رواية بنت الكهوجي الفصل الخامس عشر 15 بقلم احمد

ياقوت : جنت بالمطبخ دا اسفط المواعين وشلون خلصت طبو بابا وتميم واخوه واول مرة يجون هيج فجأة وانتبهت لبابا مشيتو ثگيلة وسانديه ثنينهم 

مادري شلون تحملت وبقيت بمكاني علمود ما يشوفوني ولان بالمطبخ اني وهم ملتهين ويا بابا فما جانو يدرون بي 

انتبهت لنفسي ووگفت ورا الحايط وگلبي مثل النار على بابا اريد اعرف شبيه وليش هيج حالتو واسمع تميم گال لاخوه جيبلو ماي 

اجى اخوه للمطبخ وويا كل خطوة تزيد دگات گلبي وينترس گلبي خوف والمشكلة لا اكو مكان اختل بيه ولا اگدر اصير ورا الباب لان راح يشوفني اكيد فبكل الاحوال انكشفنا اني وبابا 

شايفين من تطلع مسلسلات وتطلع لقطة ان الشرير على شعرة وينمسك اني هنا صار بي مثل الموقف بالضبط بحيث على شعرة ويشوفني زيد 

وهو دا يمشي اجاه صوت تميم من صاحو وتوقف من صارت رجلو على عتبة الباب تخيلو شگد جان قريب من انو يشوفني 

گالو تميم اكو ماي هنا تعال وبنفس الوقت جانت البزونة بالحوش تصيح فعافني وراح عليها وبوقتها احس گلبي يضرب القفص الصدري مو يدگ 

بقو عند بابا 10 دقايق واخير شي اسمع تميم گالو بالليل نجيك گاللهم بابا حياكم الله ايمتى ما تجون وعافوه وراحو لبيتهم واني رحت لبابا 

اول ما وصلت الغرفة باوعت عليه جان متمدد ومتغطي نزلن دموعي فورا وهو فتحلي حضنو واندحست بحضنو وانفجرت بالبجي 

ادم: خوما شافوج 

ياقوت: لا ما شافوني بس گلي انت شبيك وليش هيج تعبان 

- ماكو شي بوية نازل ضغطي شوية 

- امانة الله بابا احجيلي شبيك 

- والله يا بوية ماكو شي نزل ضغطي هذا كل ما بالموضوع 

- ليش نزل ضغطك وانت اكلك طبيعي 

- ماعرف بس الحمدلله نزول مو صعود 

- الحمدلله 

- خلص وگفي هالحنفية ترا فضنا (يقصد اوقف دموعي) 

- ههههههههه عادي اهم شي انت بخير 

- وين جنتي من اجينا 

- جنت بالمطبخ بس شعجب دخلتو هيج فجأءة 

- المشكلة اني مريض وهم مستعجلين علمودي ولان ما يدرون بيج دخلو فورا وجنت ماسك گلبي بايدي واگول بس لا تطلعين بوجهنا 

- لا جنت بالمطبخ 

- بس زيد راح للمطبخ 

- قبل ما يوصل للمطبخ صاحو تميم ولو متأخر ثانية وحدة جان شافني لان حط رجلو على عتبة الباب ورجع واني لان عند الحايط ما شافني 

- الحمدلله الله سترنا 

- اي والله المهم نام وارتاح 

- جيبي مخدتين حطيهن تحت رجليني علمود يستعدل ضغطي 

- تمام.. وحطيت مخدتين تحت رجلينو 

- لا تسوين عشى اليوم راح يجيبون النا عشى هم 

- تمام جزاهم الله خير 

عفتو يرتاح وشغلت الصوبة علمود تدفى الغرفة ورحت غسلت البزونة ورجعتها للغرفة علمود ما تبرد وبقيت گاعدة بالغرفة 

بعد ما صلينا المغرب اتصل تميم على بابا علمود يتأكد اذا بابا گاعد لو نايم علمود يجيبلو العشى وگالو بابا گاعد 

گمت اريد اروح لمكاني وگال بابا لا تاخذين البزونة لان شافوها خاف يلاحظون غيابها گلتلو تمام وحطيتها بالكرتونة مالتها ورحت لمكاني 

اول ما وصلت شغلت الصوبة وخلال دقايق دفى المكان وصار ادفى من الغرفة لان صغير ومسكر من كل جهة وگعدت بالفراش وصفنت 

