رواية بنت الكهوجي الفصل العشرون 20 بقلم احمد

الدكتورة : طيب عندي فكرة اليوم لا تحجيلي عن اي شي يضوجج اليوم اريدج تحجيلي عن طفولتج وحياتج ويا اهلج قبل 

ياقوت : تمام .. ماعرف ليش وافقت بس حسيت نفسي اريد احجي وافرغ كلشي بگلبي 

سكتت شوية وكأني دا ارجع بالذكريات لطفولتي للايام الي جنت انام واگعد بدون هم وحزن بدون خوف وقلق بدون تعب وبجي 

جان اكبر احزاني من ماما تجبرني انام واني ما اريد انام اريد ابقى العب ويا باسم وهو نفس الحالة بس ماما ما تحب تخلينا نسهر 

مجرد تذكرت ذيج الايام بلشت دموعي تنزل وبلشت اشهگ الى درجة ما گدرت احجي شي اخير شي حطيت ايديني على وجهي وانفجرت بالبجي 

الغريب ان الدكتورة ما تقربت مني ولا واستني مثل باقي الناس الي يشوفون شخص ثاني يبجي بقت هادئة وگاعدة الى ان تعبت من البجي وسكتت لحالي 

الدكتورة : تعرفين ان البجي مثل المسكن للاحزان لذلك ما حبيت اخليج تسكتين بسرعة علمود تفرغين اكبر طاقة سلبية ممكنة 

واعرف انو بعد كل هالبجي جسمج تعب وعقلج هم تعب بس تحمليني شوية واحجيلي الي تگدرين عليه وما اطلب منج اكثر من طاقتج 

ياقوت : من هدأت وشوية راحت مني الشهگة بلشت احجي وخلال كلامي مرات اضحك ومرات احزن واني احجيلها ماضيي 

جانت دموعي كل شوية ينزلن وامسحهن واحجي دقيقة لو دقيقتين وينزلن مرة ثانية ولان ما قاطعتني الدكتورة اندمجت بالكلام 

جان كلامي كأني دا اتذكر فقط مو احجي ذكرياتي لشخص الى ان وصلت لكلامي من گلت لماما من باجر اريدج ترتاحين وبعد ما تشتغلين شي 

قبل ما انطقها سكتت وكأني صحيت على نفسي وتجمعت الدموع بعيوني وانتبهت للدكتورة تباوعلي وساكتة وهادئة كلش 

الدكتورة : تحبين تكملين 

ياقوت : هزيتلها راسي بمعنى لا 

- تمام اليوم يكفي الي حجيتيه كلش كافي بس اريدج توعديني بوعد من صديقة لصديقتها 

- شنو 

- اريدج تگومين بعد ما اطلع تسبحين علمود شوية يصير نشاط بجسمج وتتوضين وتصلين الصلوات الي فاتتج كلهن ومن اليوم لا تتركين الصلاة نهائيا 

وهاج هاي الورقة بيها رقمي اي وقت تحبين تحجين وياي راح اكون كلي اذان صاغية اي شي يصير وياج تگدرين تحجينو الي واعتبري سرج ببير 

- ماعندي تيلفون 

- مع ذلك احتفظي بيه ممكن تتصلين من اهل تميم واني ماراح اتأخر عنج راح ارجعلج باقرب وقت علمود تكمليلي قصتج 

- تمام 

- ياقوت لا تنسين اني وياج واهل تميم كلهم وياج انتي مو لحالج وراح نبقى كلنا وياج ومستحيل نعوفج بس نريدج تبقين قوية لخاطرنا 

ومثل ما گلتلج قبل الي مريتي بيه صعب كلش وماكو انسان ما يتأثر بالي صار بس توكلي بالله لان محد يفيدج غيرو 

وتذكري ان الله لا يحمل نفس الا مافي وسعها يعني ربنا يعرفج قوية وتتحملين لذلك دا يختبرج ومن تصبرين وتتوكلين راح يحبج كلش ونيال الي يحبو ربنا 

وهسا اعوفج ترتاحين واسترخص منج اذا ماعندج شي تضيفينو للي حجيناه 

- شكرا للنصيحة وإن شاء الله ما اعوف الصلاة بعد 

- إن شاء الله حبيبتي يلا مع السلامة 

- مع السلامة 

من طلعت بديت اراجع كلامها براسي ونصايحها وتشجيعها الي وحاسة انو راح يكون كل تعبها بمهب الريح لان مستحيل اگدر اتأقلم 

