رواية بنت الكهوجي الفصل السابع عشر بقلم احمد
ياقوت: بابا اختفت الضحكة من وجهو وصار لونو اصفر من خوفو علي اجى ركض يحاول يتطمن علي واني مو گادرة احجي من الوجع
سحب فراشي قريب من الصوبة وگال ابقي متمددة هسا اجيب تميم او اي احد من عائلة الشيخ وناخذج عالمستشفى
- قبل ما يروح مسكت ايدو
- شنو
- ابقى يمي لا تروح
- خلي ناخذج للمستشفى
- ابقى يمي لا تروح
قبل ما يحجي حضنت ايدو وحطيت خدي على الساعد وغمضت عيوني وجنت گوة متحملة الصداع بحياتي ما توجعت هيج منو
هو صار يمسح على راسي ويگول اذا ما گدرتي تتحملين الصداع گليلي علمود اوديج للمستشفى وبقيت مغمضة الى غفيت
فتحت عيوني على صوت بابا من گعدني وجان محطوط الغدا قريب مني وبابا يگول يلا بوية غسلي ايديج علمود تتغدين لا تبقين بدون اكل
گمت مثل السكرانة گوة امشي يادوب گدرت اغسل ايديني واحس جسمي مو متوازن من گد ما ارجف من البرد الي احس بيه ومن غسلت رجعت عالسريع عالغرفة
ادم: ها شلون تحسين نفسج
ياقوت: شوية احسن (حجيت هيج علمود لا ينشغل بالو)
- جان مخليتني اروح اجيب تميم
- ما يحتاج بابا هي فلاونزا منا لباجر بالزايد تروح
- عندج العافية تعالي اكلي وعوفي السوالف
- تمام
جان مسوي طماطة وبيض وجاي وخفايف لان ما يعرف يطبخ تغديت وما خلاني اغسل المواعين گال اني اشيل الاكل الزايد وباجر اغسليهن
رجعت تمددت ولان نمت هواي مو جايني نوم بس بنفس الوقت تعبانة كلش وبقيت هيج لحد ما اندگ الباب گال بابا روحي لمكانج
گمت عالسريع وهو شال الفراش وراح فتح الباب جانو جايين تميم واخوانو يتطمنون على بابا لان گايللهم ان هو تعبان وما يگدر يروح للمضيف
بس هالمرة ما تأخرو بس تطمنو عليه وراحو ومن راحو رجعت اني لگيت بابا فارش الفراش تمددت بيه واجى بابا لمس گصتي گال نازلة حرارتج شوية
صار يمسح على راسي واني مستمتعة بلمساتو وكل شوية اباوع عليه اشوفو يباوعلي ونبتسم لبعض ومر ذاك اليوم بدون احداث تذكر
ثاني يوم شوية صرت احسن ، صحيح احس بخمول وتعب بس اقل من البارحة بهواي وقنعت بابا يروح للمضيف وبقيت لحالي
اول شي سويتو غسلت مواعين البارحة واخذتلي دوش لان جانت الشمس طالعة فطلعت من الحمام وبقيت بالشمس مشطت شعري
ومن نشف جسمي رحت سويت الغدا وكالعادة مر اليوم طبيعي وبعد ما تمرضت ب 3 ايام گعدت على صلاة الفجر جسمي صاير ماي
لدرجة خفت لا اطلع من فراشي ويضربني الهوا وارجع اتمرض وبقيت لحد ما بابا شغل الصوبة وصارت الغرفة دافية
ومن گلت لبابا گال هاي هي طلعت منج الصخونة لان معروف انها تطلع ويا العرگ الي يطلع من الجسم وخصوصا اثناء النوم
صليت الفجر ومن طلع الضو اخذتلي دوش لان ما گدرت ارجع انام قبل ما اسبح وبعد الريوگ بابا راح للمضيف واني رجعت اكمل نومتي
العصر بابا اجى للبيت مشتري تلفزيون وستلايت وكلش فرحت بيهن ثبتهن وسوا الصحن مال الستلايت لحد ما طلعن القنوات
