 |
رواية الابواب الخمس الجزء الثاني الفصل الثاني عشر بقلم ريام الهادي
بعد ما نبجي صرنه كبار
ونخاف الدمع من يمشي يعثر بالتجاعيد
بعنه الما نملكه بسوگ الاوهام
الابد مايوم نذكر لزمته الايد
وعله الواگف ركضنه وماوصلناه
كتلنا ارواحنه وماندري شنريد !
ودورنه شكثر ماشفنه شباچ
نگصده من نكفر اذنوبنه نريد
ماخف العذاب ويوم عن يوم
جاي نحسه كل مانكبر ايزيد
نچيك اعمارنه ونغلط بلحساب
وكل ساعه نموت ونرجع نعيد !!
الدكتور : البنيه صغير عمرها والحمل بهيج عمر خطر متفهموني ماعدكم لكمه توكلوها هي هاي مال زواج استغفر الله بتكم متعرضه لضرب كلش قوي خله عدها نزيف حاد الطفل مات ونزلنا اما هيه وضعها صعب عدها فقر دم حاد وسوء تغذيه صحتها ممتحمله الصار هي وربها ادعولها
قبل اشهر ...
ناي : فتحت عيني ثاني يوم اريد اركز اني وين تكول فاصله وجنت بغير مكان ثواني ورجعت تذكرت كمت اجر بروحي ومتكسر جسمي باوعت ماكو مهدي تذكرت اني مسبحت بس غسلت شكد عيب شيكول عليه وصخه اخذت صفنه الثول مال كعدت النوم هاي الصفنه ولا ابطل منها وكلت ويه نفسي اووووي قابل وين اسبح بلتواليت شيكول خلي يكول كمت احرك جسمي يمنه يسره وفتحت الكنتور وادور والله خوش ملابس اكو ولا شفتهن سحبت دشداشه وادور على منشفه ثانيه لان مال البارحه حسيتها توصخت لكيت وحده ثانيه اتذكرت گبل المنشفه مالتنا تتكطع وتمولح وينعل اهل اهلها بحيث اني انشفها مو هيه تنشفني يله نشتري جديده هسه اثنين بكنتوري
فتحت الباب ونزلت جان صوت جوه بله انزل شووون مديت راسي اشوف منو لمحتني حوراء وصعدت تركض
حوراء : صباح الخير عروستنا بلخير حبيبتي
ناي : بوستني وجانت الفرحه تنط من عيونها
يوم الالج
حوراء : امين خيه امين
ناي : عفيه اريد انزل اسبح
حوراء : ماكو سبح غير مره بلشهر
ناي : لا بربج ليش شكوو
حوراء : هههههه بسرعه تصدك امشي انزلي منو لازمج
ناي : استحي اخاف احد جوه
حوراء : كلهم بلصاله ومسدود الباب تعاي انزل وياج
ناي : نزلت وياها جان قريب من الدرج الحمام سبحت الحمام يخبل دوش وبانيو مثل حمام بيت خالو عمران وجبير اتذكرت حمامنه جنه گبر ومصبوغ نثر وبيه انجانه جبيره وطاسه صغيره وتخته نكعد عليها ونسبح رغم هذا راضيه بس كون ارجع بين اخوتي وعمه وبيبي بديت اسبح براحتي واتنهد كملت وطلعت
داصعد وطلعت عمتي عشتوو على كولت صالحه عمتي صارت وداد
وداد : بعد وكت جان ظليتي للظهر
ناي : صباح الخير
وداد : ياخير وانتي بيتي
ناي : من رخصتج
وداد : بسرعه عود نزلي اهلي يردون يجون
ناي : صار عفتها وصعدت شراح يخلص العمر وياج
مشطت شعري اباوع شون هم اظفره اخاف عيب عروس وشعرها مظفور جبته يمنه يسره مارهم كمت وشلته گبايه وحطيت كحل ومسكاره باوعت اكو عطور شميتهم طيبات حطيت ونزلت وبنزلتي طبت سدره وامها وام عبد شافني ويهلهلن
سلمو ودخلت وياهم للصاله جان مهدي كاعد وعبد وخالو شو هذا مهدي شافني طفر من مكانه وسحبني وطلعني
شبيك على كيفك
مهدي : ليش نازله بدون شال
ناي : هاااا نسيت والله
مهدي : مثل ماتذكرتي تبدلين اتذكري تحطين شى على راسج هاي اخر مره انبهه
ناي : اي افتهمت صعدت وحطيت شال ونزلت مردت وداد تتشمت بيه طبيت سلمت وخالو باسني من راسي وباركلي حطو الريوك وكعدت خالو كال روحي يم رجلج
واحنا كاعدين على الريوك جان وداد تكول
وداد : كان المفروض اهلج يجيبون صباحيتج وريوك العرسان مو احنا الي نسوي ولو همه منيلهم هيج ريوك يجوز بس بلمسلسلات يشوفون هيج اكل مخلصيها خبز يابس
ناي : دنكت خجلانه لان كدامهم كلهم حجت
عمران : احنه اهلها اني خالها وبمقام ابوها لو مو بعينج
وداد : اني قصدت على الصباحيه مقصدت شى ثاني
عبدالرحمن: اليسمعج عمه انتي مشتريه الريوك لوما اني وصلاح جايبينه صباحيه لاخونا همزين مو منج جان طردتينا هو حشو مصران ياعمه اكو واحد يحجي على اللكمه
وداد : هاااا ولك اكلتني بلسانك شحجيت وهيج ادافع
عبدالرحمن: شبعت اكوم اشوف شكو ورايه وهاااا عشاك مهدي انت ومرتك سمعت انت ومرتك وبس عليه
وداد : شفت عمران ابنك شون لسانه طولان
عمران : كافي حجي وخلي نكمل ورانه ناس تجي تبارك اكلو وفضونا
ناي : انهضمت لان عبد دافعلي وهذا الاسمه رجلي ساكت ومدري وين باله ولا جنه كاعد ياكل تحسه بغير مكان
كمت حتى بعدني مشبعانه سدت نفسي ورحت للمطبخ وكعدت حطيت ايدي على خدي وصافنه اكو قفص حاطي وبيه اثنين بلابل وصافنه عليهم جان تنمد ايد باوعت سدره وبيدها لفه
سدره : هاااج اكلي
ناي : شبعت
سدره : هو انتي شأكلتي لج كيمر يمووت حطيتلج عسل وياه ماادري تحبي لو لا اگلي يمعوده لشنو مضوجه نفسج
ناي : شفتي حجيها
