 |
رواية الابواب الخمس الجزء الثاني الفصل الحادي عشر بقلم ريام الهادي
أحنة خلانة وكتنة
تراب بحلوگ الرحي
شما يطول الجرح بينة
يطيب بس ما ينمحي
بيت مو بيتي وناس مو اهلي وعيشه مو عيشتي وقسمه صارت غصب عني ويه رجال لا اريده ولا يريدني هذا حالي واني اباوع بلوجوه واني بدله العرس والبركع مغطي وجهي اشوف ايامي بلبركع بيت عمشه وضحكتي ويه اخوتي شرهب ويونس وبلال يلعب ويه شرهب وبان كاعده يمي تضفر شعري
وعلى جهه مهند واخته ومرتضى يتعاركون اشتم ريحه قوري الجاي على صوبه علاء الدين وبيبي كاعده وحاطه استكان الجاي يمها وتعد وتغلط علينه وعلى امهاتنا لان مسووين هوسه وصوت عالي وعمه بدعه تشتغل وتنظف ورانه ماتمل ولا تگل وعمه خوله تغلط على صالحه وساهره وادعي عليهن وحاطه رجل على رجل وتاكل ولا تهتم اتذكر كل ركن جمعني بذاك البيت بخيره وشره
وحالياً منتظره اروح لبيت وداد حياة ثانيه عيشه ثانيه الكل منتظر الزفه اله اني منتظره اهلي
وين اهلي وينكم
قبل بيوم ..
اباوع عليهم لمو الغراض كلها بحكم اني اجيت بعلاكه وكم قطعه كلهن مسحوكات سحك حتى الوانهن رايحه كل الموجود همه اشتروه اليه ومن ضمنه جهاز عرسي ام عبد ماقصرت وخاصه خالو كل فتره ينطيها فلوس تروح تشتري لهاي اللحظه مااعرف شحطو شخلو مثل الاطرش بلزفه وما سألت ولا اريد اسأل جان اليوم اليمر بيه احير شفكر بأخويه المحد زاره من يوم مادخل السجن والله اعلم شصاير بحاله وشيكول علينا لان محد وصل واطمن عليه لو افكر بأختي وحالتها ويه رجال شكبره وشون مخلصتها وياه تكول زينه بس اني شرهب واعرفها تكآبر مرات الغصه اسمعها بصوتها لو بحال بيبي ومرضها ولهسه ماصحت كل فتره تتأذه لو بعمه بدعه هي وبان بقو ويه صالحه ومصايبها
عقلي مقسم بكل جهه يفكر لحاله ماركزت بتفاصيل المفروض كل عروس بهيج ايام تفكر بيها سلمت نفسي الهم وهمه يجيبون منا ويودون منا
ام عبدالرحمن: ناي تعاي بتي
ناي : هاا خاله
ام عبدالرحمن: راح تجي سدره وحوراء ينظفوج مال عرسج ايدهن ذهب ومعدلات
ناي : سدره منو
ام عبدالرحمن: بت ام صلاح
ناي : ولا مره شفتها
ام عبدالرحمن: تدرس بغداد وقبل كم يوم خلصت امتحانات واجت وطلبت منها تجي تنظفج وتحفلج ماضل وكت باجر العرس وانتي بعدج خيط مامحطوط على وجهج
ناي : بكيفج خاله
ام عبدالرحمن: بيج شى
ناي : كلتو لاهلي حتى يجون
ام عبدالرحمن: اي بلغهم عمران واكد على شرهب تغدي بين ميجن البنات
ناي : شنو هاي الهوسه البره
ام عبدالرحمن: الولد ديحضرون للحنه وطباخين جايين جان المفروض نسويلج حنه بس شنسوي لوداد مقبلت كالت الحنه للولد وماردنا نسوي هوسه تعرفين بيها تريد بز حتى تخرب الاول والتالي
ناي : ياريت تخرب
ام عبدالرحمن: شنو
ناي : لا ماكو شى شويه واجت حوراء طبت تهلهل والله تخبل الهلهوله مالتها خلتني صافنه
حوراء : زفيناه بصايه حيدر زفيناه بصايه حيدر
سدره : لفها بقميصك لايطيرها الهوه وهله وهله
حوراء : هو وينه الهوا مسموطين سمط بلحر
سدره : يابه هي گوله شبيج نبصتي
ام عبدالرحمن: لاتتعاركن هله يمه سدره شونج
سدره : شونج عمه وين عروستنا
ناي : وكفت وكتلها اني اجت باستني
سدره : بلخير عليج احبيبة مهنايه ولو ويه عمه وداد مااعتقد اكو هنا
حوراء : ولج لسانج هاي امي لو نسيتي
ناي : اباوع عليهن وابتسم مبينات صديقات
سدره : يله عيني عروستنا ورانا شغل هوايه
ناي : رحت وياهن جنت حيل مستحيه شون انزع كدامهن وهنه بضحكهن وشقاهن هواي خففن عليه بقينا نشتغل ساعات حتى وجهي حفو طلعوني بلاديه على كولتهن طلعتي بلجيس شكد تمنيت شرهب وياهن تحب هيج كعدات ولمات
للعصر دخلت سبحت والبنات راحو واسمع صوت دك وركص وهوسه وهلاهل
طلعت لابسه دشداشه وانشف بشعري اسمع اصوات هواي كلش ولا جن الحنه مالتي ولا يمي خليت وطبيت للغرفه مشطت
وطبت عليه ام عبد
ام عبدالرحمن: مشايفه هيج عروس
ناي : شبيهه خاله
