رواية جراح قلبي الفصل الخامس عشر 15 بقلم جوهرة

ايمان / 

صعب عمة اطلع لبغداد

نرجس /

تنفست براحة واني اسمع عمته تحجي وياه 

الطريق كله ساكتين بس صوت القارىء احمد العجمي 

اني استغربت ليش ما اعترضوا أكثر وليش ساكتين !!! ما اهتميت للموضوع لأن ميخصني اهم شي رحت زرت قبر حبيبي معتصم الله يرحمه 

وارجع لبيتي هاي كولش كافي ماريد شي بعد 

صعب /

ابد ما ركزت بيها من صعدت بالسيارة حتى بالمقبرة من بقت تعيط وصوتها مبحوح صح حسيت بحزنها وانقهرت عليها وابد ما باوعتلها عفتهن وابتعدت 

بس من سمعتها نترت وتكول رجعوني عيني اجت بعينها نظرتها منكسرة وحزينة ضوجتني على شنو تعترض 

كلام عمتي خلاني اسكت وارجعها لبيتها وطول الطريق ساكتة ماتحجي إلى درجة حسيت مموجودة ويانة 

اني هم بعد ما سألت عمتي الي براسها موال

وصلنا للبيت طبكت السيارة نزلن وعمتي نزلت وبيدها علاكة الغدا لأن مريت اشتريت من المطعم 

نزلت واني عيني عليها دخلت البيت قبلنا 

اشرتلي عمتي بدون ماتحجي ودخلت وراها 

جانت فاتحة باب الاستقبال 

دخلت وراحت شغلت التدفئة وأخذت العلاكه وفاتت جوا بدون اي حرف تنطقه 

رفعت تك حاجب لعمتي

ايمان / وكت صلاه ما تتوضى اكوم اني حتى اصلي الظهر

صعب / اي ترى فات وكتها وين الحمام اريد اتوضى

ايمان / انتظر خل اروح اشوف

طلعت عمتي واني سندت ظهري عالقنفة التخم وعيني بالسكف

ايمان / تعال عمة صعب 

رحت اتوضى واسمع عمتي تحجي وياها بالمطبخ وهي مالها صوت

ايمان / وين اتجاه القبلة اريد اصلي

نرجس / اي خالة هسة خل اغسل ايدي وانطيج مصلاية 

وديتها بغرفتي شكرتني واني طلعت عيب ابقى يمها تأخذ نظرة علية ممأمنة بيها أو غير شي 

ورى شوية دخلت لكيتها مكملة وكاعده عالجرباية ومدنكه

نرجس /: ها خالة خوما بيج شي

رفعت راسها / لا ماما ماكو شي بس عندي جم حجاية وياج

رديت عليها واني گلبي نغزني / تعالي نتغدى هسة

طلعت للمطبخ جنت مسوية صينية التفتت هي وراية / إذا ما بيها زحمة هذا غدا الولد 

ايمان / ها عبالي نتغدى سوية 

نرجس / اعذريني خالة بس كلت نتغدى اني وياج هنا عالميز بالمطبخ

ايمان / براحتج بنيتي 

اخذت الصينية بيدها وطلعت 

واني جنت مرتبة الاكل عالميز كعدت انتظرها 

جان مشتري كباب شوي ومقبلات واني كليت كبة جاهزة وفنكر 

رجعت كعدت وياي وبدينا نتغدى 

عفتها تتغدى ورحت خدرت الجاي التفتت عليها من كالت / راح اخذج تعيشين عندي معززة مكرمة 

انتجيت عالسنك وحظنت جسمي بيدية وعضيت شفتي بدون ما احجي ماريد استعجل

ايمان / بنيتي معتصم قبل وفاته وصى صعب عليج

نرجس / خالة اترجاج اني ما اكدر

عافت الاكل وانتبهت علية / ليش ماما انتي هنا وحيدة هناك راح تعيشين وياي ومراح تكونين غريبة

نرجس / خالة صعبة والله

تنهدت ام سما وهي تشوف عنادها ورفضها 

عافتها وطلعت تغسل ايديها

لملمت المواعين ونصيت جوا القوري وكفت عالسنك اغسلهن 

دخل الولد شايل الصينية وذبها عالميز اني جفلت هو رأسا طلع

كملت وصبيت الجاي واسمع عمته تصيح .. تعاي هنا يمنا 

كورت شفايفي ماعاجبني الصراحه لأن جاي احس بداية لتدخلهم بحياتي 

وديت الجاي خليته عالطبلة كدامهم

ايمان / اكعدي ماما اكو حجي لازم يكون عندج علم بي

ترددت اكعد بقيت واكفة رفع راسه علية عاكد حاجبه وشكله ماعاجبه شي !!!!!!

