رواية عشقت كبريائي فهد ومليكة الجزء الثاني (عناد الحب والكبرياء) الفصل السابع عشر
اشرقت شمس صباح يوم جديد فى سماء الاسكندريه لتبدء جومانه بفتح عيونها
بصت حواليها لحد ما عينيها جت على فارس اللى نايم على الكنبه افتكرت اللى حصل ما بنهم فى الليله السابقه دموعها نزلت منها وقعدت تبص على فارس وتقول لنفسها
جومانه :- ليه يا فارس بتعمل معايه كده ليه علطول بتقصد تجرحنى ليه سعات تكون حنين وطيب ومره واحده تتغير وتبقى قاسى واللى تعبنى اكتر أن بدأت اتعلق بيك وبحاول اكرهك مش قادره ياريتنى ما كنت قبلتك ولا عرفتك كنت عايشه ومرتاحه اكتر من كده ليه ظهرت فى حياتى بدون سابق إنذار وبدأت تستحوذ على كل كيانى ليه
وفى الوقت ده فتح فارس عينه
جومانه:- مسحت دموعها بسرعه وعملت نفسها نايمه
فارس :- قام بص يطمن على جومانه انها نايمه ومشى أيده على خدها لاقها كلها دموع نزل قرب من ودنها وقال انا عارف ومتأكد انك صاحيه فتحى عينك
جومانه :- فتحت عينيها وقالت ابعد عنى متلمسنيش
فارس :- بتعيطى ليه
جومانه :- مش بعيط
فارس:- والدموع اللى على خدك دي ايه
جومانه :- وانت شاغل بالك ليه اعيط او لاء
فارس :- لو الدموع دى بسببى احب اعرف ليه انا مقولتش حاجه تجرحك انا قولت اللى مفروض يتقال واللى مفيش اى راجل فى الدنيا دى يقبله أن مراته قلبها مع غيره
جومانه :- قامت وقفت وقالت بعصبيه انت ايه يا ابنى بتفهم ازاى ا ا.انت تعرف ايه عنى تعرف ايه عن شخصيتى عن حياتى ولا حاجه جيت دخلت حياتى ومتحكم فيها من غير حتى استأذن منعنى من الخروج ومعترضش واخد التليفون وبتخلينى اكلم بابا بمزاجك وقصادك ومعترضش معيشنى على مزاجك انت ومعترضش بتجرحنى ومعترضش ومش من طبيعتى اكون مسلمه بالطريقه دى بس معاك وضعى بيختلف ليه الله اعلم انا معرفش السبب بس خلاص تعبت مش قادره اتأقلم على الوضع ده نفسى ارجع تانى لطبيعتى لجومانه اللى الناس كلها عارفها واللى انت جيت وغيرتها الصراحه مش قادره افهمك انت طيب ولا قاسى مرح ولا جد مش عارفه حاسه ان عايشه مع واحد أفكاره وحركاته مشفره بالنسبالى ومش قادره افك الشفره ديه ارحمنى و سبنى فى حالى بقى
فارس :- انا بتعامل مع كل إنسان بطريقته وانتى اللى وصلتينى لكده بحس معاكى أن شاب مراهق ومعندوش تحكمات فى تصرفاته بس الحاجز اللى بينى وبينك الشخص اللى بتحبيه مش محتاج اعرف حاجه عنك ولا عن شخصيتك لان فى الاخر مش هيفيد هو الأحق بمعرفة شخصيتك مش انا
جومانه :- اوقات كتير بتيجى للواحد الفرصه وبيضيعها بغباءه وفهمه الغلط بس على ما يفهم صح بيكون الفرصه راحت من بين ايديه وندم عن اذنك وسابته وخرجت من اوضه ونزلت تحت
فارس :- استغرب كلام جومانه ومفهمش معناه بص على الباب مكان ما خرجت وبعدين دخل الحمام
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى بيت عبدالرحمن
فى اوضت مى
صحيت مى على صوت المنبه طفت المنبه وقامت من على السرير دخلت الحمام اخدت شاور واتوضت وخرجت لبست هدومها وأدت فرضها وبتاخد التليفون لاقت رساله ومكالمه
