رواية ازهار والوحش الفصل الحادي عشر بقلم جمانه السعيدي
ازهار...فعلا كريم اخذ سراب وسجلها بلروضه
وأكد على الخط يجي ياخذهن ثنيينهن للدوام
كل اربع اوخمس ايام يجي للبيت
الضهر ينام ساعتين ويرجع يطلع اما بلنسبه للمسواك
كل اربع ايام يجببلنا مسواك
اذا راد يجي للبيت يتصل بلتليفون يكول اني جاي
اني راسا البس ملابس طويله وحجاب
يدخل كبل للغرفه ينام
بدينا نتعود على وجوده بحياتنا
كل الأشياء الي نحتاجها اصير سهله اذا هو ادخل بيها
مره فاجئني الساعه عشره نص متصله علي مديرة نور
لان هو مسجل رقمه يم المديره ولي أمر نور وسام
نورواكعه بلمدرسه ورجلها ملتويه
المديره متصله علي راسا رايح للمدرسه وماخذ نور للمستشفى معالج رجلها وجابها للبيت
كريم....الووو ازهار افتحي الباب رجعنا اني ونور
ازهار.. نور ليش بيها شي
كريم...لا مابيها شي رجلها التوت
ازهار...لبست ثوب طويل وحجاب وفتحت الباب شايل نور دخلها جوه
ازهار...شبيها رجلها انكسرت
كريم...لا ماببها شي مجرد فصخ لا تخافين عليها
اني راح اجيب سراب واجي قبل لا ينتهي دوامها
خاف ماتلكه نور وتخاف
ازهار...تعبناك ويانه
كريم...لا ماكو اي تعب
طلع كريم راح جاب سراب واتصل على سايق الخط
بلغه البنات بلبيت
كريم...اروح اني اذا تحتاجين شي اتصلو عليه
ازهار...ابقى اتغده ويانه
كريم...لا عفت شغلي غير يوم انشاء الله
بليل اجا يطمن على نور وجاب حلويات للجهال
كعد شويه وراح
بدا علاوي يتحرش بي كلما يجينا يركض ويحضنه بلباب
كريم فرحان بي
علاوي لان محبوس بلبيت مايطلع من يجي كريم يلزكله
يبقى يبجي اخذني وياك بلسياره
بدا كريم من يجي يجيبله وياا لعب مره طوبه مره سياره
وكام يلعب هو ويااا
علوش مامصدك بس يضحك اباوع الكريم عبالك طفل زغير يلعب وياا
ماعرف ليش احسه طاير بجهالي
بمكان ماكان كريم يجي ساعتين ويلطع كام يجي وكت اكثر بس حتى يلعب ويا الجهال
نور...عمو اني نحجت
كريم...عفيه عفيه نور انتي لازم تصيرين دكتوره
سراب...اني هم نجحت
كريم انتي لازم تصيرين مهندسه
سراب..اني اريد اصير معلمه
كريم...يله ولا يهمج معلمه
نور...عمو صديقتي ابوها اخذها للمطعم وجابلها كيكه احتفلوا بنجاحها
كريم...تردين نروح للمطعم
نور...اي وجيبلي كيكه عليها اسمي
سراب...اني هم اريد كيكه عليها اسمي
علاوي...اني اني جمانه السعيدي
كريم...صار من عيوني انت هم تريد
هذا الحجي علاوي كاعد بحضنه من يدخل لمن يطلع علاوي مايقبل يعوفه حتلو يروح للتواليت يبقى واكف بلباب
جمانه السعيدي
كريم...باجر حضرو نفسكم واني اجي اخذكم
ازهار...لاتشغل بالك بيهم طلباتهم ماتخلص
كريم. .خليهم يطلبون اصلا اني حياتي تغيرت من كمت اجي العب وياهم
احب الوقت الي اخلصه وياهم
