رواية جراح قلبي الفصل السابع عشر بقلم جوهرة
ـــــــــــــــــــــ
نرجس / لعد شنو اصلا اني اريد اسوي عرقلة للموضوع
ام عقيل / اكلج انتي جنج ناسية منهو يصرف عليج
نرجس / لا بلة اني تقاعد بابا الله يرحمه وو...
قاطعتها ام عقيل /؛اسكتي خالة لحد يسمعج ويضحك عليج ترى التقاعد تفاليس يادوب اجار وخط مولدة تردين الصدك مصرفج صعب متكفل بي وجاي تشوفين نفسج مابحاجة أحد عبن جيبج مليان من خيره
بقيت صافنه على خالة واني توهة يلة جدحت بعقلي مجنت منتبهة لأن تقاعد معتصم الله يرحمه يروح لزوجته وأولاده واني كولشي ممحصلة لأن زواجنا ممصدق بالمحكمة يعني صعب كاعد يصرف علية من عنده
حسيت باحراج بقيت ساكته وام عقيل جنها فهمت
أم عقيل / يلة اروح لبيتي وبعدما اوصيج اقفلي الباب ولا تطلعين خاف هذا المسودن يرجع
كمت مخروعه وراها / منوو منووو ؟!!!!
التفتت وهي تأشر بيدها / چا شمالج فزيتي لاتخافين أنه اكولن خاف يرجع بس ماضنتي يعاودها خوش اكل كتل هسة حسبالة راح نشتكي عليه
طلعت واني قفلت الباب ورجعت بالبيت قفلت باب الاستقبال ورحت لغرفتي طلعت موبايلي فتحته اكلب بصور معتصم واني ميتة قهر
مرات اصفن وية روحي عالدنيا مانصفتني حياتي مليانة قهر وحزن من راحو اهلي واني اعاني وجان معتصم طوق نجاة اتشبثت بي صح بالبداية مجرد زوج يداريني ويهتم بية بس حبيت حنيته علية حبيت الاهتمام الجان ينطينياه أوووف معتصم اووف يعيوني انت شكثر مفتقدتك لو تشوف الصار وياي من بعدك معتصم ليش هيج حجيت بية ليش تريده يتزوجني معتصم مو جنت تغار علية وتكول انتي حبيبتي لعد شلون تريده يتزوجني
مسحت دموعي وجريت حسرة وذبيتها طفيت موبايلي وبقيت متمدده بفراشي
وعيني بالسكف صافنه بحياتي
ــــــــــــــــــــ
ايهم / ها نام الشيخ
لينا / ههههه اي
ايهم / تعاي لعد ترى شلعتي گلبي
سحبني بحظنه وبدى يبوس بية واني خانسة ما بادلته لهفته علية ابتعد وكال / شبيج شو بعدج مبتعده
فزينا من دك موبايلة عافني وسحبه من الشحن واني عيني عليه عكد حاجبه وفتح خط ومن سمعته كعدت بفراشي واني اعدل بشعري وفاكه عيني
ايهم / هلة ابو مروة انت شلونك ...
_
ايهم / مشغول هالفترة والحمدلله استقريت بشغلي
_
ايهم / الله كريم اي ههههه اي سلملي عليها
_
ايهم / فيمالله
سد موبايلة ورجعه عالشحن رجع التفت علية وسحبني بحظنه واني غيرتي صعدت الف من سمعته يكول سلملي عليها اكيد هاي على مريوة
لينا دفعته / عوفني ايهم
دفعته بصدره وردت انزل من الفراش
تلني من جتفي بس بهدوء / شبيج خبلة تونا شمحلانا
رفعت راسي وعيوني كلهن ملامة / ليش تكله سلملي عليها انت شلك علاقة بيها
ايهم / خطيبتي واسلم عليها
عطت / لاااا كاافي عاد
نزلت بسرعة من فراشي اريد انزل جوا اريد احجي واشكيلهم ايهم لأن بعد ما اتحمل
صاح وراية
ايهم / ولج لا توكعين وانتي حامل خبلة
وصلت لنص الدرج وانتبهت لروحي شعري مسرسح على طوله يوصل لنص ظهري ولابسة دشداشة نوم
جلدي كزبر عزا بعيني لو واحد من حمويني يشوفني شكد عيب يربي رجعت بسرعة لغرفتي ويم الباب انطخيت بصدر ايهم جان جاي وراية دفعته ودخلت هو سد الباب واجى تقرب علية مدنكة اني افرك بيدي ..
لينا / لاعبالك رجعت لأن صحتني لا بس شفت روحي شلابسة واستحيت
دغني براسي / هذا شبي هالايام صاير ميشتغل
رفعت راسي وحكيت مكان دغة اصبعه ..