وخلال التعديل واجهنا مشكلة ان بابا مو حافظ مكان القمر واني ماگدر اگلو اجت لو لا خاف احد يسمع صوتي من الجيران او من غيرهم
فحطيناه على قناة الحدث ورفعناه الصوت على اعلى شي والصحن قربو بابا من باب الغرفة ومن يسمع صوت التلفزيون يعرف اذا اجت اشارة لو لا
جان الصحن فوگ باب الغرفة مو بالحوش وما جاب اخوان تميم علمود لا يصعدون ويشوفون بوري الصوبة الي طالع من المخبأ
صحيح تأخر بس بالاخير كملو وجان هذا اكثر شي فرحني لان راح ارجع اتابع مسلسلات بغياب بابا وفورا بلش بابا يسفط القنوات
حط قنوات القران اول شي والي هن قناة مكتوب عليها قران وقناة المجد وبعدهن الاخباريات وبعدهن مجموعة mbc وقنوات الدراما
من بعد ذاك اليوم صار اغلب وقتي اگضيه عالتلفزيون بس دائما صوتو اخليه كلش خفيف علمود محد يسمعو
بقت حياتنا اني وبابا هيج لحد ما اجى الصيف وبابا وفى بوعدو واشترى سبالت ثنين ومن اجى الي يركبهن اني صرت بالغرفة الثانية
بابا يگول صاحب السبالت استغرب من حطينا سبلت بالمخبا بس بابا گالو اريدو يكون مخزن للخظراوات وما اريدهن يخربن
وهو ما گال شي مهمتو يكمل شغلو وياخذ فلوس وهاي هي بس تأخر هواي لحد ما كملهن اجى ببداية العصر ما خلص للمغرب
بعد ما راح علمني بابا شلون اشغلهن وشگد احط درجة الحرارة وهو جان سهل بسرعة تعلمتلو بس جان احسن من الصوبة والمبردة بالف مرة
وثاني يوم بابا سكر مكان البواري بحديدة وحط فوگها قصدير وفوگ القصدير جير علمود يعزل الماي وهاي هي بوجود السبالت ماراح نحتاجها بعد
تميم واخوانو صارت تعليلتهم عند بابا واحيانا يجون بعض اخوانو من غير زيد وزياد ويگضون التعليلة كلها ضحك وونسة
بس من اجى رمضان تغير الوضع من بقى كم يوم بابا اشترى خاروف بالنص هو وتميم وقسمو من النص عند الگصاب وبابا اخذ المعلاگ وتميم الباجة
وحسب اعتقادي المتواضع انو تميم اخذ نص ويا بابا لان يصير هواي على بابا وبالنسبة لتميم يگدر ياخذ اكثر من خاروف بنفس الوقت
وماعرف اذا جان هذا تفكير تميم ولا لا واستنتجت هذا الاستنتاج من بابا گال ان هو اتفق ويا تميم يشترون سوا وتميم وافق
وجان تميم يريد من بابا انو يشتريه لحالو بس بابا رفض وما قبل ياخذ منو الا يدفع النص والباجة ما جان يريدها تميم بس ما اخذها بابا
السبب انو ماعرف انظفها وام تميم من النوع الي ما تحب المعلاگ لذلك انجبر ياخذ الباجة بالنهاية ومن اجى بابا حطينا اللحم بالمجمدة وكل ما نحتاج ناخذ منو
اني قررت ما اقصر ويا بابا برمضان وصرت اضغط على نفسي واسويلو يوم كبة يوم دولمة يوم مقلوبة ورغم صعبات علي بس جنت ادبرهن
والحمدلله ما سويت اكلة بيها نقص وبرمضان رجعت لنظام القيام وبابا جان يقيم وياي لان يرجع بوقت من المضيف
جنا نگعد الضهر نصلي الضهر واني ابلش اسوي الاكلة الي مقررة اسويها وبابا يبقى بالغرفة يتابع اخبار او يقرا قران او يكمل نومتو
مرات يطلع العصر يگضي وقت بالمضيف ومرات يبقى بالبيت لان ما يحتاجوه واني اكمل الفطور وقبل ما يصير الاذان بعشر دقايق احط الفطور
