رواية جراح قلبي الفصل الثالث عشر 13 بقلم جوهرة

صعب / 

بقيت صافن وفاك عيني عالرسالة لا يربي بس لاتسويها صدك وتجي لديالى الوضع ما يتحمل الحزن كسرنا وهد حيلنا ابد مو وكتها ابددد

جريت حسرة وذبيتها وگلبي وروحي طافحات من المرارة البيهن بس الله يدري بحالي

معتصم الله يرحمه وصاني بيها وهاي امانه برگبتي بس المشكله العنوان ما أعرفه متزوج من بغداد وين راح اندلها الا اتصل عليها 

دكيت من موبايله اول رنه انفتح خط وصوت ناعم .. حبيبي والله متت خوف عليك 

غمضت عيني والغصة بداخلي والم نغز گلبي 

قاطعتها ..

صعب / السلام عليكم اني صاحبه واريد اجي للبيت بس ما اندله

ماسمعت صوتها خنست من سمعت صوتي

صعب / الووو الوووو

نرجس / هذا رقم معتصم شيسوي عندك موبايله ، انت جذاب تريد تنصب علية

سدته بوجهي بقيت ادحك عالشاشة عاكد حاجبي .. هاي شبيها ولو حقها الدنيا متتأمن

كتبتلها رسالة ودزيتها ..

/ اكتبي عنوان البيت إذا تردين تعرفين اخبار معتصم

سديت الموبايل ومددت بفراشي واني دماغي راح ينفجر من التفكير 

الله يرحمك معتصم حملتني أمانة جبيرة 

شلون راح أخبرهم بزواجه ، رانيا شيصير بيها من تسمع والله تتخبل هاي اني اعرفها غيرتها على معتصم كشرة فمراح تتحمل 

رفع راسه للسكف وتنهد وهو يقرر مالازم أحد يعرف مستحيل يعرض أخته لهيج موقف

ـــــــــــــــــــــــــــ

نرجس / يعني انتي هيج تشوفين

ام عقيل / چا عليمن تسألين وتردين جواب هذا أنه انطيتج رأيي وانتي بكيفج

نرجس / اخاف هذا ملعوب لو شي احتمال موبايله ضايع لو انسرق ، بس لو حتى انسرف جان اتصل علية من اي موبايل

ام عقيل / مدري بس لا تتهورين وترحين لبيته وتخلينه يضوج منج

نرجس / خالة روحي لايبة عليه والبارحه حلمت بي واكف مسافة عني وعينه علية

ام عقيل / هذا تفكيره يمج

نرجس / يووو لعد ليش ميتصل ويطمني

راح ادز العنوان وأشوف اقلها اعرف شي بس فدوة خالة اريدج وياي إذا اجى الرجال ما اكدر أقابله وحدي لأن معتصم يضوج ادري بي

ام عقيل / ياه شلون اعوفج تطمني أنه وياج 

،،،،،

ورى يومين كتبت رساله بالعنوان ودزيتها هذا جان الصبح ساعة تسعة ورى ساعتين اندكت الباب رحت باوعت من باب المطبخ ومن رجع جرس الباب يرن صحت .. منووو

ماكو صوت عليت صوتي أكثر جان يرد بصوت قوي .. اخوه لابو صهيب 

فكيت حلكي مصدومة شيسوي اخوه خفت بس لا صاير شي

رجعت اخذت موبايلي واتصلت على خالة ام عقيل 

نرجس / تعاي خالة عالسريع

رحت لبست حجاب الصلاه فوك تراكسودي الحجاب طويل يغطي جسمي كله وطلعت حتى افتح الباب اسمع صوت خالة تحجي وياه

فتحت الباب سلم علية وصوته جان ناصي بس مارفع عينه علية

رديت السلام وخالة كالت / تفضل بعد خالتك عليش واكف برا

دخل للاستقبال كعد عالكرسي المقابل الباب اول ما دخل واني بقيت واكفه مسافه خالة ام عقيل كعدت وعينها عليه / چا الزلمة ماهو عليش مطرشك انت خافن اكو شي 

تنحنح ورفع راسة يحجي وية خالة واني مستغربة ليش ما يباوعلي شبيه هذا عشتو شلون نفسية يمكن لان متزوجة اخوه وماعاجبه

صعب بصوت هادىء عكس دواخله / اني ابن عم معتصم وهو مو بس ابن عمي لا والله صاحبي وضلعي ونسيبي زوج اختي اني اليوم جيت أخبر زوجته الي بس اني اعرف بالزواج هذا وعرفت متأخر 

معتصم الله يرحمه صار اسبوعين من استشهد بعبوة

نرجس /؛

كأن السكف وكع على راسي من كبر الصدمة الي انصدمتها صرخت ب لااااااا صرخة يمكن الشارع كله سمعها وكعت من طولي بالكاع واني اصرخ صريخ يفتت حتى الصخر كد وجع الروح الصابني مدنكة واضرب بالكاع براحة ايدية واي شعور فقدته ما احس بالالم الصاب أيدي واني اضرب الأرضية كل الاشعر بي هو معتصم ضاع مني معتصم بعد ماكو بحياتي عيوني غوشن دموع واني اعيط واعاتب الكاع .. ليشششش ليشششش اخذتي معتصم ليش ؟؟؟؟!! شلون ضميتي بترابج منووو الي منوووو ااااااااه ياااالله اااااه استكثرت بية معتصم ليش ما خليته لخاطري يتيمة واجبر بخاطري ليش اخذته مني ليشششش

