رواية ازهار والوحش الفصل العاشر بقلم جمانه السعيدي
ازهار... بعدها باربع ايام كريم دز خبر اليوم اجي اخذ ازهار العصر لان بيتها كمل
لميت غراضي وملابسنا وسبحت الجهال وغيرت ملابسهم
الساعه بلاربعه العصر اندكت الباب
طلع اسعد اسعد جان منتضره ماطلع للشغل
رحب بي وكاله تفضل
كريم...اذا ازهار هي والجهال جاهزه خل تطلع
اسعد..مايصير ادخل
بعدهم يسولفون واني ونور طلعنا ملابسنا والغراض
هيج شغلات بسيطه
بس الملابس هواي اربع جنط مليانه ملابس
شال اسعد اول جنطه طلعها دخل كريم شافني اطلع بلجنط
كريم... شلونج
ازهار...الحمد لله
كريم...عوفي الجنط اني اطلعهن
بدا يطلع بلجنط واني احضر بجهالي
طبعا اني نفس وضعي ملابس اسود ولا حفافه ولا مكياج
ولا كلشي عبالك رايحه دفانه
قسوة الناس الي عايشه وياهم حولتني إلى انسانه
تعبانه ومالي واهس باي شي بهاي الدنيا
اصلا هذا الزواج انفرض عليه فرض
صعدت الجهال للسياره
لزمني اسعد من ايدي
اسعد...صيري حبابه وحافضي على بيتج
ازهار...نزلن دموعي مسحتهم وصعدت بلسياره
كعدت اني والجهال ورا محد قبل يكعد بصف الوحش
مشت السياره وكلنا ساكتين عبالك رايحين بجنازه
طول الطريق اكول معقوله هذا الوحش من بعد وسام
ولله شكله يخوف شلون راح اكدر اعيش ويااا
ليش الدنيا ضالمه وياي لو باقي وسام ابد ماصار هذا حالي
مثل ام البزازين وين ماتحس بلخطر تاخذ أطفالها وتنهزم بيهم
شسوي هذا الي اكدر علي
بلاخير اني مره وحيده لا حول ولا قوه
كل هذا الضيم واني ستوني دخلت ٢٦ سنه
وبعد ماادري الوكت شضاملي
على العموم اني كلشي مااريد بس احافظ على جهالي
وواصلهم البر الأمان وباقي الاشياء كلها تهون
وكفت السياره طبعا اني جنت بغير عالم حتى ما انتبهت للطريق
نزل كريم طلع مفتاح وفتح الباب
البيت حلو كلش مرتب من برا حتى البناء جديد
فتح كريم الباب وبدا ينزل الجنط
نزلت اني وجهالي
كريم.. تفضلو هذا بيتكم
دخلت جوه البيت كلش حلو حديقه زغير وصحيات برا
دخلت من باب المطبخ
المطبخ مرتب كاونتر بيج وطباخ جبير وثلاجه ومجمده
وميز طعام اربع كراسي بلاستك بس جديد
دخلنا للهول ديوان على جه وبي بلازمه
كريم...دخلت الملابس راح اجيب عشى واجي
هو طلع الجهال كامو يركضون بلبيت فرحانيين
اكو غرفتين جوه ووحده بيها غرفة نوم كامله بس موديلها شويه قديم بس نضيفه مو تعبانه
والغرفه الثانيه بيها سرير نفر وكنتور خانتين
الصاله كلش مرتبه طخم وبلازمه
البرده ملكيه وفراش الكاع حلو
صعدو الجهال فوك صعدت وراهم
فوك اكو غرفتين وحده بيها سريرين ابو النفر وكنتور ٣ باب
والغرفه الثانيه فارغه جمانه السعيدي
نزلنا جوه البيت حلو الجهال يلبعون ويضحكون
كلت مادام جهالي ارتاحو للمكان
خلاص اني مستعده اتنازل عن كلشي بس يبقون يضحون هيج وفرحانين
بمكان ماجانو كل الوقت يبجون وكل الي يجي يضربهم
بس ولله حقيقتا نفسي ماتكدر تتقبل هذا الوحش
مااعرف شراح يصير بيه
رجع كريم جايب عشى جاهز قبل اذان المغرب بخمس دقايق
خلا الاكل على الكاونتر
الجهال يلعبون ويركضون منا ومنا
كريم...ممكن نحجي اني وياج
ازهار...اي ممكن طبعا اني بعدني بنفس ملابسي حتى الحجاب مانزعته
رداء اسود وحجاب اسود
كعدنا بلهول اني كعدت ودنكت
