رواية بنت الكهوجي الفصل العاشر بقلم احمد
ياقوت : حسيت انو مو حاب يحجي للشيخ عني وماعرف شنو سبب كل هالغموض وليش حريص لهالدرجة ان محد يعرف عني شي
بالعكس اذا يحجيلهم احسن يجوز اذا الشيخ عندو بنات يصيرن صديقاتي ويجن علي او اروح عليهن بدال ما ابقى لحالي دائما
وما اعتقد لمعتصم علاقة بالموضوع لان من البداية بابا اخفاني عنهم بس الا ما يجي يوم ويبين سبب تصرفات بابا هاي
من بعد ذاك اليوم ما رجعت فتحت ويا بابا الموضوع عفتو على راحتو گلت اكيد دا يسوي هيج لمصلحتي ومن يشوف الوقت مناسب يحجي للشيخ
مرت الايام بدون احداث تذكر بعد رمضان ب 15 يوم استلم بابا اول راتب الو وخطية جان كلش فرحان بيه لان من صدگ جنا بحاجتو
اول شي سواه تسوگ للبيت مسواگ كامل وهالمرة ضم الباقي علمود يصرف منو وقت الحاجة وما جان عندنا مصرف زايد مثل ذيج المرة
بعد ما استلم بابا الراتب ورتبنا وضعنا خصصنا اسبوع لصيام شوال بلشنا بيه يوم السبت وخلصناه يوم الخميس
ومثل رمضان جنت اگضي اغلب وقتي بقراءة القران وبابا جان يقرا بين صلاة الضهر والعصر لان رجع شغلو بالنهار وبهذا الوقت ماعندو شي
معتصم من خلال كلام بابا مدا يعوف بابا بحالو بس يحاول ما يبين لبابا واهلو هالشي بس بابا يعرف طبعو كلش زين
وصلت بيه الحالة انو مرة من المرات حاط ويا الگهوة ملح بدون ما يدري بابا وبذاك اليوم صايرة عندهم گعدة يعني يريد يفشل بابا گدام الناس
بس لان بابا بريئ والله يريد يحميه من مخططات معتصم جانت قوانين الگهوة تختلف عن الجاي ومو كل واحد يصبولو ستكانة
جان لازم اول واحد يشرب من الگهوة هو صاحبها (الشيخ) علمود يتأكد انها مضبوطة ومو باردة فمن شرب منها الشيخ عرف بيها ملح
گال لابوي خليها تحمى بعد شوية وما حجى گدام العالم ورجع بابا يحميها بس جان مستغرب لان ما عافها من استوت فورا قدمها الو
اشر الشيخ لواحد من ولد اخوانو وخلاه يوصي بابا يغير الگهوة بسرعة وبابا عالسريع فتح جيس جديد من الگهوة وسوا بيه مرة ثانية
بذاك اليوم الشيخ حجى على ولدو الا انگطع نفسو لان عبالو واحد من الجهال سواها وماكو دليل على ان معتصم او احد جبير سواها
بابا جان يعرف معتصم سواها بس ما حجى للشيخ لان ما يريد الشيخ يحط نظرة على ابوي انو يتهم معتصم بدون دليل
والسبب الي خلى بابا يعرف ان معتصم سواها لان ماكو غيرو يسويها وبنفس الوقت الملح مخبوط ويا الگهوة بحيث مو مبين نهائيا
والجهال من يحاولون يتخبثون ما يخبطونو مجرد يحطون الملح وينهزمون ومن بعد ذاك اليوم ما تكرر الموقف ولله الحمد
مرت الايام وصرت فوگ حزني احس نفسي سجينة لا تلفزيون لا احد يجيني لا اروح لاحد فعليا تعقدت من وضعي بس ما بيدي شي اسويه
حتى من اجى وقت الدراسة بابا غلس عالموضوع واني ما حبيت ازعجو وعفت الموضوع ومن اجى عيد الاضحى جان مثل عيد رمضان بالضبط
مجرد ان الشيخ هالمرة ذبح اضحية ودز حصتنا ويا بابا (جان حاسبها لبابا وحدو) ونفس رمضان هم بابا گضى 3 ايام ياكل ويشرب هناك
مرة من المرات جنت گاعدة بالبيت وصرت اسمع اصوات سيارات وناس كلش عالية جاية من اتجاه المضيف وفورا انقبض گلبي
رحت ركض للحوش ماكو مكان اباوع منو رجعت لفيت راسي بشال واخذت دبية حطيتها بالگاع وصعدت فوگها وطلعت بس عيوني