لينا / اووي توجع ،، بعدين اني حامل ومالي مزاج اي شي هاي هرمونات الحمل لاعبة لعب بية
بس مال تكول خطيبتي هالشي يخبلني ايهم
جرني من أيدي وكعدني بصفه عالجرباية ..
ايهم / ولج كاعد اقشمر عليج ختولي هاي شنو انتي مريتي ام يوسف
عيني بعينه / صدوك تحجي عليك الله
جرني وحظني بقوة وباس ركبتي وهو يشمها
رفع راسه / جنت حيل ماطايق زواجنا ولا طايقج بس بعدها سبحان الله من شفتج انتي ويوسف روحي فرفحت عليكم وزاد هالشي من انهزمتي مني وبقيت ادور عليج حسيت ضاع شي عزيز وفعلا انتي عزيزة وحبيبة
لينا / فدوة اروحلك لعد بطل سالفة الاردن ولا ترجع تتصل بابو زفتة
ايهم / هههههه خوش اسم هذا ، يابة الرجال اتصل يسلم ويكول شنو رأيك نعيد الشراكه اني رفضت ومن كال بنتي تسلم عليك اني سلمت عليها وخلص
لينا / لعد ليش كلت خطيبتي
ايهم / اريد استفزج اشوف شتسوين والله يابة كارثه رأسا صعدت الغيرة طلعتي تركضين ناسية انتي حامل وناسية انتي شنو لابسة
خجلت ودفنت راسي بصدره / عفية لا تبقى تصنف علية
مسد على ظهري وباس راسي .. ديلة تعاي خل نام ....
ــــــــــــــــ
نرجس / خالة عوفيهن فدوة
ام عقيل / لا بنيتي اقلها تصدقي بيهم ميصير تبقيهم انتي راح تتزوجين عليش مخليتهن كبالج تشبعين قهر
جريت القميص من أيدها وحظنته واني اشم واتنفس عطره باقي بي والله اوووف شكد هضيمه يربي والله مالي قدرة اتخلى عنهن
كعدت عالجرباية وقميص معتصم بحظني عيوني دمعت ودنكت راسي ما التفتت على خالة كعدت تعزل ملابسه طلعتهن كلهن تكول راح أتصدق بيهم
اني مقبلت لأن قبل فترة كالت واني رفضت وهسة اجت تأخذهم
ام عقيل / كملت راح اوديهم لجماعة يتصرفون بيهم اكو عالم فقرة محتاجه انطيني البيدج
ضميت القميص ورى ظهري / لاااا فدوة خلي هذا
تقربت سحبته مني / ولج والله لو ادري يفيد جان خليته بس تشبعين قهر اسأليني أنه اووف ييمة ينرجوسة الله يبرد ويفرح گليبج
اخذته واني ابجي على معتصم طلعت وبقيت على كعدتي شبعت بجي وحدي
ــــــــــــــــــ
حجي عبدالله / انت كل عقلك يابة ميصير الأصول اصول اقلها نروح نخطبها
صعب / يابة خطبتها وخلص ورى دورة السنة أعقد عليها ونتزوج حتى حفلة ما اسوي
ام حذيفه / وليش يمة متسوي عرس شنو ناقصك حتى تحجي هيج
التفتت على امي وجريت حسرة وذبيتها .. ناقصني ابو صهيب يمة والله مالي نفس افرح وهو جوى التراب
ام حذيفه بحزن / الله يرحمه برحمته بس ييمة اقلها نعزم عالعرس بس الكرايب
صعب / لوكتها الله كريم بعد شهر مابقى شي
لينا / عيني صعب انت ليش هيج ضايج شو بيت عمو صالح من صهيب نجح بمعدل يدخله طبية صوت الرمي والطلق شعل المنطقة شعل جانو فرحانين بي عمامه
صعب / ام يوسف هيج سوو ميردونه يحس بفقدة أبوه
لينا / الله يسهل امورك ومبروك عليك يارب ولو بعدني مشايفة البنية بس عمة ايمان تكول اجنن كولش حلوة ونازكة
صعب عكد حاجبه / هاي من شوكت عمتي حجت واني كلت لاتحجين
لينا / ههههه اي حجت بس الي
ايهم صاح / لينااا .. لينااا
لينا / اي اجيت عيوني
طلعت من صاحبها ايهم وايدها على بطنها الكبرانة الها ثمان اشهر وهم حامل بولد
حجي عبدالله / شو اني مجاي استوعب منين خطبتها للبنت ؟!!!