سدره : بعد وبعد انطيها الاذن الطرشه ناي تره هيج اتعبين اذا كل حجايه ادققين بيها وتضوجين وتزعلين وتكومين من الاكل منا لشهر تصيرين هيكل عظمي
ناي : مو بيدي انغث من واحد يحجي هيج
سدره : گبري عقلج حتى متعبين مو لخاطر احد لخاطر نفسج هااج اگلي لج صلاح من الفجر طلع على اهل الكيمر حتى يجيبه تازه وتالي متاكلي
ناي : اخذت اللفه من ايدها وبديت اكل وهي بيدها الثانيه لفه الها
سدره : مكدرت اشيل الكوب مال الجاي اشربي ويايه اذا متضوجين
ناي : ابتسمت وبديت اكل ونشرب سوه ونضحك
حوراء : خيانه يامتستحن
سدره : روحي يم امج لتجي وادوخنا
حوراء : امي التهت ويه خالي اكلج نايه حلوو الزواج لا بشرينا
ناي : حركت جتفي بمعناه ماادري
حوراء : ياحظي واني كيفت كلت هسه اخذ تفاصيل دقيقه منج شو ياهي التتزوج متحجي
ناي : لهسه ماشفت شى حلو منه
سدره : الايام الجايه ان شاء الله تنسعدين
اروح اني عندي شغل بلبيت واذا احتاجيتو شى صوفرولي
ناي : شون نصوفر
حوراء : مو ميقبلون يطلع صوتنا نصيح فلانه اخاف واحد يفوت لزمنا عبدو وخلينا يعلمنا على التصوفر وياهي تريد الثاني نصوفر تجي تركض
ناي : وتسمعون عادي
حوراء : قابل بلشمال هياته شباك غرفتي يطلع على شباك غرفتها ومخلصاتها هيج
ناي : الله يديم محبتكم احسكم خوات
سدره : مو دائماً مرات تلكينا وحده لازمه شعر الثانيه لتغرج المجاملات
ناي : ههههههه معناها خوات اني وشوشه هيج ولو مالحكنا نكبر ونبقى سوه اووووف الْحٍمَدٍ للـّہ على كل حاال
سدره : اروح يله جاااو
ناي : اليوم كله خلص مجاملات وناس طابه طالعه وام عبد وام صلاح استلمو الاكل لان كلها ضاله على الغدا
اني مكدرت اكل هوسه وناس مااعرفها بقيت مستحيه لحد مصار الليل كل هذا الوكت واني مشفت مهدي غير مره وحده لمحته سبح وصعد فوك وراها نزل مبدل حتى مصاحني واني مهتميت عفته لو يريد جان صاحني
لليل سبحت لان حاره شهر السابع موت حر صعدت مكسره بدلت دشداشه قصيره وعدلت وجهي ومشطت شعري وكعدت جنت جوعانه واستحي انزل اكل تمشيت بأتجاه التلفزيون مااعرف شون افتحه مدري شدست واشتغل كيفت عندي بلغرفه واحد شغلته الهي نفسي بيه واگلب بلقنوات جان يدخل مهدي عدلت كعدتي باوعت بيده علاليك هوايه
كمت واني مستغربه
مهدي : تعالي اخذيهم من ايدي
ناي : كمت ولزمتهم مبين اكل لان الريحه تسطر
مهدي : هذا المخبل عبد جاب عشى كتله ناكل جوه مقبل اله فوك وبقى واكفلي بلدرج حتى اصعد بلعلاليك ومالي حيل سوالفه خلي نتعشى هنا
ناي : خلي اشوف فد سفرة علاكه افرشها بلكاع
مهدي : انزلي جيبي صينيه من جوه
ناي : نزلت گبل للمطبخ سحبت صينيه وبطل مي وداصعد جان اسمع وداد ورايه تكول
وداد : من اول يوم ادورين عزله بت ذكرى خوش والله بعد جم يوم الكاج جايبه طباخ فوك ومنزله درج وعازله من البيت كله
ناي : انداريت عليها وكتلها
مالي دخل مهدي كال
وداد : اي ذبيها براس ابني وانتي سوسة البله ولو حقج وين شايفه هيج اكل وهيج عيشه عينج ضيكه وبت فگر وادحسين بالاكل بلغرف
ناي : عفتها وصعدت واستغفر ربي
مهدي : وين صرتي
ناي : جنت اجيب مي مردت اكله حتى لينزل لامه عباله زعلانه ويراضيها
فتحت العلاليك اشكال جايب مشكل مشويات حتى ضلوع ومقبلات وعلاكه ثانيه مليانه حلويات نساتل كلها راقية باوعت هيج واني جوعانه كلت هم اكتل نفسي من الجوع شو هو ياكل ولا يسأل شتردين متردين انطيت الاذن الطرشه وبديت اكل براحتي
لان الاكل حار وطيب كلش واني محرومه من هيج اكل رغم مندمجه ماغابت اختي واخويه عن بالي اعرفهم اثنينهم محرومين مثلي
غصيت وكام يضرب على ظهري
مهدي : شبيج هاج مي
ناي : شربت وجريت نفس الْحٍمَدٍ للـّہ شبعت
مهدي : جنتي تاكلين بشهيه وفجأه وكفتي اكو شى
ناي : لا ماكو
مهدي : اذا تكدرين اريد جاي
ناي : اي عادي كمت وبقيت اباوع على الاكل بقه كلش هوايه
مهدي : نزلي اخاف احد يريد ياكل
ناي : معليه اني
مهدي : شنو معليك
ناي : اخاف انزله وعمه تحجي عليه وتتهمني منزله الفضاله مابيه حيل عفيه
مهدي : اني انزله
ناي : اي افضل عفته هو ينزله لان اكيد منتظرتني نزله كله وبقالي علاكه النساتل
باوعت اشكال بيها تنغصت لحوراء اخذت كم نستله ونزلت شافني مهدي استغرب عفته ورحت لغرفه بيبي لان حوري تنام يمها دكيت الباب صاحو تعاي
خوما نايمين
حوراء : لا مو وكت نومتنا هااي عروستنا محتاجه شى
ام ذكرى : تعاي بتي خلي اشوفج
ناي : تقربت منها باستني وانداريت على حوري هاااج
حوراء : هله بمرت اخويه المعدله
ناي : بقه اكل اسويلج
حوراء : لا شبعانه وهاي النساتل امزمز بيهن مشكوره داده