دخلت اية ولاول مرة من اجيت هنا اركز بشكلها وملامحها جانت ملامحها طفولية وعيونها بيهن برائة مو طبيعية بالاخص من تكون حزينة 

اية : تگدرين تحجين 

ياقوت : اي 

- شرايج نطلع للحديقة شوية تغيرين جو 

- اريد اسبح واصلي 

- تمام هاي ملابسج بالكنتور واني راح انتظرج هنا بين ما تخلصين 

- تمام 

گمت اخذت ملابس ودخلت للحمام مجرد نزل الماي على راسي انهالت علي الذكريات من كل جهة وكأنو الماي جان سبب انو ترجعلي الذكريات 

جنت اقاوم بكل ما عندي من طاقة انو ما ابجي بس احس حتى گلبي يوجعني من گد ما شعور الفقدان اثر بي 

من كملت سبح توضيت علمود اصلي ومن طلعت جانت اية گاعدة عالسرير وماسكة بايدها مشط ومراية صغيرة وزيت شعر 

اية : تعالي امشطلج شعرج 

- خلي اصلي بالاول بعدها امشط 

- تمام براحتج 

لبست ازار الصلاة وفرشت السجادة وبلشت بالصلاة وما جنت اريد ابجي بالصلاة علمود لا تبطل الصلاة وانجبر اعيدها مرة ثانية 

وخلال الصلاة تذكرت ان اقرب ما يكون العبد لربه عند سجوده وگلت بگلبي ادعي لاهلي واقاوم علمود ما ابجي مثل من قاومت بالحمام 

تخيلو نفسكم بمكاني بنت بعدني مراهقة عايشة ويا ناس كلهم غربة عني وما صارلي كم يوم من فقدت اخر شخص الي بالحياة 

سجدت واول ما گلت اللهم انفجرن الدموع من عيوني وكل محاولاتي لانو ما ابجي بأت بالفشل وبدت الشهگات تتلاحگ من حلگي 

جنت اريد اترك حتى الدعاء بس المهم اكمل الصلاة ماگدرت اخير شي قطعت صلاتي وحطيت ايديني على وجهي واجت اية حضنتني 

جنت اردد كلمة بابا بس تخيلو مادري بنفسي واني ارددها وجنت ارددها بصوت عالي مو بصوت ناصي لدرجة ام تميم سمعت صوتي وهي بالطابق التحت 

الحجية : بسم الله الرحمن الرحيم شبيها ياقوت 

اية : جانت تصلي وفجأة انفجرت بالبجي 

- حضنت راسي .. استهدي بالله بنيتي گولي يا الله 

ياقوت : مو گادرة اتحمل والله راح اموت 

- بعيد الشر عنج بنيتي توكلي بالله وتعالي وياي ننزل سوا تحت اريد احجي وياج شوية روحي يمة اية خابري تميم من جهازي انطيه خبر ان ياقوت بالصالة 

( جانت تقصد ان ما يجي تميم لان ماراح اكون لابسة النقاب وهم يعرفون ان بابا موصي تميم ان ما اعوف النقاب الا بارادتي اني ) 

هدأت شوية بس بقت الشهگة لازمتني واخذتني وياها تحت حتى الازار مال الصلاة ما نزعتو جان بيتهم من صدگ تحفة فنية من گد مو حلو 

گعدنا عالقنفة بالصالة وقبل ما نحجي اجت يمنا ياسمين بايدها صينية الجاي وصبتلنا وگعدت مقابيلي هي واية 

الحجية : شوفي يمة ياقوت اعرف الكلام ماراح ينسيج الي صار مهما حجينا ومهما سوينا بس ممكن نهون عليج من الموضوع شوية 

( ملاحضة : الحديث الي راح تگولو ام تميم مغلوط وما الو اساس من الصحة فما اعرف منين سامعة الحديث هي فوجب التنبيه ) 

الرسول ﷺ قال ( لو اطلّع ابن ادم الى الغيب لم يكن سيختار الا ما اختاره الله له ) يعني ربنا لو اطلعج على الغيب راح تختارين الشي الي دا تعيشيه 

فقدان اهلج صعب كلش وما يتحمل الموضوع الا الي الله ينطيه صبر ويكون ايمانو قوي بس اكو هواي امور لو صايرة وياج راح تتمنين انها مو صايرة 

لنفرض ابوج الله يرحمو متوفي قبل امج وبقيتي انتي وامج واخوج وحدكم يا ترا شلون راح تگدرون تعيشون وتكملون حياتكم 