جانن واگفات سيارات عند مضيف الشيخ ومتجمعين هواي زلم بس بابا مو مبين وتطمنت لان بعدو بالمضيف
انتبهت ان اجن سيارات مليانة ناس مسلحين باتجاه المضيف والي جانو واگفين عند المضيف كلهم دخلو بس بقى الشيخ وكم واحد من ولدو
الولد جانو شايلين اسلحة وواگفين ورا ابوهم من وصلن السيارات نزلو منهن المسلحين ووجهو اسلحتهم باتجاه الشيخ وولدو
جان واحد من المسلحين والشيخ يحجون بس لان بعيدين ما اسمعهم بس بقيت اراقب الوضع وخايفة خوف ما صاير على بابا
ماكو ثواني وبلمح البصر زلم العشيرة وشبابها حاوطو المسلحين وموجهين اسلحتهم علبهم وبعدها انجبرو المسلحين يروحون
من راحو شوية راح الخوف مني بس ما اتطمن لحد ما يرجع بابا رجعت دخلت داخل وورا تقريبا نص ساعة اجى بابا ورحت ركض عليه
ياقوت : شكو بابا شنو صاير
ادم : ماكو شي بوية مشكلة بين عشيرتين والشيخ راح يكون طرف صلح بينهم
- لعد شنو هالمسلحين
- بالليل افهمج اجيت علمود اگلج تغدي ولا تنتظريني راح اتغدا هناك واهتمي بنفسج احتمال حتى العشى اتعشى هناك
- من عيوني
- يسلملي عيونج
- الله يسلمك
راح والحمدلله اجى علمود يطمني وبيومها مثل ما گال تأخر هواي وما رجع للبيت لحد ما دگت الساعة 10 بالليل واجى كلش تعبان
سألتو عالعشى گال متعشي وشبعان ما اريد بس گلاص ماي ورحت ركض جبتلو ماي وگعدت گدامو گلتلو احجيلي شصار
ادم : اكو ثنين شباب صايرة بينهم مشكلة جبيرة ومتعاركين علمودها وواصل بيهم لدرجة واحد ضارب الثاني بحديدة على راسو وكاتلو
ومن شايفو ميت دز رسالة لاهلو علمود ينهزمون وهو اختفى حتى الشرطة ما گدرت تعرف وينو لحد الان واهلو وعمامو اجو على الشيخ يدخلون يمو
ولان جانو 3 بيوت بس هنا فجانو خايفين انو اهل المقتول يكتلونهم كلهم لهذا انجبرو يجون عالشيخ وبين ما هم واگفين اجو اهل المقتول
الشيخ وولدو بقو خارج المضيف علمود الشيخ يحجي ويا العشيرة الثانية ويحاول يهدي الوضع بين ما يجون زلم عشيرتو
من وصلو العشيرة الثانية نزلو المسلحين وجان اكو واحد بيهم اخو الشاب الي مقتول جان واگف يحجي ويا الشيخ
الشاب : وينهم الي كتلو اخوي
الشيخ : اهدى ابني الامور ما تنحل هيج
- شيخنا شلون اهدى بس فهمني اخوي مكتول وتريدني اهدى اخوي انهدر دمو وتريدني اهدى
- اخوك ما انهدر دمو كل الي اريدو منك تعتبرني اخوك او ابوك الي يعجبك وتحاول تهدى علمود ناخذ حق اخوك بدون مشاكل
الناس دخلو يمي وانت ابن شيوخ وتعرف ان الدخيل ما ينعطي لو تفني العشيرة كلها عن بكرة ابيها لذلك اهدى وخلينا نحلها
- يا شيخ اريدك تنطيني كلمة انك تصير طرف صلح وما تتهاون بحق اخوي
- إن شاء الله اوگف ويا الحق بس هسا اهدى وتفضلو انت والشباب الي وياك اشربو گهوة يمي
- تسلم شيخ احنا راجعين لبيوتنا والنا گعدة بعد العزا يمك
- تم واني حاضر
- يلا مع السلامة
- مع السلامة الله وياكم
ياقوت : شگد حلو كلام الشيخ فورا خلاه يهدا
ادم : اي مجبور علمود ما تصعب الامور وتزداد المشكلة
- وبعدها شصار
- بعدها دخل الشيخ طمن الموجودين وراح لاهل المقتول يعزيهم ويطلب عطوة من كبار العشيرة وبعد 3 ايام تصير الگعد ويتفاهمون على حل