ناي : تصبحون على خير عفتهم ورحت سويت جاي همزين اكو بلقوري بس حميته اخذت الكوب وصعدت لكيت مهدي يگلب بلقنوات حطيت الجاي على الميز اليمه
محتاج شى ثاني
مهدي : سلامتج نامي اذا تردين
ناي : تمددت وانطيته ظهري
معرفت انام بلبدايه ضليت اتگلب وكل شويه افكر بشى معين لحد ماهو هو طفه التلفزيون وانطاني ظهره ونام
هااي الايام كلها علاقتي بمهدي ابرد من الثلج على كد سؤال جواب او يحتاج شى مرات اني كاعده وحوراء يمي يطلب من حوراء وميطلب مني واني هم التزمت الهدوء واي تصرف مبدر مني بلعكس شيكول اهز راسي بمعنى اي وانتهى وبسبب الخطار وداد ملتهيه عني او يمكن لان مهدي بلبيت متريد تسوي مشاكل كدامه وتبين هيه الحمل الوديع العمه النموذجيه
مرت ٧ ايام على عرسنا وغير يوم العرس مهدي مالمس شعره مني ولا تكول اكو بنيه نايمه يمه وهذا الشى بوقتها كان مريح وحتى كمت البس براحتي بلغرفه ومااهتم لوجوده
ثامن يوم كعدت على فتحت الباب تكول مداهمه مال امريكان وصوت وداد يلعلع مكروصه عبالك
وداد : كومي عيني نايمه بلعسل واحنا نخدمج
ناي : هااا عمه شبيج من الصبح
وداد : عمه العماج وسود گفاچ كومي هزي طولج نايمه للظهاري شعندي احد گلج كاعده بفندق لو بيت ام العتيك
ناي : رفعت راسي باوعت الساعه على الحايط بال٨ ونص
والله بعد وكت
وداد : اي عيني حقج بت الملك فيصل جنتي تكعدين ساعه ١٢ والخدم والحشم جوه رجلج ينظفون رجلج تريك وبدل وطلع وانتي مخموده
ناي : كايمه عمه بس لتعيطين
وداد : يله وراج شغل
ناي : كمت غسلت ولبست دشداشه طويله نص ردن وشلت شعري ونزلت
طبيت للمطبخ حميت الجاي ولزمت نص صمونه واكلتها ويه الجاي
جان اطب
وداد : منا وهيج تكعدين من وكت تلزمين البيت من البيتونه لعتبت الباب بس الكراج مالج دخل بيه مهدي ميقبل اطلعين هو لو واحد من الولد يغسلوه لان مشترك اريد البيت يبرج برج اريد اذب اللكمه بلكاع انزل اشيلها واكلها من النظافه بعد التنظيف عليج والطبخ عليه لان مااستنظف اطبخين النا
ناي : هزيت راسي بدون اعتراض باوعت البيت نظيف الكاع مرمر يسوي واهس للتنظيف رحت وره البيت جبت الماسحه والسطله والوصله وبديت انظف رغم نظافه البيت بس يتعب
وداد : ماكو مسح بلماسحه
ناي : لعد بيش امسح
وداد : مسح الماسحه مال جايفات العجوزيات بيدج تمسحين
ناي : عمه ظهري هيج يتكطع
وداد : هذا العندي يله فضيني وكملي قبل صلاة الظهر اريدج مكمله
ناي : ذبيت الماسحه وبديت وكل مااكمل مكان تعيط ارجعي بعده وصخ طلعت السبع ايام من عيني فتن خلتني اكول يوم من عمري بيت بيبي ولا العيشه هنا
كملت الشغل حتى الحمامات جلفتهن واكفه سانده نفسي على الحايط وحاطه ايدي على خصري من التعب صارت ساعه بلوحده الظهر كعدت حوراء وعيونها مورمه من النوم
حوراء : شعجب محد كعدني مبين امي ماكو
ناي : لا موجوده بلمطبخ
حوراء : هاي شنو نظفتي البيت
ناي : قصدج جلفته
حوراء : ليش مكعدتيني اساعدج
ناي : اوامر امج خلي اسبح واتمدد تعبت حيل
حوراء : خلي اشوف امي شجاها
ناي : سبحت وصعدت لغرفتي رتبتها وغيرت الجرجف وصليت وكعدت اسبح ضاق صدري واختنكت باوعت اكو بطل مي وكلاص خليت بيه المي واتذكرت عمه خوله من علمتني اذا ضاق صدري واختنكت وكارهه الدنيا
ترست الكلاص مي وكمت اقرا الفاتحه سبع مرات �وإن تعدوا نعمة الله لا تحصوها 12 مره �لزمت السبحه واسبح�يابارئ 40�ياصمد 40�ياذو الجلال والاكرام 40� نفخت على الكوب وشربته �وكلت بصلاه المغرب هم اعيدها بلكت ارتاح
تمددت ارتاح غفيت شويه كعدت على فتحت الباب كلت واحد اثنين يله وداد عيطي واني مغمضه احجي ويه نفسي سمعت صوت مهدي فتحت عيني
مهدي : بعدج نايمه
ناي : كعدت وكتله لا قبل شوي غفيت كعدت ساعه ٨ ونص
نزع ملابسه وكال
مهدي : لازم اسوي حل كل شويه صاعدين نازلين التواليت الفوك راح اسوي بوري واجيب دوش حتى واحد يسبح ويطلع گبل للغرفه
ناي : اي عفيه ياريت
مهدي : اليوم اكول لصلاح هو يفهم بهاي السوالف تنزلين نتغدا
ناي : اي نزلت وياه هو سبح وطلع وكعدنا ناكل اباوع امه انعم من الدخن وياه وتضحك وتسولف يمه الي يشوفها قبل كم ساعه شون تعيط وتأمر يكول بدلوها
تكررت الحاله يوميه اكعد بهبطه من وداد تفتح الباب جفت واطب مره تقصدت اقفله اريد انام كسرت الباب من الدك توبتني مااقفل
اما البيت يلمع ميتوصخ بسرعه لان جهال ماعدنا وهي اله يوميه امسحه من فوك ليجوه عدا الاثاث والحمامات وشر الملابس وحوراء من تريد تساعدني تعيط عليها وتعزيها وتصخمها وصلت مرحله اني اتوسل بحوراء تكعد حتى بس تسكت جنت مااريد اشكي لمهدي لحد مامره كعد اغسل بلحمامات وتزحلكت وايدي صارت على البوري وتأذيت شاغت روحي كمت ابجي مدري من التعب لو من الوكعه