صعب / انتي هسة بحمايتي ابو صهيب الله يرحمه وصى بيج فتسمعين الكلام الله يهديج وتجين ويانة

رديت بسرعة واني اريد اقطع اي محاولة منهم / مستحيل اني ماعوف بيتي

صعب / موبكيفج هاي وصية ميت لازم تتنفذ واكيد جان خايف عليج واضطر يوصيني فعندج قابلية على الرفض وروحه تبقى غضبانة عليج لو تجين ويانة وتكونين محل تقدير

اندكت الباب ودخلت ام عقيل سلمت عليهم وعينها على نرجس الجان وجها ميتفسر

نرجس وشافت بأم عقيل سند / تعاي خالة اسمعي الحجي

ام عقيل / شنهي السالفة

كعدت عالكرسي وتريد تفهم الموضوع

نرجس / يردوني اروح اعيش وية خالة ايمان

بقت صافنة عليهم ومن حجى صعب يأكد هالشي ردت ام عقيل / چا خوش وتريدها تكعد يم عمتك

ردت ام سما 

/ عيني ام عقيل هذا الصحيح البنت منكدر نعوفها وحدها بعد

ام عقيل / البنت أنة عيني عليها ومأمنة عبن بسدي عايشة

ايمان / من الاخير احجيها حتى تصير واضحه الله يرحمه معتصم وصى وآمن صعب يتزوجها

شهكت صوتها ولطمة ايديها على وجهها خلتهم فاكين عينهم عليها

نرجس بصرخة / عزاا العزاني شلووون هيج تحجون ولكم اني بيا حال البارحه خلصت العدة

كعدت عالكرسي وهي تحس جسمها صابة شلل من سمعت الكالته ايمان 

مسحت وجهها وعضت على إصبعها وبقت مدنكة راسها وتنود بجسمها

ايمان / بنتي صلي عالنبي خوما جايين ناخذ روحج على كيفج

نرجس / 

جريت حسرة وذبيتها ورفعت راسي وعيني بعينه / لو اموت ما اتزوجك شنو هالقابلية العندك شلون تتزوجني واني مرة اخوك

تنهدت بقوة واني اسمعها تحجي بعصبية رديت عليها

/ اولا معتصم ابن عمي وزوج اختي الجبيرة وثانيا ما ذابح روحي عليج افتهمتي اني كل اليهمني أنفذ وصيته وماخون الأمانة الأمني عليها

نرجس / لا بلة وتريد تقنعني معتصم يتنازل ويكلك تزوج مرتي انت عقلك بي شي ؟!!!

صعب / 

كمت واني دمي فاير اريد اكفخها صاحت عمتي / صعب عمة بالهداوة 

التفتت على عمتي واني عيوني كامت تطلع شرار / طالع برا اني وفهميها الحجي عدل

عفتها وطلعت لأن إذا ابقى راح أمد أيدي عليها وهالشي ماريد اسوي 

صعدت بسيارتي وسديت الباب وانتجيت براسي عالمقعد احس بتعب نفسي احس اعصابي تعبانة

ـــــــــــــــ

دخلو ولد معتصم لبيت جدهم

علا/ هلة والله هلة بوليداتنا

صهيب / هلو عمة شلونج

علا / بخير شنو وحدكم لعد ماما وين

صهيب / اجت ويانة بس واكفة تسولف وية خالو اياد

علا / تعالو اكعدو واحجولي شلونكم بالدراسة 

رد صهيب .. الحمدلله درجاتي فول أن شاء الله طبية السنة

علا / فدووة حبيبي إن شاء الله

علا / ها رنو ليش صافنة 

رونق / وين خالو صعب

علا / عنده شغل يتأخر احتمال روحي يم البنات ملاك بالغرفة هي وجنات

دخلت رانيا سلمت على علا وكعدت / امي ماكو

علا / ابيت عمتي ام غزوان

رانيا / اكلج مرينا لبيت عمة ايمان مموجودة بابها مقفول

علا / لعد طالعة شوف وين

نزلت لينا وبيدها يوسف سلمت وأيهم نزل وراها

ايهم / هلة كل الهلال شلونج ام صهيب

رانيا / الحمدلله شو متبين مفتقدتك والله

ايهم / والله ملتهي بالشغل

رانيا / صدوك عمو سامي خابرني وسلم عليكم ويكول مكانك خالي جنت متونس من ايهم وياي

ايهم / ههههه اي طبعا الشغل كله براسي

رانيا / ماناوي ترجع بعد

لينا / 

فكت عينها وبلعت ريك وهي تسمع رانيا تسولف وية ايهم خافت يرجع صدك وترجع تتبهذل وتنركن على صفحه اووف هسة هاي سالفة تحجينها يارانيا

متكدر تحجي وتردها تخاف من ايهم 

تنفست براحة من كال وهو يلتفت عليها جان يوسف بحظنها / يمعودة خلي اعوض سنين فاتتني

رانيا / ههه اي هم حقك الله يسعدك 

ذبيت يوسف عالقنفه وكمت اسوي كاكاو

بس شنو احس بقهر لأن من أحد يحجي و يجيب طاري الاردن شكو ذكريات سيئة تغزوني 

مرات احس رانيا تتعمد تحجي ولو المرة علاقتي زينة بيها بس هذا احساسي لأن اني طبعي نحس تبقى الكلمة ادك بگلبي

اجت عمتي وراحوا كعدو بالهول وبقى ايهم 

اني التهيت اصب كاكاو بالفناجين وديتلهم وطلعت بالمطبخ من دخلت جرني لحظنه وسد الباب الداخلي / ليش وجهج مغيم

