رواية بنت الكهوجي الفصل الثالث عشر بقلم احمد
وبيومها بقى بابا بالبيت والساعة 11:30 الضهر اندگ الباب وراح بابا فتحو جان الجد جاي ياخذ بابا علمود الغدا
رجع بابا بحجة يقفل البيت انطاني خبر وراح يتغدا واني سويت غدا بطاطة حمس على گولة المثقفين فنگر (اصابع) وتغديت وبقيت انتظر بابا
الساعة صارت 2:00 الضهر جنت متمددة فجأة اندگ الباب بهمجية وصوت واحد يصيح بكل صوتو اطلعي يوليييييي
من سمعت صوتو اريد اوگف على رجليني ماگدر من الهبطة تخيلو نفسكم بمكاني ويصير وياكم هالموقف اقسم بالله مرعب مو بس مخيف
ما حسيت على نفسي الا اني قافلة باب الغرفة علي ودموعي مثل الشلال من الخوف وورا شوية سمعت صوت خطوات داخل البيت
حطيت ايديني على حلگي وكتمت صوتي واحس حتى گلبي يوجعني من الخوف وسمعت صوتو من گال ياقوت وين رحتي
فتحت الباب وركضت عليه واخذني بحضنو وهو يردد خلص بوية خلص ماصار شي اهدي اهدي خلص اني وياج وما اعوفج
ياقوت : شيريد مني ومنو هذا
ادم : ماعرفو ومو جاي عليج
- لعد على منو
- جنا واگفين عند المضيف من اجى صار يدگ الباب واجينا عليه اني والشيخ مأمون ومن سألناه شيريد يگول هاي الخياطة بايگة فلوسنا
گالو الشيخ مأمون ماكو هنا لا خياطة ولا شي الرجال عايش لحالو وما صارلو يومين من نزل هنا فالضاهر متوهم بالبيت
- والحيوان هذا ليش ما تأكد قبل ما يفجعني هيج
- اكو بعض ناس وقت العصبية ما يفكرون بعقلهم خلص اهدي ما صار شي
- تمام
جان جسمي كلو يرجف من الخوف ورغم هديت شوية بس اثار الخوفة ما تروح بسرعة اخذني بابا للغرفة وتمددت بحضنو
بقى يمسح على راسي وهو ساكت الى غفيت وگعدت ورا صلاة العصر جانت قيلولة صغيرة ولگيت بابا نايم
جان صوت الاذان واضح بالمنطقة هاي وكلش فرحت لان اكو جامع قريب نسمع صوتو جددت وضوء وگعدت بابا
بقى بابا ذاك اليوم بالبيت وجانو مقررين ثاني يوم يبدا بالشغل وعلى الفراغ يبني الغرفتين وما اخفيكم كلش ضوجني بقرارو
صحيح البيت مو النا بس هم گالولو يبقى بيه والبيت مرتب ونظيف ومو ناقصو كلشي بالعكس افضل بيت عشت بيه لحد الان
وهم ما طلبو منو يطلع من البيت علمود ينجبر فشنو براسو ماعرف والمشكلة ماگدر اعارضو وبالاخص بالوقت الحالي
بالليل سويت العشى ورجعت عليه گلتلو بشقة الله يرضاها ناس تتغدا لحم وناس تتغدا بطاطة ضحك من كل گلبو على كلامي
گال والله ما اشتهيت الغدا لان ماراح تاكلين وياي ولو مو عيب الا احطلج لحم بجيبي گلتلو بضحكة ابد مو عيب بس جيب وياك
بين ما خلصنا عشى وغسلت المواعين اذن العشاء وورا صلاة العشاء بنص ساعة اندگ الباب وجان الجو بارد ماگدر اطلع للترك
گال بابا ادخلي للغرفة الثانية ومن دخلت بيها اكو سرگي من خارج سكرو وراح فتح الباب شوية واسمع اصوات زلم دخلو للبيت
تميم : بعد ما نزل بالبيت ادم اجى ثاني يوم على جدي واعتذر منو ان لازم يروح لبغداد علمود بيتو وما يگدر يحظر العزيمة
وطلب منو جدي انو يأجل الروحة لثاني يوم بس اصر انو يروح ويگول الاغراض منثورة بالبيت واحتمال يجي مؤجر يشوفو
من حجالي جدي ما اقتنعت بصراحة لان هو مو هسا عايف البيت وعلى حجيو حتى ما رجع للبيت اجى من العمارة ورجع للعمارة فورا