جان بابا متفق ويا تميم يفطرون على شوربة ونگوعة ( قيسي ـ مشمش مجفف ) وماي ولبن او عصير او اي شي من السوائل
ويروحون على الجامع يصلون المغرب ويرجعون يتعشون ومن يأذن العشاء يروحون لصلاة التراويح ومن هناك يروحون للمضيف
( اخوتنا الشيعة نعرف ماعندكم صلاة تراويح ما يحتاج نحجي بالدلائل والاثباتات وغير شي اعتبرو كلمة تراويح ما قريتوها ♥)
ويبقون بالمضيف للساعة 12 ويرجعون للبيوت اول ما يجي بابا نحط حلويات اني وياه ولان ماعرف اسوي حلويات رمضانية جان يجيب بقلاوة وعصاير
وبعدها نبلش بالقيام اني وياه نقرا قران ونصلي كل نص ساعة تقريبا ركعتين وجان بابا يصير امام بي ومن نخلص صلاة نرجع نكمل قران
ولان بابا مو حافظ القران جان يحط القران بايدو ويقرا منو وهالشي جائز بالصلاة النافلة فقط اما الواجبة فالافضل ترك ذلك
ومن نصلي 8 ركعات بابا يكمل بس قراءة قران واني اصلي اخر 3 ركعات (الشفع والوتر) لان بابا يكون مصلي وتر بالجامع والرسول ﷺ قال
(( لا وترين في ليلة)) لذلك يصلي بس الوتر الي بالجامع واني اصلي وحدي بالبيت وبعدها نتسحر ونصلي الفجر وننام
اكثر من مرة تميم يجيب عشى لبابا وخطية حتى حلويات يدزولو ويا الفطور من الي يسووهن بالبيت وبابا ما يقبل ياكلها يخليها الي
جان هذا روتيننا برمضان بس بالعشر الاواخر طلب تميم من بابا يقيمون الليل بالجامع ويا الناس وبابا رفض گال من بداية رمضان اقيم بالبيت ومرتاح كلش هناك
وتميم ما ضغط على بابا بس صارو يخلصون صلاة العشاء ويرجعون فورا وصلاة التراويح يصلوها بالقيام هي والشفع والوتر
وقبل العيد ب 5 ايام راح بابا للسوگ اشترى ملابس الو والي رغم اني محد يشوفني بس مستحيل ياخذ الو ويعوفني وبالعكس جايبلي فساتين ثنين مو واحد
وجان جايب حلويات وربطتين عصير ( ابو اللتر ) ويگول نريد هالعيد يكون مختلف عن رمضان الي راح يقصد وضعنا المادي احسن بهواي
وبيوم العيد راح لصلاة الفجر ومن رجع بدل ملابسو ومن بلشت التكبيرات راح لصلاة العيد واني جنت ماخذتلي دوش وباقي بس ابدل ملابسي
دا استمع للتكبيرات ولاحظت صوت واحد كلش عجبني صوتو هادئ وتحس بيه نبرة حزن ضايفة جمال لصوتو من يردد
الله اكبر، الله اكبر، الله اكبر
لا اله الا الله، والله اكبر، الله اكبر ولله الحمد
وكل 5 مرات يردد التكبيرات الفوك السادسة تكون هيج
الله اكبر، الله اكبر، الله اكبر
لا اله الا الله، والله اكبر، الله اكبر ولله الحمد
الله اكبر كبيرا، والحمدلله كثيرا، وسبحان الله بكرة واصيلا
لا اله الا الله ولا نعبد الا اياه مؤمنين له الدين ولو كره الكافروووون
ويرجع يردد التكبيرات الاولى واحس ياخذ عقلي بجمال الكلمات الي ينطقهن يحسسك انك مقصر تجاه الله شگد ما تعبدو
بابا ما رجع للبيت بعد الصلاة فاني سويت ريوگ الي وتريگت وجنت اسمع صوت الباب يندگ لان جهال يريدون حلويات
