رواي عذابي وقدري الفصل السابع عشر بقلم ارسلان جاف
فرحتي وياك حد الباب… .
أجي محمل هلا وياريت… .
وأرجع سالفة شياب …
روان… علاء بعده مارجع وهمه محد بيهم يحاجيني
حتى سلام محد سلم عليه وكلي شلونج غير بس انوار…
اختنكت حيل احس حتى النفس الي اتنفسه
محسوب عليه بهالبيت …
-تعبت صعدت الغرفتي طلعت ملابس من جنطتي
وفتت للحمام وفتحت الماي وفتت جوه
المي بارد صيف بوكتها اريد ارتاح جنت مختنكه
وماحس غير عمتي دفعت الباب شهكت… ملابسي
ملبلله ولازكه على جسمي جان تكوول
بنت الكلب اليوم انعل ابوج هذا الجسم عندج
كله وضامته تدرين انتي اتجبين ملايين…
انصدمت من كلامها ومدت ايدها عليه دفعتها
وطلعت مصدومه من كلامهه
شتقصد عمتي بكلامها وليش تمد ايدها عليه
وليش فتحت حلكها من شافت ملابسي لازكه
عليه طلعت اركض وصعدت الغرفتي هم زين
محد شافني واني هيج…
طبيت لغرفتي وجسمي كله يرجف من كلامها
سديت الباب وقفلته وبقيت ابجي واشاهك
بدلت ملابسي وعلاء مااجه ل 2 بالليل اتاخررر
جنت مغمضه منايمه ..سمعت دكت الباب
كمزت من مكاني خفت لا احلام مرت ابوه
علاء صاح رنووو فتحي الباب
ركضت فتحت الباب ..
علاء… رنووو شنو اليوم قافله الباب ليش
روان كتله ماكو شي اخاف من انت ماموجود
واقفله…
كال اسف جنت مشتاق لاصدقائي وصار فتره مشايفهم وماحسيت بالوكت ..
روان ..كتله عادي حبيبي
علاء شبيج حبي ..
مابيه شي بس تعبانه من الطريق…
طفت الكهرباء صعدنه فرشنه بالسطح
علاء… رنووو تعالي مد ايده الي ونمت بحضنه
ماادري ليش ابجيت بحضنه اول مره…
علاء… رنووو حبيبي
شو ارفعي راسج… مد ايده ورفع راسي
وكال احجيلي شبيج
كتله مابيه شي . كال كل هالدموع وماكووشي
مشتاقتلك… .
كل هاي الدموع اليه اشو تعالي باسني وضمني لصدره ونمنه…
ومرت الايام ورجعت مثل ماجنت اكعد من الصبح
اشتغل وانظف واتعب ومااسمع كلمه حلوه
بس الحجي الي يغث والغلط والسب من عمتي
احلام وزادت اكثر من قبل…
-خلص شهر رمضان ومبقئ غير يوم واحد
للعيد وطلبت من عمي وعمتي اطلع اشتري شي
للعيد ماقبلوا…
وعلاء ..كال اني ماعندي فلوس مو لازم تشترين
عندج كوومه ملابس بالكنتور لبسي منها
سكتت وهم كلت ميخالف…
تعبت واني اسكت واكتم بداخلي واشوف غيري
شلون يتعاملون وياهه…
ومثل كل يوم كملت شغلي ب 12 بالليل
وطبيت اسبح وعلاء فوك بالغرفه واني جنت
بالحمام انطفت الكهرباء
اووف ياربي هسه وكتها الكهرباء تنطفي
بقيت خايفه ردت بس البس ملابسي واطلع
وماحسيت غير ايد انمدت عليه جمدت
بالليل وظلمه بالحمام متت خوف وتلمست جسمي
واحد دفعني على الحايط وخله ايده على حلكي
متت بدمي من الخوف منو الي سوه هيج
ظلمه مااشوف شي…
وجان اسمع صوت عمتي احلام بنت الكلب…
اليوم محد يخلصج مني…
ولج هذا كله لعلاء حرام بيه… دفعتها بس
ظلمه وخايفه واني بس بملابسي الداخليات
لفيت الخاولي عليه وركض صعدت لفوك
فتت لغرفتي وسديت الباب وقفلته
علاء… حبيبي شبيج
روان… انتبهت على نفسي كتله مابيه شي
بس خفت لان طفت الكهرباء
لا تخافين حبي من الظلمه انتي سباعيه
كلت ماسكت بعد حجيت لعلاء على الي سوته
مرت ابوه احلام… وماحس غير انضربت راشدي
وصااح ولج انتي ماتستحين مثل ماكالت بس
اني ماصدكتها من كالتلي مرتك يوميه بالليل
تسبح وتصيحلي بس اني ماانطيها مجال
بس ماصدكت بيها وكلت روان ماتسويها…
طبعا جذبه جديده من عمتي وعلاء صدكها
بقيت ابجي ونمت ودمعتي على خدي .. .