بس گلت يجوز يريد هسا يعرضو للاجار بس شيسوي بالفلوس وهو لحالو ما وياه احد هواي اسئلة تدور حول هالرجال والا ما يجي يوم تنكشف
ثاني يوم تغدا يمنا واني تأخرت بين ما اجيت من الجامعة ما لحگت عالغدا بس ابوي وجدي واخواني موجودين ويكفون
بالليل قررنا نزورو بالبيت لان جدي قرر يبني بيت صغير بدال الغرفتين هم يكون لابو باسم وهم اذا اجى غير گهوجي وياه عائلة يسكنون بيه
رحنا بوقتها اني وجدي وزيد وزياد اول ما دخلنا للبيت البيت جان نظيف يلمع المطبخ ما بيه خاشوگة وسخة والاغراض متغيرة اماكنهن
وسبحان وجود الانثى بالبيت يكون الها تأثر خاص مستحيل يعوضو الرجال ومن دخلت للبيت حسيت بيه لمسة انثى ماعرف ليش
بوقتها لو شخص گايلي رحت لبيت واجاني هيج احساس بدون سبب ما اصدگو بس صارت وياي وماعرف شنو تفسير هالاحساس
جانن الفرش الي وياه قليلة وحاط فراش بس بالغرفة وبحكم انو وحدو فدخلنا للغرفة مو للاستقبال ومن دخلنا للغرفة راح هو يسوي جاي
من اجى صب الجاي اشرت لزياد يوزع الجاي لان هو اصغر واحد بالموجودين وبلش جدي يحجي وياه
مأمون : استقريت هسا يا ابو باسم
ادم : اي حجي بفضل الله ثم هالشباب الي ساعدوني بسرعة استقريت
- ما الهم فضل عليك هم سوو واجبهم واحنا اجيناك اول شي نتطمن عليك والشي الثاني عدنا اقتراح الك
- الله يطمن بالكم شيخنا احجيلي الاقتراح
- شنو رايك تبقى هنا هالكم شهر بين ما نبني بيت صغير ونرتبو الك احسن من الغرفتين ومن يكمل تنتقل عليه
- شيخنا الموضوع مو مستاهل التكلفة واني ما اريد بيت يتعبني بالتنظيف الغرفتين اريحلي بهواي من البيت لذلك اقتراحكم مو لمصلحتي
ولا تنسى اني اشتغل من الصبح لليل والمنطقة هاي معروف عنها بالصيف غبارها هواي وكلو راح ينعكس علي ويتعبني
فاذا علمودي فالغرفتين احسن الي واذا لسبب ثاني فاحجيلياه علمود اعرف شنو
تميم : بضحكة .. اذا علمود التنظيف نشوفلك فد مرة ونفرح بيك
ادم : هههههههههه ما بقى بيها مجال على شنو تاخذني المرة تالي شايب منتهي
تميم : بيك البركة ابو باسم
زياد : بضحكة .. ابو باسم ترا تميم نصايحو عكس فنصيحتي اي شي يگلك عليه سوي عكسو
ادم : هههههههههه شوف حتى اخوك ضدك
تميم : تشوف هالجوز الي گدامك (زيد وزياد) ذول بس الله يگدر للسانهم فلا تنطيهم مجال ياكلوك ولا تگول ما گلتولي
ادم : جوز لو لوز
زيد : جان كاتم ضحكتو ومن حجى هيج ادم انفجر بالضحك هو وزياد
تميم : باووووع لا جدي هاي هي كملت بعد جنا بثنين صارو ثلاثة
ياقوت : جنت بالغرفة الثانية يوصلني صوتهم من يحجون بس مو واضح بس اسمعهم يحجون وصوت ضحكهم تارس البيت
جنت كلش مرتاحة ان بابا يحجي وياهم ومبين صوت ضحكتو وتمنيت اكون وياهم واعرف على شنو كل هالضحك
بقو يمكن ساعة وبعدها راحو واسمع الرجال الجبير يگول هاي هي ابو باسم مثل ما تريد لعد انتظر منا للسبت الولد موجودين كلهم ويساعدوك
بابا گال ما اريد اتعب الولد وياي اجيب عمال ويساعدوني ومنا للسبت اكون مكملو گال بيها الخير لعد باجر يكونون موجودين من الصبح
عرفت جان قصدو عالغرفتين ومن طلعت رحت اخذت الستكانات غسلتهن وقبل ما اذب الجاي اجى بنفسي اجربو لان ما شربت جاي من ايد بابا من قبل
حميتو وشربت منو جان مثل الجاي الي نسويه اني وماما ماكو فرق والحمدلله جاينا كلش طيب اخير شي غسلت القوري والستكانة الي شربت بيها ورحت لبابا
