رواية بنت الكهوجي الفصل التاسع عشر بقلم احمد
تميم : وبين ما رجعنا انتشر الخبر بالمنطقة كلها واكثر شي ساعد بانتشار الخبر هو وجود ياقوت لان الناس مستغربين انو منين اجت هالبنت فجأة
والخبر انتشر لدرجة انو حتى الشيخ الي جان يشتغل عندو ابو باسم سمع بالخبر واتصل عزاني وگال باجر امركم إن شاء الله
جنت محتار شعجب ما جاب طاري انو ليش ما گلتلو من مريت عليه بس گلت من يجي باجر الله كريم ولكل حادث حديث
من وصلنا البيت بلشنا بالعزا بس لان اول يوم ولان يعرفون الدفنة ببغداد فما اجو ناس هواي والساعة 10 بالليل رحت للمستشفى اني وزياد
تطمنت على وضع البنت وخليت زياد بمكان زيد ورجعنا للبيت بس تعبان تعب ما صاير مجرد حطيت راسي عالمخدة نمت
ثاني يوم گعدنا من وقت وتعرفون انتو العزا شگد تصير بيه خبصة وصارو الناس الي سمعو كلهم يجون يعزون ومن ضمنهم الشيخ الي اشتغل يمو ابو باسم
من شفت الوضع يسمحلي والناس كلهم موجودين ومن ضمنهم الشيخ وگفت بنص الديون گلتلهم بصوت عالي صبحكم الله بالخير
بعد ما ردو .. گلت ابو باسم انتقل لرحمة ربو والي ما جنا نعرفو ان عندو بنت واعتقد شافوها بعض الجيران من اخذناها لبيتنا البارحة
ليش خفاها عن الناس الله اعلم بس حاليا البنت امانة يمنا والحاضر يعلم الغايب اي كلام زايد عن الي گلته صاحبو يتحاسب عشائريا
انتبهت للشيخ مثل المصدوم كملت كلامي وما بقيت مدقق وياه علمود لا يحس اكو شي وهم علمود لا يشوفوني الناس وعبالهم الشيخ سبب باخفاء البنت
رجعت لطرف المضيف وشفت الزلم صارو كل واحد يحجي ويا الي يمو واكيد كل واحد يحط سبب من يمو وبهالاثناء خابرني زياد
زياد : ها تميم وين انت
- بالمضيف ليش اكو شي
- البنت گعدت قبل ساعة
- شلونها
- بالضيم دموعها ما نشفت ولحد الان ما حجت ولا كلمة بس صافنة ودموعها تجري
- ايمتى تطلع
- مانعرف لان حاولنا نجيبها ومن وگفت فقدت الوعي والدكتورة گالت عوفوها ترتاح باجر او بعدو طلعوها
- تمام اني راح اجيك بالليل بس اذا تعبان خابر زيد يبقى بمكانك
- خوش
- سكرت وبقيت محتار لا اگدر اعوف العزا واروح ولا تفكيري مرتاح لان تبقى بالاول والاخير امانة يمي
بقينا بالعزا لليل من خلصو الزلم اخذت سيارتي ورحت وادعي بگلبي انو متحسنة علمود ناخذها للبيت ونهتم بيها
من وصلت رحت فورا لغرفتها جان زيد گاعد خارج الغرفة وماسك تيلفونو گلتلو ها اكو جديد گال لا بعد ودگيت الباب وطلعت امي
الحجية : ها يمة تميم
- اخذيلي طريق اريد احجي وياها
- ثواني البسها النقاب
- تمام
- بعد شوية .. يلا يمة ادخل
- دخلت جانت لابسة الخمار ومبين دموعها دا تنقط من تحت الخمار گعدت بمسافة عنها گلتها ياقوت تگدرين تحجين وما جاوبت حتى ما حركت راسها
بقيت احجي وياها شوية على امل انها ترد بس لا حياة لمن تنادي اخير شي گلتلها تگدرين توگفين ومسكت ايدها امي علمود تسندها
بدون اي كلام وگفت على رجليها بس مبين عليها گوة واگفة واحتراما الها ما جنت اگدر اسندها اني بس تأكدت انها تگدر تمشي واخذناها ويانا
من وصلت السيارة معناها هاي هي ورجعنا للبيت وطول الطريق ساكتين ما بينا احد فتح موضوع نهائيا وهالشي احسن علمود ياقوت ما تنزعج
اول ما وصلنا البيت اجن اية وياسمين سندن ياقوت واخذنها عالغرفة ووصيت اية توكلها اي شي تسند طولها بيه ورحت لغرفتي
من التعب بس حطيت راسي عالمخدة نمت وماعرف شگد مر وقت وفززني صوت اية العالي من نص نومي
اية : تميييييييممممم
- شبيج شكو يا ساتر
- ياقوت ياقوت ماعرف وينها
- شنو ما تعرفين وينها مو جبناها من المستشفى
- اي اي بس جنت بالغرفة وياها وغفيت وماعرف وين راحت گلبت البيت واني ادورلها وماكو