صعب / يابة صح ماعدها كرايب لأن عمها الوحيد مسافر ماعايش بالعراق وخوالها بغير محافظه ماعدها علاقة بيهم وهي عايشة ابمشتمل يم صاحبة امها مرة خيرة وعينها عليها
حجي عبدالله / لعد عمتك ايمان ما كدرت أقنعها تعيش وياها
صعب / لا خلها براحتها وحتى تكونون على علم راح اتزوجها ونبقى فترة ابغداد بعدين اجيبها لديالى
ام حذيفه / شلووون شلووون لا هذا الحجي اني ابد مااقبل بي
صعب / يمة صلي عالنبي شبيج
ام حذيفه / عليه افضل الصلاة ...اسمع صعب هالشي ميصير على شنو كاعد وياها هناك ليش شبي بيتنا متريد تكعد عدنا عندك إمكانية تشتري بيت واكعد بي بس مال تعيش هناك لا والله
شتكول حجي انت راضي على كلام صعب
حجي عبدالله / اسكتي يامرة اكلتي الولد خل نفهم قصده ابني اني اعرفك ما تذب حجايتك عبث عندك قصد بيها
صعب / يابة من الاخير البنت شرطها تتزوج بالبيت الكاعدة بي واني قبلت بهالشي مؤقتا يعني اول تالي اني باقي هنا وراح اجيبها تعيش هنا حتى الغرفة وصيت عليها هالاسبوع توصل
صفن الحجي بكلامه ومسد لحيته بيده / ايي كول هيج شايف الخير وليدي
التفت على مرته /
يلة ارتاحيتي ابنج باقي ماراح تأخذه الغريبة على كولتج
ام حذيفه / ياااه غير ابني عزيز گلبي هذا بس بعده گلبي مامرتاح الا اشوف البنت يلة
صعب / ان شاء الله يمة اخذج انتي وعمتي ايمان
ام حذيفه / اي وخل ام صهيب وام غزوان هم يجن ويانة
صعب / لا لا عليش ماكو داعي
ام حذيفه / شبيك يمة غير نشوف البنت
صعب / ها مو اني راح اجيبها هنا لبيت عمتي حتى نعقد سيد هم
ام حذيفه / وهاي رأي منو انت لو عمتك لو البنت
صعب / لا يمة هذا رايي اني
سكتت ام حذيفة ماحجت تعرفه من يعاند انوب يروح يغير رأيه ميتزوج الحمدلله الله هداه
ـــــــــــــــــــــــ
ايمان / يربي هسة شلون لازم اخابرها وافهمها لو تروح انت عليها
صعب /؛مالي خلك للروحه قبل اسبوعين جنت هناك حتى ماشفت جهرتها ام عقيل كالت مريضة مدري شبيها
ايمان / لعد ماحجيت ولا كلت جان اتصلت عليها اتطمن
صعب / راح من بالي هالشي المهم اني كلتلج شقررت وانتي فضيها وياها يلة وراي شغل اترخص
طلع صعب وعاف عمته تفكر
اووف والله احتاريت منين ما نلزك السالفة تطلع سالفة غيرها مرات اكول لو حاجين الحقيقة جان هسة مرتاحين صح تصير مشاكل بس اقلها واحد يتصرف براحه بس شسوي لصعب وأفكاره وعناده
جرت موبايلها ودكت على نرجس ...
ايمان / شلونج بنيتي شخبارج
نرجس / هلو خالة الحمدلله انتي شلونج
ايمان / اسال عليج بنيتي كال صعب مريضة والله توني سمعت منه مابيج غير العافية
نرجس / الله يعافيج الحمدلله شوية خريطة بالمعدة صرت احسن
ايمان / اكول يمة نرجوسة دورة السنة راس الشهر وكلنا تجين هنا حتى تعقدون سيد ومحكمه
نرجس / بس اني ..
ايمان قاطعتها / يمة نرجس سوي الكلت عليه الله يرضى عليج شنو تكسرين بخاطري
نرجس / خلص خالة مثلما كلتي بس اريد ازور معتصم فدوة
ايمان / إن شاء الله اوعدج من تجين اني وياج نزوره
نرجس / ان شاء الله
ايمان / لعد انتظري صعب يجي ياخذج .. صدك قبل ما انسى اشتريتي ملابس شغلات تخصج
نرجس / ها لا والله كولشي ممشترية
ايمان / ليش ياماما مو نطاج فلوس وكال لأم عقيل خل اجهز نفسها حتى ذهب كال تشترينه
نرجس / اي كالت ام عقيل بس اني ماقبلت على شنو مشترية ذهب وملابس وزواج هذا بس عالورق
ايمان /
جرت حسرة وذبتها وهي تسمع حجيها ..
