رواية بنت الكهوجي الفصل الثاني عشر بقلم احمد
(#ملاحضة : اخوان باجر بأذن الله يبدا قيام العشر الاواخر وتعرفون سهر بالليل وطلبات البيت بالنهار فاذا صار تقصير مني سامحوني راح احاول ما اقصر بس مانعرف شلون تصير الضروف🌷الكاتب احمد )
تميم : انطيت اية الفلوس وتعللنا سوا لحد ما تأخر الوقت وبعدها توجهنا لغرفنا لان كلنا ورانا دوام باجر الصبح
ياقوت : بقيت عند ام فائق وللامانة رغم ضروفي بس شوية تونست وياها هي والبنات لان جنت مشتاقة الهن هواي
وبنفس الوقت صارلي مدة طويلة مو شايفة بشر غير بابا فجان وجودهن وياي كلش مفيد لنفسيتي لان هن من نوع الي يگضن الوقت كلو شقة وضحك
اتصل بابا وگال اليوم ماراح يگدر يرجع ووصاني ابقى عند ام فائق وانتبه لنفسي وسكر وتخبلنا اني وام فائق من هالغموض الي شايلو بابا
ام فائق فضولها مو تدخل او شي جانت خايفة علي اني تخاف ان فقدان ماما وباسم اثر على بابا والصدمة تخليه ما يعرف يتصرف
بس ما بيدها شي تسويه واني بالنسبة الي اطيع بابا مهما كانت ضروفو ومهما كانت اوامرو مستحيل ارفض لو يكون اخر يوم بحياتي
مر اليوم طبيعي ونمت ويا البنات بغرفتهن وثاني يوم ويا الضهر وصل بابا واجى يريد ياخذني من بيت ام فائق وهي رفضت
شگد حاول گالتلو الغدا عالنار تتغدون انت وياها وبعدين تتوكلون وخلال هالحجي وصل زوجها وهم حجى ويا بابا وقنعوه ودخل للاستقبال
جنت خايفة انو بابا يحجي عن شغلو لابو فائق واتفشل گدامهم لان جذبت بس گلت اذا حجى اگوللها خفت انو ما يريدني احجي لذلك جذبت
من تغدينا وكملنا رجعنا لبيتنا جان بابا ينتظر شوية يتأخر الوقت علمود نوصل هناك ويا المغرب ومن صار الوقت اخذنا جنطة الملابس وطلعنا
واخذنا تكسي للگراج ومن الگراج طلعنا للعمارة ويا المغرب وصلنا هناك ودخلنا للبيت تعبانين تعب ما صاير واعتقد تعرفون تعب السيارة بالمسافات الطويلة
سويت عشى خفايف بس نسد بيه جوعنا وتركت بابا بالغرفة ومن كملت العشى رحت حطيتو گدامو وگال تحظري باجر ننتقل
ياقوت : وين
- لشغلي الجديد
- وشنو شغلك الجديد
- گهوجي
- باستغراب .. بس ش شلون يعني
- يعني راح اعوف الشيخ هذا واشتغل يم غيرو
- شنو السبب
- بوية معتصم مدا يخليني براحتي واني انسان ما احب سوالف المزعطة والجهال واذا بقيت وياه راح نتخارب واتفشل گدام الشيخ
ثانيا الشيخ الله يطول بعمرو نهايتو ينتقل لرحمة ربو وبذاك الوقت يجوز انطرد طرد فاني ليش احط نفسي بهالموقف واني بغنى عنو
- ومنو يگول الي تشتغل يمهم مو مثل معتصم
- إن شاء الله مو مثلو على كل حال اتفقت ويا الشيخ الجديد وانطيت خبر لهذا وبعد شوية اروح اتعلل يمو واعتذر منو وارجع
- تمام سوي الي يعجبك
تعشينا وبعد العشى راح للشيخ گضى نص ساعة تقريبا عندو ورجع من هناك عيونو بگصتو حتى اني خفت منو من گد مو معصب
بقيت بمكاني ماعرف شسوي من الخوف وهو گعد بفراشو وصار يفرك صدرو رحت ركض جبت گلاص ماي ومديتو الو بخوف
باوع بعيوني وصفن شوية بعدها اخذ گلاص الماي شرب شوية ونزلو وسحب راسي لحضنو وگال ما اخليج تتأذين لو يبقى اخر يوم بعمري
- رفعت راسي من حضنو .. منو يريد يأذيني
- حاليا محد
- لعد ليش معصب
- بسبب معتصم تعاركنا اني وياه ووصلت للما تصلح
