رواية بنت الكهوجي الفصل الحادي عشر بقلم احمد
ياقوت : العصر راح للمضيف رغم عندو اجازة غاب نص ساعة واجى گال ياقوت بوية حظري نفسج وجنطتج راح نروح لبغداد بعد شوية ولا تنسين النقاب
حاولت افهم منو بس كالعادة ما حجالي وعافني بحيرتي وماعرف وين طلع وانجبرت انفذ كلامو واني مو فاهمة كلشي
لبست عبايتي والنقاب وگعدت انتظرو ويا اذان المغرب وگفت سيارة يم البيت واجى بابا فتح الباب وگال من تطلعين حاولي ما تخلين احد يشوفج گلتلو تمام
ادم : وين جنطة ملابسج
ياقوت : شنو من ملابس
- غير تجهزين ملابس الج والي
- شعرفني ما جهزت كلشي
- تعاي حطيلج كم بدل الج والي
- تمام
رجعت للغرفة اخذت الجنطة وعالسريع حطيت بيها ملابس الي ولبابا لا على التعيين وانطيتها الو وطلعنا ركبنا بالسيارة وانطلقنا
بابا تعمد يجي المغرب لان عيلة الشيخ يكونون بالبيت علمود العشى فما يشوفوني وبعدها توجهنا بطريق بغداد واني مثل الاطرش بالزفة
جنت اباوع للمناطق من ورا جام السيارة ومو مطلعة من النقاب بس عيوني وماعرف وين ماخذتني الدنيا وشنو نهاية الغموض الي عند بابا
بقت تمشي السيارة ساعة ورا ساعة والدنيا صارت ليل وابو السيارة صار يسوق على كيفو علمود اذا طلع بطريقو شي لا قدر الله يگدر يتصرف
اني تعبت كلش ونعست وصرت كل شوية انام واگعد وبسبب هالشي كرهت نفسي لا نايمة ومرتاحة ولا مقاومة وصاحية
ماعرف شگد صارت الساعة من وصلنا گدام بيتنا وانطى بابا حساب السيارة ودخلنا للبيت صاير من صدگ سفينة ومليان تراب
بابا گال افرشيلنا فراش ننام بيه لباجر ورحت طلعت اول شي بطانيتين فرشتهن تحت الفرش عن التراب وفرشت الفرش فوگهن
صليت الصلوات الي طافتني ورجعت للفراش اول ما حطيت راسي عالمخدة فورا اخذتني النومة وما گعدت لثاني يوم على صوت بابا
گعدت لگيت بابا جايب ريوگ صمون حار وعلبة مربى مشمش وربطة ماي صحة انطاني بطل گال غسلي وتعالي تريگي
نفذت ورجعت تريگت وياه گال راح تروحين عند ام فائق بين ما ارجع عندي شغل خارج بغداد والبيت لا تنظفيه اذا ما اني اگلج فاهمة علي
ياقوت : بابا فدوة فهمني شكو والله كتلني القلق
- مسكني من وجهي بايديه .. من ارجع احجيلج كلشي وهسا خلي اوديج لام فائق قبل ما اتأخر
- هووووووووووف تمام مثل ما تريد
اخذني لام فائق سلم عليها ووصاها علي بين ما يرجع وماعرف وين راح وام فائق دخلتني للبيت وجانت كلش فرحانة بي
سألتني هواي اسئلة ماعرفت اجابتهن وگلتلها والله يا خالة حتى اني متخبلة مدا يحجيلي اي شي كل ما اسألو يگلي ماكو شي او بعدين احجيلج
گال زين يتصرف تصرفات غريبة او يكون مو على طبيعتو من يرجع للبيت گلتلها بالعكس يرجع طبيعي ومن يبقى بالبيت ماكو منو
(طبعا من سألتني على شغلو گلتلها عامل بس يگول شغلو هناك خفيف مو متعب ويوميتو افضل منا)