ايمان / الناس راح تحجي بينا راح يكولون لأن يتيمة كولشي ممشتريلها ولج ماما انتي شخسرانة اشتري واسكتي
نرجس / خالة فدوة لا تضغطين علية والله مالي نفس وشلون ترديني اشتري وأجهز للعرس واني كل عقلي ومشاعري يم رجلي الله يرحمه
ايمان / الله يرحمه بنيتي ميخالف خلها شكليات واحنه مارايدين أكثر يلة سلميلي على ام عقيل
سدته وهي تفر براسها / اويلي يمة هالبنت هاي راح اتشيب صعب والله
خل اخابره واحجيله
ــــــــــــــــــــ
كاعد بالمكتب وية صاحبي أرشد اليوم اجى متواعدين على طلعة
ارشد / هسة شكلت والله الجو حلو مال صيد
صعب / خلها عالاسبوع الجاي بس هالمرة اني وياك بس
ارشد / هاي هي
دك موبايله عمته ايمان سلم عليها وبقى يسمع الحجي اخر شي كال
صعب / خلص عمة طالع فد شوية لبغداد
سده والتفت لأرشد / اكول ارشد تعذرني عندي شغلة ضرورية خلها غير وكت واحسبها وصلت عزيمتك
ارشد / ايا اغبر عبالي اعزمك على باچه بس مو وجه نعمة هههههه
صعب / لا بشرفك والله راح تفوتني بس اطلعها منك غير وكت
راح أرشد وبقى صعب كمل شغله باوع ساعته بالعشرة يلحك لبغداد يروح
طلع بسيارته وبراسه موال لازم يسوي .......
،،،،،،،
اندكت الباب جنت توني طالعة من الحمام دخلت المطبخ طفيت جوة الدولمة ورحت وكفت بشباك المطبخ منو هذا المنشفة براسي خوما اطلع بيها صحت منووو
صعب / افتحي شبيج
صعب هذا شيريد
طلعت فتحت الباب وكفت وراه جان يدفع الباب ويدخل
صعب / السلام عليكم شلونج
نرجس / وعليكم السلام
باوع علية ورجع باوع بساعته / عندج وكت تبدلين وتجين وياي
نرجس باستغراب / وين اجي وياك هيج وكت دنيا ظهر ترى
صعب / شنو يعني بدلي يلة حتى نروح نشتري ذهب وملابس
نرجس / ومنو كال اروح اصلا هالشي ممفكرة بي
صعب / استغفر الله بابا لاتعاندين يلة راح انتظرج بالسيارة استعجلي
عافني وطلع حتى مابقى يسمع اعتراضي عابت اي والله مدري شبي
رجعت للبيت شسوي خل أبدل واطلع وياه يروح يسويلي سالفة شكلة ميتحاجى مبين رأسا ينتر
صعدت بالصدر واني مدنكه راسي كولش مستحية اول مرة نكون وحدنا هيج هو طول الوكت ساكت واني ما تجرأت احجي بكلمة بدون ميسألني
اخذني لمحلات الذهب دخلنا اني امشي وراه سلم على الصائغ وحجى وياه يريد يطلعله شي مرتب وحلو
بدى يكلب بالذهب اشرلي على قطعة اني ماهتميت الصراحه كلتله بكيفك انت
هو بعد ماسألني اختارلي وانطاني اقيسهم
دفع الفلوس وطلعنا واني مدري الصار بية استعجلت وحجيت / من ارجع انطيك فلوسهن
وكف والتفت رفع تك حاجب جان حيل قريب
علية / ومنو كلج اريد فلوسج لو تصرفين علية شنو انتي عقلج بي شي
نرجس متعرف شتحجي / اا قصدي الفلوس مالت الذهب بالبيت
صعب ابتسم تك خد بسخرية من كلامها / امشي اشتريلج ملابس يلة بسرعة ماريد أتأخر
بقيت واكفه بمكاني هو عافني ومشى عياله اني وراه مسافة والتفت جان يرجع عاكد الحاجب يممه يخوف والله شكله عصبي
صعب / شكو متجين شعندج طنكرتي !!!!!!
نرجس / ماريد شي منك تحسسني جاي تتصدق علية
صعب / لا بلة ههه انتي عقلج بي شي اكيد استغفر الله يارب خليني ساكت وامشي احسلج
نرجس / انت شنو قصدك ؟!!!
شو هذا عافني ومشى ما حجى رحت وراه امشي واني افكر بكلامه بعدين طخت خرب حظي قصده هو كاعد يصرف وهذا صحيح واني كاعدة اتعيقل براسة
سكتت ماحجيت واني خجلانة من تصرفي
اشترالي كم قطعة لبس على ذوقه اني بعد السمعته ما سويت اي تصرف بعدها رجعني للبيت راد نروح مطعم بس اني استعجلت وحجيت كلت مسوية دولمة هو ماحجى واني فشلت هسة شعندي حجيت لازم ينزل يتغدى حتى عيب يرجع لديالى بدون ما اضيفه
من نزلت كلتله / تفضل حتى تتغدى
بقى صافن علية اني دنكت راسي نزلت الغراض وسديت الباب
صعب / ادخلي واقفلي الباب اني راجع لديالى
رفعت راسي وعيني بعينه الي مغطيها بنظارة
نرجس / انزل اتغدى
صعب / لا دايمة .. يلة فيمالله
دخلت البيت هو حرك سيارته وراح
ــــــــــــــــــــ
صفا / مبروك صعب
صعب / الله يبارك بيج
صفا / وين لكيتها مو على أساس متحب النسوان ومراح تتزوج
خزرها وعافها يريد يطلع لحكته بالكراج ..