بصت على المكالمه لاقتها لباسم فتحت الرساله لاقتها من مازن
وكان كاتب فيها(صباح الخير يا قلبى كان نفسى اقولهالك وانتى جنبى وفى حضنى بس قريب اوى أن شاءالله هترجعى مملكتك يا مى بحبك )
مى :- اتغاظت من الكلام وجت تقفل التليفون باسم اتصل بيها ردت وقالت
مى :- السلام عليكم
باسم :- وعليكم السلام
مى :- خير يا استاذ باسم
باسم :- انا كنت بتصل علشان اعرف انتى جايه ولا لاء
مى :- حضرتك أنا قولتلك امبارح انى جايه الشغل
باسم :- بس كان صوتك معيطه قولت يمكن تكونى تعبانه وغيرتى رأيك
مى :- ياريت حضرتك متشغلش بالك بيه انا لو فى حاجه هبلغ فهد بنفسى
باسم :- احم ماشى براحتك سلام
مى :- من غير ما ترد عليه قفلت السكه فى وشه
وخرجت من اوضتها
مى :- صباح الخير
فايزه :- صباح النور
مى :- تيلا قامت راحت المدرسه
فايزه :- اه راحت
مى :- ماشى يا ماما هروح انا سلام
فايزه :- متتأخريش اختك مها وجوز اختك جاين عايزينك
مى :- بأستغراب عايزين ايه
فايزه :- معرفش
مى :- هحاول اكون هنا بدرى شويه سلام وفتحت الباب وخرجت
فايزه :- ربنا يوفقك يا بنت بطنى وريح قلبك يا قادر يا كريم
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى شركة فريد المنشاوى
وصل فهد ومليكه الشركه ودخلو المكتب واتفاجئوا بوجود دعاء فيه
فهد :- بأستغراب دعاء بتعملى ايه هنا
دعاء :- ص.ص.صباح الخير يا فندم
فهد :- صباح النور
مليكه :- انتى طرشه مش بتسمعى بيقولك كنتى بتعملى ايه هنا
دعاء :- ك.ك.كنت بنضف ليكم المكتب
مليكه :- والله ده على اساس دى شغلتك
دعاء :- لاء حضرتك بس انا دخلت اخد ملف منقصة شركة ال عمران من على مكتب فهد بيه وكان فى فنجان قهوه وقع على المكتب فا كنت بنضفه
مليكه :- بعد كده طول ما احنا مش موجودين فى المكتب ده متدخليش فيه فاهمه
دعاء :- حاضر انا اسفه
مليكه :- اتفضلى على مكتبك
دعاء :- خرجت وهى بتسب وتلعن فى مليكه ومسكة تليفونها وطلبت رقم
دعاء :- الو
الشخص :- ايه عملتى ايه
دعاء :- دخلو عليا المكتب وكنت هروح فيها بس عرفت اتصرف
الشخص :- ها عرفتى تجبيه
دعاء :- لاء خفينه فى مكان مش معروف
الشخص :- لاء يا روح امك تجيبى ليا اللى قولتلك عليه بأى طريقه
دعاء :- هحاول حاضر
الشخص :- انا مش هرتاح غير لما انتقم منه ومنها بأى طريقه
دعاء :- اعمل حسابك فهد مش سهل وعنده عيون فى كل حته
الشخص :- عارف وعامل حسابى انجزى انتى وهاتى اللى قولتلك عليه
دعاء :- حاضر هشوفك النهارده فى الشقه
الشخص :- اكيد يا قمر هستناكى على نار
دعاء :- اموووووه باى
فى مكتب فهد
مليكه :- فهد البت دى حركاتها مريبه انا مرتحتش ليها من اول مره شوفتها فيها
فهد :- تانى يا مليكه
مليكه :- مش حكاية غيره والله انا اه بغير عليك منها بس برضه مش مرتاحه ليها حاسه ان وراها حاجه مش طبيعيه
فهد :- فكك من شغل وغيرة الستات دى قولتلك همشيها اول ما الاقى حد تانى متفضليش كل شويه تطلعى فى حكايات على البت لمجرد انك غيرانه منها
