رواية جراح قلبي الفصل السادس عشر بقلم جوهرة
طلع صعب برى ورونق لحكته صادف مصطفى وصلاح سلم عليهم
مصطفى / ها وين مأخذ بنيتنا
صعب / هههه راح اخطفها واساومكم عليها
حظنها مصطفى وبأسها بخدها / شحدك ،
غير هي شمعة البيت
صعب / هههه هسة تسمع المرة وتسويلك سالفة
مصطفى / لا لا ماعدها سوالف غيرة ملتهية بالبيت والجهال
صعب / وانت لعد من ملاهي بيك
ضحك صلاح / ههه صعب لا تفتح عيونه خلة مغمض احسن
صعب / شني السالفة رجال عسكري يحتاج اهتمام من يرجع لبيته
مصطفى / اي والله لا عاب حلكك بس ترى المرة ممقصرة والله هاي اني هيج احجي مرات
صلاح / ها مصطفى بدلت رأسا
مصطفى / صلوحي حبيبي مرتك تصيحك روح وخل صعب يتوكل اخرنا
سلم عليهم صعب وطلع بسيارته وياه رونق
ما خله مكان ما وداها ونسها من صدك اخر شي فاتو مطعم تعشو وأخذ لفات للبيت واشترى حلويات لرونق ورجعوا
بالطريق من وصلوا بقى صافن عليها من كالت
بكل براءة ..
رونق / شكد حلو مثل بابا من جان يطلعنا
بقى كاعد يباوع عليها نزلت ونزلت علاكتها ودخلت البيت يلة حرك سيارته وبگلبه غصة على معتصم الله يرحمه
ــــــــــــــــــــ
بيت ابو حذيفه
ملاك / عمو الي اني انتي ولي اخذتي حصتج
علا / ملاااك عوفي اختج واصعدي لغرفتج يلة روحي اقري
ملاك / ماما شوفي جنات كولشي تريد
حذيفة / بابا خطية اختج تحب تقلدج انتي اكبر وتفهمين أكثر منها
ركضت جنات بحظن ابوها جان كاعد يكلب بالريمونت
صعب انطى العلاكه لعلا / هاج وزعيلهن بناتج دوخني ،، لعد الوليدات وين ايمن ويوسف
علا / أبيت عمة ايمان
اخذت علا العلاكه وراحت للمطبخ جان مشتري لهم حلويات وشغلات والعاب بناتية مثلما اشترى لرونق
ام حذيفه / يمة صعب عمتك أميرة حجت بصفا البارحه تكول مرتين كلت ومجاي تنطوها تريدها لابن حماها
صعب / اي عالخير شكو بيها
ام حذيفه / ياه وانت لعد ترى حجيت اريدك تتلحلح
صعب / رحمة لأهلج اني شكو شلي دخل بيها
ام حذيفه / يمة البنت حلوة وشهادة وظيفة حرامات تفوتها للغريب
صعب بضيق / هذا الحجي ما اسمعه رجاءا يمه
حجي عبدالله / ام حذيفة عوفي صعب لخاطر ربج شكد تلحين انتي مو حجيتي وكتلج عوفي السالفة
ام حذيفه / لعد شلون اعوفه هيج لو متزوج جان ابنه بطوله
التفت صعب على أمه / تردين اتزوج صار بس مو صفا
ام حذيفه / هااا وشبيها صفا ؟!!!
صعب / مابيها شي بنت عمي وعلى راسي بس ماريدها مرة الي متوالمني
ام حذيفه / اي روح جيبلي وحدة لاعرفة ولا ولفة
الحجي استعدل بكعدته من سمع صعب / تحجي صدك يابة صعب
صعب / اي حجي صدك
حجي عبدالله / والله يوليدي انت عاقل عقلك يوزن بلد التختارها هاي هي الله يوفقك ويسعدك وياها
ام حذيفة ما عجبتها السالفة بس اهم شي عدها صعب يتزوج تريد تشوفه مرتاح تنقهر من تشوف الكل مستقر بحياته وهو وحداني
ام حذيفه / هاي بكيفك يمه اني شلي دخل اهم شي راحتك
دخلت لينا والجهال وياها صاح عليها ايهم من فوك من صعد قبلها / لاتتأخرين انتظرج واصعدي وحدج
عضت شفتها وراحت للمطبخ / شكد عيب يربي كلها سمعته
ضحكت علا / هههه تعودنا على سوالفة وياج يمعودة اهم شي مرتاحين
لينا / اي الحمدلله
علا / صدوك تعاي اسمعي صعب راح يتزوج
لينا / عليج القرآن منو منو الراح يتزوجها
علا / مدري بس عمتي حاجته على صفا وعمة ام غزوان تريدها كال واني شلي دخل ووووو
حجت علا السمعته ولينا فاكه حلكها مصدومة لأن الكل يعرفون صعب ميطيق سالفة الزواج
فزت من صاح بيها ايهم ..