صفا / شبيك مستثقل الكلمة وياي مكلت شي خطأ
صعب / اكول لو تلتهين بروحج احسن
طلعت رانيا ونذير ورونق وانتبهت على صفا واكفة قريب وتحجي هي وصعب ..
رانيا / ها صفا ترحين ويانة
صفا / لا عيني خاف اضايقكم
رانيا / لا يمعودة نشتري ملابس ونرجع قابل شعدنا
صعب / ام صهيب راح نتأخر يلة اني انتظركم بالسيارة
طلع صعب برا والتفتت صفا على رانيا ./اخوج هذا راح يخبلني
عافتهم ودخلت ورانيا ماحجت تعرفها خبالات
اخذت ولدها وطلعت تريد تشتري ملابس للولد وصعب يوديهم
،،،،،
سما / شبيج شايطه اعصابج
حجت سما وهي تشوف صفا دخلت ضايجه للمطبخ
صفا / مابية شي .. نترت بسما وراحت لغرفتها
طبكت الباب بقوة وراحت كعدت بفراشها
صفا / لو بس اعرف شلون قبل يتزوج شلون اقتنع بيها وهي مدري منين حتى مانعرفها وهو حسب كلام عمة ايمان مرة وحدة شافها ااووف هاي منين طلعتلي يربي وأخذته لصعب واني جنت اتمنى يصير قسمتي اويلي على حظي الزفت
بس لازم اعرفها منو واكيد عمة ايمان عدها معلومات بس هي سكوتية متحب تحجي كولشي وصعب دوم عدها وسوالفه هي تعرفهم
ــــــــــــــــــــ
ايمان / هلة بنيتي هلة صفاوي من زمان ما مارة علية
صفا / هلو عمة حبيبتي اي مشغولة مدرسة ودوام
ايمان / اي الله يوفقج ماما ، شنو اليوم ممداومه
صفا / دوامي صباحي ، اكول عمة صعب شوكت يتزوج
ايمان / مدري يمكن هالايام جان ينتظر دورة السنة وهاي صار اسبوع من خلصت والله يرحمه برحمته وينور قبره
صفا / الله يرحمه اي والله ذاك الاسبوع بالمقبرة هواي تاذينا بالبجي عبالك تونا دافنينه
ايمان / هذا قدره مابيدنا شي الحمدلله على كل حال أخذي راحتج اروح اصلي العصر اني
صفا / اي على راحتج عمة
عافتني وبقيت بالمطبخ كمت ادور على الموبايل وفتشته عالسريع ولكيته سويت ارسال على رقمي ورجعته بمكانه ورحت كعدت عالقنفة فتحت موبايلي واني ادقق بالرقم وابتسمت
بقيت قريب الساعة يم عمتي بعدها اترخصت منها ورجعت للبيت وبغرفتي قفلت الباب ودكيت عالرقم من سيم كارت ثاني لأن ماريد رقمي هذا ينعرف وبقيت انتظر الرد
صفا / الو انتي نرجس
نرجس / اي نعم منو حضرتج
صفا / مو مهم بس الاهم تعرفين الراح تتزوجيه واحد لاذمة ولاضمير يدعي المرجلة وهو بعيد عنها اصلا فد واحد سمعته زفت متشوفينه ممتزوج لحد هسة المنطقه يعرفون أخلاقه ومحد يقبل ينطي مرة
نرجس بصدمة / انتي شكاعد تحجين كذابة ماكو هيج حجي
صفا / اووي بكيفج حبيت انصح يلة باي
قفلت الموبايل وطلعت السيم كارت ضمته وهي تضحك
خليها تبقى دايخة تستاهل ولو كلامي جان قوي بحق ابن عمي لأن هو عكس كل هذا بس الغاية تبرر الوسيلة واني احبه اريده يتزوجني شسوي لعد واني اشوف الغريبة تأخذه عالحاضر
ــــــــــــــــ
نرجس /
بقيت اتصل عالرقم ويطلع خارج التغطية اريد اعرف منو هاي وشنو غايتها وليش هسة اتصلت من قرب موعد الزواج
خفت من كلامها وبقيت افكر بي معقولة صعب ماعنده اخلاق بس تصرفه وياي قمة الاخلاق
حتى قبل اسبوع اجى وحده اخذني ازور قبر معتصم لأن عمته ما اجت ابد ماحجى وياي عافني براحتي
نظرته الي مو نظرة طمع ولانظرة وصخة زين هاي ليش هيج تحجي ؟!!!!!!!