شوية واسمع صوتهم من اجو سلمو على بابا ومبين صوت شايب وياهم اعتقد ابوهم وجدهم جايين وصارو يحجون ويا بابا 

جانو من النوع الي صوتهم جهوري وعالي وبالاخص انهم ماخذين راحتهم لان على اساس البيت فارغ فما يتقيدون ويحجون براحتهم 

تخيلو جايبين وياهم العشى وحتى الجاي علمود ما يتعب بابا وفوگ هاي جايبين الستكانات وياهم يعني صحيح ماكو منهم 

الاب والجد ما بقو بس تطمنو على بابا وراحو وبقو تميم وزيد وزياد تعشو مع بابا وجايبين وياهم دومينة علمود يتونسون بيها 

صارو يلعبون ومتحمسين كلش واسمع زيد وزياد كل شوية واحد منهم يگول اگعد طلي (اهانة للي ماعندو مثل الرقم الملعوب) 

جانت تجاوزاتهم على بعض اكيد مو على بابا وتميم وبقو ويا بابا لحد ما صارت الساعة 10 بالليل واسترخصو من بابا ورجعو لبيتهم 

من اندگ الحايط طفيت الصوبة ورجعت للغرفة لگيتها نظيفة ولا كانو جان اكو هنا احد تأكدت ان البزونة نايمة وصليت العشاء وفرشت فراشي ونمت 

من ثاني يوم رجع بابا طبيعي ولله الحمد وبدا الشتاء يقسى علينا ببرودتو ويمكن اني وبابا من اكثر الاشخاص الي عانو من البرد (بمنطقتنا فقط) 

والسبب ان البيت مو ململم يعني الغرف لحالهن والمطبخ لحالو والحمامات لحالهن فنگدر نگول البيت تصميمو غريب كلش 

والمشكلة هيج بيت باجواء العراق يصير بالشتاء بارد كلش وبالصيف حار كلش يعني بالحالتين البيت ماراح يرهم ويا الاجواء 

بس بابا گال من يصير الصيف اجيب سبلتين واحد للغرفة وواحد للمخبأ بدال الصوبات ومن يحطهن حتى بالشتاء ما نحتاج الصوبات 

تميم انطى بابا خبر ان زواجو راح يكون بعد ما تمرض بابا باسبوع وبدو عائلة الشيخ يتحظرون لزواج الشيخ الجديد 

جنت اتمنى اكون وياهم واشوف شلون راح تكون تحظيراتهم للعرس وشنو اليختلف بينهم وبين اهل بغداد بس للاسف ماگدر 

ومتأكدة لو يدرون بي موجودة الا يجبرون بابا اروح ويا نسوانهم علمود ما ابقى لحالي لان بالعرس بابا اكيد يتأخر بالرجعة للبيت 

تميم : بعد ما رجعنا من ابو باسم بيوم اتصلت على عمي علمود اتأكد اذا مكملين لو لا گال مكملين شوف اي يوم يناسبك وانطيني خبر 

شاورت اهلي وگالو بعد اسبوع يعني يوم الاثنين الجاي ورجعت خابرت عمي واخذ راي اهلو اذا يناسبهم الموعد لو لا وگالو كلش مناسب 

من ثاني يوم بلشت بتغيير صبغ الغرفة وتغيير غرفة النوم واهلي بلشو يجهزون للعرس علمود ما يكون اكو شي ناقص 

اجى الصباغ اول شي صبغ الغرفة ابيض ونقشات ذهبي طلع شكلها تحفة وجبت غرفة نوم لون ذهبي على لون النقشات وطلعت كلش حلوة 

ومن اجت غرفة النوم نظفتها اية ورتبتها وقفلتها واخذت المفتاح غضب عني ههههههههههه تگول ما اريدك تخربها قبل العرس 

طبعا علاقتي باية ما تعتبر علاقة اخ واختو لا كأنها بنتي تعودت عليها وتعودت علي من اول ما اجت للدنيا جنت من صدگ اموت عليها 

جانت ما تسكت الا اني اشيلها واول شخص ضحكتلو هو اني وصرت اهتم بيها اهتمام مو طبيعي وكل ما نكبر يزيد اهتمامي بيها 

بالوقت الحالي لو تطلب مني روحي ترخصلها ومستحيل اسمع ان بنفسها شي وما اجيبو الها مهما كان غالي او صعب 

