رواية جراح قلبي الفصل الثاني عشر بقلم جوهرة
صعب /
المستشفى مكلوبة بجماعة معتصم لأن ضابط معروف بالوزارة حاولنا ندخل الأطباء منعونا لأن حالته متسمح حاليا الا يصحى جانو مطلعينه من العمليات إصابته خطيرة وطبيبه المسؤل كال بقت يم رب العالمين ودعائكم
واحد من الضباط تقرب علينا سلم ودعى لمعتصم الله يشفيه بيده علاكه صغيرة كال هاي موبايله ومسدسه ومحفظته اني قبلهم تقربت واخذتها شكرته ورحت وكفت على جهة فتحت العلاكه طلعت الموبايل وقفلته وخليته بجيبي
بقينا ساعات ننتظر وندعي الله يشافيه ويرجع لخاطر وليداته ومرته الي من سمعوا حتى الا كل ما ضاكوه يومين بالمستشفى روحنا طلعت صهيب بقى بس نذير رجع وية أمه و بيبيته الي جانت حيل تعبانه توسلنا بالطبيب يلة سمحلها تدخل هي والوليدات ورانيا شافوه من بعيد وطلعوا ورجعوو وية أبوية وايهم
اليوم الثالث صحى معتصم والطبيب كال حالته تعبانه بعدها ممنوع تدخلون
انوب ميقبلون نبقى الا واسطات وبطلعان الروح يلة سمحولنا بس ميقبلون نتواجد كلنا بالنهار نكضيها بالممر لو حديقة المستشفى والليل بالفندق بس اني ابقى بالمستشفى وياي صلاح وعمي صالح واياد جان ويانه هو وحذيفة يرحون فندق علمود عمي خطية تعبان من القهر على معتصم
مصطفى اجى ثالث يوم من كدر يأخذ إجازة وبقى وياي
شفت ساعتي بالسبعة ونص صارت أحاجي الولد كاعدين وياي عالكراسي بالممر ..
صعب / اروح اشوف الدكتور الي طلع من غرفة معتصم واجى علينا
الدكتور / منو صعب
/ اني خير ان شاء الله يارب
الدكتور / تفضل اخي المريض طلبك بالاسم ولو ممنوع لأن حالته كولش تعبانه
بلعت ريك ومصطفى وصلاح وكفو عينهم علية وجوهم مغيمة
دخلت بعدما عقمني الممرض وكمل الإجراءات حتى ادخل لأن عناية مركزة وهنا كولش مشددين
بداخلي اقرا أدعية وآيات عافني الدكتور بعدما كال دقائق وتطلع حالته متسمح
تقربت عالسرير فكيت عيني والصدمة شلت حالي شل واني اشوفه مضبضب بالشاش الابيض راسه وصفحه من وجهه وصدره كله غمضت عيني وفتحتها ودنكت بسته من راسه الجان مضمدينه ..
صعب بعبرة دمع /؛ الف لا بأس عليك ابو صهيب الغالي اخوية وضلعي شلون هيج يصير بيك
صوت الأجهزة المتصله بجسمه كلها شغاله حس بية فتح تك عين لأن الجهة الثانية مضمده
بدون ماحس طفرت دمعتي على خدي من فتح عينه عليه وبصوت ضعيف كال اسمي .. صعب
دنكت علبه / عيوني حمدالله على سلامتك انت سبع إن شاء الله تعدي وتصفى سوالف
معتصم بصوت يادوب يطلع / رانيا والوليدات امانه بركبتك
بلعت ريك واني امسح وجهي ودموعي
صعب / بوجودك معتصم تكوم بالسلامه يارب
معتصم وصوته متقطع / نرررجس ... ااامانتك .. ليوووم القيامه
تز ..و جها صعب
فكيت عيني مصدوم بالكاله منو نرجس من تذكرت زوجته ..