احجي لأم عقيل اكيد تعرف اكثر مني لا شمعرفها بي لاااا خل احجي احسن
بيت ام عقيل
جانت توها داخلة البيت هي وسمرة جانن بالسوك اشترت حاجات لبنتها محتاجتهن للكلية لأن داومت قسم انكلش
نرجس / هلو خالة شنو تعبانة
ام عقيل / اي والله هاي سمرة فررتني السوك
سمرة / يمة غير محتاجة شغلات
ام عقيل / اي يمة بالعافية
نرجس / اكلج خالة ردتج بموضوع بس ارتاحي هسة
ام عقيل / ماعندي شي احجي يمة
حجيت كل كلام البنت وخالة صافنه تسمع اخر شي من كملت
ام عقيل / هاي وحدة خبيثة تريد تخرب زواجكم خلها تولي بعد لا تردين عليها
الشهادة لله الرجال والنعم منه صار سنة ماشفنا منه إلا الخير وانتي لا يبقى عقلج صغير تصدكين بكلشي تسمعينه
سكتت ماحجيت يمكن كلامها صح مدري والله
ام عقيل / شبيج ليش ساكتة
نرجس / ها بس غير نتاكد
ام عقيل / تردين اسأله لو اروح أسأل الوادم ترى الرجال واضح وأخلاقه عرفناها لو صدك حجيها جان عنده هواي فرص يستغلج بيها لو يتحرش بيج وانتي افتهمي بعد
بقيت يمهم فترة ورجعت لبيتي واني فكري مشغول بالسمعته ام عقيل كلامها صحيح لأن صعب مايوم قلل من احترامي ابد ممتقربلي ولا يباوعلي بنظرة وصخة
بس والله كلامها خوفني شمدريني يجوز يطلع صدوك خل اخابره واحجيله لازم يعرف
دكيت على رقمه و انتظرت يفتح خط ....
(ومن يتق الله يجعل له مخرجا و يرزقه من حيث لا يحتسب ومن يتوكل على الله فهو حسبه إن الله بالغ امره)
ــــــــــــــــــــــ
نرجس /
قبل ميفتح خط سديته عزا هاي اني كل عقلي اتصل وأكله هيج سمعت عليك لااا ما اكدر
فزيت من دك موبايلي رقمه اني حافظته بدون اسم ترددت افتح خط بقى يرن وفصل
بعدها وصلت رسالة فتحتها
'' خير محتاجة شي ''
يربي هسة اني شورطني واتصلت ارد عليه شلون
عفته ما رديت ورى فترة جنت بالمطبخ اسوي
عشا رجع موبايلي دك هالمرة فتحت خط
سلم علية ورديتله
صعب / ليش ماتردين على الاتصال و رسالتي ؟!!!!
بلعت ريك واني افكر / ها ماكو شي اتصال بالخطأ جان
صعب / لا بلة ويستمر هالاتصال بعدها ينلغي
خوش لعد والرسالة مالج مزاج تردين عليها
نرجس / ها جنت مشغولة ماشفتها
صعب / يلة ماصار شي .. شلونج انتي زينة محتاجة شي
اسمع صوته بأذني يحجي بكل هدوء واتخيل صوت البنت وهي تحجي عليه انتبهت من سال ..
صعب / شبيج انتي مريضة ليش متردين
نرجس / ها لاااا مابية شي
صعب / سألتج محتاجة شي
نرجس / لا شكرا ممحتاجة
صعب / يلة ديري بالج على نفسج فيمالله
سديته واني احس بذنب على احراج مدري يمكن لان أسلوبه زين وياي يسأل علية دوم واني جاي افكر باشياء مو زينة تخصه
ليش ماحجيت وخبرته المفروض احجي
بقيت اكل بروحي لأن بقيت ساكته
صعب /
مدري شبيها اتصلت وسدته وماردت على رسالتي أحسها من صوتها مرتبكة فكرت احتمال محتاجة شي وتستحي تكول والله النسوان يحيرن شسويلها اكيد إذا شي مهم جان حجت مددت عالفراش وعيني بالغرفة مجنت اتخيل اشتري أخشاب زواجي وهاي اني منسدح عالجرباية الجديدة
قبل جم يوم اشتريت الغرفة ورتبناها صارت جاهزة بس ناقصها العروس هه على أساس صدك يلة شسوي بعد واقع انفرض علية
اندكت الباب ودخل يوسف يركض صعد يمي وانحشك بحظني
دنكت حظنته وبسته بخده / ها بابا ليش تلهث
يوسف / ماما عاطت بية تكول روح ذجت اني
صعب / ههههه اي خطية ماما اكيد ضوجتها الله يساعدها عليكم انت وابوك
رفعت راسي واني اسمع صوت ايهم يصيح يوسف
صعب / تعااال هنا خاتل ابنك
دخل ايهم / هههه ها حيال عبالك عمك يخلصك
رفعه ايهم بتك ايد ويوسف يصيح ...عوفني
صعب / شبيك عالولد صدك جذب !!!!!