ام عقيل المصدومه بالخبر كمزت وحظنت نرجس ولزمت أيدها / سودة بوجهي شوفي الصار بيدج تجرحت ، اوووف يممه ينرجس ومصيبتج  

حظنتها وكعدت تبجي وياها وتنعي

صعب / 

والله العظيم من شفتها منهارة وتضرب وتعاتب زرفته لگلبي ماحسيت الا ودموعي تنزل مسحتها بسرعه وكمت اريد اطلع برا وكفت وظهري الهن من عاطت بية .. شلووون مااات احجي

بدون ما التفت عليها جريت حسرة وذبيتها .. انفجار عبوة 

رجعت تعيط والمرة تسكت بيها طلعت وكفت بالكراج اريد اتنفس احس روحي مخنوكة واني اسمع عياطها والونين مالتها 

ما اكدر اتقرب عليها هالشي حرام بعد لازم تعتد أربعة أشهر وعشر ايام

((عدّة المرأة تتضمن معنى العبوديّة والاستسلام لأمر الله -تعالى- بامتثال أمره والالتزام بالعدّة التي تعدّ حكماً من أحكام الشريعة الإسلاميّة. التّأكد من براءة الرّحم منعاً لاختلاط الأنساب. ترسيخ مفهوم ميثاق الزوجيّة ومكانته في الإسلام؛ بحيث أنّ الفراق الدائم وتبعاته لا يتم إلّا بالمرور بعدّة مراحل. العدّة للأرملة فيها معنى الوفاء لعِشرة الزوج الميّت. إنّ الفراق بموت الزوج لم يكن باختيار أحدهما فكانت مدّة الوفاء له أطول من مدّة العدّة للمرأة بالطلاق والخُلع والفسخ. شروط عدّة الأرملة تحمل مسألة عدّة الأرملة أحكاماً وشروطاً كثيرة، وإجمالها على النحو الآتي:[٣] ترك التّزيُّن والحليّ ومسّ الطيب والخضاب، وعدم لبس الثياب المصبوغة، وحُرمة التّعرض لأعين الخاطبين، والحِداد واجب ثابت بالشريعة، لقول النبي صلى الله عليه وسلم: (لا يحلّ لامرأةٍ تؤمن بالله واليوم الآخر تحِدَّ على ميت فوق ثلاث إلَّا على زوج أربعة أشهر وعشراً).[٤] يلزمُ الحِداد جميع زوجات المتوفى عنهنّ زوجهنّ إن كان له أكثر من زوجة، فيشمل ذلك الصغيرة التي تحيض والكبيرة التي يئست من الحيض، ))

بقيت افكر شلون اساعدها واكون على تواصل وياها خوما اتركها لزوم اتردد لبغداد بين فترة وفترة حتى اشوف احتياجاتها وطلباتها 

صحت المرة الي يمها /؛خالة بدون زحمه تعاي هنا

طلعت المرة / كول بعد خالتك 

صعب / انتي شنو صلة القرابة بينكم

ام عقيل / بنيتي اعتبرها وامها الله يرحمها صويحبتي

صعب / يعني قريبة عليها وين بيتكم

اشرت على حايط بين البيتين .. هذا هو بيتي

صعب / خالتي ابو صهيب الله يرحمه قبل وفاته وصاني بزوجته وخلاها أمانة برگبتي وان شاء الله اكون كد الأمانة راح ارجع لديالى واريدج اديرين بالج عليها وهاي فلوس مصرف الها انتي تصرفي بي بعد هي ماتكدر اكيد راح تلزم عدة واني بين فترة والثانية اراجعها قصدي اجي اسألج عليها إذا هالشي ميضايقج

ام عقيل / چا شالسالفة هاي بنيتي احطها بعويناتي

اوووف يخالة الله يصبرها البت هواي انظلمت الزمن وبنيادم ظلموها الله يصبرها على بلواها والله يرحم ابو صهيب برحمته الواسعة

صعب / الله يرحمه برحمته ،، انطيني رقم موبايلج حتى اتواصل وياج واي شي تحتاجونه اني حاضر انتي بس اتصلي علية بأي وكت عادي

ام عقيل / الله يحفظك ويحرسك خطية لا تكطعون بيها اقلها تحس واحد من ريحة المرحوم مهتم بيها

اخذت الرقم وطلعت ظرف بي فلوس تكفيها مصرف شهر انطيته للمرة الي ماقبلت بالبداية تأخذه الا لحيت عليها

ومن اريد اطلع سألتها / الإدري بي معتصم الله يرحمه جان ممصدق زواجه بالمحكمة بعد ما اعرف صدقه لو لا

ام عقيل بتنهيدة / لا يخالة باقي عقد سيد

صفنت يعني مالها بالمحكمة اي حقوق لا ورث ولا راتب كله يروح لرانيا والولد

سلمت وطلعت لسيارتي 

والصار كدامي حيل اثر بية الله يرحمك معتصم

ـــــــــــــــــــــ

نرجس / 

عفت مو بس مواقف ذكرى حلوه وياي

الف رحمة اعله روحك توجع الذكرى

احسك ما متت سفره اطلعت بس وين

عالفردوس گلي اشلونها السفره ؟

الليل اجى ومواجعي مابطلت خالة ام عقيل وبناتها محاوطاتني واني اهذري بمعتصم

نرجس / سوودة بوجهي سووودة بوجهي اثاريك جوة التراب واني احجي عليك اكول شلون مارد على اتصالاتي الموت خذاك واني ماعندي خبر اوووف يممممه وينج تعاي شوفي بنيتج الدنيا شلون ظلمتها الدنيا عينها على فرحتي اخذتها مني ، الدنيا مستكثرة بية فرحتي وباكتها مني يممممه وينج تعااااي شوفي بنتج شنو اللي صار بيها

ام عقيل ودموعها على خدها/ سودة علية يمه شو تعاي اشربي كمع ماي موتي روحج

نرجس / خليني ياريت اموت واخلص هو شعندي شنو البقى حتى أعيشه 

ياااربي أخذ امانتك وخلصني ياربي موو.. 

