشاكل الا سالفة يتقربلها وهاي كدر عليها قبل يومين حاولت تعترض وتشرد منه برا الغرفة بس كدر يسيطر عليها ، تنهدت
/ الحمدلله ولو مرات يطنكر يزعل بالغرفة بس نتفاهم واني احاول أكسبه الي
هلا / اي عفيه بيج خليج هيج حريصة
هاج قبغيها للجدرية وخليها عالطباخ
شلت جدر الدولمة وشعلت جواه وعلا لملمت الغراض وغسلتهن
راحت لينا تشعل التنور مخلينه ورى البيت حتى يخبزن
صاحت على عمتها الكاعدة بالكراج / عمه فدوة خلي بالج عالجهال راح نخبز
طلعت ورى البيت حظرت التنور وجبت العجين وكعدت اقطع شنك واذبهن بالصينية
اجت علا كامت تساعدني بالخبز
كملنا ورفعت ظهري .. يماااه والله تعبت اوي شكد خبزنا
علا / لعد شلون خوما يومية هذا مال ثلث تيام انظمه بالمجمده
لينا صاحت / خرررب نسينا الدولمة
طبيت للبيت اركض بس لا شاطت حرامات
لكيت عمتي منصية جواها وكاعدة عالقنفه بالمطبخ ..
ام حذيفه / يالفاهيات جدرج فاح ورجلج عالنسوان راح
لينا / هههه لا ميروح ميروح إن شاء الله فدوة عمة همزين اجيتي جان احتركت حرامات تعبنا بيها والله
دخلت علا شايلة صفطة الخبز وخلتها عالميز
علا / ولج ها بس لا احتركت الدولمة
لينا / ههههه لا الحمدلله عمة تلاحكتلها تعاي اسمعي شتكول علينا جدرج فاح ورجلج عالنسوان راح
علا / ههههه والله عمة عندج خوش امثال
ام حذيفه / تردين بعد ترى كلهن راهمات عليجن
لينا / ههههه تم القصف وبنجاح يله اروح اسبح قبل ما يجي ايهم
عفتها وطلعت لغرفتي ويوسف وراية يدردم مدري شيريد
اخذت ملابسي وفتت للحمام جلب بدشداشتي .. شبيك ماما
يوسف / اليد الوح بيت عمة
لينا / منو بيت منو
يوسف / بيت عمة الوح
لينا / هسة يجي بابا ويوديك
عرفته يقصد عمته رانيا لأن دوم يروحلهم متعلم
يوسف انزل ماما لاتبقى وحدك
دخلت اسبح وكملت بعدني مالابسة دشداشتي واسمع عيطه يوسف طلعت ماحس بروحي ..يممه وليدي شلون عاط عيطه مال واحد متأذي
ركضت دفعت الباب مال غرفتنا واني أصيح على يوسف رحت لغرفته والكاه مشمور بالكاع والوجه اصفر نومية
ماحس الا ايهم دفعني وشأله بحظنه يكلب بي
تلمست جسمه مثلج ... عزااا العزاني ابني راح يموت ايهم يوسف شبي
نتر بعصبية /؛ثوول وين عايفته إنتل بالكهرباء
تلفتت وضربت صدري وين اكو وين دحكت الشاحنه مالت الايباد مشمورة هي والايباد بالكاع
بقى ايهم يكلب بي ورجع كلبه على راسه شاله من رجليه ودندل راسه جوا ونكتته يريد يسوي اي شي حتى يوسف يصحى
شوي وردت بي الروح واني كعدت بالكاع حيل مابقى بية
تنهد ايهم وفك عينه علية / يالكعبة شوف شلابسة ولج انستري لا احد يجي لأن صوت صرخته زرفت اذني من دخلت البيت
لينا بالها كله يم ابنها / يارب الحمدلله والشكر يمه وليدي سودة علية فقدت من سمعته ما ادري بروحي طلعت بالأتك
استحيت من ايهم عينه علية مخنزر تلمست صدري مكشوف عزا بعيني بالله لو ملتمين حمويني وعمي واني هالشكل
كمت ورجلية خشبت كوة سحلتهن للحمام لبست دشداشتي ولفيت راسي بمنشفة من طلعت اسمع صوت بغرفتنا
عمو عبدالله وعمتي والجهال ملتمين على ايهم ويوسف بحظنه صافن حبيبي من الهبطه وجهه مصوفر
التفت عمو علية / يابنتي وين رحتي عنه لو ميت هالوليد جان شكلنا الحمدلله الف الحمدلله الله دحك على حاله
من سمعته واني الهبطه بعدها بية استهضمت وحسيت روحي مقصرة ويه ابني كعدت من الجهة الثانية للجرباية وبجيت عمتي كامت تحجي علية / يمه ليش تفاولين عالولد مابي الا العافية
من شافني يوسف ابجي هو هم بجى ويصبح اريد ماما كمت عليه وأخذته من ايهم الي حجى من شافني ابجي / لا تبجين كولشي مابي الحمدلله
شلته بحظني وكعدت بصف ايهم دنكت ابوسه واني ممصدكة الصار اسم الله لو ميت وليدي يمه سلام قول من رب رحيم
نزلو جوا وأيهم راح غير ملابسه ورجع حجى وية يوسف / ها بابا تتقرب على نقط الكهرباء بعد
يوسف / لا لا خاف خل ولي
ورفع إصبعه السبابة يشوفني شلون إنتل
اخذت إصبعه بوسته / حبيبي سودة علية
ايهم / يلة ننزل نتغدى لاتبقين تبجين خل ينزل يلعب وية الجهال حتى ينسى