ايهم / هههه لا والله ماسويله شي بس اريد احجي وياه صاير خبالو ضرب لينا على بطنها وطلع يركض
وكفت وسحبته من ايهم / تعال بابا نروح نشتري حلويات
طلعنا وأيهم يمشي ويدردم ورانا / هسة ما افتهمنا ويانا علينا
رديت عليه واني اطلع للكراج / ههه لا اني وية يوسف وانت ارجع لمريتك
ايهم رجع وعينه على لينا نزلت وايدها على بطنها / وين يوسف عليك الله خوما ضربته
ايهم / اي علكته فلقة حتى يبطل سوالفه خبالو صاير
لينا / لااا عفية ليش هيج انوب يزيد اوي فدوة حبيبي يغار علية وهيج يسوي
فك حلكه عليها / لا لا طكي دمعتين اليسمعج يكول صلخت جلده هو غير خفت عليج من عطتي والله اعلم اذا بيج شي
تنفست بقوة وأيدي على بطني من حسيت بألم / ايهههم يمكن راح أولد
تقرب علية بقلق / امشي اخذج للمستشفى
اجت عمتي ومن شافت ايهم محاوطني بذراعه ..
ام حذيفه / خيركم شو مخبوصين
ياه ولج ليونة بس لا راح تولدين امشي اخذج للقابلة
لا إراديا عطت فززتهم انوب واني اتذكر السوته بية من جنت حامل بيوسف
لينا / لاااا لاااا ابد ما اوصلها لو اموت فدوة ايهم لا ماروح هاي موتتني من فحصتني بيوسف الله لا يوفقها
كعدني عالقنفه بالمطبخ وعمتي كعدت بصفي وأيهم واكف فوك راسي ..
ايهم / يمة شنو السالفة شبيها تخبلت
ام حذيفه / يوه هاي من دخلت بشهرها شمدريني اخذتها للقابلة تفحصها ومرتك ما تتحمل تخربطت
رديت عليها واني اتنفس سريع / عممة احجي ضميرج هي اذتني
ام حذيفه / اي والله صدك مو جان ماعندج توسع وهي ...
لينا صاحت وهي ميتة خجل / عمممة فدوة لا تحجين شي عوفي عوفي السالفة
رفعت راسي لايهم صافن على حجينا .. والنبي راح أولد فدوة اخذني للمستشفى بعد.. ااااايي ما اتحمل
صاحت عمتي ..علا ..خطية اجت تركض وراحت جابت عباتي لبستها ولفيت شالي
علا / هاي جنطه الطفل عمة شيليها
ام حذيفه / اي يمة جيبيها وعينج على يوسف
علا / صار عمة. عيني لينا دكومين بالسلامة الله يسهلج
التفتت عليها / فدوة ادعيلي
من جاي نطلع بالسيارة لاكونا صعب ويوسف الي نزل يركض من سيارة عمه
فتحله ايهم الباب وصعده بحظنه / ماما ماما
حبيبي عينه علية وانوب كام يبجي من شافني ابجي موجوعه
عمتي بالصدر كاعدة نترت بي / مابيها شي لا تفاول على امك
اشرلنا صعب بيده ونزل من سيارته .. خير خوما كو شي
ايهم / راح تولد وطالع للمستشفى هسة
صعب / الله يسهل إذا تحتاجون شي خابرني
ايهم / تمام
بالطريق صحته ليوسف من شفته خايف عبالة هو السبب لأن ضربني دفرة برجلة حظنته وبقيت ابوس بخدودة / حبيبي لاتخاف هسة اجيبلك نونو حلو تلعب وياه
يوسف بخوف / ماما تعورتي
لينا / لا ماما هذا اخوك يريد يطلع لأن يحبك
دنك باس بطني ويمسح عليها واني كوة متحمله الالم والوجع لخاطره ماريد اطلع صوت حتى لايخاف
ايهم عيني بالمراية أشوفها شلون تتوجع وكوة متحمله وبس الدموع تجري تنهدت بقوة واني ادوس سرعة حتى اوصل للمستشفى واجى على بالي اول ولادة جنت اني بالاردن وتوني واصل للبيت بوكتها خوفي عليها مو كثر هسة فعلا خايف عليها يارب تكوم بالسلامة
ــــــــــــــــ
ايمان / لعد ليش ما اتصلتو بية جنت اروح وياها سودة علية الله يكومها بالسلامة
علا / عمة طلعو عالسريع لأن مبين عليها متوازية
ايمان / يارب سهلها يارب