ام عقيل سدت حلكها ونترت بيها / كاافي راح تموتين متكليلي بيش طالبة رويحتج ولج هذا أمر الله

جرتها وخلتها تمدد ، راسها عالمخدة طاقتها خلصت بس تون ورأسها عالمخدة تنكت بي كل شوية

نرجس / 

الصبح كعدت ساعة ثمانية اخذتني خالة للحمام توضيت ولبستني حجاب الصلاة ..

ام عقيل / صلاتج لاتنسيها لاتخلين حزنج يبعدج عن ربج صلي وأنه احضر الريوك نتريك سوا

صليت واني دمعتي توكع عالسجادة بقيت ادعي لمعتصم وراها طلعت من الغرفة بعدما بدلت ثوب اسود خالة محضرته الي

دخلت المطبخ لكيتها مجهزته للريوك عالميز غصبتني اكعد اتريك مديت أيدي راحتها جانت وارمه وتأذيني كثر ما ضربتها عالكاع

  سوتلي خالة لفة وانطتنياها وحلفتني اكملها

،،،،

الايام تمر علية واني ميتة بدون روح امشي

ادحك على ايدية جانو وارمات كثرما دكيتهم بالكاع واني ماحاسة بالالم والوجع لأن الم ووجع روحي وگلبي جان اكبر من اي الم 

ام عقيل دومها وياي إذا موهي البنات سمرة وروعه والله شكد ما احجي على طيب ام عقيل اقصر مداريتني ومتخليني لوحدي حتى لا احس بالضوجه 

وحتى الاكل تطبخ واجيبلي اني اصلا ما أشتهي الأكل نزل وزني هواي دوم دمعتي بعيني وذكريات وطيف معتصم وياي صح كل العشته وياه خمس اشهر بس اعتبرها عمر 

لأن فترة كلها حب وحنية مهتم بية ويدور رضاي واني اعتبره دنيتي كلها اثاري الوكت ظاملي طعنته وباك معتصم مني

كمت اتخربط جسمي تعبان ماعندي طاقة لأي شي خطية ام عقيل تحير بية تاجرلي سيارة وللمستشفى تحاليل وفحوصات طلع عندي فقر دم وإرهاق بسبب قلة الاكل والارهاق تفكير زايد وثاني مرة ورى ثلث أسابيع رجعت انتكست حالتي لأن ماالتزم بالتعليمات ولا العلاج وأكلي قليل

ام عقيل وياي بالمستشفى ماتركتني جنت لابسة نقاب لأن اني بالعدة ولوما مرضي ماجان خطيت خطوة برى بيتي 

رجعنا المغرب ومن نزلنا سيارة احدث موديل بيضا طابكه يم الباب اني مارفعت راسي فتحت الباب ودخلت وبيدي علاكه الأدوية 

بقت ام عقيل برا شوي ودخلت كالت

ام عقيل / هذا حماج اجى يتطمن عليج وحجيتله الصار

نزعت النقاب وجريت نفس بدون خلك

نرجس / وتطمن جنابه

ام عقيل / اي وهاي فلوس الج

باوعت عالظرف .. ليش اخذتيهن اني مو بحالهم معتصم عافلي فلوس وو .. ماتحملت بجيت انقهرت واني اشوف العالم تتحسن علية

ام عقيل / استغفر الله هسة انتي عليش تبچين أنوبة تتخربطين وانتي بعدج تعبانه

نرجس / خالة ليش هيج حظي كلت استعدلت وياي من تزوجت معتصم ما ادري الزمن يغدر بية

ام عقيل /؛امر الله بعد لابيدي ولابيدج بنيتي لا تقنطوا من رحمة الله بعدج صغيرة العمر جدامج

بلعت غصة واني الدنيا بعيني هالكدوتها

ـــــــــــــــــــ

صعب / 

رجعت من بغداد بالليل محد يدري اني وين متعودين على طلعاتي ارجع مرات فايت وكت 

اجت على بالي زوجة معتصم حالتها بالنازل حسب كلام المرة واني أيدية مربطة كل الاكدر اسوي انطيها فلوس واسال عليها بحكم العدة اي كلام مابيناتنا زين اني شمدريني المرة تنطيها الفلوس لو تصرف عليها اااخ والله حيرة شلون اتأكد بس مبينه مهتمة بيها من خلال حجيها مدري والله الناس بهالوكت مينحزرون خل اجرب طريقة هم ترهم حتى ضميري يرتاح

طبكت سيارتي من وصلت للبيت وأخذت موبايلي دزيتلها رسالة لأن رقمها عندي صار موبايل معتصم انطيته لرانيا بعدما حذفت رسايل زوجته وسويت حظر لرقمها وبعدها حذفته حتى لحد يعرف إذا فتشوا الجهاز 