ام عبدالرحمن: حتى ماسألتي شتلبسين باجر يابدله وينها ماكلتي ليش اليوم محد سوالي حنه اني حتى عمران كتله شو مااشترو ذهب مال النيشان الها خاليها صنطه
ناي : شتفصلون اني البس خاله هاي سوالف متهمني
ام عبدالرحمن: بدلتج بغرفتي كومي قيسيها حتى اذا بيها خلل اني ارتبها هي بيها حبال من الظهر تتگبر وتتصغر
ناي : خليها على باجر
ام عبدالرحمن: لج يمه لاتفتين گلبي كومي شكد بارده
ناي : كمت لبستها وكعدت عدل عليه لان شدت الحبال زين مرتبه ونظيفه طلعت كلش حلوة بيها رغم لا مكياج ولا شى
ام عبدالرحمن: تخبل عليج وهذا تلبسي فوك راسج حتى يغطي كلشي ولو هي المسافه بسيطه خطوتين بس باجر تلكين الكراج والحديقه الاماميه والحديقه الوره مليانات زلم اهلنا واصدقاء الولد هوايه وراح يزفون مهدي وهو صاحب واجب وكلها تحبه وكلها تريد توكفله
ناي : نزعت البدله جان صوت الغنى ويمكن مطرب جايبين حتى مامديت راسي وشفت شكوو رغم غنى وركص وطلقات وهوسات هيج شغلات قليل اشوف وهاي المفروض حنتي واني لبست دشداشتي وكعدت لحد ماطبت ام عبد حطت حنه بيدي كالت لازم نحنيج ردت ترحين هناك
ناي : باوعت على خاله وكتلها اكيد وداد ماقبلت
ام عبدالرحمن:لاتهتمين افرحي باجر عرسج مو شرط الحنه هاي اني جبت الج من كاسه العريس افتحي ايدج حنت ايدي وحطت درهم بيها وحده جگليته وسدتهم وباستني
كتلها ماانسى فضلج خاله وكفتي ويايه بوكت محتاجه الام بيه ينطيج العافيه ويفرحج بولدج
جان تحضني وتبوسني وكعدت شويه سولفت على ليله الدخله جنت اعرف شغلات بسيطه وهي شرحت واني استمع وساكته
خلصت الليله فرح وهلاهل ومزايق وركص ودك وطلق بلنسبه الهم وتفكير وهم بلنسبه الي
ثاني يوم اجن البنات وياهن ام صلاح وحده بنيه كالو هاي عدها صالون الوضع موزين مو مال ترحين الها كامو وجابوها للبيت سبحت وكعدت ترتب بشعري ومكياج اني مغمضه ومرجعه راسي لوتسويني قرقوز هم مااحجي
شفت شكلي حلوة ومرتبه خاصه حفافه جديده الوجهه يلمع ومكياج حلو وتسريحه حلوة اني كلشي تسوي اكول حلوو لان مشايفه هاي السوالف ولا حاطتها بعمري
لبست البدله وحطو البركع
اجت ام عبد وبيدها علبه
ام عبدالرحمن: بتي هذا ذهبي لبسي كدام العالم شتكول صدرج وايدج فارغات بطرك الحلقه
ناي : عادي خاله شكو بيها
ام عبدالرحمن: غير الناس تاكل وجهنه متعرفين ذني شيحجن يبوو راح يكصنج كص
دلبسي ذني ومن يخلص العرس اني اجي اخذهم قابل يطيرن
حوراء : لا عمه مهدي اشتره كلاده ومحبس وتراجي كلي اخذيهن قبل لترحين ونسيت
ام عبدالرحمن: شكد مطفيه دروحي جيبيهن بسرعه
ناي : راحت واجت فتحو العلبه بحياتي ماملكت ذهب كلاده ثگيله طويله ولبست المحبس زين طلع على كدي وتراجي كامت ام عبد ولبستني بتوت (سوارات) كالت حتى يكمل شكلج مردت البس اي شى وبنفس الوقت مردت اعاندهم اني عيوني وگلبي على الباب انتظر اهلي
طلعت اسحل بلبدله والهلاهل علت تسمع كل الموجودين وكعدوني بغرفه الخطار وبدن النسوان ياهو التجي تهلهل وتدبج شغلو ديجي ويركصون وحوراء وسدره وياهم بنات ماكعدو
واني منزله البركع وانتظر جيه اهلي لحد ماتعبت وكامت روحي تصيح اهلي وين اريد اهلي
ام عبدالرحمن: شويه ويزفوكم
ناي : عفيه خاله كولي لخالو اريد يجون اهلي يله تصير الزفه
ام عبدالرحمن: يابتي تأخرو والناس هم وراها طريق تريد ترجع
ناي : فدوة خاله ولزمت ايدها اتوسل
ام عبدالرحمن: خلي اشوف شيكولون واجيج
شرهب : جنت فرحانه من اجه وكال مرتضى على زفه ناي ودزت خبر لازم اجي جانت الفرحه ماشايلتني وبليل كلت اكول لعدي حتى باجر احظر نفسي وعكب باجر من الصبح اروح لبيت بيبي ونطلع لديالى
اجه ويحرك نفسه يمنه يسره حتى يعدل ظهره من التعب
الله يساعدك
عدي: جوعان صبي الاكل
شرهب : كامل راح اجيبه واجي رحت جبت الصينيه وكعدت يمه بلكاع
عدي : هاي شمسويه عشه
شرهب : بيض وطماطه شبيه
