رواية بنت الكهوجي الفصل الثامن عشر بقلم احمد
ياقوت : بعد العيد بعشر ايام جان يوم خميس بالليل بابا گال اللبسي عبايتج والنقاب وروحي لمكانج ولا تطلعين الا ادگ الحايط
ياقوت: اروح فهمتها بس العباية والنقاب ليش
- شوية وتعرفين بس لا تطلعين الا اگلج
- باستغراب وتوتر.. تمام
لبستهن عالسريع ورحت لمكاني وشوية وسمعت صوت تميم دخل للغرفة وسلم على بابا وصار يتطمن عليه وگعد يحجي ويا بابا
تميم: مرة من المرات جنا گاعدين بالمضيف واجانا ابو باسم مبين مهموم وحزين حتى اني وجدي وابوي تفاجأنا من وضعو
مأمون: خيرك ابو باسم ليش مهموم
ادم: شيخ اجيت انطيكم خبر انو ماگدر اكمل بالشغل
- ليش عسى ما شر
- والله يا شيخ رحت للدكتور لان مريض وماگدر اكمل بالشغل
- شنو من دكتور وشنو من مرض فهمنا
- راح تفهمون بعدين المهم اني اجيت انطيكم خبر علمود تشوفولكم غير گهوجي وبالنسبة للبيت هاليومين افرغو الكم
- ماكو هيج حجي شغلك محد ياخذو وتبقى بالبيت لحد ما تتحسن وترجع لشغلك وحتى لو تعوف الشغل ما تطلع من البيت وهسا ياخذك تميم لدكتور ثاني ونشوف شنو مرضك
- ما يحتاج دكتور رحت اني وتأكدت وهسا اني استرخص لان الدكتور وصاني ارتاح
- ابو باسم خلينا ناخذك لدكتور ما يصير هيج عالقليلة گوللنا شنو مرضك
- بعدين احجيلكم شيخنا هسا ماگدر احجي اي شي
- هاي هي براحتك ومثل ما گلتلك ننتظرك لحد ما تتحسن
- الله كريم
تميم: طلع ابو باسم وباوع علي جدي وهو مستغرب اني جنت محتار مثلو وماعرف شنو صاير وما جان يشكي من شي قبل
مأمون: بوية تميم خليك وياه دائما شيحتاج لا تقصر وياه حتى اكل اخذلو
تميم: تمام
مرت الايام ومثل ما گال جدي صرت اوديه لمراجعاتو واوديلو اكل بس جنت منتبه انو دائما نظيف والغرفة مالتو نظيفة
جنت اعتقد انو هو يضغط على نفسو علمود ما يتعبنا بس ما حجيت شي كانو فد شي داخلي گال ابقة ساكت وسوي نفسك مو منتبه
ويا الوقت سأت حالتو كلش وجنا من نروح للدكتور ابقى اني خارج لان ما يقبل الدكتور ادخل ويا ابو باسم ويحجون لحالهم داخل
بالفترة الاخيرة كلش تعب وجنت كل ما اشوف حالتو ينكسر گلبي عليه فوگ ما فقير ووحيد مريض وما يگدر يعين نفسو
مرة من المرات ما جان عندي شي بعد ما خلصت عشى جهزت نفسي علمود اروح للمضيف ودگ التيلفون وجان ابو باسم وجاوبتو
ادم: الو
تميم: هلا ابو باسم
- شلونك
- الحمدلله اسأل عنك
- تسأل عنك العافية تگدر تجيني
- ثواني واني يمك
- تميم
- هلا
- وحدك
- باستغراب .. تمام وسكرت منو
الحجية: ها يمة شبيه الرجال
- ماعرف يمة رايح اشوفو هسا
زيد: السلام عليكم
الكل: عليكم السلام
تميم: اني استرخص
زيد: وين
تميم: لابو باسم
زيد: جاي وياك
تميم: الرجال طالبني لحالي
زيد: هههههههههه مو انت ابن الريس
تميم: عدا الشقى الرجال طالبني لحالي وهو حجاها بالحرف الواحد
زيد: باستغراب.. تمام
تميم: رحت على بيت ابو باسم وكالعادة فتحت الباب ودخلت فورا لان هو منطيني الصلاحية انو ادخل ايمتى ما يعجبني
وجان هو حاط باب صغير للحوش مثل مال الغرفة فانزل اليدة مالتو وينفتح فورا مو من الابواب الجبيرة لذلك ما اواجه صعوبة بفتحتو
دخلت للغرفة سلمت عليه وسألت عن صحتو رغم اشوفو گدامي ما يگدر يتحرك گال الحمدلله وفوگها الگحة متعبتو
ادم: تحفظ الامانة يا تميم
تميم: شنو من امانة ابو باسم
- تحفظها لو لا
- بعون الله بس شنو الامانة
- دگ الحايط بايدو
- مافهمت شنو يعني
- هسا تعرف
تميم: ثواني وتفاجأت بمرة واگفة بباب الغرفة لابسة نقاب وعباية ومو مبين كلشي منها وتخبلت بعد اكثر من گال ادم دخل بوية
جنت فاتح عيوني على وسعهن ومو مصدگ الي دا اشوفو وماعرف منين اجت هالمرة ودخلت هي گعدت عند راس ادم