لينا / اخذه وياك اني امشط شعري و اصلي الظهر وانزل
شاله أبوه ونزلوا واني رحت سرحت شعري وتعطرت وأخذت حجاب الصلاه لبسته وسجدت حمد وشكر لله لأن حفظلي وليدي
كملت صلاة ونزلت جوا ذبيت شال على راسي
لكيتهم مجموعين بالهول جاي يتغدون
من شافوني علا وحذيفة تحمدولي بسلامة يوسف
كعدت بصف عمتي شوي واجى صعب سلم وطلع لغرفته صاحت عمتي عليه حتى يتغدى
كاللها متغدي والجهال ماقصروا حجو لعمهم الصار ، بسرعة اجى دنك شال يوسف ويبوس بي ورجع التفت علية
صعب / لينا عينج على ابنج ليش هيج بالله لو صاير شي اسوء من الصار لا سامح الله
سكتت ماحجيت نزلت راسي عمتي كالتله الحمدلله بالريش ، عافنا وراح لغرفته بعدما نزل يوسف اللي اجى كعد بحظني
ـــــــــــــــــــ
ام عقيل /
يبنت اقلها يجيج بزر يونسج ليش تبقين عوبة
نرجس / خالة ما اكدر اطلع بدون علمه ومن خابرته كال لاتروحين هسة اني كايلج على جهال
ام عقيل / مايدير بال عبن عنده وليدات انتي روحي الطبيبة ولج هنا براس الشارع مو بعيده
نرجس / لا خالة معتصم ميفكر هيج يكول ماريدج تنقهربن إذا الله قاسملج خلفة يرزقج
ام عقيل / چا شنهي هو الرزق بيد الله چا بيدمن بس هم الوحدة تراجع وتفحص
نرجس / الله كريم
ام عقيل / كيفج أنه علمودج يلة افوت لبيتي ما تجين تتغدين يمنا خوش مطبك سمج مسوية
نرجس /؛ههههه بالعافية اكول خالة ماتملون من السمج
ام عقيل / لا ولج شلون انمله افيش چني كاعدة بالهور واصيد واشوي
نرجس / تحنين لحد هسة
ام عقيل / بالعباس لما الوليدات راهمين بغداد لا ارجع للجبايش ترى كل ربعنه غاد
نرجس / اتذكر بابا يكول ابو عقيل جنوبي اصيل الله يرحمه
ام عقيل / ايي الله يرحمه برحمته جان يحن لديرتنا بس شغله هان ماجان يكدر يعوفه
نرجس خالة انتي اول زواج هنا
ام عقيل / اي تزوجنا واجينا شذكرتيني ينرجس صار سنين بالخمسة وعشرين سنه
نرجس / حيل كولش هواي زين لعد البنات عمرهم صغير
ام عقيل / ماخلفت اول بقيت جم سنه عاد الله رزقني سمرة وروعة وانوب أخيهم الحمدلله
خل اكوم انتي تلهيني هسة الكى جدر المطبك محترك ولو هدرت جوا
راحت ام عقيل واني بقيت وحدي حتى مالي نفس اكل جنت مسوية محشي شجر صبيت بالماعون وديته لبيت ام عقيل يحبون طبخي دوم اذكرهم من اطبخ
جانو توهم بادين بالغدة وريحة المطبك شلون تشهي خليت الماعون عالسفرة وكلها تصيح تعاي تغدي ههه سوولي واهس والله كعدت بصف سمرة البنت الجبيرة عمرها قريب ال18 تدرس سادس علمي ماشاء الله كولش شاطرة واختها 16سنه صف خامس
بقيت يمهم شربت جاي وسلمت وطلعت لبيتي
من دخلت لكيت الموبايل يدك فتحت خط معتصم عصبي ..
معتصم / وين جنتي عشر مرات اتصل عليج
نرجس / حبيبي والله يم خالة ام عقيل عزمتني اتغدى يمها
تنهد وصوته هدى / عافيات بس جان اخذتي موبايلج حتى اطمن ادك وماكو گلبي نغزني عليج
نرجس بحب / فدوة اروحلك حبيبي
معتصم / هالاسبوع ماراح امرلج نازل لديالى كلت اتصل عليج
نرجس بإحباط / ياه يعني مراح اشوفك جم يوم
معتصم / احاول امرلج حبيبتي
نرجس / فدوة معتصم لاتكطع بية تدري وحيدة بدونك
جر حسرة وذبها / شلون اكطع بيج نرجسة ماريدج تحجين هيج بعد للموت ما اتخلى عنج
نرجس / يمممه اسم الله عليك
معتصم / يلة گلبي ، مشغول بالمكتب فيمالله
نرجس / الله يحفظك حبيبي
سديته واني روحي لايبة عليه
ـــــــــــــــــ
رانيا /
كاعدين يمنا بيت عمة ام غزوان وعمة ايمان جانت سما متعاركه هي وصلاح وعمو صالح كام يقشمر على سما لأن زعلانه وية رجلها
عمة ام غزوان حجت وية عمو صالح ابن حماها محامي يريد يتقدم لصفا شو هاي من سمعت نطت لعمتي متريد تتزوج جان عمة ام معتصم ترزلها وخلتها تكوم
دخل صعب علينا وجهه مغيم ميتفسر وراه مصطفى حماية الوسطاني وابوية اني رأسا گلبي نغزني
بقيت فاكه عيني على صعب اخوية حظن عمي وهو يكول / عمي خابروني جماعة معتصم طاكه عليه عبوة وبالمستشفى
هسة ....
شكرا لزيارتكم عالم روايات سكيرهوم