تخيلي وياي تدخلين للغرفة تشوفين امج واخوج ملابسهم قديمة ووجوهم يابسة من الجوع وباقين جلد وعظم لان ماعندكم احد يصرف عليكم 

تدرين هذا بحد ذاتو اصعب من الموت بالف مرة ومو بس انتي تتأذين منو لا راح يتأذون اخوج وامج منو ويبقون حسرة عليهم الفلس لحد ما يموتون 

بس الله اختارلج انو يموتون هم بالبداية ويبقى ابوج علمود يصرف عليج ويهتم بيج بس شاء الله انو يخلص عمرو هو هم وتبقين انتي 

بس من فضل الله عليج انو توفى ابوج هنا يمنا مو يم الشيخ ذاك جان هسا بس الله يعلم بحالتج خصوصا ان ابنو جان يكره ابوج 

وهذا الحجي مو معناها احنا مسوين فضل عليج بالعكس انتي مسوية فضل علينا انو تخلينا نساعدج ونحسبج وحدة مننا وبينا 

فمختصر كلامي يا ماما حاولي تصبرين وتتوكلين على الله علمود ربنا يخفف عنج من الشي الي انتي بيه واحنا راح نكون وياج دائما 

بس هسا گليلي قبل ما نعرف بوجودج جنتي ملتزمة بصلاتج لو لا 

- اي جنت ملتزمة 

- لعد هسا ارجعي لصلاتج لان هي الرابط بينج وبين ربج ومن تقطعيها معناها قطعتي الرابط وهالشي غلط وخصوصا بهيج ضرف 

وحاولي تقرين قران وشوية شوية ربنا راح يخفف عنج بس مثل ما گلتلج تلتزمين بصلاتج وقراءة القران 

- اريد ازور بابا وماما وباسم 

- من عيوني بس يجي تميم اشوف ايمتى يگدر ياخذنا ونروح اني وياج 

- تمام 

زيد : ولج اية العگروگة 

اية : ولك لا تجييييي زييييييد 

زيد : شبيج وجه الللللل........ اسف ورجع 

ياقوت : اني من سمعت صوتو انداريت فورا علمود لا يشوف وجهي وهو خطية ما يدري بي بس من شافني فورا اعتذر وطلع 

الحجية : فلا يعقل هالعجي هذا 

اية : دائما يصخمها 

ياسمين : بخباثة .. عمة طلع عندنا عگروگة واحنا ما ندري 

الحجية : ههههههههه اي والله وشلون عگروگة حلوة 

اية : يمممممممة ولج ياسمين وربي اگوملج 

ياقوت : اني استرخص اروح اصلي 

الحجية : مرخوصة بنيتي الله يتقبل مقدما 

ياقوت : منا ومنج صالح الاعمال 

عفتهن متعاركات اية وياسمين بس يتشاقن ويا بعض ورجعت للغرفة وصليت بدون ما ادعي علمود ما اضعف مرة ثانية واقطع الصلاة 

على نص الصلاة اجت اية وهي معصبة لان جانن ياسمين وامها يصنفن عليها بسبب زيد واني من خلصت صلاة رفعت ايديني 

گلت اللهم عليك توكلت واليك انبت واليك المصير اللهم ارحم اهلي واجمعني بهم في الجنة وكن لي حافظا ووكيل يارب العالمين 

اية : تقبل الله 

- منا ومنج صالح الاعمال 

- شرايج احجيلج عن اهلي 

- ماعندي مشكلة 

بلشت تحجي عن عائلة ابوها وزوجتو الثانية بالبداية وبعدها حجتلي عن تميم اخوها وامها وياسمين زوجة تميم بس ما تسميها غير العوبة 

جانت اية من نوع البنات الفكاهية بس لان مقدرة ضروفي فما تگدر تبقى تسولف وتضحك لان ما يصير هي تضحك واني حزينة على بابا 

وجانت سوالفها كلش حلوة خصوصا ان لهجتها تختلف عن اهل بغداد فجانت لهجتها بالنسبة الي من صدگ تخبل اتمنى تبقى تحجي وما تسكت بس علمود اسمع لهجتها 

گضيت ذاك اليوم وياها وكلش ارتاحيتلها ووجودها وياي جان كلش مفيد الي لان ما بقيت اتذكر اهلي وابجي مثل كل يوم 