- اووووف شگد صرت اكره هالمعتصم
دا نحجي واندگ الباب گال بابا روحي لغير مكان وراح يفتح الباب اني كالعادة افتريت من ورا البيت وصرت يم الشباك وانتظرت
شوية ودخلو بابا والشيخ للغرفة وكل الي اجى ببالي ان الشيخ جاي يتعارك ويا بابا علمود ابنو بس تفاجأت من كلامو ويا بابا
الشيخ : ابو باسم اعرف معتصم غلطان بحقك وقبل ما اجيك شبعتو رزايل واني انطيتك حقك وانت تعاملت وياي مو وياه وبصراحة كلش خجلان منك
- شيخنا اني تنازلت عن حقي وحتى اذا اخذتهن منك اعوفهن هنا بالبيت واروح
- تردني يا ابو باسم واني اجيتك للبيت
- ما عاش الي يردك شيخنا بس اني اعتبرهن دفعة بلاء وهاي هي
- اقسم بالله ان ما اخذتهن لاغضب على معتصم واتبرى منو ليوم الدين ولا اني ابوه ولا هو ابني
دا اگلك هذا حقك ومعتصم ما الو اي دخل حتى لو انطيك فوگ حقك فلا تشيل همو وخيولي هو تالي شاب مو واعي على نفسو
- خلص شيخنا خلص هاي هي
- تفضل حقك وامانة الله تعذرني والله خجلان كلش منك
- توكل بالله شيخنا سهلة ما صار شي
- يلا اني اتوكل واعوفك ترتاح وراك طريق طويل باجر (عبالو نرجع لبغداد)
- خليني اضيفك جاي
- تسلم ينتظروني والله جماعة بالمضيف وماگدر اتأخر عليهم
- لعد براحتك
- يلا مع السلامة
- الله وياك شيخنا
من طلعو رجعت للغرفة واسمعهم يتناقشون يم باب البيت بس صوتهم مو واضح وشوية واجى بابا گعد بالغرفة گلتلو فهمني شصاير
- رحت للمضيف وگعدت ويا الشيخ .. اعذرني شيخنا ما انطيتك خبر بوقت بس صار ضرف مفاجئ ولازم اعوف الشغل
- ابو باسم امانة الله اذا محتاج فلوس لو شي احجي اني اخوك
- الله يعزك لا والله شيخنا مو موضوع فلوس
- زين انطيك مهلة ترتب امورك وترجعلي
- والله شيخنا ياريت شغلة ترتيب امور على كل حال اني اجيت اعتذر منك
- لا يا ابو باسم ماكو اي داعي للاعتذار .. طلع فلوس من جيبو .. وهاي فلوسك مال شهر الي راح
- بس اني ما كملت شهر
- بضحكة .. عود اذا رجعت ما احسبلك اول 5 ايام
- ههههههههههه لا ارجعلك ال 5 ايام واذا رجعت ترجعهن الي
معتصم .. دخل للمضيف .. شعندك هنا مو عفت الشغل
الشيخ .. بصدمة .. معتصممم شهالكلام
معتصم : يابة هو عاف الشغل وحتى ما انطانا خبر علمود نجيب غيرو بعد كل الي سويناه وياه وجاي بكل عين صلفة علمود ياخذ فلوس
ادم : وگف گدام معتصم .. شوف ولك معتصم مو عبالك اذا ابن شيخ معناها تتجاوز علي وابقى ساكت فاحترم نفسك احسلك
اولا اني اجيت اعتذر من ابوك لان ابوك يستاهل الاحترام مو مثلك شايف نفسك اكبر من حجمك بهواي
ثانيا الفلوس ما جبت طاريهن ودا اقنع ابوك ارجعلو فلوس ال 5 ايام الي ما اشتغلتهن فلا عبالك ميت عالفلوس
معتصم : لو مو ميت عالفلوس ما تجي من بغداد علمودهن
ادم : من گال هيج دفعتو كل قوتي وگعتو بنص المضيف وهو تخبل گام يريد يتعارك وياي وصار بيناتنا ابوه واخوانو
اخير شي عصرت الفلوس بايدي وضربتهن بوجهو وطلعت من المضيف اجيت هنا ومثل ما شفتي اجا ابوه يعتذر مني
ياقوت : الله لا يوفقو شنو شايف نفسو هذا
- عبالو الي يشتغل عندهم عبد مو انسان انجبر يشتغل علمود ياخذ لگمتو بالحلال لهذا اريد اعوف الشغل هنا ونروح لغير مكان
- لا مو هذا السبب
- شنو
- مو هذا سبب ترك الشغل بس ما اريدك تحجيلي اعرف عندك اسباب خاصة وراح يجي يوم تحجيهن الي بس الله يعلم ايمتى