- تمام جايج
گمت عالسريع بدشداشة النوم دورنا بالبيت كلو ماكو فص ملح وذاب وماعرف شلون تذكرت بيت ابوها وطلعت ركض جان الباب مفتوح
رحت بسرعة اتأكد موجودة لو لا اول ما وصلت البيت سمعت صوت تنهدات بالغرفة طبيت عليها جانت نايمة بفراش ابوها
منظرها يكسر الخاطر نايمة مثل وضع الجنين ببطن امو وحاطة ملابس ابوها على وجهها وتبجي وتشهك ومن شفتها هيج احتاريت شسوي
طلعت من الغرفة گعدت بالحوش وشوية ارتاحيت انها موجودة بس مكسور گلبي عليها شوية واجت امي وجهها اصفر من خوفها على ياقوت
ومن سمعت صوت شهگتها ما حجت وياي دخلت فورا الها سمعت بجيها زاد وتشكي لامي على فقدان والدها وصوتها كلش مبحوح من البجي
شوية وطلعن هي وامي ولان جانت جاية بدون خمار ما انداريت عليها مشيت فورا گدام ومن طلعن قفلت الباب ورجعنا للبيت
اهلي الي ببيت ابوي جانو نايمين ما يعرفون بشي فما جان احد منهم موجود بس اية جانت گاعدة بالحوش وتبجي من الخوف
من جهة خايفة ان ياقوت يكون صايرلها شي ومن جهة خايفة من ردة فعلنا انو نعصب عليها وتعرفون بهيج موقف الواحد يبقى يلوم بنفسو
من شافت ياقوت اجت تركض عليها واني كملت طريقي للغرفة وكملت نومتي بس من الموقف كل شوية افز من النوم واطلع من الغرفة اتأكد ان ماكو شي
من صارت الدنيا صبح تريگت وگلت لابوي واخواني يهتمون بالعزا واني رحت للجامعة وجان دوام روتيني مجرد عزوني الدكاترة بوفاة ابو باسم
وجانو كلش فضوليين علمود يعرفون قصة ياقوت بس گلتلهم الموضوع امانة يمي ماگدر احجي بيه ومن شافوني قافل عافوني
بس حجيتلهم على وضع ياقوت وخايف انو ترجع تتخربط لو يصير بيها شي واخسرها واكون مو صاين الامانة الي بقت يمي
وحدة من الدكتورات اقترحت علي انو اتفق ويا دكتورة خاصة تجي يوميا للبيت تجيك وضعها وصحتها وتنطينا الخلاصة
جانت فكرتها كلش حلوة والاحلى من هذا انها تعرف دكتورة من گرايبها تگدر تحجي وياها واتصلت عليها مباشرة
فتحت السبيكر وحجيت وياها عن وضع ياقوت واتفقت وياها گالت راح اجيكم اليوم بالليل وبعد باجر ابلش وياها من النهار
گلتلها كلش ممتاز وانطيتها العنوان ورقمي علمود تخابرني اذا تيهت العنوان ومن كملت دوامي رجعت للبيت وانطيت خبر لاهلي علمود الدكتورة
الساعة صارت 8 اتصل علي رقم غريب وجاوبت طلعت الدكتورة واگفة گدام البيت وطلعت استقبلتها ودخلتها داخل
راحت ويا ياسمين على غرفة البنات واني وامي بقينا بالصالة ننتظرها تخلص وترجع وفعلا بعد نص ساعة نزلت هي وياسمين
ياسمين راحت للمطبخ تجيبلها الضيافة وهي اجت گعدت يمنا وفورا حجت وياها امي
الحجية : ها دكتورة بشرينا
الدكتورة : والله ماعرف شحجيلكم البنت منهارة داخليا كأنها قطعة زجاج مكسورة وما تتصلح الا اذا الله راد تتصلح
اني ما اقصد تهملوها لو تخافون عليها بس لازم تهتمون باكلها وشربها اهم شي حتى لو ما تقبل تجبروها لان عدها سوء تغذية كلش حاد
اني شكلتلها مغذي بس ما تگدر تعيش عالمغذيات لذلك حاولو تنطونها اكلات خفيفة مثلا شوربة او البان خالية من الدسم
الحليب والبيض السلگ كلش مفيدات الها بس الافضل تاخذونها لدكتورة نفسية علمود تگدر تتفاهم وياها وتخفف عليها الحمل
الحجية : دكتورة البنت فقدت ابوها مو مخبلة
- اعرف خالتي حشاها اني ما گلت مخبلة واصلا احنا العراقيين ماخذين فكرة عن طب النفس على انو بس للمجانين وهالشي غلط
الدكتورة النفسية راح تعرف تخليها تحجي الي بگلبها تخليها ترجع تثق بنفسها وترجع تنسجم ويا الحياة مرة ثانية
ما اكذب عليج واگلج مثل قبل لان الي صار وياها راح يبقى بيها لاخر عمرها بس عالقليلة تگدر تتعايش وياه