ثاني يوم عيد الكل كعدوا من الصبح كل واحد
من حمويني بدل وكشخ وطلع هو وزوجته
الا اني مامر عليه العيد بقيت بالبيت
وعلاء طلع لشغل وكال هاي فرصتي بالعيد بلكي
اجمع كم فلس علمود اداووم بيهن…
بقيت اشتغل وابجي على حظي
عمي وعمتي احلام طلعوا وراحوا لزيارة
بقيت كاعده وابجي وجهاز ماعندي علمود
اخابر اهلي اعايدهم…
من رجعت من اهلي علاء اخذ جهازي والسيم
كارت كسره علمود مااحجي ويه اهلي…
جنت كاعده بغرفتي واندكت الباب
روان منووو ..
انوار اني… فوووتي
حبيبتي مفتوح الباب
فاتت وكعدت يمي على الجربايه
انوار ..روان شبيج
مابيه بس مشتاقه لاهلي…
كالت روان اتركي هاي السوالف هسه
اني اجيت حتى احجيلج شغله اسمعيني
من رحتي لاهلج مرت ابويه احلام بقت
تحجي براس علاء وطلعتج جذابه وخاينه
وخايسه كلشي حجت عليج…
حتى رادت تزوجه بس همزين رجعتي انتي…
روان ..اي ادري… سمعت
وخابرته خالتي ام علي وراحلج… وديري بالج
تره علاء مراقبج هسه واخذ تليفونج بس
علمود يتاكد ماعندج شي…
لان احلام مرت ابويه كالتله
انت من تطلع لدوووام مرتك تصعد فوك وتخابر
واني باذني هاي سمعتها تكول لواحد احبك
ومااكدر بدونك واخذت علاء جنت مجبوره
بس شبيدي اهلي جبروني بعد…
روان واني اسمع حجي انوار فاكه حلكي
شنوو من مره هاي الله واكبر عليها…
وحتى قنعته يطلكج وياخذ وسن بس
شهكت وخليت ايدي ع حلكي ودموعي تنزل
انوار ..الحمد لله خالتي ام علي خابرته وحجت وياه
وصحه على نفسه والله جان هسه مرت ابويه احلام
زوجته دمرت حياته…
رنووو ..ديري بالج على روحج تره مرت ابويه
حيه من تحت تبن تسوي كلشي ..ديري بالج منها
روان ماشي
انوار -يله رنووو اني نازله اخاف يجي احد
نزلت انوار واني بقيت مصدومه
ياللهي اني ماعندي غيرك شسوي…
تعبت منا الحمل تعبني وسوالف مرت ابو علاء
احلام لو شغل البيت والتعب والحمل الي تعبني
والحمل زاد عليه ..
وحنان مرت حماي امير… كامت يوميه مطلعه
سالفه شلون اني حامل وهي لا…
واحنه بنفس اليوم اتزوجنه وكامت حتى الخبز
ماتخبزه واني اعجن العجين…
واكوو وحده جيرانه بصفنه خوش ابنيه وحبابه
كلت بلكي الله دزها الي هي تاخذ العجين وتخبزه
واني حامل والحمل تعبني ومنا شغل
وياريت سامعه كلمه زينه لو احد محسسني
بشي زين كلها معيشتني عبالك وجودي غصب
عنهم…
كمت اعجن العجين وانطي للبنيه جيرانه ندى
تخبزه وعمتي احلام بعدهه على سوالفها وغلطها
وسبها…
بيوم جنت اغسل بالمطبخ…
واذا اغسل المطبخ لازم اغسل وياه الدرج والممر
والحمام ..
كملت شغلي مبقى غير بس الممر واكمل
جنت مدنكه وامسح بالكاع وجان عمتي احلام تجي
وبيدهه شايله قوري الجاي وتكلبه بالصاله
ماجنت ادري وراه اكووو لعبة…
وصاحت على حنان مرت حماي امير وكالتلها
امسحي يمه وياج الجاي انكلب اجتي واخذت
الماسحه اشو وكفت وكالت لا والله اني ماكدر امسح
بلكي حامل ويرووح يوكع… بس
انتي الي بطنج ثابت وكلشي مابيه…
روان… ماتشوفيني شلون طايح حظي اكرف من
الصبح لليل وبعدج حاطه عينج عليه
اي مسعده ماتمسح الصاله بنت النع….