ياقوت : شعدهم اجو
ادم : علمود البيت الجديد
- اسمعكم تحجون بيه
- اي يريدون يبنون بيت كامل وگلتلهم ما احتاجو يتعبني بالتنظيف
- وربي يا بابا مدا افهم كلشي منك
- تفهمين عن قريب بس يكمل افهمج ليش رفضت اكو شغلة ببالي اريد انفذها
- تمام مو مشكلة
- بس انتظريني اذا الله گدرني واستقرينا هنا اشتريلج او ابنيلج بيت يخبل شرط اخلي البنات يحسدنج عليه بس انتظري خلي نستقر
- ما اريد كلشي المهم انت وياي والباقي كلو مو مهم عندي
- الله يخليج الي ولا يحرمني من وجهج الحلو
- ولا يحرمني منك يا احلى اب بالدنيا
من صار وقت النوم نمنا ثنينا وثاني يوم گعد من الصبح علمود يبلش ببناء الغرفتين واول ما راح اخذو ابو تميم للسوگ بالسيارة
اشترو الاغراض الي يحتاجهن بالبناء ومرو عالعمال الي مخابرهم تميم من البارحة وجايين وياهم وجانت المواجد جاهزة للبناء
بدو بالبداية بتعديل الارض الي تصير تحت الحايط علمود يصير عدل وما يميل بعد ما يكمل وبعدها بلشو بالبناء
واحتياطا لكثرة الامطار سوو التكعيب 5 بلوكات للغرف والحوش 3 والبناء جان عبارة عن غرفتين بوجه الگاع وعاليمين المطبخ وعاليسار التواليت والحمام
بابا بسبب شغلو كعامل كل هالفترة تعلم للبناء فجان بناء هذا البيت مو سهل بس يگدر يدبرو بس بنفس الوقت تأخر بيه
جان متوقع يومين والثالث يكملو بس تأخر بيه 37 يوم واكثر شي اخرو التكعيب (الاساس) لان اخذ هواي بلوك وهالشي انعكس على سرعة الشغل
اكلهم وشربهم جان كلو من بيت الشيخ ويگولون لبابا انت اهتم للبناء ومعليك بالباقي اذا تبني وتطبخلهم ما تلحگون تكملون كلشي
جان بابا يرجع هلكان من التعب بس مجبور يتحمل وشگد حاولو وياه اهل الشيخ علمود يجيبون واحد غيرو يبني وهو بس يبقى وياهم ورفض
بعد ما كملو الاساس جابو تراب ودفنو الاساس كلو من الطرف للطرف وبعدها بنو الجدارن وبعد الجدران اجى وقت السقف
بس لان الجدران يرادلهن رش فتأجل السقف اسبوع كامل لحد ما شبعن ماي الجدران بعدها لبخوهن وكملوهن بس اللبخ مو هو لبخهن
وجابو جينكو من هذا الي يجي طبقتين وبالنص فلين ( يسموه سنوديشة ) هاذا ما جان من النوع الي ينحط فوگ البيت ويحطولو بلوك
لا يتثبن سياخ حديد بالحايط ويلحمون حديدة من الشياش عليهن ويثبتن بحيث ما يتحركن نهائيا جان البيت قريب من البيت الي گاعدين بيه
قبل ما ننتقل بيوم الساعة دگت 2:30 بالليل بابا گال يلا جهزي نفسج علمود نروح گلتلو تمام وهو شال فراش واني شلت اكل وبطل ماي
وما جان هذا انتقال كامل لا بس اني جنت رايحة لان اذا اجو علمود يساعدون بابا راح يشوفوني ونتورط اني وبابا وماكو غير هالطريقة
اول ما دخلت للبيت انتبهت ان ارضيتو مصبوبة ومسغولة طالعة كلش ناعمة وشكل البيت احسن من ما توقعتو بهواي
بس الشي الغريب ان بابا باني الغرف بوجه قطعة الارض وتارك مساحة متر ونص تقريبا فراغ بين طارف القطعة وطارف الغرفة من اليمين
وراجع باني حايط موصلو من طارف القطعة القطعة لطارف الغرفة بعد مو مخلص البيت وصاير ممر كلش صغير بين المطبخ والحايط الجديد
ومن الواحد يدخل للممر يرجع يتوجه عاليسار لحد ما يوصل نهاية العرض مال الغرفة ويجيه ممر عاليسار تكملة للممر السابق