- الله كريم إن شاء الله احجيهن الج بالوقت والوضع الي ببالي
- آمين .. يلا خلي ننام ورانا طريق طويل باجر
- باجر راح اوديج لام فائق بين ما اضبط وضعي بالبيت الجديد واجي اخذج
- منو ينظفو منو يرتب الاغراض والملابس
- ذني مو مشكلة بس ماگدر اخذج لان ما وياي مفتاح البيت الجديد واكيد راح يجي احد من اصحاب البيت ويشوفوج
- تمام براحتك
بعدها نمنا وثاني يوم بابا وصاني اجمع الملابس بجنط وابقى بالترك ونفذت وخلال تواجدي بالترك اسمعو صار يحجي ويا زلم
وعرفت انو جايب عمال يساعدوه لان ما يگدر وحدو ومن كمل انطاهم حسابهم واجى گال يلا بوية خلينا نتوكل على الله
طلعت وگفت عند السيارة وراح هو عالسريع انطى المفتاح لواحد من ولد الشيخ واجى هو صعد بالنص واني صرت من الجهة الثانية
ولان جنت من جهة البيت والمضيف من الجهة الثانية فمحد شافني من ولد الشيخ الي جانو واگفين يم المضيف
مشت السيارة وجانو يتناقشون بابا والسايق واني اباوع للمناطق من تحت النقاب وعقلي بغير مكان افكر شراح يصير ويانا اني وبابا بالمستقبل
من وصلنا بغداد صاحب سيارة الحمل انتظر بالگراج واخذنا سيارة تكسي وصلني بابا لام فائق ورجع للگراج وكمل طريقو
ثاني يوم العصر اجى اخذني ورحنا اني وياه للرمادي وبوقتها ما جان حاجيلي وين راح يشتغل كل الي اعرفو يشتغل بمنطقة جديدة
وكالعادة وصلنا ويا المغرب بس من وصلنا من صدگ صرت احسد الي عايشين بالمنطقة على جمالها ونظافتها وجمال بيوتها
جانت المنطقة عبارة عن فرعين بشكل مربع صايرات والي بيهن كلهم گرايب الشيخ وعشيرتو ما بيهم احد غريب نهائيا
وجانن البيوت كلمة فخمات قليل بحقهن وديكورات اول مرة بحياتي اشوف مثلهن شگد ما اوصف جمالهن ما انطيهن حقهن
البيت الي جنا عايشين بيه صاير گدام بيت الشيخ وبينو وبين بيت الشيخ المضيف الي صاير بحديقة عامة صايرة بين شارعين
خلي اشرحو بشكل اوضح
الشارع صاير بشكل مربع وبالنص حديقة عامة بانين المضيف بيها من جهة بيت الشيخ وبيتنا صاير بالجهة المقابلة من الشارع الثاني
جانو مهتمين بالحديقة اهتمام كلش جبير مليانة ورود واشجار وعشب وحتى حدايق البيوت مو مهتمين بيهن مثلها
بابا عالسريع فتح الباب قبل ما احد يشوفنا واني عالسريع دخلت داخل وانتظرتو لحد ما انطى حساب صاحب السيارة ورجع
ادم : هذا بيتنا المؤقت بين ما يكمل البيت الجديد وننتقل عليه ونستقر بيه إن شاء الله
ياقوت : اول ما تدخلون من باب الحوش تصير على يمينكم صحيات (تواليت ومغسلة وحمام) ومقابيلهن مطبخ عاليمين واستقبال عاليسار والترك يبدا من المطبخ لضهر البيت يعني شكل رقم ٦ بالعربي
دخلنا عالمطبخ الجدار سيراميك ابيض وبالوسط بيه نقشة هم ابيض بس يسموه مضلع وفوگ النقشة وتحتها خطوط رصاصيات يسموها مراية ( نوع من السيراميك )
السقف جان هم ابيض وبالطرف بيه اطار اسود والكاونتر المنيوم اسود يخبل والارضية بورسلين ثلجي يسموه
دخلنا عالصالة الازارة سودة واللبخ والسقف كأنهن گطن من گد مو بيضات والغرف مثل نظام الصالة والدرج بايات جاهزة لونهن جوزي
الحمامات الداخلية والخارجية جانت ارضيتهن تختلف عن البيت لونها ازرگ والجدار ابيض وبيه دمار رصاصي بدون نقشة