حوراء : اسم الله شبيج شوو كومي
ناي : تأذيت حوري
حوراء : سوده عليه كومي عوفي كلشي اني اكمل
ناي : اااااخ ايدي توجعني شخطت ونضرب العظم
طلعتني وكعدت وجبت دهن حتى تحطه على الشخوط الترست ايدي هلمره شاغت روحي بلزايد
حوراء : كافي لتبجين شجاج دختي لو شنو
ناي : تزحلكت وعود ودت الزم البوري وكعت
حوراء : عوفي اني اكمل امي طالعه هي وام عبد للسوك مترجع هسه ابقي كاعده
بقيت كاعده وانفخ على ايدي اريدها تبرد رجعت راسي اريد يسكن الالم ماكو جان اطب
ابليس الاحمر هي شافتني كاعده ذبي الغراض البيدج بلكاع وعاطت يبوو صوتها شكد مزعج ومقرف
وداد : هااااااا يمه لان طلعت لعبتي بذيلج بعد حطي رجل على رجل واني اغسلهم الج
ناي : رفعت ايدي وكتلها عمه والله تعورت وكعت
وداد : مو ثوله غير واذا وكعتي طار راسج لو انكسر عظمج هنه جم شخطه كومي شيلي الغراض وفرغي المسواك بلثلاجه وينج حوور
حوراء : هياتني يوم
وداد : شسوين
حوراء : اكمل التنظيف
وداد : عوفي ناي تكمل البيدها وترجع تكمل تنظيف روحي يم بيبيتج اخاف محتاجه شى
حوراء : ماما ناي متأذيه خلي ترتاح واني اكمل شو هو نظيف
وداد : انجبي واسمعي الحجايه لااكوم اطلع قهري بيج
ناي : عوفي حوري اني اكمل ردتها بس تسكت كملت كلشي وصعدت اباوع ايدي ادك بروحي من الوجع انتظرت مهدي اجه شافني كاعده صافنه
مهدي : خيرج
ناي : شوف اني مااريد اشكي واسوي مشاكل وساكته هاي المده كلها
مهدي : شصار احجي
ناي : امك تأذيني حيل وبالعه حجيها دمرتني لا انام مثل الاوادم شغل وكراب من انت موجود متصيحني ومن انت ماكو تنگلب عليه شووف وشوفته ايدي وحجيتله كلشي جان يكول
مهدي : مكعد تنظفين بيت غريب هذا بيت رجلج وبيتج
ناي : اني مشكيت من التنظيف مستعده انظف ليل نهار بس مو بهاي الطريقه حتى المواعين مال الغدا والعشا متقبل حوراء تمد ايدها اله اني عدا كلامها الجاف ويايه وعياطها تكول عدوتها بعدني مصار شهر واني ادمرت
مهدي : والمطلوب شنو مني
ناي : احجي وياها خليها على الاقل متجرحني بلحجي من تشوفني تعبانه تسمح لحوراء تساعدني عمي البنيه تتوسل حتى تساعد وامك متقبل خلي نص عليه ونص عليه الرحمه حلوة
مهدي : احجي وياها شمسوين غدا اليوم
ناي : تمن وباميه
مهدي : يله متنزلين تاكلين
ناي : مااريد
بروده وردت فعله خلتني تندمت لان حجيت وياه هذا شكل واحد يجيبلي حقي لا ربحت هلمره يمكن افتح ابواب جهنم عليه
منزلت حتى المواعين ماغسلتهم ولليل جعت ونزلت سويت لفه واكل واتمشى رجلي اخذتني لبيبي قليل اشوفها او بالاحرى اتجنب شوفتها
فتحت الباب لكيت بيدها سبحه ورافعه راسها للسكف وتسبح وضعها مستقر
كعدت يمها شافتني ابتسمت ولزمت شعري
ام ذكرى : افتحي شعرج
ناي : ليش
ام ذكرى : افتحي
ناي : فتحته وكامت تتلمس بيه وعيوونها ادمع
ام ذكرى : نفس شعر امج النعومه واللون بس هي جانت قليل تخلي يطول
ناي : الله يرحمها
ام ذكرى : انتي ليش تحبين اختج هيج
ناي : منو شرهب
ام ذكرى : اي رغم هيه سبب كلشي صار
ناي : هيه شعليها ضجت وعله صوتي انتم بهاي العائله دومكم تذبون الصوج بينا عمه وداد ذابه الصوج بأمي لان مات رجلها وتمشي وتذب حرگتها بيه وانتي ذابه الصوج بشرهب هي عود سبب موتت امي بيبي انتي مره تعبانه ومريضه لتشيلين ذنب بنيه يتيمه شرهب مظلومه مثلي اذا مو اكثر
شعليها اجت للدنيا لكت روحها لا ام ولا اب وفوكاها يعيروها بت جليله ابتلت بأم حتى رحمه ماكو بگلبها ذبتها وراحت وحصلت منها التعياره والسمعه الموزينه
ام ذكرى : على كيفج بتي ماكلت شى
ناي : امي الوحيده البيكم طيبه ماحملت طفله صغيره ذنب الكبار واخذتها بحضنها واعتبرتها بتها ولو عدنا حظ بيه خير مجان اخذها الموت وخلانه ملطشه للرايح والجاي عفتها وكمت وهي تصيح ورايه
مهدي : شبيها الحجيه
ناي : مابيها عفته وصعدت اختنكت من كلشي ورجعت جبت الكلاص من اسوي هاي التسبيحات حيل ارتاح
حطيت راسي ونمت مااريد اشوف احد
ثاني يوم محد كعدني مدري شعجب كلت خاف احلم كعدت ساعه ٩ نزلت لكيت وداد وام صلاح يتريكن سوه كلت من هيج مكعدتني حتى ليكولون مأذيه جنتها سلمت وكعدت وسألت عن سدره كالت راحت لبغداد لان عدها شغلات وبحوث لازم تجيبهم تذكرت السنه الراحت عليه ممتحنت بلكت يصير امتحن دور ثاني اقنع مهدي
دخل خالو عمران صار فتره مشايفته سلم وكاال
عمران : بتي حضري نفسج نروح لبغداد
ناي : خفت وكتله بيبي بيها شى اختي
عمران : ماكو شى متردين تشوفيهم
ناي : ياريت امنيتي
عمران : اني نازل لبغداد واخذج ويايه
وداد : شون تطلع ياخويه ورجلها ماكو
عمران : انطيته خبر متفوتني هيج فوته
وداد : ميخالف يجي يله تروح
عمران : كومي ناي ورانه طريق