ايهم / ابقي فاكه الحلك يالفاهية
لينا فزت / ياااه فززتني والله
ايهم خزرها / اني شوصيتج
لينا / ها اي هسة اجيت
راح ايهم شرب مي / ماريد شربت وحسابج بعدين
طلع راح يمهم بالهول التفتت علا على لينا
علا / شيريد شو نافخ ريشاته
لينا / مي اجيبله وجان يريد يعني ا ا يريد يووو علا شبيج تعرفين شيريد الرجال من مرته
علا / هههههه اي اعرف والليلة الليلة الليلة عود تحظري
خجلت لينا / عابت اي والله
ــــــــــــــــ
أبيت ام سما بناتها عدها ورجالهن باقين عالغدا كملوا غدا وشربو جاي ربى طلعت هي وزوجها وجهالها بقت سما هي وابنها ، وصلاح راح يصلي العصر
سما / لو تشوفين شنو سوت من سمعت صعب يريد يتزوج تخبلت تكول اكيد وحدة ك . ح .
استغفر الله ماريد احجي حتى تعاركت وية رانيا لأن غلطت على صعب ورانيا ضاجت حجت عليها
وعمتي كفختها على رأسها وكالتلها ما اسمعلج صوت لا اوصل الحجي لابوج واخوتج وهمة يتصرفون
ايمان / عزا بعينها متوب هاي
سما / ماما خطية والله مرات انقهر عليها تحبه غير
ايمان / يا ماما شبيدنا احنا شو جم مره حجينا وياه ميريدها ماله نفس بيها خوما كوة هي ، اسمعي انتي لا تتدخلين ابد وية صفا لأن عرمة وجريئة تروح تأثر على علاقتج بصلاح فمالج شغل بيها
سما / لا والله اني بهيج سوالف ما ادخل روحي
ايمان / ورانيا بعدها زعلانه وية صفا
سما / لا شو هاي اجت باستها وتتعذر اني بقيت فاكه حلكي يمه شلون عدها قابلية
ايمان / اي الله يهديها
دك موبايل ايمان راحت اخذته ورفعت حاجبها متفاجئة أشرت لبنتها تروح يم زوجها وتأخذ الجاي وماعون كعك
اخذته وراحت يم صلاح وبقت ايمان بالمطبخ
انتجت عالكاونتر / هلاو عيني شلونكم
ها إن شاء الله يصير خير ، لا موبايله مابي شي احتمال شحنه طافي يلة مع السلامة
سدته وبقت صافنه تفكر بالسمعته عن صعب يريد يتزوج يعني انطى خبر لأهلة حتى يكون عدهم علم وبمخابرة ام عقيل هسة تكللها نرجس قبلت بس بشروط
يلة بيها الخير نروح ونسمع شروط ست نرجس
اتصلت على صعب فعلا موبايلخ مغلق يلة اوصي عليه شلون لا خلها اني اروح لبيت الحجي واشوفه هناك
بالليل ورى العشا راحت لبيت ابو حذيفة قريب عليهم كم بيت بيناتهم اول ما وصلت لاكاها صعب بالباب الجبيرة ..