كريم....اني طلبتج للزواج حتى اساعدج تخلصين
من الوضع التعبان الي جنتي عايشه بي
اسعد حجالي عنج
حبيت اساعدج ماخطر على بالي غير هاي الفكره
اطلب ايدج للزواج
اعرف انتي ما مامتقبلتني عيونج يحجن هيج
بس اني اعتبر هذا عمل انساني في سبيل الله
حبيت اساعدج هذا البيت اللج انتي وجهالج
واني انشاء الله مراح اقصر وياكم
كل كم يوم امر عليكم واجيبلك مسواك واذا احتاجيتي شي اتصلي عليه
اي شي راح تلكيني بدقائق هنا
بس اني اريد هاي الغرفه من البيت كله
الغرفه الي بيها سرير واحد من احتاج اجي هنا هاي الغرفه اليه
اني مراح أقرب عليج ابد
عيشي براحتج هذا بيتج انتي وجهالج
جيبي تليفونج اكتب رقمي إذا احتاجيتي شي
اني جاي احاول اقدم عمل انساني مو اكثر
ابد مو قصدي الزواج بمعنى الزواج
هذا رقمي كتبته تعشي انتي والجهال ونامو
باجر ادزلكم مسواك
وهذاومصرف للجهال
ازهار...طلع ١٠٠ الف خلاها على الميز وطلع
اني بقيت بمكاني عبالك حايط لا حس ولا نفس
ولا حجيت كلمه وحده
ولا حتى كتله تتعشى ويانه
الصراحه كنت مصدومه معقوله هذا الشكل المخيف
شايل هيج كلب
معقوله بيت اليه والجهال وقدملي ومهر وتكفل بينا عمل انساني
وين اكو واحد يسوي عمل انساني بهذا الوكت
هلكد ماشفت ناس ضالمه مجاي اصدك اكو واحد يتصرف هيج تصرف بدون مقابل
معقوله هذا الوحش ارحم من اخوتي عليه
لا مجاي اصدك وين اكو هيج كلب بهاي الدنيا
اهلي وأهل زوجي يتخلون عني والغريب يفتح بيته اليه
ولله ماادري كلشي جائز بهذا الوكت
اجيت فتحت العلاليك. كباب شوي وزلاطه ومقبلات
خليتها على الميز وصحت على الجهال
اجو يركضون بس شافو الاكل كامو يكمزون فرحانيين
كعدو ياكلون واني عزلت باقي المسواك
اجبان وقشطه ومربى علاكه خبز وعلاكه صمون
فواكه ٣ انواع
موز وتفاح وبرتقال علاكه حلويات للجهال
ياربي الف الحمد لله والشكر الناس اتسد باب ورب العالمين يفتح الف باب
معقوله هذا الخير كله اليه اني وجهالي
ياكرمك يارب العباد جمانه السعيدي
نزعت الرداء والحجاب وكعدت اكل وياهم
من خلصت شغلت البلازمه كعدو يتفرجون افلام كارتون
واني نضفت المطبخ ودخلت سبحت
صعدت ملابس البنات فوك بغرفتهن
وملابسي اني وعلوش بلغرفه الجوه بس غرفة الوحش ماقربت عليها
نمنا كلنا بلغرفه الجوه بعدهن البنات مامتعودات
ينامن وحدهن
ثاني يوم اندكت الباب رن التليفون
انطيت التليفون النور لان الوحش جاي يتصل علينا
نور...الوووعمو
الوحش...تعالو دخلو المسواك
نور...اي عمو
طلعت نور وسراب دخلن المسواك
مخضر ولحم ودجاج
قسمته حسب حاجتنا كل يوم
بعد اربع ايام من سكنا بهذا البيت
رن تليفوني باوعت الوحش يتصل
انطيت التليفون النور ترد علي
نور...الووو عمو
الوحش...هلو نور شلونج
نور... زينه
الوحش...اليوم اجي للبيت انطي خبر الامج
نور...اي عمو هله بيك
جمانه السعيدي
ازهار.... نضفت غرفته وعطرتها ..الساعه ثنتين الضهر اندكت الباب اني عرفته هو
لان محد يجينا غيره
اخواني ماصدكو يخلصون مني حتى مكالمه محد اتصل يطمن عليه
لبست دشداشه سوده طويله وحجاب
دك باب المطبخ قبل لا يدخل
ازهار. تفضل
دخل سلم عليه
كريم....شلونكم
ازهار...الحمد لله
كريم...الجهال شلونهم خو ما محتاجين شي
