رواية مريم الفصل الخامس عشر بقلم جمانه السعيدي
مريم كلشي بلدنيا ماليه واهس كرهت الدنيا كلها
قبل الامتحانات باربع ايام
اجاني اتصال على تليفوني
رقم غربب
رفعته وكلت الووووو
عبدلله مريم شلونج
مريم هلو عبد لله الحمد لله
...الامتحانات بعد اربع ايام
...ما امتحن ماليه خلك ابد
...انتي تحجين صدك تردين الحجي يزعل عليج
لان هو صاحب الفضل الأكبر بهاي الدراسه
...ما اكدر افتح الكتاب واقراء
....لا تكدرين القرايه هي الشي الوحيد الي راح يطلعج من هاي الحاله
ولاتسين الفلوس الي دفعه الحجي مصاريف المعهد
كلهن دفعهن ليكدام
...ما اريد اكمل
...شنو ما تردين تكملين باقي بس ايام الامتحان
راح اضيعين عليج السنه كله علمود كم يوم ترحين تمتحني بيهن
ما عرفتج هيج ضعيفه جمانه السعيدي
لازم تمتحني وتنجحين حتى الناس كلها تكووول تعب الحجي ما ضاع وياها ابد
انتي اتخيلي اذا هسه موجود يقبل تعوفين الامتحان
....لا ما يقبل بس ولله حالتي النفسيه تعبانه
...انتي بس اطلعين وتهتمين بلقرايه اكيد حالتج راح تتحسن هواي اني راح اجيبلج الجدول وادزه على الواتساب
وابد لاتصيرين ضعيفه صيري قويه وانجحي واهدي هذا النجاح للحجي حتى يرتاح بكبره
مريم لليل اجتني رساله من عبدلله جدول الامتحانات
طلعت الكتب اباوع عليهن
واجت كل الذكريات ابالي
شلون جان الحجي يخدر الجاي ويجيبه ويكول اقري زين
وهذا الجاي حتى تركزين
وشلون الصبح من اكعد يكول روحي اسبحي حتى تتنشطين واني اسوي ريوك
وشلون من تمرضت حاير بيه يوكلني ويشربني
وكل شويه يشوف حرارتي
اتحسرت الضاهر اني ماليه بالطيب نصيب ابد
بس كلام عبدلله صحيح
اني لازم اشد حيلي واقراء وانجح
ما اريد تعب الحجي يضيع
جمانه السعيدي
كمت سبحت وبدلت وطلعت كتبي وكمت اقرا
وقررت استعد للامتحانات
اقرا ليل نهار مرات افز بليل اروح اغسل وارجع اقراء
خلصت الامتحانات وبقت بس النتيجه
صادفة أربعين الحجي بأيام الامتحانات
ماكدرت اروح
قررت بس تخلص الامتحانات اروح ازوره
بس خلصت امتحان ثاني يوم رحت للنجف
اخذني بابا ورحنا
بس شفت الكبر انهاريت من البجي ولا عبالك أربعين يوم
عبالك امس ميت
كعدت يمه وكمت احجي وياااا
مريم حجي اني مشتاقتلك لو تدري شكد تعبانه من بعد
ما عفتني
اني امتحنت علمودك حتى لاتكول مريم ضيعت تعبي وياها
واريد اكلك شي بعد
اني تنازلت عن حصتي للولد ما اريدهم يضوجون مني
لان اخذ منهم حصتي من الورث
خاف يكومون يحجون عليك لان ازوجتني
واني قاسمتهم بلورث
تعرف اني شنو الورث الحقيقي بلنسبه اليه
الذكريات الحلوه العفتها بكلبي
هاي احلى ورث ورثته وحدي هاي الذكريات محد يكدر ياخذها مني لان هي بس اليه
اني هسه منتضره النتيجه تطلع اذا نجحت اجي ابشرك بنجاحي لان انت صاحب الفضل الجبير بهذا النجاح
واذا تعينت من كل راتب راح اطلع مبلغ
وانطي العائله فقيره بثواب روحك
لان انت شريكي بهذا الراتب
لاتتوقع راح انساك يوم لو تروح من بالي
اسئل الله ان يغفرلك بكد ما اسعدتني
ويجعل الجنه مسكنك الله يرحمك برحمته الواسعه
رجعت للبيت ورجعت اشتغل وانضف البيت واطبخ
وسميه النهار كله تحجي عليه
ليش تنازلتي عن الورث وليش عفتي حصتج
بس اني ما ارد عليها ابد مو خوف منها لا بس ماليه خلك