عدي : هلكان من الصبح واكف على رجلي وصوت رايح ومحترك جد جدي حتى من ارجع الكه لكمه بلبيت تالي الكه طاوه بيها بيض وطماطه وماعون خيار
شرهب : لعد شتريد طلي على التمن
عدي : لج تستهزأين
شرهب : ااااخ لتكرص غير هذا الموجود نعمه من الله خير ناس ماعدهم هذا الاكل وخطيه عمو اليوم شغله تعبان
عدي : واني شعليه مو انطي مصرف
شرهب : يامصرف فدوة لعينك هنه خمسين الف اذا يوميه بيض وطماطه ميكفن نص شهر واحنا نفرين وياك امك وابوك واختك ورجلها عدا الجهال هاي الخمسين مالتك متكفي ريوكات للشهر
عدي : هذا العندي وانتي تعاي لج صاير صوتج عالي وتحاسبين من احجي اشيلج فلقه هسه اطلع تعب اليوم وضيمه كله بيج فوك ماتسوين اكل براسه خير لرجلج تضوجين لان احجي
شرهب : من عيوني شتريد اطبخلك بس ورق
عدي : شورق
شرهب : كرفس غير فلوس عدي تره اهلك والله حالهم يصعب على الكافر الشغل هلكهم وانت عندك راتب مابيها شى اذا شلت نص الراتب وساعدتهم
عدي : بابا منيلي اني كوه مدبر عيشتي وهاي الخمسين المتعجبج طافح دم گلبي بيها
شرهب : تقنعني راتب مو هوايه والدروس الخصوصيه وين فلوسها
عدي : هذا السؤال اذا انعاد اطلع حليب امج من خشمج وانومج شهر بلفراش اياج تعيدي مره ثانيه فلوس ماعندي وهاي عيشتي ترضين بيها وتبوسين رجلي لان ملفيج وكاعده تاكلين تشربين تنامين بلاش
شرهب : شتريد اطلع اشتغل واجيبلك فلوس لو اجدي وادفع فلوس اقامتي هنا
اني ماكتلك انطيني كتلك ساعد اهلك وهذا رجل اختك التمبل مال نوم المحسوب على الزلم وذره غيره ماعنده ميطلع يشتغل
عدي : هواي لغيتي وطلعتي الاكل سم عليه اريد من باجر تسويلي اكله زينه مالي دخل منين تجيبين عسى ما متاكلين المهم عشاي يكون زين يقوي گلبي على تعب الدوام مكافي ال٣٠٠ الف الراحن لوما ابويه يحجي ويايه لا اني شامرج بلشارع ومرجعج لاهلج
شرهب : باوعت صفح عليه وماحجيت تذكرت عرس ناي اكلك عدي عكب باجر عرس اختي بديالى واريد اروح ويه بيبي
عدي : ماكو روحه
شرهب : ليش عفيه
عدي : ميرادلج ملابس كروه ذني مو فلوس منين اجيب
شرهب : عندي ملابس اي شى البس والكروه بيبي تدفعها
عدي : ترحين بس تجيبين اكل وياج وفلوس اذا اختج انطتج
شرهب : هو منو ينطي منو
عدي : انجبي واكعدي ماكو روحه
شرهب : هذا هو سكتت
عدي : شوو جيبي
شرهب : جر ايدي واخذ السوار وشاغت روحي لا عفيه هذا هديه بيبي
عدي : ماله داعي لابسه ذهب على الفكر ولابسته خلي نبيعه نستفاد منه ولو هو خفيف ميجيب شى اقلها نعوض ال٣٠٠ الراحن
شرهب : كلشي اخذ وعوفلي هذا السوار ماعندي غيره حتى حلقتي فضه
عدي : حجايه ثانيه وحتى روحه ماكو
شرهب : بقيت ساكته واباوع عليه شون ياگل وبگلبي اكول كون يطلع زقوم بطنك يوم بعد يوم اكرهه كلشي منه يخنكني كلامه اسلوبه تصرفاته عشرته حتى المكان اليجمعني بيه وانام بيه اكرهه صار شهرين من تزوجنا ولهاي اللحظه من يتقرب مني يضربني ويأذيني ماسمعت منه كلمة حلوة ولا مره ولا حتى حسسني اني مرته دوم يخليني احس خدامته لو صاحب فضل لان تزوجني
عفته وكمت كعدت على الجربايه مقهوره على السوار العندي واكول ميخالف المهم اروح اشوف ناي واوكف وياها
عدي : اخاف عندج روحه باجر لبيت بيبيتج اخذي وياج احد لترحين وحدج مشي
شرهب : منو اخذ عمه وعمو بلسوك
عدي : اخذي ابتسام وحدج ماكو طلعه ونص ساعه وترجعين تفرفر ماكو
شرهب : اي اي افهمت لتعيط
ثاني يوم كوه قنعت ابتسام تروح ويايه واتمشى بهذا الحر وصلت لبيت بيبي طبيت وركضت على عمه ابوس بيها
بديعه :طبيتي وطبت ريحه الجنه ويااج فدوة لوجهج الحلوو
شرهب : شونج عمه وضليت ابوس بيها وبلبل نزل يركض يبوس بيه
ابتسام : لج عيني متخافين هذا المنغولي يأذيج
شرهب : شنو منغولي لتكولين هيج عليه اسمه بلال بلبل نصيت صوتي بضوجه وكلت ماكو منغولي غير رجلج ورجلي
ابتسام : شبيهه رجلج
شرهب : مابيه
عمه وين بيبي
بديعه : جوه من تشوفج راح تگيف
شرهب : طبيت عليها شونها عموشه