رفعت راسي وبكل صراحه / ماريد أحد يذكرني انقهر والله واني اتذكر سنين تركتني ماتسال علية

ايهم / جججج وشمدريج ما اسأل لا والله وداعت يوسف كلما اتصل أسأل عليج بس جنت اوصيهم مايحجون انتي شلون تتوقعين اني اعوف زوجتي وما اعرف اخبارها

لينا / اسم الله على أساس مهتم لا تسال على زوجتك وتريدني اصدك ، ايهم فدوة والله متعقدة من هالشي

ايهم / 

عصرني بحظنه اقوى ودنك باسني بشفايفي 

/ اي صدكي ، لينا ترى وصلت حدى تالي وياج زين تصرفاتي وياج متحسسج بشي 

ابتسمت وعضيت شفتي

ايهم / ههههه حيالة ، الليلة ما اعتقج والله

عافني وطلع واني تنفست بقوة واحس دغدغة مشاعر حلوة

ـــــــــــــــــــ

نرجس / 

من طلع التفتت على خالة ام عقيل ودموعي مابطلن ..

نرجس / شفتي وين صفت بية الدنيا شفتي شلون فرتني فرة

ام عقيل / اهدي خلن اسولف وياج

نرجس / ليش شكو بعد انتي سمعتيهم

ردت ام سما / بنيتي والله العظيم لوما وصية معتصم جان ماحجيت حتى صعب ترى مو هينة عليه السالفة حقج انتي ماتعرفين صعب منو

قاطعتها واني بديت افقد اعصابي / ومنووو يعني لا اعرفه ولا اريد يتقربلي

ايمان / اني مكلت هسة الزواج وادري بيج جرحج طري ومهضومة اقلها ورى سنة لأن صعب ميقبل هسة 

نرجس / اني العندي حجيته خلاص وماريد أحد يفتح وياي هذا الموضوع

ايمان / دكومي جيبلي كلاص مي وردة 

طلعت نرجس والتفتت ايمان على ام عقيل 

وبصوت همسته حتى لا تسمعهن

ايمان / اريدج تقنعيها فدوة ام عقيل البنت أشوفها حبابة ودخلت گلبي والله وإذا تردين الصدك اني شجعت صعب يتزوجها رغم رافض الزواج نهائي

ام عقيل / اكلج خية هو شكد عمره

ايمان / بالخمسة وثلاثين

ام عقيل / ومامتزوج چا شنهو الينتظره

ايمان / اووف سالفته سالفة

دخلت نرجس وقدمت المي اخذته ايمان وشكرتها بعدها كامت ..

ايمان / يلة اترخص اني ورانا طريق

نرجس / ابقي خالة ليش ترحين

ايمان بعتب متقصدته / لا خالة مبين ممرحب بينا هنا يلة مع السلامة

حسيت بخجل واحراج واني اسمعها هيج تحجي يربي والله اني ضيفتهم بس كلامي وياهم لأن استفزوني

طلعت وراها وام عقيل وياي جانت تودع بيها وتحجي وياها منطلقه بالكلام عبالك تعرفها من سنين

نرجس / خالة اعذريني انتي هم واعذري ظروفي

وكفت والتفتت علية / عاذرتج ماما والله يجبر بخاطرج إن شاء الله ويسعدج 

سلمت وطلعت واني رجعت دخلت الاستقبال وام عقيل وراية راحت تربعت وكعدت عالزولية واشرتلي / تعاي هان اريد أحاجيج 

رديت عليها بدون خلك /؛ فدوة خالة عوفيني مابية حيل عالسوالف 

ام عقيل / چا خوش أنه اسولف وانتي اسمعي يلة تعاي

كعدت كبالها وراسي منزلته اريد اسمعها شتكول 

ام عقيل / مرات ألوم روحي عبن أنه سبب بزواج المرحوم منج شكيتله حالج وعيشتج وهو الله يرحمه ماقصر ومرات اكول الحمدلله هاي قسمتج الله كاتبها بعد واحنا مانكدر نعترض يابنتي رب الي سخرلج رجل مثل معتصم وأخذه منج عنده حكمة كله اسباب رب العالمين خلاها للبشر والدنيا ماتوكف على بشر وانتي بعدج وردة توها فتحت للدنيا خوما تدفنين روحج ييمة لا تزعلين مني تدرين شكثر احبج واريد مصلحتج باجر تكبرين ومحد يدوم لحد راح تحتاجين اليسندج وانتي لا عمام ولا خوال من كلهن مفلسة كولي الحمدلله أنه عندج وساندتج بس هم ضروري تفكرين بمصلحتج وهذا الرجال بعده انتي اول قسمته واكيد راح يصونج ويحبج وانتي شوفة عينج ماكل ولا مل بين فترة وفترة يجيب الفلوس والمسواك ويسأل ويتطمن عليج 

لو غير واحد جان كال وشنهي أنه ابقى رايح راد ابنا ومات وهي لا ولد ولا بنت يربطها بينا فكري زين بحالج وشوفي انتي حياتج وحيدة شلون تصير 