صعب / مستحيل مستحيل معتصم فدوة رحتلك لا تحجي انت حالتك متسمح ارتاح هسة ارتاح لا تعب روحك يروحي انت
عله نفسه شوية والكلمه بصعوبه يحجيها وعينه دمعت اني من شفته هيج تخبلت مديت أيدي ومسحت دموعه وروحي شايغة عليه ..
صعب /؛ اخوية الغالي عيوني اثنينهم لا تعب روحك
بصوت كوة ينسمع / أمانة بذمتك توعدني صعب ... وحيدة ماعدها سند
عضيت شفتي الجوة بقوة حتى طعم الدم حسيته
كمل وهو يتنفس بقوة ..
معتصم / وعدتهاا ماعوفها للموت اثاااري الموت يأخذني
صعب / اسم الله عليك تكوم بالسلامه إن شاء الله
سكت ونفسه يصعد وينزل
دخل الطبيب / رجاءا اطلع حالته تعبانه ولأن طلبك بالاسم دخلتك عليه
عينه علية والدمع يلالي وية الجفن يريد مني وعد واني شلون اخذله وهو اخوية وضلعي ولوما ثقته بية ما جان طلبني
دنكت يم راسه بسته فوك عينه / اوعدك الأمانة بركبتي ليوم الدين
وكانو حس كلامي وفهمه اني راح اراعيها مو شرط اتزوجها همسلي بتعب .. تزوجها
هزيتله راسي بدون ما احجي
طلعت من الغرفة ومن المستشفى كلها واسمع صوت الولد وراية اشرتلهم بيدي يرجعون
رحت كعدت بالحديقة راسي بين أيدية خايف على معتصم خايف لا يفاركنا يوصي عبالك راح يودع حالته ابد متبشر بخير رفعت راسي للسما .. يااارب
بقيت كاعد عالمصطبة دموعي تنزل ، جريت حسرة ومسحت وجهي بقوة ، ساعة لمحت أبوية وأيهم دخلو المستشفى ودخل وراهم غزوان ابن عمتي دحكت بساعتي ساعة 8ونص الصبح
كمت حتى ادخل وبعدني يم الاستعلامات دك موبايلي هذا صلاح عكدت حاجبي ودخلت سريع واني افتح خط واركض عالدرج لأن موجودين فوك ما اخذت مصعد
صلاح / معتصم حالته انتكست
سديته والدرج سويته خطوات وصلت واني الهث من الركض عالدرج
واسمع عياط مصطفى وصلاح الي كام يركع براسه بالحايط ويبجي
جماعته بالداخليه توهم واصلين جاي يشوفونه تخبلو عليه الممر انترس كلها تبجي على معتصم اني بعد مابية اوكف سندت ظهري عالحايط وكعدت بالكاع واضرب على راسي وابجي بحرگة ابجي اخوية وصديقي ابجي الحياة الجمعتنا والموت الفركنا ابجي معتصم الهيبة معتصم ابو گلب الطيب الي مليان نخوة وشهامة
عمي صالح تخربط وكع علينا ضغطه مفول اخذو بغرفه الطبيب
كملنا الإجراءات وسرعوها إدارة المستشفى الولد غزوان وأيهم طلعوا قبلنا لديالى حتى يكونون بالبيت لأن العالم راح يلتمون
خابرنا على عمامنا وكرايبنا انطيناهم خبر
واني احس امشي بدون روح احس انكسرت والله ... بالي يم رانيا شراح يصير بيها من تسمع
رجعنا وتابوت معتصم مخلينه على سيارة عسكرية وملفوف بالعلم وسيارات سدت الشارع من طلعنا من بغداد لأن أغلب جماعته اجو ويانه حتى يشيعونه
ـــــــــــــــــــ
ايهم /
اول ما دخلت بيت عمي تلكتني رانيا تعيط وتملخ بروحها حظنتها واني اشهك وابجي وهي تنكت بروحها وترجف وصوتها رايح من العياط ..