خزر وداد واني كمت بسرعه كلت خاف يصير شى فتحت الكنتور بدلت قميص وتنوره جدد مالابستهم ونزلت على حوري اخذت شال منها حتى مكياج ماحطيت وگاله وطلعت اركض
عمران :كملتي
ناي : اي خالو ركضت مثل الطفله المحبوسه اشهر وتالي كالو الها امشي نروح للمراجيح
طايره صعدت بلسياره واني احسب الدقيقه حتى نوصل
بقه خالو يسألني شلونه مهدي وياج وشونها وداد مكدرت اكول غير اثنينهم زينين
شكول مهدي ابرد من الثلج وحاسبني ماموجوده لو وداد النار المطيحه حظي حتى اذا افتح الثلاجه تعيط ميفيد الحجي اكتفيت بكلمة زينين ويايه واعتقد خالو عرف بيه اكذب
وصلت لبغداد افييش ياهواج وصلت للبيت
قبل لا انزل انطاني خالو فلوس كال اخاف تحتاجين مقبلت كال مو مني من رجلج باوعت ذني هوايه
عمران : ميخالف اخاف تحتاجين وتردين تنطين لتنحرجين ذني فلوس رجلج مو غريب
تشكرت من خالو ونزلت كتله شوكت تجي
عمران : باجر
ناي : هاااااا يعني ابات فتحت عيني ممصدكه
عمران : اي مردت اكول كدام وداد حتى لتضوجج
ناي : لو كايل خالو جان جبت ملابس ويايه
عمران : خلصيها شون مجان
ناي : اي هم صحيح شكراً خليت ونزلت
دفعت الباب ودخلت
لكيت شرهب كاعده ويمها بان وعمه واني شمرت روحي بنصهم جنت ممصدكه هياتهم يمي
بعد مافرغت شوقي ولهفتي عليهم ركزت وجوهم مو طبيعيه
شبيكم
بديعه : اكعدي بتي وسمعي الراح احجي
ناي : بيبي وين بيها شى
بديعه : لا مابيها نايمه قبل شويه نامت
ناي : لعد شكوو
بديعه : تدرين بعمج فلاح خلص عمرة عامل بلبناء مايكدر يشتغل غير شغله يطلع من الفجر مايرجع اله العصر وهو حاير بعيشتنا ومصرفنا وخاصه وره سالفه يونس سوده عليه وكعت عمتي وسدت المحل صار الحمل كله براسه وادويه عمتي كلها غالية خلف الله على ابوعبد هم يساعد ونكول جم دوب يضل الغريب يصرف حتى عيبه بحق ولدها ولو ذولاك جلدهم جلد خنزير مايحسون وهذا فلاح ياكل بروحه جان يطلع العشره وال١٥ وال٢٥ بليوم وساترتنا بس هاي الفتره الكتل والتفجيرات والتهجير خلت الناس ذاك من ذاك اليجازف ويبني ويذب فلوسه كدامكم بغداد مشعوله شعل وشباب حلوة مطشره بلشوارع عساه بحضه وبخته السواها
وهذا كله خله الوادم متبني وتنهزم وصار الشغل والعيشه هنا كلش متنراد اسبوع كامل عمجن يفتر كوه حصل ٢٠ الف لزكناها تلزك وبعد الحال ميساعد راح قبل جم يوم لولد صديقه بكربلا وكله ارجع اشتغل ويانه المحافظه امينه والشغل بيها زين وخاصه اطراف كربلا ناس تبني واكو شغل ودبرله بيت صغير بدون ايجار مثل الحرس نكعد بيه
ناي : يعني هم راح ترجعون
بديعه : مجبورين يمه العيشه خنكتنا هلمره اني ويه فلاح مااكدر اعارضه لان حالنا تعب كلش راح اخذ عمتي وبلال ويايه مااكدر اعوفهم منو الهم هنا اذا عفتهم مو بعيد ثاني يوم صالحه واختها يشمرن عمتي بلشارع
ناي : زين واحنا اني وشرهب
بديعه : انتن يايمه بيت رجولتجن والله يسعدجن
ناي : عمه رغم بعيده عنكم بس احس بالامان والراحه اقلها اعرف اكو بيت اذا ضاق الزمن بيه اجي بيه اشمر نفسي بحضنجن
بديعه : بتي اني لو عليه والحسين الشهيد مااعرف هنا لو على كص رگبتي ضيق الحال هو جبرنا
شرهب : اني منو الي بله ناي خالو عمران
بديعه : اختج يمج هياتها ديالى من بعدها ساعه زمان واختج يمج اعرف بيجن ضايجات وانقهرتن وحقجن بس وضعنا تعب فوك متتصورون
شرهب : والبيت منو يبقى بيه
بديعه : صالحه ورجلها
شرهب : يعني حرم البيت عليه
بديعه : الله ليعوزج اله بنيتي خليت مرتضى يخابر على ابو عبد حتى يجيبج ويروح لشرهب ويجيبها ماردت اروح بدون مااشوفجن
ناي : شوكت ترحون
بديعه :عكب باجر
ناي : الله يسهل الكم كمت واني الدمعه بطارف عيني حقهم العيشه حيل صعبه على عمو دخلت لبيبي جانت نايمه تمددت يمها وحطيت راسي وابجي بهدوء اشتاقيت الها وراح اشتاق اكثر بقت ابجي واباوع عليها لحد ماحست وفتحت عينه تفاجأت نايمه يمها حطيت راسي بحضنها
عمشه : يمه يبعد رويحتي نايه انه مااحلم
ناي : لا بيبي بحضنج اني
عمشه : شون كيفج يمه عساج مرتاحه
ناي : مسحت دموعي وعدلت كعدتي وابتسمت بوجهه زينه
عمشه : چا عيونج يانايه ماتكول هيج
المدهربه ام راس مدعفس شعامله بيج
ناي : وداد
عمشه :مكدرتج ولاعبه طم خريزه بيج اعرفنهه تطوه مامش خير منها
ناي : زينه ممسويه شى هي بحالها واني بحالي
عمشه : تجذبن عليه بنيات صمد ذيج زلمتهه داكها دك وحامس افادها حمس ومن انشد عليهه ترد بخير وهيه كل خير ماجاي صوبها وانتي مثل اخيتج باذن جبدج بط وديد وتلوفدين تلوفد وتجذبين
ناي : الْحٍمَدٍ للـّہ على كل حال عوفج مني راح ترحين ويه عمو فلاح
عمشه : يايمه شنهي بيدي چا انه يوم ماطحت ضليت ورگه يابسه ياهو ينفخ بيها اطيرن