لاحظتها خايفة وحصرت نفسها يم ادم وجان جسمها كلو يرجف من الخوف ومدلها ايدو باسم ومسكتها ومبين من كف ايدها صغيرة بالعمر
ياقوت: من دگ الحايط بابا فهمت انو يريد يحجي لتميم عني وصرت امام الامر الواقع بس ليش يريدني اطلع گدام تميم
رحت للغرفة ومتوترة توتر مو طبيعي اول مرة انحط بهالموقف هذا من دخلت جنت منزلة راسي وحتى ما شفت شكل تميم
تميم: ابو باسم منو هاي ومن ايمتى هي هنا ومنين اجت ووين جانت
ادم: هاي ياقوتتي هاي بنيتي وفلذة كبدي هاي دنيتي الي عايش علمودها وهسا راح احجيلك كلشي عنها
- احجيلي
- بعد وفاة زوجتي بكم يوم توفى ابني الجبير الي جان من اصحاب متلازمة داون وبقى يمي بس ياقوت وجنت مستعد اسوي اي شي علمودها
بعد وفاة باسم رجعت لشغلي القديم الي هو عمالة وبين مدا اصعد كاشي عالسطح اجى واحد ملثم ومبين مو من العمال
الشخص: انت ادم ابو باسم
ادم: اي حبيبي اني
- اني جايك بخبر وماعرف اذا لحگت عليه لو تأخرت
- تفضل احجيه
- اكو مجموعة شباب ناويين يدخلون بيتك علمود بنتك
-مسكتو من ياختو.. شنو قصدك ولك
- مو اني الي راح ادخل وبالنسبة للولد الي خاطبها فنصيحتي لا توافق عليه ترا راح تذب بنتك بالنار اذا وافقت
- بعصبية.. احجي شنو قصدك قبل ما انهي حياتك
- اني فاعل خير فبدال ما تتعارك وياي الحگ على بنتك قبل ما يغتصبوها لان مقررين ينفذون اليوم لان طلعت انت للشغل
من كمل كلامو طلعت ركض للبيت ومن بعدها ما شفتو مرة ثانية ورجعتلي الحياة من شفت ياقوت گاعدة بالغرفة تقرا قران
بعدها جنت ضايع لا اگدر ابقى گاعد بالبيت ولا اگدر اشتغل واني اعرف بيهم يريدون يدخلون على ياقوت ومن الاستعجال حتى ما عرفتهم
ومثل ما گال الولد رفضت الي خطبها ومن سمعت بالشيخ فاضل يريد گهوجي رحت اشتغلت يمو علمود ابعد ياقوت عن بغداد
وقررت اخفيها لحد ما اتأكد انها بامان وبسبب المشاكل بيني اني ومعتصم قررت اعوف الشغل ومن سمعت بالگهوجي عندكم ميت اجيت هنا
وهم قررت اخفيها لان ما جنت اعرفكم وخايف عليها بس اليوم صار لازم تعرفون بوجودها واي شي يصيرلي هي امانة يمكم
تميم: جنت منخرس ماعرف شحجي بعدني متخبل
ادم: هاي قصة بنتي ياقوت وهذا السبب الي خلاني ما اسكن بالغرفة الي يم المضيف عندكم او عند الشيخ فاضل
- منو يعرف بيها غيري
- محد يعرف بيها بالانبار.. وگح گحة كلش قوية وانطاه موقع قبر باسم وامو
- بخربطة.. بس اقصد شنو....... قاطعني
- تميم عندي طلب
- اطلب
- لا تقنعوها تنزع النقاب اذا ما هي تقتنع من يمها
- هاي هي مثل ما تريد
ياقوت: جان بابا يحجي واني منصدمة من الحجي وهسا فهمت كلشي صاير وياه وسبب اختفائي
ادم: بوية ياقوت
ياقوت: بصوت شبه مكتوم بسبب وجود تميم.. ها
- ابقي يم تميم او يم اهلو لان ماگدر اخليج يم غيرهم
- بقيت ساكتة وصارت تنزل دموعي واني اسمع كلامو وتخبلت اكثر من كمل كلامو
- اشهد ان لا اله الا الله واشهد ان محمد رسول الله
تميم: ما تحملت الموقف وطلعت خارج الغرفة
ياقوت: بدون وعي وبصوت عالي.. لا لا لا با بابا ببابا لا لا فدوة بابا بابا لا لا لا بابا لا لاااااا لااااااا باباااااااا لاااااااا بابا لا بابااااااااااا
بابا بابا فدوة لا تعوفني ما الي غيرك بابا لا لا تعوفني الله يخليك باباااااااا باباااااا لا تعوفني باباااااااا باباااااااااا
مسكت راسو وحجيت بهدوء.. بابا بابا بس اسمعني اني اااننن اننني وووحدي هسا للا لاا لااا تتت تتعوووف لا تعوفنننيي لللحالليي
انتتت انننت ممو گل گلت اانن ااانو ماگدر ابببب ابقى للل لحححا للللحالي للل لللييش تعوفنييي هسسااا هااا ليش تعوفننني