- الحمدلله والله كلش خفت عليك
- تطمني اني خارج قوس بس شلون شفتي المسلحين
- صعدت على دبية وباوعت من فوگ الحايط وما طلعت بس عيوني علمود محد يشوفني
- تمام بس ديري بالج مرة ثانية حتى لو يصير طلق لا تحاولين تباوعين ما نريد احد ينتبه عليج
- والله بابا من اكون خايفة عليك ما اضمن تصرفاتي
- حاولي بابا حاولي وهسا خليني انام وراي گعدة من الصبح
- تمام تصبح على خير
- وانتي بالف خير
ياقوت : نمنا وگعدت من وقت قبل ما نتريگ دگ الشيخ على بابا وگلو تجي تتريگ ويانا وما گدر بابا يرفض وبدل ملابسو وانطاني خبر
وقبل ما يروح گال لا تحسبين حسابي بالغدا والعشى وراح ( اليوم الثالث جان نفس الشي هم راح تريگ هناك وبقى لليل )
باليوم الرابع جانو مقررين يسوون الگعدة بس طول النهار الوضع هادئ ماكو كلشي وصار عندي فضول اعرف شصاير وانتظرت بابا لحد ما اجى
من سألتو گال ان اكو واحد من الشيوخ جان المفروض يجي بالگعدة واتصل على الشيخ اعتذر منو لان ما يگدر يجي واجلو الگعدة
- ومنو هذا الشيخ
- هذا هم طلبوه طرف خير بالگعدة
- مو الشيخ موجود
- باباتي بهيج امور يجون اكثر من طرف علمود يحاولون ينطون ارائهم بالموضوع والراي الي يعجب البقية يتنفذ
- زين احجيلي مختصر عن هالگعدات
- شوفي يتجمعون اهل المقتول واهل القاتل ووياهم شيوخ العشيرتين وشيوخ الطرف الثالث الي يحاولون يصلحون بينهم
تبدا بينهم المفاوضات على حل بيهم الي يطلب فصلية وبيهم الي يطلب فلوس وبيهم الي دم بدم وبيهم الي يعتبرها قضاء وقدر
ودائما شيوخ الطرف الثالث ما ينحازون لواحد على حساب الثاني لازم يكونون طرف خير ومن يتفقون على راي ينفذونو الطرفين وتنتهي المشكلة
- شنو يعني فصلية
- يعني اهل القات ل ينطون وحدة من بناتهم او بنات عشيرتهم تتزوج واحد من اهل المقت ول وتبقى عايشة عندهم وممنوع ترجع لاهلها
- هذا خوش حل لان ممكن يخلوها تشوف اهلها وتنتهي المشكلة
- لا بوية هذا اكبر جريمة بحق البنت لان تعيش وياهم حالها حال الخدامة بدون لا حقوق ولا احترام ولا تقدير
تعيش عندهم مذلولة طول عمرها وحتى ضرب تنضرب واهلها ما يگدرون يسوون كلشي لدرجة ممكن تموت من الضرب
- يممممممة شهالناس هاي
- اي لعد شعبالج
- وشلون اهلها ينطوها
- ما اعرف شلون يفكرون البعض
- وشلون الدولة تسمحلهم
- الدولة ما تتدخل بالعشاير وهذا الموضوع يصير بين العشيرتين ما ينطون خبر للدولة
- والله ماعرف شلون يفكرون بعض ناس
- الله يعين الي راحن فصلية وشافن انواع العذاب
- اي والله يلا هسا نام ما بقى وقت
- تصبحين على خير
- وانت بالف خير
اهل القات ل بقو عند الشيخ لان ممنوع يرجعون لبيوتهم قبل ما يلگون حل واهل المقتول اجلو الگعدة علمود هذا الشيخ
جانو مقررين الگعدة بعد وقتها ب 3 ايام وبقى ذيج الايام بابا بالمضيف من الصبح لليل بس الحمدلله جانت الامور هادئة وماكو اي شي جديد
مرن ال 3 ايام بصعوبة كلش جبيرة لان جنت وحدي وجنت كلش اشتاق لبابا وما اجى يوم الگعدة الا اني طالعة روحي
بيوم الگعدة بابا راح من وقت وگال اذا تأخرت لا تنتظريني وراح والساعة تقريبا 10 صارت اصوات عند المضيف بس مو واضحة
