رواية جراح قلبي الفصل الرابع عشر بقلم جوهرة
وامها الله يرحمها جانت صاحبتي من زمان
رانيا / عمة انتي هواي صديقاتج وحلو تتواصلين وياهن بس والله قهرتيني على بنتها مسكينة ماعدها أحد
ايمان تنهدت / والله يا ام صهيب لعد اني ليش اريدها عندي بيتي اقلها تونسني
صفا / وصعب مرات يبات عندج ... حجتها وهي توزعلهم الجاي
خزرتها عمتها وهي تاخذ استكان الجاي / هذا وليدي بيوم المااشوفه مدري شبية احس مضيعه شي
سما / ها ماما واحنا وين رحنا
ايمان / ولج انتن ملتهيات رجال وجهال وبعدين بيتي مفتوح للكل
صالح ابو معتصم / والله خيتي انتي متقصرين دومج صاحبة واجب هاي بعد براحتج وهم تكسبين اجر بالبنت خطية يتيمة
كعدت صفا وعينها على عمتها ايمان بعد متكدر تحجي لأن رزلتها بس بداخلها ضاجت من طاري البنت شلون راح تعيش أبيت عمتها وصعب دومه يروح ويجي اصلا اغلب أوقاته هناك أكثر كل ولدهم يزورها
رجعت ايمان لبيتها ومن دخلت اتصلت على صعب اتذكره بروحتهم باجر يطلعون من الصبح وخبرته محد يدري يرحون ويرجعون نفس اليوم إذا الله سهل
وخابرت نرجس وفهمتها باجر الصبح راح تزورها
ـــــــــــــــــــ
صعب /
تعال عمو تعشى .. صاحته جنات بنت حذيفة
طلع من غرفته لكاهم فارشين سفرة العشا وملتمين كلهم بالهول
كعد بصف ايهم الجان مخلي يوسف بحظنه
صعب /؛ ترى هواي صاير حريص يابة خلة كاعد بصفك الولد جاي يكبر مايصغر
ايهم / ههههه هاي شبيك على ابني
صعب / ها بابا يوسف انت صرت جبير مو
هز يوسف راسه لعمه بدون ميحجي
حذيفه سال / باجر موجود بالمكتب لأن جماعه راح يمرون عليك يردون يشترون كاع
رفع راسه لحذيفة / عندي ارتباط وية جماعه من بلدروز وباجر طالع واحتمال أتأخر خلها عكب باجر
حذيفة / هاي هي راح اتصل وابلغهم
سكت صعب ورجع يكمل عشاه وهو يفكر لباجر اصلا باجر طالع لبغداد
ــــــــــــــــــــ
وصلو ساعة ثمانية الصبح جنت متحضرة لابسة عباية رأس خالة ام عقيل كالت انتي رايحة مقبرة العباية احسن
رغم اول مرة ألبسها انطتني عباية سمرة
عمة معتصم كعدت وية خالة ام عقيل وبقت تسأل بيها اني رحت احضر ريوك يمكن ممتريكين عيب صاحت ام عقيل / نرجوسة تعاي الجماعة راح يرحون
رجعت عليهن / كلت اسويلكم ريوك
ايمان / لا بنتي الحمدلله تريكنا يلة خل نتوكل
طلعنا لديالى واني كعدت بالمقعد الخلفي مدنكة راسي من صعدت وسلمت عالولد الكاعد ردلي السلام بصوت ثكيل
الطريق كله مشغل قرآن وعينه عالطريق كلمة ماحجى رغم عمته تسأله على شغلات وهو يرد بكلمة وبصوت ناصي
رفعت راسي والتفتت عالجامة ودكيت راسي بيها بقيت طول الوكت ساندته عليها ومغمضه
اول مرة بعد فترة اطلع من البيت
تنهدت وفتحت عيني من سمعت عمته تكول وصلنا
المقبرة جبيرة واني من شفتها گلبي انعصر ودموعي نزلت
ويم قبر معتصم الرجال وكف قرا فاتحه وابتعد واني بعد ما دريت بروحي ذبيت جسمي عالقبر وابجي بكل لوعتي وبكل حصرتي وبكل حرماني
واعاتب معتصم ليش عافني حسيت على جرة أيدي وعمته تحجي وصوتها رايح من البجي ..
ايمان / كومي ماما انتي جاي تعذبينه هيج
الله يرحمه برحمته اكعدي ادعيله هاج هذا كتاب الأدعية
اخذت الكتيب وفتحته وكعدت على جهة من القبر وبقيت اقرا الدعاء ودموعي تنزل مابطلت
كملت وقريت الفاتحه مسحت دموعي واسمع صوت رجال / يلة عمة خل نطلع لبغداد
صاحتني /نروح بنيتي
هزيت راسي بمعنى اي ومشيت وراهم للسيارة الي بعد مسافة قليلة عن المقبرة
كعدت واني اجر بحصرتي وعيني عالمقبرة
حرك سيارته واسمع عمته / صعب خل نرجع لبيتي
صعب / مو وكتها عمة
ايمان / شتكولين نرجس تبقين عندي وباجر ترجعين
نرجس بصوت يادوب ينسمع / لا لا ما اكدر مشكورة
ايمان تريدها تكون على علم بالراح يصير / ياه ليش لعد شلون راح اجيبج تعيشين وياي
شهكت فاكه عيني مصدومة بالسمعته والرجال عينه بالمراية صارت مركز علية
ما اهتميت كل الاجى على بالي ناس غربة لو حتى أهل معتصم الله يرحمه بس ما اعرفهم وصعبه اجازف هيج مجازفة خليني اني وام عقيل اقلها اعرفها وتعرفني
حجيت مصدومة / مستحيييل انتي شتكولين
جانت نبرة صوتي عالية كد ما صدمتني
التفتت علية / ماما لاتعصبين فكري زين مكانج عدنا انتي محسوبة علينا
نرجس / لااا ميحتاج افكر لأن اني رافضة هالشي
واخيرا نطق الرجال وبصوت خشن / مو بكيفج هاي وصية ابو صهيب ولازم تتنفذ
بقيت صافنه عليه وهو سكت ماحجى بعد
التفتت احجي وية عمته / رجعوني لبغداد هسة
حسيت روحي مثل المخطوفه و شعور طوقني خلاني ارتبك واخاف وكل الاريده ارجع لبيتي