جانت خايفة انو صاير يشرب او يتعاطى فد شي بس جوابي زادها حيرة واني جان عندي امل انو تگدر تعرف شنو ببالو بس خاب املي
تميم : گضينا 3 ايام بعزا الگهوجي وبعدها توكلت للسماوة والي بيها عشيرة اهل القاتل وجان بينهم الشيخ فاضل صديق كلش مقرب مني
ورغم ما فد يوم حكمت بفصل بمناطق الجنوب بس هالمرة لخاطرو اجيت وما اخفيكم جان عندي ردة فعل انو ما اگدر اتفاهم وياهم
بعدها توجهنا للعمارة ورحنا لمضيف احد الشيوخ تگهوينا وبلشت المناقشات اني جنت گاعد واستمع للمناقشات بدون ما انطي رايي
جان الخلاف على ال 200 مليون واحد يگول قليل والثاني يگول هواي اخير شي واحد گلي شيخ تميم انت شنو رايك بالموضوع
تميم : اولا الي صار مكتوب عالولد سواء تعارك ويا الثاني لو بقى بالبيت لو وين ما جان مكتوبلو يموت بذيج اللحظة والشاب الي قتلو مجرد سبب لا اكثر
ثانيا اهل القاتل ماراح يگدرون على فصل 200 مليون ولا ينطون فصلية لذلك اني بالنسبة الي اشوف 100 مليون فصل كافية
اهل القاتل تخبلو من سمعو هيج حجيت وواحد منهم گال لعد نريد فصلية گلتلو گدام الحاظرين اذا انفتح موضوع الفصلية مرة ثانية اني ما الي گعدة وياكم
اني اجيت هنا احل مشكلة مو اوگع بذنب بنت بريئة ما الها اي دخل بالموضوع تاخذوها تستعبدوها بدون اي رحمة
صارت مناقشات طويلة وعريضة بس كل الموجودين ايدو كلامي ما عدا اهل المقتول جانو رافضين بالبداية وويا كثرة الاصرار وافقو
بعدها تغدينا وشربنا الجاي ورجعت بس ما وصلت لليل بحيث گوة اشوف دربي ومن السيارة فورا للفراش وغطيت بنوم عميق
ثاني يوم گعدت جسمي متشنج من التعب اخذتلي دوش لحد ما ارتخت اعصابي وعضلاتي ونزلت تحت جانن امي واختي يتريگن
تميم : صباح الخير
الحجية : صباح النور هلا وليدي
- شلونج يمة
- من شفتك صرت بخير
- دومج بخير يمة
- شصار وياكم البارحة شو تأخرت
- حجيتلها مختصر
اية : انت شدخلك بينهم مثل البصلة بكلشي تحط نفسك
تميم : يمة اعتقد راح يبقى عندج ولد واحد
زيد : دخل للصالة ليش ابنها اية وين راح يروح
زياد : لك هاي شنو اية ولد واني مادري
اية : اجو البايخين
زياد : اوف ولك زيد طلعت بايخ انت
زيد : كل انسان يرى الناس بعين طبعه
زياد : بقى صافن على زيد بملامح باردة
زيد : شبيك
زياد : شنو جنت تحجي
زيد : لا هذا كلام للكبار مو الك
زياد : ها اي خوش عبالي الي
زيد : لا لا
الحجية : تعالو تريگو وعوفو السوالف
زيد : حجية انتي هم بطرانة اكو احد يتريگ الساعة 9 .. وگعد ياكل
زياد : اي والله واني هم اگول هيج .. وگعد هو هم
اية : يمة عوفيهم ذول مخابيل ما يفيد وياهم الحجي
زيد : ويص ويص
زياد : وصيص وصيص
تميم : اعقلو عاد شبيكم .. دگ تيلفوني