للحجي الي بيه كافيني
وبيوم اتصل عليه عبدلله وكال البشاره نجحتي
الف الف مبروك
مريم بس سمعت الخبر كمت ابجي
عبدلله ليش تبجين مو اكلج نجحتي ليش تبجين
مريم اتخيل الحجي لمن نجحت العام شلون فرح
عبدلله الله يرحمه برحمته الواسعه بعد كافي بجي
منا وهيج وقت الشغل والعمل والنجاح
البجي ما يرجع شي
مريم ما اكدر كلشي يذكرني بي
عبدلله انشاء الله بس يطلع تعيينج وتعيين راح يتغير الجو عليج وتصيرين احسن
مريم انشاء الله شكرا تعبتك وياي
عبدلله تعبج راحه
مريم بليل كلت البابا اريد اروح للحجي
وسميه كبت عليه يوميه رايحه للحجي شحصلنا منا الحجي
حتى الورث وخليتي راح من عدنا ابوج على باب الله وعندا شغل وانتي يوميه رايحه للنجف
ابو مريم سميه اسكتي لاتحجين ترا زودتيه حيل
اني عندي السان واعرف احجي
انتي لاتدخلين ابد فهمتي
....اي بابا ميخالف باجر اخذج
سميه زعلت حيل اصلا هي متحمله عليه بزياده
رحنا ثاني يوم اخذت الشهاده ورحت
بس وصلت كعدت يمه وكمت احجي وياااا وابجي
مريم حجي اني نجحت والفضل كله يعود الك
هذا النجاح نجاحك
اني بفضلك صرت انسانه ثانيه
لو اكعد اشكرك طول العمر ما اوفيك حقك
اني يوميه اذكرك بلصلا وادعيلك
اني وعدتك بس انجح اجيك وابشرك
يمكن رب العالمين اكرمني بلنجاح علمودك
الله يغفرلك ويرحمك برحمته الواسعه
رجعنا للبيت واني رجعت خدامة سميه
بس احسب الوقت يمته يطلع التعيين اريد اساعد بابا
خطيه حيل تعبان شغلة البناء حيل متعبه
وهو من زمان يشتغل
واخواني كلهم مدارس
على فكره اني ماكعدت عده لان اني بعدني بنيه
يعني زواجنا ما موفي شروط العده
بعد فتره تقرببا شهرين ونص بيوم كاعده واشوف الحاله ماتساعد وبابا حيل تعبان اجتني فكره
خابرت على عبدلله
عبدلله بس سمعت صوته اجاني انتعاش بجسمي احس
الدوره الدمويه تنشطت والذاكره تحسنت
والكلب كام يكمز من مكانه
صار فتره ادور عذر حتى اتصل بيها وماكو
...الوووو هلو مريم
...هلو عبدلله شلونك
...الحمد لله انتي شلونج مش .... وسكتت اجيت اكول مشتاقلج
وسكتت
مريم اريد اطلب منك طلب
...عيوني اامري مو اطلبين
...تسلم عسى ربي يحفضك اريد اشتغل اي شغله
يعني اوكف على باب دكتوره اكص باصات اضرب ابر
أشكل كانونه
تعرف الضروف ما تساعد وبابا تعبان والمصاريف هواي علي كلش اقترحت علي ابيع الذهب الي عندي وانطي الفلوس بس ما قبل ابد
عبدلله بس هاي بسيطه كلش اكو دكتوره نسائيه
محتاجه وحده تاشر العلاج وتضرب ابر
باجر ارجعلج الخبر
عبدلله ثاني يوم كلبت الدنيا بس كون احصللها هاي الوضيفه
والدكتوره قبلت
راسا اتصلت عليها
عبدلله هلو مريم
مريم هلو عبدلله
...حصلتي الوضيفه بس اني اريد عمولتي
..... عمولتك جدر دولمه بس مو هسه لمن اداوم واستلم
واسويلك جدر دولمه من راتبي
....موافق هم ميخالف
...باجر امر عليج الساعه بتلاثه واخذج المكان الشغل
اتفقنا
...اي اتفقنا
انتضرت بابا يرجع حتى انطي خبر
مريم بابا اني لكيت وضيفه يم دكتوره اريد اشتغل
منا لمن يطلع تعييني
...ليش بابا ناقصج شي
...لا ما ناقصني شي بس اريد اطلع واغير جووو
اشتغل بلكت نفسيتي شويه تتحسن
واذا احصل فلوس بعد احسن هاي من الزينات
ابو مريم بكيفج بابا