وگلبي ينعصر ويا كل دگة بس ماگدر اروح افتحو ومرات اسمع بعضهم يگولون هذا بيت الرجال الي عند الشيخ مأمون ( جد تميم )
وبابا ما رجع لليل لان هواي ناس اجو من الجيران والگرايب والمعارف فيروحون ناس ويجون ناس وانجبر هو يبقى هناك
ومعروف بكل عيد عند اهل تميم يسوون غدا للضيوف فتغدى بابا وتعشى وياهم بس اهم شي انو رجع مو كلش تعبان لان زيد وزياد يساعدونو بالگهوة
تخيلو اني ما عايدت بابا لحد ما صارت الساعة 12:30 بالليل وانطاني عيدية 10 الاف رغم رفضت بس اصر علي واخذتهن
وسبب رفضي ان هو اساسا مو مقصر وياي والراتب اكثرو ينصرف علي وماراح استفيد منهن شي بس مع اصرارو وافقت
مرت الايام وحلويات العيد اكلناهن اني وبابا لحالنا بس مرة وحدة اجو يتعللون تميم واخوانو وبابا حطلهم حلويات
ومع مرور الوقت صرت اللاحظ بابا يرجع تعبان من الشغل ومن اسألو يگول مجرد تعب ماكو شي بس يوم بعد يوم يتعب اكثر
اخير شي ترجيتو يروح للدكتور وبالف يا ويلاه لحد ما وافق وراح للدكتور طلع عندو تضخم بعضلة القلب وانطاه علاجات ولازم ما يتعب نفسو
ياقوت: شنو يعني تضخم بعضلة القلب
ادم: شعرفني هو گال هيج واني سويت نفسي اعرفها علمود ما انحرج گدامو
- ههههههههه وخوما شغلتها صعبة
- لا بوية سهلة يگول بس انو القلب يزيد دگتين لو ثلاثة زيادة بالدقيقة ( ما جان يريد يگلي الحقيقة علمود ما اخاف )
- دگتين ثلاثة يتعبنك هيج
- اي لان يبقن مستمرات مو يجن ويروحن
- ايوا طيب انطيت خبر لبيت الشيخ
- لا بعد
- خابرهم انطيهم خبر
- بعدين اروحلهم واحجيلهم
- مو گلك الدكتور ابقى مرتاح
- اعرف بوية واني اروح اگللهم وارجع قابل اروح انقل بلوك وياهم
- مو ما اريدك تتعب
- تطمني باباتي ما اتعب نفسي
- تمام.. بستو بخدو ورحت اسوي الغدا
بابا شاف باقي وقت للغدا وراح للمضيف وتقريبا نص ساعة ورجع گال انطيتهم خبر ورجعت گلتلو عاشت ايدك هو هذا المطلوب
كملت الغدا وتغدينا ورجعت غسلت المواعين ورجعت للغرفة جان بابا متمدد ويباوع للتلفزيون گعدت عند راسو وصرت امسح على شعرو
- تريد تنام
- لا بعد
- ايمتى تحجي للشيخ عني
- ماعرف والله بس مو مطول
- يعني قبل لا يبدا الدوام
- ابمتى يبدا
- 1/10 يبدا الدوام
- وعيد الاضحى ايمتى راح يصادف
- بعد الدوام باسبوع تقريبا
- لعد خليها بعد العيد احجيلهم علمود اخليج يمهم احتمال بين ما اجيب نقلج من بغداد
- شيبقيني يمهم واني لا اعرفهم ولا يعرفوني
- اعرف باباتي بس ماگدر اخذج وياي وارجعج راح تتعبين وتتبهدلين عالفاضي
- هوووووووف ماشي بس المهم ما ابقى مثل السجينة
- اعرف ضغطت عليج هواي بس والله جنت مجبور
- بابا والله مو قصدي الومك او احسسك بالذنب بس قصدي انو شوية اخلص من القيود الي بحياتي بس يا ترى تتوقع راح يتقبلون حقيقة انو بنتك وياك وما حجيتلهم عنها
- اي يتقبلون واذا ما تقبلو اخذج وياي ونرجع لبغداد مو فد مشكلة
- بس انت متونس هنا وشغلك زين وكلشي زين بالانبار