باوعت جان عمي جاوبتو گال بنت عمك موافقة عليك رتب امورك والله يقدم الي ييه الخير تشكرتو وسكرت وبشرت امي بالخبر
زيد : اييييه يعني راح تتزوج وما تبقى هتلي
تميم : لا والله للاسف ما ابقى دايح مثلكم
زياد : يعني حاليا انت دايح
تميم : دنعل شيبكم .. وانهزمو منو
اية : هههههههههه ما لگيت غيرهم تحجي وياهم
تميم : المهم اني رايح للمضيف محتاجين شي
الحجية : سلامتك
تميم : اعتقد تأخرت عليكم بالتعريف عن عائلتي وصار لازم اعرفكم عليها
نبدي بجدي مأمون العمر 75 سنة متزوجة من جدتي سعدية العمر 70سنة
ابوي اسمو نصير عمرو 55 سنة لان جدي تزوج بوقت وامي بركة البيت هالة عمرها 53 سنة
زوجة ابوي الثانية اسمها صفية عمرها 45 سنة
عائلتي عايشين اني وامي واختي اية عصفورة البيت عمرها 17 سنة صف سادس علمي
واخيرا اني تميم العمر 30 سنة دكتور جامعي وعلى وشك الزواج من بنت عمي دلال العمر 20 سنة
طبعا اني وامي واية عايشين ببيت لحالنا وابوي وزوجتو الثانية عايشين ببيت العائلة الاساسي ويا جدي وجدتي واولادهم كالاتي
فاضل 26 سنة
مالك 25سنة
يارا 24سنة متزوجة
ليالي 23 متزوجة
رشى ورشيد توم 20 سنة رشى متزوجة ورشيد بعدو
واخر شي التوم المخابيل زيد وزياد 18سنة
طبعا اني واخواني ما نعتبر انفسنا اخوان بس من الاب نعتبر نفسنا شخص واحد وعلاقتنا ويا بعض قوية بكل ما تعنيه الكلمة من معنى
وحتى امي وزوجة ابوي علاقتهن ويا بعض كلش زينة بس جانت اكو مشاكل بين اية وباقي خواتي وهالشي انعكس على امي وزوجة ابوي
ولذلك قررت اعزل امي واختي عن باقي العيلة وابوي ما اعترض على قراري لان هو هم ما يحب مشاكل العائلة بس بيتنا بنفس الحوش ويا بيت ابوي
طبعا من اول ما اجيت للدنيا ربيت ويا ابوي بالمضيف واخذت كل عاداتنا وتقاليدنا من الصغر وهالشي خلى ابوي وجدي يسلموني العشيرة واني صغير
حاولت اجلها واخليهم هم يديرون امور العشيرة وما قبلو بحجة انت ماعندك شي واذا صار عندك شغل نغطي مكانك بين ما تجي
اهلي لان اخواني كلهم ما تزوجو وماكو احد يخدمهم جابو نسوان ثنين يشتغلن الهم بالبيت ويحسبولهن مبلغ مالي كل شهر
بذاك اليوم ماجان اكو شي مميز مجرد صلينا صلاة الجمعة ورجعنا للبيت وثاني يوم قبل الضهر جنا گاعدين بالمضيف ودخل علينا شخص
ادم : السلام عليكم
الكل : عليكم السلام ورحمه الله تفضل
- زاد فضلكم
مأمون : زيد صب گهوة للضيف
زيد : صار جدي
مأمون : الله بالخير
ادم : الله بالخير والعافية
مأمون : حياك الله
ادم : ابقاك الله شيخ جايكم بموضوع اريد احجيه واتوكل لان وراي طريق
مأمون : تفضل احجي والي نگدر عليه تاخذو من عيوننا
ادم : تسلم عيونك .. سمعت ان الگهوجي مالكم توفى قبل كم يوم واني اشتغل گهوجي اذا تريدون گهوجي طبعا
مأمون : اي والله نريد ونتشرف بيك بس ماعرفتنا عن نفسك