انتظرت دقائق حتى ترد من كتبتلها .. توصلج الفلوس طمنيني

ماكو أي رد نزلت من سيارتي بقيتها برا لأن راح اطلع بيها من جاي ادخل لغرفتي ورى ماسلمت على أبوية وحذيفة كاعدين بالهول والبقية مالهم حس يمكن أبيت عمي تأخذهم امي وتروح تعلل علمود رانيا والوليدات 

وصلتني رسالة سديت الباب مال غرفتي وكعدت عالفراش قريتها وتطمنت من اكدتلي توصلها الفلوس 

فتت طلعت منشفة وتراك وللحمام حتى اسبح 

كملت واديت صلاتي وطلعت للمطبخ ميت جوع فتحت الفرن عايفين عشا بعده دافي كباب طاوة ومعكرونه طلعتهم وخليتهم عالميز وطلعت خبز وكعدت اكل

دخلت لينا المطبخ ورجعت مستحية يمكن مالابسة حجاب شوي واجت سلمت وطلعتلي لبن وطرشي وجابت جطل للمعكرونة 

صعب / مشكورة خيتي

لينا / راح اسويلك جاي لأن ايهم راد همين

صعب / تسلمين خيتي إذا مابيها كلافة ملابسي يحتاجن غسل

لينا / ادلل هسة اغسلهم

صعب / لا خلها الباجر ممستعجل عليهم 

اكول شوماكو وين رايحين

لينا / عمة راحت هي وعلا والجهال لبيت عمو صالح

صعب / يوسف نايم 

نزل يوسف واجى يركض وحظنه / حبيبي

صعب / ههه لك انتي حبيبي حيال تعال تتعشى وياي

صعد عالكرسي وصعب سواله لفة كباب وانطاه

يوسف أخذ اللفة / ماما بابا ايدول جاي وين

لينا / اي حبيبي راح اوديلة

خدر الجاي وصبيت لصعب وأخذت كوب ايهم صعدت فوك ، انطيت الجاي لايهم

/ يلة هذا الجاي

ايهم / اي عفية بيج وين يوسف توى نزل وراج

لينا / صعب اجى وكاعد يتعشى وبقى وياه الحيال

ذب الكوب عالطبله / أها خوش لعد خلة يم عمه واقفلي الباب وتعاي

لينا / خاف متقبل

ايهم / ولج شو ماعاجبج ؟؟ اقفلي الباب يلة يلة تحركي 

سديت الباب ماقفلته ورجعت / مممم شنو تريد تستفرد بية

تقرب عليه وعيونه تحومي على كل جسمي ... كولي افترسج ههههه

لينا / كولش مو وكتك احنا بيا حال وانت ادور رومانسيات

ايهم ضيك حاجبه / خوش لكيتي حجة حتى تتهربين من واجبج

لينا تنهدت / اعرف واجبي ميحتاج تنبهني

ايهم / واضح لعد ليش متقبلين اتقربلج ، من يوم اللي صار بينا وانتي تتهربين

لينا / قصدك من ذيج الليلة اللي اخذتني غصب وتقربتلي واني ما راضية

ايهم خزرها / ترى اكدر أسويها بس مليت من هالشي اريدج انتي برضاج لينا لاتمرمرين گلبي

لينا رفعت حاجبها / وشبي گلبك شو ما شاء الله عليك ولا يهتم هالگلب اللي بين ضلوعك

ايهم حجاها وهو يتنهد / والله گلبي يحبج ومرمرني ذابحني عليج شسوي انطيني حل

كورت شفتها ورجعت خطوات ورى ابتسمت وفتحت الباب طلعت من الغرفة تحس ارتاحت من سمعته وشتفت نظراته اللي مليانه حب

صاح وراها ما اهتمت نزلت بسرعة من الدرج وهي تحس بخطواته وراها وفعلا اول ما وصلت الصالة كضها من ذراعها يريد يحجي وياها شافهم صعب اللي طلع من المطبخ وبيده يوسف ، صعب خزر ايهم اللي جان وجهه احمر وعاكد حواجبه معصب

صعب / ايهممم شبيك وية لينا ؟!!!

ايهم نزل ايده ومسح على شعره / ماكو شي ، بس بنت عمك تموت عالعناد

ركض يوسف على أبوه / بابا لوح باي

لينا ردت / لا باجر نروح تعال انيمك

ايهم / وين تريد تروح بابا

لينا / يريد يروح لبيت عمو صالح

ايهم / لا خلها باجر يلة روح وية ماما

ــــــــــــــــــــ

كاعدين أبيت عمي صالح اجينا نشوفهم وناكمن على رانيا والولد مثل كل مرة ،

رانيا / 

 فدوة يمة لاتمنعيني باجر اروح لأن حيل روحي مفرفحة

ام حذيفه / يمة كل اسبوع ترحين والله جاي تعذبين روحج وتأثرين على وليداتج

رانيا / ولدي يردون يرحون صهيب يوديني قابل ميعرف يسوق يأخذ سيارة عمة صلاح

ام حذيفه / انتي لأزمة عدة ميصير تطلعين هيج

رانيا / يمة وين طالعة شو لابسة نقابي وكاعدة ولا احجي ولا اسولف شي

ام حذيفه / هاي براحتج بعد وانتي حجية ترحين شو اشوف مالج خلك اليوم

ام معتصم / تسمعين العافية ضغطي جان صاعد وهسه شوية احسن .. شأرجع يعيني يم حذيفة الراح راح الف رحمه ونور تنزل على روحه