حياتي بعد ماجانت مابيها طعم صارت حلوه بيهم
اذا هذا الشي مايزعجج لان جاي اقتحم خصوصيتكم
ازهار...بلعكس هما يحبونك وينتضرونك يمتى ترجع
لان اني مااخليهم يطلعون برا
ثاني يوم اتصل علينا كريم
كريم......جهزو نفسكم اني جاي حتى نطلع
بدلت للجهال طلعو وكفو بلباب ينتضرونه
سمعت صوت السياره
طلعت حتى اوصي عليهم
ازهار...هله كريم عفيه دير بالك عليهم
باوع عليه وكال ليش ماتجين ويانه
ازهار...لا اني شعندي طالعه هم اخذهم حتى يتونسون
نور ماما ديري بالج على اخوج
دنك حجا وياا نور ورجع دنك على سراب مااعرف شكال
راسا اجن يركضن
نور وسراب...يله ماما الله عليج تعاي ويانه مانروح اذا ما تجين
ازهار...لا اني مااروح
سراب...مااروح اله تجين
كريم...يله تعاي ويانه بس هلمره
ازهار.. انحرجت من الحاحهم دخلت لبست صايه سوده
وحجاب اسود خليت معطر وطلعت
لكيتهم صاعدين بلسياره وينتضروني علاوي كاعد بحضن كريم يريد يسوق
البنات كاعدات ليكدام فتحت الباب ودخلت بلسياره
وصلنا للمطعم هو حاجز قبل يوم
بس كعدنا جابو ٣ كيكات ازغار كل كيكه مكتوب عليها اسم
وحده مكتوب عليها نور ووحده مكتوب عليها سراب ووحده علاوي
علاوي انزله اكعده بلكرسي ويرجع يكعد بحضن كريم
كريم.. عوفي
ازهار...ثكيل عليك كافي اجا كل الطريق بحضنك
هذا كرسي ويكعد علي
كريم...عوفي اني احب اشم عطره احبه قريب عليه
كل واحد قطع كيكته وبداوم ياكلون والعصير والببسي
كدامهم كريم يوكل بعلاوي
ازهار...هااا خلصتو
سراب...اني اريد اخذ كيكتي وياي
كريم...من رخصتك اجا العامل
كريم...كل واحد خلي كيكته بعلبه يردون ياخذوهن وياهم
فعلا العامل جاب علب وخلا كل كيكه بعلبه والعصاير خلاها بعلاكه
جمانه السعيدي
كريم...بعد تردون شي
نور...بعد تأخذنا المدينة الالعاب
ازهار....خنزت عليها كافي عيب الرجال زين ويانه خوما نستغله
كريم....اي بسيطه هذا المول قريب وبي العاب
شلنا علاليكنا ورحنا
ازهار...ماما نور عيب مو هيج شنو هاي الشروط كيك والعاب
نور...غير نجحت
ازهار...على اساس اخذتي الدكتوراه هو أول ابتدائي
وصلنا اني كعدت على صفحه
وكريم اخذهم يلعبون
ازهار..كمت احجي ويا نفسي صار هواي ماكاتبه رساله الوسام لازم اكله كريم طلع انسان طيب
ويحب الجهال عكس ما توقعت رب العالمين دزه النا
حتى يرحمنا من ضلم الأهل والاقارب
الغريب مرات يكون احن من الكرايب
خلصو العاب ورجعنا للبيت علاوي نام هلكد ما تعب
من اللعب
وصلنا كريم للبيت وراح
دخلنا غسلنا ونمنا
ازهار...طلعت تليفوني كتبت رساله الوسام
وسام كريم طلع خوش ادمي وبكلبه رحمه اكثر من اهلي واهلك اني متأكده انت دعيتلنا يم رب العالمين
انت شهيد ومنزلتك عاليه يم رب العباد
اكيد رب العالمين استجاب الدعائك ودزلنا كريم