بس كالعادة قبل ما انام رجعت تذكرت اهلي وخصوصا بابا وما نمت الا مخدتي تبللت من دموعي وبهالاثناء جانت اية نايمة 

ثاني يوم گعدت الصبح جانو اية وتميم رايحين لدوامهم ولان ماعرف احد هنا نهائيا بقيت بالغرفة الى ان اجت ياسمين 

ياسمين : صباح الخير حبيبتي 

ياقوت : صباح النور 

- ليش گاعدة هنا لحالج تعالي يمنا اني وعمتي 

- تمام .. ومديت ايدي عالخمار 

- لا تلبسيه تميم بالدوام ويتأخر بين ما يجي 

- احتياط خاف احد يجي 

- اذا هيج لعد تمام 

- اخذتو وياي بدون ما البسو احتياط ان يجي احد مثل زيد البارحة فوجودو وياي احسن ونزلت وياها وكلش فرحت الحجية من شافتني نازلة ويا ياسمين 

من گعدت يم الحجية ياسمين عافتنا وراحت للمطبخ وطلعت تيلفونها الحجية وخابرت واحد واسمها تگول اي هاي يمي هسا 

جنت مستغربة تحجي ويا منو وانتظرت لحد ما خلصت اتصالها وگالتلي ها يمة شلون تحسين نفسج اليوم گلتلها الحمدلله 

- راح يجون هسا ابو تميم والحجي والحجية 

- شنو من حجي 

- اقصد جد تميم وجدتو 

- ليش يجون 

- ابو تميم والحجي گالو من تتحسين نريد نحجي وياها 

- بتوتر .. تمام .. ولبست الخمار فورا 

- لا تتوترين بنيتي ماكو شي 

- تمام .. تقريبا 5 دقايق ودخلو اول شي جد تميم وبعدو زوجتو وبعدها ابنهم الي هو ابو تميم سلمو وگعدو ويانا اني والحجية 

اول ما گعدو اجت ياسمين جايبة صينية الجاي ووزعتلهم وشاورتني گالت من يروحون احطلج ريوگ مو زين عليج الجاي بدون اكل 

الجد : شلونج بوية إن شاء الله احسن 

ياقوت : الحمدلله 

- شوفي بوية احنا نعرف ضروفج والله يشهد موت ابوج اثر بينا احنا هم لان جان من زينة الناس بس مكتوبلو يموت بذاك اليوم 

انتي حاليا وحدة منا وبينا والي يصير عليج يصير علينا وراح تبقين تاج على روسنا طول العمر إن شاء الله واحنا مسؤولين عن كلشي يخصج 

تريدين تبقين هنا يم ام تميم او تجين يمنا بالبيت الثاني انتي حرة البيتين مفتوحات الج باي وقت تحبين ونتشرف بيج وين ما تكونين 

واي شي تحتاجيه ام تميم يمج وامانة الله تنطيها خبر بكلشي تحتاجيه لان ما نريد نكون مقصرين عليج امام الله بدون قصد 

وبالنسبة لزيارة اهلج حتى اذا تميم ماعندو مجال اخذج براسي لاهلج ولبيت اهلج وتزوريهم وارجعج 

- من گد ما كلامو حلو انربط لساني ماعرف شجاوب بس كلامو من صدگ انطاني احساس براحة وطمأنينة مو طبيعية 

ياسمين : جدو ترا البنية خجولة وماتعرف شنو تجاوب لهذا ساكتة 

الجد : ههههههه زينة البنت هو الادب والخجل واني مو منتظر ردها هسا اني اريدها تسمع كلامي ومن تحتاج شي تنطينا خبر 

ياسمين : خلص جدو اني واية وياها دائما ومن تحتاج شي نگول لعمتي فورا 

الجد : الله يرضى عليج يا بوية ويجزيج خير 

الجدة : بس ما فهمنا ليش لابسة النقاب بالبيت 

ياسمين : ماعرف 

ياقوت : انتبهت لياسمين مثل الي اختصرت الكلام وما تريد تجاوب الجدة 

الجدة : ليش ساكتة 

ياقوت : بابا هيج يريد 

الجدة : وشنو ابوج ما يعرفنا علمود يخاف عليج مننا 

ياقوت : بابا لو يخاف علي منكم ما حطني امانة يمكم بس هو امرني بهالشي واني انفذ كلامو سواء عايش ولا ميت 

الجد : هذا الموضوع مو مهم هسا واذا ما هي تنزع النقاب بارادتها ممنوع ينفتح وياها الموضوع مرة ثانية 