- اعرف بس على فرض زعلو قابل اعوفج بس تطمني ما يزعلون
- تمام
بقينا نحجي بمواضيع مختلفة ومرت الايام وبابا حالتو من سيئ الى اسوء وكل يومين تقريبا يروح مراجعة للدكتور يتأكد من وضعو
ولان جانو يجون وياه تميم او اخوانو بابا ينجبر يقفل الباب من خارج واني ابقى انتظر عند باب المطبخ بين ما يرجعون
ومن اسمع صوت المفتاح يتحرك بالقفل فورا اروح لمكاني وابقى انتظر لحد ما يندگ الحايط واروح لبابا ويطمني عن صحتو
ورغم دا يتعب اكثر واكثر بس الدكتور يگول لان دگات گلبات دا تحاول تنتظم جسمك يتعب وهالشي يدل على تحسن بحالتك
( طبعا هالكلام اسمعو من بابا الي ما جان يريد يخوفني عليه ولا ماكو شخص لا بالطب ولا بالعقل يتقبل هالفكرة هاي )
اني يا غافل الك الله واگول ماطول حجي الدكتور هيج يعني راح بابا يتحسن ويرجع لشغلو ويرجع مثل قبل بوقت كلش قصير
المضيف عافو فد مرة وتميم يدزلو اكلو باستمرار ودائما يخابرو قبل ما يجيب اكل علمود بابا ما يتعب نفسو ويسوي
وجان من يجي يدخل فورا للبيت لان المفروض بس بابا فمن يدخل للبيت اكون اني بمكاني او بالممر انتظرو يروح ومن اشوفو يطلع ارجع للغرفة
ومن اجى عيد الاضحى ما گدر بابا يجيب حلويات او ملابس وحتى ما گدر يروح للمضيف فبالليل اجو هم والجيران على بابا
جنت اسمع صوتهم متجمعين عند بابا هواي حتى صوتهم مو واضح بيهم الي سلمو على بابا وراحو وبيهم الي گعدو شوية
بس كالعادة اخير شي بقو تميم وزيد وزياد عند بابا بس هالمرة بدون دومنة وماطولو هواي بقو شوية وراحو علمود يرتاح بابا
وبسبب مرض بابا حتى العيد ما فرحت بيه بس جان اهم شي عندي يرجع بابا لوضعو الطبيعي وصار عندي شك بكلام الدكتور
لان الي دا اشوفو ان صحة بابا تدهور ويا الوقت مو تتحسن لدرجة صار يومو كلو بالفراش من التعب ما يگدر يمشي نهائيا
لدرجة من يريد يقضي حاجتو اسندو لحد ما يوصل باب التواليت ومن يخلص اسندو لحد ما ينام بفراشو وگوة يحرك رجليه ويمشي
ومن يسبح بقى بالبجامة ويگعد على طبلة الحمام واني اسبحو ومن اخلص اطلع وهو يبدل ملابسو ومن يخلص اخذو لفراشو وامشطلو شعرو وارجع اخذلي دوش
وبعد العيد باسبوع صارت عندو گحة وحتى الدكتور تركو ومن اگلو يگول هو گال ما يحتاج تجيني الراحة بالبيت تفيدك اكثر
گلتلو روح على غيرو گال رحت على 4 دكاترة وكلهم نفس الشي وهذا اضبط واحد بيهم والناس كلها تمدح بيه
وقتها ماگدرت احجي غير شي والمشكلة اني بنت لو ولد جان اخذت التحاليل والاوراق مالتو وافتريت الرمادي كلها وسألت كل الدكاترة
بعد العيد بعشر ايام جان يوم خميس بالليل بابا گال اللبسي عبايتج والنقاب وروحي لمكانج ولا تطلعين الا ادگ الحايط
ياقوت: اروح فهمتها بس العباية والنقاب ليش
- شوية وتعرفين بس لا تطلعين الا اگلج
- باستغراب وتوتر.. تمام
لبستهن عالسريع ورحت لمكاني وشوية وسمعت صوت تميم دخل للغرفة وسلم على بابا وصار يتطمن عليه وگعد يحجي ويا بابا