بقوا الساعة 11 واجى عليهم صعب دخل سلم على عمه واخته ام صهيب ووليداتها 

رونق جانت كاعدة صافنة من شافته دخل راحت بحظنه وصعب باسها واخذها كعدو على جهة مدنك حاظنها ويسولف وياها

صفا عينها عليهم تحجي وية علا / شوفي شلون ترتاح من تشوف صعب

علا / اي سودة علية حبيبتي يمكن لان علاقته وصداقته بابوها قوية

صفا / اي اكيد وهو هم ميضوج يبقى يحجي ويرد على اي شي تسأله

التفت صعب على أخته / صلاح كمل المعاملة وية المحامي لو بعده

رانيا / المحامي كال كملت بس يحتاجون توقيعي ومن يدز علية اروح

صعب / أها خوش خل يتكفل بكل الإجراءات لأن المحاكم والتقاعد دوخة

ام حذيفه / يمة صعب يحسبولهم نفس الراتب لو أقل

صعب / اكيد راتب زين لأن شهيد الله يرحمه برحمته وسجلو من طلعنا شهادة الوفاه وان شاء الله ميطول مبين المحامي شاطر

رانيا / اي حذيفة يعرفه يكول خوش محامي

صعب / يلة يمة خل نتوكل لأن تعبان اريد اروح انام

سلمنا عليهم وطلعنا للسيارة صعدت امي كدام وام ملاك وجهالها ورى 

نزلتهم بالبيت واني رحت لبيت عمتي ايمان محتاج اسولف وياها احس روحي مخنوك

بيت ام سما

فتحت الباب ودخلت عمتي تصلي بالهول وصلاح كاعد يكلب بموبايله سلمت وكعدت كباله .. اليوم هنا

صلاح / اي والله مكضينها لحدما ام صهيب تخلص عدتها

صعب / اي وسما اجتها بالعدلة حتى تبقى يم عمتي

كملت عمتي الصلاة متعودة تصلي ركعتين قبل متنام سلمت علية وكعدت

ايمان / هسة تسمعك وتكول صعب بس يحجي علية

صعب / والله عمة بنتج بطرانة مدوخة رجلها

صلاح / لا تطمن هالوكت ساكتة لان عمتي خوش كرضتها كرضة 

التفت صعب لعمته / ها عمة صدك هالحجي

ايمان / اي والله ما انطيتها مجال ابد عمة صعب خل رجلها يكون روحه ويجمع جم فلس عليش متوازي ويروح يغرك بالديون وشوفة عينك عمامك راح جبيرهم شلون صلاح يعوف البيت ويطلع لا عمة خلهم هسة بعد وكت على طلعتهم أبيت وحد ميصير يعوف أهله ، مصطفى متكتر بيته بوحده انوب صلاح يطلع لا ما اقبل

صعب / اي صحيح كلامج الحمدلله على كل حال يلة اني اترخص اروح للبيت

ايمان / ابقى بات هنا ليش راجع

صعب / لا خل اروح بس كلت أمر عليج من البارحه ماشايفج 

طلع صعب وعمته طلعت وراه حست عنده شي بس ماحجى لأن صلاح موجود 

اباب الحوش يريد يصعد سيارته / عمة صعب اشوف بعيونك حجي 

جريت حسرة وذبيتها / اييي والله بس مو وكتها غير مرة من اجي والكاج وحدج 

سلم عليها وصعد سيارته راجع للبيت

اريد احد قريب لگلبي أحد أثق بي وماكو غير عمتي ايمان هاي سرها ابير ماتنطي سرها لأحد لازم احجيلها خوما ابقى هيج لأن جاي اتعب نفسيا من كثر التفكير ياربي والله صعبة مجاي اكدر حتى افكر شلون اربط اسمي بأسمها وهي جانت لمعتصم اااااخ شي روحي ماتتقبله زين شلون واني وعدته  

بس اني مامقصر وياها جاي اتابع اخبارها وموفرلها المصرف 

تنهد بقوة ودخل للبيت الجان صنطه رأسا دخل غرفته وراح مدد بفراشه ميريد يفكر بشي حتى دماغه يوجعه من ( ربي اني مسني الضر وانت ارحم الراحمين)

ـــــــــــــــــــــــ

نرجس / 

أيدي على خدي صافنة من الظهر اني على هالحال بابي مقفول علية محد اجى من بيت ام عقيل عدهم فاتحة واحد من ولد عمامها توفى وراحت للجبايش من الفجر طلعوا 

بالليل جانت يمي وصتني اقفل بابي واكعد وانوب تتعذر لأن محد راح يبقى عندي وهاي صار ثلاث ايام من راحت

العدة مالتي أحسها موت بطيء روح تنازع عالبطيء وتعاند تبقى بالجسد وحسرة معجونة بألف آهة

مرت الأشهر الأربعة كأنما سنين عدت علية أحسها واني مكابلة حياطين البيت لا اشوف بشر ولا شارع لوما ام عقيل وبناتها يمكن جان اتخبلت 

ومرات هم ما أشوفهن لأن عدهم دراسة بس ام عقيل خطية تجي وتروح 

وكفاتها هواية وياي مينحسبن ودوم ادعيلها

جريت حسرة وذبيتها واني احسب بعد يومين تخلص العدة 

كمت للمطبخ من حسيت معدتي كرصتني لأن ممتغداية ولا سويت شي وهسة الساعة بالاربعة العصر كمت من فراشي وجريت روبي لبسته الجو بارد كهرباء طافية وتدفئة ممشغلة رحت للمطبخ شعلت الصوبة وطلعت من الثلاجة كبة جاهزة 