يلة أنه اروح لبيتي وانتي فكري 

طلعت ام عقيل واني بقيت على كعدتي عالزولية جريت حسرة وذبيتها وانتجيت بظهري على رجل القنفه

دوختني بحجيها الي أغلبه صحيح واقع حال اوووف شسوي إذا هذا حظي استغفر الله يارب استغفر الله يارب 

بقيت صافنه بدون ما يجي على بالي شي ماحسيت بالوكت الا بعد فترة الدنيا مغربية صايرة والكهرباء طافية كمت حولت عالمولدة وطفيت التدفئة وشعلت الصوبة بالمطبخ وطلعت حتى اتوضى واصلي العصر والمغرب 

ممصليتهم ماريد افكر هسة بأي شي مالي طاقه عالتفكير

ــــــــــــــــــ

بالليل أبيت ابو حذيفة 

/ وانتي شلج بهيج سالفة هاي وراها مسؤلية باجر عكبة يطلعولها عمام لو خوال يخبصونا

ايمان / حجي فدوة لعينك البنت وحدانية واني ما اكدر اعوفها بنت صديقتي ومن قبل جانت توصيني بيها

حجي عبدالله / والله ام سما هذا كلامي وكلته بعد انتي بكيفج 

التفتت على الولد / وانتم شو ماحجيتو

رد حذيفة / اقلها تكسبين بيها ثواب

ايهم / اي والله صحيح وانتي ياعمتي ام گلب الحنين 

ابتسمت ايمان لأيهم من حجى / المهم البنت إن شاء الله تقتنع وتجي تعيش وياية

حجي عبدالله / هلة والله ليش ماتقبل لعد على شنو كاعدة تخططين وتحجين

ايمان / ابو حذيفة ترى صعبة عليها وتستحي كلت أقنعها بلكن تقبل

حجي عبدالله / اي بعد بكيفج والله يتقبل عمل خير هذا

صعب / 

ساكت واسمع عمتي تحجي وياهم ماتدخلت لأن بالطريق البارحة هواي حجينا حتى صرت عصبي على عمتي ، لأن قررت ما اتزوجها خلها عايشة وحدها واني بين فترة وفترة امر عليها اشوف طلباتها لأن البنت مجاي تتقبل هالشي 

بس عمتي الله يهديها خبصتني بحجيها ومبين عليها البنت عاجبتها بالنسبة الية متفرق عندي لأن نهائي ما نظرتلها بغير نظرة لا سامح الله اني النسوان حاط علامة X عليهن ممفكر اربط حياتي بمرة

ــــــــــــــ

لينا / 

 ايهم فدوة الأسماء طالعة اكعد يلة ساعة عشرة هسة

كعد ومسح على وجهه ورجع شعره بيديه للورى / اكلج ترى اكلتي راسي من الصبح خليني نايم اليوم لأن ماريد اروح للمكتب طلعتي بهاي السالفة

لينا / عفية حباب الله يخليك اقلها اسالهم بلكن طالع اسمي

ايهم / شبيج انتي بابا اكو نت ادخلي عالرابط مالتهم وشوفي قوائم الاسماء 

لينا / يووو بقيت لهسة من الفجر كاعدين البيت كله انذار داخلين عالرابط ومجاي يحمل راح اتخبل

ايهم / هه عابت هيج وزارة كلك كولشي بالدفعات

شمرت الغطا ونزلت /؛ اروح اسبح واصلي حظريلي الريوك 

التفتت عليها من شفتها صافنه / شبيج گبد 

يلة استعجلي

لينا / ياه هو منو اليستعجل

تقرب علية ومسح على خدي ويادوب مفتح عيونه / شنو رايج نجدد اللي سويناه البارحه

نزلت راسها مستحية ورجع ايهم حاوط وجهها بين ايديه / اموت عاليستحي  

لينا / 

اعرفه راح يبقى يدك ناعم عفته ونزلت جوا باوعت بالهول يوسف وأيمن وحدهم يلعبون والبنات بالمدرسة 

طلعت بيض وجبن وحظرته عالميز ورحت اطرك البيض

علا / اوي دخت مجاي يظهر شي

لينا / علا عوفي هسة ايهم يروح للتربية

هلا / هههه صدك تحجين بابا ياتربية اقرب مكتب انترنت يروح يسأل ميحتاج روحة

لينا / اعرف بس حتى يتأكدلي شسوي اريد اتطمن

سويت البيض والريحه سطرتني ذبيت الماعون عالميز وطلعت للمغاسل واني ااشر لعلا تكمل مكاني