بنهايتو مسوي شلون الغرفة الصغيرة وبيها باب طولها 3 امتار وعرضها تقريبا متر وهذا الشي الي جان يخلي بابا يبقى على اصرارو ان هو يبني البيت
هذا جان بابا بانيه علمود يصير مخبأ الي ومحد يدري بيه انو مخبأ بس بابا حتى عائلة الشيخ ما جانو منتبهين الو من بناه
لان مثل ما كلتلكم بناه لحالو فاجو لگوه مبني وكامل ومن سألو بابا گاللهم شفت فراغ ما منو فائدة وگلت اكبر الغرفة واوصلها لطرف الارض
وحتى من سوا السقف جان حاسب حسابها بس لان بنا الجدار مالها بعد السقف فما جان السقف متماسك ويا الجدار وجان بابا متعمد يسوي هالشي
وراح تعرفون باقي التفاصيل كلهن ويا القصة بس المهم ان هذا راح يصير المخبأ مالي علمود محد يگدر يشوفني مهما كانت الضروف
ولان الممر صغير گوة دخلنا الفراش بالف يا ويلاه لحد ما وصلناه للاخير وفرشناه بالمخبأ وبقيت الاكل والماي وياي
ياقوت : بابا والله خايفة ابقى وياي هنا
ادم : اي بابا باقي باقي بس تعالي نامي هسا لاتبقين گاعدة لان ورانا تنظيف باجر
- تمام بس انت وين تنام
- اني من انقل الغراض انام
- بس هيج راح تتعب
- لا بابا ما اتعب انتي نامي وارتاحي علمود باجر تنظفين البيت وبين ما تكملين تنظيف اكون اني نايم ومرتاح
- تمام
تمددت بالفراش وجان الجو بارد كلش وتخيلو انتو برد الشتاء وبيت فارغ وجديد صاير كأنو قطعة ثلج لدرجة مدري شلون صارت نومتي من البرد
جنت افز من برد رجليني بس النوم كابس علي كبسة مو طبيعية من التعب واحس بايد تلامس راسي وتمسح عليه وقبل ما اركز ويا الايد ارجع انام
بقيت على هالحالة لحد ما صارت الدنيا صبح وعافني بابا وراح ومن دفى شوية الجو غطيت بنومة عميقة وفزيت على صوت شي ضرب الحايط
ركزت شوية جان اكو اصوات بالبيت وعرفتهم ولد الشيخ جايين يساعدون بابا بنقل الاغراض شربت ماي وبقيت انتظرهم الى ان خلصو
وجان اتفاق بيناتنا اني وبابا من يدگ الحايط بايدو معناها اطلعي ماكو احد ومن دگ الحايط طلعت لگيتهم مدخلين الاغراض ومكمليهن
بس جان عندنا هواي نقوصات وبالاخص المطبخ لا بيه كاونتر لا بيه سنگ مجرد سلات بلاستك محطوط بيهن مواعين
ادم : بوية حاليا لا تسوين كلشي راح نروح اني وتميم للسوگ نجيب كاونتر من هاي المستعملة واذا ما وياه سنگ نجيب ويانا سنگ
ياقوت : تمام بس راح ارتب باقي الاغراض
- لا بقي كلشي مثل ما هو علمود ما ينتبهون ان الاغراض تغير مكانهن واحنا بالسوگ
- ماشي بابا مثل ما تريد
- تريدين اجيبلج شي وياي
- سلامتك
- الله يسلمج .. يلا شوية وارجعلج
- تمام
من راح بابا گعدت شوية عالشمس وجان بيها حرارة ورحت طلعت العلاگة الي جبتها وياي جان بيها حلويات وكيك فتحتها وصرت اكل منهن
جنت اباوع للبيت وافكر شگد يرادلنا لحد ما نستقر بيه اكيد راح نتأخر هالمرة لان ناقصنا هواي اشياء بس إن شاء الله نكملهن بسرعة
جانت اكو مشكلة وحيدة وهو انو الجو بارد كلش وايام الشتاء تكون قصيرة الواحد ما يلحگ يسوي اي شي بسرعة يخلص النهار
لذلك ممكن نواجه شوية تأخير بالاستقرار بس ويا الوقت كلشي راح يترتب وبسبب الحلويات عطشت فرحت جبت الماي ورجعت
شلون طلعت من الممر اريد اشرب ماي وتجمدت بمكاني واجت عيوني بعيونها وهي واگفة عند علاگة الحلويات وتباوعلي
شكرا لزيارتكم عالم روايات سكيرهوم