ام عقيل جانت متسوكة كولشي كالت خاف أتأخر يم عمامي وتخلصين مسواك 

والله يربي هو اني شنو الراح اكله اصلا باقي على حطته 

صفنت ب الكبة بعدها بيدي لزمت ورجعتها بالفريز مالي واهس اكلي وارتب 

طلعت دبس وراشي بالماعون وحضرت خبزة خليتها عالصوبة تحمى وكعدت اكل بدون نفس اجى على بالي معتصم ذبيت الخبز من أيدي اااوف حيل مشتاقتلك معتصم اريد ازور قبرك حبيبي بس ما اندلك 

نزلت دمعتي بلعت ريك بحسرة كمت شلت الصينية ذبيتها عالكاونتر ورحت جبت موبايلي كعدت اكلب بالصور مالته وعندي فديو محتفظة بي جان بوكتها لابس بدلته العسكرية ويريد يلتحق واني افتر وراه اصوره بكل مكان بالبيت وهو رافع حاجبه على أساس بايع ثكل علية وبس صوتي بالفيديو واني اقشمر واقلد اخر شي هو ضحك 

طفيته واني اضحك وابجي بنفس الوقت رفعت راسي فوك وعيوني مغوشة بالدمع

/ ليش ربي ليش حرمتني منه جان سندي ورجلي وحبيبي ليش استكثرت فرحتي بي فدوووة يا ربي لا تغضب علية تدري بية يتيمة وبس معتصم خلة الدنيا حلوة بعيني

أندكت الباب بقوة وفزيت بقيت خانسة بمكاني رجع الدك زاد كمزت لباب المطبخ فتحته على كيفي وطلعت راسي اسمع الباب تندك بقوة 

سديت الباب وقفلته ورجعت كعدت يم الصوبة حاظنه جسمي الصراحة خفت منو هذا انوب ماعندي سطح اصعد وأشوف اقلها البس نقاب واصعد حتى اتطمن 

بقيت اتصنت ماكو صوت دقائق ودك موبايلي خالة ام عقيل عكدت حاجبي لأن الصبح اتصلت تطمن علية صارلها ثلاث ايام من راحت ويومية تخابرني فتحته عالسريع

ام عقيل / شلونج نرجوسة

تنهدت بصوت .. هلووو خالة اكلج الباب تندك واني خايفة

أم عقيل/ لاتخافين يمة انه خابرتج علمود هالشي حماج وعمتة بالباب وهسة خابرني يكول كسرت الباب والجرس محد يطلع من البيتين كتله أنه بالجبايش عدنا فاتحه والبت قافلة الباب على روحها

نرجس / خالة يعني شنو هسة راحو لأن ما اسمع دك باب

ام عقيل / وين يرحون واكفين بالباب اطلعي افتحي للمرة ، يلة بنيتي احنا باجر راجعين بأذن الله

سديته ورحت الغرفه لبست حجاب وذبيت النقاب على وجهي وطلعت من الاستقبال افتح الباب

فتحته وكفت وراه دخلت المرة بطولي تقريبا بس موهلكد شفت ملامحها لأن النقاب يغوش على عيوني 

سلمت علية وبقت صافنه لحظات اني رديت عليها السلام بصوت يادوب سمعته رجعت للبيت واني ااشرلها بيدي حتى تدخل 

دخلت قبلها للاستقبال .. دخلت وهي تسمي بالله وراحت كعدت عالقنفة سديت باب الاستقبال ورجعت كعدت مقابيلها 

الرجال الاجى وياها يمكن رجع لسيارتة اني ما اكدر اخلي يدخل زحمة لأن عدتي بعدها ممنتهية هو هم يتصرف بحدود 

اول ما كعدت رفعت النقاب على راسي والمرية بقت صافنة بوجهي اول ما ركزت بملامحها ارتاحيتلها بيضه وجها مدور حلو ولابسة حجاب وجبة لون اسود 

ذبت جنطتها بصفها / شلونج بنيتي

نرجس / الحمدلله خالة

دنكت راسي واني احجي بغصة 

ايمان / اني عمته لابو صهيب الله يرحمه برحمته وينور قبره 

متحملت واني اسمعها شهكت بقوة وبجيت 

جسمي يختض واني ادهك بالبجي 

ماحسيت الا انحظنت وراسي على صدرها 

وأحس بجسمها يهتز كاعد تبجي وياي 

ربع ساعة خلصتها واني ابجي واون 

رفعت راسي ومسحت دموعي بيدها ..

ايمان / بالراحات بنيتي بالراحات ادعيله بالرحمه

نرجس /:خالة كولشي يوجعني روحي موجوعة وگلبي وكولشي اوووف يا معتصم ليش عفتني ليش ماكلت منو الها انت جنت سندي وحبيبي شلون هيج عفتني وحيدة ,

رجعت ابجي والمرية دموعها بعينها وتحجي وياي وتقنعني اسكت 

جريت النفس كوة ومسحت دموعي وبقيت مدنكه راسي 

ايمان / لاحول ولاقوة الا بالله يارب رحمتك

اسمعها تردد كلمات واني ساكته مدت أيدها وأخذت أيدي بين جفوفها

ايمان / ماما انتي وصية معتصم ومستحيل نتخلى عنج قبل ميتوفى وصى بيج وخلاج أمانة بركبة صعب ومو صعب اذا ميكون كد الأمانة وراعيها