علا / هاج عمة اشربي جايج
اخذته من ايد علا انطتني وراحت برا التفتت وراها تحجي وية صفا شوية ودخلن
صفا / السلام عليكم شلونج عمتي حبيبتي
ايمان / وعليكم السلام هلة بصفوة شلونج ماما
صفا / الحمدلله
شربت الجاي وذبيت الاستكان عالطبلة انتبهت على صفا كامت طلعت من المطبخ مدري وين راحت لأن علا كاعدة بصفي
ايمان / وين الحجي وصعب حذيفة شو ماكو احد
علا / طالعين بس صعب بغرفته
ايمان / هاا .. اني طخت عندي هاي صفا متكعد راحة خرب حظها بس لا يكفخها صعب
اوي والله تعبوني اني شكو ياهو البيهم صغير
اجت البنيات بنات حذيفة واخوهن بوستهن واخوهن وياهن شايلات كتبهن يقرن بقن بالمطبخ كاعدات مفرشات عالزولية يقرن
شوية واجت صفا وصفحة من خدها حمرا
وطلعت برا راحت علا وراها صاحتها ترجع مارجعت
علا وجهها ميتفسر دخلت وكعدت بصفي بقت صافنة
دخل صعب عاكد حاجبه وكالب الخلقة حتى ماسلم علية اشر لعلا بأصبعه وبعصبية ..
صعب / اسمعي بنت عمي اختج تفهمينها الجاي تسوي غلط عيب عليها هالتصرفات كاعد بغرفتي تدخل علية ماكو حيا استغفر الله شوية وتوكع بحظني لا تخلوني اجفص بالحجي هسة
شهكت علا .. عززاا بعينها إن شاء الله ، والله العظيم شكد حجيت وياها حتى كمت استحي منك
صعب بنفس وتيرة الغضب / وعليش مستحية ليش اني ما اعرفج انتي تاج على راسي والنعم منج بنت عمي واخيتي
ايمان / عمة صعب لاتعصب خل تولي هالعوبة والله لا احجي وية ابو معتصم خل يزوجها لابن حماها لام غزوان وتنكسر ركبتها مدري طالعة عليمن بنياتنا كلهن يستحن وهاي عرمة
بقيت يم بيت ابو حذيفة كاعدين كلنا بالهول خابر ايهم فرحان لينا جابت ولد وهسة على وصول
وصدك ربع ساعة وصلو ام حذيفة شايلة جوة عباتها النونو ويوسف وابو الي حاظنين لينا ويمشوها بهداوة اجيت أهلهل وتذكرت معتصم بعدها لوعته وحركته بگلبي سكتت ورحت اخذتها من ايهم ..
ايمان / حمدالله على سلامتج بنيتي تعاي للغرفة
دخلتها لغرفة ابو حذيفة علا جانت محظرة الفراش ومرتبه حتى مهد الطفل
نامت بالفراش والطفل ام حذيفة خلته بالمهد
باركت لايهم الفرحه بعيونه .. مبروك عمة يتربى بعزك
ايهم / الله يبارك بيج عمة بعد روحي
التفت الحجي دخل يباركلهم .. ها مراح ترمي جم طلقه
ايهم / والله يابة راحت من بالي
دخل حذيفة واشتغل الرمي .. اسمعوا هذا صعب كام يرمي وياه يوسف
الكل فرحانين بالوليد وبقوا طابين طالعين للغرفة الا ام حذيفة طردتهم كالت البنت تريد ترتاح والولد نايم شتشوفون منه هاكدوته
تحجي وتأشر على إصبعه
ايهم قرر يسمي معتصم محد اعترض عالاسم بس الحزن جان واضح بعيونهم خاصة رانيا الي اجت ثاني يوم تبارك
ــــــــــــــ
يوسف باهتمام عينه على اخوه /ماما شنو ياكل
لينا / حبيبي يرضع حليب انت هم جنت هيج
يوسف / لا عيب
لينا / هههه تعال ايهم شوف ابنك وسوالفه
دخل الغرفة وراح كعد بصفها وعينه على ابنه
ايهم / شوفي عاكد الحاجب ويرضع شلون نظرة ههههه ، شبي يوسف ؟!!!!
لينا / يكول عيب لأن كلتله جنت ترضع مثل عصومي
ايهم / هههه اي حيل عيب ترى
غمزلي / والله جهالي مدللين بس اني مسكين
لينا / ايهههم اوي والله انت بطران
ايهم / ديلة ام البطران راح اخذ يوسف للسوك شمحتاجه اجيبلج
شكرا لزيارتكم عالم روايات سكيرهوم