عمشه : يبعد هلي وعشيرتي چا ردت عافيتي لون اشوفن وجهج الحليوو تعالي احبنچ
شرهب : حضنتها افييش شكد مشتاقتلج
عمشه : شون كيفج
شرهب : زينه عايشه
عمشه : وثورج هايج راكد
شرهب : هههههه يوم هيج ويوم هيج
عمشه : وجهج جنهه ليمونه مديوسه بنعال شنهي يمه ماتاگلين
شرهب : شبيهه وجهي يخبل بيبي لتحجين عليه
عمشه : يمه خاف شايله
شرهب : شنو شايله
عمشه : حبله يايمه
شرهب : حامل بلعت ريك شون حامل وبقيت
ناطه عيوني من الصدمه
عمشه : شنهي الجحش مايطخج مكضيهه يزامط ويارايح ياراد على الوادم يدرس بجهالهم وعايفچ وحيدج
شرهب : لا مو هيج بيبي بس تفاجأت
عمشه : بدعه تعالي ليه
بديعه : هااا عمه
عمشه : اخذي البت لام تحسين الجده وجهه مبلوع البت حبله اريدن اتوكد
بديعه : گلبي لزمني اباوع عليها شون حامل بعدها هستوها تزوجت اخذها للمستوصف ماطول مفتح اسويلها تحليل وارجع
عمشه :لون البت حبله خلنهه صنطه مااريدن صويلحه تعلم
شرهب : طلعنا وكلت لابتسام واجت ويانه وحللت وطلعت حامل يمكن اني اول ام تبجي لان متريد اطفال لا وضعي ولا عمري ولا عيشتي ويه عدي تخليني افكر اصير ام هو اني اريد ام تعلمني
بديعه : لتفكرين وتضوجين كله رزق
ابتسام : على شنو تضوج عيني غيرها وحده تكيف لا راحت دكتور ولا دفعت فلوس دوره نسوان يدفعن دم گلبهن حتى يحبلن والدكتورات تلعب بيهن لعب لاتتبطرين على نعمه الله
شرهب : اكتفيت بلصفنه واني امشي وحسبه تودي وحسبه تجيب شون اجيب طفل يعيش نفس عيشتي رجعت لبيبي وبقت تبوس بيه مكيفه
بديعه : تحسين بلعبان نفس وجع شى
شرهب : كلشي مااحس
بديعه : هواي نسوان تصير نساوتهن خفيفه كون تبقين هيج ومتتأذين
شرهب : اني اجيت على عرس ناي ترحون مو
بديعه : اني تعرفين امي ميته مصارلها فتره حتى الاربعين مطالعه مااكدر اوصل بتي وهم فال موزين عليها اطب واني لابسه اسود وبيبيتج تعبانه صار كم يوم تصخن
شرهب : لعد شون عفيه عمه لازم اروح لاختي
بديعه : وبان هم اكلت گلبي تريد تروح خلي اشوف مرتضى بلكت ياخذجن
شرهب : لازم عمه
عمشه : ولزلمتج ماياخذج چا بس يعرف يحبل مايودي ويجيب
شرهب : اوووف من زلمتي خلي اروح ضلت ابتسام بره
عمشه : يمه لون ترحين لنايه تاخذين هذا البت وتحطي بيدها چا مالتج وينه
شرهب : هاااا بلبيت
عمشه : لايضيع يلمدهربه چا انه ذابه دم گلبي بيهن
شرهب : ميضيع بيبي اخذت السوار مال ناي وطلعت لكيت ابتسام واكفه ويه صالحه
صالحه : كالو حامل بلخير
شرهب : محجيت ولا جاوبتها يله ابتسام دنكت على بلال وبسته من راسه وطلعت
انداريت على حماتي انتي ليش كلتيلها حامل
ابتسام : شمدريني هي سألتني مصار شى عد شرهب وثاني شى هيه مو مرت عمج شبيج ترجفين منها
شرهب : اووووف امشي نرجع تأخرنا بقيت الطريق كله معدتي گالبه منا سالفه روحتنا باجر ومنا سالفه الحباله
رجعت للبيت وعمتي خطيه كيفت وكامت تهلهل من عرفت كل هذا واني اكول عدي من يعرف شراح يكول ياترى يفرح واجه من وكت مبين ماعنده دروس هواي وامه خطيه من فرحتها استقبلته باب الهول وكالت مرتك حبله
عدي : اهووو راح نبدل سوالف تعبانه مرضانه اريد اروح طبيب اليوم ظهري يوجعني
ام عدي : ياابني كول بلخير افرح چا انت گبل عطت ومرضت البنيه هاك كدامك شحلاتها
عدي : مو نعرفها السالفه يايمه خلي بالج طبيبه ماكو تردين كصي باص بلمستوصف وروحي مااضل اذب فلوس ادويه وطبيبات علمود ظهرج لو خصرج لو بطنج توجعج راعي صحتج حتى متعبين واتعبيني وياج
ام عدي : عين الله عليها بأذن الله ماتحتاج وتكوم بلسلامه غيرك واحد يدك ويركص اجاه الوليد چا شوف نفسك شيبت وماكو ضنه بحضنك ويوم مايجي لسانك شطوله وتحسب اهمداه للحظ
عدي : حقج مو انتي مراح تصرفين اني ماكلها وره متجيب حليب وحفاظات ومريض واركض بيه طركاعه وكعت عليه
شرهب : اذا هيج معاجبك يصير طفل جان كلت ومااحبل من الاول
عدي : منو كال مااريد
ام عدي : خبلتنا شتريد انت