رفعت راسي وعيني بعينها كملت حجبها 

ايمان / لاتكولين اني وحيدة احنا اهلج صح محد يعرف بس اني وصعب وهذا يكفي لأن مراح نعوفج واكو شي ثاني بعدين تعرفينه مو هسة خلة بعد وكته

نرجس / شنوو

ايمان / لا خلي بعدين اني احجيلج بي ، هسة اريد اعرف انتي مرتاحه بكعدتج هنا

نرجس / من يوم السمعت بي خبر معتصم واني ماحس براحه مجرد ايام تنكظي

ايمان / شكد عمرج ماما

نرجس / اربعة وعشرين

ايمان / واهلج وين الي عرفته توفو الله يرحمهم بس قصدت اقاربكم

نرجس / ماعندي أو ممتواصلة وياهم بعيدين

ايمان / انتي واصلة بالدراسة

نرجس مخلصة معهد

ايمان / صعب كال اكو مرية ام علي

نرجس / ام عقيل واني مأجرة هذا المشتمل منها بيناتنا بس حايط خوش مرية حتى اجار صار اربع اشهر ماتقبل تأخذ

ايمان /؛الله ينطيها على كد نيتها ويرزقها بس صعب جاي ينطيها فلوس بيدها توصلهم الج ترى مبلغ ( ..... ) كل شهر يوصلج

نرجس / اي توصله الي وكله موجود عندي اصلا شراح اصرف اني معتصم جان عايفلي فلوس 

وو.. ماكملت غصيت بحجايتي ودموعي نزلت

فدوة خالة بس اريد طلب منج اريد تأخذيني لقبره أزوره روحي مفرفحه عليه وكم مرة احلم يجيني هنا اووف احس روحه تحومي علية 

سكتت وبقت صافنه علية جان ترد ورى فترة

ايمان / ان شاء الله خل احجي وية صعب يلة انتي العدة مالتج راح تخلص مو

نرجس / اي بعد يومين

ايمان / زين الله يسهل ورقمج اخذته من صعب اتصل عليج تتحظرين حتى اخذج للمقبرة

نرجس /؛ان شاء الله

ايمان / اني ردت ابقى يمج ابات بس صعب كال منريد أحد يعرف للعلم هو يعتبره سر معتصم ، وميقبل يكول وصار اشهر يحاول يحجي وقبل يومين يلة حجالي

نرجس /؛ خالة اني مراح اسويلكم مشاكل لأن ما اعرف احد ولا راح اتقرب عليكم

ايمان / اوف انتي حقج متدرين شكو ،، 

يلة اني اروح خطية صعب صارله ساعة بالسيارة ينتظر بس خل يدخل المسواك وغراض اشتريتلج كم قطعه ملابس اختاريتهم توقعت نفس جسمج ماشاء الله حلوة

نرجس بحزن / تسلمين خالة بس ليش معذبة روحج ممحتاجه والله

ايمان / ميخالف ماما ماحبيت ادخل عليج وأيدي فارغه

نرجس / بس فشلة اني ماضيفتج التهيت بروحي

ايمان / حقج ماما واني عاذرتج يلة بنيتي ازورج غير مرة ونكعد نسولف ونشرب جاي من ايدج الحلوة

ودعتني بوستني بخدودي وطلعت ما طلعت وراها لأن الرجال دخل علاليك خلاهن بالطرمه وطلع سد باب الحوش وراه

ــــــــــــــــــــ

صعب /

مرت اشهر واني اريد احجي لعمتي ومجاي ترهم اكول لا مو وكتها خلها بعدين واني بهاي الفترة اتصالاتي بام عقيل ممتوقفه دوم اسال على البنت وكل شهر اروح لبيت ام عقيل انطيها الفلوس إلى أن قبل يومين قررت احجي لعمتي ايمان ................ 

..... ............. ..........

صعب /؛عمة هذا كل الصار 

عمتي فاكة حلكها علية

صعب / عمة ترى البية مكفيني لا تبقين صافنه بوجهي

صفكت ايد بيد / ولك عمة شأحجي شأكول والله العظيم بس تسمع رانيا تتخبل علينا اووف يمة منكم بيت ناصر كل دكة اكبر من الثانية تسوونها 

صعب / لعد ليش ساكت اني اختي واعرفها بس المشكلة مو هاي اني مشكلتي شلون اتزوجها ممفكر ولا اريد افكر ارتبط بيها 

ايمان /:صعب يمة أمانة ميت هاي وبركبتك ظلت الله يرحمه يدري بيك كد المسؤلية واختارك من بين كل ولدنا

صعب / عمة فدوة افهميني نفسي ماتتقبلها وهي جانت زوجته لمعتصم واني الزواج كارهه ماريد اتزوج 

ايمان / اني من وكتها السالفتك ما لحيت وياك ومن جنت مرات احجي اكول بلكن شوي تلين بس بعد السمعته لا والله ياصعب ماراح اعوفك الا تتزوجها

نتر صعب / عمممة اترجاج لا تكبرين السالفة البنت جاي اصرف عليها بما يرضي الله لهنا وخلص شلون اتزوجها ؟!!!