ارتفع صوت بجيي.. بابا بابا فدوة لا تعوفني وحدي لا تروح ويا باسم وماما الله يخليك بابااااا بابااااا
تميم: جنت واگف خارج وبسبب صوتها ماگدرت احبس دموعي وفوگها حزني على ابو باسم هالرجال شلون تحمل كل هالضغوطات هاي
طلعت تيلفوني وخابرت ابوي گلتلو جيب امي وتعالو لبيت ابو باسم واستغرب كلش گلتلو من تجي هنا افهمك بس تعالو بسرعة
وسكرت منو واحس صوتها يحرگ گلبي وهي تصيح ابوها الي ماراح يرجعلها واحس بصوتها حزن وضياع وخوف مو طبيعي
شوية واجو ابوي وامي وجانت امي لونها مخطوف لان صوت البنية طالع خارج البيت ابوي گال بسم الله الرحمن الرحيم شنو هالصوت تميم
تميم: يمة اخذي بنت ابو باسم وياج للبيت
ثنينهم بلحظة وحدة: بنتوووو
تميم: اي يمة بنتو ما تسمعين صوتها البنية روحها فرفحت
نصير: وابو باسم شبيه
-انطاك عمرو وخلالنا هالبنية امانة يمنا
- لا حول ولا قوة الا بالله
ياقوت: فجأة انسحبت من بابا وتخبلت فوگ ما انحرمت من ماما وباسم يريدون هسا يحرموني من اخر شخص بقى الي
الحجية: گومي وياي بنيتي
- لا لا فدوة عوفيني فدوة والله ما اريد اروح فدوة لا تحرموني منو هو الوحيد الي باقيلي ابوس ايدج خالة عوفيني والله ماگدر اعوفو
- توكلي بالله يا بنيتي ابوج انتقل لرحمة الله
- لا لا والله لا بابا ما يعوفني هو هو گال ما اعوفج ابوس ايدج لا تحرميني منو
- صارت تبجي وياها.. بنيتي ابوج انتقل لرحمة الله واكرام الميت دفنو يا ماما ما تريدين تكرمين ابوج
- ادفنوني وياه اي اي ادفنوني وياه ما اريد اعيش بعدو فدوة ادفنوني وياه ولا تحرموني منو ادفنوني وياه الله يخليكم
سحبت راسي لحضنها وهي تبجي واني احس نار محتركة بگلبي ودا تحرگ بي والله لا يشوف احد الاحساس الي جنت احس بيه
تميم: يلا يمة اخذيها وروحي للبيت الولد اجو
ياقوت: ما اروح لا فدوة خلوني يمو
الحجية: ما يصير بنيتي هيج تعالي وياي للبيت.. وسحبتني
ياقوت: لا عوفوني عوفونيييييييي باباااااا باباااااااا بابا لا تعوفني بابااااااا لااااا فدوة بابا لا تعوفني ما الي غيرك عوفوني ابوس ايديكم
جانت الحجية تحاول تسحبني وياها لان بقائي يضرني بس اني تخبلت ومو مقتنعة ان بابا يعوفني مستحيل يعوفني ويروح
سحبوني من البيت وصراخي ترس المنطقة بحيث اهل المنطقة طلعو كلهم على صوتي ومايعرفون منو هاي الي اهل تميم ماخذيها لبيتهم
جنت اتوسل بام تميم تعوفني ارجع لبابا بس ما عافتني لمصلحتي من وصلنا بيتهم جانو اهل تميم كلهم واگفين مستغربين من الوضع
صاحت ام تميم لاية وياسمين علمود ياخذني للبيت جان النقاب مليان دموع من گد ما بجيت على بابا گوة گدرن اية وياسمين يدخلني للبيت ومن دخلت ماعرف شصار بعد
تميم: اخذنا ابو باسم للمسجد القريب غسلناه وكفناه واتفقنا ثاني يوم الصبح ناخذو لبغداد ندفنو هناك يم زوجتو وابنو
انطينا خبر للناس ان الصلاة عليه راح تكون باجر بعد صلاة الفجر علمود الي يريد يحظر الصلاة قبل ما ناخذو على بغداد
جانو الناس يسألون عن البنت الي شافوها بس ما حجينا لاحد واخذنا ابو باسم حطيناه بالمضيف وطلعو الي جانو موجودين بقيت بس اني
گلتلو الله يرحمك يا اخوي وصديقي وامانتك بايدي امينة إن شاء الله واوعدك راح اكون سند الها طول عمري وما اخذلك ولا اخذلها
ماعرف اذا هسا تدري بالي دا احجيه لو لا بس اذا تسمعني كون متأكد انو راح تكون بنتك اهم عندي من اهلي والله يرحمك مرة ثانية
بعدها رحت للبيت سألت عالبنية گالو من اجت فقدت الوعي واخذوها للغرفة واية يمها وصعدت الها دگيت الباب گالت اية ادخل
دخلت جانت البنية مكرفصة على السرير وتبجي وتشهگ گلتلها ابوج بالمضيف اذا تريدين......