ذبيت من راسي يلة ارتاحيت حسيت معدتي انكلبت 

رجعت للمطبخ والخاولي بيدي انشف بوجهي وعيوني 

علا / سلامات شبيج

التفت ايهم علية كعد يتريك وبقى عينه علية

رحت كعدت عالقنفة واني اجر نفسي ..لعبت نفسي من شميت ريحة البيض 

علا / فدووة لعد راح اكول مبروك

عكدت حاجبي ممستوعبة كلامها ورجعت تحجي وية ايهم

علا / عيني ابو يوسف دير بالك المرة جنها حامل

اباوع على ايهم واني انسطرت بالخبر وبقيت اركز على اخر موعد لدورتي يعني فايت اسبوع باوعت اشوف الفرحة بعيون ايهم الي حسسني يريد هالشي ، بس اني احس بربكة وقلق لأن حملي بيوسف جان بظروف مليان قهر وحزن ، بس هسة الوضع تغير وأيهم يدور رضاية ومهتم بية ، صفنت وية نفسي يعني الحمل هذا من تقربلي اول مرة بعدما جانت علاقتنا متوترة وتقربلي غصب مادريت بروحي واني اخزر ايهم بنظرات حادة هو بقى صافن بوجهي يريد يعرف ردة فعلي ليش ساكتة

كعدت علا بصفي / اليوم نروح للدكتورة اني وياج ونتأكد وهم اجيك وضعج إذا فعلا حامل

التفتنا على ايهم من كال / شو خل اشوف عيني بعينج هيج خليها

صفن ثواني بعيوني وغمزلي وضحك .. هههه 

اكيد حامل يابة مابيها نقاش هاي

عافتنا علا وطلعت واني كلت .. ايباه على أساس دكتور حضرتك 

شرب جايه وخلا الكوب عالميز وكام يغسل تقرب علية واني منتجية بتك ايد عالقنفه

ايهم / هو يوسف حبلتي بي واني مرة وحدة لو مرتين تقربتلج اصلا راح أنصدم إذا مراح تطلعين حامل ضرب خشمي بأصبعه بكل خفة وراح

واني خدودي احمرن من كلامه عزا شلون حجاها ولا يستحي همزين علا مموجودة يبو جان نصبت علية

انتبهت من رجع وصاح يوسف يجيبله السويج

لينا / اني اروح اجيبه

ايهم / لا يمعودة بعد صعده ونزله ممنوع بالراحات افتهمتي

اجت عمتي / ها صاير تحرص على مريتك

راح باس راسها وخدها / افيش يممه 

لعد شسوي مريتي حيلة لازم اداريها 

التفتت علية فرحانة / صدك يمة بالمبارك

لينا / يا الله عمة بعدني هو اني ما ادري بروحي بس علا وأيهم هيج يحجون

كعدت عمتي وأيهم واكف مقابيلي / شنو بكيفهم رجلج متاكد وفرحان بعد عليش

ايهم / اي يمنع فدوة لحلكج توني جاي اكللها حبالتها بيوسف .. .... ... قاطعته بسرعة واني استحي من الراح يحجي 

لينا باحراج / ايهههم عفية شنو هاي والله استحي

حك لحيته ومسد عليها /؛ هههههه يلة يلة سكتت بس تحظري العصر اخذج للدكتورة

دخل يوسف يركض شايل سويج دنك ايهم وباسه بخدودة المتفحات / اووخ راح اكلهم

يوسف خربان ضحك وصى أبوه يجيب حلويات ورجع يركض على ايمن بالهول 

طلعت ورى ايهم صعد سيارته بعدما فتح باب الحوش واشرلي ارجع جوا اني هم ابتسمت له ودخلت المطبخ لملمت الميز ونفسي كاشة من البيض غسلت المواعين ورحت طلعت بامية من المجمده أسويها عالغدا وطلعت كم قطعه لحم وياها 

علا صاحت علية / لينا اني رايحه اخبز عينج عالجهال

ــــــــــــــــــ

ايهم / 

مريت لمكتب انترنت حتى اشوف اسم لينا طالع بالتقديم الولد شافهم وكال مطالع واتاكدت بنفسي هم جاي أتصفح وأشوف اسم صفا الوحيدة من العائلة طالع اسمها 

ماخابرت عليهم اكيد عدهم علم بس دزيت رسالة لأم صهيب بهالشي

الصراحه جنت رافض لينا تقدم عالتعيين بس من شفتها راغبتها ماحبيت اكسر بخاطرها شو هسة ضجت عليها لأن اسمها مموجود سالت الولد إذا عنده علم بقوائم غير هاي 

كال اكو احتياط راح تطلع للعصر لو باجر 

مارجعت للبيت رحت لمكتب صعب من فترة مرايح واني عندي شغل وياه بس هو ميحجي زين وخاصة هالفترة مدري شبي بس يضرب صفنات احتمال علمود ابو صهيب الله يرحمه صح كلنا تأثرنا ومجاي يروح من بالنا بس صعب اكثر شي متأثر عليه

ــــــــــــــــ

لينا / 

طلعت يم علا كملت الخبز / شفتي حظي اكيد اسمي مطالع وأيهم ما اتصل حتى لا اضوج دز رساله لرانيا علمود صفا طالع اسمها

علا / عليج الله صدوك 

لينا / اي والله توها اتصلت علية يلة بالخير عليها تستاهل

علا / الخير يصيبج يارب

لينا / تسلمين .. اروح اكمل الطبخ

ــــــــــــ

عالغدا وصلو الولد وصبينالهم كعدنا نتغدى واني ما اكلت قليل لأن ايهم من اجى كال مطالع اسمج بس اكو قوائم احتياط راح تطلع 