مليكه :- براحتك يا فهد انا بقولك على اللى حاسه فى قلبى من ناحيتها مش علشان غيره تصدق بقى متصدقش انت حر وسابته وقعدت على مكتبها
فهد :- بص ليها بنفاذ صبر وقال انا تعبت منك اقسم بالله والغلط من عندى أن وافقت انزلك الشغل معايه كنت الاول مرتاح وانتى قعده فى الفيلا وشايفه واجباتك اللى عليكى بدل النكد اللى بقى اربعه وعشرين ساعه ده
مليكه :- بصت ليه بصدمه وقالت انا بقيت نكديه يا فهد
فهد :- انتى شايفه نفسك ايه
مليكه :- عندك حق انا بقيت واحده مقرفه مقصره فى حقوقها وواجباتها اتجاه بيتها وجوزها وبقيت نكديه ومعيشاك فى نكد علطول بس انا هريحك من القرف ده كله وهقعد تانى فى البيت بس علشان اربى عيالى مش اكتر عن اذنك واخدت شنطة ايديها ولسه هتفتح الباب
فهد :- مليكه متعصبنيش رايحه فين
مليكه :- هريحك من شكلى ونكدى وهقعد فى بيتى اربى عيالى وأشوف حقوقى وواجباتى اللى مقصره فيهم
فهد :- انتى ايه يا شيخه مش بتزهقى ابدآ بتخدى كل حاجه قفش مش بتعرفى تخدى وتدى فى الكلام شبه البنأدمين ابدآ
مليكه :- اه بقيت واحده مزعجه عن اذنك وشدة درعها من ايد فهد ومشيت
فهد :- مليكه مليكه
مليكه :- مردتش عليه ومشيت وسابته
فهد :- اتعصب ودخل مكتبه وقفل الباب وراه جامد
وفى الوقت ده دخل باسم عليه
باسم :- صباح الخير
فهد :- صباح النور اقعد يا باسم
باسم :- مالك يا ابنى وفين مليكه
فهد :- مفيش مليكه روحت الفيلا
باسم :- اممم زى كل مره متخانقين صح
فهد :- باسم بلاش اسألتك الكتير دى مش فايقلك
باسم :- هتفضلو علطول كده متمرده ومتكبر هى متمرده عليك وانت كبريائك مش عايز تتنازل عنه
فهد :- باسم سبنى دلوقتى وروح شوف وراك ايه
باسم :- ماشى هسيبك براحتك وقام خرج من المكتب وراح مكتبه وكانت مى وصلت
باسم :- صباح الخير
مى :- صباح النور
باسم :- عامله ايه دلوقتى
مى :- الحمدالله
باسم :- انا اسف لو كنت ازعجتك بأتصالى الصبح ولا سببت ليكى مشكله مع جوزك
مى :- لاء مفيش مشكله ولا حاجه بس ياريت حضرتك بلاش تكلمنى على التليفون الا لو حاجه ضروريه لو فيه حاجه مش مهما استنا لما اجى المكتب وقولها
باسم:- جوزك بينزعج صح
مى :- استاذ باسم للمره المليون بقول لحضرتك متتكلمش عن حياتى الشخصيه
باسم :- ده سؤال عادى
مى :- وانا مش ملزومه ارد عليك مدام خارج سياق العمل عن اذن حضرتك
باسم :- بصلها واتنهد وبدء يشوف شغله
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى فيلا اسر
صحيت مها على مغص فى بطنها وحست أن الالم بيزيد حاولت تقوم بس اتفاجئت بدم على السرير
مها :- اسر اسر قوم الحقنى شكلى بسقط
اسر :- قام مفزوع وقال ايه فى ايه واتصدم من منظر الدم
مها :- بدموع شكلى بسقط يا اسر
اسر :- قام لبس تيشرت ولبس مها هدوم وشالها ونزل يجرى بيها حطها فى العربيه وراح بيها المستشفى ودخل يجرى ونده على حد يبلغ الدكتور ودخلها اوضت الكشف
مها :- بدموع خايفه اوى يا اسر