جنت مبهورة بالبيت لان حتى بيتنا القديم مو مرتب بهاي الطريقة ومبين هواي معتنين بيه والله يعلم شگد صارفين عليه
ادم : ها شرايج
ياقوت : ما دخلني روح للبيت الجديد لحالك
- هههههههههه افه بعتيني بهالسرعة
- بالله عليك بابا احد يعوف هذا الجمال ويروح
- لعد توقعي شنو ببالي
- اتحفنا بالله
- اتفقت ويا الشيخ ابني غرفتين واسگفهن بجينكو عازل ونسكن بيهن
- بصدمة .. گول غيرها بابا فدوة كل عقلك تحجي
- شوفي بوية اعرف صعبة عليج هاي الشغلة بس البيت هذا مو النا ولا عندنا صلاحية نبقى بيه لان ما اقترحوه علي من الاول
الغرفتين الي نسكن بيهن متأكد راح يكونن اريح من هذا البيت فالي اريدو منج تتحملين لخاطري لان اذا قررت استقر هنا راح يختلف الوضع
مستعد ابيع بيتنا الي ببغداد واشتري بيت هنا واحجي للشيخ عن وجودج وياي كل الي اريدو منج تتحملين هالفترة لخاطري
- شگد هاي الفترة
- إن شاء الله مو طويلة اذا كلش كلش قبل بداية الدراسة السنة الجاية علمود تداومين بالمدرسة هم
- خلص بابا هاي هي مثل ما تريد
- الله يرضى عنج ويقدرني انو اسعدج واكون عون الج طول العمر
- آمين الله لا يحرمني من وجودك بحياتي
- بنيتي باجر اني معزوم عند الشيخ على اساس اليوم العزيمة واجلتها علمود اجي اخذج وگلي باجر مابيها بعد تأجيل
- تمام
- تريدين نسفط الغراض لو نتعشى وننام
- نتعشى ونسفط الغراض وننام بس صدگ منو نظف البيت
- اجيت عليه لگيتو نظيف
- تمام
- رحت سويت عشى تمن وزلاطة لان ما عندنا خبز ورجعت للغرفة تعشينا اني وبابا وبس عدلنا بعض الاغراض وسفطت الملابس والمواعين
بعدها اخذنا كل واحد دوش علمود ما تتشنج اجسامنا ورجعنا للغرفة فرشت فراشاتنا ثنينا وغطينا بنومة عميقة لثاني يوم
گعدت الصبح على صوت دگة باب الحوش وفزيت بسرعة من الفراش گعدت بابا وگلتلو الباب يندگ كال اخذي فراشج للغرفة الثانية عالسريع
اخذت فراشي ومن الاستعجال نسيت شالي والنقاب مالي بالغرفة ذيج مرميات عالگاع ومن تذگرتهن تخبلت وادعي ما يدخل الي اجى شوية واجى بابا گال اطلعي
ياقوت : منو اجى
ادم : زياد اخو الشيخ جابلنا ريوگ
- جابلنا ريوگ
- اي يوميا يجيهم گيمر وحاسبين حسابي وياهم وجايبين وياه خبز حار
- عاشت ايديهم خلص نستقر هنا الوضع احلى من قبل هههههههههه
- هههههههههه ام بطن ما يفيد وياج
- وين رايحلنا يوميا يجينا الگيمر للبيت
- بهاي وياج حق
عفت بابا ورحت صليت الفجر ورجعت للمطبخ سويت الجاي وجان الگيمر يكفينا وزايد وگلت حرامات اسوي بيض ويزيد
وعلمود اكون صريحة وياكم جانت هاي اول مرة اكل گيمر لان سعرو غالي واحنا مو من النوع الي نگدر نصرف هيج مصرف
حطيت الريوگ وتريگنا اني وبابا وما جنت اتوقع الگيمر طيب هيج والي انتبهتلو انو دسم كلش بحيث اكلت كم لگمة واحس معدتي انترست
وبيومها بقى بابا بالبيت والساعة 11:30 الضهر اندگ الباب وراح بابا فتحو جان الجد جاي ياخذ بابا علمود الغدا
رجع بابا بحجة يقفل البيت انطاني خبر وراح يتغدا واني سويت غدا بطاطة حمس على گولة المثقفين فنگر (اصابع) وتغديت وبقيت انتظر بابا
الساعة صارت 2:00 الضهر جنت متمددة فجأة اندگ الباب بهمجية وصوت واحد يصيح بكل صوتو اطلعي يوليييييي
شكرا لزيارتكم عالم روايات سكيرهوم