عدي : مااريد اضيع تعبي بالادويه واركض مستشفيات بيج زود خلفي ولا تخليني اصرف هاي كدام امي اغسلي ايدج مني الف متشوفين ياشرهب اذا تمرضتي
شرهب : هزيت ايدي وصعدت سمعته يكول تعاي سويلي عشه من هسه بدينا شلاع الگلب ولا انداريت لان عمتي كالت اني اسويلك تعاال
رحت لغرفتي واباوع بلمرايه على حالي صافنه على وكتي الذبني هاي الذبه
رحت بفرشتي ونمت من وكت مااريد حتى اشوفه واسمع منه ويغثني
كعدت ساعه ٦ الصبح وكلي نشاط اريد انسى كلشي اليوم عرس اختي
عدي : شعندج من الصبح كاعده اليوم جمعه
شرهب : مو كتلك عرس اختي
عدي : ماكو روحه
شرهب : لا عفيه شنو ماكو
عدي : مو حامل ترحين سيارات وصعده ونزله ويصير شى عليج وتعال يعدي اركض بيها
شرهب : طبني مرض عسى مااموت مااجي واكولك اريد فلس منك خلي اروح لاختي الله عليك وراها حتى لو اتكطع ماافتح حلكي
عدي : نامي وانخمدي ماكو روحه
شرهب : بقيت الح وصرت نار جنت مستعده اصير دم وياه المهم اروح
ساعه جرت ساعه وصارت بال٩ وهو قافل توسلت بجيت حتى على صدري لطمت تخبلت اريد اروح وهو ولا يمه نزلت مابيها مجال لعمي اليوم ادري بيه مطالع لان مريض عمتي طالعه بمكانه للسوك
عمو فدوة خلي اروح لعرس اختي ماعدها احد غيري
ابوعدي : منو يوديج بنتي
شرهب : ابن عمي وبت عمي منتأخر عدي مديقبل توسلت بيه ومفاد من ٦ الصبح لهسه شلع گلبي
ابو عدي : عدي وينك
عدي : هاا يابه خيرك
ابو عدي : خلي البت تروح لاخيتها
عدي : متروح واذا طلعت الباب اكسر رجلها
ابو عدي : لك انت ليش ناقص شرف وناموس مايهزك دمعها هااك تناشغ على اخيتها وهنه يتامه ومالهن غير خوتهن لاتكسر بيها
عدي : گلت متروح واذا راحت مترجع لهنا تولي لبيبيتها
ابو عدي : كومي بتي اوديج بيدي لبيت حبوبتج وروحي بلسلامه ومن تردين من اخيتج تردين لهنا هذا بيتج والمايعجبه هو يطلع
عدي : لتعصيها امري يابه هاي يگبر راسها وبعد متسمع كلام غير اني رجلها وكلامي اليمشي
ابوعدي : واني ابوك وطالب منك تروح واكف بعين صلفه ودايس كلامي كدامها حط الله بين عينك دمعت اليتيم تهز السما هز شتكول لله بعدين كومي بنيتي توكلي بالله واستعجلي ماضلج وكت
شرهب : صعدت ركض حتى سبح مسبحت البارحه سابحه مو وكت اخاف اسبح واعدل نفسي وهذا يتخبل عليه بدلت شون مجان واخذت السوار وحطيت الشال على راسي ونزلت لكيت عدي مبخر من الاعصاب حتى منداريت عليه مشيت ويه عمي وطلعنا تكول سجن وهدوني منه
وصلنا لكيت مرتضى وناي منتظريني
مرتضى : وين صرتي يمعوده ردت ارجع للبيت
ابو عدي : عينك عليها ابني
مرتضى : صار عمي
ابو عدي : هااج بتي
شرهب : باوعت عمو شال ١٠ الالاف وحطهن بيدي
ابو عدي : اخاف كروه تحتاجين عيب ابن عمج يدفع
شرهب : لا عمو مااريد
ابو عدي : توكلي بالله بتي وديري بالج على روحج
شرهب : مقبل ارجعهن بست ايده واخذتهن منه احسن من ابنه الكحف ابوفليس جوحي نبر تو شون عايشين هيج خرب بعيشتهم
اجت بان واجر تكسي مرتضى للكراج حتى مناك نصعد گيه لديالى مبين هو هم ماعنده خطيه مردت احرجه وانطيته العشره وبان انطته ٢٥ الف عمه كالت انطيها لمرتضى
جانت حاره وعبريه قليل والوكت ديفوت واني متوتره
بان : شبيج
شرهب : حيل تأخرنا كون انلحك
مرتضى : نلحك لترعصين
شرهب : مو همه يزفوها وره الغده من وره الاوضاع
بان : بلكي نوصل قبل الزفه شكد عاجبني اشوفها بدله العرس
ناي : اجت ام عبد وكالت صبو الغدا وره الغدا يزفوج راح يأخرهم مهدي ساعه وحده وراها ميكدر بعد
ناي : رفعت ايدي اريد اكل اضافيري توترت حييل باوعت لابسه كفوف هو ذني وكتهن
انمدت السفره بلكاع وصبو الغدا مبين صارفين هواي البارحه قوازي واليوم هم
كملو ونظفو وراهم الكل يتحرك هنا وهنا واني عيني على الباب سمعت صوت الطلقات كالو راح يدخل العريس غمضت عيني بقهر وركعت الهلاهل بطبت مهدي مرفعت راسي ابد