اسر :- باس ايديها وقال متخفيش يا حبيبتى أن شاءالله خير وفى الوقت ده الدكتور دخل وطلب من اسر الخروج وكشف على مها وبعد شويه خرج الدكتور
اسر :- بلهفه طمنى يا دكتور
الدكتور :- كان البيبى هينزل بس الحمدالله لحقناه وادتها حقنه تثبت الحمل ولازم تنام على ضهرها وممنوع اى حركه ليها
اسر :- حاضر
الدكتور :- امته اخر علاقه حصلت ما بنكم
اسر :- احم امبارح
الدكتور :- وبيحصل كل قد ايه
اسر :- تقريبآ يوميآ
الدكتور :- بعصبيه يعنى حضراتكم ده مش اول حمل للمدام دى تالت مره يعنى مفروض تكونو عارفين أن ممنوع اى علاقه خلال أول تلت شهور لان الحمل بيكون فى مرحله تكوين وتثبيت ولو حصل بينزل البيبى علطول ده ربنا بيحبكم وكاتب للبيبى ده يعيش يا اما كده كان زمانه نزل من زمان من اول علاقه ليكم فى مراحل التكوين ياريت حضرتك ممنوع اى علاقه الفتره دى وتلتزم بالتعليمات اللى قولتلك عليها وتجيب ليها العلاج الموجود فى الروشته دى علشان تثبت الحمل اكتر ويعوض جسمها الدم اللى نزل منها وتقدرو تمشو دلوقتى
اسر :- احم شكرآ حضرتك
الدكتور :- الشكر لله وسابه ومشى
اسر :- دخل الاوضه لمها وبسها فى راسها وقال عامله ايه دلوقتى
مها :- بتعب حاسه بشوية مغص فى بطنى
اسر :- معلش لما نروح هجيب ليكى العلاج تخديه هيريحك شويه
مها :- رغم أن مكنتش عايزه البيبى ده اول الحمل بس كنت هموت عليه لما حسيت ان هفقده
اسر :- طبعآ مش بقى حته منك دلوقتى
مها :- الدكتور قالك السبب ايه فى اللى حصل
اسر :- اممممم
مها :- ايه
اسر :- العلاقه
مها :- اتكسفت ووشها احمر وقالت احم مالها
اسر :- هى السبب فى اللى حصل وقلى ممنوع اى علاقه فى الوقت ده
مها :- م.م.ماشى
اسر :- فاهمه ممنوع يعنى بلاش شغل الاغراء اللى بتعمليه معايا ده
مها :- خلاص يا غلس وضربته فى كتفه
اسر :- ههههههههه مشكله لما بتتكسفى
مها :- عايزه امشى من هنا
اسر :- يلا الدكتور قلى تقدرو تمشوا دلوقتى
وقامت مها من على السرير واسر سندها وخرجو من المستشفى ركبو العربيه وراحو على الفيلا
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى فيلا فهد المنشاوى
وصلت مليكه الفيلا وهى دموعها على خدها دخلت اوضتها ورمت نفسها على السرير وقعدت تعيط وفى الوقت ده تليفونها رن مسكته لاقته رقم فهد كنسلت عليه وحدفت التليفون على السرير
مليكه :- هو مفكرنى ايه يجرحنى بكلامه وبعدين يقولى كلمتين واصفه لاء يا فهد مش هكون ضعيفه معاك تانى وهعرفك مين مليكه ولازم احسسك بغلطك علشان متجرحنيش تانى ومسحت دموعها وغيرت هدومها ونزلت من اوضتها تشوف اللى وراها
وبعد وقت وصل فهد للفيلا وكانت مليكه وقفه فى المطبخ دخل وقال
فهد :- السلام عليكم
مليكه :- من غير ما تبصله وعليكم السلام
فهد :- مش بتردى على تليفونك ليه
مليكه :- كده مش فاضيه بقوم بواجباتى فى البيت
فهد:- مليكه اتكلمى عدل
مليكه :- والله هى دى طريقتى لو مش عجبك متتكلمش معايه خالص
فهد:- كده يا مليكه
مليكه :- بتحدى ايوه يا فهد
فهد :- بصلها بغيظ وقال انتى حره وسابها ومشى