ثاني يوم تغديت من وكت وسبحت ولبست بنطرون اسود وبدي وشال اسود ولبست الرداء وتحضرت
وكلت البابا اني راح اروح ويااا عبدلله
بابا تمام
وصل عبدلله وطلعتله
عبدلله خرب بالاسود وعشيرت الاسود ياربي الاسود
اخترعو حتى هي تلبسه
الخدود والشفايف حمر ولله اخاف عليها
لوما العياده نسائيه ما اخذتها تشتغل هناك ابد
هاي عود لاحافه ولا خاله مكياج
مريم هي عبدلله وين صفت يله نروح
عبدلله اي مشينا يله صعدنا تكسي ورحنا
لكينا اكو مراجعين بس الدكتور ما جايه بعدها
كعدنا ننتضر والدكتوره بعدها ما جايه
مريم ممكن اسئلك سوال
...اي اسئلي
...بيت الحجي منو ساكن بي
...محد ساكن بي صار من حصة سجاد وعارضه للايجار
والمفتاح عندي
مريم والأثاث الي بي
...بعدا نفس الشي يريد يبيعه بس لمن يلكه موجر ساعتها يبيعه
يكولون صايرين مذابح على الورث
مريم شلون يعني
يعني هم قررو يوزعون الورث كما هو يعني مو يبيعونه ويوزعون يعني هذا يريد هذا البيت يحسبون قيمته
شكد وينطونه اله من حصته
اكو املاك متعاركين عليها كل واحد يكول اليه
مريم اتحسرت الله يهديهم
عبدلله الله يهديهم
مريم ممكن اطلب بعد طلب
...اكيد من عيوني
...اذا عندك المفتاح ممكن تخليني اروح اشوف البيت
الله يخليك بس ربع ساعه مو اكثر
عندي بي ذكريات كلش حلووووه
عبدلله اي ميخالف من تخلصين شغل اليوم أمر عليج ارجعج الاهلج وبلطريق اخليج ادخلين بلبيت وتشوفينه
مريم شكرا يا احلى صديق اني مراح انسى فضلك ابد
عبدلله العفو
جمانه السعيدي
مريم اجت الدكتوره ودخلنا عليها وشكد وصاها عليه عبدلله
الدكتوره مايحتاج توصيني هي مبينه شاطره وحلوه
مريم بديت شغلي ابد ما واجهت اي صعوبات حسيت نفسي سعيده وكلي نشاط
الشغل كان سهل حيل مجرد ااشر العلاج واذا وحده عدها ابره اضربها
الزبائن هواي كانو بيومها والدكتوره فرحت بشغلي
وانطتني ٢٥ الف كالت هاي يوميتج واكراميه الشغل
من خلصنا اتصلت على عبدلله حتى يجي ياخذني
واتصلت على بابا كتله اني شويه راح اتاخر
اجا عبدلله هااا شلونه الشغل
...ولله حلو الشغل ويسوي واهس
...الحمد لله يعني مرتاحه
...الحمد لله يله تاخذني البيت الحجي
...اي
أجرنا تكسي ورحنا فتح الباب واني اخذت نفس عميق
دخلت ودموعي نزلن
عبدلله هاااا اذا تبجين خل نطلع
مريم مسحت دموعي وكتله لا ما ابجي
دخلت كلشي بمكانه بس الأثاث كله تراب
امشي وأجر نفس اريد اشبع من الهوا الي جان يتنفس منه الحجي
اتخيله شلون جان يكعد وشلون ياكل
وشلون من يجي يدور عليه
وشلون اني اقرا وهو محتار شيجيب ويخلي
ما كدرت اسيطر على دموعي
نزلن غصبا عني
غرفت النوم مثل ماهي بس الضاهر مدورين بيها لان الكنتور مفتوح يجوز عبالهم بيها فلوس لو خزنه مال فلوس
سديت بيبان الكنتور وصلت الخانت الحجي وكمت اشم بريحته
اتحسرت ومسحت دموعي
عبدلله يله نروح
مريم اي شكرا لانك ساعدتني هواي
...لاتكولين هيج
مريم طلعنا واني عيني على البيت وهو يقفل بلبيبان
واذكر الحجي من نطلع ويقفل الباب
مشينا
عبدلله خل اوصلج للبيت
مريم ممكن تاخذني سوبر ماركة اريد اشتري الإخواني حلويات
عبدلله اي تدللين
رحت واشتريت حلويات وفواكه وماخليت من ٢٥ بس الاجره اروح بيها باجر للشغل
شكرا لزيارتكم عالم روايات سكيرهوم