رانيا / ولك ايهم خابرو يكولون مااات ولك ايهم اختك راح ابو بيتها راح الغالي عيوني ابو صهيب شلون رحت وعفتني
ايهم / اششش كولي لا اله الا الله ادعيله بالرحمه تعاي فوتي للبيت
حبيتها براسها واني اجر بيها الكراج مليان نسوان وكلهن يبجن ويعيطن بدون ما انتبه عليهن صحت / لينا وينج
اجت من بيناتهن تبجي ويوسف بيدها .. ديرين بالجن عليها
اخذتها لينا ودخلت جوا
رجعت وامي صاحتني / يمه ايهم شوكت يوصلون
ايهم / ورى الظهر واحتمال للعصر اكلج يوم شو الولد صهيب ونذير ماكو
ام حذيفه / سودة علية حابسين روحهم بالغرفة همة واخيتهم ويبجون
ايهم ودموعه تنزل / لاحول ولاقوة الا بالله العلي العظيم .. يلة اروح يم الزلم برا
ـــــــــــــ
للعصر اتصل حذيفة على علا الي جانت منهارة ومددة راسها على رجل عمتها ام غزوان
حجت سما وياه كاللها وصلنا ماريد مرة تطلع برا لأن جماعة غربة ويانه سدته وراحت حجت وية امها الي كامت وعباتها براسها صاحت زوجة مصطفى ..
ايمان /؛افتحي باب الكليدور والاستقبال حتى يدخلون التابوت
كامن النسوان من سمعن طبعا الجيران والكرايب كلها موجودة رفعت أيدها ايمان .. / رحمة الله والديجن الزلم راح يدخلون مايردون مرة تطلع برى
رجعت كعدن بس جم وحدة بقن واكفات
شوية وعله صوت الرمي واشتعل الجو بالطلق
رانيا سندت روحها على سما وكامت تريد تطلع برى
رجعنها النسوان عاطت / عوفني اريد أشوفه عوووفني
نترت بيها عمتها ايمان / وين طالعة الحوش مليان زلم هسة يدخلونه
فاتن للأستقبال لحظات ودخلو شايلين التابوت وحطوه بالكاع مابقى بس ولدهم واكفين رانيا وكعت عالتابوت حظنته وعاطت بحرگة والتمن بناتهم والعمات وام معتصم البجي والنعي ...
نعي ام معتصم على وليدها خلا حتى الزلم تبجي
يمة البيت وحشة وليش ماجيت
يايمة أعله بختك ترحل شلون
وليدي دموع ثكلى الصبت أعليك
تون وتنوح مو مثل الينوحون
اذا دمعاتي نشفن فوك الخدود
اظل عليك اصبن حتى الجفون
ولا ريدن عيوني ونورهن راح
وهيه بلاية نور شتسوة العيون
صاحبت المكابر ياضوة العين
ترجعك يمة الي وية اليرجعون
دللو يالولد ماتسمع الصوت
دللو حظني وحشة ورايح الحيل
خذاك الموت غفلة بيوم ردناك
يوم الطاح حملي وردتك تشيل
لينا دخلت حاظنه رونق ويبجن وراهم صهيب ونذير نامو عالتابوت وعياطهم وبجيهم يبجي حتى الصخر صعب من شاف رونق تحظن بالتابوت وتبجي اجى وحظنها وهو يبوس راسها ويبجي
رونق تصيح اريد بابا جذابين بابا ماميت
شالها وطلع صاح لينا .. اخذيها بغرفتها ماريدها تطلع
ابو حذيفة كاللهم يلة شيلو نأخذه للجامع نصلي عليه
الصريخ مالت رانيا وأخواته ترس البيت حاضنات التابوت ويعيطن
حذيفة سحب علا ورانيا الي جانت فاقدة كامت تلطم على وجهها وتعيط متريدهم يأخذونه
حظنها اخوها ودنك يحجي وياها اجت وحدة من كرايبهم اخذتها
صاح حذيفه بيهن.. عالم غربة هم اجوي ماريد ولا مرة تطلع برا