مليكه :- طبعآ ربنا خلقنى حره وهعيش طول عمرى كده وكملت اللى كانت بتعمله
عند فهد
دخل الاوضه وهو متعصب ومش طايق نفسه قعد على السرير وقال
فهد:- بعصبيه ماشى يا مليكه لو مكنتش اخليكى تعرفى أن الله حق مبقاش انا فهد المنشاوى وغير هدومه ونزل دخل مكتبه وقفل وراه الباب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى فيلا فارس المنشاوى
دخل من باب الفيلا لاقه جومانه قعده على الكنبه بتاكل فشار وبتتفرج على التلفزيون
فارس :- السلام عليكم
جومانه :- وعليكم السلام
فارس :- اكلتى
جومانه :- لاء
فارس :- ليه
جومانه :- شئ ميخصكش
فارس :- ردى عدل عليا
جومانه :- احنا مش كنا من الاول متفقين ان كل واحد يخليه فى حاله ياريت نلتزم بالاتفاق ومحدش ليه دعوه بالتانى
فارس :- وانا مش مهتم بيكى يعنى ولا هموت من الخوف عليكى بس انا بعمل كده علشان خاطر ابوكى لو حصلك حاجه من قلة الاكل ابوكى هيشيلنى ذنبك
جومانه :- لاء متخفش هبقى اكتب ليه ان انا اللى عملت فى نفسى كده وهخلى مسؤوليتك
فارس :- جومانه متعصبنيش وقومى يلا ناكل انا جايب اكل معايه
جومانه :- وانا قولت ليك مش هاكل وبعدين مش محتاج تشترى اكل عندك الاكل فى المطبخ جاهز عامله ليك ومتخفش مش زى بتاع المره اللى فاتت وسابته وقامت دخلت اوضتها
فارس :- طلع وراها وخبط عليها باب اوضتها
جومانه :- فتحت الباب وربعت ايديها على صدرها وقالت نعم
فارس :- خدى الاكل اللي جايبه وكلى هنا فى الاوضه لوحدك لو مش حابه تاكلى معايه
جومانه :- لاء
فارس :- ده كباب وكفته اللى انتى بتحبيهم
جومانه :- شكرآ كرهتهم بسببك
فارس :- شكرآ يا ستى بس برضه خليها عندك فى الاوضه احتياطى
جومانه :- اخدتهم من أيده وقالت على فكره انا اخدتهم منك علشان اخلص من زنك لكن انا مش هاكلهم هرميهم فى الزباله
فارس :- انتى حره اعملى اللى تعمليه وبعدين قعده فى الاوضه لوحدك مش خايفه من الفار
جومانه:- لاء ما انا اتصرفت خلاص فيه
فارس :- يخربيتك اوعى تكونى اكلتيه
جومانه :- مقرف الله يقرفك لاء طبعآ عملت وصله للتليفون الارضى واتصلت برقم شركة مكافحة الفئران وهما جم خرجوه من هنا
فارس :- نعم يا اختى دخلتى ناس غريبه الفيلا طيب ازاى وانا قافل عليكى بالمفتاح
جومانه :- لاء ما انا طلبت منهم لما جم أن هما يفتحه بنسخة الباب اللى محطوطه فى الصندوق بره ولما مشيو قفلت تانى الباب بالمفتاح
فارس :- نععععععععم انا معيش مين معايه فى الفيلا انتى دماغك دى ايه سم
جومانه:- اصل انا متعوده على المواقف دى من ايام ما كان بابا بيسافر ويسبنى لوحدى فى الفيلا
فارس :- هاتى المفتاح اللى معاكى ده والتليفون انا هخفيه وحسك عينك تعملى حاجه زى دى تانى فاهمه
جومانه :- انا حره على فكره انا مش عايشه فى سجن ولا معتقل ولا انك اشترتنى
فارس :- انا جوزك ومن حقى اعمل فيكى اللى انا عايزه وكلامى اللى قولته مش هقولو تانى واعملى حسابك بكره هتروحى معايه شرم وهيكون فهد ومليكه موجودين هتتعملى معايه قدامهم عادى مش عايز حد يحس بحاجه فاهمه وسابها ومشى من غير ما ترد عليه