ايمان / انت رجال وتفهم شلون تفكرون معتصم من امنك عليها وطلبك تتزوجها ترى مو كل واحد يسويها واكيد جان واصل مرحلة خلته ينخاك وهسة انت تكول ما اتزوجها شلون يعني متكون كد النخوة ي صعب

جريت حسرة وذبيتها / انتي مستوعبة العلاقات الراح تصير اتزوج زوجة معتصم الي هو صاحبي واخوية وابن عمي وزوج اختي الي من تسمع راح تتخبل ومو بعيد تهجم عالبنت عمة رانيا غيرتها فضيعة

ايمان / زين اشور عليك برأيي وانت بكيفك بعد 

بقيت صافن عليها اريد اسمع الراح تكوله

ايمان / خل هاي الفترة تعدي وتخلص السنة والبنت راح اجيبها عندي بالبيت اكول بنت صديقتي ومابقالها أحد واجت عندي وراح افهمها على هذا الاتفاق هاي إذا قبلت ومن تستقر وتأخذ راحتها عندي انت تقدملها للزواج وهذا أشوفه احسن حل

عمتي ايمان تفكيرها كارثه شلون فرتها شلون خططتلها

صعب / اكول عمة احجي الصدك عليج الله هذا كله لخاطر معتصم الله يرحمه لو لخاطر ترديني اتزوج

ايمان / انت حلفتني والصدك الشغلتين مثل اليضرب عصفورين بحجارة وحدة

صعب /؛ خلف لله عليج خوش تضربيني ضربة

ايمان / والله يا ابني الكاتبة رب العالمين يصير وكله بالقسمة

ــــــــــــــــــــ

بالسيارة من رجعنا بالطريق عمتي التفتت علية /:والله البنت آية من الجمال هاي لابسة الحجاب والسواد مغطيها بس شلونها اني دخلت عقلي وارتاحيتلها

صعب / الله يستر عليها ليش تحجيلي بيها عمة ترى مايجوز وهي حزينة على رجلها

ايمان / والله عمة من شفتها حبيتها وانقهرت عليها لو تشوفها شلون تبجي بحركة ولوعة

صعب مقهور / وترديني اتزوجها صدك تحجين هاي جرحها غميج ترديني اتزوجها هاي إذا قبلت تتزوج

ايمان / كولشي بوكته .. هسة البنت تريد تزور قبر معتصم شتكول انت

صعب / حقها هذا خل تخلص عدتها ونجي اني وياج نوديها

ايمان / اي نهاية الأسبوع خلها وهم افاتحها بكعدتها عندي انت شتكول

صعب / هاي هي التشوفينه عمة وانتي اعرف مني بهاي السوالف

ايمان / شوف اني راح اكول صديقتي توفت ورحت الفاتحة وبنيتها بقت وحيدة كاعدة عند الجيران ومفكرة اجيبها تعيش وياي

صعب / بكيفج عمة بس خوش فكرة هاي حتى لحد يسأل بعد ويدرون بيج صديقاتج هواي

ايمان / ايي والله شو هسة اجت هاي الفكرة على بالي

ـــــــــــــــــــ

نرجس / 

رجعت ام عقيل واجت علية وحجيتلها الصار

ام عقيل / والمرية هاي شلون تأكدتي عمته 

نرجس / هااا مدري بس هي حجت وكامت تبجي وياي

ام عقيل / اكلج نرجوسة شو احنا لا نعرف أهله ولا نندل بيتهم كل النعرفه نازلين بديالى

نرجس / اني اندله لأن معتصم كولشي حاجيلي عليهم

ام عقيل /:شوكت ترجع عمته

نرجس / مدري يمكن كم يوم

ام عقيل / مامطمنة اعوفنج ترحين وحدج وياهم 

نرجس / لعد شلون اني روحي مفرفحة اريد ازور

ام عقيل / چا شنهي اعوفنج وياهم عالم غربة مانعرفهم

نرجس / خالة شبيج دوختيني واني ماناقصني لعد شلون تأخذين الفلوس والغراض من الولد شو متعترضين

ام عقيل / والله الصدك الرجال مبين ادمي عينه مايرفعها وحجايته بثكل موش أخفيف 

بس أنه إذا كعدت وية المرة افهم شتريد حتى اتطمن عبن ما شايفتها أنه واحجي بكيفي

نرجس / هااا هيج لعد

ام عقيل / ديلة اروح لبيتي

نرجس / خالة أخذي من المسواك لأن خير من الله وين اودي اني

ام عقيل / لا يمة خلة الج تستفادين منه

نرجس / لا والله وهاي اني حلفت تعاي بالمطبخ شوفي الغراض

دخلنا المطبخ وفكت حلكها / ياه شعندج عايلة هلكد متسوك صدك عود وين تودينا

انطيتها علاكة جبيرة جمعت كم غرض واخذتهن وهي تتشكر مني

نرجس / خالة هو انتي صاحبة فضل علية وما انسى وكفاتج وياي حتى اجار متقبلين تاخذي 

بس من هالشهر تاخذينه لا والله ازعل

ام عقيل / هاي هي العدة خلصت وأنه كودن جنتي بعدة وحزينة مالي نفس الزم فليساتج

نرجس / حبيبتي خالة الله يرزقج ويحفظلج عقيل وخواته

ـــــــــــــــــــــ

ايمان / 

حجت وية اخوها ابو معتصم على ما اتفقت هي وصعب والظاهر اكو من يعترض

ايمان / وانتي شعليج اني جاي احجي وية اخوية الزعاطيط شلهم دخل ؟!!!

صفا / عمة حبيبتي جنت اتشاقى والله

ايمان / صفا فاهمتج ترى مو علية تعبر هاي السوالف

ابو معتصم / عوفج منها كومي صفا سوي جاي

ايمان / ها ابو معتصم ترى كلامي مابي شي البنت محتاجتني

شكرا لزيارتكم عالم روايات سكيرهوم