اسمع هوساتهم وركصهم والكل فرحان بيه ردت اشوف وداد تركص تهوس رفعت راسي ماكو مبين تنتظرنا هناك سحبني من ايدي وكمت ويااه وحطو البرنص مال البدله وغطوني وكمت امشي وين مايمشيني
مهدي : على كيفج لتوكعين
ناي : طلعت للحديقه وحركو الجو طلقات الحلوو طلعت من بيت طبيت البيت الثاني كم متر لا سيارات ولا زفه بلشارع بس جماعتهم جايبين دفوف ويدكون ويركصون خالو سلم عليه وكال لمهدي دير بالك على بت عمتك اختاريتلك الي تناسبك وانسى الي بالك وهو باس ايد خاله وكله ان شاء الله مفهمت شنو يقصد ومهتميت مشينا ودخلنا لبيتهم
دخلت بيت وداد رفعت عيني حتى اشوف شكوو كدامي لكيت امه تهلهل وتهوس واطش جگليت ياااا هاي منو اخاف بدلوها حتى فرحتها مبينه جذابيه الله يستر منج اكيد متريد احد يتشمت بيها
دخلت لكيت نسوان مااعرفهن باركو وطلعو وبيبي ام امي كاعده على كرسي
رفعو مني البرنص لان بس نسوان ورفع البركع مهدي وباسني من راسي شافتني بيبي كامت تبجي وتأشر تعالي متكدر تكوم سحبني مهدي من ايدي على كيفه وخلاني گبالها بجت حييل ولزمت ايدي وجرتني اضطريت ادنك وابادلها الحضن گلبي ميحس بأي حنان اتجاهه عكس بيبي عمشه الطاك گلبي على شوفتها
ام ذكرى : بلخير بنيتي شايفه كل الخير منه المال ومنج العيال عساج تشوفين السعاده بكل خطوه بحياتج
ناي : شكراً بيبي واني احجي وياها سمعت صوت ورايه اكثر صوت اريد اسمعه بهاي اللحظه صوت شرهب
اني انداريت واشوف اختي مدمعه واكفه صاحت نايه وهلهلت ركضت عليها وعفت الكل وحضنتها
شرهب : اااااخ يابت ابويه امشي وادعي اوصل گبل ماتنزفين واشوفج بلبدله
ناي : بقيت ابجي واشهك جن اشكيلها حالتي وغربتي بدونها وبدون اهلي جن اشكيلها اليوم شون حسيت بروحي يتيمه ومالي احد
وهي تشگيلي قهرتها وشون عاندت كلشي واجتني
وداد : يله مهدي اخذ مرتك واصعد
ناي : انداريت عليهم باوعت على مهدي
مهدي : خليها شويه جماعتي ماسلمت عليهم نص ساعه واجي
ناي : عافنا وطلع كلش فرحت وسحبت شرهب وحضنت بان وكعدتهن بصفي وين بيبي وعمه
شرهب : عمه تعرفين بيها حزينه مكدرت تجي وتسلم عليج وهااي بوسات منها وبيبي الطريق طويل عليها وموزين على صحتها وهااي هم بوسات منها
ناي : منو جابكم
بان : مرتضى خطيه حن گلبه وجابنه
ناي : ينطي العافيه
حوراء : همزين اجيتو من شافتكم يله ضحكت ورد وجهه خلي اصب الكم غدا
شرهب : منريد مشكوره
حوراء : شون يصير جايين هذا الطريق كله بدون اكل
ناي : ردت احط اختي بنص صدري واسكت الكل واسمع صوتها ودكات گلبها مااريد صوت احد اريد شرهب وبس
ام ذكرى : كومي بتي اخذي اختج وطبي لغرفتي
وداد : ياغرفه عمه والعالم طابه طالعه تسلم وتبارك مو وكت اختج اكعدي وثگلي موزين قبلت اطب اختها كدام معازيمنا شيكولون من يشوفوها
ناي : كمت لزمت ايد شرهب وكلت البان تعالي ايد لازمه شرهب وايد لازمه البدله واسحل بيها وانطيت ظهري لوداد ولا جاوبتها
ودخلت لغرفه بيبي لان اندلها
كعدت على جربايتها
شرهب : لج شطالعه طلعت اختي كيك واني ماادري تخبلين
ناي : ماصرت حلوة اله لمن شفتج
بان : عندي مفاجأه الج هنه اثنين
ناي : كولي ياريت
بان : احجي لو تحجين انتي
شرهب : والله تعبانه احجي انتي
بان : اول شى راح تصيرين خاله
ناي : دمعت عيني وهمست حامل
شرهب : كافي بجي المكياج سال راح يخرب وجهج
ناي : بستها والخوف زاد اضعاف گبل عليها صحتج تتحمل الحباله
شرهب : حديد لتخافين عوفج مني المفاجأه الثانيه اهم
ناي : ماكو شى اهم منج
جان اطلع بان موبايل واتصلت مااعرف على منو شويه وانطتني استغربت مكالت منو مباشره حطته بيدي واني حطيته على اذني واسمع صوتها وهي تبجي وتكول وعدتج اجي بعرسج وماوفيت بوعدي
كمت وكفت ممصدكه اسمع صوتها عمه خوله
خوله : تمنيت بيدي البسج بدله العرس وبيدي ازفج
ناي : عمه اشتاقيتلج تأذينا بلياج وحطيت ايدي على حلكي واشهك
خوله : الله لايوفقهن ويحرك گلبهن ويخليهن بلذل مثل ما لعبن بحالكم لعب اااااااااخ لو اكدر لا اجي احركهن وهنه عايشات