جومانه :- بقرف بنأدم مستفز وغلس ومتعجرف على الفاضى ودخلت اوضتها وقفلت الباب ومسكت الشنط اللى فيها الاكل وشمتها وقالت لالالا الريحه لا تقاوم فظيعه وفتحت الشنط وقعدت تاكل منهم
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى شركة فريد المنشاوى
خلصت مى شغلها ودخلت لباسم وقالت
مى :- تمام كده حضرتك انا خلصت الشغل اللى ورايا هروح انا بقى
باسم :- وانا كمان خلصت تعالى اوصلك فى سكتى
مى :- لاء شكرآ لحضرتك هركب تاكسى
باسم :- مش عارف ايه المشكله لما اوصلك مفيهاش حاجه يعنى
مى :- لاء شكرآ بعد اذن حضرتك وسابته ومشيت
باسم :- واخرتها معاكى يا مى وخرج من مكتبه ونزل وركب عربيته بس وقف فجأه
مى :- نزلت من الشركه بس اتفاجئت بوجود مازن مشيت من غير ما تبصله
مازن :- مى يامى
مى :- بعصبيه عايز ايه وليه جاى ورايا هنا
مازن :- جيت اتكلم معاكى بهدوء بعيد عن البيت وبعدين اوصلك
مى :- مفيش كلام ما بنا يا مازن ابعد عن طريقى وانا مش صغيره هعرف اروح البيت لوحدى
مازن :- مى ادينى فرصه واحده بس اعوضك فيها عن اللى فات واثبتلك أن انا اتغيرت
مى :- بعصبيه زقته من صدره وقالت انت ايه يا اخى حالف ما تسبنى فى حالى كل ما بحاول انسى واعيش حياتى ترجع تانى قدامى وتفكرنى بكسرة قلبى ارحمنى بقى انا تعبت اقسم بالله تعبت بحاول الم اللى اتبقى من كرمتى بحاول اكون موجوده ما بين ناس حتى لو بجسم بس من غير روح بحاول اثبت لنفسى قبل اى حد أن انا بنأدمه وعندى مشاعر بحاول اعمل حاجات كتير انت ضيعتها منى زمان خلاص مش قادره اتحمل كل اللى بيحصلى ده منك لله يا مازن منك لله ودموعها نزلت منها
مازن :- مسكها من درعها وشدها فى حضنه وقال طيب أهدى شويه يا مى انا اسف بجد اسف
مى :- زقته بعيد عنها وقالت ابعد عنى متلمسنيش انا بكرهك وبكره كل لمسه منك ليا بكرهك وفى الوقت ده جه باسم
باسم :- مدام مى فى مشكله
مى :- مسحت دموعها وقالت ممكن توصلنى معاك يا استاذ باسم
باسم :- بفرحه ايوه طبعآ اتفضلى
مى :- راحت ركبت العربيه بتاعة باسم
باسم ومازن بصو لبعض بغيظ وتحدى
مازن :- انت ايه علاقتك بمى
باسم :- حاجه متخصكش
مازن :- ابعد عن طريق مى احسنلك
باسم :- وان محصلش هتعمل ايه
مازن :- مش هتكلم هخليك تشوف فعل
والاتنين بصو لبعض بتحدى وباسم ركب العربيه ومشى
مازن :- قعد يبصلهم لحد ما اختفت العربيه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى العربيه عند باسم
كانت مى بتحاول تمسك دموعها بالعافيه بس دمعه نزلت منها غصب عنها
باسم :- مسك منديل ومد أيده بيه لمى
مى :- اخدته منه وقالت شكرآ
باسم :- العفو بس عندى سؤال
مى :- لو على اللى حصل من شويه بلاش
باسم :- ايوه مش ده جوزك
مى :- قصدك طلقي
باسم :- بفرحه انتى اطلقتى
مى :- لو سمحت مش كل شويه هفكرك بلاش نتكلم فى حياتى الخاصه مش علشان ركبت معاك ده هيسمحلك انك تدخل فيها
باسم :- انا اسف وساق العربيه وهو فرحان بالخبر ده وصلها عند بيت امها ونزلت مى من العربيه وقالت