اشر لأخوته وولد عمامه شالو التابوت وصوتهم صدح ب ((لا اله الا الله ))
طلعوا من البيت للسيارات وبدوا جماعته يرمون شيعوو للجامع صلو عليه بعدها انطلقوا للمقبرة اليدفنون بيها
نصبوا جوادر العزا بالشارع والناس ما انكطعوا من العزا الشباب هلكو بين الضيافه والتوجيب وبين حزنهم وقهرهم على فقدانهم معتصم
السواد شمل حتى شبابهم لابسين الاسود حزن عليه
لينا / تعال حبيبي
/ اي خالة
لينا / روح صيح عمو ايهم
ركض الولد برا ورجعت لينا بالمطبخ تكمل صب الجاي للنسوان
/ هسة يجي يرزلج .. حجت ربى بنت عمتها ايمان
لينا / شسويله ابنه يحير بي ذبحني بين رجليه يكمز
صاح يوسف الجان خانس لأن قبل شوية أمه عاطت بي راد يوكع القوري / ادول لبابا عليج
لينا خزرته / لا بلة
رجعت تصب جاي من كملت شالت الصينية وطلعت للنسوان بالاستقبال كاعدات وياها سما اجت تساعدها
دخل ايهم للمطبخ / السلام عليكم شلونج ربى
ربى / وعليكم السلام هلو ابو يوسف
ايهم / شنو كالو يصيحوك
التفتت ربى تأشر على يوسف الي كمز يركض على ابوه / لينا وصت عليك تأخذ يوسف الله ستر جان انكلب قوري الجاي عليه
دنك على ابنه وخزره / ليش بابا تسوي وكاحه
استحى وحظن رجل أبوه وسحب دشداشته جان لابس لون نيلي ولاف شماغ اسود على راسه .. لا لا اني هم زعلت عليك ليش هيج وكيح
ربى / لا وانوب يكل لأمه اكول لبابا عليج
دنك شاله وباسه / ايابه متسبع بأبوه يله تعال وياي للجوادر
نزله وانطاه أيده ودخل وياه يم الزلم
يم النسوان رانيا على وضعها تلث ايام مابطلت نوح وبجي مدت امها أيدها ومسحت على رأسها وباستها / كافي بنيتي شنو الراح ترجعينه اقريله قرآن سوي استغفارات الله يبرد گلبج
بصوت مبحوح والدموع مغركه الخدود ..
رانيا / عيوني يووم شلون راح اعيش بدون معتصم اني جان بالدوام انتظره واحسب شوكت يرجعلي شلون راح اصبر وبعد ما أشوفه ما المح خياله ما احظنه من يجيني مجاز ولج يممه شيصبرني اني ووليداتي يمممه
ليش ربي ليش هيج حرمتني اني ووليداتي منه ربي ماكلت هاي تموت إذا يعوفها ررربي ما شفعتله دموع رونق وهي تصرخ وين بابا
سحبتها امها بحظنها وكوة سيطرت على ايديها الجانت تضرب على صدرها ورجليها
ام حذيفه / لاحول ولا قوة الا بالله لاحول ولا قوة الا بالله
خلاص ماما موتي روحج ولج هسة كاعد يتعذب بقبره من وراجن
التفتت عالنسوان / رحم الله والديجن اقروله الدعاء اقروله الدعاء
رانيا / عوفيني يوم فدوة
عافتها امها وعينها عليها شوية هدت
ام معتصم تعبانه ضغطها كل شوية يعلك كاعدات عدها بناتها علا وصفا وبيناتهن ام غزوان وإيمان ام سما كاعدات شريط واحد والنسوان يجن يعزن ويطلعن
البيت بيد لينا والجناين زوجة مصطفى وسما وربى و رنا بنت ابو حذيفة تجي وتروح مرتين اجت لأن بغير مدينه كاعدة
ثالث يوم سوو الختمه والمولود ووزعو ثواب على روحه وبعدها فض العزا بس بقوا الناس يزورون بيت ابو معتصم