المهم مرت الايام سريعة جهزت نفسي ( اخذت قاط وهاي هي ) وقبل العرس بيوم جانت ليلة الحنة من العصر رحت للحلاق حلقت ورجعنا اني والحلاق 

اخذتلي دوش ومن طلعت رتبلي التسريحة الحلاقة وجانو جماعتي كلهم موجودين وقبل ما نروح لبيت عمي رحنا للمضيف 

بلشو الشباب بالجوبي والاحتفالات وقت اذان العشاء توقفت الاغاني والاحتفالات ورحنا لجامع قريب صلينا جماعة بيه ورجعنا 

وبعد الصلاة رحنا مشي لبيت عمي لان بنفس الفرع احنا وياهم اصدقائي اخذوني لبيت عمي من دخلت هم بقو خارج يحتفلون 

دخلت گعدت عند ياسمين بنت عمي وانتظرت لحد ما جابو الذهب لبستها الذهب وحطيت حنة بايدها وگعدت دقيقتين وبعدها طلعت 

ياسمين بنت عمي عمرها جان 25 ورغم بعض اهلي گلولي اخذ اصغر منها على گولتهم تربيها على ايدك بس اني رفضت رفض قاطع 

جنت اريد مرة مو طفلة ولا مراهقة لان اني رجال عندي مسؤوليات بگد شعر راسي وما الي خلگ لسوالف المراهقة والزعل وغيرها 

وثانيا ياسمين مخلصة دراسة يعني ما راح تقصر وياي بسبب الدراسة او تأثر عليها هي فجانت كلش مناسبة الي وبنفس الوقت اصغر مني بهواي 

ومن اول ما خطبتها گلت لعمي سالفة تتوضف مستحيل وهو اصلا يعرف ان بنات عشيرتنا يكملن دراسة بس اذا ما ينجبرن عالوضيفة ما يتوضفن 

هي واهلها كلهم وافقو ورغم انو ما اخذنا بعض عن حب بس حسيت بداخلي انو بدينا نفهم بعض من البداية وهو هذا الي جنت اريدو 

من طلعت رجعت ويا جماعتي للمضيف وكملو احتفالاتهم لحد ما صارت الساعة 11 بالليل وكلمن راح لبيتو واني توجهت لغرفتي 

بدلت ملابسي ومن التعب بس تمددت فورا نمت ما گعدت لثاني يوم اول ما گعدت صليت الفجر وجابتلي اية الريوگ وگالت راح نروح اني وماما لبيت ابوي لان جماعتك راح يجون 

قبل ما تطلع انطيتها فلوس گلتلها روحي للصالون ويا النسوان واخذتهن وراحت وبين ما دا اتريگ دخل علي زيد علمود يشوفني گاعد لو لا 

گعد تريگ وياي وگال جابو جادر ودا ينصبونو حاليا وراح يبلشون بالغدا لان الجو بارد بالليل فالغدا افضل من خلصنا ريوگ نزل المواعين زيد 

اني طلعت زي عربي للعرس واخذتلي دوش وطلعت لگيت قسم من جماعتي جايين رتبت نفسي وواحد من جماعتي سوالي تسريحة 

اني جنت من النوع الي ما اخفف شعري هواي لان ما يطلع حلو علي فاخلي طولو وسط ولحيتي دائما احددها واسويها تدريج 

بس تعب صاحبي كلو راح عالفاضي من لبست الغترة ( شبيها بالشماغ بس لونها ابيض سادة ) لان ما بين شي من التسريحة 

وبالاخص انو البس طاگية صغيرة تحت الغترة علمود تقلل من ارتفاع شعري ويثبت فوگها الشماغ او الغترة من البسهن 

بعدها لبست البشت ( العباية الرجالية ) وطلعت وياهم گعدت بالمضيف وبدو الناس يجون ووصيت زيد وزياد يساعدون ابو باسم بالگهوة 

ابو باسم جان كلش يعجبني بشغلو اول ما يجي يكونن الدلات والقواري والفناجين يلمعن لان يغسلهن قبل بيوم بالليل 

ومن يجي ما يلتهي فورا يسوي الگهوة او الجاي وبعدها اذا عندو غير شغلة بين ما يكملن يسويها وما يحتاج حتى مساعدة 

بس بالعرس وصيت زيد وزياد هم يقدمون للناس لان بعض المعازيم شباب وزحمة ابو باسم يدنگ عليهم ويضيفهم وهو بگد ابوهم