ادم : اسمي ادم من بغداد وإن شاء الله ويا الوقت تعرفوني
تميم : اسمحلي جدي بس اني شايفك بالعمارة بالگعدة الي صارت قبل يومين
ادم : اي صحيح اني جنت الگهوجي
تميم : شنو السبب الي خلاك تعوف الشغل هناك
ادم : ما اريد احجي عن الي اشتغلت يمهم لذلك راح اگلك اسباب شخصية رغم ماكو اي سبب شخصي
تميم : احنا ما دخلنا بالي اشتغلت يمهم المهم عندنا انو ما تفشلنا گدام الناس واي گعدة تصير او مناسبة او شي الولد موجودين ويساعدوك
ادم : ما احتاج مساعدة وإن شاء الله ما اقصر بشغلي بس ويا منو اگدر اتفاهم وياك لو ويا الحجي (الجد)
مأمون : تميم هو الشيخ بغيابي فالي يعجبك تتفاهم وياه تفاهم وياه
ادم : اني كل الي اريدو غرفتين اسكن بيهن لان بيتي ببغداد مو هنا
مأمون : ايمتى تگدر تجي
ادم : ماعرف بس انقل غراضي من العمارة
مأمون : عيلتك تجي تعيش ببيت تميم الى ان نبني الكم بيت لان الگهوجي السابق جان عندو بيت خاص بيه
ادم : شيخ ماعندي عيلة اني وحدي
مأمون : زين تگدر تعيش بالغرفة الي يم المضيف بين ما نكملك البيت
ادم : شيخنا اني اشتغلت بالبناء اگدر اكملهن بيومين ومن فوگ ما يحتاج صبة احطلهن جينكو بس يحميني من البرد بالشتاء وهاي هي
وغراضي راح انقلهن من العمارة فماگدر اتأخر بيهن واعرف سويت زحمة عليكم بس اذا اتأخر يصير التأخير عليكم انتو هم
تميم : ابو منو
ادم : ابو باسم
تميم : خلص ابو باسم ابقى يمنا اليوم وباجر تكون المواد جاهزة ونتساعد كلنا نبنيهن الك علمود تخلصهن بسرعة
ادم : ما اريد اكلفكم واتعبكم.........قاطعو
تميم : ما اقاطع كلامك الا بالخير ماكو لا تعب ولا تكلفة باجر إن شاء الله نبدي نبنيهن
ادم : الله يجزاكم بخير لعد عن اذنكم عندي اتصال
تميم : اذنك وياك
مأمون .. من طلع ادم .. شنو رايك تميم
تميم : اكو شي صاير وياه وعندي فضول اعرفو
مأمون : اني هم بس فكرة البيت افضل مو
تميم : اي جدي عالقليلة مثل حالة ادم اذا احتاجينا بالمستقبل يسكن بالبيت الي نبنيه لادم
مأمون : اني هم فكرت هيج
تميم : رجع ادم وغيرنا الموضوع وجنت حاب اعرف شنو قصتو بس خلي ويا الايام اعرفو ويبين اذا عندو قصة لو لا
والشي الي خلاني استغرب ان ما يعرف عني كلشي ما التقينا بس بالفصل شنو السبب الي خلاه يختارني دون هالناس هاي كلها
اتصلت على واحد من گرايبنا عندو معارف بمعامل البلوك وصيتو يجيب الفين بلوكة ورمل وسمنت علمود نبلش بيهن من باجر
مر اليوم طبيعي وادم بقى بالمضيف واتفقنا راتبو يكون 500 الف وثاني يوم جان عندي دوام رحت للجامعة ما رجعت لل 5 العصر وجان ادم مو موجود
من سألت عنو گالو ما اجى البلوك ومواد البناء وگال ما يگدر يتأخر من يوصلن نخابرو ويجي گلتلهم هاي هي ورحت گعدت ويا جدي