مى :- شكرآ حضرتك تعبتك معايا
باسم :- العفو على ايه تعبك راحه
مى :- سلام ومشيت
باسم :- مع السلامه وقعد يبص عليها لحد ما اختفت وشغل عربيته ومشى على فيلته
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى شقة عبدالرحمن
طلعت مى ورنة الجرس
فايزه :- فتحت ليها الباب
مى :- دخلت وقالت السلام عليكم
فايزه :- قفلت الباب وقالت وعليكم السلام
مى :- امال فين مها واسر
فايزه :- اختك تعبت شويه ورحت بصيت عليها ولسه جايه من شويه
مى :- من الحمل
فايزه :- ايوه الدكتور قال تنام على ضهرها فتره علشان البيبى يثبت
مى :- ربنا يكملها على خير
فايزه :- يارب ابقى اتصلى اطمنى عليها
مى :- هريح شويه واكلمها
فايزه :- ادخلى غيرى هدومك على ما احضر الاكل
مى :- معلش يا ماما مليش نفس
فايزه :- يا بنتى علشان خاطر بنتك مش راضيه تاكل الا معاكى
مى :- حاضر يا ماما هى تيلا فين
فايزه :- فى الاوضه بتلعب باللعب اللى ابوها جابها ليها
مى :- بعصبيه وازاى يا ماما تخديهم منه احنا مش عايزين حاجه منه ولسه هتروح على اوضت بنتها
فايزه :- مسكتها وقالت أهدى يا مى مش كده ما هى بنته برضه وبعدين كفايه بقى البنت نفسيته تعبت منكم ومن خناقتكم عايزين تتخنقو بعيد عن البنت حرام اللى بيحصل فيها لسه صغيره على كل ده
مى :- بدموع يعنى هو لسه مفتكر أن ليه بنت وبيشترى ليها لعب
فايزه :- معلش يا بنتى الراجل حس بغلطه كلنا بشر وبنغلط يا مى مفيش حد فينا ملاك
مى :- بس غلط عن غلط بيفرق يا ماما فى غلط الواحد يسامح عليه وفى غلط بيكسر الواحد من جوه ميبقاش عنده طاقه حتى يسامح وسابتها ودخلت اوضتها
فايزه :- بزعل على بنتها يارب ريح قلبها وفرحها بدل الحزن اللى مالى قلبها والدموع اللى علطول فى عينيها
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فى فيلا فهد المنشاوى
حضرت مليكه الاكل على السفره
وبعدت عدى ينادى فهد من المكتب راح عدى وخبط على الباب
فهد :- من جوه مين
عدى :- انا يا بابا
فهد :- عايز ايه
عدى :- بتقولك ماما يلا الاكل جهز على السفره
فهد :- روح قولها بابا مش عايز ياكل
عدى :- حاضر
وراح عدى وبلغ مليكه
مليكه :- اتغاظت وراحت هى عند باب المكتب وخبطت
فهد :- من جوه قولتلك قولها مش هاكل
مليكه :- ياريت بلاش شغل العيال الصغيره ده ويلا علشان العيال متحسش بحاجه
فهد :- ممكن لو سمحتى تمشى وخلينى اخلص الشغل اللى ورايا
مليكه :- ممكن تفتح الباب وتكلمنى شبه البنأدمين
فهد :- امشى يا مليكه علشان متعصبش عليكى ومش هاكل
مليكه :- براحتك والله اللى بياكل على ضرسه بينفع نفسه وسابته ومشيت
والكل قعد ياكل وبعد وقت الكل انتهى من الاكل وكل واحد راح اوضه
ودخلت مليكه اوضتها وبعد وقت دخل فهد عليها من غير ولا كلمه
مليكه :- اخدت مخده وغطا ونامت على الكنبه
فهد :- بصلها بغيظ ونام على السرير واداها ضهره
ونامو الاتنين استعداد لرحلة شرم
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