الخايسه نهارها كله ملتهيه… هاي عمتي تحجي
وصلت لصاله ومااحس شلون انشاليت من الكاع
وركعت الكاع بيها زاهي وجاي وتزحلكت
وعمتي خابطتهن سوا بقيت بمكاني بس اون
من الالم ومحد بحالي بقيت اكثر من ساعه واني
مدده بالكاع مااكدر اتحرك من مكاني والالم
الي بطني موتني خفت على ابني لا صار بي شي
وابجي… محد بحالي
بلكوه سحلت روحي وصعدت لغرفتي رغم الالم
موتنني فتت لغرفتي وماحسيت صارت الدنيا ضلمه
صحيت لكيت نفسي نايمه بالكاع ومحد يمي
وعلاء بعده ماراجع من الدووام كمت وتمددت على
الجربايه واخذت مسكنات للالم ونمت وماكعدت الا على صوت علاء يصيح رنووو
فتحت عيوني شفته كاعد يمي كلي كومي حبيبتي
اتعشي…
روان… مااشتهي كلشي اريد بس انام
عافني نايمه ونزل…
ومرت الايام… .
اذا علاء موجود بالبيت ارتاح شويه تسكت
بس اذا مموجود عمتي تكلب الدنيا فوك راسي
حجي غلط وسب وجنت اسكت لخاطر حبيبي
- ومرت الايام ونفس الحال ..
لحد قبل يوم عيد الاضحئ…
اجه علاء وكال نقلونه فوج الحشد الشعبي من
الديوانية لبغداد وره العيد هنا اني صارت غصة
بقلبي واختنكت ونسيت فرحتي حتى بالعيد
وراح اشوف اهلي جنت كلش مشتاقتلهم صار شهرين ماشايفتهم من سمعت خبر روحه علاء لبغداد
طفت كل فرحه بقلبي
شكوو فرحه بقلبي راحت واشتحوذني الخوف
والقلق من المجهول
خوف زوجه على زوجها واب ابنها الي بعده
مجاي لدنيا…
وشراح يصير بيه اذا هو هنا يمي ومرت ابوه
هيج تسوي بيه اذا هو راح يرووح شراح تسوي بيه
ورحت بالعيد لاهلي شفتهم بس نقله علاء
لبغداد جانت غصة بقلبي وخاصه اني اعرف
ولاوضاع موزينه…
وخاصه بعد ماصارت حادثه سبايكر وداعش
واشوف الناس عايشه بقلق ومنا الانفجارت
متت خوف عليه… واخر يوم العيد وصارت صدك
وصار لازم يلتحقون لبغداد لساعه ب4 العصر
تطلع سياراتهم يوم 8/12 بشهر الثامن
روان علاء… الله يخليك لاترووح ويخليني
حامل اني خايفه عليك بروووح امك…
جنت لازمته من ايده وابجي مسح دموعي
بايده وكال الروووح والحياه والمووت بيد رب
العالمين هو الي خلقها وهو الي ياخذها وانه
رايح ادافع عن بلدي والبي نداء المرجعيه
ومو بس اني وحدي الالف وياي…
باس راسي ونزل جوه ودعنه وراح هو وحماي
كرار طلعوا سوه اثنينهم ..
اباوع محد مهتم ولا عبالك راحوا وماندري
وين دازيهم لو وين ياخذوهم ولا لمنو راح ينطوهم
التفكير والخوف اخذني وماعندي تلفون اخابره
واعرف اخباره .. وخايفه عليه
اشتغل بالبيت واسمع حجي عمتي احلام بدت
تغررد بس طلع علاء من الباب…
اريد اشوف بنت النع… منو يحميها بعد
اني اعلمج اذا ماربيتج من جديد…
عفتها ورحت كملت شغلي ميفيد الحجي ابد…
صارت الساعه ب10 بلليل وماكو اي خبر عنهم
وهمه ماخابرو ولا واحد كال وصلوا بعدهم
صعدت لمرت حماي كرار سجى… اريد اسالها
عنهم ..
روان سجى خابر كرار…
لا مخابر…
روان سجى حبابه عفيه خابريهم وشوفيهم وين
وصلوا اخاف صار عليهم شي بالطريق
جان تكول ياريت يموتون ونخلص ياريت منهم
ضليت فاكه حلكي شلون تحجي هيج عليهم
عفتها وكمت ورحت لغرفتي كمت ابجي واشهك
هاي شبيها هالناس… ياربي مالي غيرك انت المعين
والحافظ .. ساعدني انت تعرف كلشي
وتدري بيه بعيده عن اهلي وضعيفه ومابيدي شي
يارب احميلي علاء احفظه واحرسه انت قادر
على كل شي بقيت بغرفتي ابجي ونمت حتى
عشه متعشيت للصبح…
لا تطول غيبتك عني ...
ترة الطفل يستغرب بدون حضن أمه
شكرا لزيارتكم عالم روايات سكيرهوم