الچلمه محسوبه عليه وانه لون ضليت ويه بت غنيه موش بعيد تگتلني وانه نايمه هاي ماتعرف حرمه الله ولا تخافه وگلشي اتوقع منها چا يوم مارحتن وضليت وحيدي جبت بت بدعه تنام يمي عبن گلشي يصير ذني مجلوبات ويردن اموتن اليوم گبل باجر
ناي : اسم الله عليج بيبي يومهم گبل يومج
عمشه : ياااا امين يمه امين
انفتحت الباب وطبت شرهب واجت كعدت من الجهه الثانيه كل وحده بينا اخذت مكان ونباوع بعيونه واني وشرهب نعرف گلبنا ديبجي دم بقيت اليوم كله كاعدين بغرفه بيبي سألت عن صالحه كالو يم امها بلبصره كلش ارتاحينا لان مراح نشوفها ولا نشوف بتها
اخذت دشداشه من عمه لبستها
كعدنا كلنا على الغدا مثل گبل اني وبيبي وعمه وشرهب وبان وبلال ناكل ونضحك مسويه عمه دولمه تخبل مثل منحبها حمره وحامضه ولاجعه وياها خبز حار وخضره وهاي شرهب تكمز لان تتوحم اباوع عليها تتعارك ويه بلال على عضود السلك وابتسم بقهر مشافت شى من عمرها وهي كتومه متسولف كلشي اليه ولا لاحد ومن نسألها تمدح بعمها وعمتها ومتجيب طاري زوجها معناها موزين وياها لان لو زين جان بين من كلامها
للعصر طلعت الفلوس حسبتهن ٤٠٠ الف قسمتهن نصين حطيت بيد عمه ٢٠٠ وبيد شرهب ٢٠٠ رغم اثنينهن ماقبلن وهوسن اني اصريت وكمت اعيط واهوس وياهن لحد مقبلن كيفت وكلت همزين اخذتهن من ارجع اتشكر من مهدي
خلصت اليوم كله نضحك ونسولف جن وحدتنا تودع هاي اللمه حتى من نمنا كلنا بغرفه بيبي شكد تمنيت هذا حالنا ولا اني متزوجه ولا شرهب وصالحه ماكو بلبيت وعايشين وحدنا والله مستعده اطلع اشتغل المهم تبقى هاي لمتنا وحدنا بدون ذني المسمومات وارجع انفض خيالي وارجع للواقع والي احنا بيه
بيومها مرتضى اجه خطيه ابتلى بينا وخابر عمه خوله فتح سماعه وبيبي سمعت صوت عمه وتبجي لازمه الفوطه وتمسح بعيونها كلت الها احجي وياها تأشر متقبل
خوله : يمه ادري بيج سامعتني يمه اني احبج لو شمسوين بيه وداعت كسرتج لا اخذ حقج وحق ذني البنات تعرفين بيه كدها يمه يجوز خلفتي ٥ ولد واني البنيه الوحيده وعيونج كلهم نسوان واني الزلمه الوحيده البيهم
شرهب : اي والله ياعمه هههههه
عمشه : من خفت لهلسان كضي لا احشه
خوله : ههههههه اروح فدوة لصوتج حشي راضيه وعلي اني اطلعه الج وحشي
عمشه : اخيج شونه
خوله : شونه كلشي مابيه يطورد هنا وهنا خافي على نفسج
ناي : مديت التلفون حتى تلزمه وتحجي وياها دفعته
عمشه : ميلي مني مااسولف وياها انه ماراضيه عليهه
خوله : ترضين يمه واني منج بكلشي راضيه
عمشه : يله ولي دوختينا
خوله : دير بالج على امي بدعه امانه يمج واني كل ميصير عندي ادزلج فلوس دواها
عمشه : مااريدن شى منج الله لايعوزني خليهن الج
ناي : بقت عمه توصي كل وحده بينا وتالي مرتضى كام يلطم راح الرصيد وسدينا حيل ارتاحينا من سمعنا صوتها من انسد الخط كالت بيبي
عمشه : اكلجن خوله مريضة گلبي وجر عليها
شرهب : مو صار ساعه ترزلين بيها والله ياعموشه منعرفج تكرهيها لو تحبيها
عمشه : ام الگمل چا غير وحيدتي انه احبنهه عبنها الوحيده لجن سالفتهه ماتنسي
بديعه : والله ماكو احن من خوله وصارت بعد ياعمه كدامج الحظ مكعد وياها
عمشه : اييي يايمه حظها اسود مصخم
منين اجيب
حظوظ للحضه مايل يركض
وره ام عطوب وعاف ام الجدايل
شرهب : هله بلشاعره عمشه تصفيق
عمشه : كضنها ليه من شعفتها لاتشوفين روحج حبله چاالصخيله هم تولد
شرهب :اني وياها نجيب سوه
ناي : بقينا نضحك ونسولف حتى نوم منمنا جنت حيل مرتاحه وبليل سوينه تمن ماش وروبه (لبن) وكعدنا ناكل وبلبل يلعب بشعر شرهب واني افرك برجل بيبي وعمه تعدل بلملابس مال بيبي حتى ياخذوها وياهم
جنا حيل محتاجين هاي اللمه بس الحلوو ميدوم
وثاني يوم ودعتهم جنت حاضنه بيبي وابجي واتنقل بينهم مره بيبي ومره شرهب ومره عمه وبان حتى بلال كل واحد بيهم جنت اودعه
منعرف شوكت يجون سمعت الهورن اجه خالو قبل مااطلع كلت والله وفرغ الج البيت ياصالحه والردتي صاار
عمشه : لاتنقهرين يايمه مايصير ورب الخلقچ مايصير توكلي على بيتج
ناي : بستهم وحضنت شرهب وطلعت رجعت لديالى ودموعي على خدي وطول الطريق خالو ساكت لان يعرف الوضع
من طبيت طب خالو توقع وداد تحجي لان بتت ومن شافته سكتت وعيونها ناطتهن عليه لبستها وصعدت اني بيا حاال بطرانه
بيومها مااجه مهدي ومااهتميت لليل يله حاطه ايدي على خدي وهو دخل مسحت عيوني
مهدي : الْحٍمَدٍ للـّہ على سلامتج
ناي : الله يسلمك شكراً لان قبلت ابات
مهدي : اهلج شونهم
ناي : يم الله
مهدي : ليش عيونج حمره
ناي : هيج ماكو شى وبرطمت
اجه سحب ايدي وكعدني بصفه وهاي اول مره يسويها