فمالي نفس وانوب افكر خاف صدوك حامل ياربي الف الحمدلله اقلها اخ ليوسف والي ريحني تصرف ايهم من سمع أشوفه فرحان

للعصر وداني للدكتورة وياما علا وأيمن نزلنا وأيهم أخذ الجهال كال افرهم بالمول ومن نكمل نتصل عليه 

علا هم تريد اجيك روحها فحجزنا اثنينا واني رحت سويت تحاليل وبقيت انتظر شوكت تطلع

رجعنا بالليل والطريق كله ايهم ناصب على يوسف وأيمن على راح يجيكم اخ وراح يسيطر عليكم وراح اخلي يتزعمكم وهذولي خطية يفرفحون 

واحنا نضحك عليهم ومن يوسف كام ميسيطر على غيرته عض ايد ايهم بقوة والله حتى أسنانه نبتت بايده

ايهم / لك ليش اااخ والله توجع

يوسف بعصبية / خ ولي ماريده

ايهم / هههه لا خطية اخوك صغنوني هذا

لينا / يووو ايهم عليك الله ليش هيج خليتهم شوف يوسف راح يطك تعال ماما حبيبي بابا يشاقيك هذا نونو هنا خاتل يكول ما اطلع الا حبيبي يوسف يرضى 

التفت وحظني وخلة راسة على صدري دنكت بسته براسه وحظنته وأيدي تمسح على ظهره

ــــــــــــــــــــــ

نرجس /

خالة رايحة استلم الراتب نزل البارحه ( تقاعد ابوها )

ام عقيل / ترحين وحدج لو ادز عقيل وياج

نرجس / لا يمعودة المكتب قريب يلة اروح بس كلت انطيج خبر

طلعت من بيت خالة ام عقيل جنت لابسة بنطرون اسود وفوكاه كوت للركبة ولافه شال على راسي 

رحت المكتب الصرف سحبت راتب التقاعد وطلعت بالشارع حسيت أحد يراقبني مدري اني يتهيئأ لي هالشي ما اهتميت رحت سوبر ماركت عجبني اشتري شغلات التفتت وأشوف شاب واكف قريب علية اني ما ارتاحيتله حسيته عوينجي اشتريت الاريده وعيني كل شوية تروح عليه واشوفه مركز نظره علية 

اني هم بعد ما اكدر ابقى أكثر خفت منه حيل اول مرة اتعرض بهيج موقف عالسريع دفعت الفلوس شلت علاكتي وجنطتي وطلعت وبشارعنا قبل ما اوصل البيت بمسافة التفتت واشوفه وراية اني بلحظتها قطرة دم مابقت بية عالسريع دخلت البيت وقفلت البيبان وجسمي كله يرجف منو هذا وشيريد وليش 

نرجس /

مرت اسابيع على الموقف الصار وياية واصلا نسيته حتى ما حجيت لأم عقيل وبيوم طلعنا عصرية اني والبنات يشترون ملابس خالة كالت روحي وياهم بس لا تتأخرون جان الجو حلو نهاية شهر الثالث سمرة ماقبلت تجي وصتنا نشتريلها لأن كاعدة تراجع للأمتحان الوزاري وبدت عطلتها هي سوت لنفسها عطله درجاتها زينة يعني ضامنه دخول الوزاري 

جنت لابسة نفنوف بهاري اسود تلث ارباع وعليه حزام عجبني البسه احب اطلع ولبسي مرتب افترينا بالمحلات القريبة على منطقتنا اشترينا وروعه كالت ناخذ كرزات وعصائر من المحل مرينا نشتري وبالجامات مالت المحل ألمح الولد الي قبل أسابيع لحكني واكف ، اني شعر راسي وكف التفتت على روعه جريتها وطلعنا وهي تحجي يمعودة خل اشتري بعد 

ولا سمعتها كل الي على بالي اوصل البيت 

حتى لفتة ما التفتت اخاف كولش 

دخلنا لبيت ام عقيل يلة تنفست من شافتني خالة فكت عينها ..

ام عقيل / ولج شبيج وجهج اصفر

كعدت عالكرسي بالمطبخ /؛ ولد لحكني هو نفسه قبل أسابيع سواها واني ما حجيت 

ردت روعه ..

/ والعباس يمة خرعتني لازمتني من أيدي وتسحب بية واني اركض وراها انعل بليسج هسة يكولون ذني مخبلات

نرجس / اوي شكد بطرانه هو اني گلبي وكع من شفته ، عمة بعينه شكد عينه صلفه

ام عقيل بصدمة / لحكجن لهنا

نرجس / اي والله

طلعت خالة أم عقيل وعقيل وياها جان واكف يسمع ورجعت صاحتني

ام عقيل / تعاي ياهو اشري عليه 

لحكتها بخوف وطلعت راسي من الباب جان واكف مسافة بس شكله واضح

نرجس / خالة هذاك اللابس اسود 

جان لابس بنطرون وقميص اسود 

عقيل من سمعني دخل للبيت يركض اخذ سجينة وطلع عالسريع 

يمممه اني من شفته ما ظل عقل براسي كلت راح يتذابحون وعقيل يتأذى من وراي

صحت بي مارجع راح يركض عالولد وأخواته طلعن يتعايطن 

ركضت على ام عقيل الي رجعت اخذت عباتها ولحكت ابنها ..