ناي : ممصدكه سمعت صوتج
خوله : تمنيت اكدر اجي واوكف وياج اني محقوقه الج ولاخوتج من طاح حظي شون اعوفكم واطلع غلطت واني كاعده واعض بأصابيعي لان سلمتكم بيد الميخافون من الله
هينه تطلع اقامتي واجي اذا ماعيشت صالحه بوحل مااسمه خوله
ناي : شونج عمه صحتج شونها عوفج منهن
خوله : موزينه شون حالي بلياكم وهذا نجم شلع گلبي ماخذ جوازي واله اني انتظر اسكتي يمه كل الصار بيه بجفه والعايشته من سمعت بحالج وحال اخوتج بجفه
ناي : ماكو شى يتغير انتي انتبهي على صحتج مبين من صوتج تعبانه
خوله : ماارتاح اله اتشفه بيهن البرابيك كوليلي شون طالعه
ناي : ابتسمت وكتلها يكولون حلوة
خوله : صيري سباعيه ولتسكتين على حقج اذا عندج حق يم احد اخذي من عينه واذا الهم حق عندج انطي وانتي الممنونه داري رجلج الفات لاتفكرين بيه اني المريحني هو ابن فوزي والله يرحمه فوزي رجال اخو خيته ابن اجاويد واكيد ابنه مثل اكسبي احبيبة وحطي جوه جناحج
ناي : مااريده عمه لا اطيقه ولا يطيقني
خوله : هذا حجي قابل كل الناس تزوجو عن حب ربج يخلق الموده والرحمه بين المتزوجين اذا متحبي احترمي قدري ادي واجبج وياه لتخلين وداد المشعشعه تتشمت بيج وتطعن بتربيتج عمتج مو خيره حياله الف وجهه الها ديري بالج وصيري فطنه بطلي فهاوه واذا مكدرتي تخليها تحبج ولو هي متحبج لو تشعلين العشره شمع الها على الاقل خلي الداير مدايرج يحبج حتى يوم ماتوكعين تلكين اليوكف وياج وهذا الحجي لشرهب هم تسمعني لو لا
شرهب : اسمع عمه حاطه اذني ويه ناي
خوله : ريتني يمجن واحط وحده بعيني اليمنى والثانيه بعين اليسرى واغمض عيوني بيجن ومااخلي بشر يلمس شعره منجن
ربي الصبر منك
ناي :عمه كلش متأذيه مبين من كلامها بقيت اضحك ويه شرهب وبان وياها تالي انكطع خلص الرصيد جان اتصالها بلسم لروحي اندكت الباب
سدره : عيني عروستنا يردوج تره وداد گآبه للستار راح تجي تجرج من تسريحتج مو تكولين مكلتي حتى فشار بالانكليزي كامت تفشر
ناي : ههههههه خلي تسمعج
شرهب : روحي منريد تصير عركه هااا نسيت طلعت السوار وحطيته بيدها هذا بيبي دزته
ناي :دنكت وبسته تمنيت ابوسها واشم ريحتة فوطتها اشتاقيت للسانها لو شافتني واني بدله العرس جان استلمتني
شرهب : جان مثلي خلصتها بجي وتغلط على بنات غنيه
ناي : حقيرات توقعت يجن كلت والله اله اطردهن
بان : ميعرفن مكلنا طلعنا بلبوكه
حوراء : يله نايه مهدي اجه
ناي : اجيت عينج عليهم حوري
حوراء : من عيووني انت اصعدي مو اخويه حرگتي وامي شعوطتيها
ناي : حضنتهم وطلعت لكيت مهدي واكف يم الدرج تقربت منه والبنات تهلهل وصعدنا ردت اوكع البدله جبيره لزم ايدي وصعدنا
دخلنا للغرفه وامه ويانه وسدره وحوراء وام عبد وام صلاح هلهلن ونزلن بقت وداد جان تتقرب من عدنا
وداد : مثل ما وصيتك ابني لتتأخر خلي اشوف بعيني يله ارتاح
ناي : مفهمت شنو قصدها وهو باس راسها وسد الباب
شفت غرفتي جانت صاج خشب عراقي وحلوه جديده مرتبه وفرشه بيضه يعني ماجايب شى محلو حتى البردات حلوة حبيت الغرفه من اول مشفتها
مهدي : اكلتي
ناي : مجوعانه
مهدي : تبدلين
ناي : هزيت راسي وكتله تكدر تطلع بين ماابدل
مهدي : مترهم بدلي واني ادير وجهي
ناي : بقيت حايره شون ابدل وعيوني محرجه منه جان يكول
مهدي : تعرفين احنا ناس بابه عرب وتربيت على عادات خوالي ولازم العريس يخلص شغلته بسرعه ويطلع بياض مرته رغم مامقتنع بهاي الشغله بس مجبور ساعديني حتى متتأذين وكلشي يمشي حسب الاصول
ناي : كعدت على الجربايه وهو تقرب مني اثنينا انسان الي وينفذ المطلوب منه بديت اقرا ايات قرآنيه حييل خايفه وارجف وباهته روحي من الخوف والجوع نزعت بدلتي وكلي مستحه منه مهدي تعامل ويايه بهدوء وبأسلوب حلو توقعت راح يتعصب او يتعارك وخاصه اكثر من مره اطفر منه من وره الخوف ويجرني بهدوء وبأسلوب يخليني ارجع لحضنه غمضت واكز بأسناني ورجلي نملت وادعي تفض واخلص وسلمت نفسي اله لحد ماباس راسي وكال مبروك