ياقوت : شكرا عمو 

الجد : العفو بوية هسا اني رايح محتاجة شي قبل ما اروح 

ياقوت : سلامتك 

الجد : الله يسلمج .. ابو تميم تجي وياي 

الحجي : اي يابة جاي وياك 

الجدة : اني هم رايحة للبيت وياكم 

الحجية : شعندكم مستعجلين 

الجد : نروح للمضيف راح يجون الزلم بعد شوية 

الحجية : تمام 

ياسمين : بعد ما راحو .. تعالي ياقوت للمطبخ 

ياقوت : تمام .. رحت وياها اول ما دخلت للمطبخ گلتلها ليش جدتكم كأنها ضايجة مني 

........... 

ياسمين : بعد ما راحو .. تعالي ياقوت للمطبخ 

ياقوت : تمام .. رحت وياها اول ما دخلت للمطبخ گلتلها ليش جدتكم كأنها ضايجة مني 

ياسمين : لا حبيبتي مو ضايجة منج اصلا شنو شافت منج علمود تضوج 

- ماعرف حسيتها ضايجة 

- شوفي جدتي بيها طبيعة ما تنطي مجال للشخص الغريب اذا ما تتأكد انو زين 100% وتبقى حذرة منو لحد ما تتأكد منو 

فانتي بالنسبة الها حاليا غريبة لان بعدها ما تعرف عنج شي بس اكيد من تعرفج راح تحبج كلش وراح تتأكدين شگد هي طيبة وحنونة 

- متأكدة من كلامج 

- اي ليش اكون مو متأكدة 

- لان من حجت وياج فورا اختصرتي الموضوع وسكتي 

- ها اي اقصد لا حبيبتي متوهمة 

- تمام 

حسيتها ارتبكت بس ما حبيت اركز بالموضوع بس اني ما سويت شي يخليها تكرهني وإن شاء الله ما يصير شي وياي الي صار وياي كافي 

بعد الريوگ اجت الدكتورة فحصتني وگالت متحسنة بس بعد سوء التغذية مو رايح لان اكلي قليل ومو بايدي مجرد اكل كم لگمة تنسد نفسي 

بس المهم انو بالوقت الحالي دا اكل واخذ علاجي فحتى لو قليل يبقى احسن بالف مرة من عدم الاكل وهي نصحتني انو اكل بشكل اكبر 

وخطية اهل تميم يحاولون دائما يسوون اكلات دسمة علمود تفيدني وترجعلي عافيتي وماعرف ليش حبيت انو التقي بالدكتورة النفسية مرة ثانية 

رغم مو حابة احجيلها عن وفاة اهلي بس حسيت نفسي محتاجة اگعد وياها لان وجودها ذيج المرة كلش فادني وكلش ارتاحيت من حجيت وياها 

جان نظام اهل تميم بالغدا ما يتغدون لل 2 تقريبا لحد ما يجي تميم واذا يتأخر هواي ينطيهم خبر علمود ما ينتظروه عالغدا 

اني بذاك اليوم بقيت ويا ياسمين لحد ما رجعت اية ورحت وياها للغرفة لحد ما اجت ياسمين جايبة الغدا النا اني واية لان ماگدر انزل بوجود تميم 

صحيح انو ياسمين مو مجبورة تخدم اية بس هن يتعاملن ويا بعض اكثر حتى من الخوات بحيث يحبن بعض حب مو طبيعي 

وياسمين تعتبر هاي الاشياء طبيعية واية اصلا جانت ناسية موضوع الغدا لهذا مانزلت جابت قبل ما تجيبو ياسمين النا 

مر الوقت وبعد صلاة العصر جانت اية دا تدرس واني گاعدة بصفحة وصافنة واندگ الباب گالت اية ادخل ودخلت الدكتورة النفسية 

مجرد شفتها حسيت بفرحة داخلي لان جنت متشوقة للگعدة وياها سلمت علينا واية ترخصت وراحت وگعدت گدامي الدكتورة 

الدكتورة : ها شلون صرتي 

- الحمدلله بفضل الله ثم فضلج كلش زينة 

- الفضل لله نفذتي الوعد الي اتفقنا عليه 

- اي نفذتو 

- عاشت ايدج ها شتشوفين نفسج مستعدة تكمليلي لو لا 

- ماعرف من اتذكر الموضوع اخاف كلش 

الفصل الواحد والعشرون من هنا 

شكرا لزيارتكم عالم روايات سكيرهوم