نرجس بهلع وخوف / فدوة خاله لا عقيل يصير بي شي واني السبب

ماردت علية طلعت عالسريع

عقيل ركض عالولد ودفعه بصدره وسجينته بيده .. 

/ شعندك ولك لاحك خواتي

الولد باستهتار / لك شنو هاي اختك الجبيرة تملخ شكد حلووة شو متشبهك انت اجلح املح

شال السجينة بوجهه / أعلمك الاجلح شيسوي بيك اليوم

الولد / ديلة هو انت خلك زعطوط بس اختك داخلة مزاجي خوش قطعه تمووت 

عقيل هجم عليه بوكسات ودفرات 

تعاركو والولد لواها لايد عقيل وذب السجينة بالكاع صح عقيل ماشاء الله جسمه ضخم بالنسبة لعمره 15 سنة بس الولد كدر عليه 

ام عقيل بالنص وياهم تفازع لابنها مدري منين اجو شباب اثنين يمكن جماعته وكامو يضربون بعقيل

نرجس /؛يمه صخام بوجهي من وراية راح بيها الولد

بدون وعي ركضت عليهم واني اعيط بالشارع 

حتى يطلعون الجيران يفزعون لعقيل الي وكع بالكاع

الشارع مجان بي هواي ناس ومن سمعو عياطي وعياط ام عقيل طلعوا يتراكضون 

وكفت قريب عليهم اريد اجر عقيل من بيناتهم وخالة وياي ما احس إلا انجريت من زندي وصرت ورى رجال طول وضخامه شهكت ابجي واني استنجد بي / دخيلك موتو عقيل

والله وممبالغة خلال دقائق عفسهم لطخ راس براس واني صافنه ودموعي بخدي اباوع شلون كفخهم 

رحت على عقيل الي وكف وامه تنفض بملابسه وتتفحص بوجهه وجسمه وتصيح

/ عفية بوليدي اليفازع لعرضه

التفت الرجال علينا ونتر / ام عقيل شنو السالفة وليش هالعركه ؟!!!

قبل ماتحجي خالة رد عقيل واني متت بدمي من انتبهتله لصعب خرب حظي هسة انت الجابك حظي المصخم

اباوع عليه عيونه كامت اطك شرار من سمع حجي عقيل اللي كاله !!!

صخام ولطام هاي هيج حاجي علية ابن الكلب الله لا يوفقه 

وقبل ميكمل عقيل كلامه صعب سحل الولد وكعد يكفخ بي خلا ميندل طريقه وهدده راح يشتكي عليه دفرة وتفل عليه وجماعته اخذو وشردوا

طلع عقيل يعرفه وين ساكن بالشارع الورانه دوم يلحك البنات وسمعته زفت

اني اول وحدة رجعت اركض للبيت خايفة بعدما سمعت اللي كاله الولد علية وسمعه صعب دخلت وقفلت الباب خايفة من صعب هسة شيكول علية اكيد راح يسويها سالفة

اسمع صوتهم بالكراج مال بيت ام عقيل صاير عصبي وكام ينتر بكلامه شوي واندكت بابي انخرعت واني اسمع صوته ..

صعب / افتحي اريد التفاهم وياج

مارديت عليه رجع مرة ثانية دك الباب وبصوت ضخم وقوي / والله العظيم إذا متفتحين الباب اكسره على راسج 

فكيت عيني وحلكي مصدومة بي هذا يخوف شرار ويطفر عزا العزاج نرجس 

اسمع صوت خالة / ولج يمه افتحي قابل راح ياخذ روحج

صحت عليها واني خاتلة ورى الباب باب الحوش / خالة تعاي انتي وياه فدوة لاتخليني بوحدي

ام عقيل / ديلة شو افتحي .. 

واني فتحت الباب هو رأسا دخل وطبك الباب وراه رجعت اركض لباب المطبخ حتى ادخل جرني من أيدي وقربني عليه بعدها رأسا سحب أيده !!!؛؛

صعب خازرها / نحجي وحدنا وخالتج اكيد واكفة بسد السياج وتسمعنا 

نرجس رغم خوفها ردت / انت شنو شايف روحك

رد بصوت قوي / اني صعب ومشايف روحي اسمعي يبنت الناس انتي أمانة بركبتي ليوم الدين عنادج هذا خلي على جهة اني اجيت اسال واطمن عليج وجبتلج مصرف بس من شفت الصار عقلي انجن واني اسمع شاب لاحكج ويجيب طاريج بكلام مو حلو انتي محسوبة علينا واحنا اليعودلنا مانفرط بي

نرجس / اني ما سويت غلط هو لاحكني حتى قبل اس...