وجنت اريد انفذ كلام بابا بس كتلني الفضول اخير شي صعدت فوگ الدبية ويا للهول شفت عدد سيارات مو معقولة عند المضيف
يمكن بال 50 سيارة والشباب المسلحين تارسين المكان ترس من صدگ منظر مهيب وهاي علمود گعدة فتخيلو بالافراح او الاحزان شلون يكون التجمع
رجعت نزلت وعرفت بابا ماراح يجي للغدا وبقيت انتظرو الى ان صارت الدنيا عصر واجى تعبان گوة واگف على رجليه
تمدد بالغرفة يرتاح وصرت افقص رجليه (اعصر العضلات بايديني) علمود شوية يرتاح ويخف تشنج العضلات
ياقوت : ها بابا شصار وياك
ادم : ماكو جديد من الصبح لقبل شوية يلا فضت المشكلة ومن راحو انطاني الشيخ اجازة اليوم وباجر علمود ارتاح لان صارلي 6 ايام ما شايف الراحة
- وشنو اتفقو
- اتفقو فصل 100 مليون
- بصدمة .. گول والله
- لعد شعبالج
- شدعوة هالگد
- هي هاي الفصول وازيدج من الشعر بيت بالبداية طلبو 200 مليون
- حييييييييل
- بس اكو شيخ من الانبار هو قرر 100 مليون وبعد المفاوضات واقناع الطرفين وافقو على هذا المبلغ
- بس والله هواي
- اي اكيد
- بس مهما كان افضل من الفصلية
- اي اكيد لان البنت بريئة ما الها اي ذنب
- والقات ل وينو
- ماعرف بس مصيرو يرجع لاهلو بعد ما ورطهم هالورطة
- الله يصلحو
سكت بابا وشفتو نعسان وعفتو ينام والمغرب سويت العشى ولاول مرة نرجع ناكل اني وبابا بعد انقطاع 6 ايام كاملة
تعشينا ورجعنا نلعب بلعبة تركيب الصور وهالمرة ركبناهن ثنينهن وبعدها صرت اقرا لبابا قصة من كتاب القصص
جان يضحك علي ويگلي الي اعرفو الاب يقرا لبنتو قصة مو العكس گلتلو عادي هسا اني اقرالك ماكو فرق بيناتنا
تمدد وحط راسو بحضني بستو على گصتو ورجعت اكمل القصة وماسكة الكتاب بايدي اليمين وايدي اليسار على راس بابا
انتبهت انو غفى لان جان تعبان وعدلتو بفراشو وگعدت مقابيلو واباوعلو وهو نايم وتعبان واحاول افهم شيدور براسو
اريد اعرف ليش خافيني ليش عاف الشغل ببغداد ليش اجى هنا هواي اسئلة دا احاول الگيلها جواب بس جوابهن كلهن عند بابا
تمددت بفراشي واباوع عليه الى ان نعست واخذتني النومة وگعدني بابا صلينا الفجر ورجعنا نمنا لان اليوم عندو استراحة
بس بذاك اليوم لاحظتو هواي يصفن وبالو مشغول وعفتو على راحتو ما حبيت اضغط عليه لان تعودت اعوفو براحتو بهيج حالات
لان كل مرة اسألو ويگلي بعدين احجيلج بس العصر صار عندي فضول اخير شي حبيت ارضي فضولي ورحت سألتو گلتلو شبيك محتار اليوم بشنو تفكر
ادم : ماكو شي بنيتي
ياقوت : والله عرفت
- شعرفتي
- كل ما اسألك ليش صافن تگلي بعدين احجيلج او ماكو شي
- دا افكر اعوف الشغل
- ليش تعوفو شصاير
- ماعرف شلون افهمج بس خلي اوزنها بعقلي واشوف اذا ترهم ولا لا
- تمام لعد اعوفك توزن ابو الميزان
- ههههههههه صايرة تصنفين علي يولي
- كيفي .. وطلعتلو لساني
جانت علاقتي ببابا مو مثل علاقة الاب ببنتو لا جان صديقي اكثر من انو ابوي واحجي واتشاقة وياه بدون اي حدود او حواجز
العصر راح للمضيف رغم عندو اجازة غاب نص ساعة واجى گال ياقوت بوية حظري نفسج وجنطتج راح نروح لبغداد بعد شوية ولا تنسين النقاب
حاولت افهم منو بس كالعادة ما حجالي وعافني بحيرتي وماعرف وين طلع وانجبرت انفذ كلامو واني مو فاهمة كلشي
شكرا لزيارتكم عالم روايات سكيرهوم