قبل ما اكمل كلامي طلعت ركض بحيث حتى ما لحگنا اني واية نمسكها او نحجي وياها لحگتها بس صارت صاروخ من سرعتها
اني على سرعتي ونشاطي ما لحگتلها لان الحرگة الي بگلبها مو مثلي اكيد ومن وصلت المضيف فورا فتحت الباب ودخلت
جان المضيف فارغ فمن دخلت هي اني بقيت خارج علمود انطيها شوية خصوصية ويا ابوها فاخذت كرسي وگعدت خارج المضيف
ياقوت: سويتها يا بابا مو سويتها وتركت بنيتك سويتها وتركت ياقوتتك لحالها هسا منو الي منو يضحكني منو يهتم بي
عبالك اكو احد يعوضني عنك وتتركني امانة يمهم كل هاي اهون عليك تتركني وتروح مافكرت شلون اكمل حياتي بدونك
تدري شنو المشكلة بابا المشكلة اني ماگدر ازعل منك لهذا عفتني.. حطيت راسي على صدرو من فوگ الكفن وانفجرت بالبجي
تميم: بقيت گاعد يم المضيف وهي تأخرت اخير شي رحت للبيت جبت اية علمود تشوفها ليش تأخرت طلعت اية گالت فاقدة الوعي
ورحت بسرعة جبت السيارة واجت وياي امي وسندن البنت هي واية واخذتها فورا للمستشفى واخذناها فورا عالطوارئ
دخلت يمها الدكتورة وطولت هواي بين ما طلعت گالت البنت صاير عدها انهيار عصبي كلش حاد لازم تنتبهون الها ممكن تتأذى اذا بقت هيج
وبعدها دخلت امي عدها واني اتصلت على زيد علمود يجي بمكاني وبين ما اجى زيد ورجعت اني جان مو باقي هواي لصلاة الفجر
اخذنا ابو باسم حطيناه بالجامع ومن صلينا الفجر صلينا عليه واخذناه لبغداد احنا وعمامي وكم بيت من الجيران الي يعزونا كلش
جانو ابنو وزوجتو بمقبرة الشيخ معروف الكرخي فتواصلنا وياهم علمود يحفرون القبر بين ما نوصل وهم ما قصرو ومن وصلنا جان القبر جاهز
دفناه وقرينا عليه الفاتحة ودعينالو بالرحمة ومن رجعو الي موجودين بقيت گاعد عند القبر شوية افكر بكلامو البارحة وببنتو الي عفتها بالمستشفى
ما جان عندي كلام احجيه لان حجيت كلشي البارحة بس احس گعدتي يمو شوية ريحت نفسيتي اخير شي گلت الله يرحمك يا ابو باسم ويرحم جميع اموات المسلمين
انداريت اريد ارجع وانتبهت لابوي انطى حساب الدفان ورجعت ركبت السيارة وتوجهنا للرمادي وجانو وياي ابوي واخوي رشيد
اتصلت على فاضل اخوي گلتلو ابدو باجرائات العزا بين ما نوصل گال تمام ورجعت خابرت زيد گال البنت بعدها ما گعدت والدكتورة تگول باجر تگعد
وبين ما رجعنا انتشر الخبر بالمنطقة كلها واكثر شي ساعد بانتشار الخبر هو وجود ياقوت لان الناس مستغربين انو منين اجت هالبنت فجأة
والخبر انتشر لدرجة انو حتى الشيخ الي جان يشتغل عندو ابو باسم سمع بالخبر واتصل عزاني وگال باجر امركم إن شاء الله
جنت محتار شعجب ما جاب طاري انو ليش ما گلتلو من مريت عليه بس گلت من يجي باجر الله كريم ولكل حادث حديث
شكرا لزيارتكم عالم روايات سكيرهوم