اليوم شفت وجهه ثاني لمهدي جان طيب وهادئ وتقبل رفضي اله وخوفي وتعامل بمنتهى الاخلاق ويايه صدمني الصراحه
مهدي : اكو تواليت فوك غسلي بيه
ومن يصير مجال ويهدا الوضع انزلي بلحمام الجوه اسبحي اني نازل شويه واجيج
لبس دشداشه بيضه ونزل
اني كمت على كيفي وفتحت الكنتور لكيت منشفه وسحبت دشداشه وردت اطلع واستحيت اندكت الباب صحت منو
ام عبدالرحمن: اني ناي اكدر ادخل
ناي : اي خاله ياريت
طبت وطبت وياها شرهب كيفت بعدها
باركولي
ام عبدالرحمن: خوما أذاج
ناي : لا اريد اغسل خاله ومستحيه
ام عبدالرحمن: كومي ماكو احد فوك واني ابدل الفرشه مو فارشين بلكاع شون على فرشت العرس يله فدوة الكم
ناي : كمت ويه شرهب وبقت واكفه بلباب تنتظرني واسمع طلقات بره غسلت زين وبدلت وطلعت شبيج شوشه
شرهب : خايفه حيل عليج توقعت مثل المخبل العندي
ناي : ههههه ماكو شى عدت
رجعت للغرفه وخاله كملت كلشي جان اطب وداد
وداد : يله عيني روحي لبيتكم قابل تباتين
شرهب : اني مالي نيه ابات اجيت اشوف اختي واروح
وداد : وشفتيها لزكتي خوما لزكتي
ناي : شبيج عمه وياها غير اختي وبهيج يوم ويايه
وداد :اني انتي كوه جارعتج هلمره اختج
ام عبدالرحمن: وداد عيب صدك كذب البنيه خطار تعاي عيني لبيتي اشيلج على راسي
شرهب : سالم راسج خاله اني رايحه
ناي : انقهرت حيل ومكدرت احجي حضنتني شرهب وكالت هاي عكرب دوسيها
ناي : الله كريم
وداد : يله انزلي شكول شكول تالي وكت الفي بيتي
ناي : محجيت لان خفت اسوي مشكله مثل ذيج المره ويصعد مهدي وتنگلب عليه
طلعت وركعت الباب
وره ساعه اجه مهدي ونام مبين نعسان اندكت الباب حوراء جايبه اكل كعدته مكعد استحيت اكل وهو نايم فتح تك عين وكاال
مهدي : اكلي مجوعان اني اكلت هواي بلغده
كعدت اكل ميته جوع وراها طلعت غسلت اكو مغسله ورجعت تمددت بصفه من التعب غفيت محسيت اله ثاني يوم الصبح
شرهب : رجعت وطول الطريق احمدالله وضع ناي زين رغم عمتها حقيره ومتنجرع بس اكول تهون وصلني مرتضى لبيت عيالي وصلنا المغرب واستلمني عدي من الباب
عدي : شرجعج
شرهب : غير راجعه لبيتي
ام عدي : ادخلي يوم ولتجادلي
شرهب : دخلت ومحجيت وياه مالي حيل هوسه ومشاكل اني گلبي خلصان
رجعت اساعد عمي وعمتي وهمه ميخلوني لان حامل وياهم انسى ضيم عدي ولسانه النكس واسلوبه ابن الشارع اهون منه عود معلم حرامات هيج واحد يربي اجيال
كمت اترزل على كلشي وانطي الاذن الطرشه زوج حماتي اشتغل وخلصت من وجوده بلبيت بس ابتسام بدت تخبث ويايه ودوم تذب الشغل براسي وتحرك عدي عليه وعمتي ترزلها مره مرتين وميفيد فجأه كامت مطيقني وادور عركه من لاشئ عدا بساميرها من اسبح والبس دشداشه نظيفه تتخبل حتى مكياج مااحط من وراها لان تعيب واطلع الحاجه من عيني
الفلوس قليله والعيشه صعبه والاكله كوه اكله واللبسه التنشك اخيطها مرات اتعب واتخربط واخاف اكول لعدي جيب دوا لان مريضة لان يگلبها عزه عليه
ناي : واكفه بلمستشفى واكل بأضافيري ومهدي يحاول يطمني واني مشلوشه اروح واجي واضرب ايد بأيد اذا صار شى بشرهب اذبحه لعدي
مهدي : هو احنا شفهمنا وانتي متخبله انطي مجال هاي عمتها ناطه بلبجي عليها وعمها مبين رجال فقير وتعبان
ناي : مهدي اختي دتموت جوه حامل بلشهر السادس وهيج يسوي بيها الزباله
مهدي : منو يكول هو الضاربها يجوز واكعه
ناي : لا هو متأكده السستر من طلعت وسألتها كالت وجهه ملخ من الضرب ونص جسمها ازرك وهو الحيوان لهاي اللحظه ماكو واسأل امه وابوه ميجاوبون
طلع الطبيب وكاال
الدكتور : البنيه صغير عمرها والحمل بهيج عمر خطر متفهموني ماعدكم لكمه توكلوها هي هاي مال زواج استغفر الله بتكم متعرضه لضرب كلش قوي خله عدها نزيف حاد الطفل مات ونزلنا اما هيه وضعها صعب عدها فقر دم حاد وسوء تغذيه صحتها ممتحمله الصار هي وربها ادعولها