تميم : جدي شنو رايك بفكرة
مأمون : شنو هي
- ابو مشعل مو عندو بيت فارغ ليش ما نأجرو لادم ويگعد بيه لحد ما يكمل بيتو
- ليش مستعجل على جيتو
- ماعرف جدي اكو احساس بداخلي يخليني استعجل
- سوي الي يعجبك
- تمام
- تميم لا تخلي ابو باسم يدفع اجار الرجال فقير وحالتو على گدها
- اي جدي اكيد
خابرت على ابو مشعل ( ابن عم ابوي ) وحجيتلو القصة وگلتلو ما اريدو يعرف ان البيت الك ووافق وبالبداية جان رافض ياخذ اجار
اخير شي حجى وياه جدي وقنعو واخذت رقم ابو باسم من زيد واتصلت عليه بلغتو ان عندنا بيت يجي يگعد بيه لحد ما يكمل بيتو
شفتو جان متردد اخير شي گلتلو باجر تجيب غراضك وتجي گال هاي هي وقفلت الخط منو وبلغت جدي بالي صار
بعدها وصيت زيد يشوفلنا احد ينظف البيت لان خطية رجال جبير وما يگدر ينظف البيت لحالو وثاني يوم الصبح جاب نسوان نظفنو والضهر صار جاهز
وصيت اخواني من يوصل الرجال يساعدوه بتنزيل الاغراض ويبقون وياه لحد ما يكمل كلشي بس لان طريقو بعيد ما وصل للمغرب
من وصلت سيارة الحمل رحنا اني واخواني ساعدناه بالغراض حتى تسفيط سفطناهن وياه وجان كلش فرحان لان ساعدناه
بعدها انطيت صاحب السيارة اجرتو وتخبل ادم شلون تريد تنطي واني احلف وهو يحلف اخير شي جبرتو ان اني ادفع الحساب
ادم : والله مو راهمة هيج
تميم : توكل بالله ابو باسم مو مستاهلة وهسا نعوفك ترتاح وترتب وضعك وباجر غداك يمنا
- بلشتو بالرسميات يعني
- لا رسميات ولا شي انت صرت واحد مننا بعد
- الله يعزكم
- يلا تصبح على خير
- وانت بالف خير
رجعنا للبيت اني واخواني وطلعت بوجهي للبيت ما رحت للمضيف واجو وياي زيد وزياد لان ما يتونسون اذا مو اني وياهم
اية : هلا بشيخ العشيرة هلا بالي له الخاطر يهلي هلا بزينة الشباب كلهم يمة اروح فدوة لطولك
زياد : زيد تشم ريحة لواگة لو بس اني
زيد : لواگة من العيار الثقيل مو اي لواگة
تميم : امري يا بعد اخوج شنو راح تحجين بعد هاي اللواگة كلها
اية : ياااااا اني لوگية
تميم : لا اعتذر حشى اللوگية عنج
زيد : وگع بالگاع من الضحك
اية : زعلت منك
زياد : زين زعلتج هم لوگية مثلج لو لا
زيد : ههههههههههه زعلة لوگوية
زياد : انجب زيد احترم لوگيتنا
اية : بعصبية .. يمممممممممة شوفيهم
الحجية : كافي ولكم ترا اگوملكم
تميم : گمت گعدت عدها وسحبتها لحضني وراضيتها .. گليلي شرايدة
اية : اريد فلوس
تميم : شگد ولشنو
اية : 50 الف اكو فستان عاجبني واريد اوصي صديقتي تجيبلي منو من محل ابوها
تميم : بس هيج
اية: اي
تميم : غير تدلل اللوگية مالتي
اية : ضربتو على كتفو .. فلا تبطل سوالفك
تميم : ههههههههههه
انطيتها الفلوس وتعللنا سوا لحد ما تأخر الوقت وبعدها توجهنا لغرفنا لان كلنا ورانا دوام باجر الصبح