ازهار.. تسلم كلشي ما ناقصنا
بس عندي طلب
طبعا هو واكف بنص الهول واني باب غرفتي
كريم...اي كولي
ازهار...مدرسة نور بعيده ذيج يم اهلي اريد اشوف اكو مدرسه قريبه انقلها هنا
كريم...بسيطه باجر الصبح اني اشوف منو أقرب مدرسه
هنا واجيبلها نقل سهله
بعد عندج شي ثاني
ازهار...تسلم الله يحفظك
دخل للغرفه قفل الباب علي شويه وسمعنا صوت الشخير
مو صوت ضيم لو بلمعركه العدو يشرد
بناتي قربن على باب الغرفه ويضحكن
وعلوش خله اذنه على الباب اول شي ضحك
وبعدين كام يقلد كريم
يمد شفايفه ليكدام ويسوي اخ اخ اخ اخ اخ
عود يشخر مثله
ازهار...عيب تعالو حتى عمو ينام
العصر تقريبا الساعه بلاربعه طلع من الغرفه
ازهار...نور روحي كولي عمو تريد اكل جاي
نور.. عمو جوعان تريد اكل
طبعا هو بلمطبخ يغسل وجها
كريم...لا عمو شكرا
نور...جاي
كريم...لا مااريد شي روحي اسئلي امج اذا محتاجه شي
اجت نور ماما محتاجه شي
ازهار...لاكلشي عدنا بس كوليله عمو مو تنسا موضوع مدرستي
نور....عمو مايحتاجون شي بس مو تنسى موضوع مدرستي
كريم...لا ماانسى تدللين
طلع وطبك الباب
ازهار...لا مومعقول يمكن اني جاي احلم
هذا انسان عادي حاله حال البشر الي اعرفهم الي يشوف شكله مايتوقع هاي اطباعه
ثاني يوم اتصل عليه
انطيت التليفون النور
نور...هااا عمو
كريم...هلو نور عمو خل احجي وياا امج
ازهار....الووو
كريم...صباح الخير
ازهار...صباح الخير
كريم...جبت كتاب نقل نور من مدرستها بلكوه يله قبلو
النقل باجر اول يوم اداوم بلمدرسه الجديده
ازهار...وين هاي المدرسه اني مااندل هنا
كريم...اني الصبح اجي اوصلها للمدرسه واني ارجعها علما اشوف خط يوصلها كل يوم
ازهار...الف رحمه على والديك شكرا
كريم...الشكر لله مع السلامه
فعلا ثاني يوم كعدت الصبح كعدت نور غسلتلها وبدلتلها
رن تليفوني
ازهار...صباح الخير
كريم...صباح النور خل تطلع نور اوصلها للمدرسه
طلعت نور
اني بقيت فاتحه الباب فتحه زغيره واباوع عليهم
دنك عليها باسها من راسها وفتح باب السياره صعدها
بصفه وشغل السياره وطلع
الحمد لله والشكر كون هذا الحال يدوم
هلكد ماشفت ناس حقيره بحياتي مامصدكه الي جاي يسوي كريم ويا جهالي
نضفت البت وطبخت غده زين كلت بس يجي كريم
لازم يدخل ياكل ويانه
وصل نور وبقى واكف لمن دخلت
ازهار...روحي كوليله عمو تعال اتغده
نور...عمو تعال اتغدا تكول ماما
كريم...شكرا غير مره
ماقبل يدخل كعدنا نتغدا اني وجهالي نمنا شويه
وكعدت اقري نور
رن التليفون بليل طبعا محد يتصل علينا غير كريم
اخواني عبالك ماتو لاحس ولا نفس
بس ميخالف رب العالمين عوضنا احسن تعويض
ازهار...الووو
كريم....هلو ام نور شلونج
ازهار...الحمد لله
كريم...اكو روضه بصف مدرسة نور شنو رائيج نسجل سراب بيها اليوم سئلت عنها كالو حتى تعليم أحرف بيها
تروح هي ونور ويرجعن سوا
ازهار...اي ولله ياريت
كريم....اكو خط مدرسه يجي بشارعكم باجر احجي ويا السايق اذا عنده مكان ياخذهن ويااا
واذا ماعنده مكان اشوف سايق باخذها ويرجعهن
ازهار.... ولله مااعرف شلون اجازيك
كريم....ماسويت شي الله يسهل انشاء الله
ازهار...الف رحمه على والديك
شكرا لزيارتكم عالم روايات سكيرهوم