مهدي : لتبجين حقهم يدورون على رزقهم اني لو مثلهم اسوي هيج
ناي : منو الي بعد ميرحون صارو بعيدين
مهدي : هياتها كربلاء الي يسمعج يكول راح يرحون لامريكا
ناي : حقك متعرف شكد وجودهم مهم من راح يرحون حسيت روحي وحيده
مهدي : اهلي موجودين وكلهم يحبوج
سكت شويه وكال اني هم موجود لتنسين اني زوجج
ناي : باوعت عليه جان كلامه هادئ ورزن وبنفس الوقت حنين
الله يحفظلك اهلك
مهدي : واني ميحفظني اموت عادي
ناي : ابتسمت وكتله اسم الله عمرك طويل
مهدي : لتبجين بعد كل منروح زياره اخذج ويايه تشوفيهم
ناي : لزمت ايده بلهفه وكتله ياريت باوع على ايدي سحبتها
جان يمد ايده على خدي ويتلمسهم واطراف اصابعه تتنقل بين خدودي وشفايفي بلحظه سرت مثل الكهرباء بجسمي غمضت وايده تتجرأ اكثر تنزل على جسمي والايد الثانيه ترفع شعري بهدوء وبدا يبوسني بكل رقه بوضعي اني ومهدي هيج حاله غريبه كلش
بقيت هادئه لان مردت يصير شى ونتجادل
نومني على الجربايه حسيت عنده شوق اليه مشاعر اول مره اختبرها يمكن لان جنت بعيده عنه البارحه تقرب مني واني ابد مارفضته بلعكس تركت روحي اندمج وياه
لمساته وحنيته خلتني اهدأ واستمتع بكل حركة منه
لحد مكمل كلشي كاام وعافني مثل الواحد جان بحلم حلو وفز على وداد
كمت هو سبح ورجع لمكانه بدون حتى ميحجي ويايه طلعت سبحت لكيت مسوي الفوك دوش همزين خلصت جنت كل ماانزل اسبح امه تعوج حلكها
بعدها تمددت يمه ونمت
ومن يومها علاقتي بمهدي عاديه كلش كل فتره يتقرب مني ويكوم لا غزل لا مشاعر لا حبيات صارت علاقتنا مجرد تبادل واجب شرعي اثناء العلاقه مشاعر ولمسات وعاطفه وبعدها نرجع لوضعنا الطبيعي
مر اربع اشهر على زواجي مكدرت اداوم راحت السنه عليه وكلت بلكت اكدر ارجع السنه البعدها
اربع اشهر ونفس اليوم يتكرر الفرق وداد كامت تشد اكثر واني ابلع واسكت من يوم ماشكيت لمهدي وماسوه شى بطلت اشكي الفرق شى واحد حوراء كامت تساعدني عناد بأمها لان بيبي حجت ويه وداد وكالت اني احجي لمهدي واخلي يلعب بيج طوبه اتوقع خافت لان بيبي اذا حجت لمهدي يصدكها وميكسر بخاطرها كامت شالت المطبخ وصار مسؤوليه حوراء وهذا اهم شى باقي البيت عليه واذا شافتني كاعده او نايمه مترتاح اله ترجفني
كاعده العصر وسدره تحظر تنزل لبغداد اخر سنه الها اجه مهدي وجهه ميتفسر باوع على سدره بالاول وهي مدارت بال رجع انتبهه عليه وكاال
البسي ناي
ناي : خير
مهدي : اختج شويه تعبانه
ناي : يمه شرهب كمزت شبيهه عفيه شبيهه
مهدي : البسي هسه وبلطريق احجيلج
ناي : ركضت جريت عبايه اسلاميه مال حوراء تلبسني وحطيت الشال ولكيت شحاطتها وركضت ويه مهدي جنت فاصله من الدنيا كلت اختي شصار بيها
شون راح نطلع وممنوع تجوال
مهدي : نطلع مالج دخل
ناي : جان الطريق فارغ وبس سيارتنا تمشي والجو بيه بروده شهر ١١
الفتهمته اختي واكعه مخابرين على خالو ومبلغي وخالو مخابر على مهدي واجاني ركض
وصلت للمستشفى وحالتي حاله شفت عمها وعمتها يبجون عليها اسألهم ميجاوبون غير ادعيلها
كمت الطم اختي راح تروح مني وطلع الدكتور وبلغنا بحالتها لو تهسترت
مهدي : على كيفج فدوة الها الطفل المهم تكوم بلسلامه
ناي : ياطفل ميهمني اني يهمني اختي وبس
كعدت باب العنايه وابجي شكد حاولو يسكتوني ازيد بجي اتخيل حالها شصار بيج ياروح اختج
شرهب : عشت ويه عدي قهر وجوع وظلم تحملت كلشي لسانه المتبري منه لو اخلاقه الزباله بخله المينجرع كلشي منه حطمني المصبرني على عيشتي ابوه وامه
روحت بيبي وعمه خلت حالتي تعيسه مالي ظهر وين انطي وجهي اذا تعاركت وزعلت منو يلفيني اعرف ناي متقصر بس عمتها جلبه تأذيها اضطريت اتحمل كلشي واكعد واسكت وين اولي
مرت اشهر الحمل بطني كبرت اگلي قليل لان العيشه صعبه وهذا عدي ولا يحس ولا يهتم راكع الكل عرض الحايط اتعب اتمرض اني احير بروحي مرات من الجوع احط خبزه وخيار اكل لا لحم لا دجاج ولا شى يسند گلبي كل هذا واكو الْحٍمَدٍ للـّہ افضل من غيري
بديت احب الطفل البطني وخاصه من احط ايدي واحس بدفراته
ومرات اتخيل نفسي شايلته والعب وياه كمت احسب اله يوم يوم مرات اشيل همه شون يعيش هيج عيشه اذا احنا كوه اللكمه ناكلها هو شون
ومرات اكول انطي روحي وابقى ارضعه من صدري لحد ميشبع واعوضه حنان الام الي انحرمت منه
بيوم عمي اجه تعبان ويكح وضعه صعب ودوا المستوصف مكام يجيب نتيجه الليل كله يون ويكح روحه تطلع اموت قهر عليه عمي طيب وحنين وماعنده اذيه بس الله بلاه بخلفه ماعدهم ذره رحمه لزمت عمتي وعرفت
يرادله اخصائي حجيت ويه عدي كال ماعندي ولطم شكد كرهته اعرف عنده ومينطي رجعت لابتسام كالت رجلي كوه مدبر عيشه جهالي لج متشوفين ابوج كالت اصبريلي شهر بلكت الم باوعت عليه مكلت شى غير