تميم : يعني نجيب دكتورة نفسية افضل شي
- اي نعم جيبولها دكتورة نفسية واني استرخص وبعد باجر ارجعلكم وراح ابقى اجيها بالنهار افضل من الليل
تميم : تمام دكتورة مشكورة
- العفو
الحجية : دكتورة تحتاج علاجات لو لا
- كتبتلها مقويات والافضل انها ترجع تاكل احسن من العلاجات
الحجية : تمام
تميم طلعت وياها وبقت تحجي وياي علمود الدكتورة النفسية وفائدتها لياقوت ومن راحت بدلت ملابسي وطلعت
اول شي مريت لصيدلية اخذت العلاج الي كتبتو الدكتورة وصرت اسأل عن الدكاترة النفسيين الى ان لگيت 3 بنفس المكان
بس جانو ثنين زلم ووحدة مرة فاكيد ماراح اخذ زلمة لياقوت واتجهت للدكتورة جانت تريد تعزل العيادة وتروح للبيت واستأذنت منها ان اخذ 5 دقايق من وقتها
الدكتورة : تفضل اخي شنو مشكلتك
تميم : دكتورة المشكلة مو وياي ويا بنت تخصني
- طيب احجيلي مختصر
- البنت فقدت اهلها كلهم بالبداية امها وبعدها ب 10 ايام تقريبا اخوها وقبل كم يوم فقدت ابوها وحاليا البنت بين الحياة والموت
جبنا الها دكتورة ونصحتنا نجيب دكتورة نفسية وجيت عليج
- تمام تگدر تجيبها باجر لو لا
- والله يا دكتورة حتى مشي گوة تمشي لان مدا تاكل واريد نلحگ عليها قبل ما تموت واذا اجيبها راح تصير كلش زحمة علينا
فرايي تجين انتي وبالنسبة لتكاليف السيارة اني اتكفل بيهن واطلبي السعر الي يناسبج وإن شاء الله ما نختلف على شي
- اليوم تأخر الوقت ماگدر اجي
- اني ما اريدج تجين بوقت مو مناسب انتي اختاري الوقت الي يناسبج وتعالي علمود تاخذين راحتج وما تستعجلين
: تمام باجر إن شاء الله اني يمكم
- تمام (العنوان) وهذا رقمي اذا تيهتي البيت
- تمام
- يلا استأذن وشكرا عالوقت الي انطيتيه الي
- ولو واجبي الله وياك
طلعت من يمها ورجعت للبيت انطيت العلاجات لامي وحجيت وياها عن الدكتورة النفسية والاتفاق گالت عاشت ايدك
من تأخر الوقت رحت نمت ومن بعدها محد اجى للعزا بعد لان المتوفي الگهوجي مو احد من اهلي والجادر شالوه اهلي واذا صار واجى احد نستقبلو بالمضيف
بالنسبة الي اني واهلي رجع روتيننا طبيعي بس مجرد خايفين على ياقوت وباقي التفاصيل بحياتنا رجعت مثل ما جانت
ياقوت : بعد وفاة بابا حرفيا ما بقت روح بجسدي احس نفسي مجرد جسد لا روح لا سعادة لا احلام لا طموحات لا شي نهائيا
شي واحد موجود وهو الذكريات والم الفقدان الي اكلني اكل كأنو سرطان انتشر بجسمي كلو ودا ينخر نخر بجسمي والمشكلة ماكو حل
صحيح عايشة ببيت اهل تميم بس تخيلو ما ادري بالدنيا لدرجة حتى شكل اية مو حافظتو بس اعرف انو اكو بنية وياي طول الوقت
بعد ما اجت الدكتورة بالليل بيوم اجت وحدة غيرها جانت الدنيا بداية العصر بس بوقتها ما جنت ادري شگد الساعة
وصلتها ياسمين للغرفة ومن دخلت طلعت اية وگعدت مقابيلي جانت لابسة ملابس عادية مو ملابس دكتورة حتى استغربت منها
طلعت دفتر من جنطتها وبدت تكتب بدون ما تحجي وياي واخذتلها تقريبا 5 دقايق وهي تكتب وبالاخير رفعت الدفتر ووجهتو الي وگالت شنو رايج
جانت كاتبة اسم ياقوت بطريقة من صدگ تخبل وراسمة وياه زخارف بحيث احسن خطاط ما يكتب الاسم مثل ما هي كتبتو
الدكتورة : تفضلي .. مدت ايدها وجانت بيها كاكاو ابو الربع
ياقوت : لا رد
- ترا ما يرد الكريم الا البخيل والرسول ﷺ جبر بخاطر صحابي وراح اكل عندو بالليل علمود يفرحو بقبول العزيمة
- رغم احب السوالف الي تحجي عن الرسول بس ماعرف ليش هاي الانسانة حسيت دمها ثگيل كلش واخذت الكاكاو بس علمود تروح بسرعة وما اكلتو بس اخذتو منها
- هسا نبدي ويا بعض اسمي حنان واني راح اگون صديقتج واريدج تحجين كلشي بگلبج الي