ايمان / وينك ردت احجي وياك موبايلك مغلق
صعب / اي شحنه طافي ونسيت اشحنه خير عمة خوما كو شي
ايمان / كل خير ان شاء الله ام عقيل اتصلت تكول نرجس قبلت بس بشروط
صعب رفع حاجبه / لا والله وانوب حضرة جنابها تتشرط يصير خير
ايمان / شوكت تروح حتى اروح وياك
صعب / خلها اسبوع يلة
ايمان / يا ليش مو هواي
صعب / الي قصد بيها اريدها تبقى تضرب أخماس باسداس
ايمان / ههههه والله عليك سوالف ديلة خل افوت جوا اسمني اجيت خل اسلم على أهلك
واكعد شوية
ـــــــــــــــ
اسبوع يلة صعب راح لبغداد وعمته ايمان وياه وبدون محد يدري بيهم بهالاسبوع نرجس تفكر بكل الشروط الراح تحجيها وام عقيل تحجي عليها مقبلت باغلب شروطها
بس الضوجها صار اسبوع ولا حس ولا خبر منهم وهو جان بس يريدها تقبل
كاعدين بالاستقبال ساكتين ورى ما نرجس كالت شروطها وتقبل بالزواج
عينه عليها يريد يفترسها كثرما ضوجته بكلامها تحجي بكل برود وهو ساكت يسمع
ومن كملت نتر بيها ..
صعب / انتي كل عقلج مخلية الشروط هاي والله لو بية اضحك جان ضحكت
نرجس / من فضلك بلا استهزاء اني شفتهن راهمات حيل حتى اقبل بالزواج
أستعدل بكعدته ورفع أيده بوجهها / قسم بالله العظيم لوما وصية معتصم ماتشوفيني كاعد واسمع هالخرابيط وتردين اقبل بيهم !!!!!!؟
ايمان تهدي / صعب عمة بالتفاهم وليدي
كور شفايفه وعينه بعينها / شروطج هاي مقابل شرط صغير وهو اطيعين كلمتي وتنفذيها
بدون تفكير ردت / موافقه
بعدها خنست وهي تفكر أكثر وتحس استعجلت من كالت موافقة لأن هالكلمتين ثلاث بيهم هواي شغلات ومعناهن جبير
خرب حظي اجيت اكحلها عميتها
من رجعوا لديالى الطريق كله يسولف بيها وعمته ساكته لأن تعرفه ضاج
صعب / ثولة تكول زواج عالورق وما اجبرها عبالها بحالها اني ، لا وتريدني اسكن بالمشتمل عايف شغلي ومكتبي والدنيا واروح لبغداد ضوجتني بنت الذين ، اني اعرف ليش هذه تريدني أرفض حتى تكول انت مقبلت بس والله لا ادوخها بس خل اتزوجها ومن اول اسبوع اجيبها لديالى ، بس خل تخلص السنة والله كريم
ايمان / صعب التفاهم حلو لاتبدي حياتك وياها بمشاكل
صعب / هي ام المشاكل اني ماعندي شي وياها ،، عمة ترى كل الجاي اسوي واتحمله لخاطر معتصم والله
جرت حسرة وذبتها / اي يروحي ادري بيك الله يسعدك ويحفظك
سكت صعب وعينه عالطريق وباله مشغول بنرجس وشروطها شلون كاعدة كباله وتحجي بسيطه هينة ينرجس بعدج متعرفين منو صعب
ايمان /؛ هسة انت أعقد عليها وبعدين الزواج
صعب / راح أخبرهم البنت هي نفسها بنت صديقتج واني من وصلتج شفتها وقررت اخطبها
ايمان / اي اني هم فهمتها هي وام عقيل
صعب / تدرين عمة هاي ام عقيل مرة أصيلة والله وبراسها نخوة حيل تخاف على نرجس باول فترة جانت ادخلني بتحقيق من انطيها المصرف
ايمان / اي بنت اوادم الحمدلله الله وجهلها هيج وحدة البنت مسكينة يتيمة وانوب ترملت وعمرها صغير لا عم لا خال الله يكون بعونها
ـــــــــــــــــــ
ام عقيل / اووف منج والله فشلت من حجيتي
نرجس / خالة لعد اني ماريد زواج هو كاعد يجبرني من يكولي امانه خلاها معتصم وجاي احس ضميري يوجعني مدام شغلة بيها معتصم الله يرحمه برحمته
ام عقيل / الله يرحمه بس بعدني مصدومة منين جبتي هيج جرأة وحجيتي شكد عيب الولد وجهه صار احمر من العصبية مدري من الاحراج
نرجس / خالة شبيج والله هاي شروط قليلة ردت اكول ممنوع تدخل البيت بس خفت يكوم يكفخني
ام عقيل / ولج مهطورة لو حاجيتها لا هو العباس أنه اكوم