الله ينطي جوز للماعنده سنون وعفتها ومشيت قصدت الله انطاهم اب وام كل حنيه الدنيا بيهم وهمه خلفه عار ميستاهلون
بدا عمي يتعب اكثر وكام حتى المي يشربه يتقيأه متحملت منظره وهو يكول لعمتي لزميني القران يجوز انام مااكعد
كعدت يم راسه اشهك من البجي ياربي منو اليه ومنين اجيبله هسه اني الرعنه لو ماخذه التلفون الكالت عليه ناي وخالته يمي مجان بعته هسه وبفلوسه اودي خفت اخذه وعدي ياخذه مني مثل السوار
بقيت حالي حال الطير المذبوح للنص لا هو ذابحي ومرتاح ولا هو معالجي عايفي ينزف
شفت عمتي لازمه ايد عمتي وتكوله اتشاهد ورايه متت بدمي
صعدت واني بطني كدامي گلبت الغرفه ادور وين فلوسك يلجلف وينهن
مبقيت مكان يعتب عليه ساعه ونص ادور نتفت الغرفه نتف حتى الفراش لحد مالكيتهن بجيس وره الكنتور مدحوسات مسويهن اكثر من واحد من عساهن انحطن على كبرك جريت واحد وفتحته واخذت منه
ولبست ونزلت يله عمه
ام عدي : وين يمه
شرهب : ناخذ عمي للدكتور
ام عدي : يابتي منين ناخذه
شرهب : امشي فدوة اروحلج صحنا ولد جيرانه جاب تكسي وشاله هو وابو التكسي ورحنا ولان عمي خوش انسان الله وكفله الخيرين ابو التكسي بقى ويانه لان شاف حالتي حامل وعمه مره جبيره بقى ويانه واباوع عليه وبگلبي اكول الله يوفقك ويرزقك هذا الغريب حن على عمي وهو لا يعرفه ولا شايفه وابنه العار يسمع كحته ليل نهار وماهزه مرضه
دخلنا للطبيب وتحاليل واشعه طلع التهاب حاد بلرئه انطانه ادويه وجانت غاليه
اشتريت علاجه كله كلت للطبيب اريد علاج كامل مااكدر اجيبه بعد
بيومها صرفت ٥٠٠ الف بين طبيب وتحاليل وادويه وابو التكسي مقبل ياخذ كروته بقيت اني وعمتي ندعيله بلعافيه على اهله على هاي التربيه والشهامه
كل هذا رجعت مرتاحه وعمي كوه يحجي ويكول الله يرضى عليج يابنتي ومدمعه عيونه
وعدي اجه حتى مسأل اخذتوه منين فلوس كلشي ماسأل عباله بلمستوصف
بديت بيدي انطي العلاج لعمي وجيرانه يجي يضربه ابره ومياخذ لان يحب عمي وخلال ١٠ ايام كام بلسلامه جنت حيل فرحانه لدرجه امشي واغني حتى سالفه الفلوس نسيتهن
لحد ما مره رجع من وكت مبين قابض راتبه لان يتختل صعدت اكول اله تتزقنب شو اول مدخلت جرني من شعري وقفل الباب
عدي : فلوسي ناقصه وينهن شرهب
شرهب : يافلوس
عدي : لتغشمين نفسج ناقصات ٥٥٠ الف اليوم احركج اذا مطلعتيهن
شرهب : وخر مني انكسرت ايدك قابل اني حراميه
عدي : انتي مو بس حراميه وبت شارع وزباله تمدين ايدج على فلوسي اذا مطلعن هسه اذبحج
شرهب : دفعته حيل وعطت بوجهه اي اخذتهن وراحن انصرفن
جان يلزمني حييل ودك راشديات ودفرات ويعيط ويسب كحبه بت الگلب وين صرفتيهن اليوم احرك اهلج لو انبش ابوج من كبره هسه ترجعيهن
جانت ضرباته مال واحد مخبل حتى مفكر هاي اخاف تموت وحامل اني جوه ايده ولازمه بطني خايفه على ابني والباب تكسرت يدكون عليه حتى يفتح وهو فاقد كل هوسه وعياطه رجعي فلوسي
عدي : لج وين صرفتيهن على ياكواد
شرهب : تفلت واني حلكي يقطر دم وجسمي يملخني من الوجع ماكو غيرك الكواد شايفني مثلك لك صرفتهن على ابوك المريض راد يموت وانت عااق متحس بوجعه
عدي :اذا ماازوعج الفلوس حتى اتوبين اتمدين ايدج على غراضي ياحراميه يافاسده يابت الحرام
شرهب : هنا ضرباته تحولت دفرات على بطني لحد ماوكعت وعطت وصارت رطوبه جوايه وماوعيت على نفسي اله وناي فوك راسي
شفتها شهكت واصيح ابني ناي
ناي : بقينا يومين ننتظر واني على ساعه اخرب لا اكل وبس مي ولوما ينشف حلكي حتى المي مااشربه كعدت ويه امه وابوه وعرفت سبب العركه انجنيت ابوه جان منزل راسه ومستحي وامه تبجي انقهرت على حالهم وحقد على الگلب عدي حتى مهدي صار عصبي وكل شويه يكول خلي تكول بلسلامه وحسابه يمي
يومين وكعدت معودت وعت جنت ممصدكه اختي وعت ابجي ويه بجيتها
ناي : لازم يعفن بلسجن هذا واحد نذل
ام عدي : ابوس ايدج يمه لتضيعون مستقبله
ناي : لعد من راد يموت اختي حلال لو بتج خاله تقبليها
ام عدي : شرهب والعباس ابو فاضل اعز من بتي ومن طاحت جن روحي طاحت گبلها والراح ابن ابني والشاهد الله نار تاكل بيه وبأبوه شنسوي هذا حالنا الله بلانه بولد مايحس بينا ربينا وتعبنا وكبرنا وماجازانه بس مانرضى يضيع عمره بلحبوس
شرهب : جنت اسمع واني ميته قهر ومكسوره طب عمي يبجي وكعد يم ايدي ويبوس بيها حتى مااشتكي شكد حنينين عليه وشكد هو حقير وياهم دمعاته وشيبانه وهو يتوسل بيه كسرت گلبي عمي مريض اذا مات مااتحمل اشيل العمر كله ذنبه
باوعت عليهم وكتلهم مااشتكي بس يطلكني ماارجع ساعه يمه
شكرا لزيارتكم عالم روايات سكيرهوم