جنت خايفه من شكله بس هسه اشوفه حلو لان جاي اشوف طيبة كلبه عليه وعلى جهالي
الحمد لله دائما وابدا
جمانه السعيدي
بيوم الي مايجي كريم للبيت الجهال يتصلون علي ويبقون يسولفون علي
مرات اكول شكد اله خلك اني امهم مجاي اتحمل لغوتهم
بس هو عادي يفتح الحاكيه يشتغل ويسولف عليهم
واذا اجا اتصال شغل يرد على الاتصال ويرجع يتصل عليهم
جاب جيس ملاكمه زغير العلاوي
علكه بلدرج من يجي يلبس علاوي الجفوف ويلزم
الجيس ويخلي علاوي يضربه
يكول اريده يطلع قوي عنده عضلات
وهذا مكيف النهار كله يتلاكم وياا الجيس
حتى اني وخواتي كل شويه جاينه بوكس شكل
فرحان بروحه عود قوي
فات سنه على هاي الزواجه واحنا مثل مااحنا
اني لابسه اسود وهو ابد مايقرب عليه بس حاير بجهالي
الحد ما تعلقو بي
اذا مايجي يبقون يتصلون علي يمتى تجي
فات اسبوع وهو ماجاي بس يدزلنا مسواك ومصرف
نور...الووو عمو ليش ماتجي ولله اشتاقينالك
كريم...اجي قريبا اني الي اشتاقيت الكم
انطيني امج احجي وياها
كريم...هلو ام نور شلونج
ازهار...هلو كريم الحمد لله انت شلونك الجهال يسئلون عليك خير خوماكو شي
كريم...اي صاير شي اخو زوجتي الوسطاني
صار فتره يعدل بيته وبنا طابق ثاني زوجته والجهال بيت اهلها صار شهرين من رجعت للبيت
خطيه قبل اسبوع وكعت زوجته طلع بيها مرض خبيث
بلدم منتشر وهي ما تعرف
زينه راحت كعدت ويا جهالهم لان اخوها وزوجته وامها
يفترون بلمستشفيات
ازهار...سلامتها الف سلامه
كريم.. الله يسلمج لان زينه راحت كعدت بيت اخوها يم الجهال امي بقت بلببت وحدها
مااكدر اعوفها واجيكم امي عدها سكر وضغط وتعبانه
قبل زينه يمها من اجيكم مطمن
بس هسه وحدها مااكدر اعوفها
ازهار...الله يشافيها ويشافي كل مريض
كريم...كلبي راح يطك على علاوي بلكت يصير عندي وقت وأمر اشوفه
ازهار... علاوي كلما يسمع صوت سياره بلباب يطلع يركض
عباله انت
كريم...اليوم باكت افرغ امر اشوفه حتلو شويه
ازهار...إنشاء الله
العصر اندكت الباب طبعا احنا محد يدك بابنا
ونعرف دكت كريم
الجهال طلعو يركضون للباب
فتحو وكامو يعيطون عمو اجا عمو اجا عمو
دنك عليهم وشالهم كلهم مره وحده اتلاثتهم شايلهم ويبوس بيهم
علاوي حاضنه من ركبته
مااعرف ليش اذكرت اخوي امجد من يزمخ على علاوي وخلا يبجي ويناشغ وما كسر خاطره
بيوم حبسوني بلغرفه
وهسه كريم حاضنه ويبوس بي فعلا الناس مو بلشكل
الناس بلفعل
اخوي ابيض وحلو بس عمله قبيح
وكريم الناس مسميته الوحش وشكله يخوف
بس كلبه ماكو منه بلدنيا كلها
انتبه كريم اني اباوع علي
نزلهم وكالي شلونج ام نور
ازهار.. تسلم الحمد لله
كريم...محتاجين شي لان مااكدر اتاخر
ازهار....مادام انت موجود كلشي مانحتاج بس سلامتك
كريم...الله يسلمج
شكرا لزيارتكم عالم روايات سكيرهوم