سكتت وعضيت شفتي لأن تهورت وحجيت 

نتر بية / احجي ليش سكتي

نرجس / ماكو شي بعدين انت معليك بية محد خلاك وصي

صعب / تعرفين زين كل الدخل الي كلامي واضح ماحاجة اعيده 

نرجس / انت شتريد شتريد احجي اني البية مكفيني

صعب / سالفة مثل الصارت قبل شوية راح ترجع وتنعاد تعرفين ليش لان ولد الحرام والميخافون الله هواية وراح ترجع تتكرر بغير شكل انتي ارملة شابة وجميلة وحيدة بهالدنيا ومعتصم شاف كل هذا ومر بخاطره هالشي يعرفج محتاجه سند وصاني بيج وأمانته برگبتي ما أفرط بيها

مد أيده بجيبه وطلع ظرف ومده الي/ هذا مصرفج هالشهر واني راجع لديالى فكري زين بموضوع الزواج رجعيلي خبر 

عافني وطلع بدون حتى ميسلم بقيت صافنه وراه والظرف بيدي شوية واجت ام عقيل 

جرتني من أيدي ودخلتني المطبخ 

كعدت واني بعدني صافنه شمرت جنطتي وعلاكه جنت مشترية داخليات وعطور

ام عقيل / هاج غراضج ولا تبقين صافنه ترى سمعت كل الحجي ودماغج هذا كبري

رمشت بعيني اريد اركز / خالة الرجال صعب فعلا واسمه عليه ، شلون اتعامل وياه ؟!!!!

ام عقيل / يمه يحفظه الله وآل البيت هو غير طيح حظهم عفية عليه والله

نرجس / اووف خالة متت بدمي خفت يأذون عقيل خطية انوب اصير سبب باذيته 

ام عقيل / چا شلون انتي حسبة اخيتة الجبيرة فدوات اروح لوليدي نچر ومايسكت عالعيبة

،،،،،،،،

صعب / 

رجعت لديالى والصار بعده بعقلي مدري شنو حسيت واني اسمع الكااله عليها حسيتها مرتي وانحجى بيها وانوب تعاند بنت الاوادم هالكدودتها وبيها كل البلا 

رفعت أيدي ودعكت اصابيعي ملمس أيدها بيدي أيدها بيضا وترفة 

استغفر الله شبيك صعب البنت مو على ذمتك حتى هيج احجي انتبه عقلي وحواسي لكلمة مرتي الي مجانت بقاموس حياتي بس اعتقد راح تكون مفردة بي 

ـــــــــــــــــ

صفا / عيني لا تحسدوني خل اروح وراية مدرسة

لينا / لعد ليش اجيتي جان طلعتي من بيتكم ؟!!!!!

صفا / شدعوة ليونة كلت أمر اسلم واطلع هذا اول يوم الي بالدوام ولو راح تجي العطله قريب شهرين هههههه

لينا / اي مابقى شي يلة مدرستج قريبة براس الشارع

كامت وهي تعدل بحجابها وترتب شكلها ..

صفا / يربي متعودة عالمكياج وامي رزلتني تكول الا تطلع السنوية مال ابو صهيب يلة

لينا بصدمة / لعد شلون خطية الله يرحمه شو حالنا حالج عيني كلنا لابسين اسود وحزنانيين

صفا / اي بس انتن حفافه وكحل بالعين خوما مثلي

لينا / ترى صاحبات زلم وزلمنا يردون هيج بعدين شفتينا داكين تاتو شو هن شعرايتين ماخذين من كل حاجب

صفا / اي هسة ايهم وحذيفه يكولون ذبو الاسود راح تذبو

لينا / لا عيني شنو السالفة ترى ماكو هيج شي باقين لدورة السنة يلة والولد معليهم بهيج شي

صفا / خرب حظي شوكت اصير مرة رجال

فكت لينا حلكها / هه إن شاء الله

صفا / هسة غير يتحرك الما اريد اجيب اسمه

لينا بلا وعي / منو ؟!

صفا / منو يعني غيره صعب افندي

دخلت علا / ها صفا بعدج ، بيش الساعة دوامج

صفا / رايحه عيني رايحه 

عافتهن وطلعت والتفتت لينا على ام ملاك ..

/ اكلج هاي كل عقلها تريد صعب يتزوجها

علا / اي يحظي وشكد أنصحها بلة لو قابلة بابن حماها لعمتي أميرة مو احسن بدل ظلتها تتأمل بدون فايدة 

لينا / اي حتى ايهم كال عليه خوش شاب ومحامي يشتغل بمكتب وبالمحكمة

علا / الله يهديها

ـــــــــــــــــــــــ

بيت ابو معتصم /

رونق / خالو حبيبي يلة هسة تاخذني للالعاب

صعب حظنها / هلة حبيبة گلبي شلونج

رونق / زينة يلة خالو والله ضايجه

بقى حاظنها وكاعدين يسولفون اتفق يوديها بين الجسرين وراها يأخذها للمول 

دخلت رانيا وقدمتله عصير وكعدت كبالهم

رانيا / صعب والله عدها دراسة خلها غير مرة

صعب / براحتها شوكت متحب تتصل علية واوديها

رونق / ماما والله حفظت عفية خالو خلها هسة الروحة وشوف حتى كشخت

صعب / هههه خوش متحضرة يلة لعد ماتجين ويانه ام صهيب

رانيا / لا وين اجي خلها غير مرة

شكرا لزيارتكم عالم روايات سكيرهوم