ـــــــــــــــــــــ
أبيت ابو حذيفة
ام حذيفه/ اختكم لازمه عده وكاعدة فوك هي وولدها عليش جايبيها هنا خلها بيت رجلها اولى تلزم عدتها هناك
ايهم / يمه احنا ممعترضين بس نكول اقلها شوي تتغير نفسيتها
ام حذيفه / ايهم عوف هذا الحجي ابوك ماقبل من سمع
ايهم / خلص اني كلمة وكلتها بالنسبة إلي يومية امرلها
ام حذيفه / اي يمه الله يوفقكم لاتكطعون بيها
رد صعب / صدك تحجين هاي اختنا شلون نكطع بيها
صعب /
عفتهم ودخلت لغرفتي مددت بالفراش وغمضت وخيال معتصم يحاجيني من يوصي بية تذكرت موبايله قفلته من ساعتها رحت للكنتور طلعته ورجعت كعدت بفراشي فتحته وبدت الاشعارات ما يحتاج اكنك لأن دوم من يجينا الله يرحمه يكنك يعرف الرمز
مادخلت على اي رساله تصفحت المكالمات وموجود رقم يمكن داك بوكتها عشرين مرة قبل لا اقفل الجهاز
جان ممسجل بأسم مخلي رقم 2
شكيت هذا رقم زوجته الثانية احتمال
تذكرت وصيته عكدت حاجبي اني اختي اخليها بنص عيني هي وجهالها واغمض عليهم
وهالشي سهل عندي انو اكون كد هيج مسؤلية مو صعب الما يوكف ويصير سند لاخته
بس صوته وهو يوصي ويأمن على مرته مجاي يخليني انام مرتاح ياربي والله صعبه يريدني اتزوجها ليش ليش معتصم مو انت تعرفني وتعرف طبعي اني وفكرة الزواج أعداء شلون
هيج توصي اااخ اااخ الله يرحمك برحمته وينور قبرك
جريت حسرة وذبيتها واني اتخيل عمق المشكلة الراح تصير لو عرفوا بزوجته والاصعب والكارثة إذا تزوجتها وجبتها تعيش بيناتنا
محتار ياربي واريد حلها منك يا آلهي
انتبهت دك الموبايل شفته نفس الرقم2
ــــــــــــــــــــــــ
نرجس / خالة ام عقيل صار اسبوعين ماكو خبر من معتصم فدوة خالة كوليلي شأسوي المن اروح والله راح اموت من التفكير بي
ام عقيل / لاتفاولين يبنت تلكينا التهى يم اهيلته هسة ماتحسين الا فاتح الباب ويجفت عليج
نرجس / صدوك خالة انتي هيج تتوقعين
ام عقيل / چا شنهي السالفة الرجال عنده عويل خوما يعوفهم
نرجس / زين خالة نروح للوزارة اني وياج حتى أشوفه اسال عليه
ام عقيل / چا شحجيت عوفي الرجال لاتلزكين ويمل منج واخاف عليج تترزلين بنيتي
سكتت ماحجيت احتمال كلام خاله صح بس ممعقولة اتصل وميرد علية شكد اتصلت ميفتح خط انوب رجع انقفل صار ايام مقفول معقولة معتصم هيج نسيتني مو جنا يومية نتخابر ليش حبيبي هيج هنت عليك تتركني حايرة وخايفه عليك
والله مجاي اتهنى بشي حتى اللكمه اغص بيها
اسبوعين متحاجيني الا اذا زعلان مني بس طلع فرحان من البيت وعلاقتي بي احلا شي
اووف والله كمت اخربط اني
خل ارجع اتصل بلكن يحن علية ويفتح خط
يم صعب الرنين متواصل انقطع ورجع مرة ثانية وثالثه
مسح على وجهه ولحيته / استغفر الله يارب
وصلته رساله انوب فتحها وبقى فاك عينه على الكلام القرا
شكرا لزيارتكم عالم روايات سكيرهوم
